Ponponius dit : il ne loist pas à feme à acuser home de commun crime se ele ne porsuit la mort à son pere ou à sa mere ou à ses enfanz, ou à son patron ou à sa patrone, ou à leur neveu ouou] ou ou dans le ms. à lor nices ou à lor paranz.¶

Communs acusemenz est otroiéotroié] trovz (?) dans le ms., cf. lat. Certis ex causis concessa est mulieribus publica accusatio à feme por certaine cause, si comme s’ele porsuit la mort de cez et de celes à quoi eles sont tenues par la loi. Et ce meismes establi en loi que Cornelius fist do testamanz à celui que ses peres et sa mere franchi. ¶ {1} Il est otroié à l’orfelin à porsuivre la mort son pere par le consoil à celui qui l’a en garde ; et si en otroie à l’orfeline que ele porsive la mort de son ael par la loi des testamanz. Car li enpereres Vaspasians otroia à son orfelins que il pledassent des testamanz leur peres, mes il en puet pledier par l’entredit de porter avant les tables dou testamant.

Paulus dit : l’inscripcion des libelles doit estre tele par devant le prevost ou par devant le viconte. ¶ Tices dit que il acuse d’avotire Meue, por ce que il dit que ele fist avotire o Sey en cele cité, en la meson à celui, en ce mois et quant cil estoient conseillier. Car sanz dote li leus doit estre senefiez, en coi l’en dit que li avotyres fut fez, et la persone o qui il fut fez, et li mois ; car issi est il establi en la loi que Julius fist des avotires. Et issi est il commandé generaumant à toz cex qui acusent aucun de commun crime ; mes nus n’est contrainz de comprendre i malgré sien le jor ne l’ore. ¶ {1} Et se li libelles n’est ordrenez selonc la loi, li nons à celui qui est acusez en est effaciez, et puis le puet l’en acuser de rechief. {2} Cil qui balle libelle doit fere subscripcion ou autres por lui se il ne set letres. {3} Et se il oppose à son aversere autres crimes, si comme se il tint bordel [190vA] en sa meson, ou que il lessa aler celui qui estoit repris en avotire, ou que il prist loer por celer avotire, tot ce doit estre compris ou libelle. ¶ {4} Se li acuserres muert ou il est enpechiez por autre cause si que il ne puet acuser, li nons à l’acusé est esfacez do libelle se il le requiert. Et ce est establi en la loi que Julius fist de force et ou consoil ou senat, si que il lise à un autre à acuser le tot de rechief ; mes il convient voer dedanz quel terme, et sanz dote .xxx. jor i doivent estre gardé.

Macer dit : se nos savons li quel ne puet pas acuser, nos poons bien entendre li quel puet acuser. Il est deffandu as uns que il ‹puet acuser› por leur nature ou por leur aage, si comme as femes et as orfelins ; et as autres por lor office, si comme cez qui sont en garnison ; et as autres por leur poesté, si comme as baillis ; et as autres par leur propre mesfet, si comme à cez qui sont mal renomé ; et as autres par vilain gaign, si comme à cez qui ont commoncié à pledier contre deus par .ii. crimes ; et à cez qui ont pris loer por acuser ou por lessier à acuser ; et as autres par lor condicion, si comme à cez qui ont esté franchiz contre leur patrons.

Paulus dit : et se autres por sopeçon de faus acusement, si comme à cez qui dient faus testemoine si comme il leur fu enseignié.

Hermogenes dit : et aucuns por povreté, si comme à cez qui ont moins de .l. deners d’or.

Macer dit : neporquant, se tuit cil porsivent leur tort fet ou il volent vengier la mort à leur procheins paranz, il ne sont pas osté de l’acusement. ¶ {1} Il ne doit pas estre devee as enfanz et à cez qui ont esté franchi que il ne se plaingnent do fet à leur peres ou à leur patrons por deffendre leur choses, si comme se il dient que il ont esté mis hors de possession, et il ne le dient pas por acuser les de crime mes por recovrer leur possession. Ne il n’est pas deffendu au fill à plaindre soi dou fet sa mere se il dit que ele ait pris autrui enfant et dit que il estoit suens por partir à son heritage ; mes il ne li est mie otroié à acuser le comme de crime. ¶ {2} Uns ne puet acu[190vB]ser celui que uns autres a acusé ; mes se il est assous, ou li acuserres ne porsuit pas la cause, il n’est pas devee que uns autres ne l’acuse.

Renulcius dit : il ne loit pas à acuser le legat l’enpereor – ce est le prevost d’aucunne contree – do crime qui i fut ainz que il alat en la legacion, ne li balli do pople de Rome, ne celui qui est hors do païs par la cause de la chose commune desque il n’en est hors por aler contre les lois. {1} Et cil qui sont receu encontre aus puent user de ces benefice, et cil à qui leur mesfez a esté quitez. ¶ {2} Il est contenu en la loi que Julianus fist de commun juigemenz que nus n’acuse deus homes de crime en un meisme tens, se ce n’est por le tort qui li a esté fez. ¶ {3} Se uns sers est acusez de crime, l’en doit garder ce meismes que l’en garderoit se uns frans hons en estoit acusez. ¶ {4} Li serf puent estre acusez de toz crimes fors de force privee ; car cil qui sont dampné de crime sont puni par le poupliement de la tierce partie de leur biens. Mes ceste paine ne puet estre enjointe à serf. Autresi est il des autres crimes par coi l’en paie poine des deners ou paine capital, si comme est essill qui ne puet estre enjoinz à serf. ¶ Ne la loi que Ponpeius fist de cez qui ocient leur peres n’a pas leu contre le serf en tant comme il en apartient as paroles ; mes por ce que nature est commune, il convient prendre vengence d’els autresi comme d’autres. Sers ne doit pas estre tenuz par la loi que Cornelius fist de torz fez mes plus cruel poine li doit estre enjointe hors d’ordre.

Marceans dit : li enpereres Sevoirs et Antonius escritrent par les communes annones que la feme qui acuse aucun de crime par devant le prevost de annones doit estre oïe. Et cil meismes qui sont mal renomé doivent estre oï en cet cas. Et li chevalier qui ne puent deffendre autrui causes, qui voillent por la pez, il doivent estre receu ; et li serf oï en cest cas.

Paulus dit : li senaz juiga que nus ne soit acusez par diverses lois par un meisme crime.

Cil meismes dit : se plusors sont qui voulent acuser un home en commun juigement, li juiges doit eslire li quelx l’acusera quant il avra queneu la cause et regardees les persones as acuseors selonc la digneté, ou selonc ce que il en apartient à chescun, ou selonc l’aa[191rA]ge, ou selonc les mors, ou selonc autres causes.

Modestius dit : si li mestresmestres] sers dans le ms., cf. lat. Si servum dominus in crimine capitali defendat deffent son serf de crime capital, il doit doner caucion d’amener le avent.

