2015, première édition électronique
L'École nationale des chartes met à disposition cette ressource électronique structurée, protégée par le code de la propriété intellectuelle sur les bases de données (L341-1), selon les termes de la licence Creative Commons : « Paternité - Pas d'Utilisation Commerciale - Pas de Modification ; 2.0 France ». Cette licence est disponible en ligne http://creativecommons.org/licenses/by-nc-nd/2.0/fr/ ou par courrier postal à Creative Commons, 171 Second Street, Suite 300, San Francisco, California 94105, USA.
Pas d'Utilisation Commerciale : L'École nationale des chartes souhaite encourager l'utilisation et l'amélioration de ses ressources électroniques, pour les intérêts de l'enseignement et de la recherche. Toute autorisation au-delà du champ de cette licence doit être obtenue auprès de l'École nationale des chartes.
Pas de Modification : Afin de mieux servir la communauté scientifique, l'École nationale des chartes s'engage à conserver et à toujours offrir publiquement la version la plus à jour de ses ressources électroniques par une URI pérenne. Elle s'engage à les corriger et à les améliorer, à intégrer les contributions qui lui sont soumises (après validation par un comité scientifique), et à référencer l'origine de ces contributions. Toute modification de la ressource qui ne serait pas reversée à la version de référence sous l'autorité éditoriale de l'École nationale des chartes doit faire l'objet de l'accord de celle-ci, afin de ne pas disperser les contributions et de permettre les meilleures conditions possibles de collaboration scientifique.
Paternité : l'École nationale des chartes demande à ce que toute publication dérivée de ses ressources électroniques comporte : 1) le nom de l'École nationale des chartes et, pour les publications électroniques, son logo 2) l'URI permettant d'accéder à la page citée sur notre site, ou à la page d'accueil de la ressource 3) la date du fichier source utilisé.
Tout litige soulevé par le non respect des termes de cette licence sera soumis à la juridiction des tribunaux de Paris.
L’édition numérique reproduit fidèlement la partie éditée par P.-N. Rapetti, telle qu’elle apparaît dans l’édition imprimée de 1850, couplée aux sections précédemment inédites, ici éditées par les soins de G. Pastore.
À totes les foiz que l’en demande à l’oir de quel part il est her
quant l’en i met plet contre lui, et cil qui demande ne set quel
part il i a cil o qui il vet pledier, lors convient il que l’en li
demant, quant la demande est personel ; si que l’en demande
certaine chose, que li autres soit certains conbien li hers ait de
l’eritage au mort, que cil demande plus que il ne doit que il n’i
ait domage. ¶ {1} Nos n’uson pas hui de ces demandes, car nus n’est
forciez de respondre de sa droiture avant plet ; et pour ce, ne
sont pas ces demandes usees et sont desacoustumees ; mes il
sofisent solement à pledeors à provences
Li prevozprevor dans le ms.
Quar [59vB] aucunne foiz est forcé la provence de l’eritage demander.
Li prevoz dit que cil qui est trez en plet fust tenuz de sa response, qu’i se datrosse en mantent ou en deconoissent, et que il soit acertenez quel partie checuns tient par la demande que l’en li fera. ¶ {1} Ce que li prevoz dit « cil qui est demandé en cort et respondi », nos le devon issi entendre que cele response soit fete par devant celui qui a juridiction, si comme prevoz ou seignors de provinces ou autres juiges, et que la response soit fete la où li juiges siet en cort por tenir les plez ou s’il est en meson ou en voie.
Cil à qui l’en demande s’il est heir ou combien il tient, ou s’il a en son poet celui en qui non il pledie dou forfet, doit demander jor de conseil ; car s’il reconoist folement, il i avra domage.
Et par ce qu’i apartient à morz que il eent hers, il apartient à cex
ausint qui vivent
Se l’en demande à aucun en cort se la beste est soe, qui fist le domage, il est tenuz de respondre.
Se l’en demande à aucun en droit se li sers est sien, qui fist le domage, et il dit que oïl, il sera tenuz de la loi Aquiliene comme sires. Et si l’en pledoie o celui qui en respondi, li sires est delivrés de cele demande à rendant le serf.
Se aucun respont sanz demande que il ert heir, il en est ausi comme si l’en li eust demandé. ¶ {1} Nos devon entendre non pas solement se li prevoz fet la demande à l’aversaire ; {2} mes se li sers fet la demande, ele sera nule plus que s’il demandoit. ¶ {3} Li [60rA] uns ne doit pas estre forciez de respondre par l’autre s’il est heir, car l’en le doit demander en cort à celui qui est tret en plet. {4} Celsus. Si defensor. Se li defendeors qui deffent l’oir est demandez an cort se cil qu’i deffant est heir, et il dit fausement que oïl, cil deffandeor ou combien il a en partie est tenuz à l’aversaire ; et il ne fet nul tort à celui qu’i deffant. Et l’en ne dote pas que Celsus ne die voir ; l’en doit voir s’il le deffant s’il ne respont, et l’en puet dire que non, car il ne lo deffant mie plenement.
N’est pas estrange chose se nos volon que cil responde en droit que nos volon qu’i promeste en droit qu’i ne fera domage par sa meson ne par le leu d’iqui enprés d’où l’en tient le domage et por quel part ; que s’il nie que la teneure ne soit pas soe, ne il ne done caucion que il ne fera domage, et il cuide pledier ou lessier le plet, il sera forciez de doner caucion, car il est aparissant que il i bee à barat.
Cil qui respondent au fauses reconoissences sunt ausint obligé comme s’il respondeent par aus, quant il respont por celui por qui l’autre a aucion ; quar par nostre confession prenons nos sor nos le fes à celui qui demande. ¶ Et se je dis que cil qui estoit ou poer au pere que il estoit en mon poer et que il estoit mon fiz, je sui ausint obligiez com s’il estoit mes fiz se li ages le poet sofrir ; car fauses confessions se devent acorder à naturex.
Se cil en qui non li plez de forfet est commoinciez, tant comme li plez devant le juige en est juigé estre franc, reus doit estre assos ; ne la demande qui est fete en droit ne vaudroit rien, car aucun puet metre obligacion sus autres en non de cele persone an qui non aucunn a aucion contre lui ; et moismes sor lui qui dit en droit qui est sien, ou s’il li reconoist que li sers soit sien. [60rB] Aucion ne puet estre misse sor autre an non de franc home ne par demanderie, ‹ne› par reconoissance. Et par ce avendra que ceste aucion n’ot pas leu droitement en non de franc home contre celui qu’i l’a reconeue. ¶ {1} Reconoissances sont si fermes que ce que l’en reconoist est tenu por droit, et par nature reson recevoir le pot.
Se je di que li serf est mien avant que je demande l’eritage, ‹...› car li heritages est euz ou leu au seignor. {1} Se le serf est morz, que aucun reconoist que il est sien en cort, cil qui respondi n’est pas tenuz ausi comme s’il fust sien propre ; il ne sera pas tenuz enprés la mort.
Se li sers n’est pas à un, qu’i ‹est› a plusors, et tuit mentent que il n’est pas en lor poer, ou s’il firent tant que il ni fust pas, ou se aucun lo fist, chascun de aus est tenuz, ausi comme por le tot s’i l’eussent en lor poer. Et se cil sol ne fist barat ne conchiement por quoi il fust hors de son poer ou s’il nia que il n’i fust, il n’est pas tenuz.
Se li filz plede o son pere, et il se test quant l’en l’apele, l’en doit tenir tot ce ausi comme se l’en ne li eust rien demandé.
Li commun d'une vile font une assise sor chascun une porcion de deniers, et fere le devoient. Uns borjois de la communie receit cele chose ; enprès, quant il a receu, si vient rendre conte de cele chose. L'en demende comment il porra rendre conte à fin. Et l'en dit que il face le ban crier ; et quant li bans sera criez, et il doit conter à cez qui i vandrant, por qu'il soient douze persones nécessaires ; et tex contes est à fin, et ne n'en puet-an rapeler, se l'en ne la rapele dedanz l'an et dedanz le jor. Il convient i noncier que l'en n'ait pas conté la chose que l'en demende.
