Modestius dit : cil à qui aucunne chose est promisse est autresi comme demanderres, et cil qui la promet est autresi comme deteurs [161vB].

Jabolenus dit : quant dui ont promis uns meismes deners, ou il sont promis à .ii., il sont par droit tuit deu à chascun de cez à qui il furent promis, et chascun de cez qui les promist les doit toz. Et por ce, se li uns les demande et reçoit, li obligemenz faut.

Ponponius dit : se dui prometent une chose et l’en lor demande : « prometez vos ce ? », et chescun respont : « je le promet – ou nos le prometons », il sont par droit obligié.

Julians dit : nus n’est qui ne sache que autrui besoigne puet etre promisse et pleige donc en cel obligement. Et por ce, rien ne deffant que une meisme chose ne puisse estre promisse à deus, ou que deus ne puissent prometre une meisme chose ; si comme se dui home metent en convenant que uns fevres lor face une meisme besoigne, ou dui fievre d’un meisme san prometent à fere à un home une meisme chose.

Ulpianus dit : quant dui prometent une meisme chose l’en crient por nient que il n’i ait renovelement. Car, ja soit ce que li uns respont avant et li autres aprés, l’en doit dire que il sont anbedui obligié, et li derreniers obligemenz ne tost pas le premier ; car il a po de difference se il prometent ensenble ou chascuns par soi desque il ont corage que il soient anbedui obligié, ne il n’i a point de renovelemant. ¶ {1} Quant dui ont promis une meisme chose, ele puet estre demandee à chescun ; car ce est la droiture de deus qui prometent une meisme chose que chascuns soit obligiez par tot et l’en la puisse demander à l’un et à l’autre. Neporquant, l’en en puet demander à chescun sa partie, autresi comme nos poons demander au detor et au plege tote la dete poons nos fere en cest quas ; et se li uns paie, li autres est quités. Et autresi, se une meisme chose est promise à deus ensenble, se ele est paie à l’un, li autres ne la puet puis demander.

Julians dit : se je voill que dui prometent une moisme chose et je la demant à chescun et li uns seus me respont, je croi que cil seus est obligiez à moi ; car ce qui est demandé en tel maniere n’oblige pas les deus se li uns respont seus. ¶ {1} Et se dui ont promis une meisme chose, je ne dot pas que il ne loisse à celui à qui il ont promis à prendre plege de l’un et de l’autre, ou de l’un tant solement. {2} Mes se dui demanderent à un seul aucunne chose et il la [162rA] promist à l’un, il n’est tenuz fors à lui. ¶ {3} Dui poent estre obligié à une meisme chose, ja soit ce que il ne respoingnent pas ensenble à la demande que leur est fete ; car l’espace do po de tens, qui n’est pas contraire à l’obligement, ne tout pas que il ne soient anbedui obligié. {3} Et se l’en demande à aucun se il sera pleige ainz que li dui aient respondu et il dit que oïll, il ne senble pas que li obligemenz soit enpeechiez, car il n’i a pas longue espace ; ne chose n’i est pas fete qui soit contraire à l’obligement.

Florencius dit : se dui prometent une meisme chose, li uns puet estre obligz porement et li autres soz condicion ; ne la condicion ne tost pas que la chose ne soit demandee à celui qui est obligiez porement.

Ulpianus dit : se je baille une meisme chose à garder à .ii. homes por ce que je me fioie en l’un et en l’autre, ou je prestoi à .ii. une meisme chose, il sont anbedui obligié à moi. Et autresi est il en autres marchiez, si comme en achat et en loage et en vente et en testamant et en chose prestee ; en testamant, si comme se pluseur sont fet hoir et cil qui a fet le testamant dit : « Tyces et Menes doigent à Seprone .x. livres ». {1} Mes se aucuns baille sa chose à garder à deus, et il met en convenant que li uns soffre le peril de totes les aventures, il n’i sont anbedui tenu desque li obligemenz n’est o aus ; mes il n’est pas issi quant li perilz est sus anbedeus ; mes se convenanz est puis fez par quoi li uns soit quitez des periliz, la darreniere convenance ne puet pas müer l’estat et nature do premier obligement par quoi li dui furent obligié au commoincement. Et por ce, se il sunt compoignon et aucuns domages est avenuz en la chose par les colpes à anbedeus, li convenanz qui est fez à un vaudra à l’autre.

Cil moismes dit : se li dui qui ont promis uns meismes deners ne sont pas compoignon, ce que cil à qui il les promistrent doit à l’un deners ne vaudra rien à l’autre.

Cil moismes dit : quant dui ont promis une meisme chose, li uns puet bien estre pleige por l’autre. Et cil à qui i l’ont promise porra bien depecier s’aucion se il velt, mes il ne doit pas estre contrainz de departir la. Et cil qui est plege por l’autre puet estre trez en cause por lui ou les puet trere en cause anbedeus. ¶ {1} Por ce que il a esté compris es tables do testamant que .c. dener ont esté promis à celui ou à cel autre, ne il n’i a pas esté [162rB] ajoint que il soient tuit promis à chascun, il senble que la moistié en soit promise à chascun. {2} Et encontre ce, quant l’en trove issi escrit : « je Antoines et je Archelaies et je Corniell avons promis à celui .c. livres » et n’i est pas ajoint que chascuns soit tenuz par tot, la promesse doit estre departie entre els par iveies parties.

Genulcius dit : se l’en demande à deus une meisme chose et li uns la promet maintenant et li autres la promet le jor enprés, l’en ne doit pas entendre que cil soit obligiez qui la promist darrenierement ; car li demanderres fist assez autres besoingnes entre les deus responses. ¶ {1} Se aucuns fet convenance à Tyce et à un orfelin sanz l’autorité à celui qui l’a en garde que il doignent une meisme chose, Julians escrit que Tyces est obligiez toz seus ; ja soit ce que se uns sers promist à Tyce, l’en doit garder à li par l’aucion de son chetel, autresi comme se il fut frans.

Cil meismes dit : se uns de cez qui ont promis une meisme chose est hoirs à l’autre, l’en doit dire que il reçoit seur lui deus obligemenz.

Paulus dit : qui se poent obligier ensenble as choses qui sont promisses par le prevost.

Gaius dit : se l’en entant que ce qui est promis à moi et à Tyce soit propre en la persone à chescun de nos, il ne pot estre rendu à chascun de nos, si comme quant usaires nos est promis ou aucunne chose par non de doere ; et issi escrit Julians.

Cil moismes dit : se une meisme chose a esté promise à deus et li uns en a pledié et cil qui la promist l’offre à l’autre, il ne fet rien.

Paulus dit : se il a esté commandé par non que certaines persones à aucuns des heirs paient un lés, ou que tuit le paient fors uns qui en est exceptiez, Accelicinus et Sabins et Cassius dient que il doivent les lés selonc les parties que il ont en l’eritage, car li heritages les oblige à paier le tot ; autresi est il quant tuit li heir sont nommé.

Ponponius dit : se dui ont promis un moisme serf, li fez à l’un nuist à l’autre.

Cil meismes dit : quant dui doivent uns moismes deners, se li uns est envoiez en essil li autres n’est pas delivrés de l’obligement ; car il a moult grant difference se li denier sont paié ou se la persone à un deteur est delivré par aucun cas. Car se la persone est delivree tant [162vA] comme li obligemenz dure, li autres remaint obligiez ; et por ce, se la commune de feu et d’eve est defendue à aucun, li pleges qui estoit obligiez n’est pas delivrés.

Julians dit : quant sers fet convenance il n’a point de difference se il la fet en son non ou el non son seignor, ou à l’un et à l’autre ensenble. ¶ {1} Se tes sers qui me servoit par bone foi avoit chetel qui apartenoit à toi et je preste à Tyce de cez deners, il seront tuen. Et se li sers fet convenance que cil me soient rendu, il ne fet rien ; mes tu le porras bien avoir se tu les chalonges. ¶ {2} Se li sers qui est comuns à moi et à toi preste deners do chetel qui n’apartient fors à toi, il n’aquiert pas à moi l’obligement. Et se il met en convenant que il soient rendu à moi par non, il ne delivre pas le deteur de toi ; mes li uns et li autres de nos avra auction, je por la convenance et tu por ce que ti denier furent presté. Neporquant, li deteurs me porra mestre arriere par excepcion de tricherie. ¶ {3} Se mes sers fet convenant que une chose soit donee àà] a a dans le ms. mon autre serf, autretant vaut comme se il feist convenant à moi moismes. ¶ {4} Li communs sers sostient la persone as ses deus seignors. Et por ce, se mes propre sers fet convenance que une chose soit bailliie au serf qui est communs à moi et à toi, il sera autresi comme se deus convenances i fussent fetes, l’une en ma persone et l’autre en la toe. Ne nos ne devons pas cuider que la moitié en soit aquise à moi et l’autre ne soit de nule valeur ; car la persone au serf commun est de tel condicion que en ce que li uns de ses seignors puent aquerre et li autres ne puet pas aquerre, tot est à celui seul qui puet aquerre. ¶ {5} Se li sers en coi aucuns a l’usaire a fet convenance que une chose soit rendue à celi qui en a la proprieté, se ce est de la chose à celui qui en a l’usaire, la convenance ne vaut rien ; car cil qui a la proprieté ne puet pas aquerre auction par la chose à celui qui a l’usaire. Mes se uns autres eust le convenant fet, il peust demander proprement. Et se celui qui promist paie à celui qui a l’usaire do serf, il est quités. ¶ {6} Se li sers qui estoit commun à Tyce et à Meve fet convenance en ceste maniere : « tu promez à donner à Tyce .x. livres as kalandes de marz ; et se tu n’i li donnes, lors tu promz [162vB] à doner à Meve .xx. livres » ; il senble que ce sont .ii. convenances. Me se les .x. livres ne sont donnees à Tyce as kalendes de marz, li uns et li autres des seignors porra pledier par la convenance ; mes por ce que li segonz obligemenz est fez à Meuve, Tyce sera mis arriere par excepcion de tricherie.

Ulpians dit : li sers qui est communs à deus seignors ne puet pas fere convenant à l’un que il soit toz à l’autre ; car il ne puet pas aquerre à son seignor lui meismes, mes l’obligement de lui.

Cil moismes dit : se li sers à la chose commune ou cil au université fet convenace, je croi que la convenance vaut.

Cil meismes dit : se li sers comuns à .ii. seignors velt que une chose soit donnee à lui et à .i. de ses seignors, autretant vaut comme se il feist convenant que ele fut donnee à ses deus seignors.

Cil moismes dit : li sers qui est communs est si à toz ses seignors que il n’est pas toz à chescun, mes chascun i a sa partie ; si que eles ne sont pas devisees, ainz i sont plus par entendement que par cors. Et por ce, se il aquiert aucunne chose, il aquiert à chescun selonc la partie que il a en lui. Et li loit à fere convenance ou aquerre el non à un d’els ‹...› se il li commande, et nos usons de ce droit, que il aquiere à celui par seul par cui amendement il aquiert.

Ponponius dit : Offilius disoit par droit que se li sers comuns preste ou baille en garde aucunne chose par le commadement à un de ses seignors, il aquiert auction à celui seul par qui commandemant il le fet.

Ulpians dit : et por ce, se uns sers à .iiii. seignors et il fet une convenance par le commandemant à deus, il n’aquiert auction fors à deus qui li commanderent ; et non pas ivelment mes selonc les parties que il ont en lui. Autresi croi je se il a fet convenance el non à deus ; car se il a fet convenance par le commandemant à toz, ou en leurs nons, nos ne dotons pas que il n’aquiere à aus toz, non pas ivelment mes selonc les parties que il i ont en lui. ¶ {1} Se li sers comuns a fet convenance à un de ses seignors, se il la fet en non d’un des autres, ce qui est promis est deu à celi seul en quel non il la fist. Mes se il fist porement sanz nommer nul de ses seignors, il en aquiert à toz ses seignors leur parties, fors à celui qui li promet la chose, et non pas ivelment mes selonc les parties que il ont en lui. ¶ Et fit convenant par le commandemant à .i. de ses seignors, il est autresi comme nos avons dit quant il l’a fet en son non. ¶ Il plet à Julians que il aquiere aucunne foiz à un seul de ses seignors, ja soit ce que il n’a fet la convenance ne par son commandemant ne en son non ; si comme quant l’en li promet aucunne chose qui ne puet pas estre a[163rA]quise à toz seignors. Et ce avient quant l’en li otroie voie à aller au champ qui est à un de ses seignors, car lors aquiert il le servise à celui seul.

Gaius dit : se li uns de ses seignors velt prendre fame et li doaires est promis à ce serf.

Ulpians dit : se li sers qui est amené et à Tyce fet tel convenant que un sers li soit donnz, qui est toz à Tyce, il aquiert tot à celui à qui il n’estoit pas ; car ce que il ne puet aquerre à l’un de ses seignors apartient tot à celui à qui il puet aquerre. {1} Et se uns sers qui avoit .ii. seignors fet tel convenance : « tu promez à donner à celui ou à celui qui sont anbedui mi seignor », Cassius dit que la convenance ne vaut rien ; et Julians s’i acorde, et de ce droit usons nos.

Julians dit : et se il dit issi : « tu promz à donner à Tyce .x. livres ou à Meue un champ » ; por ce que il n’est pas certaine chose auquel il aquiert l’auction, la convenance ne vaut rien.

Ponponius dit : se li sers qui est communs à moi et à toi fet convenence que l’en li otroit voie ou charriere par un champ, et il ne nomme ne moi ne toi et je ai un champ d’elz, il aquiert à moi seul la voie ou la charriere.

Cil meismes dit : se li sers qui est communs à moi et au chastel, que li fiz qui estoit en bail aquist par chevalerie, qui est morz, fet convenance ainz que cil de qui il a fet son hoir reçoive l’eritage, tote la convenance est aquise à moi que ai dedanz ce tote la seignorie de lui ; et cil qui n’est encore pas hoirs n’i a point de part. ¶ {1} Se li sers qui est communs à Tyce et à Meue met en convenant que la partie qui est Meue li soit donnee, la convenance n’est nule ; mes se il eust fet tel convenant que ele fust donnee à Tyce, ele fust aquise à Tyce. Et se il eust dit tant solement que la partie Meue fust donnee et il n’eust nommé ne soi ne autre, la partie Meue fut à cestui à qui ele peust estre aquise. ¶ {2} Uns sers fist convenance que une chose fust donnee à son seignor, qui estoit en chetivoisons ; et ja soit ce que ce qui li est promis simplement ou ce que il reçoit d’autre apartient à l’oir à celui qui est en chetivoison ; et il est autrement en la persone au fill qui n’aquiert pas à son pere qui est en chetivoison ce que l’en li promet, ne tant comme il est en la poesté son pere et aprés. Neporquant, l’en puet demander en ce cas savoir mon se il senble que nule chose li soit aquise à l’oir par ceste convenance, ne plus que se li sers d’un heritage eust fet convenant que une chose fust donnee au mort ou à celui qui devoit estre hers. Mes en ce cas li sers est oelmz au [163rB] fill ; car se li filz à celui qui est en prison fet convenance que une chose soit donnee à son pere, la chose sera en croele. Et se li peres muert en la chetivoison, la convenance ne sera de nule valor, car il n’a pas fet convenance por soi mes par autre. ¶ {3} Se li sers en coi aucuns a l’usaire s’est aloez jusqu’à un terme et l’en li a promis chescun an à poier un certain pris, l’aucion apartendra à celui qui a l’usaire, tant comme li usaires durra. Et quant il sera failliz, il apartendra à celui qui en a la proprieté. Et issi l’escrit Julians, et ceste sentence me senble veraie et tenable, car chescuns n’aquiert fors ce que reson li otroie. Et se cil meisme serf fet tel convenance : « tu me promz à doner tant comme je te donroi dedanz tel terme », il est en dote qui avra auction por cele convenance. Car se il baille ses deners à celui qui en a l’usaire ou de son gaing, l’aucion sera aquise à celui qui en a l’usaire ; et se il baille de cez à celui qui en a la proprieté, l’aucion sera à lui.

Senulcius dit : se uns sers communs fet tel convenance : « tu promez à donner es kalendes de genvier .x. livres à Tyce ou à Meue mes seignors, ou à celui qui lors vivra », Julians escrit que la convenance ne vaut rien ; car la chose est en crole, ne il n’apert pas au quel li obligemenz est aquis.

Heraces dit : li sers ou aucuns a l’usaire ne puet fere convenance o celui qui en a l’usaire de la chose son seignor ; mes il la puet bien fere à son seignor de la chose à celui qui a l’usaire.

Paulus dit : ce moisme doit l’en dire de celui à qui li usages est lessiez.

Heraces dit : se li usaires est à .ii., ce que il aquiert est à celui de qui chose il aquiert.

Renulcius dit : se li sers d’un heritage fet une convenance et il en prant pleige et li heritages est receuz aprés ce, l’en dotoit se li termes doit estre contez des le jor que la convenance fut fete, ou des ce que li heritages fut receuz ; autresi demande l’en se li sers à celui qui est en chestivoisons a pris pleige. Et Cassius dit que li tens doit estre contez des lors que l’en pot pledier, ou en ce est desque li heritages fut receuz, ou desque cil est venuz de cheitivoisons.

Paulus dit : se li sers qui est communs à .ii. seignors fet tel convenant : « tu promz à donner .x. livres à Tyce mon seignor, et cez meismes .x. à Meue mon autre seignor », nos dirons que il sont dui à qui une meisme chose [163vA] est promisse.

Cil moismes dit : li sers qui fet convenance en non d’autre que de son seignor, n’aquiert pas à son seignor l’obligement.

Cil moismes dit : se li sers de coi aucuns a l’usaire, ou que il porsiet par bone foi, fet convenance es causes par coi obligemenz ne selt pas estre aquis à eles, il aquiert à son seignor. Mes nos ne dirons pas ce se leur non fut mis en la convenance.