Cil moismes dit : quant Tyce menacoit à acuser de fauseté le testamant Sey son frere, ele n’acompli pas la solempnité de l’acusement dedanz le tens qui est establiz. Et aprés li prevoz de la contree prononça que ele ne puet pas puis acuser le testamant de fausseté ; ne ele n’apela pas contre cele sentence, ainz vost puis pledier que li testamanz ne vaustist rien. Je demande se Tyce qui n’apela pas contre la sentece au prevost puet puis retorner à acuser le testamant de fausseté. ¶ Et la response est que nule chose n’est proposee par coi ele doie estre oïe contre l’autorité de la sentence.

Calistratus dit : li saint frere escritrent que li oir as acuseors ne doivent pas estre contrainz de porsuivre les plez que li morz commoincerent. {1} Et li enpereres Adrians escrit que il ne convient pas que li acuserres soit contrainz d’acuser pluseurs.

Ulpians dit : li juige solent juigier savoir mon se cil qui sont acusé doivent estre mis en chartre, ou baillier as chevaliers à garder, ou receu par plege ou par leur seule parole ; et ce suelent il fere ou por la qualité dou crime dontdont] dome dans le ms. il sont acusé, ou por l’enor de la persone, ou por sa richece, ou por ses muers, ou por sa digneté.

Ulpians dit : li enpereres Pius escrit que cil ne doit pas estre mis en liens qui est apareillz de doner plege ; se il n’a fet si grant mesfet, que il ne doie estre bailliez ne à plege ne à chevalers, ainz doie estre tenuz en chartre.

Renulcius dit : l’en garde essi des chevalers que, se il mesfont aucunne chose, il soient envoié à celui soz qui il estoient. Et cil qui a pris un ost à conduire a poer de chatier les chevalers qui mesferont.

Paulus dit : se aucuns jeoliers est corrumpuz par loier et il sueffre que cez que il doit garder soient deslié, ou que l’en leur aport ferremenz ou venin, il doit estre puniz par l’office au juige ; et se il ne le sot pas, il do[191rB]it estre ostez de son office por sa negligence.

Cil moismes dit : il est contenu es commandemanz que nus ne lest sanz cause ce que il a pris en garde. Cil meismes dit : « se tu voiz que li mestre aient deslié vistement et sanz acheson aucuns de cez qui estoient lié es citez, tu commanderas que il soient lié arriere, et anjoindras paine à cez qui les deslierent ; car, se il estoient quite, il la feroient autre foiz ».

Cil meisme dit : se cil qui sont mis ensenble en chartre preinent consoil de ropre leur liens et briser la chartre por eschaper s’en, il doivent estre plus puni que la cause por coi il furent pris ne requiert. ¶ Et se il n’avoient rien mesfet avant, si doivent il estre puni por ce fet ; et cil qui decovrent lor consoil doivent estre sozlegié de leur paine.

Ulpians dit : li crimes qui est fez contre la maesté l’enpereor est procheins à sacrilige. {1} Ce est li crimes qui est fez contre le pueple de Rome et contre la seurté de l’enpire. Et de cest crime est corpables cil par qui porchaz et par qui tricherie consoil est pris que ostages soient rendu sanz le commandemant au prince ou occis, ou que home armé soient en la cité o glaives et o pierres, ou que il s’asenblent contre la chose commune, ou que li commun leu soient porpris ou li temple, ou que home soient esmeu à traïson ou à dissension ; et par qui porchaz et par qui consoil est pris que aucuns des metres dou pueple de Rome qui a commandemant et poesté sus les autres soit ocis, ou que aucuns port armes contre la chose commune, ou qui envoie as anemis au peuple de Rome mesage ou letres ou leur fet signe, ou il fet par tricherie que li ennemi au pueple de Rome soient aidié par son consoil contre la chose commune, ou qui escommuet les chevaliers par qui dissession ‹ou› noise est fete contre la chose commune. ¶ Dissession si est quant l’en se descorde et noisse en sort.

Cil moismes dit : ou cil qui ne se pert pas de la contree que il a guovernee quant uns autres a esté envoiez en son leu, ou cil qui a lessié [191vA] l’ost que il devoit garder, ou li bas hom qui s’en est alez as enemis au pueple de Rome, ou cil qui à son esciant escrit fause ovre cité es communes tables, car cist est ou premer chief de la loi que Julius fist do crime qui est contre la majesté l’enpereor.

Macer dit : la loi des .xii. tables commande que cil qui escommuet les anemis contre le pueple de Rome ou qui leur aide d’aucunne chose, soit puniz par poine capital. Et la loi que Julius fist do crime qui est fez contre la maesté l’enpereor commanda que cil qui mesfet à la commune majesté soit puniz ; itel sont cil qui s’enfuient de bataille, ou qui tienent forterece contre l’enpereor, ou traïssent leur ost. Par ceste meisme loi est tenuz cil qui fet bataille sanz le commadement l’enpereor, ou a esleu ost en la contree que il a guovernee et ne le baille pas à celui qui a esté envoiez en son leu, ou qui guerpist l’enpire ou l’ost ou pueple de Rome, ou li bas hom qui à son esciant a fet aucunne chose par tricherie por le mestre, ou cil qui a porchacié que aucunne des choses qui sont escrites devant soit fete.

Scevola dit : cist est tenuz par ceste loi par tricherie et par qui seremant aucunne chose est amenee qui soit contre la chose commune ; et cil par qui tricherie et par qui seremanz li oz ou pueple de Rome a esté meuz en aguiez et livrez à ses ennemis ; et cil par qui tricherie i remaint que li enemi ne veignent en la poesté au pueple de Rome ; et cil par qui porchaz et par qui tricherie li ennemi au pueple de Rome sont garni d’armes et de darz et de chevaux et de deniers ou d’aucunne autre chose ; et cil par qui porchaz et par qui tricherie il remaint que li rois ou une estrange nacion n’obeist pas au pueple de Rome ; et cil par qui porchaz et par qui tricherie estraige sont donné as anemis au pueple de Rome ; et cil qui met hors celui qui a reconeu son crime et est por ce mis en liens. {1} De cest crime est delivrez par le senat cil qui font les ymages l’enpereur qui sont depecees.

Modestinus dit : cil qui sont mal re[191vB]nomé, qui n’ont pas poer d’acuser, sont receu sanz nule dote à acuser de crime qui est fez contre la maesté l’enpereor. {1} Et li chevalier qui ne puent pas deffendre autrui causes ; car cil qui veillent por la pez doivent estre receu à cest acusement. {2} Et li serf qui en acusent sont oï, neïs contre leur seigneurs, et cil qui ont esté franchi contre leur patrons. {3} Neporquant, par la reverence de la majesté l’enpereor, li juige ne doivent pas tenir cest acusement à gap mes à verité. Car il doivent regarder à la persone qui est acusee, savoir mon se ele le pot fere et à ce qui a esté fet, et savoir mon se il estoit de saine pensee ; ne aucuns ne doit pas legierement estre trez à paine par l’error d’une parole. Et ja soit ce que li fol soient digne de poine, neportquant l’en doit esparnier à cez qui ne sunt pas de seine pensee se li mesfez n’est de cez qui sunt escrit en la loi, ou tiels que il doie estre vengiez en l’essample de la loi.