Et se aucuns dit qu'il ait conté la chose que l'en dit qui n'est pas
contée, ou qu'il a bien contée la chose que l'en dit qui est mal contée,
et il offre à prover par soi et par garanz, et la commune face encontre
tel ni et tel deffense comme il deit : l'en demende se de tel chose
puet nestre bataille. Et l'en dit que nenil ; ainz sera el recort
de cez qui auront esté au conte ; car bien est avenant que communs
seit plus creuz
Et se aucuns sergenz dit qu'il a conté à son seignor d'aucune chose que ses sires li demende, que li sergenz quenoist qu'il a receues, que li sergenz offre à jurer qu'il li a conté, et cil fet encontre tel ni et tel deffense comme il doit : l'en demende liquex seremanz vet avant. Et l'en dit que li chois vet au seignor, qui ne quenoïst pas le conte. Et se li sergenz offre à jurer par soi et par garanz, que il li ait paié et conté, et cil fet encontre tel ni et tel deffensse comme il doit : l'en demende se de tel chose puet nestre bataille. Et l'en dit que oïl. Et se li sires quenoist le conte, et il dit que l'en ait mal conté, et die de quoi, et l'offre à prover par soi et par garanz, et li autre fet encontre tel ni et tel deffense comme il doit ; l'en demende que dit droiz. Et l'en respont : quant contes queneuz est, que en tel chose n'a que sormise, et qu'il n'i a que prove, et li chois est à celui à qui l'en demende la mesprison. Et se li sires dit qu'il ne l'ait pas conté vingt sol qu'il a receu d'un home et l'offre à prover par soi et par garanz, qui furent au conte d'aus deus, et cil fet encontre tel ni et tel deffense que si a : l'en demende se par ces paroles nest bataille. Et l'en dit que cil est loisanz de prendre la preuve de lui et de ses garanz, ou de contredire que c'est voirs, ou d'escondire vers un des garanz par gaige de bataille.
De cetui droit don l'en use contre serganz, doit l'en user d'autel contre compoignons.
L'en dit ci que qui a partie en aucun héritage, que cil qui veaut partir
a besoing de partir, doit partir, et li autres doit (é) lire. Et s'il ne veaut prendre de l'une des deus parties l'une,
la jostice le li doit fere fere, ou fere le par le conseil des prodes
homes.
Or est à savoir quex choses l'en doit partir : l'en doit partir toz vilenaiges, vavasoreries, totes manières des mobles, fors en choses que l'en ne puet partir, c'est à savoir chose que périst por partie fere, comme molin, comme feur, comme pressoir, comme marchié, et tex choses semblables.
Uns hons dit issi que quant partie est fete, que l'en ne puet redemender partie ; et qui alongue tenue d'un an et d'un jor, la tenue vaut. Quant l'en a fenit la tenue, et qui enfraint la tenue, cil qui aloigne la tenue la doit motrer par soi et par garanz ; et en tel chose a batalle. Et se la partie fut fete, et ele n'a pas un an, ele est tenable, se ele est de bonne foi. Et s'il nie que ele ne fut onques fête, et l'en alongue pas tenue, ce n'est que surmise ; et li chois de la prove est à celui à qui l'en demende.
Se aucuns demende partie por cause de mariage, et aucuns amis li donast héritages ou mobles por fere le mariage, tot vendra en partie, se li dons n'est apertemant donez à la persone.
Se l’en pledoie entre plusors de departir les choses antre mesnies et plez est entre cex moismes de departir communauté ou de bones, l’en doit prendre celui juige par devant, cui [61rA] tuit li heir ou tuit li compoingnon s’asenblent en un leu se l’en le puet fere.
Quant uns de plusors tutors est plediez et li autre ne sont pas metable, il sunt tuit envoié à un moisme juige, se cil le requiert ; et issi est contenu en l’establissement as prices.
Li prevoz dit : cil qui receptera autrui serf ou autrui serve, ou qu’i li fera fere chose que il ne doie par son barat par quoi cil sera enpiriez, je donroi juigement contre lui au doble de tant comme la chose vaut. ¶ {1} Cil qui achate ser en bone foi n’est pas tenuz de cest ban, car il ne porra mie pledier de ceste aucion quar il n’a que fere se li serf est corrumpu ; et il avandra que se aucun fet cel forfet, l’en avra ceste aucion contre .ii., et c’est trufle. Mes nos ne cuidon mie que franc home qui sert en bone foi ne puet avoir ceste aucion. {2} Nos entendon issi ce que li prevoz dit : celui qui recetera s’il recete autrui serf ; et recetier proprement est doner refui en sa meson au serf, de soi repondre, ou en son champ ou en son edefice ou en autre leu. ¶ {3} Amonestier est plus que forcier aucun de fere aucunne chose ; et en amonester puet à aucun doner bon conseil et aucunne foiz mauvés. Et por ce dit li prevoz : celui qui le serf fera sordere par barat, et cil ne forfet mie que tiel chose amonesté au serf s’il ne l’anpire. Et cil qui escommuet le serf ou a pansé aucunne chose mauvese, est tenuz de cest ban. {4} Se le serf fust de bone meniere, et s’il i a mosté mal ou l’en li mostre à fere, et c’est voir s’il i mostra comment il le feist, il en est tenuz. Et se li serf s’en devoit foïr ou il devoit fere larrecin et cil le li loa, il en est tenuz ; il ne doivent pas loer à croistre lo mal. Et s’il fist de bon serf mauvés ou s’il fist le mal pejor, {5} s’i li amonesta que il feist tort ou qu’i l’enblast ou que il s’en foïst ou que il corrumpist autrui serf ou que il reponsist son chatel ou que il fust lecheor ou que il fust fox ou que il aprist mauvés mester ou que il fust jugleor ou melif ou s’il amonesta [61rB] à l’austor que il depeçast le conte au seignor ou que il entrameslast, il en est tenuz.
Ou s’il le fist bordeler, ou s’il li amonesta que il feist bordeau de soi et d’autre.
Li prevoz note le conchiement de celui qui amoneste le serf par son barat. ¶ Et se aucun enpire le serf sanz fere barat, il n’est pas tenuz. {1} Dun l’en demande se aucun amoneste autrui serf à monter sus une meson ou avaler en un puis, et il i monte ou descent et chiet et issi se froisse cuisse ou autre membre ou il se tue, l’en demande s’il en est tenuz. Et l’an dit que s’il le fist sanz barat, il n’en est pas tenuz ; s’il le fist par barat, il est tenuz.
Mes meuz est que il soit tenuz de la loi Aquiliene.
Cest mot « barat » doit estre raporté à celui qui le serf recete ; que autre ne soit tenuz fors cil qui por son barat le recete. Mes se aucun le recete por lui garder de tot ou por partie, ou par misericorde ou par autre cause renable, il n’en sera pas tenuz. ¶ {1} Se aucun amoneste par barat un serf, qu’i cuidoit que il fust serf, il m’est avis que il est tenuz s’il est serf.
Se aucuns corrump serf qui est mien et sien, l’en demande à Julien
s’il est tenuz de ceste aucion. Et il dit que oïl. Et s’il fist sa
clamor de compoingnie, ou de communauté ou de conpoignie, s’il sunt
compoignon il est tenuz, si comme dit Julien. Et porquoi enpire il
la condicion au compoignon s’il pledoie à son compoignon plus que un
estrange ? S’il le recete ou s’il le corrunt ‹…› cil qui pledie
o son compoignon, sanz change de celui, ausi est s’i le
corront
En cest juigement vient l’esme des choses que li sers en porta o soi, car tot le domage ‹...› ; ne ce ne se monte rienz se les choses sunt portees à lui ou à autre ou s’il sont gastees. Et c’est bien droiz que cil soit tenuz qui est princhief dou forfet, plustost que celui à qui il sunt aportees.
Corages de serf est corrumpu se l’en li amoneste que il despise son seignor.
Li sires franchi son serf qui fesoit son despens ; enprés il li rendi conte, et comme il n’en rendist pas bien le conte, il aperçut que il avoist gasté son avoir ches une feme. L’en demandoit s’il porroit avoir aucion de serf corrumpu contre cele feme car ce serf est ja frans. Je di que oïl ; et moismement de larrecin por le serf qui les deners i porta.
Qui cele fuitif est lierres. {1} Li senator juigerent que li fuitif
ne soient receu en chans ne en vile, ne de cex qui tienent les
choses, et i establi poine. Et cil qui dedanz brief jor ne rendroit
les fuités as metres ou as senators, s’il ne le fesoient dedanz
celui terme, s’il les trovoent et nes les arestoient, il juiga que
il fussent puni. ¶ {2} Et li senators ostroia à chevalier et à
vilain que il porroit encerchier
Li fuitif simple doivent estre livré à lor seignors ; et s’i sont meslif ne batailleor, il devent estre puni durement.