Jabolenus dit : se uns sers fut franchiz en testamant et il ne savoit pas que il fut frans, et il se tenoit en l’eritage, et il mist en convenant que dener fussent paié à jor, il n’aquiert rien à l’oir se li hers sot que il fut franchiz el testamant ; car il ne puet pas dire que il soit par droit sis sers desque il savoit bien que il estoit frans. ¶ Il n’est pas issi do franc home qui a esté achetez et sert par bone foi ; car en celui cuident il et li acheterres une meisme chose. Mes l’en ne puet pas dire que cil qui siet bien que il est frans le tiegne par droit, ja soit ce que il moismes ne set pas sa condicion.

Modestinus dit : sers d’eritage fera par droit convenance el non de l’eritage et de celui qui doit estre heirs.

Cil moismes dit : quant li sers en coi aucuns à l’usaire fet convenance el non au seignor de la proprieté do chetel à celui qui a l’usaire ou par sa poine, il aquiert au seignor de la proprieté ; mes il convient enquerre comment cil qui a l’usaire puet recovrer le suen de celui qui a la proprieté. Et se autrui serf nos sert par bone foi, et il aquiert el non son seignor ce que il puet aquerre à nos, il aquiert à lui sanz nule dote. Mes voions comment nos le porrons recovrer ; et ce que Gaius dit n’est pas sanz reson, car l’en puet demander arriere au seignor en l’un et en l’autre cas.

Cil meismes dit : tuit li marchié que sers fet tant comme il nos sert, ou totes les convenances que il fet, sont aquises à nos ; car il estoit en nostre poeté quant il les fist. Autresi est il se li filz qui est en baill fet marchié ; et ce moismes dont il a donné respit tant que il soit mis hors do baill, se il l’a fet par tricherie.

Ponponius dit : plege peut estre donz por toz obligemanz.

Cil moismes dit : plege puet estre pris de chose prestee et de chose ba[163vB]llie en garde ; et il est tenuz neïs se la chose est prestee ou baillie en garde à un serf ou à un orfelin, se cil por qui li plege est donnz i ont fet aucunne chose par tricherie ou en lor corpes.

Cil meismes dit : plege puet estre pris de l’auction que je puis avoir contre celui por qui ge sui plege ou de l’auction de commandemant ou de besoignes fetes. ¶ {1} Li plege est obligiez et lesse son plege obligié por ce que il est en leu de deteur.

Cil meismes dit : Julians dit generalment que cil qui est heirs à celui por qui il estoit plege est delivrez de la plevine por l’eritage qui li est escheez et est tenuz comme hoirs au deteur. Et il escrit que se li plege heirs est à celui por qui il est plege, il est tenuz comme deteur. ¶ Mes quant uns deteurs est heirs à un autre, il est obligiez por deus causes ; car l’en ne puet pas voer li quex obligemenz destroit l’autre, mes l’en le voit bien au detor et au plege, car li obligemenz de la chose est plus pleniers que cil de parole. Et la où il i a aucunne difference d’obligemant, l’en puet dire que li uns est destroiz por l’autre ; mes quant il n’i a point de difference, l’en ne puet pas voer li quex destroit l’autre. Ce n’est donc pas novele chose de dire que une meisme persone puet estre obligee par deus obligemanz ; se li uns des deteurs est donc heirs à l’autre il sostient deus obligemanz. Cil moismes dit : se cil à qui une chose est promise est heirs à un autre à qui une autre chose est promise, il sostient deus manieres d’obligemanz ; mes se il plede par un d’els, il pert l’autre, car la nature des deus obligemanz est tele que se li uns en est amenz en juigement, li autres faut.

Cil meismes dit : une chose me fut promise, quant je l’oi demandee ne je ne l’oi pas, je en voill avoir plege. Se je en ai plege, li plege est obligiez. {1} Et il a pou de difference se li plege est obligiez porement ou soz condicion. {2} Et plege puet estre pris por l’obligemant qui est passz ou qui est à venir, por quoi cil qui est à venir soit naturels.

Julians dit : se aucunne chose est paie qui puisse estre demandee arriere, plege puet estre pris de cest naturel obligement.

Julians dit : cil qui preste contre le consoil au senat au fil qui est en baill ne puet pas prendre pleige de son pere aprés la mort au fill ; car il n’a nule maniere d’auction contre le pere, ne il n’i avroit point d’eritage en qui non li plege peussent estre obligié.

Cil mo[164rA]ismes dit : plege est par droit pris el non de l’auction qui apartient por son chetel.

Cil moismes dit : se tu as presté à Tyce .x. livres par mon commandemant et tu en pledas à moi par auction de commandemant, Tyces sera pas delivrez. Mes je ne doit pas estre condampnz à toi se tu ne me donnes l’auccion que tu as contre Tyce ; et se tu pledes à Tyce, je ne seroi pas delivrez, mes je ne seroi obligiez à toi fors en ce que tu ne porras pas avoir de Tyce.

Cil moismes dit : quant cil qui a promis une chose est hoirs à son pleige, li obligemenz de la plevine faut. Se l’en li demande la dete comme à deteur, et il use d’excepcion qui apartient au pleige, replicacion seur le fet ou de tricherie vendra contre lui.

Cil meismes dit : se je ai promis une chose sanz cause et je en ai donné pleige, ne je ne vell pas que il euse d’excepcion mes que il la paiet, et il plet à moi par aucion de commandemant, excepcion doit estre donné à mon plege malgré mien ; car ce est plus ses preuz que il retiegne ses deners que ce n’est que il la paiet et puis le demant arriere. ¶ {1} Se tu as .ii. pleige de .xx. livres et li uns n’en paie que .v., li autres n’est pas delivrés. Et se tu velz demander à l’autre les .xv., tu ne seras mis arriere par nule excepcion ; mes se tu demades .v. au premer puis que tu en avras eu .v. et de l’autre .xv., tu seras mis arriere par excepcion de tricherie.

Cil moismes dit : li plege ne puent estre obligié à celui à qui li deteurs n’est pas obligiez. Et por ce, se li sers qui est communs à Tyce et à Sanprone fet convenance que une chose soit donnee à Tyce, et il prant plege en ceste maniere : « tu es plege que ceste chose sera donnee à Tyce ou à Sanprone ? », Tyces la porra demander au plege. Et la persone de Senprone n’i est mise fors por tant que l’en li puet paier ainz que li plez soit entammz sanz la sentence ou malgré suen. {1} Cil qui a promis à paier une chose en certain leu est aucun pou de plus dure condicion que cil qui l’a promise simplement ; car il ne puet paier en nul autre leu que en celui où il promist malgré à celui à qui il doit paier. ¶ Se une chose m’est deue porement et je pren plege à qui je di que il le me rendra en certain leu, li plege ne sera pas obligz. {2} Mes se cil qui estoit à Rome promist que il paie[164rB]roit aucunne chose à Capes et li plege dit à Ephese, li plege n’est pas obligiez, ne plus que se li deteurs eust promis soz condicion et li plege au terme ou porement. ¶ {3} Plege puet estre pris par tot la où il a aucun obligement, ou citein ou naturel, por coi il est donnz. {4} L’en n’apele pas obligement ce sanz plus por coi aucunne aucion apartient, mes quant li dener qui sont paié ne puent estre demandé arriere ; car ja soit ce que l’en ne die pas proprement que li naturel deteur doient, neporquant l’en puet entendre que il sont deteur. Et cil qui reçoivent deners d’aus reçoivent autresi comme leur detes. ¶ {5} Se nule chose est promise à terme et plege en est donz soz condicion, la droiture de la plevine est en crole, que se la condicion est acomplie devant le terme li plege ne soit pas obligiez ; ¶ et se ele avient au terme ou aprés, il soit obligiez. {6} Quant plege est pris en ceste maniere : « se Tyces ne paie les .x. livres que j’é li presté, tu es pleges que tu les pieras ? » ; il senble que ce a esté mis en convenant que se l’en les demande au deteurs et il ne les paie, li plege soit tenuz à paier les. Et se li deteurs muert ainz que l’en li demant, li plege est tenuz à paier ; car en cest cascas] car dans le ms. est il voirs que li deteurs ne paiera pas.

Cil moismes dit : l’en doit secorre as plege se que cil vers qui il sont plege soient contraint de doner à cez qui sont appareillié de paier la dete tote les aucions que il a vers les autres.

Cil meismes dit : l’en entant que cil qui atorne son detor done tant de deners comme il li doit. Et por se, li plege atorne son deteur vers celui, vers qui il est plege, ja soit ce que li deteurs que il li a donné n’a de quoi paier la dete, neporquant il puet mointenant pledier par aucion de commandemant à celui por qui il fut pleige.

Cil moisme dit : un sers fut plege por un home sanz le seu son seignor et paia deners par cele plevine ; l’en demande se li sires puet demander les deniers à qui il furent paié. Et la response est que il convient voier de coi il les paia ; car se il les poia do chetel qui estoit suens, li sires ne les puet pas demander arriere, et se il les paia des deners son seignor, il seront demandé arriere. Et se il plevi por cause qui apartenist à son chetel, ce que il paia des deners son seignor sera demandé arriere [164vA], mes ce que il paia de son chetel ne sera pas demandé.

Jabolenus dit : mes se li sers paie les deniers, il les porra demander arriere non pas à celui por qui li sers fut plege, mes à celui à qui il les paia ; car li sers ne puet estre obligiez par non de pleige. Donc ne puent il pas estre demandé à celui à qui il fut pleges, car il est encore obligiez, ne ne puet pas estre delivrez por le paiement de cez deners de coi li obligemanz n’apartient pas au serf.

Florentius dit : quant cil qui promist une chose est morz, plege puet estre pris de sa dete ainz que li heritages soit receuz, car li heritages est en leu de la persone.

Marcians dit : se je ai fet convenant que .x. livres soient paiés à moi ou à Tyce, Tyces ne puet pas prendre plege ; car il n’i est acompoigniez fors por tant que li denier puent estre paié à lui.

Marciaus dit : quant Tyces volt estre plege envers Senprone por Sei son frere, il li envoia tex letres : « se Sey mes freres te requiert, je te pri que tu li bailles deners et je en sui pleges ». Quant Senprones ot receu les letres, il bailla à Sey les deners ; aprés ce, Tyces fist Sey son frere son heir de la tierce partie de son heritage. Por ce que l’aucion de la plevine est donc faillie par deners, la tierce partie de l’eritage que Sey a, je demant se Senprones puet pledier as autres oirs por tote la dete. Et Marciaus respont que il puet pledier à chescun fors por tel partie comme il a de l’eritage. ¶

Cil meismes Marciaus escrit que se aucuns est plege por l’orfelin qui est obligiez sanz l’autorité à celui qui l’a en garde, ou por le fol despendeur ou por le forsené, il est melz que l’en ne li secorre pas ; car aucion de commandemant n’apartient pas à cez.

Gaius dit : li obligemenz n’est pas departiz par droit entre les plege selonc les letres à l’enpereor Adrian. ¶ Et por ce, se aucuns des plege muert sanz oir ainz que sa part de la dete li ait esté demandee, ou il torne à povreté, sa partie est sus les autres.

Paulus dit : se li uns des pleges dit que li autres ont assez de coi paier, cele excepcion li doit estre donnee, ja soit ce que il n’ont de coi paier.

Cil moismes dit : se une chose m’est promisse soz condicion qui ne puet avenir, plege n’en puet pas estre pris. [164vB]

Gaius dit : chescuns puet estre pleges por autre, ja soit ce que li deteurs n’en sache rien.

Ulpians dit : li plege ou li autres qui a paié au creancier ainz le terme doit atendre que li termes soit venuz ainz que il demant rien au deteur.

Cil meismes dit : se je avoie demandé à Tyce un serf et il avoit doné plege de tot le plet et il le franchi et il fist de lui son hoir, se il estoit veroiement suens, l’en doit dire que li plez est seur lui ; et se il ne sofre que ce ne soit fet, il a brisié la convenance. Mes se il estoit miens et il reçut l’eritage sanz mon commandemant, li plege seront tenuz por le plet qui n’est pas deffenduz ; mes se il a reçu par mon commandemant, la convenance faut. Et se il fut miens, et le porloignai à fere le recevoir l’eritage, tant que je eusse veincu le plet, et je vell dedanz ce pledier por la cause qui n’est pas deffendue, la convenance n’est pas brisee ; car nus bons hons ne le juigeroit.

Modestius dit : se il plede contre le pleige, nule aucion ne li doit estre donee. Autresi est se dui sont plege d’une meismes quantité, et li creanciers plede à l’un d’els tant que il paie tote sa dete, ne il ne li donne pas les aucions que il a contre l’autre ; car li autres ne sera trez en cause ne par le creancier ne par celui qui a paié.

Cil moismes dit : se plege sont pris por ce que cil qui a esté en garde ne porra avoir de son procurator, et quant li enfes ot acompli leal aage, il peust avoir en tote sa dete ou do procureor ou de ses oirs ; me s’il la lessa à demander tant que li oir n’orent de coi paier, aucion li apartient par droit contre les pleges. {1} Cil meismes dit : que se uns des pleges est condempnz à paier tote la dete, quant l’en commoincera à pledier à lui par aucion de chose juigee, il porra requerre que les auctions li soient donnees contre les autres pleges.

Cil moismes dit : quant dui sont deteur, se plege est donnz par anbedeus ou par un seul, il est par droit pris.

Jabolenus dit : se je praigne eissi pleges, que je avrai mil muis de froment por .x. livres que je prestai, li plege n’i est pas tenuz ; car plege ne puet estre obligiez por autre chose ne por cele qui est prestee ; car l’en ne doit pas proisier denersdeners] deners ses dans le ms. à danrees autresi comme danrees à deniers. [165rA]

Ponponius dit : se je fis à Tyce une convenance et je en pris un plege, et je fis aprés convenance à un autre de cele meisme chose et je en pris un autre plege, il ne seront pas compoignon de la plevine ; car il sont plege de diverses convenances.

Scevola dit : uns hons fu pleges por un autre qui avoit deus chans venduz ; et por ce que li uns en fu chalongiez, li acheterres tret le plege en cause et fut condempnz en une certaine quantité. L’en demande se il puet pledier à l’oir au vendeor devant que il soit contrainz de fere la chose juigee. Et la response est que il en puet bien pledier ; car il apartient por droite cause à l’ofice au juige que li pleges soit deffenduz ou que il soit delivrez.

Paulus dit : se li deteurs a deservi à estre envoiez en essil, plege ne puet pas estre pris por lui, ce dit Julians, autresi se li obligemanz fut failliz contre lui. ¶ {1} Se li filz qui est en bail prant eissi plege por cause de son chetel : « tu pleviz toz les deners que je prestai à cestui », et il les preste aprés ce que il est hors do bail, li plege n’est pas obligiez à son pere, mes il est obligiez au fil por humanité.

Cil moismes dit : se uns creanciers est hoirs à son deteur d’une partie de son heritage et cil qui est sis plege est oirs de l’autre partie, li obligemanz de la plevine faut por tel partie comme li creanciers a de l’eritage, et li obligemanz est saus por l’autre partie. Mes ce n’est pas par la reson de la plevine mes de l’eritage, car li greigneurs obligemanz est ‹...› le meneur.

Paulus dit : se li creanciers qui avoit pris plege por ce que il avoit presté est deceuz à prendre gage, il puet pledier par aucion de gage. Et en cele aucion vendra tot ce qui apartient au creancier, mes il n’en porra pas chargier le plege ; car il n’est pas obligiez por le gage mes por les deners qui sont presté.

Cil moismes dit : se je faz tel convenant à Sey : « tu me promez à rendre toz les deners que je prestai à Tyce quant que ce soit », et je en praing pleges, et je preste aprés à Tyce deners par pluseurs foiz, Sey est obligiez por quant que je li preste, et li pleges autresi ; et ce qui puet estre eu de ses biens doit valoir à toz ivelmant.

Scevola dit : li plege ne puet estre trez en cause devant que li deteurs doie.

Paulus dit : se cil qui a baillié son champ a un coitiveor et en a pris plege, il i a une conve[165rB]nance de pluseurs penssions ; et por ce est il plege obligiez en totes les penssions. ¶ {1} Quant li principaus deteurs aloigne l’obligemant par son fet, li obligemenz au plege dure si comme se li deteurs demore à rendre un serf et li sers muert.

Scevola dit : quant li deteurs est delivrez de son creancier si que la dete remaint en sa nature, li plege remaint obligiez ; mes quant li obligemenz se remue par droiture de renovelement, li plege doit estre delivrez ou par droit ou par excepcion.

Paulus dit : se il fut mis en convenant si comme l’en propose que li denier qui furent presté seroient rendu en Lonbardie, l’en doit entendre que li plege se obliga à ce.

Scevola dit : se li plege amoneste au creancier que il contraigne le deteur d’aquiter soi, ou que il vende les gages, et li creanciers ne le volt fere, l’en demande se li pleges le puet deffendre do creancier par excepcion de tricherie. Et l’en respont que nenil.

Cil moismes dit : tex convenanz fu fez entre une creanciere et son deteur, que se .c. solz que ele li prestoit ne li estoient rendu la où ele les demanderoit premerement, il li liroit à vendre dedanz certain tens les aornemenz que il li bailloit en garde. Et se il estoient moins vendu que l’en ne li devoit do chetel et d’usures, il li rendroitrendroit] rendroir dans le ms. le seurplus ; et de ce li dona il plege. L’en demande se li pleges puet estre obligiez por tote la dete. Et la response est que selonc les choses qui sont proposees, li pleges n’est tenuz fors en tant comme li gage seront vendu mains que la dete.

Hermogenes dit : li plege qui offri à celui qui avoit mains de .xxv. anz lés dont il estoit plege, et les seela et les mist en garde en un commun leu por poor d’anterine restitucion, puet maintenant pledier par aucion de commandemant contre celui qui li mist en plege.

Cil meismes dit : autresi comme li principaus deteurs n’est pas obligiez se il ne promet par sa persone, n’est pas li plege obligiez se il ne promet à paier ou à fere aucunne chose. Il ne doit prometre que li principaus deteurs paiera ou fera aucunne chose, car l’en ne doit pas fere promesse d’autrui fet.

Paulus dit : se autrui sers a esté plege por Tyce et il l’a paié, Tyces est delivrez se li sires au serf velt pledier à Tyce por aucion de commandemant ; car desque [165vA] il en plede à lui, il otroie le paiement.