Cil meismes dit : cil par qui consoill ou par qui tricherie une cité ou une contree est traïe ou livree à ses ennemis puet estre acusez de crime contre la majesté l’enpereor.

Ulpians dit : cil qui muert en aucun crime muert en entier estat ; car li crimes est estainz par sa mort se il n’est corpables de crime contre la majesté l’enpereor. Car se si oir ne purgent icele crime, li heritages sera à la borse l’enpereor ; neporquant, tuit cil qui sont corpable de crime contre la majesté l’enpereor ne sont pas en cele condicion, mes qui par desloial corage s’est en hardiz de fere aucunne chose contre la chose commune ou contre le prince. Se aucuns est corpables por autre cause, li crimes est estainz par sa mort.

Ulpians dit : li enpereres Augustus dona ceste loi {*48.5.2} par coi il convient pledier avant à l’ome qui a fet l’avotire que à la feme devant que li hom en ait esté [192rA] conveincuz et condempnz. ¶ {1} Se li mariz acuse sa feme par droiture de mari, excepcion li peut estre opposee se il brisa premerement la loi do mariage. ¶ {2} Li crimes de olerie tost à mari à acuser sa fame d’avoutire ; car autresi est paine establie contre lui comme contre la feme, autresi puet nuire excepcion à celui qui l’a retenue, puis que ele fust reprise d’avotire. ¶ {3} Cil qui sofre que sa feme mesface despit an son mariage n’estn’est] et est dans le ms., cf. lat. Ceterum qui patitur uxorem suam delinquere matrimoniumque suum contemnit quique contaminationi non indignatur, poena adulterum non infligitur tenuz à soffrir paine d’avotire. {4} Se fame dit que ele ait fet avoutire pour ce que ses mariz est holiers, ele velt alegier son mesfet, mes tex aquiz n’est pas receuz. Et por ce, se cil qui est acusez d’avoutire velt acuser le mari à la fame que il est holiers, il ne sera pas oïz por ce que il fut avant acusez. ¶ {5} Se li mariz acuse sa feme d’avotire en commun juigement, l’en demande se alleguemenz de holerie metra arriere le mari de l’acusement. Et je croi que nenil. La holerie charge donc le mari, mes ele n’excuseexcuse] acuse dans le ms., confusion du scribe, cf. lat. non mulierem excusat pas la feme. {6} Et por ce, puet l’en demander se cil qui conoist l’avotire puet enjoindre au mari paine por la holerie. Et je croi que oïl, car quant Claudius – uns nobles hom – acusoit sa feme, il fu descoverz que il l’avoit retenue puis que ele avoit esté reprise en avotire, et li enpereres Savoirs la condempna sanz nul acuseor. ¶ {7} Se uns estranges est acusez d’avotire et il oppose à celui qui l’acuse de crime de holerie, il ne s’aliege point, ne il ne sozmet pas le mari à paine. ¶ {8} Se li mariz et li peres à la feme vienent ensenble à acuser d’avotire, l’en demande li quelx doit estre mis par devant. Et il est melz que li mariz i soit mis, car l’en doit croire que il porsuivra l’acusement plus aprement et par graigneur anguoissé ; si que se li peres vient premerement et il balle son libelle, et li mariz n’est pas negligenz ne ne tarde pas, ainz se porchace d’acuser la et de querre ses proves par coi il puisse prover l’avotire, li mariz sera oïz par devant le pere. {9} Mes quant autres qui puet acuser aprés [192rB] le pere et aprés le mari vienent avant, il est conté en la loi que cil qui conoist de la cause doit establir li quelx est plus droiz acusserres.

Ulpians dit : il n’est pas dote que je ne puisse acuser cele que je doi prendre à feme de l’avotire que ele fist en son premer mariage ; car il est contenu apertement en la loi que Julius fist des avoutires que se cele qui l’en velt acuser d’avoutire est veve, li acuserres puet premerement acuser le quel que il vodra, ou lui ou celui o qui ele fist l’avotire ; mes se ele est mariee, il doit premerement acuser l’avotre et puis la feme.

Papinians dit : cil qui abandone sa meson por fere avotire ou pechié de char o autrui feme ou à valet, ou prant gaagn de l’avoutire sa feme de quel condicion que il soit, il est puniz comme avotres. {1} Nos entendons par non de meson tote maniere d’abitacion ¶.

{13} J’é pris une feme qui estoit acusee d’avoutire et quant ele en fut condempnee je la refusai ; je demant se il senble que ele ait doné la cause do departement. Et la responsse est que, por ce que il est deffendu par la loi que Julius fist à retenir tel feme, il est aperte chose que je n’ai pas doné cause do departement, mes il est fez as corpes à la feme.

Marcians dit : se aucuns dit que ses sers ait fet avotire en sa feme, li enpereres Pius escrit que il est melz que il acuse sa feme que il n’est que il tormant son serf por fere li reconoistre. ¶ {1} Se aucuns n’a pas lessié aler l’avotre ainz l’a retenu, si comme il avientil avient] il avient par avotre q. dans le ms. que li filz fet avotire en sa marastre ou ses sers, ou cil que il a franchi en sa feme, il est tenuz par la sentence de la loi, ja soit ce que il n’est pas tenuz par les paroles de la loi. Neporquant, l’en doit dire que il est tenuz par la sentence que bane soit fez. ¶ {2} Se la feme prant loer de l’avotire son mari, ele doit estre punie comme avotre.

Modestinus dit : cil fet pechié de char qui tient franche fame por cause de lecherie et ne mie de mariage, exceptee sa moichine. ¶ {1} Avotires est fez en feme mariee ; et pechié [192vA] de char en veve, ou en virge, ou en valet.

Vap. dit : se cil qui a moins de .xxv. anz a fet avotire, il est tenuz par la loi que Julius fist, car tels crime commoince enprés l’aage de .xiiii. anz.

Marciaus dit : cil est tenuz par la loi que Julius fist de force commune qui a en sa meson ou en son champ armes ou darz, fors celes que il doit avoir quant il va chacier, ou quant il erre, ou quant il va par mer.

Scevola dit : les armes en sont exceptees que aucuns a quant il se remuee ou quant el i sont acheetes par heritage.

Marcians dit : en cele meisme cause sont cil qui ont pris consoil de fere dissession et ont sers ou franc homes armez. ¶ {1} Par cele meisme loi est cil tenuz qui est en commun leu o armes. {2} En ceste meisme cause sont cil qui ont assenblé gent por assaillir villes et ont pris par force d’armes les choses qui i estoient. {3} Et cil i est tenuz qui de feu ravist aucunne chose, fors ce de quoi la meson estoit fete. {4} Et cil qui prant par force enfant ou feme sera puniz par la poine de ceste loi. ¶ {5} Cil qui vient au feu o glaives o ou armes por ravir aucunne chose, ou por deffandre au seigneur de la meson que il ne sauve sa chose, est tenuz par la poine de ceste loi. {6} Par ceste meisme loi est tenuz cil qui o homes armez met aucun hors de la possession de sa meson ou de son champ.