Li enpereor dit que cil qui veust son serf fuitif querir en autrui
chans, il doit aler au mestre de la province que li doint ses
letres ; et se mestiers est, que l’en li envoist le bedel qu’i
i aut, et que l’en sofre que li sires entre en la teneure por querir
son fuitif, et que li prevoz punisse celui qui ne li lessera entrer.
Met
Li mestre et li estachier retienent à droit les fuitis en garde ; car li mestre qui sont en garnison envoient les fuitis par droit à la volenté au prevost.
Si ser fuitis se mest en une cort, ne [62rA] non fet por peril de soi que il ne puisse bien eschever le peril del seignor. Li enpereors commande que il fussent rendu ostreemant à lor seignors s’il voloent fere de cex meschief ; car aucunne foiz il vossissent bien que il fussent mis en un mauvés leu por eschaper, mes il convient que il seent rendu à lor seignors.
Li prevoz dit que se aucun bati celui ches qui l’en joe as tables ou
se l’en li fet domage ou se aucunne chose en celui tens est
ostee
Aucunne foiz solent les uns les autres forcier à joer co‹m› seent il voincuz. {1} Li senator deffendirent joer por deniers, fors que se aucuns a pris en atine à joer à la pelote, à corre et à saillir, à luitier ou à combatre por esprover sa vertu.
Si comme de cex choses où l’en puet fere promesses segont [62rB] la loi ; et as autres choses ne le puet l’en fere se ce n’est por soi esloser.
Ce que l’en joe par mestre en mangier de maintenant est bien sofrable. ¶ {1} Se serf ou fiz qui ne est pas encore hors de main jue et il pert, li sires ou li peres le puet demander la perte. Et se li serf prist l’argent, l’en donra contre le seignor aucion dou chetel non pas dou forfet, car le plet est de la chose que l’en a fete, mes l’en ne le doit plus mener à rendre que tant comme valoit le chetel de cele chose. ¶ {2} L’en a contre les paranz et contre les parçoners bone demande de ce que sont joie en jeu des tables.
Li prevoz done aucion en fet contre le mesureor des chans, car il ne convient pas que il nos deceue s’i est contenz par aucunes des bones ou se le vendeor ou se l’achateor volent savoir combien le champ tient. Et por ce mist il avant ceste aucion, car li encien ne crurent mie que loange fust entre tex persones, mes san plus entendre en leu de benefice, et ce que l’en li done sera por li regar doner, et par ce l’apele l’en honore. Et se l’en a aucion de loage, l’en puet dire que ce ne vaut rien. ¶ {1} Ceste aucion requiert solement male tricherie. Car assez est que l’en contraigne le mesureor s’il fet barat à celui home qui n’est pas vers lui obligiez ; et s’il en est travaillez par le barat au mesureor, bien si gart que tel barateor i mist. Et se li sires le fist par negligence, le mesureor n’a garde, bien i gart sa grant colpe ; car c’est ausint comme barat. Et s’il en prist loer, tote la cope n’est pas soe por les paroles dou ban, car li prevoz set bien que il i a loer. ¶ {2} Il sera tenuz de ceste aucion quil le renia ; et asez renie por soi qui par autre renie.
Ou par lestres. {1} Et se je mande qui es mesureor que tu mesurasses ce champ, et tu le mandas à Tabert, et cil i fet aucun barat, tu en seras tenuz, car tu feis barat qui à tel le mandas.
Se je le mande à .ii. et il font enbedos conchiement, je porrai
contre aus .ii. pledier por le tot ; et se li uns fet gré, li
autres est delivrés. ¶ {1} Ceste demande avient à celui à qui il ne
convient pas que la fause mesure fust fete, ¶ c’est au vendeor ou à
l’acheteor à qui ce nuit. ¶ {2} Ponponius dit que se l’achateor done
plus à vendeor por le reniement
Ceste aucion dure toz jorz, car ele prant commoincement non pas de conchiement mes de l’afere qui est commoinciez.
Se le mesureor ne dit pas fause mesure mes il la
retarde
Ou de lesse de voie ou de servité mestre ou oster, ou s’il i mant en mesure .i. ere ou un chevron ou une pierre.
Ou d’aucunne autre chose il sera tenu ; {1} et se li mesureor l’a deceu, l’en li donra ceste aucion contre lui. ¶ {2} Et encore, dit Ponponius, ce moismes contre celui qui ne fu mie mesureor il le deçut, l’en a contre celui ceste aucion. {3} Et ausint contre le mestre qui fist la meson qui deçut le seignor, car li enpereor le commanda. {4} Et ausi cuide je de l’osteler qui conchia son oste à contier.
Cil qui despant aucunne chose por mort, li mor li est tenuz ausint comme s’il eust fet marchié o li, non pas o son heir.
Aristo dit que li leus est religios où li serf est morz et enterrez. ¶ {1} Cil qui mist mort en autrui leu ou metre li fist, il est tenuz de aucion de fet. Nos devon entendre « autrui leu » se c’est autrui champ ou en [63rA] autrui edefice. Et ceste parole done aucion au seignor, non pas à celui qui tient en bone foi, car quant il dit « en autrui leu », il fet mencion do seignor à qui le leu est. ¶ Et se le fruitier li porte, il sera tenuz au seignor de la proprieté. ¶ L’en demande se le compoignon est tenuz s’i le porte en la partie au compoignon ; mes il est voir que il puet estre trez de aucion de departir communauté en plet ou de choses à mesnie. ¶ {2} Li prevoz dit : si home mort ou ses os sont portiez en leu qui est autrui ou en sepulcre où il n’a droit, cil qui a ce fet sera tenuz de aucion de fet et sera tenuz de poine de deniers. {3} Et li prevoz entendi de celi qui est portez, que l’en fet por enterier. ¶ {4} Li leus est dit pur qui n’est ne seinz, ne sacrez, ne religios. ¶ {5} Sepulcre est où cors ou os d’ome sont mis. ¶ Celsus dit que li leus qui est donez à sepulcre n’est pas tot religiou, ne mes tant comme li cors en tient. ¶ {6} Monumanz est qui est fet por remembrance. ¶ {7} Se aucuns i a son fruit ou son usage, il ne fet pas le leu religios. Et se li uns i a l’usage, li autres la seignorie, il ne feront pas le leu religios se cil qui lessa l’usage ne porta par avainture le cors en celui leu quant il ne le peust bien metre aillors ; et issi le dit Julien. Autremant ne sera pas le leu religios contre la volenté au fruitier, mes bien le sera s’il consent. ¶ {8} Nus ne fet le leu religios qui doit servise se cil ne s’i acorde à qui l’en doit le servise. Et s’il ne puet user de servise moins bien par autre leu, il ne puet ce fere por empechier le servise, et por ce ne sera pas le leu religios ; et c’est bien reson. ¶ {9} Cil qui a le champ engagié, s’il i mest un serf mort, il le fet religios ; et ausi est s’il i est enterrez, mes il ne le puet pas ostroier à autre.
Et par l’acort de toz puet l’en bien dire que li leus est religios ; et issint le dit Ponponius.
Cil qui mist mort en autrui leu est tenuz de oster le ou de rendre le
pris que il va[63rB]ut por aucion de fet qui avint à l’eir et contre
l’eir et est pardurable. ¶ {1} Li contes done aucion de fet contre
celui qui a porté mort en autrui here de pierrele
L’en demande se li sires puet oster les os ou le cors que un autre met en sa chose sanz commandemant d’evesque ou de prince. Et Labeo dit que il doit atandre le roi, l’evesque, ou le commandemant au prince, si que non l’en avra aucion de injure contre celui qui le cors feret desfoir. ¶ {1} Se l’en venst leu religios por peor, li prevoz done contre lui aucion à celui qui la chose apartient ; et ceste aucion est contre l’oir ausi comme cele qui contient aucion d’echat. ¶ {2} Se aucuns mest mort en leu establi à communs usages, li prevoz done juigemenz contre lui s’il le fet por barat et en devra bien estre puni par reson. Et s’il le fist sanz barat, il en est quités. ¶ {3} Et en ceste aucion apel de leu pur est atandu à edefice. ¶ {4} Ne ceste aucion n’avient pas solement au seignor, mes à celui qui a l’usage de tel leu ou aucunne servitute, car il ont poer de deffandre lo. ¶ {5} Aucion de fet avient à celui à qui l’en a deffendu que il ne portast le mort en celui leu où il avoit droit de porter lou ; et deffanse li avient se l’en ne li a deffendu, et son procurator a autele aucion car l’en antant que l’en li a ausi deffendu.