Cil meismes dit : que tu as usé de l’excepcion que te devoit valoir et tu as esté condempnz par le tort au juige, cil por qui tu estoies plege ne te rendra rien par aucion de commandemant ; car il est melz que li torz qui t’a esté fez remaigne sus toi que sus autre se tu donas en ta corpes cause d’estre condempnz à tort.

Gaius dit : li plege qui est obligz soz ceste condicion : « se ma nef ne revient d’Ase », est senblable à celui que je ai pris en plege tant comme il vivra et je li quitai ainz que la condicion avenist. Se il muert donc ainz que la condicion aveigne, je puis maintenant demander au deteur ; car quant la condicion avindra, ele ne porra pas fere l’obligemant en la persone à celui qui i a esté morz ne confermer la quitance.

Paulus dit : quant uns procurators pledoit por une chose, il donna caucion que ses sires avoit la chose estable. Et quant il ot esté vaincuz, ses sires vint aprés, si commoinça à pledier de cele meisme chose ; et li deffenderres avoit la possession de la chose, si ne la volt rendre, et por ce il fut condempnz à grant chose ; li plege ne seront pas puis tenu à lui, car ce que il paie por sa paine ne doit pas estre sus les pleges.

Ulpians dit : renovelemanz est translacion ou remuemanz de la premere dete en autre obligemant ou citeian ou naturel ; ce est quant la premere cause est ostee et la novele est establie. Renovelemanz est apelz de noveauté, c’est de novel obligemant. ¶ {1} Il ne convient pas garder quex li premers obligemanz fu ou citeians ou naturex ou par le prevost, ne se il est fez par chose ou par lés ou par consentemant. Quelsque li premers obligemanz soit, donc il puet estre renovelez par paroles por que cil qui vient enprés soit tenables ou citeinemant ou naturelemant ; si comme se l’en promet à l’orfelin aucune chose sanz l’autorité à celui qui l’a en garde.

Cil moismes dit : totes choses puent venir en renovelemant ; car toz marchiez qui est fez ou par paroles, ou sanz paroles, puet estre renovelz et venir en obligemant de paroles. Mes nos devons savoir que renovelemanz est fez quant nos fesons aucunne chose par corage [165vB] de renoveler l’obligement ; et se nos le fesons por ce, ce seront deus manieres d’obligemant.

Ponponius dit : cil à qui il est deffendu que il ne toche ses biens ne puet renoveler l’obligemant se il n’amende sa condicion.

Ulpians dit : obligemanz qui est fez à terme puet bien estre renovelez, neïs puis que li termes est venuz. Et il est certaine chose que convenance puet estre si renovelee que termes i soit mis ; et lors n’en puet l’en pas pledier maintenant mes quant li termes sera venuz.

Paulus dit : cil à qui l’en puet paier par droit puet renoveler l’obligemant, fors en cest cas, se je met en convenant cece] que ce dans le ms., cf. lat. Cui recte solvitur, is etiam novare potest, excepto eo, si mihi aut Titio stipulatus sim que l’en me doit paier à moi ou à Tyce ; car Tyces ne puet pas renoveler l’obligemant, ja soit ce que l’en li puet bien paier.

Ulpianus dit : atorner est baillier à son creancier un autre deteur ou leu de soi, ou à celui à qui li creanciers commadera. {1} Atornemanz est fez ou par convenance ou par commencemant de plet.

Paulus dit : se aucuns atorne à son creancier son deteur et li deteurs le soffre, qui set bien que il se peust deffendre par excepcion de tricherie, il resenble à celui qui done. Mes se li deteurs promet au creancier par ignorance que il paiera sa dete, il ne porra user de nule excepcion contre lui, car li creanciers ne reçut que le suen. Mes cil qui li atorna est tenuz à lui et il li puet demander que il la delivre de tel obligemant se il n’a paié, ou que il rende ses deners se il la paie ; ou, se il a paié, il porra pleder par aucion de commandemant.

Ulpians dit : se je ai atorné à mon creancier celui qui rien ne me doit, comme se il me deust, excepcion ne li vaudra rien ; mes il me porra demander arriere ce que il paiera por moi.

Cil moismes dit : totes les foiz que ce qui est deu porement est promis soz condicion por cause de renoveler l’obligemant, li renovelemanz n’est pas maintenant fez, mes quant la condicion sera avenue. Et por ce, se uns sers est par aventure en l’obligemant et il muert ainz que la condicion aveigne, il n’i a point de renovelemant ; car la chose n’est mes au tens que la condicion avient. Et por ce dit Marciaus que se l’en a demore à rendre le serf, [166rA] et il est puis mis en l’obligemant qui est fez soz condicion, la demore est purgee, et l’en ne doit fere nule mencion el darrener obligemant. {1} Mes se une chose est deue à aucun soz condicion, et il met en convenant por renoveler l’obligemant que ele li soit deue puremant, li renovelemanz n’est pas maintenant fez, ja soit ce que il senble que la pure convenance i face aucunne chose. Mes li renovelemanz sera fez quant la condicion avindra ; car, quant la condicion avendra, ele ostera la premere convenance et s’atornara à la segonde. Et por ce, se cil qui promist est envoiez en essil tant comme la condicion est en crole, Marciaus escrit que se la condicion avient si n’i avra il point de renovelemant ; car la persone qui fut obligee n’est pas quant la condicion avient.

Ulpianus dit : cil qui ne puet parler puet atorner son deteur à son creancier par letres ou par signes.

Cil moismes dit : quant renovelemanz est lealmanz fez, li gage sont delivré et les usures ne corant pas.

Paulus dit : nos poonz renoveler obligemanz par nos, se nos somes de notre droiture, ou par autres qui font convenance par nostre volenté. {1} Orfelins ne puet renoveler obligemant sanz l’autorité à celui qui l’a en garde ; mes cil qui l’a en garde le puet fere se ce est li preuz à l’orfelin ; et cil qui est procurators de toz les biens.

Celsus dit : aucuns ne puet pas renoveler l’ancien obligemant por ce que l’en li puet paier por droit. Quant l’en paie par droit aucunne foiz à cez qui sont en nostre poesté ce que il ont presté, mes uns d’aus ne puet par droit renoveler le premer obligemant.

Papinianus dit : quant li venderres atorne l’acheteur à paier à aucun ce que il li doit, et li acheterres promet issi : « je pairai quanque je doi de cest marchié », ce est renovelemanz de l’obligemant, et il ne doit paier usures ne à l’un ne à l’autre.

Cil meismes dit : se uns creanciers fet convenance à Senprone por cause de renoveler l’obligemant que il li pait ce que uns autres li devoit, en tel maniere que il se parte de tot do premer obligemant, li darreniers detors ne puet pas obligier les gages au premer se li premer ne s’i assant.

Triphonius dit : se uns hons me voloit doner aucunne chose, et je la tor[166rB]noi que il la paast à mon creancier et il la promist, il n’avra pas excepcion contre lui que il ne soit condempnez fors en tant comme il puet fere, autresi comme il la peust avoir contre moi ; car tu li demandasses chose donnee et li creanciers li demande sa dete.

Gaius dit : quant uns deteurs doit par plusors causes et il paie une dete, il est en sa volenté de dire por quel cause il a paié, et ce que il dit sera tenu ; car nos poons fere certain convenant à celui à qui nos paions. Et se nos ne disons pas quant nos paions por quel cause nos paions, il est en la volenté à celui qui reçoit [166vA] por la quel dete il velt que ce soit, por que il acont en chose que nos doions certainement et de coi nos ne pledons pas, et ne mie en dete ou aucuns soit plege, ne en dete de coi li termes n’est encore venuz ; car il senble droit que li creanciers face la besoingne au deteur, autresi comme il feroit la soe. Il est donc ostroié au creancier aconter ce que l’en li paie en quel dete que il vodra, por quoi il face autresi comme il feroit de la soe chose, mes il li doit conter desque l’en li paia.

Florentins dit : car li creanciers puet refuser à recevoir les deners se l’en li velt paier por autre chose que il ne velt ; et li deteurs puet refuser à paier les se l’en li velt conter en autre chose que il ne velt.

Ulpianus dit : car se ce ne lor estoit ostroié, il avendroit que il convendroit toz jorz otroier ce que mains lor vodroit. {1} Et se li uns ou li autres ne dit pas en quel dete il velt conter ce qui est paié, se les detes estoient deues au terme ou soz condicion, il convient que ce qui est paié soit conté en la dete de quoi li termes est passez ou la condicion acomplie.

Ponponius dit : il est melz que ce que j'ai paié me soit conté en aquit de ce que je doi en mon non que de ce que je doi par plevine, et en ce que je doi sus paine que en ce que je doi sanz paine, et en ce donc je ai doné caucion que en ce que je doi sanz caucion.

Ulpians dit : es choses qui sont deues à paier maintenant est il certaine chose que ce qui est paié sanz nule distinction soit conté en la plus grief cause ; et se il n’en i a nule qui soit plus grief que les autres, il soit conté en la plus vielle. La dete senble plus dure qui est deue par caucion que cele qui est deue porement. ¶ {1} Se aucuns a donné deus plege, il pot paier si que il en delivre l’un.

Ulpians dit : se aucunne chose est deue por vilaine cause, et aucunne chose por cause qui n’est vilaine, ce qui est paié est conté en ce qui est deu par vilaine cause. Et se aucunne chose est deue por cause de chose juigie et aucunne chose por autre cause, je croi que ce qui est paié doit estre conté en ce qui est deu par cause de chose juigie ; et issi le prove Ponponius. Et se aucunne chose est deue por cause ou paine est ajointe, ce qui est paié doit estre conté en ce qui delivre de la paine.

Paulus dit : se je ai fet convenance que une chose soit paié à moi [166vB] ou à Tyce, Tyces ne la puet demander ne quiter ne renoveler – la convenance – ja soit ce que l’en li puet paier par droit.

Ponponius dit : se je ai fet convenance que une chose soit paié à moi ou à un orfelin, se cil qui la doit la paie à l’orfelin sanz l’autorité à celui qui l’a en garde, il est delivrés envers moi.

Julians dit : li sires le doit otroier quant il le set premerement.

Ponponius dit : quant uns plege plevist por deus por chascun .x. livres, il est obligiez en .xx. livres ; et se il paie les .xx. livres ensenble ou par chescun .x., il delivre l’un et l’autre deteur. Mes se il n’en paie que .v., voions le quel il alige. Et sanz dote il aliege celui por qui il dit que il paie ; et se il vendoit rien, il convient regarder à la plus vielle dete. Autresi est il se il a paié .xv. livres et il dit que les .x. sont por l’un et les .v. por l’autre ; et se il n’en dit rien, les .x. seront par la plus vielle dete et les .v. por l’autre.

Ponponius dit : cil qui fut fez oirs d’une partie d’un heritage paia .x. livres que li morz avoit promises ; il est quités de tant comme il apartient à la partie que il a de l’eritage, mes il demandera as autres tant comme il en afiert à leur parties. Mes se une partie de l’eritage li eschiet ainz que il la demant, il sera obligiez par cele partie. Et por ce croi je que excepcion de tricherie li nuira se il demande arriere ce qui en afiert à cele partie.

Ulpians dit : en totes manieres de delivrances, tuit li atachemant sont delivré, si comme li plege et li gage et les choses obligees ; fors quant les choses au creanciers et celes au plege sont assenblees ensenble, car por ce n’est pas li deteurs delivrez.

Marcians dit : il avient aucunne foiz quant l’en paie deners que dui obligemant sont osté en une ovre par un meisme paiemant ; si comme quant aucuns a vendu à son creancier son gage por sa dete, se il li paie puis ce que il li doit, il oste l’obligemant de la vente et celui de la dete. Et se uns orfelins a enprunté deners sanz l’autorité à celui qui l’avoit en garde, et li creanciers li lesse un lés en son testamant soz tel condicion « se il rent les deners que il li presta », il senble que il li presta par .ii. causes : por aquiter soi de sa dete, si que il soient conté à l’oir que il ne puisse user us de la loi que retaille les lés, et por acomplir la condicion que li lés soit renduz. Et se li usaires des [167rA] deners est lessiez à aucun, il avient que quant li oirs li baille il s’aquite de ce qui li fut commandé ou testamant et oblige celui à qui il les baillé à rendre les quant li usaires faudra. Autresi est il se il est commandé à l’oir que il vende aucunne chose ou la baut à loage ; car quant il le fet, il s’aquite do testamant et oblige à lui celui à qui il vent la chose ou baille à loage.

Ulpians dit : satisfacion est contee por paiement.

Gaius dit : il loist à chescun à paier por aucun sanz son seu ou malgré suen ; car il est establi au droit citeian que la condicion à chescun puet estre amendee sanz son seu ou malgré suen.

Paulus dit : la parole do paiement apartient à tote delivrance comment que ele soit fete, et ele est plus raportee à la sustance de l’obligemant que à la paie des deners.

Marcians dit : ce qui est promis à terme puet maintenant estre paié ; car l’en entant que toz li tens qui est jusque au terme est donz au deteur por aquiter soi.

Modestins dit : autresi comme quitance destroit totes les auctions qui apartenoient devant, fet li assenblemanz des biens ; car se li deteurs est oirs au creancier, ce que li bien sont melé tot totes les aucions.

Cil moismes dit : se cil qui a eu un orfelin en garde li a rendu quanque il li devoit por cause de la garde, et li orfelins donne à aucun aprés un po de tens les auctions que il a contre celui qui eissi s’est aquitez, cist dons est nus, car les aucions sont nules. Mes se ce fut fet ainz que il paiast, ou puis que il ot promis que il dorroit ses auctions, et cil paia dedanz ce, et aprés li orfelins donna les auctions, eles sont totes sauves à celui à qui il les avoit donees ; car senble melz el darrener cas que li pris des auctions qui sunt donnees ait esté paiez, que il ne fet que les auctions qui apartenoient avant soient destroites.

Ponponius dit : selonc ce que chescuns marchiez est doit estre paiez ; si comme se nos avons fet marchié d’aucunne chose, ele doit estre paie. Et quant nos fesons aucunne convenance par paroles, li obligemanz doit estre depeciez ou par chose ou par paroles ; par paroles si comme par quittance ; par chose si comme quant chescuns paie ce que il promist. Et quant achaz ou vente ou aloemanz est fez por ce que puet estre fet par un consentement, il puet estre depecié par un consentement.

Papinians dit : se cil [167rB] à qui ses deteurs paie autrui deners a les deniers toz sans, et il demande ce que l’en li doit, et ne rant pas ce que il a receu, il sera mis arriere par excepcionpar excepcion] par excepcion par excepcion dans le ms. de tricherie. ¶ {1} Se je preste ou paie deners qui sunt comun à mo‹i› et à autre, auction ou delivrance n’est maintenant par ma partie, comment que la compoignie soit ou chascun des deners ou en tote la somme. ¶ {2} Et se plege paie autrui deners por cause de plevine, se il sont despendu il puet pledier par auction de commandemant à celui por qui il estoi plege. Et por ce, se il paie les deniers que il avoit toluz, il pledera par auction de commandemant quant il en avra satisfacion fet à celui à qui il les avoit toluz. ¶ {3} Favians mande saluz à Pampanian. Quant Tyces devoit à Sey une quantité certaine por cause de lés, et il li devoit autretant por autre cause que il ne poest demander, li sers Tyce qui s’entremetoit de ses besoignes paia à Sey sanz son seignor une some qui bien peust soffire à la quantité d’une des detes, et li dit que il li paioit en aquit de tot ce que ses sires li devoit. Je demant por quel cause il senble que ce qui est paié soit receu. Et la responsse est que se Sey eust dit à Tyce que il li paiast en aquit de sa dete, l’en entendist par non de la dete le lés, et ne mie les deners qui ne poient estre demandé ; mes puis que il eust paié icele dete, il ne la peust pas demander arriere. Mes quant li sers Tyce fu establiz à procurer ses choses, il ne senbla pas que il li commandast à paier ses deners qui ne devoient pas estre paiez et de coi il se poest defendre par excepcion ; ne plus que li sers puet paier les deners de son chetel por cause de plevine où il n’entra pas por chose qui apartenist à son chastel.

Cil moismes dit : quant uns hons doit por plusors causes et il paie deners, si que il ne dit pas por la quel cause ce est, l’en les contera premerement en cez qui sont deu soz male renomee, et puis en cez qui sont deu soz paine, et puis en cez qui sont deu seur gage. Et si les doit l’en premerement conter en cez que il doit conter por lui que por autre, et li ancian juigerent ce por ce que il senble que sages deteurs le feroit issi. Et s’il n’i a nules de cez choses, la plus vielle dete sera avant paie. Se li deteurs paie plus deners [167vA] que une des detes ne monte, la plus vielle dete sera quite et ce qui remaindra de la paie sera conté en aquit de l’autre enprés.

Paulus dit : li creanciers ne doit pas estre contrainz de prendre danrees por deners, se il i puet avoir domage.

Mecians dit : se cil qui doit deners por plusoz causes paie deners sanz dire por la quel il a paié, Julians dit que l’en doit croire que il paie por cele de quoi il poit estre contrainz el tens que il paia.

Paulus dit : ce que nos disons de l’oir, qui doit rendre au plege au mort ce que il li a paié, ainz que il ait receu l’eritage, doit estre entendu o aucun atenprement de tens ; car il ne doit pas recevoir l’eritage si comme il vient d’anterrer le cors.

Gaius dit : autre chose est que l’en puisse paier à Tyce par la droiture de la convenance, et autre chose que je l’otroi après ; car quant l’en li puet paier par la droiture de la convenance, je ne puis pas deffendre que l’en ne li paiet. Mes se je otroi puis que la convenance fut fete que l’en li paiast, l’en ne li paiera pas par droit. Se je deffant ainz que l’en li pait, que l’en ne li pait pas.

Ponponius dit : obligemenz de paroles est depeciez ou naturelment ou citeinement. Naturelment si comme quant l’en paie la chose qui fut promisse, ou quant ele lesse à estre sanz les corpes à celui qui les promist ; citaienement si comme li uns clame l’autre quite, ou les choses à l’un et à l’autre vienent en une meisme persone.

Modestins dit : quitance est delivrance par coi li uns et l’autres de cez qui sont obligié ensenble est assos de tot l’obligement.

Ulpians dit : il nos plest que orfelins puisse estre delivrez par quitance sanz l’autorité à son deffendeor.