Ulpians dit : ou qui preste ses homes à ce fere.

Marceans dit : cil qui met le feu en une meson par dissession, ou qui i enclot un home per tricherie, ou qui fet que uns morz ne soit pas enfoiz et que sepulture ne li soit fete, ou qui oblige à soi aucun home par force, est tenuz par la poine de ceste loi. ¶ {1} Se l’en plede de force qui a esté fete et de la possession et de la seignorie de la chose où ele a esté fete, li enpereres Pius escrit que l’en doit avant enquerre de la force ou de la proprieté de la chose ; mes il n’i a que l’en enquere avant de la force que de la droiture de la seignorie ou de la possession. ¶ {2} Cil qui a pris par force feme ma[192vB]riee ou desmariee est puniz par trop grief torment ; et se li peres à la feme est tant priez que il quite ce qui li apartient, uns estranges le porra acuser sanz doter excepcion de .v. anz ; ¶ car li crimes de prandre feme à force passe celui d’avotire.

Cil meismes dit : li enpereres Pius escrit en cez paroles que cil qui doit estre puniz qui ravist enfant qui est naturelment frans : « je sui meüz par la conplaince qui estoit contenue ou libelle que Selvains me bailla, par coi il sennefia que ses filz qui estoit naturelment franc avoit esté raviz et enclos et batuz à desmesure. Et por ce, Germain biaus tres chiers amis, je voill que tu l’oïes ; et se tu aperçoiz que il soit issi, tu en preignes grief vengence ».

Cil meismes dit : cil est tenuz par la loi que Julius fist de commune force qui estoit en aucunne baillie ou aucunne poesté et ocist ou bati un des citaiens de Rome, ou commenda que aucunne tel chose li fust fete, ou que il fust liez ou tormentez. Ce meisme apartient as legaz et as avocaz et as contes se aucuns d’aus est repris que il les ait botez ou fet leur tort.

Marcians dit : il est contenu en loi que Julius fist de force commune que nus ne lit ne n’enpeeche celui qui est acusez que il ne puisse aler à Rome dedanz un certain tens.

Paulus dit : nos apelons armz non pas tant solement cez qui o‹nt› glaives mes cez qui on‹t› autres choses de coi l’en puet mal fere.

Ulpians dit : cil est tenuz par la paine de ceste loi, qui fet par force et par tricherie que juigement ne sont pas fet seurement ou que li juige ne juigent si comme il doivent, et cil qui font par force que aucuns leur promet deners ou communement ou priveement, et cil qui par tricherie est armz la où l’en fet juigement. Cil en est exceptez qui por chacier a assenblié homes armz qui se conbatent as betes, car ce li est bien otroié. ¶ {1} Cil est tenuz par ceste loi qui a assenblé homes par batre aucun par force ; et ja soit ce que cil qui est batuz ne soit pas ocis. {2} Neporquant, l’en deffant à celui qui est dampnz de force commune la commune de feu [193rA] et d’eve.

Paulus dit : cil qui usent mesons ou viles sont puni par force capital se il le font o homes armz. ¶ {1} Par non d’armes sont apelees totes les choses par coi aucuns puet mal fere. ¶ {2} Il ne senble pas que cil qui porte armes por soi deffendre les port por homes ocerre.

Cil moismes dit : cil qui demandent noviaus paages sont tenu par la loi que Julius fist de force commune.

Paulus dit : la tierce partie des biens à celi qui est condempnz de force privee est puepliee ; et il est establi que il ne puisse estre senateurs, ne apelz à nule honor ne à nule ordre, ne que il ne soit juiges, si que il soit sanz totes ennors par le consoil au senat. {1} Autresi comme mal renomez par ceste paine sont sont tenu cil qui sont ramené à la poine de la loi que Julius fist de force privee, ¶ et cil qui par tricherie ravist aucunne chose de peril de mer. {2} Mes cil qui ravissent aucunne chose de peril de mer sont puni hors d’ordre par les establissement au princes. Car li enpereres Pius escrit que nule force ne doit estre fete as mariniers ; et se aucuns le fet, il soit puniz tres cruelment.

Scevola dit : par ceste loi est tenuz cil qui assenble homes et fet par force par coi aucuns soit batuz sanz ocirre le.

Macer dit : il n’a point de difference se aucuns a assenblé à fere force frans homes ou sers, ou suens ou autrui ; {1} car tuit cil qui i sont assenblié sont autresi tenu à la paine comme il est. {2} Et s’il n’i a nul home assenblé, ne il n’en a nul batu, mes il en aporte par force aucunne chose de l’autrui, il est tenuz par ceste loi.

Paulus dit : li crimes de ceste loi est fez quant aucuns a assenblé gent et fet par force que uns hons n’a pas esté amenez à juigement. {1} Et se aucuns a fet enqueste d’avotire par sers, et por ce dit Labeo que l’en doit user plus atrenpeement do banissement au prevost de tort fet.

Ulpians dit : se aucuns a chacié un home de son champ par homes que il ‹a› assenblez ou par ses armes, il puet estre acusez de force privee [193rB].

Modestinus dit : il est contenu au consoill au senat qui est apelz Volusians que cil qui s’asenblent à autrui plet por departir entre els quant que li acuserres avra do condempnement sont à la loi que Julius fist de force.

Calistratus dit : se li deteur pledent contre leur creanciers, il doivent demander par devant le juige ce que il cuident que lor soit deu ; car se li creancier se metent en possession des choses à leur deteurs sanz nul commandemant, li enpereres Marc juiga que il n’eussent pas droiture de creance. Les paroles dou juigement sont celes : « il est bone chose, se tu cuides que tu puisses riens demander, que tu en pledes par droites aucions ; et tes averseres doit dedanz ce estre en possession, et tu doiz estre demanderes. Car totes les foiz que aucuns prant sanz le commandemant au juige ce est force, ne il n’apartient pas à vergoigne ne à digneté ne à pitié que nus face riens se par droit non. Se il est donc prové que aucuns porsie la chose à son deteur, qui ne li est baillie par lui ne par le juige, ainz l’a prise par soi meismes, il n’i avra pas droiture de creance ».

Ulpians dit : se li creanciers prant les choses à son deteur sanz l’autorité au juige, il est tenuz par ceste loi et est puniz de la tierce partie de toz ses biens, et est mal renomez.

Marcians dit : il est contenu en la loi que Ponpeius fist de cez qui ocient leur peres que, se aucuns ocist son pere, ou sa mere, ou son aiel, ou s’aiele, ou son frere, ou sa seror, ou son cosin germain, ou son oncle de parpar] par ar dans le ms., signe d’abreviation excédant son pere ou de par sa mere, ou sa tante, ou sa feme, ou sa bruz, ou son gendre, ou son socre, ou sa suegresse, ou son fillastre, ou sa fillastre, ou son patron, ou sa patrone, ou se ce est fet par tricherie, il sunt tenu par la paine que Cornelius fist des homecides. ¶ Et sese] sa dans le ms. la mere ocist son fil ou sa fille, ele est tenue par ceste loi ; et li aieles qui ocist son neveu et cil qui achate venin por doner a son pere, ja soit ce que il ne li puet pas doner.