Se aucun a sepulcre et il n’i a pas voie et li voisin li deffendent que il n’i auge, li enpereor dit que il doit demander sa voie et que il la doit avoir, et que il l’et de celui qui a son champ ajoint. Et c’est commandemant qui ostroie que l’en demant la voie d’une aucion de cité ; et li prevoz doit contendre par droit pris que il face la voie, par si que li juiges voie la voie, que li voisin n’i soit perdant. {1} Le senator establi que usages de sepulcres ne soit conchiez par changes, c’est à dire que il ne soit mis en autre usage. ¶ {2} Li prevoz dit que se despans est fet par acheson de mort, je commanderoi que cil rende à qui la chose apartient. {3} Cest ban est proposez por droite cause [63vA], que cil qui fist le despans por le mort que il en ait ce que il i mist ; car autremant remainsissent les cors à enterer, et que aucun ne feist despens d’autrui. ¶ {4} Il convient que cil face le despens que le mort commanda et eslut. Et s’il ne le fet, il n’i a point de poine, se aucun molumant ne li est por ce lessiez ; et lors s’il ne fet la volenté au mort, il le doit perdre. Et se le mort n’en parla, cil qui fet le despens ne doit rien avoir et celui lessera as hers ; et s’il n’en i a nul, il sera à coisins et à plus prucheins. ¶ {5} L’en juige despens à mort segont ce que il a et segont la digneté. ¶ {6} Li prevoz ou li mestres doit juigier quex despens l’en doit fere por mort ; s’i i a deniers en l’eritage, s’il soit fet de deniers. S’il n’en i a, s’i vende des choses qui ne sont pas boens à tenir et qui chargent l’eritage. Et s’il i a or ou argent, l’en commandera que il soit venduz ou angagié por fere le despens.
Ou s’il i a detors, s’il pueent rendre maintenant.
Et se aucuns empeche celui qui achata que les choses vendues ne li
fussent baillies, il convient que li prevoz i doit metre conseil et
que il deffende ce fet se nul vient encontre. ¶ {1} Se cil qui est
morz est coitiver
Celsus dit que quant la feme muert l’en li doit fere sa mortaille dou doere qui remoint [64rA] à l’ome et des cez autres biens que la feme avoit.
Et issi convient il le mariz et l’eir despendre en la mortaille. {1}
Le mariz ne sera pas plediez de ceste aucion s’il rent à la feme son
doere, et ausit comme Marcellus dit ; et c’est voir en cet
quas, où il lust ce fere par loi
Et s’il n’i ot point de doere, il convient que li pere à la fame i fust tenuz de fere despans commun, si comme Ancillinus dit, ou metre hors de ban les hers à la feme. Et s’ele n’a nul heir, ne li peres n’a que poer, il convient que li mariz face tant comme il en porra fere de despens que sa feme ne remoinge à este enterree.
Se feme enprés ce que ele est departie de son mari, et ele est a autre marié, et s’il muert, Fulcinus cuide que le pretre et le doere et que il face despens de mortailles.
Se cil qui tient l’eritage fet le despens de la mortaille et il ne demande pas ce que il a despendu, ceste aucion li est bone. ¶ {1} Se li ons et la feme morent en un moismes tens, Labeo dit que l’en doit doner ceste aucion en l’oir à l’onme segont sa partie par ce que il a ce en non de doere.
Se aucun est heir et enprés li est l’eritage tot let comme à celui qui n’est pas digne, droiz est que li droiz de l’eritage li remainge quant a despans.
Li ancien ne cuiderent pas que l’en deust plorer celui qui vet à destruire et ses enfanz et son poïs ; ausi comme se li fiz eust ocis son pere, ou le peres le fiz, sanz felonnie, il establirent que cel le comparast.
Quant guerrier ont pris leus, il ne sont plus sainz [64rB] ne religios, ausi comme l’ome franc devienent serf ; et s’il sont delivré de ceste chestiveté, il revienent arieres en l’anciene franchise.
Nos entendons despens de mortaille quanque l’en despent por le cors, si comme pour oignemanz, por le pris de la terre où il est enterré, et de sarcuez et la voiture ; et quanz l’en i metra de despens avant que il soit enseveliz, je cuit que tot ce est despens. ¶ {1} Divus Adrianus dit que c’estoit monument de sepulcre quanque l’en i despant por fere le leu où li cors est mis ; et se cil qui fist le testamant commande fere aucunne chose, si comme un porche ou un edefice, ce n’est pas dou despens de mortailles.
Cum aucun est enterré en divers leus, l’un ne l’autre leu ne est pas religiou, car d’une sepulture ne puet l’en mie fere plusors sepulcres. Il m’est avis que cil leu est religios qui est fez principaument par cors enterrer, dont l’image i est por qui nos somes coneuz. {1} Quant l’en ostroie que reliques i soent portees, li leus est religios.
Li despens de la mortaille doit estre fet toz jorz de l’eritage, et i doit estre li despens avent que l’en rende rien quant li heritages ne puet rendre les detes.
Li prevoz dit : je deffant que l’en ne face force à celui ne à
cele que il ne puisse porter son mort et enterrer maugré toz. {1} La
où cil avra droit de metre son mort, qu’i n’est pas deffendu que il
ne li mete ; il est aparissant que il eist defandu à porter le
mort se li deffant la voie. ¶ {2} Li sires de la chose puet user de
ceste aucion que li avient de pur leu. ¶ {3} Se l’en me doit voie en
champ par qui je voil porter le mort et l’en me deffant la voie,
acordé est que j’é ceste aucion par ce que l’en me deffant la voie
et tot ce i sera se l’en a autre servise sor le champ [64vA]. {4}
Cest entredit est deffandables. {6} Cest entredit est entreposé par
ce quar il apartient à religion que les monumanz seent bien atorné
et aorné. ¶ {7} L’en ne deffant à nul que il
Li rois deffant que feme grosse d’enfant ne soit enterree s’ele muert dusque li enfes li soit trez ors dou cors ; qui fera contre ce, aparissant est que il avra tué l’enfant.
Si aucuns mesone prés de tes mesons en sepulcre fessant, tu ne porras pas apoier c’ovre nove ; et se l’ovre est fete, tu n’avras nule aucion fors que de force et de injure. ¶ {1} Se aucun mort est porté prés d’autrui edefice dedanz le an mesure, li sires de l’edefice ne li porra pas deffandre que il ne mete un autre mort en celui leu, ou que il ne face edefice se li sires le sot au commaincement.
Longe teneure ne done pas droit de fere sepulcre à celui qui n’i a droit.
Se l’en met os en mon sepulcre qui n’est pas fet, n’i a point de destorber que il ne soit parfez. {1} Et se li leus i est ja fez religios, li evesques doivent encerchier et voer commant l’en puisse refere le leu, sauve la religion.
[64vB] Bien est avenant que nos façoin entendre les paroles, que nos dison aucunnes choses de la sennefiance de cest titre. Por ce que li prevoz dist mout de choses qui apartienent à divers marchiez, par ce mist avant li titres « des choses creu‹e›s »; tuit li autre marchié don nos avons parlé desus sont acompli, si comme Celsus dit ou premier livre des questions. ¶ {1} Cest mot « croire » est generau, et por ce le mist li prevoz soz ce titre et parla de prest et de gage ; car de quelconques chose nos acordon et acreon autrui chose, nos cuidon que il rende ce que il nos doit dou marchié. Nos apelon ce « croire », si comme li prevoz le dit generaument.
Nos preston non pas por avoir cele chose non mie que nos avon
prestee, car se l’en l’an nos rendoit autel ce seroit prest ou chose
baillie en garde ; et se l’en rent autre chose que cele, ausint
comme mil por forment, ce ne sera mie prest. ¶ {1} Doere de prest
est en chose que l’en puet peser
Quant nos preston aucune chose, se nos ne devison que l’en la nos rende ausi bone, nos i perdon. Cil qui doit la chose la doit rendre ausi bone comme i l’enprunte ; car s’il rent nouveau vin por viez n’est pas bon, car ce que l’en devise en marchié doit est tenu. Et l’en i doit ce entendre que l’en ne rende la chose en autre maniere, et ausi bone comme ele fust prestee.