Paulus dit : nus ne puet quiter ne estre quitez par procurator sanz commandemant.

Ponponius dit : quitance ne puet estre fete soz ‹condicion›.

Ulpians dit : quitance qui est fete à terme n’est de nule valeur ; car quitance selt delivrer autresi comme paiemenz.

Cil moismes dit : quitance puet estre fete se li uns demande issi : « me quites tu de ceste convenance ? », et li autres respont : « oïl ».

Cil moismes dit : l’en demande se cil a point de force de con[167vB]venant en quitance qui rien ne vaut ? Et sanz dote se il n’i a consentement, il n’i a point de force de convenant. Aucuns demande donc se il puet estre que il n’i ait consentement ? Et je ne voi pas por quoi il ne puisse estre ; car se cil qui fesoit la quitance savoit bien que ele ne valoit rien, tuit sievet que il n’i a point de force de convenant desque il ne se consenti au convenant fere. ¶ {1} Autressi comme li sers communs puet aquerre convenance à un de ses seigneurs, li puet il aquerre quitance et delivrer del tot ; et Octavenus le cuide eissi. {2} Li sers communs puet aquerre quitance à un de ses seigneurs malgré à l’autre ; et issi plet il à Labeo. Aprés escrit Labeo que se li sers qui a deus seignors a tant fet que li uns a promis une chose à l’autre, il priet l’autre que il le quit, et il le puet delivrer par quitance autresi comme il l’avoit obligié. Et issi sera li obligemenz aquis et ostez par un meisme serf. ¶ {3} L’en ne puet quiter par paroles fors obligemant qui est fez par paroles, car ce qui n’est pas fet par paroles ne puet pas estre depeciez par paroles. ¶ {4} Se li filz qui est en baill promet aucunne chose, il n’oblige pas son pere mes soi meismes ; et por ce puet li filz demander delivrance por quiter soi, car il est obligiez. Et se li peres demande quitance, il ne fet rien, car il n’est pas obligiez mes ses filz. Ce moisme doit l’en dire do serf, car il puet estre delivrez par quitance. Et li obligemanz de coi li sires estoit obligiez par lui sont osté ; et nos usons de cest droit, quar quitance soit do droit as genz. Et por ce croi ge que quitance puet estre fete en grec, por coi por qui ele soit fete en autretel forme comme ele estoit fete en latin.

Paulus dit : quitance puet estre fete d’une partie de ce qui a convenencié, non pas tant solement se l’en dit eissi : « quites me tu les .v. des .x. deners que je te promis ? », mes se l’en dit eissi : « quites me tu la moitié de ce que je te promis ? », et li autres respont : « oïl ».

Ponponius dit : mes se denier n’ont pas esté mis en la convenance, mes uns certains cors, si comme un serf, quitance ne puet estre fete d’une partie. ¶ Quitance puet estre fet à un des oirs.

Paulus dit : une maniere d’aquerre est delivrer son seignor d’obligemant ; et por ce, se li sers de coi avo‹n›s a l’usaire [168rA] puet delivrer celui qui en a l’usaire por porchacier la quittance, car il senble que il aquiert de ses choses meisme. Autresi dirons nos do serf en coi nos n’avons que l’usage set en celui qui nos sert en bone foi et as autres qui sont sozmis à nostre droiture. Et se je quit à un serf ce que je li promis, je n’avrai nule auction contre son seignor, ne de son chetel ne de ce qui est mis en son preu. ¶ {2} Se li sers d’un heritage demande ainz que l’eritages soit receuz quitance de ce que li morz me promist, et je li octroi, je croi que li heritages est delivrés par ce. {3} Et se ses sires estoit en chetivoison, l’en doit dire que la quitance sera confermee quant il sera revenuz ; car sers puet bien fere convenance el non à son seignor qui est en chetivoison.

Ponponius dit : ce qui est deu à terme ou soz condicion puet estre osté par quitance se la condicion avient ou li termes vient.

Ulpians dit : la convenance de servises qui a esté fete par le seremant à celui qui a esté franchiz puet estre ostee par quitance. ¶ {1} Se ce qui a esté convenencié ne puet estre parti, la quitance qui est fete d’une partie n’est de nule valeur, si comme se il a esté mis en convenant que uns chans doie servise. ¶ Se usaires est mis en convenance, si comme li usaires d’un champ, quitance en puet estre fete d’une partie si que cil qui l’avoit de tot le champ ne l’ait que d’une partie. ¶ Se voie est promise à aucun parmi un champ et il cuide que il n’i ait mie voie ne charriere, ceste quitance n’est de nule valeur. Autresi doit l’en dire se la charriere est quitee, mes se li santier et les charrieres sunt quités, l’en doit dire que cil qui promist la voie est delivrés. ¶ {2} Il est aperte chose et certaine que se cil à qui uns chans a esté promis en quite l’usaire ou la voie, la quitance ne vaut rien ; car cil qui quite doit quiter ce qui li a esté promis ou tot ou en partie. Mes cez choses ne sont par parties del champ, ne plus que se une meson a esté promise à aucun et il en quite les pierres ou les fenestres ou les chevrons. ¶ {3} Se usaires a esté promis à aucun, et il en quite l’usage, si li usages puet estre establiz sanz le fruit, la quitance vaut. ¶ {4} Se cil à qui uns sers a esté promis quite Stic, Julians dit que la quitance vaut, et que ele oste tot l’obligemant. Se cil qui a promis puet paier une chose à celui à qui il a promis, et cil ne puet refuser que il ne [168rB] la preigne se il la quite, il donne delivrance. ¶ {5} Il est certaine chose que cil à qui uns chans a esté promis ne puet pas quiter la cause de tricherie qui fu mise en la convenance ; car ce n’est pas partie de la dete, ainz est autre chose que ce qui est deu. ¶ {6} Se cil à qui l’en promist un serf ou .x. solz soz condicion quite le serf, et li sers muert ainz que la condicion aviegne, li .x. solz remaindront en l’obligemant, autresi comme se la quitance n’eust onques esté fete. ¶ {7} Se quitance est fete ou plege quant li deteurs est obligiez par chose et ne mie par paroles, l’en demande se li deteurs est delivrés. Et nos usons de cest droit ; que ja sé ce que li deteurs n’est pas obligiez à paroles, neporquant il soit delivrés par la quitance qui est fete au plege. ¶ {8} Se quitance est fete au ploige de lés qui sont lessiez soz condicion, li lés seront aprés deu se la condicion avient. ¶ {9} Se pleige fut pris en ceste maniere : « tu es ploing de quancque je pretoi à Tyce », et li creanciers li quite la plevine ainz que il prest rien à Tyce, Tyces n’est pas obligiez ; mes quanque la prant, sera obligiez à lui ; car se nos disons que li pleges ne puet estre delivrez devant que une chose fu prestee au deteur por ce que il n’estoit obligiez à rien, neporquant li deteurs ne puet pas estre delivrez par quitance qui fu fete ainz que il fust obligiez. ¶ {10} Li deffenderres à l’orfelin et li procureors au forsené ne puent pas quiter lor detes, ne procurators ne puet fere quitance, mes tuit cil qui puent renoveler obligement. Et en tele maniere puet il quiter, et autresi ne luer puet l’en fere quitance, mes il puet estre delivré par renoveler obligement, que nos solons user de cest remede au la persone à cex qui ne sont pas presant ; car nos feson por renoveler l’obligemant que uns autres nos promet à rendre ce que cil nos doit qui n’est pas presanz, et issi le quiton nos. Et cil qui est hors do païs est issi presanz par le renovelement et est delivrez par quitance. ¶ {11} Tuit oir puent quiter et estre quité. {12} Se une meisme chose à esté promise à plusors ensenble et li uns la quite, cil qui la promist est toz delivrés.

Paulus dit : se la quitance ne s’acorde [168vA] à l’obligemant, et se ce n’est voirs qui est dit à fere la quittance, ele n’est pas perfete ; car il convient que les paroles s’acordent ensenble.

Ponponius dit : se cil qui promist Stic demande issi : « je te promis Stic, me quites tu Stic et Panfile ? », et cil respont : « oïl » ; je croi que la quitance vaut, et mancion est por noiant fete por Panfile. Autresi comme cil qui promist .x. solz demande issi : « je te promis .x. solz, me quites tu .xx. solz ? », et cil respont : « oïl », il sera delivréz de .x. solz.

Ulpians dit : se plusor sont obligié à une moisme chose et quitance est fete à l’un, il seus n’est pas delivrez, mes tuit cil qui estoient obligié à lui ; ce n’est pas par la reson de la quitance, mes por ce que il senble que il aist paié. ¶ {1} Se plege est pris de la chose juigie et quitance li est fete, cil qui fut condempnez est delivrés.

Julians dit : se cil à qui .x. solz ou uns sers furent promis quite les .v. solz, il oste une partie de la convenance et puet demander les autres .v. solz, ou la moitié do serf.

Florentins dit : quitance et delivrance puet estre fete d’un marchié ou de plusors qui sont certain ou qui ne sont pas certain et de totes causes. {1} Gaius Aquillius mostre issi la convenance de quoi quitance doit estre fete : ¶ « tu me promz quant que il convient que tu me faces ou donges par aucunne cause, ou orendroit ou à terme, de quoi je puis avoir aucion contre toi et que je te puis demander, et quant que tu as do mien et que tu en porsiz, et tant comme ces choses valent », et cil doivent respondre : « je le te promet ». Et la quitance doit estre fete en cest maniere : « quites me tu tos les choses que je t’oi promises ? », et cil doit respondre : « je les te quist ».

Julians dit : se quitance est fete à celui qui est obligiez par chose et ne mie par paroles, il ne sera pas delivrés, mes il se porra deffendre par excepcion de tricherie ou de convenant. ¶ {1} Il a tel difference entre quitance et letres de poiemant : que cil à qui quitance est fete est delivrés, ja sé ce que il n’ait pas paié les deners, mes cil qui a letres de poiement n’est pas delivres se il n’a poié les deners.

Cil moismes dit : se la cause de chose juigee est quitee, tote la convenance faut, si comme Marciaus dit, car ele i est mise que la [168vB] chose puisse estre juigee.

Renulcius dit : se uns m’a esté lessiez soz condicion, et je faz convenance por cause de renoveler obligemant que il me soit donnz, et je le quit enprés ce, avant ce que la condicion avigne, Nerva dit que se la condicion avient, aucion ne m’apartient pas ; par le testamant, por ce que li obligemanz est renovelz ; par la convenance, por ce que quitance en a esté fete.

Gaius dit : sers ne puet pas fere quitance neïs par le commandemant son seignor.

Labeo dit : se je t’ai quité, por ce ne sui je pas quités à toi. Et Paulus dit : mes por ce que loages et achaz et vantes sont fez par assentemant, ja soit ce que nule chose n’est encore baillie, l’une et l’autre partie puet estre quitee de tot obligemant. Ja soit ce que l’une sole partie face la quitance.

Ulpianus dit : il senble que trois especiaus manieres sont de convenances qui sont fetes par le prevost : les unes sunt fetes en juigement, les autres par caucion, les autres sont communes. {1} CelesCeles] A celes dans le ms., cf. lat. Iudiciales eas dicimus qui sont fetes en juigement, qui sont fetes d’avoir estable ce qui sera juigié, si comme de poier ce qui sera juigié et denoncement de novele ovre. ¶ {2} Celes qui sont fetes par caucion sont celes qui ont maniere de auction, neïs de renovelement en est fez ; si comme de lés et de garde, et d’avoir la chose estable, et que domages ne sera pas fez. ¶ {3} Les communes sont celes qui sont fetes de estre au juigement. {4} Et l’en doit savoir que totes convenances contienent caucion par leur nature, car les convenances sont fetes por aseurer cex à qui eles sont fetes. ¶ {5} De cez convenances qui sont fetes par le prevost, et les unes qui sont fetes par caucion et les autres par une promesse. Mes il en i a por qui soient fetes par une promesse ; et quant eles seront nonbrees, l’en savra apertenement que les autres ne sont pas par promesse, mes par caucion. {6} La convenance de denoncement de novele ovre est aucunne foiz fete par caucion et aucunne foiz par une promesse. Et il convient voir comment caucion en est donnee ; car il convient doner caucion de l’ovre qui est fete en privé leu et fere une promesse de cele qui est fete en commun leu. Et cil qui commencent en lor non ne font fors prometre, et cil qui commencent por autres doivent [139rA] donner caucion. ¶ {7} L’en promest aucunne foiz que domages ne sera pas fez, et aucunne foiz en done l’en caucion. Car quant aucunne chose de quoi domages puet venir est fete en commun flueve, l’en en donne caucion ; et quant ele est fete en mesons, l’en n’en fet fors prometre. {8} Convence qui est fete de randre une chose à dobles n’est fors une promesse. {9} Se il n’est mis au convenant que caucion ne soit donnee, et s’il i a aucun contredit, si comme l’en dit que l’en demande par malice que tel convenance soit fete, li prevoz doit conoistre de la chose à une sonme et commander que caucion soit donnee ou deffendre le. {10} Et se il i convient à joindre ou amenuissier ou müer, aucunne chose de la convenance est par la juridicion au prevost.

Paulus dit : les convenances qui sont fetes par le prevost contienent ou restitucion de chose ou quantité qui n’est pas certaine. {1} Si comme la convenance de denoncement de novele ovre, en coi il est contenu que ele soit restablie ; et por ce, se li deffenderres et li demanderres muert et il lesse plusors oirs, et li uns voint ou est vencuz, tote l’ovre devra estre restablie ; et tant comme il faut aucunne chose, ne puet l’en pas dire que l’ovre soit restablie. ¶ {2} La convenance de poier ce qui sera juigié, et celes qui li sires avra establi ce que li procurators fera, et cele que domages ne sera pas fez, et celes qui sont senblables à cestes, contienent quantité qui n’est pas certaine. Et de celes dit l’en que eles doivent estre departies à persones aus hoirs, ja sé ce que l’en puet dire que la persone as hoirs à celui qui fet la convenance ne puet pas müer la condicion à aucun par convenance qui descende do mort. Et encontre ce, il est fet par bone reson que se uns des hoirs à celui à qui la promesse fut fete voint, la convenance a lieua lieu] a lun dans le ms., cf. lat. At in contrarium summa ratione fit, ut uno ex heredibus stipulatoris vincente in partem eius committatur stipulatio: hoc enim facere verba stipulationis “quanti ea res est" por sa partie por tant comme la chose vaut. {3} Mes se li uns des hoirs à celui qui promist porsiet tote la chose, Julians escrit que il doit estre condempnz por tot ; et se cil qui porsiet muert puis que li plez est entammz, uns de ses oirs ne doit pas estre condampnz am plus que li autre, ja soit ce que il porsit tot le champ.

Ulpians dit : l’en donne caucion [169rB] generaument en totes les convenances qui sont fetes par le prevost et as procurations.

Paulus dit : les convenances qui sont fetes par le prevost sont sovent demandees quant caucion lesse à estre fete sanz la colpe à celui qui promet.

Cil moismes dit : ce doit estre gardé en totes les convenances qui sont fetes par le prevost, que se mis procurators fet convenance en mon non, aucion li apartiegne quant la cause sera corrue. Autresi est il que se uns marcheanz commence à estre en tele cause que il baille à autres ses marcheadises et en retient la seignorie.

Cil moismes dit : en totes les convenances en coi une chose est promise à fere et poine i est mise, se ele n’est fete est la caucion donnee par non de la poine.

Ulpians dit : il convient as caucions qui sont fetes par le prevost que plege soient donz, ne nus ne s’en puet aquiter par baillier gages ne deners, ne or ne argant.

Papinians dit : Paulus dit que quant cil qui est fez hoirs soz condicion a receu la possession des biens, il est contrainz de doner à celui qui est establiz à estre hoirs aprés lui caucion à plus lonc terme que la condicion n’est. Car li prevoz ne velt que ses benefices tort à nuli à decevance ; et l’en puet bien voir que cil qui prant avant, demande à tort caucion. ¶ {1} Quant uns lés est lessiez à Tyce et amené soz contraires condicions, l’en doit donner caucion à l’un et l’autre quant li uns et li autres a esperance d’avoir le lés par la volenté au mort.

Renulcius dit : se doteuse parole avient as convenances qui sont fetes par le prevost, l’excepcion sera au prevost, car l’en doit garder à sa pensee.

Ulpians dit : Valerians escrit que se li prevoz qui commanda premerement que caucions fust donnee jusques à trois anz commanda aprés que ele fut donnee à plus lonc tens, por ce que il vost que l’an usast la premere convenance, il senble que il aperne à cez qui estoient obligiez par l’excepcion de la premere convenance.

Renulcius dit : la convenance d’une moisme maniere, où l’en promet arrendre tant comme la chose vaut, il est miauz que l’en compraingne certainne somme ; car sovant avient que il est grief chose de prover la valor des choses, si que ele est ramenee à petite somme.

Ulpians dit : li establissemanz de la loi que Julians dit est que li oirs ne sont pas tenu par les aucions de coi poines corperes viennent. Et por ce ne puet il estre trez en cause por le larrecin lor ancessors. Mes ja soit ce que il ne soient pas tenu par aucion de larrecin, neporquant il convient que il soient tenu de fere venir la chose avant, ele porra estre chalongie contre els ; et chose qui a esté poié qui n’estoit pas deue leur puet estre demandee. ¶ {1} Il est certaine chose que oirs puet pledier par aucion de larrecin ; car l’excepcion d’aucuns mesfz est donnee as oirs. Oirs puet bien pledier par la loi qui fet restorer les domages et par aucion de torz fez. ¶ {2} Il nos plest que la poine anseigne le maufetor, non pas tant solement en larrecins, mes an totes les autres auccions qui nessent des mesfez de quelque maniere qui eles soient.