Scevola dit : li autres filz qui sotsot] sor dans le ms., cf. lat. Frater autem eius, qui cognoverat tantum nec patri indicaverat la chose et ne la fist pas savoir à son pere doit estre envoiez en essil ; et cil qui vendi le venin doit estre sozmis à torment.

Marcians dit : l’en doit savoir que il a compris en la loi des paranz sa feme ; neporquant, une meisme paine n’est pas enjointe por les lointains et por les procheins. La persone à la maratre et cele à l’esposee ne sont pas comprises en la loi, neporquant eles sont contenues en la sentence.

Cil moismes dit : li peres et la mere à l’esposee et à l’espos sont contenu el non de suecre et de suegresse, et li esposse sont contenu el non de gendres.

Cil meismes dit : quant uns homs aloit chacier, il ocist el bois son fill qui fesoit avotire o sa marastre ; li enpereres Adrians l’envoia en essil por ce que i l’ocist melz comme lierres que comme peres ; car la poesté au pere doit estre en pitié et ne mie en cruauté.

Cil moismes dit : l’en puet demander se cil qui ocistrent lor peres sont tenuz par la poine de ceste loi ou cil qui en furent consachant. Et Mecians dit que tuit cil qui en furent compoingon doivent estre puni d’une meisme paine ; et por celes doivent soffrir li estrange meisme [194vA].

Cil meismes dit : se deners sunt presté à fere aucunne desloiauté par le seu à celui qui les preste, si comme por acheter venin ou por doner as larrons por ocirre le pere, celuicelui] a celui dans le ms. qui les enprunte et cil qui les pretent sont tenu par la paine de ceste loi.

Cil meismes dit : se cil qui est acusez de la mort à unes des persones, qui sont nomees en la loi que Ponpeius fist, muert ainz que li plez soit finz, se il se tue, la borse l’enpereor sera ses heirs. Et se il muert autrement, se il fist testamant, cil de qui il fist son hoir avra son heritage ; et se il ne dist testamant, cil l’avra que les lois i apelent.

Modestius dit : la paine à celui qui ocist son pere est tele establie par les anciens, que cil qui a ocis son pere soit batuz de verges et puis soit cosuz en un sac ou un chien et o un coc et o une serpent et ou un singe, et puis soit li sac getez en la mer bien en parfont se la mer est pres ; et se ele est loing, il soit bailliez as bestes à devorer selonc l’establissement l’enpereor Adrian. {1} Et cil qui ocist autres persones que son pere ou sa mere ou son aiel ou s’aole, por coi li encien establirent la devant dite paine, il soit puniz par paine capital. {2} Neporquant, se aucuns ocist son pere par forsenerie, il ne sera pas puniz si comme li saint pere escritrent ; car ce est assz que il est puniz par forsenerie meisme, mes il doit estre gardz diligement et mis en liens.

Marcians dit : la poine de la loi que Cornelius fist des fausons est enjointe à celui qui a porchacié par tricherie que fausses atestacions soient fetes. {1} Et qui recevra deners, ou fera convenence, ou assenblera compoignie por establir fausse avocacion por obligier cez qui n’ont rien mesfet, il sera chatiez par le consoil au senat. ¶ {2} Se aucuns prent deners por refuser testemoine, ou por dire le, ou que il ne le die pas, il est tenuz à la poine de la loi que Cornelius fist des fausoniers ; autresi est cil qui corrump le juige, ou qui porchace que il soit corrumpuz. {3} Et se li juiges despit les esta[194vB]blissemenz as princes, il est puniz. {4} Cil qui en contes ou en tables ou en aucun instrumant escrivent fausseté, ou en ostent aucunne chose, sont puni par ces causes comme faussenier. Et issi dampna li enpereres Savoirs par la loi que Cornelius fist des faussoniers le prevost d’Egite, por ce que il fist fausseté en ses instrumanz quant il estoit par desus la contree. ¶ {5} Cil qui remue le testamant à celui qui est encor vis, est tenuz par la poine de ceste loi. ¶ {6} Cil qui dit que cil à qui il balla ses instrumenz à garder les a bailliez à son aversere, le puet acuser de faussonerie. ¶ {7} Li consoil ou senat apartient as testamanz as chevalers, en coi il est commandé que cil soit tenuz à la poine as fausoniers qui escrit en testamant que il en ait aucunne chose. ¶ {8} Il a tel difference entre le fil et le serf et l’estrange qui escrivent testamant, que il covient en l’eritage que especial subscripcion i soit fete, et lors cesse la paine. Et cil qui escrit le testamant puet avoir son lés, mes en fil ou en serf soffist la general subscripcion et à eschever la paine et à avoir le lés. ¶ {9} Li deffendeur et li procureor qui ont fine lor office et n’ont pas rendu conte ne puent pas fere marchié à la borse l’enpereor ; et se aucuns fet encontre ce, il soit puniz autresi comme se il eust fet fausonerie. {10} Mes ce n’apartient pas as autres qui firent ce ainz que il receussent la garde ; car il n’ont pas perdu leur excusacions, ainz ont mis arriere tot barat. {11} Et li enpereres Savoirs et Antonius escritrent que cil qui n’a pas encor rendu conte de la garde que il a amenistree, ne puet pas fere marchié o la borse l’enpereor, se cil est vis que i l’ot en garde ; car se il est morz, il puet fere marchié, ja soit ce que il n’a pas encor rendu conte à son hoir. {12} Mes se li deffenderres ou li procureres est hoirs à aucun qui avoit fet marchié à la borse l’enpereor ainz que il ait rendu conte de la garde, je ne croi pas que la poine i ait leu, ja soit ce que cil que il ot en garde vive encore. {13} Paine de forsenerie est essill et puepliemenz de toz les biens. Et se sers fet faussonerie, il sera sozmis à tres grief torment.

Paulus dit : qui oste testamant ou le ceile ou le ravist ou l’efface ou des[195rA]saelle, et qui escrit faus testamant ou seele ou recite ou porchace par sa tricherie que ce soit fet, il est dampnz par la poine de la loi que Cornelius fist des faussoniers.

Ulpians dit : cil qui ne set pas que testamanz soit faus, le puet bien reciter.

Cil meismes dit : se aucuns avoit porchacié faussement que l’en escrisit faus testamant que uns lés li estoit lessiez, et il est morz, la paine puet estre quitee à son hoir. ¶ {1} Quant uns hons a esté fez hoirs son pere et il ot depeciez les escriz de ses lés, il fu morz ; Marcus dit que la borse l’enpereor doit chalengier tant de l’eritage comme li peres en peut avoir departi par lés.

Julians dit : li senat quita paine à celui qui avoit escri de sa main en escroes le lés que ses peres avoit escrit en son testamanz et puis l’esfaça ; et por ce que il le fist par le commandemant son pere et il avoit passe .xxv. anz, il li fu ostroié que il eust l’eritage.