Se aucun ‹n’›ot cause ne porpensement de prester à ousure, et tu vosis achatier un champ et vosis anprunter l’argent, ne ne le vosis pas acroire dusque tu eusses acheté, et par ce le creancer qui avoit par aventure besoing d’aler hors dou païs te bailla cel argent en prest por acheter cel champ, tu pranz celi argent à ton peril ; car cil qui recevra la chose à vendre por user dou pris de la vençon avra la chose à son peril. ¶ {1} Chose qui fut baillie en gages, se li argenz est poiez, puet estre demandee ; et li fruiz que l’en a pris à tort, car se le mesteer prent les fruiz anprés les .v. anz cil les puet demander qui baille le gage s’il n’es à pris par la volenté au seignor ; si non, il ne les puet demander. {2} Ce qu’est ravi par force de flueve puet estre demandé.
Ce que il convient que tu me rendes, s’il perist enprés por toi, et por toi faut que tu ne le me rendis, le domages en est tiens. Mes l’en doit voir se l’en l’a fet por toi et se la chose estoit en ton poer, ou se tu feis por barat qu’i n’i fust mie ou que ele i fust, ou s’il i ot aucune droite cause par quoi tu deus savoir que il te convenoit cele chose rendre moi.
Certaine chose est que l’en doit savoir quele est la chose et conbien grant qui est obligie, ou que l’en die le non de la chose, ou que l’en die monstrance qui vaille non. ¶ Car Pedius dit que ne mon[65rB]te rien se la chose est apelee par propre non ou s’ele est monstree à doi ou par moz de injure ; si que l’en die tex moz par anviron que bien vaillent le non de la chose demandee.
Se tu anpruntas de aucun hors dou seu deners et tu cuidoies que il fust sages et tu les mez en ton preu, ¶ Julianus dit que le desvé a la demande ; car de celes causes moismes que l’en nos fet gaignier senz nostre seu, par celes meismes gaaigne li desvez. ¶ Et se cil qui fist creance au serf commaince à estre desvé, et le serf met cele chose en preu au seignor, l’en la puet demander en non au serf. Et se aucun cret autrui deniers et enprés est desvé et cele pecune est perdue, l’en la puet demander por le desvé.
Se li compoinz presta sa propre pecune, il acroit, tot ne s’acordent pas à ce li autre. Et s’il preste dou commun, il ne l’acroit mie se li autre ne s’i acordent, car il ne fet prest que de sa partie.
Quant fiz qui est en bau preste son jornel quant il estoit à Rome à escole, Scevusla dit que l’en li doit aider.
Se je te baille deniers, ausi comme se je la te vosise doner, tu les prenz, ¶ Julien dit que ce n’est mie don. L’en doit voir se c’est prest ; et je cuit que ce n’est mie prest et que li denier ne sont pas à celui qui les reçoit, car il les prant en autre cuidance. Et par ce, s’i les despent tot, les li puisse l’en demander, il se porra deffandre de barre de tricherie ; car segont la volenté à celui qui fist le don li denier sont despendu. ¶ {1} Car se je, ausi comme se je te baille en garde de don, tu le pranz comme prest, ce n’est ne garde ne prest. ¶ Ausi est se tu enpruntes deners et je les pris en prest por ma besoigne fere. En l’un cas et en l’autre, je les puis demander sanz mestre barre encontre.
Se je porsie le serf qui t’est lessié, ausi comme s’il me fust lessié, et je le vent, s’il est mort il n’en puet demander le pris, ce dit Julien, se je i ai gagné.
Se li procurators au chevaler presta deniers et il en prent plege, par col exemple se tutor d’orfelin ou cil qui a la cure [65vA] de valet et il promet à rendre l’argent de l’un et de l’autre, acordé fust que il l’en donast aucion au chevaler à qui furent li denier.
Citié puet estre engagie par prest se li denier sont torné an preu de la cité ; si que non cil qui reçut l’argent non pas par la cité i seront tenuz.
Li creanciers à qui l’en ne baille pas sofisant gage puet demander que l’en li baut gage qui vaille la dete.
Si li sires ot serf marcheant, Julien dit que l’en puet o le serf
ausi pledier comme o celui par qui il moine la marchandise, qui a
cel ofice
Il est establi ou commandemant à princes, que cil qui governe la province ne que cil qui à aus vienent ne marchandet ne que il ne prestent ne que il ne seent userier.
Le peril des choses apartient à celui par qui cope l’en puet prover que la chose est enpiree.
L’en doit regarder combien il a en la nature des homes savoir se la chose puet estre deuee.
Tres grant remede de delivrer plez fu miste en usage quant religion de serment fut controvee, par quel religion li contenz de seremant sont otez.
Seremant contient senblance de pez, et a greignor autorité que chose juigiee.
Li prevoz dit : se cil à qui l’en pledoie jure a la volenté à
son aversere. Et « cil qui jure » nos devon savoir que
c’est reus ; ne l’en n’i mest mie por noiant ce qui est dit desus
« à la volenté de son aversere », car se reus jure et nus
ne li commande, li prevoz ne li fera pas valoir celui
seremant ; car lors ne jure reus que à soi. Car s’il estoit
issi, chascun jureroit à la volee et se delivreroit par ce de ce que
l’en li demanderoit. ¶ {1} Ce queconques aucion aucun est tret en
plet, s’il jure, li seremanz li vaudra se le plet est en persone ou
en chose, ou en fet, ou d’etrive, ou de defense, ou de qui tu vodras
aucion. {2} Et se l’en jure de l’estat d’au[65vB]cune persone, si
comme s’il est franc ou cuvert, li prevoz fera valoir le
seremant ; ausi comme je lessoi le seremant sor toi et tu juras
que tu n’estoies mie en mon poer, li seremanz sera tenuz. ¶ {3}
Marcellus moismes dit que l’en puet jurer savoir se la feme est
grosse ou non, et l’en en trera le seremant. Et oncore dit il, se li
contez estoit de la possession, il convient garder le seremant se la
feme veust estre mise en sesine comme grosse, et se l’en li
contredit, ele jurra que ele estoit grosse, ou l’en fist seremant
contre lui ; et se ele le jure, ele ira en la sesine sanz nule
peor ; se l’en jure encontre lui, ele n’avra pas la sesine, tot
soit ele grosse. Et Marcellus dit que li seremanz vaudra à la feme
que el ne soit trete en plet, ausi comme se ele est mise en la
sesine en non de son ventre par cause de chalonge, que l’en ne li
face force en la possession. ¶ L’en doit voir se li seremant vaut
dusque la, se l’en fet enqueste enprés ce que li enfes est nez que
il est fiz ou s’il ne est pas fiz à celui à qui l’en dit. Marcellus
en parle et dit que l’en en doit enquerre la verité, car le seremant
de l’autre ne vaut ne ne nuit à l’autre. Et le seremant à la mere ne
vaudra rien à l’enfant, ne ne nuira se la mere lesse jurer que ele
n’est pas ençainte de celui que l’en dit. ¶ {4} Puis que l’en let
seremant sor autre, il convient que il jure ; autremant vet se
je te lessoie sor toi à fere le seremant par si que tu jurasses par
Deu, et tu juras par ton chief {*12.2.4} ou par celui à tes
fiz, {*12.2.5} cest seremant ne vaut riens. Et se je requis
que tu jurasses par ton salu et tu juras issi, le seremanz sera
tenables ; car tot seremant qui loit à fere par qui aucun i
estper quod voluit quis sibi iurari, idoneum
est
Quar ce que autres font ne doit pas nuire as autres.
À totes les foiz que l’en jure por chose, l’en ne perdone tel seremant ne à pere ne à patron ; et por la chose demande l’en le seremant, ausi comme de creance de deniers que li autors dit que l’en les li doit, ou reus jure que il ne les doit mie. Ausi est quant l’en demande seremant de deners à termez.
Il convient que l’en envoit à fere le seremant à nobles persones en lor mesons et à cex qui sont foibles.