Cil moismes dit : il n’avient nule foiz que plusors mesfez qui sont assenblé ensenble facent que quitance de l’un soit donnee ; car la poine dou mesfet n’est pas amenuisie por un autre mesfet. {1} Cil qui a donc enblié un serf ou l’a ocis est tenuz par aucion de larrecin por ce que il a emblé, et par la loi qui fet restorer les domages por ce que il l’a ocis ; et l’une de cez aucions ne destraint pas l’autre. {2} Autresi doit l’en dire se il le tolit par force et l’ocist ; car il est tenuz par l’entredit des biens raviz par force et par la loi qui fet restorer les domages. {4} Et se i l’a enblé ou batu, il est tenuz par .ii. auctions, ce est de larrecin et de tort fet ; et se il l’ocist, il est tenuz par la tierce. {3} L’en demande donc, se il a esté demandé arrieres por ce que il avoit esté anblez, se il remeint por ce que l’en ne puis[169vB]se pledier par la loi qui fet restorer les dommages. Et Ponponius dit que l’en en puet bien pledier. Car l’an prise autre loi qui fet restorer les dommages que quant l’en demande arrieres par cause de larrecin ; car ele est presiee en la loi qui fet restorer les domages à tant comme ele vaut plus en cel an. Mes quant l’en a prisié en cause de larrecin, l’en ne garde pas à la valor dou tens passé. Mes se cil qui ce a fet est sers, il soffre poine por la quel cause que ce soit, l’autre aucion n’est pas perrie. ¶ {5} Se aucuns enble aucun serf et il le bat, il sera tenuz par aucion de serf corrumpu et de larrecin. ¶ {6} Et se aucuns a navré le serf que il avoit enblié, les deus aucions li avront leu, ce est cele de larrecin et cele de la loi qui fet restorer les domages.

Cil moismes dit : se aucuns viust porsuire les aucions qui nessent des mesfez, se il en vieust pledier par deners il les convindra revenir au droit ordinaire, ne il ne sera pas contrainz de fere suscepcion au terme ; mes se il en vieust pledier por poine, il convient que il face subscrition.

Paulus dit : Labeo dit que larrecin est apelez de nerté, por ce que il est fez en repost et en ocurté et plus par nuit que por jor ; ou de tolir, selunc les paroles dou latin. {1} Sole pensee de fere larrecin ne fet pas larron. {2} Et cil qui a pris une chose à garder, et la nie, ne est pas tenuz mointenant par aucion de larrecin, se il ne l’é fet par achoison de tolir les. ¶ {3} Larrecins est atochemanz d’autrui chose par barat por avoir la de gaing.

Paulus dit : deus manieres de larrecin sont : cil qui est aperz et cil qui n’est pas aperz.

Ulpians dit : cil est lerres aperz qui est pris o tot le larrecin ; {1} et il ne puet chaloir qui le praingne ou cil qui la chose fu ou un autre. ¶ {2} Mes l’en demande se il est aperz lierres lors sanz plus que il est pris fesant le larrecin ou aprés. Et Julians dit que, ja soit ce que il n’est pas pris an fesant le larrecin, por ce ne remoint pas que il ne soit aperz lierres se il est pris à tot la chose que il avoit enblee, ainz que il l’ait portee la où il l’avoit pansee à porter la.

Paulus dit : l’an doit entendre « la où [170rA] il avoit pansé à porter la » ce est la où il avoit pansé à gesir cele nuit o tot.

Ulpians dit : se il est don‹c› pris au leu commun ou privé ainz que il ait porté la chose la où il avoit en pensé, l’an doit dire que li larrecins est aperz se il est pris ou la chose que il avoit enblee, et issi escrit Cassius. {1} Mes s’il la porta lala] lo dans le ms. où il avoit en pensé, et il est pris o tot, il n’est pas aperz lierres.

Paulus dit : je soit ce que larrecins est sovant fez par atochier, neporquant il an garde selonc le commoincement se il est aperz lierres ou non.

Ulpianus dit : se aucuns a fet un larrecin tant comme il estoit sers et il est pris puis que il est franchiz, voions se il est aperz lerres. Et Ponponius dit que il puet estre trez en cause d’apert larrecin, car la nessance de larrecin qui fu fez ou servage ne fu pas aperte. {1} Iqui escrit Ponponius que par la prise est li lerres aperz. ¶ Se je t’ambloi les choses de ta meson et tu te reponsis que je ne t’oceisse, ja sé ce que tu veoies fere larrecin, neporquant il ne est pas aperz. {2} Mes Celsus ajoint à la prise, que tu le veoies enblant et tu le sivis par prandre, et il geta ce que il avoit anblé et s’en foi, il est aperz lerres. {3} Et il en dit un pou de difference se cil à qui il avoit fet le larrecin, ouou] en dans le ms. un de ses voisins, ou uns trespassanz, le prist.

Gaius dit : par le larrecin qui est aperz voit l’en le quel n’est pas aperz.

Ponponius dit : se aucuns a aucion de larrecin, por ce se li lerres a tochié sovant la chose que il a enblee, ne croit pas l’aucion ; ne por ce, se la chose croit puis que ele est anblee. {1} Mes je puis chalongier ma chose aprés, autresi comme devant.

Ulpianus dit : cil a aucion de larrecin qui eust preu se la chose ne fust pas enblee.

Paulus dit : cil à qui la chose apartient a aucion de larrecin se ele li apartient par honeste cause.

Ulpians dit : li folons qui prant dras à teindre et à parer puet toz jorz pledier de larrecin se il li sont enblé, que il sont en sa garde. Et s’il n’a de quoi rendre les, l’aucion revient à celui cui il estoient ; quar il n’a de quoi rendre, le pris n’est pas seur lui. {1} Aucion de larrecin n’est pas donnee à celui qui porsit par male foi, ja sé ce que ce fust li preuz [170rB] que la chose ne fust pas enblee, por ce que ele est à son peril. ¶ Mes nus n’a auction de sa desloiauté ; et por ce est donnee auction de larrecin à celui soul qui porsiet par bone foi. {2} Se la chose estoit baillie an gage et ele est enblee, nos donons au creancier aucion de larrecin, ja soit ce que la chose n’estoit pas seue ; et nos ne donnons pas aucion à lui contre les estranges tant solement, mes contre le seignor moismes de la chose ; et issit escrit Julians. Et il nos plest que aucion en soit donnee au seignor, et issi avendra il que l’aucion sera donne à deus por ce que l’aucion apartient à deus. Et l’en demande se ele est toz jorz donnee au creancier ou lors sanz plus quant li deteurs n’a de quoi paier. Et Ponponius dit que ce fut toz jorz ses preuz que il eust le gage ; et issi le dit Papinians et Julians, et il est voirs.

Paulus dit : cil à qui une chose est deue par convenance n’a pas aucion de larrecin se ele est anblee quant il est demoré an celui qui la promist que il ne l’a rendue.

Ulpians dit : cil qui achete la chose n’a pas aucion de larrecin se ele ne li fust livree ; mes Celsus dit que cele aucion apartient encore au vendeor, et il convient que il doint à l’acheteor l’aucion de larrecin et le poer de chalengier la. Et se nule chose l’en est rendue par cez aucions, il convendra que il la baut à l’acheteor ; et ceste sentence est veroie, et issit le dit Julians. Et sanz dote li perilz apartient à l’acheteor se li venderres la garda au mieux que il pot. {1} Et se li acheterres moismes a anblé la chose que li venderres devoit garder puis que il en ot poié le pris, il n’est pas tenuz par aucion de larrecin. ¶ Mes se il l’enbla ainz que il l’eust poié, le pris il i est tenuz, autresi comme s’il eust anblé son gage quant il l’eust engagié. ¶ {2} Li coitiveor ont aucion de larrecin, ja soit ce que il ne seront pas seign‹o›r. {3} Voions se cil à qui la chose est baillie en garde a aucion de larrecin. Et por ce que il est tenuz à rendre fors ce qui aviant por sa tricherie, il nos plest que il n’aist pas aucion de larrecin ; car se il n’i a fet tricherie, il en est quités. Se il i a fet [170vA] tricherie, li perilz est sor lui, mes il ne doit aquerre auccion de larrecin par sa tricherie. {4} Julians escrit que il a esté establi en la persone à toz les larrons que il ne puissent pledier par aucion de larrecin ou non de la chose dont il sunt larron. ¶ {5} Papinians demande : « se je pris deus sers en gages por .x. solz et li uns m’en est enblez, et cil qui m’est remés vaut bien les .x. solz, savoir mon se j’ai aucion de larrecin jusqu’à .v. solz tant solement por ce que j’ai les autres .v. solz saus en l’autre serf ? Ou por ce que cil qui m’est remés puet morir se j’é auction de toz les .x. solz, ja soit ce que cil qui m’es remés vaut assez plus ? Et il cuide que je le puisse avoir por toz les .x. solz ; car l’en ne doit pas regarder au gage qui est remés, mes à celui qui est amblez. ¶ {6} Il moismes escrit que se l’en me devoit .x. livres, et li sers que j’avoie m’est embliez et je avoie pledié par aucion de larrecin et conquis les .x. livres, aucion de larrecin ne m’apartendra pas se il m’est amblez autre foiz ; car il a lessié apartenir à moi desque je ai eu ce que l’an me devoit. Issi est il se il m’est anblez sanz ma colpe, je sui tenuz par auction de gage ; se ce est par ma colpe, je porroi pledier par aucion de larrecin. ¶ Et se ce n’est en ma copes, l’aucion apartient au seignor de la chose et non pas à moi ; et Ponponius loe ceste sentence. {7} Cil moismes dit que se dui serf sont anblé en un leu ensenble, aucion de larrecin apartient el non de l’un et de l’autre au creancier ; mes ce n’est pas por tot ce que il valent, mes por tant comme l’en li doit seur chescun. Mes se il me sont enblié chescun par soi, et ge ai eu el non de l’un tote ma dete, je n’avrai rien el non de l’autre. ¶ {8} Se cil à qui je prestai ma chose i a fet tricherie, il n’en puet pas pledier par aucion de larrecin. {9} Et ce moisme dit Ponponius de celui qui prent une chose à porter par le commandemant à aucun. ¶ {10} L’enl’en] C len dans le ms. demande se li peres a aucion de larrecin por la chose qui fu prestee à son fill. Et Julians dit que nenil, car il ne la devoit pas garder. Autresi [170vB] comme cil qui est plege por celui à qui la chose est prestee n’a pas aucion de larrecin ; car tuit cil qui n’ont aucion de larrecin, qui eussent preu se la chose n’eust pas esté enblee, mes cil qui est tenuz à rendre la por ce que ele est perie en ses corpes ; et Celsus loe ceste sentence. {11} Se aucuns avoit un serf par enprunt et il li est enblez, l’en puet demander se il a aucion de larrecin. Por ce que nule citeiane auction n’a leu contre lui, car tex enprunz est senblables à don, et por ce est li entrediz convenables et necesseres contre lui, et n’an’a] ne dans le ms., cf. lat. non habebit furti actionem mie aucion de larrecin. Et quant l’en avra pledié à lui par l’entredit, je croi que il doit rendre ce qui est avenu en sa colpe ; et por ce, puet il pledier par aucion de larrecin. {12} Et se aucuns a pris une chose à loage et ele li est enblee, il avra aucion de larrecin se ele est perdue en ses corpes. ¶ {13} Se li filz qui est en bail li est enblez, il est aperte chose que ses peres a aucion de larrecin. ¶ {14} Se une chose est prestee, et cil à qui ele est prestee muert, ja soit ce que larrecins ne puet estre fez à l’eritage, neporquant, se ele est enblee, li hoirs à celui à qui ele fut prestee porra pledier par aucion de larrecin ; et cil qui la presta en porra pledier. Autresi est il en la chose qui est engagie ou baillie à loage. Et ja soit ce que aucion de larrecin n’est pas acquise à l’eritage, neporquant ele est acquise à autre à qui la chose apartient. ¶ {15} Aucion de larrecin apartient à celui à qui la chose est prestee, non pas tant solement por la chose prestee mes por la chose qui est nee de cele ; car la garde en apartient à celui à qui la chose fut prestee. Car se je t’ai presté un serf et sa robe est enblee, tu en plederas par aucion de larrecin, ja soit ce que je ne te prestai pas sa robe. ¶ Et se je t’ai prestee une jumant qui a un polin et li polins est enblez, Aquilius dit que aucion de larrecin apartient à moi et à toi, ja soit ce que il ne ce fust pas prestez. ¶ {16} L’en demande donc quele aucion de larrecin est donnee à celui à qui la chose fut prestee. Et je croi que aucion de larrencin apartient à toz cex qui ont autrui chose à leur perill, si comme par prest ou par loage [171rA] ou en gage ; et cil qui a la seignorie de la chose la puet demander arriere tant solement. ¶ {17} Se les letres que je te envoie sont enblees à celui qui les portoit, l’en demande à qui aucion de larrecin apartient. Il convient donc premerement enquerre au quel les letres estoient, ou à celui qui les envoia, ou à celui à qui eles furent envoies. ¶ Et se je les baille au serf à celui à qui je les envoie, l’aucion est aquise à lui. Autresi est se je les bailli à son procurator ; car por ce que possession est aquise à aucun par franche persone, les letres sont maintenant seues. Meismement se ce fu ses preuz que il les eust, mes se je envoai les letres si que eles me fusent renvoies, la seignorie en est moie. Et cil porra donc pledier par auction de larrecin à qui preu les choses qui sont escrites apartenoient ; car li preuz fut suens que eles ne fussant pas enblees. Et por ce, puet l’en demander se cil à qui eles furent ballies à porter puet pledier par aucion de larrecin. Et sanz dote se la garde en apartenoit à celui, il en puet pledier. Et se ce fust ses preuz que il rendist les letres, il avra aucion de larrecin. Et se il estoit contenu es letres que aucunne chose li fust rendue ou fete, il puet avoir aucion de larrecin, ou se il les prist en garde ou il ot loier por porter les ; en ce cas est sa cause senblable à cele au taverner ou au metre de la nef ; car à ce donnons nos auction de larrencin, se il ont de coi rendre les choses qui ont esté enblees en la nef ou en la taverne, car li perilz en apartient à els.

Cil moismes dit : establissement de droit ne deffent pas que li peres ne puisse pledier par auction de larrecin à son fil qui est en son bail, mes nature le deffant ; car nos ne poons pas plus pledier à cez qui sont en nostre poeté qu’à nos moismes.

Ulpians dit : se nostre serf ou nostre fil nos font larrecin, il ne sont pas tenuz à nos par aucion de larrecin, car cil qui puet establir contre le larron ce que il velt n’a pas besoign de pledier par aucion de larrecin. Et por ce, ne establissent pas li ancian que il plede à els. {1} Et por ce, demande l’en se li [171rB] sers est venduz ou franchiz se il est tenuz par aucion de larrecin. Et il nos plet que nenil, car l’aucion qui fut nule au commencement ne puet pas nestre contre lui. Mes se il la toche puis que il fut franchiz à la chose que il enbla, l’en doit dire que il est tenuz par auction de larrecin, car lors fet il larrecin. ¶ {2} Quant li sers que je ai acheté et qui m’a esté livrez est rentrez, il n’est pas autresi comme s’il n’eust unques esté miens, mes l’en doit dire que il a esté miens, et l’a lessé à estre. Et por ce, dit Sabins, que se il fet larrecin, il est en tel point que cil qui le retret ne puet pas pledier por le larrecin que li sers a fet. Mes se il ne puet pledier, si doit l’en metre reson en ce que quant il commença à estre retrez ; et ce est contenu en l’aucion de retre chose qui est vendue. ¶ {3} Se sers est fuitis et il fet un larrecin à son seignor, l’en demande se il puet avoir aucion de larrecin contre lui qui a commoincié à porsoer le par bone foi por ce que il ne velt revenir à son seignor. Ce muet la dote, que ja soit ce que il senble que je porsie mon serf qui s’en est foiz, neporquant je ne sui pas tenuz por le larrecin que il fet por ce que il n’est pas en ma poesté. Et Julians escrit que ce que il senble que je le porsie me vaut à longue tenue tant seulement. Ponponius dit donc que auccion de larrecin apartient au seignor au serf qui est fuitis.

Ulpians dit : Julians escrit que cil qui a moins de .xiiii. anz puet bien fere larrecin se il est tex que il sache que tricherie est. Et l’en puet pledier à lui par aucion de tort ou de domage quant il a fet larrecin. Mes Modestinus dit que l’en i puet bien ajoindre que ce ne doit pas estre tenu contre les enfanz, et l’en puet bien pledier par la loi qui fet restorer les domages à celui qui a mains de .xiiii. anz qui set entendre que mals est. Et ce est voirs que Labeo dit que cil qui a moins de .xiiii. anz n’est pas tenuz por le larrecin qui est fez par son porchaz.

Paulus dit : Julians dit que por ce ne remoint pas que la chose ne li puisse estre demandee.

Ulpians dit : ce est voirs que pluseurs dient que l’en ne puet pas pledier por champ par aucion de larrecin. {1} Et por ce, demande l’en se aucuns est mis hors d’un champ [171vA] à force, savoir mon se il doit demander comme chose enblee. Et Labeo dit que nenil ; mes Celsus dit que la possession en puet estre demandee, autresi comme de chose movable qui est enblee. {2} Il n’est nule dote que l’en ne puisse pledier par aucion de larrecin por les choses qui sont ostees dou champ, si comme por les arbres ou por les pierres ou por les fruiz que aucuns en a ostez par corage d’enblier.

Paulus dit : se moches sauvages ont fet mel en ton arbre, et aucuns enble ou les moches ou le mel, il n’est pas tenuz à toi par aucion de larrecin, car eles ne furent pas toes ; et il est certaine chose que eles sont en nonbre des choses qui sont prises ou ciel et en terre et en la mer. ¶ {1} Il est certaine chose que li coitiverres qui coitive un champ par deners puet pledier par aucion de larrecin à celui qui enble les fruiz qui sont en estant ; car desque il fussent cuillié, il commençassent à estre suen.

{13} Ulpians dit : se li filz qui est en baill est enblez, il est aperte chose que ses peres a aucion de larrecin.

Paulus dit : qui moine la beste qui li est prestee plus loing que il ne doit, ou euse d’autrui beste malgré suen seignor, il fet larrecin.