Affricans dit : se aucuns escrit ou un testamant que uns lés li soit paiez, il est tenuz par la paine de la loi que Cornelius fist des fausoners, ja soit ce que li lés ne vaille rien ; car il est certaine chose que cil est tenuz qui escrit que li lés li est lessiez en testamant qui puis est roz ou qui ne vaut des le commaincement. Neporquant, ce est voir quant li testamanz est parfez ; car se il n’est pas saelz, il est melz que li consoil au senat n’i ait pas leu ; autresi comme li entrediz d’aporter avant les tables do testamant n’i a pas leu. Car à ce que li conselz au senat ait leu, il convient avant que il ait aucun testamant ou que il ne soit pas fez à droit ; car lors dit l’en par droit que li testemanz est faus. Et se il n’i eust point de testamant, l’en ne deist pas que il ne fust pas à droit fez se totes les choses i fussent fetes si comme eles deussent. ¶ {1} Se cil qui est fez oirs escrit ou testamant que li filz est deseritez par droit ou autres persones, il est tenuz par le consoil au senat. {2} Et autresi cil qui escrit de sa main que franchise li soit donee est tenuz par le consoil au senat. {3} Se uns patrons escrit que uns lés li soit lessiez el testamant à celui que il franchi, et il a enpetré pardon, et l’en li a commandé que il [195rB] s’atiegne del lés, l’en demande se il puet avoir la possession des biens contre les tables. Et il nos plet que il ne la puisse pas avoir. Mes de ce ne s’ensuit pas que se une fame escrit el testamant son mari que ses doeres li soit renduz, ou li creanciers el testamant son deteur que ce que il li doit à terme li soit rendu, et il enpetre pardon de ce que l’en li commant que il s’atiegne del lés ; car l’en ne puet pas tolir à la feme son doere, ne au creancier s’aucion.

Marcians dit : li serf ne puent en nule maniere pledier à leur seigneurs, fors lors sanz plus, si comme li enpereor Marcus et Commodus dient, que le serf se plaint que les tables dou testamant en coi franchise li fu donee sunt repostes ; car lors doit li sers estre receuz à acuser l’oir son seignor dou testamant que il cele.

Ulpians dit : tuit cil qui ont res en partie les deners d’or et tainz en partie, se il sont franc home, il soient baillié as bestes à devorer ; et se il sont serf, il soient sozmis à tres grief tormanz.

Cil meismes dit : il est establi en la loi que Cornelius fist des fausoniers que qui fera aucunne fausseté en or, ou qui fera faus deners d’argent, il soit tenuz par crime de faussonerie. {1} Par cele meisme paine est cil tenuz qui pot deffendre tel chose et ne la deffendi pas. {2} Et si est commandé en cele meisme loi que nus n’achat ne ne vende à esciant deners d’estaing ne de plon. {3} La poine de ceste loi est promise à celui qui à esciant et par tricherie seele autre chose que ce qui fu commandé el testamant ; et cil qui ont assenblé compoignie por dire faus testemoigne, li uns por l’autre. ¶ {4} Cil qui a mis por lui un acuseor en cause qui est meüe por deners est tenuz par cele meisme poine par coi cil sont tenu qui recoivent deners por movoir autrui plet.

Macer dit : li conselz au senat ne parole point de celui qui escrit en un testamant que cil en qui poesté il est, ou uns autres qui est en la poesté à celui meismes, [195vA] ait un lés. Mes en cest cas, il mesfet contre la loi ; car li preuz de cele chose n’apartient pas au pere ne au seigneur à qui il apartenist se li filz ou li sers eust escrit que li lés fut à lui meisme. ¶ {1} Il est certaine chose que se aucuns escrit que uns estranges ait un lés, et il vient puis en sa poesté en la vie à celui qui fist le testamant, li conselz au senat n’i a pas leu.

Macer dit : se li peres à un chevaler escrit el testamant à un autre chevaler que ses filz ait un lés, por ce que cil lés n’est pas aquis au pere, il est hors de paine. {1} Et se li filz escrit que sa mere ait un lés, se il le fet par le commadement à celi qui fet le testamant, il est sanz poine et la mere puet avoir le lés.

Papinians dit : quant cil qui est corpables de fausonerie muert ainz que il ne soit acusez ou que sentence en soit donee, il est quités de la paine ; mes ce que il conquist par fausseté ne remaint pas à l’oir.

Cil moismes dit : assennemanz de faus non est par paine de faussonerie. {1} Li avocaz qui par .x. anz a esté hors d’ordre des curials por ce que il avoit recité par devant le prevost un faus instrumant puet recevoir sa digneté aprés les .x. anz ; car il n’en chai pas en la loi por fere fausseté mes por reciter la. Et por cele meisme reson li bas hom qui fu envoiez en essil temporel par cele meisme cause porra estre fez curials quant il sera revenuz.

Paulus dit : quant li filz qui estoit hors do bail escrivoit le testamant son pere, il l’escrit par le commandemant au pere que uns lés fust donz à un serf qui estoit communs à lui et à un autre ; je demant comment il en ira. Et la response est que plusors demandes sont jointes ensenble ; et sanz dote, il nos est deffendu par le consoill au senat que nos ne servons pas que aucunne chose soit donee à celz que nos avons en nostre poesté. Li filz qui est hors de baill sera donc tenuz par ceste meisme paine, ja soit ce que il l’escrit par le commandemant à son pere. ¶ Il senble que cil soit escusez qui [195vB] ‹est› en autrui poesté, si comme li sers se il pert par la subsc‹r›ipcion que il ait fet par le commandemant. {1} L’autre question est, por ce qui est fet ou escrit contre droit ne vaut rien plus que se il ne fust pas escrit ou fet, savoir mon se ce que aucuns escrit, qui soiit doné au serf qui est communs à lui et à un autre, doit estre rapelé en partie et valoir en partie, ou se toz li lés est deuz à son compoignon. Et à ce respondi Marciaus à Julian ; car quant Julians ot escrit en un testamant que une chose fust donee à lui et à Tyce, ou à un serf qui estoit communs à els deus, por ce que cele escriture ne vaut rien, ne plus que se ele ne fust pas escrite, l’en puet legierement veer combien chescuns en doit avoir. Et puis dit Marciaus, comment en sera rien deu à son compoignon se li nons au serf en est sostrez comme faus. Autresi doit l’en garder en cestre presente demande. ¶ {2} Li mariz franchi un des sers do doere sa feme et puis escrit en son testamant que il eust un lés ; l’en demande que la feme i puet conquerre. Et la responsse est que li patrons est encheez en la paine dou banissement à l’enpereor Claudi‹us› ; et ja soit ce que li filz qui est hors dou baill puisse estre trespassz el testamant, neporquant il puet demander la possession des biens. ¶ Se li patrons n’a donc rien des biens à celui que il franchi, il ne sera de rien tenuz à la feme ; mes l’en demande se il puet estre tenuz por ce que la loi dit, ou se il a fet par tricherie que la chose ne veigne pas à lui. Et sanz dote il n’i fist rien por grever la feme, car il ne penssa pas ce contre lui. Et se aucuns escrit par le commandemant à celui qui fist le testamant que il feist un lés et il i ajoint que il li estoit commandé que il rendist cel lés à un autre, por ce ne remaint pas que il ne se doie atenir del lés, et que li hoirs ne le doie avoir et estre tenuz à rendre le la où li morz commanda.