Le seremant qui est lessiez par convent hors de jugement ne puet l’autre partie renoier à l’autre. ¶ {1} Li orfelin par l’autorité au tutor puet bailler le seremant à l’aversaire ; et s’il le fet sanz tutor, il avra barre por soi, mes l’en dira contre la barre que li orfelins n’a pa poer de l’aministracion des choeses. ¶ {2} Se tutor tant com il a le bau, ou curator qui garde un hors do sen, envoie à l’aversere le seremant, il doit estre estable, car il pueent la chose alienier et recevoir les detes et pledoier por cex qui ont en garde et en cure. ¶ {3} Se li procurators lesse le seremant, il doit estre tenuz s’il a ministracion de toz les biens, ou se l’en li a mandé especiaument ou s’il est procurator en sa chose moismes.
Se li sers jure que ses sires ne doie riens, li sires doit avoir excepcion ; et bien se gart li averseres qui lessa le seremant sus le serf.
Se aucun a juré ne monte rien s’il est male ou femele ou de quel age
il soit, car li seremanz doit estre gardez en totes menieres contre
celui qui se tint apoiez quant il le lessa fere ; tot soit il
veü que li menor se parjuret, car il n’est pas aparissant que il
deceue son aversaire à son esciant. ¶ {1} Se li peres jure que li
filz ne doit pas ce que l’en li demande, Celsius dit que li peres et
li fiz doivent avoir excepcion dou seremant. ¶ Se li peres jure que
il n’i a point de chatel, li fiz porra estre trez en plet s’il a
enprés rien gaignié, et [66rB] li peres sera trez en plet que il
rende reson dou chetel qui est enprés conquis. ¶ {2} Convenance de
seremant puet estre por numbre comme de renouveler convenance, de
lessier et de joster de tot
Seremant vet en leu de poie.
Menor ne puet fere grace à autrui de seremant lessier sor lui.
Cil qui jure par son salu, tot soit il veü que il jure par Dé, au regart de la divinité il jura issi. Mes se li seremanz est mis sor lui si especiaument et jurast par son salu, n’est pas aparissant que il et juré ; et por ce convient il que il jure solempnelmant de chief.
Se cil qui mist le seremant sor l’autre ne l’est quite, et l’en ne jurra pas de calumpnia, l’en ne li doit pas doner aucion ; car bien si gart cil qui choisi à avoir le seremant qu’i n’avra pas avant « de calumpnia », qu’i fut senblant que cil li vosist pardoner.
Grant vilenie est et en ausi comme chose coneue quant l’en ne veaut jurer ne lessier le seremant à son aversere.
Se l’en done deniers por fere chose qui est honeste, que autre fust mis hors de ban, ou que le serf fust franchi, ou se l’en lesse le plet, se la chose est segue, l’en ne puet les deniers redemander. ¶ {1} Se je te done .x. solz por la convenance tenir, et de maintenant je la lesse por l’eritage demander ou les lés, ‹…›.
Je te done ma peccune que l’en ‹n’› alast en plet ; je demant,
se je puis demander la se l’en ne me done caucion que l’en jauge, se
l’en ne me promest que l’en jauge. Et il est voir que il ja fiert
mult savoir se je donoi l’argent solement por ce que l’en ‹n’› i
alast, ou se l’en me doit prometre que l’en ‹n’› i irra
Si un estrange dona doere por la feme, et fist convent que en quelque meniere li mariages fust feniz li doeres li fust randuz, ne les noces ne furent segues, por ce que tant solemant fut fet convenz de cez cas qui sequent le mariage, eles ne furent pas fetes, l’en demande à qui avient la condiction, ou à la feme ou à celui qui fist le doere. Et il est senblant à voir, en cest quas se doit garder car quant la cause n’est segue il puet demander son don que il fist por le doere quant le mariage ne fust complez, se la feme ne mostre par bones proves que il eust fet plus por la feme que por lui. {1} Et se li peres done por la fille, et issi est en convent, se l’en ne motre que autrement soit fet, Marcellus dit que li peres puet demander ce que il a doné.
Quant aucun en sa maladie fet don et quant il garist le veaut rapeler, il puet demander les fruiz des choses donees, et les anfanz et quanque il apartient à la chose.
Se l’en rent à faus procurator chose qui n’est pas deue, l’en ne puet demander rien au procurator se li sires tient à fet ; mes li sires en est tenuz, si comme Julien dit. Et se li sires n’eust à fet, tot fust la peccune rendue, l’en la poist demander au procurateor ; et ce qu’est baillié n’est pas demandé comme chose qui n’est pas deue, mes ausi comme ce qu’est doné por chose qui n’est mie fete, por ce [67rA] que l’en a mie ferni ce que a esté fet ou se le procurateor a fet larrecin de peccune qui n’ot mie, l’en puet o lui pledier de larrecin et demander la li.
Tost ce qu’est doné est doné ou por chose ou por cause, et por chose ou bele ou lede. Je di lede quant il a ledure devers celui qui la done non pas devers celui qui la reçoit, ou non pas devers celui qui la reçoit ne devers celui qui la done, ou de l’un ou de l’autre. ¶ {1} Ce qu’est doné por chose honeste pot issi estre redemandé se la chose n’est fete por qui li fez fu fez. {2} Et se cil qui reçoit la chose la prant par lede cause, puet l’en demander le don.
Ausi comme je te done aucune chose que tu ne faces sacrilege ne larrecin, ne que tu ocies un home ; et en ceste maniere, ce dit Julien, se je te done que tu n’ocies home, l’en le puet demander. {1} Et se je te done et se je te demande por rendre moi la chose qui est ches toi mise à garder, ou que tu me rendisses unes letres. {2} Et se je te donoi que tu donasses sentence por moi et que tu feisses ma cause bone, l’en ne puet ce don rapeler. Cil est a crime, car il corront le juige ; et issi le doit l’enpereor et dit que il doit perdre la querele.
Et la où il a ledure devers celui qui done et qui prent, nos dison que il ne le puet rapeler ; ausi comme se l’en done deners por juiger malemant.
Et ausi est se l’en done deners por fotre, ou se aucun qui est pris en avotire ‹se› soeet rent ; il n’en puet rien demander, si comme Sabinus et Casius distrent. {1} Et s’il done loier que li lerres ‹ne› fust en cause, por ce que il a honte de ça et de la, il ne puet demander ce que il en a doné. ¶ {2} À totes les foiz que la honte est à celui qui prent, Celsus dit que l’en li puet demander, ausit comme se je te done que tu ne me faces tort. {3} Mes ce que l’en done à putein ne puet estre demandé, si comme Labeon et Marcellus dient ; et c’est par bone reson, non pas por ce que anbedui i aent honte, mes solement cil qui done. Cele i a honte en ce que ele est putein, mes ele n’a pas honte de [67rB] prendre tot soit ele putein. ¶ {4} Se je te done loier por juigier mon serf furtif, ou celui qui m’a amblé ma chose, je ne puis mon don demander, car tu n’eus pas honte ou recevoir le. Et se mon serf fuitif te done loier que tu ne li vuasses, je te puis demander ce comme à larron. Et se li lerres prant droit devant moi, ou li compoign au lerre, ou li fuitif, et il done, je cuit que l’en le puet demander.
Se aucun prist loer de mon serf que il ne deit le larrecin que il avoit fet, s’il le dit ou s’il non dit, Proculus dit que l’en puet demander le don.
Sabinus loie toz jorz les ancienes en ce qu’i cuiderent que se aucunne chose est donee à aucun par mauvese cause l’en la puet demander ; et Celsus s’acorde à ce.
Se peccune est eue de promesse qui est fete à force, l’en la puet demander.
Se tu as promis à Tebert por lede cause, s’i demande la promesse, tu as contre lui barre de tricherie ou aucion de fet ; et se tu li renz, tu ne puez redemander lo, car la cause de la promesse est ostee, qui estoit nule por la excepcion se l’anciene cause remoinssist, c’est à dire la honte. Et s’il i ont honte cil qui prent et qui done, cil qui tient et est sesiz en a le meillor ; ne li autres ne puet demander, tot soit le don rendu par la promesse.
Se je te preste robe à user et enprés la te bailloi que tu m’en rendisses le pris, je le porroi bien demander ; tot soi il doné por la chose et la cause soit segue, le don est fet avant vileinement. ¶ {1} Se tu reçoit chose loee ou vendue ou commandee que tu en rendisses à moi l’argent, j’avré contre toi aucion de loage ou de vente ou de mandemant. Et se tu me renz ce que tu me devoies dou testemant ou de promesse et je te rant la peccune, l’en puet solement demander la peccune qui fu donee en celui non ; et issi le dit Pomponius.