Ponponius dit : se li faus procurateurs à un creancier a receu deners d’un deteur par le commandemant à un autre deteur, il est tenuz par aucion de larrecin, et li deners sont à celui qui les paia. ¶ {1} Se je te baille ma chose comme la toe, et tu savoies bien que ele estoit moie, tu fes larrecin se tu l’es fes par corage d’avoir la de gaagn. ¶ {2} Se li sers d’un heritage fist larrecin à l’oir ainz que il eust receu l’eritage, et ses sires li lessa franchise en son testamant, aucion de larrecin apartient contre lui, car li oirs ne fut onques ses sires.

Ulpians dit : se uns des compoignons a fet larrecin de la chose commune, si comme il avient aucunne foiz, l’en doit dire sanz nule dote que aucion de larrecin apartient contre lui.

Paulus dit : se la chose de la seignorie qui a esté enblee est muee par aucunne reson, aucion de larrecin aparti[171vB]ent au novel seignor si comme à l’oir et à celui qui porsiet les biens, et au pere adoptif, et à celui à qui li lés est lessiez.

Paulus dit : cil qui a brisié un huis por cause de tort fet n’est pas tenuz par aucion de larrecin, ja soit ce que les choses en ont esté portees par autres ; car la volenté et li proposemanz de mesfere distincte les mesfez. ¶ {1} Se uns sers a enblé ce que ses sires presta et cil à qui il les presta a bien de coi rendre les, Sabins dit que l’en puet pledier à lui par aucion de chose prestee, et il puet pledier contre le seignor por le larrecin au serf. Et se il rent la chose que li deteurs li a paié, l’aucion de larrecin faut, ou se il quite l’aucion de chose prestee. ¶ {2} Mes se tes sers t’a enblé la chose qui te fut prestee, il n’i a point d’aucion de larrecin, car li perilz de la chose est toz seur lui ; mes l’en puet pledier à lui par aucion de prest. ¶ {3} Cil qui s’offre à fere à autrui besoignes n’a pas auction de larrecin, ne il n’i est pas tenuz, ja soit ce que la chose est perie par sa colpe, mes il doit estre condempnz par aucion de besoignes fetes. Autresi est il en celui qui fet les besoignes comme deffenderres, ou el deffendeur qui doit metre diligence en la chose, ou en celi qui a donné caucion à pluseurs deffendeurs qui furent donné en testamant et a receu toz seus l’aministracion. ¶ {4} Se tu tiens ma chose par autrui don et je la t’enble, Julians dit que tu en puez pledier à moi par aucion de larrecin, se il apartenoit à toi à retenir en la possession ; si comme se tu deffendis mon serf qui te fut donnz en juigement, ou il fut trez par son mesfet, ou se tu le garissis de la maladie par coi tu le peusses retenir se je le chalongasse contre toi.

Paulus dit : quant uns creanciers enporte la chose qui est engagie, il n’apert pas que il toche à autrui chose mes à son gage.

Alpheus dit : se aucuns a fet fosse en autrui terre por foir croie et il en a foie et portee, il est lerres non pas por ce que il la foi mes por ce que il en porta.

Julians dit : se uns larrecins est fez au fil qui est en baill, il en pledera par droit quant il sera hors do bail ; et se la chose que il avoit aloee li est enblee [172rA], ou il est mis hors do baill, il en porra pledier.

Cil meismes dit : se cil qui avoit presté sa chose l’enbla à celui à qui il l’avoit prestee, l’en n’en puet pledier par aucion de larrecin ; car il ne prist fors sa chose, et cil à qui il la presta est delivrez dou prest. Et l’en doit issi entendre, se cil à qui la chose fut prestee i avoit nule droite cause de retenir la. Car se il avoit fet necessoires despenses en la chose qui li estoit prestee, ce fut plus ses preuz à retenir la chose tant que les despenses li fussent rendues que à pledier en aprés ; et por ce avra il aucion de larrecin.

Affricans dit : autresi comme l’en entant que serve fuitive puet fere larrecin de soi, moismes fet ele larrecin quant ele trestorne son enfant.

Modestius dit : cil ne fet pas larrecin qui mostre la voie au serf fuitif.

Marcians dit : li prevoz de la contree ne porra pas fere que cil qui est condempnz de larrecin ne soit mal renomz.

Ulpians dit : se aucuns a toché la chose por avoir la de gaagn, ja soit ce que il mue puis sa volenté et que il la rende à celui qui ele fut, neporquant il est lerres ; car sa repentance ne le delivre pas de ce mesfet.

Se cil à qui la chose fut prestee – ce dit Sabins – en fet larrecin, l’en en puet pledierpledier] perledier dans le ms. à lui par aucion de larrecin et de chose prestee. Et se l’en a pledié par aucion de larrecin, l’aucion de chose prestee est esteinte. Et se l’en a pledié par aucion de prest, excepcion en est opposee à l’aucion de larrecin. ¶ {1} Quant aucuns porsiet une chose comme oirs, l’aucion de larrecin qui est fez n’apartient pas à lui, ja soit ce que la puet gaagnier par longue tenue ; car cil puet pledier par aucion de larrecin qui eust preu se la chose ne fust pas enblee et si senble que li preuz en fut à celui qui i a le domage et ne mie à celui qui la peust avoir de gaagn.

Ponponius dit : se cil qui feignoit que il estoit procurators à mon creancier fist tant que je promis à poier à lui ou à celui que il m’atorna, je ne puis pas pledier à lui par aucion de larrecin ; car il n’i a eu nule chose qui ait esté athochie par corage d’enbler.

Cil meismes dit : cil qui ravist un [172rB] sac plein de deners est tenuz par aucion de larrecin el non de sac et des deners, ja soit ce que il n’eust corage d’enbler les sac.

Cil meismes dit : cil qui a enblé les deners à une cité est tenuz par aucion de larrecin.

Neraces dit : se aucuns a pris comme oirs les biens à celui que il cuidoit que il fut morz et il est vis, il ne fet pas larrecin. ¶ {1} Se l’en a pledié à aucun par aucion de larrecin en son non et l’en en plé puis por autre chose en non de son serf, excepcion ne li doit pas estre donnee de ce que l’en en a ja pledié à lui.

Paulus dit : ja soit ce que la chose qui a esté enblee ne puet estre gaagne par longue tenue se ele ne revient à son seignor, neporquant se il en a eu le pris en juigement ou il l’a vendue au larron, l’en doit dire que la longue tenue i puet valoir.

Cil moismes dit : cil qui eust preu se la chose ne fut pas enblee a aucion de larrecin se il tint la chose par la volenté à celui qui ele estoit, si comme se il l’avoit par loage. Mes cil qui la tient par sa propre volenté, et cil qui fet les besoingnes à l’orfelin comme deffenderres, et cil qui est deffenderres ou procureres n’ont pas aucion de larrecin por la chose qui est emblee. Et cil à qui est uns sers deuz par convence ou par testamant n’avra pas aucion de larrecin se il est enblez, ja soit ce que il ait domage, ne cil qui est plege por un coitiveor.

Triphonius dit : se la chose qui a esté enblee ou porsise par force revient à son seignor qui n’en set rien, il senble que ele remaigne en la poesté son seignor. Et por ce, se aucuns l’achate par bone foi aprés ce que ele est revenue, ele porra estre gaagnie par longue tenue.

Jabolenus dit : se li folons à qui li drap ont esté loé est delivréz de celi cui il estoient qui pledoit à l’un par aucion de loage, Labeo dit que il ne puet pas pledier contre celui qui les enbla par aucion de larrecin. Et se il avoit pledié par aucion de larrecin ainz que li sires pledast à lui par aucion de loage et ainz que sentance fust donnee del larecin, il fut delivrez de l’aucion de loage, li lerres doit estre quités de lui. Et s’il n’i a eu rien de ce, li lerres doit [172vA] estre condempnz à lui ; et ce est por ce que il a aucion de larrecin por tant que il en apartient à lui. {1} Nus ne puet donner autre aide ne consoil de fere larrecin se il ne le puet prendre.

Labeo dit : se aucuns savoit que l’en li enbloit une chose et il ne le deffendi pas, il ne puet pas pledier par aucion de larrecin ; mes Paulus dit encontre. Car se aucuns fet que une chose li soit enblee et il le soffre por ce que il set bien que il ne le puet deffendre, il puet pledier par aucion de larrecin ; et se il le pot deffendre et il ne le deffendi pas, por ce ne remaint pas que il ne le puisse pledier par aucion de larrecin. Et en ceste maniere selt li patrons enbler à celui que il a franchi qui a honte de contrester li presentement.

Ulpians dit : juigemenz est donz contre cez qui gardent les nés ou les tavernes ou les ostiex se larrecin est fez par aucun de cez que il ont en lor servise comment que il soit, ou se li larrecins est fez par l’aide ou par le consoill au mestre de la nef ou de la taverne ou de l’ostel ou sanz lui, ou par aucun de cez que il a en sa nef par conduire la. {2} Et l’aucion est de rendre le domage à doubles. {3} Quant aucunne chose est perdue en la taverne ou en la nef, li taverners ou li metres de la nef est obligz par le bannissement au prevost ; si que il est en la volenté à celui à qui la chose est enblee de pledier contre le taverner ou contre le mestre de la nef par le bannissemnt au prevost, ou contre le larron par citaiene aucion. {4} Et se li taverners ou li metres de la nef reçoit l’aucion, il puet pledier au larron par aucion de larrecin, et non pas cil à qui la chose fut enblee, car li perilz de la chose fut seur celui. ¶ {5} Se li mestres de la nef ou li taverniers abandone son serf à soffrir paine de son mesfet il se delivre. Par coi n’est donc li metres de la nef condempnz, qui i mist si mauvés ? Ou por coi est il obligiez por tot le mesfet el non au franc home et il n’i est pas obligiez el non au serf ? Fors por ce que cil qui i met franc home doit bien savoir quex il est, et l’en li doit pardoner le fet à son serf qui est à son ostel, se il est apareilliez d’abandonner le à soffrir [172vB] poine de son mesfet. Et se il i met autrui serf, il est tenuz por lui, autresi comme por franc home. {6} Et li taverners restore les domages que cil font qui sont en sa taverne por garder la, et que cil font qui i sont por habiter ; mes il ne restore pas cez que li trespassant font, car li taverners ne li ostelers ne pot pas conoistre les trespassanz ne il ne les puet pas refuser ; mes il senble que il ait esleuz cez qui habitent, autresi comme toz jorz que il ne met pas hors, et por ce doit il restorer les domages que il font. ¶ Li metres de la nef ne respont pas del fet as governeors.

Paulus dit : se arbre sont copez en larrecin, Labeo dit que aucion en puet estre donnee par la loi qui fet restorer les domages et par la loi des .xii. tables ; mes Trebaces dit que l’une et l’autre doit estre donnee, si que li juiges face paier par la darreniere tant comme il faut, que tot n’est paié par la premere.

Gaius dit : l’en doit savoir que cil qui copent les arbres en larrecin, et meismement cil qui copent les vignes, doivent estre puni comme larron.

Ulpians dit : pluseurs des anciens cuident que vigne soit contenue par non d’arbre. {1} Et l’en puet bien apeler arbres ierres et roseaus, {2} et ce moisme doit l’en ‹dire› des sauz. {3} Mes se aucuns a fichié verges de sauz por fere sauceie, et aucuns les cope ou arache ainz que eles soient racinees, ¶ Ponponius escrit par droit que l’en ne puet pas pledier comme d’arbres copez. ¶ {4} Car l’en dit pas proprement que ce soit arbres desque il n’est racinz ; autresi dit il de la semence qui est semee por fere nestre arbres ainz que il soient né. {5} Et por ce, senble il que ‹si› les racines sont mortes, et eles sont encore fichees en terre, que ce est arbres ; et Labeo loe ceste sentence ; {6} et dit que ce est arbres qui est esrachiez si que il puet estre plancez arriere. {8} L’en puet donc pledier el non de toz ces arbres que nos avons nommz.

Gaius dit : l’en ne dote pas que se une chose est encor si tandre que ele doie estre tenue por herbe, ele n’est pas el conte des arbres.

Paulus dit : coper est non pas tant solement tranchier mes acorchier entor ou sier ; car l’en ne doit pas dire que cil qui sie tranche. ¶ {1} La cause de ceste aucion est autretele comme cele de la loi qui fet restorer les domages. {2} Cil qui [173rA] a l’usaire en un champ n’a pas ceste aucion ; ne cil qui le tient à ferme, autresi comme il n’ont pas aucion de retenir eve de pluie ne de boner chans.

Paulus dit : se pluseurs ont copé en larrecin une meisme arbre, l’en pledera à chescun por tot. {1} Et se li arbres estoit à pluseurs, la paine sera paié à toz els. ¶ {2} Se mes arbres estant ses racines el champ à mon voisin, il ne les porra pas coper, mes il porra pledier à moi que mes arbres ne soit pas issi ; autresi comme il ne me loist pas à metre mes solives seur son mur.

Ulpians dit : il senble que li arbre sont copé en larrecin que sont copé sanz le seu à leur seigneur et par corage de celer li. ¶ {2} Se aucuns estache tot un arbre et estrepe, il est tenuz par ceste aucion ; car il ne le tranche ne ne sie, mes il est tenuz par la loi qui fet restorer les domages, ja soit ce que toz li arbres n’est pas copez. {3} Neporquant, l’en en plede par droit, autresi comme se il fut copz. ¶ {4} Se aucuns tranche ou sie arbres o sa main, ou il le fet fere à ses serganz, il est tenuz par ceste aucion. Autresi est il se il le commande à un franc home. {5} Et se il ne commande pas à son serf, mes li serf le fet par la volenté son seignor, Sabins dit que aucion apartient contre lui por les mesfez. Et ceste sentance est veraie, {6} ja soit ce que ceste aucion est por soffrir poine, neporquant ele est pardurable. Mes ele n’est pas donnee contre l’oir à celui qui fet le mesfet ; et si est donnee as hoirs à celui qui fet le mesfet. {7} Et li condempnemenz contient le doble de la chose.

Paulus dit : l’en doit esmer combien li sires i a de perz et combien li arbre valent et ce qu’i i remaint. ¶ {1} Cil qui cope arbre en repot il le cope en larrecin. {2} Se il le cope donc, et il l’atoiche por avoir le de gaagn, il est tenuz por lespor les] porler dans le ms. arbres par aucion de larrecin et par aucion de fere les venir avant. {3} Cil qui les coupecoupe] coure dans le ms., cf. lat. Qui per vim sciente domino caedit par force par le seu à celui qui i sont n’en chiet pas en ceste aucion.

Gaius dit : se cil qui a copé les arbres tenoit le champ à loage, l’en puet pledier à lui par aucion de loage ; et li demanderres se puet tenir apaié d’une aucion.

Julians dit : se li arbres est doubles et la jointure part par desus terre, ce n’est que uns arbres. Mes se la jointure est par dedanz terre, il i a autretant d’arbres comme il en ist braches de terre.

Paulus dit : mes [173rB] se l’en a pledié par la loi qui fet restorer les domages por arbres copez quant li antrediz de ce qui est fet par force ou en repost sera contre celui renduz, contre celui qui les aporta, il sera assous se il est assz grevez par le premer condempnement ; mes por ce ne faut pas l’aucion de la loi des .xii. tables.

Jabolenus dit : cil qui a vendu un champ puet pledier par aucion d’arbres copez en larrecin.

Ulpians dit : se aucuns ravist aucunne chose de feu, ou de meson cheete, ou de peril d’eve, ou de nef depecee, ou il en reçoit aucunne chose par tricherie, ou il i fet aucun domage, je donrai juigement contre lui por les quatre dobles dedanz l’an que l’en en porra pledier premerement ; et anprés l’an, por tant comme la chose vaut ; et si en [174vB] donroi juigement contre le serf et contre la mesnie. ¶ {1} Li profiz de cest bannissement est toz aperz et la jostice tres droiturel ; car il apartient au commun preu que nule chose ne soit ravie de tels aveintures. {2} Il convient voer comment nos devons entendre ce qui est ravi dou feu, ou dou feu meisme ou de la où li feus fu. Et il est melz que l’en die que cil ravist dou feu qui ravist la choses qui sont getees por la poor dou feu. Autresi comme nos solons dire que la chose est fete en bataille qui est fete por cause de bataille ; et por ce, se aucunne chose est ravie des leus qui estoient pres de feu, l’en doit dire que le bannissemenz a leu, car ele est ravie dou feu. ¶ {4} Se l’en a poor de feu ou que meson ne chie, et neporquant li feus ne fet nul mal ne la meson ne chiet pas, voions se cist bannissement a leu. Et il est melz que il n’ait pas leu, car nule chose n’est ravie de feu ne de peril d’eve. ¶ {5} Li prevoz dit aprés ou « de peril d’eve » ; et l’en demande savoir mon se ce est el tens que le perill avient ou aprés. Et je croi que ce est des choses qui gisent en la rive de l’eve aprés le perill. Et il est melz que l’en entende en ce meisme tens.

Gaius dit : en ce moisme leu.

Paulus dit : l’en puet melz dire que cist ravist de la tormente, qui ravist tant comme la tormente dure. ¶

{1} Li sainz enpereres Antonius escrit eissi de cez qui ravissent aucunne chose de peril de mer : « vos avez demandé quel paine je cuide que cil doivent soffrir qui ravissent aucunne chose des nés qui sont depecees par tormente. Et il me senble que l’en puet savoir legierement ; car il i a moult grant differance se il prist les choses qui perissoient, ou il ravi cez qui poeent estre sauvees. Se grant proie est donc prise par force, se frans homes l’ont prise, tu lesles] la dans le ms., cf. Ideoque si gravior praeda vi adpetita videbitur, liberos quidem fustibus caesos in triennium relegabis batras de batons et les envoeras en eissil jusqu’à trois anz, ou tu les metras en commune garde. Et se ce sont serf, tu les feras batre de corgies et puis les condempneras en paine de mestal. Et se granz choses n’ont esté ravies, tu porras lessier alier les frans homes quant il seront batu de bastons, et les sers quant il seront batu de corgies. Issi doivent les poines estre juigies selonc la condicion des persones et selonc la qualité do mesfet, si que nule chose ne soit establie [175rA] plus cruelment ne plus molement que si comme la cause le requerra. ¶ {2} Cez aucions sont donees as hoirs et si doivent estre donnees contre les oirs por tant comme il en est venu à els.