Calistratus dit : li enpereres Claudi‹us› commanda que l’en ajoinsist à la loi que Cornelius fit des [196rA] faussoniers que, quant aucuns escrit testamant ou lés, se il l’escrit que il en ait aucunne chose, il soit tenuz autresi comme se il eust fet faussonerie ; ne pardons ne soit pas donz à cez qui dient que il ne savoient pas la force de loi. Il senble que il escrit que il ait aucunne chose non pas tant solement quant il le escrit de sa main, mes quant ses sers ou ses filz que il a en sa poesté l’escrit, si comme cil li dit qui fet le testamant. {1} Il est contenu es establissemenz as princes que se cil qui fet le testamant esclere especiaument en sa subscripcion que il commanda à un serf que il escrisist en son testamant que ses heirs paiast un lés à son seignor, ce vaut ; car la general subscripcion vaut contre l’autorité dou consoil au senat à eschever la poine de la loi. Et por ce, est il autresi comme se li lés ne fust pas escriz, et pardons doit estre donz à celui qui l’escrit. Et je croi que li pardons doit estre demandez à l’enpereor à qui l’en se doit atenir de lés. ¶ {2} Encor juiga li senaz, que se uns sers escrit el testamant son seigneur par son commandemant que il ait franchise, il ne soit pas frans por ce sanz plus que il l’escrit de sa maisme ; franchise li soit donee autresi comme se ele li fust lessie à terme. {4} Il plot à sages homes que pardons soit donez à la mere se ses sers escrit el testamant son fil par le commandemant au fil que ele en ait aucunne chose. {5} Ce meisme juiga li senaz de la fille qui, par le commandemant sa mere et par ignorance de droit, escrit es testamant sa mere que ele en eust aucunne chose. ¶ {6} Se aucuns fist de .ii. homes ses hoirs, et il commanda en son testamant que se li uns moroit sanz hoirs toz li heritages fust à l’autre qui avroit hoirs, ou se li uns et li autres moroit sanz hoirs, li heritages fust renduz à celui qui escrivoit le testamant, il nos plest que la poine de la loi que Cornelius fist des faussoners soit quitee à celui qui escrit le testamant ; et il est plus benigne chose que les choses qui sunt escrites soient gardees.

Paulus dit : li crimes d’istrumanz enblez n’est pas des communs juigemenz se li testamanz à aucun n’a esté enblez. ¶ {1} Paulus dit que tuit cil sont tenu par la paine [196rB] de la loi que Cornelius fist des faussoniers qui seelent faus instrumanz autres que testamanz. {2} Et il n’est pas dote que tuit cil qui ont fet fausseté en tables ou en letres communes, ou en seelement ou en autre aucunne chose, ou qui ont celé ou sotret ou effacié ou dessaelé verai instrumant por senbler que il soit faus, ne doient estre tenu par cele meisme paine.

Cil meisme dit : quant uns hom ot escrit o sa main que uns sers li estoit lessiez et que il li estoit commandé que il le franchissist, li senaz juiga que tuit li hoir le doivent franchir.

{1} Cil meismes dit : se aucuns escrit en un testamant que il eust en garde le fill à celui qui fesoit le testamant qui avoit moins de .xiiii. anz, ja soit ce que il est sopeceneus por ce que il senble que il covoita la garde de son gré, neporquant, se il prove que il soit convenables, il doit avoir la garde non pas par le testamant mes par juigement ; ne il ne sera pas acusez por ce que il senble que il s’asenti à la volenté au mort. ¶

Se cez qui ont fet fause monoie la volent reformer et amender, il sont assous par l’aide de droite repentance. ¶ {1} Li acusemenz d’enfant que fame tient comme suen, qui n’est pas suens, ne perist pas par longue estance ; et autresi en puet l’en bien user aprés la mort à la feme comme en sa vie.

Hermogenes dit : cil sunt puni par paine de faussonerie qui ont pris deners por introduire faus tesmoinz, ou qui en ont fet obligement, ou convenance, ou que en ont assenblé compoignie, ou qui ont porchacié que aucunne de cez choses soit fete.

Paulus dit : cil qui par divers marchiez a vendu à deus une meisme chose est puniz par paine de faussonerie ; et issi l’establi l’enpereres Adrians. A cez est ajoinz cil qui a corrumpu juige ; mes il solent estre puni un pou moins aprement, car il sont envoié en essil à tens, ne leur biens ne lor sont pas tolu.

Cil meismes dit : l’en ne doit pas dire que cil qui a moins de .xiiii. anz enchie el crime de faussonerie ; car à paine puet estre corpables de [196vA] fausseté cil qui ne set que tricherie est. ¶ {1} Se li peres escrit en un testamant que uns lés en fust donz à son fill qui estoit en la main à ses ennemis, l’en doit dire que, se li filz revient, li peres est encheez en la paine au senat ; mes se il muert illeuc, li peres est quités. ¶ {2} Mes se il escrit que ses filz qui est hors do baill en ait aucunne chose, il le fet par droit. {3} Et se il escrit que aucunne chose en soit à son fill adoptif, ou au serf à qui il deust ja avoir doné franchise selonc ce que il i fut enjoint, l’en doit dire que il est hors de la sentence del consoill au senat ; car tot ce qui est aquis par tel serf li doit estre renduz quant il est franchiz. {4} Et se il escrit que aucunne chose en soit donee au serf qui n’est pas suens, ainz le sert par bone foi, il mesfet quant à son penssé ; car il cuide que il soit siens. Mes por ce que il ne puet aquerre par lui ne lés ne heritage, nos disons que il doit estre quités de la paine. ¶ {5} Se li sires a escrit en un testamant que ses sers ait un lés quant il sera franchiz, nos disons que il est excusez dou consoil au senat, car il n’i garda pas à son preu. ¶ Ce meisme puet l’en dire do fil qui puis est mis hors do baill. ¶ {6} Cil qui conferme les escriz qui furent fez ainz que li testamanz, par coi une chose li est lessie, enchiet en la paine del consoill au senat. ¶ {9} Li sers qui escrit en autrui testamant que cil qui le fesoit enjoigneist à son seigneur que il li donast franchise, n’est pas tenuz par les paroles dou conseil au senat. Mes de ce puet l’en doter, car si comme nos avons dit avant, li senaz quita en ce cas la paine. ¶ Se li sires fet subscripcion el testamant, le doit dire que il fet contre le consoil au senat, car franchise apertendroit à lui et si lés porroit estre aquis à son seigneur. ¶ {10} Se cil qui escrit le testamant escrit que il li est enjoint que il doint franchise à son serf, voions se il est hors de paine por ce que il n’i a nul preu à lui, se il ne l’a escrit por [196vB] ce que li sers se rachat par grant pris et que il le franchise. ¶ {11} Cil qui escrit de sa main, quant uns chans fu lessiez à Tyce, que ce estoit soz tel condicion « se il donoit deners à celui qui escrivoit le testamant », il est en chaez en la paine au consoill dou senat. ¶ {12} Cil qui escrit par la volenté son pere que il soit desheritez, ou que il n’ait point de lés, n’est tenuz ne par les paroles ne par le consoil au senat.