Johans de
Beaumont dit : Tot ce qu'est doné (
Ausi com se te done aucune chose que tu ne faces sacrilége, ne larrecin,
ne que tu n'ocies un home : et en ceste menière, ce dit J. :
Se je te done que tu n'ocies home, l'en te puet le don demander. Et se
je te done por moi rendre la chose qui est sor toi mise en garde, ou que
tu me rendes unes letres ; et se je te donoi que tu donasses
sentence por moi et que tu me feisses ma cause bone : l'en ne puet
ce don rapeler ; car cil a crime qui corromp le juige
Se aucuns a promis por lède cause, et il n'ait randu, il a barre contre
celui qui demende ; quar la chose de la promesse est ostée qui
estoit nule por l'escepcion
Uns demandoit vingt livres, et disoit qu'il les avoit donées por lède
cause, por ce que cil a qui il les avoit donées n'oceit un home, et
c'estoit à prover et à avérer par soi et par garanz, qu'il avet seu et
veu la promesse fere et les deniers poier. Li copables fet encontre lui
tel ni et tel deffense comme il doit. L'en demande qu'an dit droit. Et
Or devon voir de chose qui n’est pas deuedesue dans le ms.
Ausi est si novele cause est don l’en ne savoit rien de tot l’eritage ; ausint comme un enfant nest anprés la mort au pere que li hers ne savoit pas que la mere fust enceinte, ou se li autres enfant qui estoit en guerre revient que li peres disoit fausement que il estoit morz. Il convient doner bones aucions au fiz qui nest enprés la mort au pere, ou à l’autre qui gaaigne l’eritage contre cex qui ont eu les lés. Ticius et Antoninus enpereors distrent que cil qui tient l’eritage en bone foi est tenuz de tant comme il a plus gaignié que le peril de ceste chose ne remoinge à celui qui randi la chose sanz sa colpe.
N’est pas nouvele chose se un autre demande ce que autres a poié ; car comme cil qui n’a .xxv. anz quant il a demandé l’eritage et les lés renduz nicement est mis en point qui estoit avant, il ne puet demander ce que il a rendu, mes cil à qui la chose apartient les puet demander.
Ce qu’est rendu por niceté qui n’estoit pas deu, ce puet estre demandé ou autretant.
Ce que un autre rent à la feme en non do mari qui ne puet rendre, il ne le puet demander, car la dete est à la feme.
Se je te done l’usage et lo fruit de mon champ qui quidees fausement que je le te deusse, et je muir avant que je le te demande, la demande de cestui passe de cex en celui.
Car c’est lëauté et nature que nus ne doit estre riches d’autrui domage.
La demande de solte qui n’est pas deue est naturel ; et tot ce que apartient à sote puet estre demandee, si comme li enfes qui nest de la serve, ou ce que creue d’eve a amené en mon [68rA] champ ; et les fruiz, se cil à qui la sote est fete l’a pris en bone foi, sont demandables. {1} Et se l’en rent autrui deniers, l’en les puet demander si que l’est en et la sesine ; ausi comme se je cuide fausement que je te doie la sesine d’aucunne chose et je la demandasse. ¶ Et se je fis la possession toe, si que ele ne puet estre rapelee par lonc tens, tot puisse je pledier à toi par droit par ce que je te rendi chose que je ne te devoie mie. {2} Et se li fruiz et li usages qui estoit autrui est rendu o la chose, je la te demanderoi hors l’usage.
Se l’en rent par niceté chose qui estoit deue par condicion, ele puet estre demandee tant comme la condicion pent ; et quant ele est avenue, l’en ne la puet demander. {1} Et ce que l’en doit à jor nomé, ne puet estre demandé dusque le jorz soit.
Ponpes demande trop bien, se aucuns cuide que pez soit fete de celui qui est heir ou de celui qui est procureor, et il done por cele pez qui n’est mie fete, l’en demande se l’en le puet redemander. Et il dit que oïl, car il est donez por fause cause. Ausi cuideré dire se la pez n’est fete por qui le don est fet ; et se la pez est depecee, ausi en doit l’en dire. ¶ {1} Se aucun fet pez aprés chose juigie et il rent, il porra redemander par ce que acordé est que la pez est nule ; et ce dit li enpereor. Et ce puet estre retenu en la cause dou juigement qui a esté rendu por cele pez.
Se cil qui se puet deffendre de pardurable barre, qui savoit bien que la barre li avoit mester, promest aucunne chose por soi delivrer, il ne la porra pas redemander.
Cil qui par niceté rent plus que l’eritage ne se monte an creancer, puet demander ce que il a rendu comme ce que il ne devoit mie. ¶
{2} Se la feme est en tele opinion que ele croit que ele est obligie por le doere quanque le rendra por le doere, ele ne porra redemander ; quar quant la fause opinion est otee, ce qu’est rendu ne puet estre redemandé, ainz remoint por cause de pitié. ¶ {3} Cil qui promist home generaument est ausi comme cil qui doit un home ou .x. solz. Et par ce, s’il cuida que il eust promist Tibert et le rent, il ne le demandera pas [68rB] ; et s’il rent un home que tu vodras, il sera delivrés.
La demande nest nule de celui qui reçoit la soe chose ; et totesvoies, se autres les rent que cil la devoit veroiment, cil la puet redemander.
Tu promeis par malper errorem
Cil qui promist à doner .x. solz s’il fesoit aucunne chose, ou se aucunne chose est fete, s’il rent ce que il promist avant que la chose soit fete, ‹...› que il a promis, et par ce les puet il redemander.
À cex puet l’en demader la peccune à qui ele est rendue en quelque meniere, non pas à cex qui ele profite.
Ce que aucun rent par si que il savoit que il ne devoit mie la chose et par corage que il la redemandast, il ne la pot redemander.
De aucion de chose que l'en ne doit mie, et comment l'en la puet demender, nos devon voier. Se aucun rent chose qui n'est pas deue, et riens n'en siet, il la puet redemender.
Se aucuns enfes est au ventre sa mère et ne set l'en pas que il i soit,
l'en puet redemender le héritage, qu'il sera rendu à autre qui se fera
heir. Ausint est se aucuns est heirs (
Et se mi procurators rent chose que je ne devoi mie, il la puet
redemender ; et tutor et curator ausi. Ce qui est rendu par niceté,
et n'ière pas deu, puet estre demendé ou autretant
Un home dit issint : Cel home me doit dix livres, que je li rendi, que je net li devoie pas ; si les démant, et s'il veust dire que ce ne soit voirs, je suis prez dou prover et de l'avérer, et par moi et par garanz qui en fera ce qu'il devra. Li copables fet encontre tel ni et tel deffense comme il doit. L'en demende qu'an dit droit. Et l'en respont que li demanderes est loisanz de prandre la prove de celui et de son garant, et de conoistre que c'est voirs, ou d'escondire par la soe. Car en tel chose n'a que sormise, comme il n'i oist cause dom il ait bataille, ne chetel ; et est aparissant que l'en ne poie pas volentiers chose qui n'est deue.
La meniere de ceste demande sera tele : que se aucuns promest sanz cause ou rent chose que il ne doit pas. S’il promest sanz cause, il ne puet pas demander tant comme la chose se monte que il n’a mie rendue, mes il puet demander l’obligacion moismes. {1} Et s’il promet por cause et la cause n’est pas segue, l’en doit dire que l’en puet demander ce que l’en a doné. ¶ {2} Se l’en a promis au commoincement sanz cause ou s’il i ot cause de prometre qu’i n’est pas segue, l’en puet dire que l’en puet demander. ¶ {3} Se aucuns puet demander à autre ce que il a eu sanz droite cause, ou s’i l’a doné por torte cause.
Se li felons baille ses vestemanz à laver et à polir et enprés que il les a perduz il rent au seignor par plet le pris que il valoient, et enprés li sires trove la robe, l’en demande par quele aucion cil puet demander la peccune que il a perdue. Et Cassius dit que il ne puet mie solement pledier ou le seignor de loage, ainz puet demander au seignor ce que il a rendu ; et je cuit que il a aucion de loage. Et l’en demande s’il puet demander cel argent. Car il rendi chose que il devoit, mes que tant i a qui rendi sanz cause ; por ce que la robe fut trovee, puet il demander ce que il i bailla.