Gaius dit : se aucuns a sostret ou ravi sa chose, qui a esté sauvee de perill d’eve ou de feu ou de meson chaesté et mise en autre leu, il est tenuz par aucion de larrecin ou des biens raviz par force ; mesmement se il ne savoit pas dont la chose estoit meüe. Et se aucuns oste la chose de la rive que l’eve a getee hors, pluseur cuident ce meisme ; et ce est voirs se aucun po de tens est passz aprés le torment ; car se ce avient el point meismes que li tormenz est, il n’a point de difference se aucuns ravist la chose en la mer ou seur la rive. Autresi devons nos dire de ce qui est ravi de la nef qui est prise à force ou depecie.

Calistratus dit : nef est depecee ou brisee à force quant ele est robee ou pluingee ou desjointe ou parcee, ou quant chable sont rompu ou les ancres remeses en la mer.

Cil meismes dit : il a esté porveü en pluseurs manieres que rien ne soit ravi de peril de mer, ou que nus estranges ne viegne à cullier ce qui est gité hors. Quant li enpereres Adrians commanda en un bannissement que se cil qui ont les possessions delz la rive de la mer ravissent aucunne chose des nés qui sont alegies ou depecies delz leur possessions, il les rendent par le juigement au prevost à cez qui s’en pleindroint ; et leur rendent quanque il proveront que leur a esté sostret par els, et de cez de quoi il sera prové que il en avront ravi aucunne chose, donra li prevoz grief sentence, autresi comme de larrons. Et ‹por› que la prove de tel mesfet soit plus legiere, il est otroié à cez qui se pleignent de tel chose que il requierent le prevost et dient par devant lui ce que il ont perdu et noment cez qui en sont corpables, si que il soient envoié au juige selon la maniere de lor mesfet ou lié ou par plege. Et il est commandé que caucion soit prise dou seigneur de la possession en coi ce est fet que il sera au juigement. Et li senaz dit que il li plesoit que chevaliers, ne bas hom, ne franc, ne sers ou prince ne viegne cuillir ce qui est mis hors de la nef.

Heraces dit : se ta nef est aportee en mon champ par force de flueve, tu n’as poer d’oster l’en devant que tu m’ois doné caucion de rendre le domage que ele m’a fet. [175rB]

Paulus dit : se aucuns art une meson ou un moncel de froment qui est delz une meson, il est commandé que il soit liez et batuz et puis ars es feu se il le fist à escient. Mes se il le fist par avainture ou par negligence, il est commandé que il restore le domage ; et se il n’a de coi restorer, il soit chastiez plus legierement. ¶ Par non de meson est estendu tote maniere d’edefiement.

Ulpians dit : li prevoz de chascunne contree face que li pecheur ne deçoivent pas cez qui vont par la mer por mostrer lor lumiere de nuiz, si que il cuident que il i ait port, et que il viegnent la por arrivier et depecent leur nés et perdent ce qui est dedanz et li pecheor l’aient de gaiegn.

Marcians dit : se li feus prent en la meson à aucun par aventure, l’en li doit pardoner se ce n’a esté par si grant corpe qui soit procheine à ostage ou à tricherie.

Ulpians dit : il est certaine chose que il loist à chescun à cuillir ce que la tormente li a tolu ; et issi escrit li enpereres Antonius. ¶ {1} Se cil qui à escient a mis le feu en aucunne cité est bas hom, il selt estre bailliez as bestes sauveges à devorer ; et se il est en aucunne digneté, il doit soffrir paine capital ou estre envoiez en pardurable essil.

Ulpians dit : l’en apele generaument tort ce qui n’est pas fet à droit ; et especialment est apelz tort fez ledengement. Aucunne foiz entent l’en par non de tort fet le domage que aucuns fet en sa corpe, si comme nos solons dire en la loi qui fet restorer les domages. Aucunne foiz apelons nos tor desloiauté, car quant aucuns done desloial sentence, il fet tort. Et ce que il fet est sanz droit et sanz jostice. ¶ Ledengemenz est autresi comme despiz. ¶ {1} Labeo dit que tort est fez ou par chose ou par paroles ; ‹…› par paroles quant l’en ne met main sus nul home ne sus sa chose, si comme quant aucuns est lesdangiez. {2} Et tote maniere de tort est sus cors ou seur digneté ou seur male renomee ; seur cors si comme quant l’en fiert ou bote aucun ; seur digneté si comme quant l’en tost à une feme son mari qui est en aucunne digneté ; seur male renomee quant l’en velt despuceler une feme par force.

Paulus dit : mes se torz est fez à l’ome, sa feme n’en puet pas pledier ; car li home doi[175vA]vent deffendre les femes et ne mie les femes les homes.

Ulpians dit : il a esté raconté que tuit cil qui puent soffrir tort fet le puent fere. {1} Neporquant, aucun sont qui ne le puent fere, si comme li forsenz et cil qui a moins de .xiiii. anz qui ne set encore que tricherie est ; car torz puent estre fez à cez mes il ne le puent fere. Por ce que torz est fez par corage de tort fere, l’en doit dire que se cist botent aucun ou il le ledeingent, il ne senble pas que il facent tort. {2} Et issi puet estre fez torz à celui qui n’a point de sens, mes il ne le puet pas fere se il ne set que il fet tort et à qui il le fet. {3} Et por ce, se aucuns fiert un autre par geu ou il le bote, il n’est pas tenuz par aucion de tort fet. ¶ {4} Se aucuns bat un franc home por ce que il cuide que il soit ses sers, il n’est pas tenuz par aucion de tort fet.

Paulus dit : se ge voloie ferir mon serf, et ge te feri malgrié mien, qui estoies delz moi, je ne sui pas tenuz par aucion de tort fet.

‹…› por ce que il dit que il a esté batuz ou botez, ou que l’en a entré en sa meson. Cele loi done aucion por trois causes, ce est quant aucuns est botez ou batuz ou l’en a entré en sa meson. ¶ Il apert donc que toz li torz qui est fez à la main est compris en ceste loi. {1} Il a tel difference entre boter et batre, si comme Offilius dit, que batre est o dolor et boter est sanz dolor. ¶ {2} Nos devons entendre meson non pas tant solement la proprieté de la meson mes le hergergement. Et por ce, se aucuns habite en sa propre meson ou en cele que il a aloee ou qui li est prestee, ceste loi avra leu. {3} Et se aucuns habite en granche ou en loge qui soit en cortiz, l’en doit dire ce moisme. {4} Et se li sires avoit baillié à loage le champ où li torz fu fez, il n’en pledera pas mes li coitiverres. {5} Et se l’en entre ou champ à son seignor qui est coitivez, Labeo dit que li sires dou champ n’a pas aucion par ceste loi ; car il ne puet pas avoir son herbergement en totes ses mesons. Et je croi que ceste loi apartient en totes les habitacions en coi li sires puet habiter, ja soit ce que il n’ait pas por tot son manoir. ¶ Et sese] sa dans le ms. aucuns demore à Rome por apprendre, sanz dote il n’i a pas her[175vB]bergement ; et neporquant, l’en puet dire que se l’en entre en sa meson, ceste loi a leu, mes ele n’apartient pas as ostex où l’en ne demore que une nuit, mes à cez où l’en est à plus lonc terme. ¶ {6} L’en demande se li peres puet pledier par ceste loi por le tort qui a esté fez à son fil qui est en baill. Et il plest à toz que il n’en puisse pas pledier, mes l’aucion de tort fet qui est donnee par le prevost apartient au pere, et cele qui est donnee par ceste loi apartient au fil. ¶ {7} Li filz qui est en bail puet pledier par ceste loi por totes causes, ne il ne doit pas doner caucion que ses peres avra estable ce que il fera ; car Julius escrit que li filz qui plede par aucion de tort fet ne doit pas estre contrainz de doner caucion. ¶ {8} N’est ostroié par ceste loi que li demanderres se meste seur le seremant au deffendeor, si que li deffenderres vut que il n’a pas fet le tort. ¶ {9} Se aucuns escrit ou ordene ou mis avant libelle qui apartiegne à la male renomee à aucun, ou il la porchacie par tricherie que aucunne de cez choses soit fete, ja soit ce que il l’oit fete en autre non, il est commandé en la loi que il ne puisse porter testemoine ne fere testamant. ¶ {10} Par cele meisme paine est tenuz selonc le consoill au senat cil qui met avant – en grieu – ou sanz escriture aucunne chose qui apartient à diffamer aucuns, et cil qui porchace que aucuns soit achetez ou venduz. {11} Et se la persone qui est acusee est franche ou serve, cil qui l’acussa par cel libelle doit estre condempz selonc la maniere de la sustance à la persone qui est acusee, si comme li juiges juigera.

Paulus dit : la grandeur de la plaie fet la cruelté dou tort fet ; et aucunne foiz croit il por le leu où la plaie est, si comme quant ele est en l’oil.

Ulpians dit : mes por ce que nos disons que torz fez est plus cruel par chose, l’e‹n› demande savoir mon se ce est quant li torz est fez au cors tant solement, ou quant il est fez en autres choses, si comme en robe desciree ou en compoignon tolu ou en ledenge dire. Et Ponponius dit que, sanz atochier à la persone, puet l’en dire que li tors fez est cruelx. {1} Car se aucuns fiert ou navre aucun legierement en place ou en marchié, il fet cruel tort. ¶ {2} Il a po de difference se tex torz est fez à celui qui est en baill ou à celui qui en est hors, car il est juigiez à cruel forfet. ¶ {3} Se aucuns sers a fet [176rA] un tort cruel, se ses sires est presanz, l’en en puet pledier à lui ; et se il n’est presanz, li sires doit estre bailliez au prevost qui le sozmete à torment. ¶ {4} Se aucuns assoie à oster à feme chastoe ou à home ou à naturelement franc ou à celui qui a esté franchiz, il sera tenuz par aucion de tort fet. Et se il est sers, ceste aucion avra leu.

Paulus dit : l’en assaie à tolir chastee quant l’en velt fere que cil qui est chastes ne soit pas chastes.

Gaius dit : se aucuns velt ramener aucun en servage qui soit en franchise, et il set bien que il est frans, ne il ne le fet pas por garder la droiture que il a de chalongier le, il est tenuz par aucion de tort fet.

Ulpians dit : Labeo demande se aucuns met home hors do sans par medecinement ou par autre maniere, savoir mon se aucion de tort fet i a leu. Et il dit que oïl bien. ¶ {1} Se aucuns n’a pas esté toichiez mes la main a estee levee seur lui et il a esté espoentez autresi comme se l’en le vosist batre, aucion de tort fet li apartient. ¶ {2} Li prevoz dit : « je donroi juigement contre celui qui a dit ledanges à aucun contre bones mors, ou qui a fet par sa tricherie que autres li ait dit ». {3} Labeo dit que ledengemenz est tort fez. {4} Ledengemenz est fez quant pluseurs vilaines paroles sont dites à aucun. ¶ {5} Mes li prevoz dit contre bones mors, et por ce mostre il que toz ledengemenz n’est torz fez, mes cil qui est contre bones mors, ce est qui apartient à diffamer aucun. ¶ {6} Il moismes dit contre les bones mors, et ce doit estre entendu non pas tant solement contre les bones mors à celui qui dit les lesdanges, mes generalment contre les bones mors à tote la cité. {7} Labeo escrit que ledengement puet estre fez non pas tant solement à celui qui est presanz mes à celui qui est hors do païs ; et por ce, se aucuns vient à ta meson quant tu n’i est pas et il te ledenge, il te fet tort. Et ce moismes doit l’en dire se il dit vilenie de toi en une assenblee ou en une taverne. ¶ {8} Cil qui mesdit tant solement ne fet pas le ledangement, mes cil qui semont autre de mesdire. ¶ {9} Ceste parole à aucun n’i est pas mise sanz reson ; car se aucuns ledenge, et l’en ne set qui, il n’i a point d’aucion. ¶ {10} Se aucuns a esté en porchaz que uns autres fust ledengiez et il n’a pas esté ledan[176rB]giez, il n’i est pas tenuz. {11} Et de ce apert il que toz mesdiz n’est pas ledengemenz, mes cil sanz plus qui est diz o noise ; {12} qui que le die, ou uns ou plusors, ou qui est entre genz ; ne o noise n’est pas proprement lesdengemenz, ainz est dit por diffamer. ¶ {13} Se l’en demande consoil à aucun, à estrelogien ou à aucun devineur, et il dit que telx est lerres qui n’est pas lerres, l’en porra pledier à lui par aucion de tort fer. {14} L’aucion qui nest de ledengement ne doit pas estre donee as oirs ne contre les hoirs. ¶ {15} Se aucuns ledange femes se eles sont vestues de robes à foles femes, il ne mesfet pas tant assz comme se eles fussent vestues de robes à prode femes. Se feme n’est donc pas vestue de robe à prode feme, et aucuns la claime fole feme de son cors, ou il tost son compaignon, il n’est pas tenuz par aucion de tort fet. {16} Nos apelons compaignon celui qui va en sa compoignie ou qui la suit, qui que il soit, ou franc ou serf, ou home ou feme. {17} Il ne senble pas, ce dit Labeo, que cil qui li toille son compoignon qui commence à mener l’en, mes cil qui parfet ce que il a commoincié, si que il n’a point de compoignon. {18} Et cil n’i est pas tenuz tant solent que l’en moine par force, mes cil qui a amonesté son compoignon tant que il l’a lessé. ¶ {19} Cil qui li tost son compoignon n’est pas tant solement tenuz par ce bannissement, mes cil qui l’apele de folie ou qui l’en suit. ¶ {20} Apeler est asseoir par bele proiere à fere li brisier sa chastee ; mes il est tenuz par aucion de tort. ¶ {22} Autre est apeler que suivre. Cil apele qui par paroles assoie à fere li brisier sa chastee ; cil en suit qui va sovant entor li sanz mot dire. ¶ {23} Il convient que nos sachons que tuit cil qui la suivent et tuit cil qui l’apelent ne puent pas estre tret en cause par cest bannisment ; car se aucuns le fet par geu, ou par servir honestement, il n’en chiest pas en ce bannissement, mes cil qui le fet contre bones muerz. ¶ {24} Jeje] se dans le ms. croi que li espossiez puet estre receuz à pledier par aucion de tort fet ; car li torz qui est fez à s’apousee li torne à depit. ¶ {25} Li prevoz dit : « nule chose ne soit fete por diffamer ; et se aucuns fet contre ce vengence, en soit prinse selonc ce que la chose [176vA] sera ». ¶ {26} Labeo dit que cist bannissemenz est por nient proposez, por ce que nos en poons pledier par la general cause de tort fet. Mes il senble à Labeo, et voirs est, que li prevoz vost parler especiaument de cele chose ; car ce sont choses notables et se eles ne sont notees especiuament, il senble que eles soient despités. {27} Li prevoz deffendi generalment que nule chose ne fust fete por diffamer autrui. Et por ce, se aucuns fet ou dit chose par coi autres soit diffamz, aucion de tort fet avra leu contre lui. Ce sont les choses que sont fetes de coi male renomee vient : se aucuns se vest de vesteure lede ou ordre, ou lesse croistre sa barbe ou ses chevous por gaber autrui, ou il escrit ou dit ou chente aucunne chose contre la renomee à aucun. ¶ {28} Ce que li prevoz dit : « et se aucuns fet contre ce vengance, en sera prise selonc ce que la chose sera », doit estre issi entendu que la vengence au prevost soit plus pleniere. Et se aucunne chose le muet, ou par celui qui plede par aucion de tort fet, au par devers celui à qui il plede, ou par devers la chose, ou par devers la qualité dou tort fet, il n’oie pas celui qui demande. ¶ {29} Se aucuns a baillié libelle au prince, ou à aucun de sa mesnie por acuser aucun, et il ne porsiet pas le plet, Papinians dit que l’en puet pledier à lui par aucion de tort fet. ¶ {30} Il meismes dit que cil qui vendi la venture de la sentence, autressi comme se il deust paier deniers, doit por ce estre castiez par le prevost o bastons, autresi comme se il fust condempnz par aucion de tort fet ; car il senble que il a fet tort à celui qui dona la sentence. ¶ {31} Se aucuns a porpris les biens à un autre, ouou] en dans le ms. une sole de ses choses, il est tenuz par aucion de tort fet. ¶ {32} Et se aucuns velt vendre autrui chose, et il dit por moi diffamer que je li ai baillié en gage, Servius dit que je puis pledier à lui par aucion de tort fet. ¶ {33} Se l’en apele celui qui rien ne li doit son deteur por fere li tort, il est tenuz par aucion de tort fet. ¶ {34} Li prevoz dit : « se aucuns bat autrui serf contre bones mors, et il dit que il l’a fet par le commadement son seigneur por fere enqueste, je donroi juigement contre lui. Et se l’en dit que aucunne [176vB] autre chose i ait esté fete, je en donroi juigement quant la cause sera coneue ». ¶ {35} Se aucuns fet tort à serf por fere le à son seignor, il me senble que li sires puet pledier en son non par aucion de tort fet. ¶ Se il ne le fist pas par l'otroi(?) son seignor, li prevoz ne doit pas lessier sanz vengence le tort fet qui a esté fez au se‹r›f ; meesment se ce fu por fere enqueste. ¶ {36} Se aucuns a batu le serf qui estoit communs à lui et à un autre, il n’est pas tenuz par aucion de tort fet ; car il l’a fet comme ses sire. {37} Et se cil qui en avoit l’usaire l’a fet, li sires n’en pledera pas à lui ; et se li sires l’a fet, cil qui a l’usaire n’en pledera pas. ¶ {38} Il dit contre bones mors, car tuit cil qui les batent n’i sont pas tenu, mes cil qui les batent contre bones mors ; et se aucuns les bat por chastier le ou por amender, il n’i est pas tenuz. {39} Et por ce demande Labeo : se uns mestres d’aucunne baillie bat mon serf, savoir mon se je en puis pledier contre lui, autresi comme se il l’eust batu contre bones mors. Et il dit que li juiges doit enquerre que li serssers] sires dans le ms. fesoit quant il le bati ; car se il le bati por ce que il essioit à avoir ennor et biaus aornemenz et que s’esgaioit, il doit estre assous. ¶ {40} L’en dit que cil bat qui fiert des poinz. ¶ {41} Nos apelons « enqueste » torment et doleur de cors por fere reconoistre verité. Nue demande et legier espoentement n’apartient donc pas à cest bannissement. {42} Se aucuns fet donc enqueste par le commandemant au seigneur, et il passe mesure, Labeo dit que il est tenuz par aucion de tort fet. ¶ {43} Li prevoz dit : « se l’en dit que aucunne chose ait esté fete, je en donroi juigement quant la chose sera coneue ». Et por ce, se uns sers est batuz ou tormentez por fere enqueste, aucion de tort fet apartient contre lui qui ce fist sanz connoistre la cause. Mes se autres torz li a esté fez, ele n’apartient pas devant que la cause soit conneue. {44} Car li prevoz ne promet pas juigement el non do serf por totes manieres de tort fet ; car se il est legierement feruz, ou uns legiers mesdiz li est diz, li prevoz n’en done pas aucion. ¶ Mes se il est diffamz par aucun mesfet ou par aucunne chose qui soit escrite, je croi que la conoissance de la cause [177rA] doit estre offerte au prevost et la qualité dou serf ; car il a moult à gart quex li sires est ou bons ou mauvés, ou fos ou sages. Li prevoz prendra donc garde au tort qui est fez et à la persone à qui il est fez ; et issi otroiera il que aucion en soit meue ou il le deffendra. ¶ {45} Li torz qui est fez au serf retorne aucunne foiz à son seigneur et aucunne foiz n’i retorne pas. Car se li sers le tint por franc, et cil qui li fet le tort ne savoit pas que il fut mis sers, et se il le seust il n’en eust point fet, Mela escrit que je ne puis pas pledier à celui qui li fist le tort. ¶ {46} Se aucuns a pledié par aucion de tort fet por son serf qui a esté batuz et il plede aprés por le domage, Labeo escrit que ce n’est pas une meisme chose, car l’une aucion apartient au domage que aucuns fet en ses corpes et l’autre au despit. ¶ {47} Se je ai l’usaire d’un serf et tu en as la proprieté et il est batuz ou enqueste fut feste par lui, aucion de tor fet apartient plus à toi que à moi. ¶ {48} Autresi est il se l’en bat ton serf que je porsoie par bone foi, car l’aucion en apartient plus à toi que à moi. ¶ Et se aucuns bat le franc home qui me servoit par bone foi, il convient destinter, car se il le fist en despit de moi, aucion de tort fet m’apartient ; autresi est en autrui serf qui me sert en bone foi, si que totes les foiz m’apartiegne aucion de tors fet que li tortz li est fez en despit de moi. Et se li torz est fez por le serf, l’aucion en sera donnee à son seigneur ; autresi puet l’en distincter en celui qui en a l’usaire. ¶ {49} Se je bat le serf à pluseurs, il est certaine chose que aucion de tort fet apartient à toz els contre moi.