Cil meismes dit : l’en demande que est fausseté. Et il me senble que ce est fausseté se aucuns chainge autrui cyrografe, ou se il despiece ou efface libelle ou contes ; mes cil n’est pas faussoniers qui me‹n›t en conte ou en rendre reson.

Scevola dit : uns hons qui fist son testamant commanda que sa fille fust hoirs de la dozieme part de son heritage, et si enjoint à cez qui estoient hoirs de .xi. parties que il franchissent un serf. Cil sers dit à la fille à celui qui fist le testamant que il porroit bien prover que li testamant estoit faus ; et quant la fille ot fet subscripcion el libelle de l’acusement, li prevoz pronunça que li testamanz n’estoit pas faus. L’en demande se la franchise et li lés sunt deu au serf aprés cest fet. Et la reponsse si est que nenil, selonc les choses qui sont proposees.

Ulpians dit : cil qui a rendu fausses letres el non au prevost, ou qui a proposé faus banissement, est tenuz par aucion seur le fet por sofrir paine, ja soit ce que il soit corpables de la loi que Cornelius fist des faussoniers.

Marciaus dit : se aucuns effaça le testamant son pere et se tint por oir, autresi comme se ses peres fust morz sanz fere testamant et fu issi morz, toz son heritage sera toluz par droit à l’oir.

Modestius dit : uns sages hom de droit pronunça que cil qui distrent divers testemoines doivent estre tenu à la paine de ceste loi, autresi comme se il eussent fet faussonerie. {1} Et cil qui contre son seel aporte faus testemoine est tenuz par paine de faussonerie. Et cil qui a dit deus divers testemoines d’une meisme chose, si que l’en ne set le quel l’en doit croire, est tenuz par paine de faussonerie. ¶ {2} L’en ne doit pas doter que cil qui se tient [197rA] por chavalier, et aporte enseignes que il ne deust pa porter, ne doie estre griefmant puniz.

Cil meismes dit : se li deteurs en ment del jor en coi il engaja son gage, ce est fausseté.

Cil moismes dit : se aucuns fet menconge entendant au prevost de la contree ou par instrumant ou par libelle, ce que il fet ne vaut rien ; et se il en est acusez, il soffrera la poine que cil soffrent qui acusent fausseremenz, et sera puniz autresi comme se cil eust fet faussonerie. Et plusors escriz ont esté fez de ce, mes nos ne recorderons fors que un de coi les paroles sunt teles : « se tes aversaires bailla son libelle et il ne dit pas verité en ses prieres, il ne puet pas user de subscripcion ; mes se il en est acusez, il en doit soffrir paine ».

Cil meismes dit : cil qui fet faus seel ou fausse subscripcion est à la paine de la loi que Cornelius fist.

Calistratus dit : li enpereres Pius escrit à Claudi‹us› que selonc la mesure de chascun mesfet doit l’en establir contre cez qui par devant les juiges ont aporté instrumanz qui ne puent estre prové. Et se l’en voit que il aient plus deservi que il ne puent soffrir, l’en face la chose savoir à l’enpereor, qui juigera comment il doivent estre puni. Mes li enpereres Marc et ses freres atrenperent ceste chose par leur humanité, si que tel instrumant sunt aporté avant par erreur si, comme il avient sovent, l’en le pardoint à celui qui l’aporta.

Modestius dit : cil qui corrumpent par tricherie les banissemenz qui sont proposz sunt puni par paine de faissonerie. ¶ {1} Se li venderres ou li acheterres corrump les mesures de froment et de vin, ou d’aucunes autres choses qui sont provees communement, ou il fet aucunne tricherie, il soit condempnz au doble de tant comme la chose vaut. Et li enpereres Adrians commanda que cil qui fausseroient les pois ou les mesures fussent ennvoié en essil.

Cil meismes dit : se aucuns use de faus establissement, ou de ce que l’en ne set qui fist, la commune de feu et de eve, li est deffendue par la loi que Cornelius fist.

Marciaus dit : la loi que Julius fist de demander arriere deners que li bailli ont pris à tort apartient as deners que aucuns a pris quant il estoit en metrisse, ou en poesté, ou en procuracion, ou en legacion, ou aucun autre commun office, ou quant il estoit en la compoignie à aucun baillif. ¶ {1} La loi en excepte cez que il puent prendre, ce est de coisins et del lignage leur femes.

Scevola dit : aucion est donee par ceste loi contre les oirs à celui qui estoit acusez dedanz un an aprés ce que il est morz.

Macer dit : cil sont tenu par ceste loi qui sont en aucunne poesté et prennent deners por juigier ou por lessier à juigier.

Senulcius dit : ou por fere plus ou mains que il ne doivent fere par lor office.

Macer dit : juigemenz est donz contre conte par ceste loi.

Macer dit : la loi que Julius fist de demander arriere ce que li ballif prenent à tort deffent que nus ne preigne loer por doner juige ou arbitre, ne por envoier le, ne por [197vA] commander li que il face droit, ne por lessier à fere aucunne de cez choses, ne por metre home en communs lieus, ne por commander que il soit liez, ne pot lessier le aler, ne por deslier le, ne por condempner home, ne por assoudre le, ne por proisier plet, ne por fere juigement capital ou por chetel. ¶ {1} Il apert que la loi octroie que l’en preigne aucunne chose de cez qui ne sont pas nonbré en ceste loi ; mes de cez qui i sunt nonbrez n’est il pas otroié que l’en preigne aucunne chose. {2} Mes l’en puet bien prandre à fere les communes ovres et assenbler les communs fromenz et à fere les autres chose qui sont necessoires au commun. ¶¶ {3} Cil qui mesfont en ceste loi sunt puni hors d’ordre ; et sunt aucunne foiz envoié en essil, ou puni plus cruelment selonc ce que il ont mesfet ; car se il prenent deners d’or por ocerre un home, ou se il ne les ont, si leur sunt il promis, ou por condampner celui qui n’a rien mesfet, il doivent estre puni par paine capital, et estre envoié en essil pardurable, si comme plusor ont esté puni.

Paulus dit : ce qui est doné au visconte ou au prevost contre la loi que Julius fist ne puet pas estre gaagnié par longue tenue. {1} Cele meisme loi despiece les ventes et les loages qui leur sont fetes por moins que à autres, et enpesche que la chose ne puisse estre gaagnie par longue tenue devant que ele soit revenue en la poesté à celui dont ele eissi ou à son hoir.

Papinians dit : cil qui ontont] a dans le ms., cf. lat. Qui munus publice mandatum accepta pecunia ruperunt, crimine repetundarum postulantur pris le loier por quiter le servise qui estoint enjoinz communement sont puni par la paine que Julius fist de ce que li ballif prenent à tort.