Paulus dit : il n’est pas biens ne droiz que cil qui a acusé malfeteur soit condempnz por cele chose ; car il est bone chose que li pechiez as malfeteurs soient puni et seu. ¶ {1} Se uns sers a fet tort à un autre serf, l’en en doit pledier autresi comme se il l’eust fet à son seigneur. ¶ {2} Se torz a esté fez à la fille mariee qui est en la poeté son pere et ses peres et ses mariz en pledent, Ponponius dit par droit que cil qui fit le tort doit estre condampnz au pere en autretant comme il fut condempnz se ele fust veve, et au mari en autant comme il fust condempnz se ele ne fust à nul ho[177rB]me. Et se feme mariee n’est en la poesté à nul home, por ce se sis mariz plede en son non de tort qui li a esté fez, ne remaint pas que ele n’en puisse pledier en son non. ¶ {3} Se cil qui ne me conoist pas me fet tort, ou il cuide que je soie Tyce et je suis Sey, il est certaine chose que il me vost fere le tort ; car je sui bien certains qui je sui, ja soit ce que il cuide que je soie uns autres ; et por ce ai ge aucion de tort fet. ¶ {4} Se aucuns cuide que cil qui est en bail en soit hors et il li fet tort, il ne senble pas que il le face au pere, ne plus que cil le fet au mari qui le fet à sa feme et cuide que ele soit veve ; car li torz n’est pas fez en leur persone ne cil qui le fist n’ot regart fors à celui à qui il le fist, autresi comme se il fust hors do baill. {5} Et se il savoit bien que il estoit en baill, mes il ne savoit à qui, sis peres en porra pledier en son non ; et autresi en puet li mariz pledier se cil qui fist le tort à sa feme savoit bien que ele estoit mariee mes il ne savoit à qui ; car desque il savoit ce, il est certaine chose que il voloit fere tort au pere ou au mari qui que il fussent.

Gaius dit : se mes creanciers à qui ge fui apareilliez de paier semont mes pledes en despit de moi, il est tenu à moi par aucion de tort fet.

Modestius dit : se uns creanciers seigne la meson à son deteur por cause de fere li tort sanz l’autorité à celui qui avoit poer d’ostroier le, li deteurs porra pledier à lui par aucion de tort fet.

Sabins dit : li pris de tort fet ne doit pas estre fez selonc le tens en coi la sentence est donnee, mes selonc celui en coi li torz fu fez.

Ulpians dit : se frans home est pris comme fuitif, il puet pledier par aucion de tort fet.

Paulus dit : se aucuns entre en autrui meson malgré à celui qui ele est, l’en en puet pledier o lui par aucion de tort fet.

Ulpians dit : se aucuns deffant un autre que il ne vende son propre serf, cil en puet pledier par aucion de tort fet.

Cil meismes dit : se l’en a geu à serve par force, aucion de tort fet en sera donee à son seigneur ; ou se ele a esté celee, ou aucunne chose li a esté fete par corage d’embler, aucion de larrecin li apartient. Et se aucuns a despucelé feme [177vA] ainz que ele soit en aage, aucun cuident que l’aucion de la loi qui fet restorer les domages li apartiegne.

Paulus dit : se aucuns siet que uns enfes soit mes fiz ou mes sers et il le fet joier, ja soit ce que li enfes s’i consente, neporquant il senble que torz me soit fez, si comme se il le fet joier as tables o à autre geu. Mes ce puet avoir leu totes les foiz que cil qui li amoneste a corage de tort fere ; se cil qui ne set qui est sires à celui que il a amonesté puet doner mauvés conseil, et por ce est necessere l’aucion de serf corrumpu.

Cil meismes dit : se l’image ton pere qui estoit seur son monument est depecee à pierres, Labeo escrit que tu n’en puez pas pledier par aucion de sepulcre brisé mes de tort fet.

Ulpians dit : aucion de tort n’est pas contee en noz biens devant que li plez soit entamnz.

Paulus dit : se tu franchis ou estranges le serf par quoi aucion de tort fet t’apartient, l’aucion te remaint.

Ulpians dit : l’en set bien que aucion n’apartient pas au serf qui est franchiz por le tort qui li fu fez tant comme il fu en servage, ja soit ce que li filz qui est hors do baill ait aucion por le tort qui li fu fez tant comme il fu en baill. {1} Neporquant, li torz fez ne doit pas estre proisiez par un meisme pris en la persone au pere et en cele au fill.

Paulus dit : quar il puet avenir por la digneté au fil que graindres torz est fez à lui que au pere.

Ulpians dit : il ne loist pas as metres à fere aucunne chose à tort. Se uns metres fet donc aucunne chose à tort ou comme bas hom, ou por fiance de sa digneté, il puet estre trez en cause par aucion de tort fet. Mes l’en dote se ce est tant solement comme il est en la metrise ou quant il l’avra lessie. Mes il est voirs que, se la metrise est tele que il ne puisse estre apelz en droit, il convient entendre tant que il en soit hors. Et se ce est de meneurs metrises, ce est de celes qui sont sanz juridiction, il puet estre trez en cause tant comme il sunt en la metrise.

Paulus dit : se aucunne chose est fete selonc bones mors por anorer la chose commune, ja soit ce que ele tort au despit à aucun, neporquant, desque li metres ne li fist pas por tel penssé, il n’ost pas tenuz par au[177vB]cion de tort fet.

Gaius dit : se pluseur serf ont batu ensenble aucun ou il l’ont ledengé ensenble, li mesfez est propres à chescun ; et de tant comme il furent plus à fere, le mesfet est il graindres. Et encor puet l’en melz dire que il i a autretant de mesfez comme il i a de malfetors.

Julians dit : se je voill pledier au pere el non dou fil par aucion de tort fet et il done procurator, il ne senble pas que li filz soit deffenduz se caucion n’est donee de paier ce qui sera paié. Et por ce sera donnee l’aucion contre le fil autresi comme se li peres ne le deffendist pas.

Marciaus dit : il est contenu as establissemenz as princes que les choses qui sont mises en commune remembrance por diffamer aucun soient esfacies.

Scevola dit : il est establi el consoil au senat que nus ne port l’image l’enpereor por fere tort à autre ; et qui fera contre ce soit mis en communs leus.

Marciaus dit : li sainz enpereres Sevoirs escrit eissi à Diogene : « cil qui est dampnz de cruel tort fet ne puet pas estre en l’ordre de curials ; ne l’error au prevost ne te doit rien valoir, ne cele à celui qui prononça de toi aucunne chose, ou à cez qui contre la forme de droit cuident que tu remainsisses en l’ordre des curials ».

Neraces dit : se toz a esté fez au fil, l’en ne doit pas deffendre au pere que il n’en plede en deus juigemenz en son non et el non au fil.

Paulus dit : il ne convient pas que cil qui apelent lesdengent les juiges, et se il le font il sont diffamé.

Gaius dit : cil qui muet à tort aucion de tort fet soit envoiez en essil ou mis hors de s’ordre.

Jabolenus dit : se cil qui esta en la meson de soz fet fumee qui grieve celi qui est en cele desus, ou cil qui est en cele desus giete ou espant aucunne chose en cele de soz, Labeo dit que l’en n’en puet pas pledier par aucion de tort fet. Mes ge croi que ce soit faus se ce fu par corage de tort fet.

Hermogenes dit : l’en selt establir por tort fet paine hors d’ordre, selonc la cause et selonc la persone ; si que li serf sont batu et puis rendu à leur seigneurs, et cil qui ont esté franchi sont chastié par batement ou par eissil temporel, ou par deffensse d’aucunne certaine chose.

Paulus dit : cil qui commovent autrui femes de pechier et cil qui volent brisier les mariages sont puni hors d’ordre por la volenté de lor desloial tricherie, ja soit ce que il n’aient pas acompli ce que il voloient. ¶ {1} Torz est fez contre bones mors, si comme quant l’en aboivre aucun de fumee corrumpue, ou quant l’en le conchie de boe, ou quant l’en ordoie les eves ou les conduiz ou les las, ou aucunne autre chose por fere tort à aucun ; et de cez selt l’en prendre grief vengance. {2} Se aucuns amoneste à un enfant à abandoner soi à pechier contre nature et il li tout son compoignon ou il le corrump, ou il requiert pucele de folie ou il porchace en aucunne maniere que ele perde sa chastee, ou il prent loer por amonestier li, se li pechiez est parfez, il est puniz par paine capital ; et se il n’est perfez, il soit envoiez en essil par tant comme il en fist.

Ulpians dit : il ne convient pas que desloial compoingie soit assenblee por couverture de religion ou de rendre veu.

Marcians dit : li saint enpereor Sevoirs et Antoines escritrent que la feme qui a porchacie que ele n’ait enfant soit envoie en temporel essil ; car il n’est pas droiz que ele soit sanz poine de ce que ele fet son mari sanz enfanz.

envoié en essill

Cil moismes dit : cil qui entrent en autrui meson par corage d’enbler doivent estre puni plus que larron. Et por ce, sont il doné à fere comme ovre à tens, ou il sont batuz de bastons et puis lessier aller, ou envoiéou envoié] euoie dans le ms., cf. lat. aut ad tempus relegantur en essill à tens. {*47.11.8} Il i a un crimes qui apartient à l’execucion au prevost, si comme se aucun dient que leur instrumant sont perdu ; car li saint frere donerent au prevost de la cité l’execucion de ceste chose. ¶

Il i a uns crimes qui solent estre puni selonc les costumes des contrees ; {*47.11.10} si comme en Egypte, cil qui depecent ou rompent le terral qui tient l’eve en son cors, il sont puni hors d’ordre. Mes ce es selonc la condicion et selonc la quantité do mesfet ; car li un sont puni par commune ovre et li autre par mestal selonc lor digneté.

Paulus dit : se loiers a esté pris por lessier à acuser aucun de crime, et l’en faint que ce a esté par commandemant au prevost, li prevoz de la contree do[178rB]it commander que li loiers soit renduz et prendre vengence do mesfet.

Ulpians dit : li enpereres Adrians escrit eissi quant l’en li demanda consoil de cez qui enblent les bestes comment il doivent estre puni : « quant cil qui enblent les bestes sont puni par tres dure poine, il sont dampné ou glaive ». Mes il ne sont pas si cruelment puni par tot, mes la où cist mesfez est plus sovent fez ; et aillors i sont aucunne foiz doné à servir à tens. {1} Cil qui enblent les betes sont proprement cil qui les sostreent des pestiz et des fous et les emmoinent. Et ce est leur estuide et autresi comme uns arz par coi il ostent les chevaus et les bues d’avoc les autres ; mes se aucuns enmoine une berbiz que il trove seule, ou un cheval qui est remés aprés les autres, il est lerres, mes ce n’est pas de tel maniere. {2} Et cil qui enble un porc ou une chievre ou un moston ne doit pas estre puniz si grievement comme cil qui enblent greigneurs bestes. {3} Et ja soit ce que li enpereres Adrians establi poine de mestal ou de servise ou de glaive, neporquant ne en plus honeste leu n’apartient pas à ceste poine, ainz doivent estre envoié en essil ou osté de lor ordre. Et cil qui les emmoient o armes ne soient pas sozmis as bestes. {4} Cil qui en amoine les bestes de coi il pledoit por avoir en la proprieté doit estre renvoiez au citein examinement, si comme Saturnius escrit ; et ce est voirs se il ne le fist pas por enbler les, mes por ce que il li senbloit que il i avoit droit.

Cil moismes dit : li crimes de mener en bestes n’est pas des communs juigemenz, ainz est melz larrecins. Mes por ce que cil qui les emmoinent joint sovent armes, se il sont pris, leur mesfez selt estre puniz griefment.

Calistratus dit : li nombres des oielles fet ou simple larron ou meneur de bestes ; car aucun cuident que .x. berbiz facent ou fou, et .v. porcel ou .iiii., mes uns chevaus ou uns bos soffist au crime de mener en bestes. {1} Et cil doit estre puniz plus griement qui emmoine une beste de l’estable son seigneur que se il l’en menast des chans. {2} Et cil qui sovent le font que cil qui ne le fet [178vA] que une foiz. ¶ {3} Il est contenu es letres l’enpereor Adrian par quel poine cil doivent estre puni qui recestent cez qui emmoinent les bestes, ce est que il soient envoié par .x. anz en essill hors de la terre de Lonbardie.

Ulpians dit : cil qui traïst la partie que il doit sostenir et aide à l’autre est apelz prevaricatoires. Et Labeo dit que il est issi nomez por ce que il se varie en diverses parties. ¶ {1} Cil est proprement prevaricateurs qui a acusé de commun crime et puis lesse le plet ; car avocaz n’est pas proprement apelez procurateur ; mes’il traïst la cause que il doit sostenir ou en commun juigement ou en privé, il doit estre puniz hors d’ordre.

Cil meismes dit : l’en doit savoir que paine hors d’ordre est orendroit enjointe à cez qui traïssent la partie que il doivent sostenir.

Marcians dit : se il est pronuncié en cause de commun juigement que cil soit prevaricateurs de qui il est deffendu que l’en ne plede de ce que il a acusé à tort à son esciant, il sera mal renomez.

Henulcius dit : li accuserres qui a esté condempnz que il atraie la cause que il devoit sostenir ne puisse pas puis acuser selonc la loi.

Paulus dit : il a esté escrit par nostre enpereor et par son pere que, quant crime sont opposé hors d’ordre, li prevariteur sont tenu par cele meisme paine par coi il fussent tenu se il eussent mesfet contre la loi ; car li deffenderres est assous se li acuserres est convoincuz que il ait traï la cause que il devoit sostenir.

Ulpians dit : en totes causes, fors en cele de sanc, cil qui corrump son aversere qui l’acuse est tenuz por convoincuz par le consoil au senat.

Marcians dit : ce est tres mauvese maniere de genz que receteur, sanz coi l’en ne se puet tapir longuement ; et il est commandé que il soient puni autresi comme li larron. ¶ Et en cele moisme cause sont cil qui peussent bien prendre les larrons et prenent deners ou une partie de ce que il ont enblé por lessier les aler.

Paulus dit : li parent et li coisin as larrons qui les recetent ne doivent pas estre assous ne puni si comme li autre ; car lor mesfez n’est pas ivels à cez qui reçoivent les larrons qui ne leur apartienent.

[178vB] Ulpians dit : li saint frere escritrent de cez qui sont eschapez de chartre brisee que se il en sunt issu par les portes que il ont brisees ou par conspiracion que il aint fetefete] fere dans le ms. o les autres qui estoient o els en la preson, il soient puni par poine capital. Mes se il sont eschapé par la negligence as gardes, il doivent estre puni plus legierement. {1} Et li plus povre seulent estre mis à fere le commun servise ou pardurablement ou temporelment. ¶ Et li plus honeste seulent estre de leur ordre ostez à tens ou essir dou païs ; car nule especial poine ne lor est enjointe es establissemenz as princes. Et por ce, quant la cause sera coneue, li juiges les punira à sa volenté. {2} Autresi doivent estre puni cil qui brisent les mesons. Mes li enpereres Marc commanda que uns chevalers de Rome, qui avoit brisé une meson et en avoit porté deners, se tenist par .v. anz d’entre‹r› en la contree d’Aufrique et en Rome et en Lonbardie. ¶ Il convindra donc establir contre les briseors et contre les autres, quant la cause sera conneue, comment il doivent estre puni selonc le mesfet ; por tant que l’en ne past pas el bas home la poine de fere leur fere communs servises, ne es plus honestes cele d’envoier les en essil.