[68vB] Cil qui sont obligié sanz cause ont aucion de chose qui n’est mie certaine, et la puet demander por fere que il seent delivrés.
Ne monte rien se aucunne chose est donee au commoincement sanz cause ou se la cause por quil ce fust promist ne fu pas segue.
Cele qui se devoit marier dona à l’ome peccune en doere, ne ne se maria pas ; l’en demande s’ele puet cel argent demander. Je dis por la ribauderie de cele qui done et de celui qui reçoit, se li denier sunt numbré l’en ne les pot demander ; et en tel jeu en a le meillor cil qui tient. Et segont ceste reson aucun dit que la feme ne puet demander rien de cele chose ; mes je cuit que la chose n’est pas lede, car ele ne fu nule, car li doeres fu nul comme cele peccune fu donee por mariage non pas por fotre. ¶ {1} La marrastre au fillastre, la bruz au serorge, donerent peccune en non de doere, ne il n’i ot point de noces ; il est veü que il n’i a point de demande, car entre tex persones lor assenblee est nule car il i a avotire ; et plus, et por ce que il n’i ot point de cause de doere, l’en le puet redemander s’il est doné.
En chose emblee avient la demande au seignor.
Hors dou seu et anfanz sont obligié de cause de larrecin quant il i a hers, tot ne puisse l’en pledier ou aus.
Si serf est demandez par cause de larrecin, ce doit venir en la demande por conbien cil ne vosist qu’i pledoie ; ausi comme s’il i a heir establi et li sire est apereliez de perdre l’eritage, si comme Julien dit ; et s’il demande un home mort, il le doit avoir ou le pris de l’eritage.
Se serf ou cil qui est en ba‹n› amble, l’en doit demander au seignor ce que il en a eu ; et por le remoignent, li sires puet doner le serf por le forfet.
[69rA] De cause de larrecin puet l’en demander au serf, et nus n’est tenuz de cele demande fors cil qui embla ou li hers.
Il est apparissant que aucun ne puet pas demander chose en autre leu que la où ele fu promise. Et por ce que c’estoit iniquité se cil qui promist ne venist en leu où il avoit promis, s’i le fet à escient ou s’il le convenoit à force estre aillors et por ce ne poet venir en leu, por ce que acordé fust que l’en donast bone aucion en ceste chose.
Aucion arbitrere contient le preu de l’un et de l’autre, tant de
l’autor comme de reus. Et se li reus i a domage, la condempnacion
sera de moins que li plez ne fust ; ou se c’est à l’autor, la
peccune sera creue. ¶ {1} Ceste aucion vient de ceste promesse, ausi
comme se tu promez à doner .x. solz à Orliens. ¶ {2} Se aucun
pledoie à Paris por .x. solz ou por un home que l’en li promist, il
n’an puet pledoier aillors ; que reus ne prendeScevola. Non utique
Se cil qui fist le testamant commanda à son heir que il rendist aucunne chose en certain leu, il i avint aucion à plesir.
Ou s’il enprunte deniers por rendre les an certain leu.
Aucion de achest ou de vente ou de chose baillie à garder est en juigement de bone foi s’il est en convent en marchié que la peccune soit rendue en certain leu, ne aucion à plesir n’i a leu. Et s’il promist à rendre en certain leu, il usera de ceste aucion.
Il est aparissant que l'en ne puet demender chose que là où ele fu promese ; et por ce que c'estoit iniquité que cil qui promist ne venist en leu où il avoit promis, fu acordé que l'en donast bone aucion contre lui.
Ceste aucion vint de tel promesse, aussi comme se tu me promeis dix soz à
rendre à Orliens, tu ne les me doiz pas rendre à Paris ; car je
perdroie le profist dou leu où tu les me devoies
Se aucuns promest à rendre à Paris et à Orliens, il fet que l'en li puet demender la moitié à Paris et la moitié à Orliens.
Et se aucuns promest à fere une meson et ne dit pas le leu, la promesse ne vaut riens.
Se aucuns rent à Paris et il doit à Orliens, l'en ne li puet riens demender ; car il n'i fist pas force ne peur.
Se cil qui fist le testament promist à rendre en certain leu, sis heirs
r'est tenuz. Aucion d'achat ou de vente ou de chose baillie, a juigement
de bonne foi
Uns promist à rendre à Orliens ; li créanciers dit qu'il promist à rendre à Paris, et l'est prez de monstrer et de l'avérer par soi et par garanz, qui en fere lo tierz plus. Et li detés fet encontre tel ni et tel deffense comme il doit. Et l'en respont que l'en doit regarder où li marchiez fu fez : s'il fu fez à Orliens, cil qui demende s'en passera, contre le créancier et contre son garant, par sa prove ; s'il fu fez à Paris, li chois de la prove est au créancier ; car en tel chose n'a pas bataille.
Li prevoz sostient cest ban car il garde les chose establies par
acort ; car dure chose est aler contre sa foi. {1} Li prevoz
dit : « cil qui establi à rendre deniers que il
devoit » ; l’en doit ce issi entendre celui ou cele, car
femes sont coneues de rendre ce que il en convenencent s’eles n’ont
seignors. ¶ {2} Et tot ne soit il rien dit en cest ban de menor,
[et] s’il establist soi à rendre sanz l’autorité au tutor, il n’est
pas tenu. {3} Et se cil qui est encor au bau promest à rendre, l’en
demande s’il est tenuz. Et je cuit que oïl ; et ausi li peres
dou chetel ou fiz. ¶ {4} Cil qui promet vitement quant il veaut
prometre que l’en ne li demant rien, il n’en puet pledier ; car
il ne le fist pas par corage de establir se il a rendu, mes solement
par corage de promestre. {5} Et l’en demande se l’en puet autre
chose rendre que cele qui est deue. Mes quant il est acordé que l’en
rendist chose por chose, ausi puet l’en rendre autre chose por ce
que l’en doit. Et se aucun doit .c. solz et il rent froment au
vaillant, ceste rente vaut. ¶ {6} Dete puet estre establie por tote
cause, et por chascun marchié certain ou non certain, et se aucun
doit argent por aucun achat ou de cause de doere ou de cause de ban
ou d’autre marchié. ¶ {7} Dete ou sa nature sofist. {8} Et cil qui
est obligiez de aucion non pas de droit de cité est tenu si
s’atablist à rendre, quar la dete est aparissant qui est deue. Et
por ce, si
Et se tu establis à rendre .x. soz ou non dou fiz tot eit en chatel .v., il sera en diz par ce que il si establi.
Ausi est de .ii. qui ont promis quant l’en a enprés promis à l’un et anprés randu à l’autre ; car cil à qui l’en [70rA] a promis doit estre en leu de celui à qui l’en a rendu.
Et dusque itant veudra la promesse se l’en doit ce que l’en promest s’il n’en i a nul qui dee ; ausi comme s’il promest avant que il demant l’eritage au detor ou s’il est pres de randre, Ponponius dit que la promesse vaut par ce que l’argent estoit deuz. {1} Se aucun devoit .c. deners et en promé .cc., il n’est tenuz que de .c.
Et se aucuns devoit .xx., il est tenuz.
Se nos prometons .ii., l’en porra demander tot à l’un. ¶ {1} Et aucun puet establir en certain leu et en certain tens, et il ne puet pas solement demander la où l’en li promist mes aillors par tot. {2} Li prevoz dit : « s’il est aparissant que cil qui promist n’et rendu, ne qu’i n’et fet gré à celui à qui il doit comme cil fust pret de prandre ». {3} Et s’il ne failli en creancier, li autres est tenuz ; mes l’en doit secorre au detor. ¶ {4} Et les paroles que li prevoz dit « que se reus ne fist ce que il promist », savoir se ces paroles apartienent au tens de la promesse, ou se l’en doit regarder le tens que li plez fut entamez, l’en en dote ; et je cuit que les paroles doevent estre raportees au tens de la promesse.
Ce qu’est deu soz condicion, ou porement, s’il
Li prevoz dit : je donroi juigement de ce que l’en dira que l’en
avra presté
Ne l’en ne doit pas doner aucion de prest en desvé, mes l’en fera la chose monstrer por le chalungier.
Et il m’est avis se li orfelins gaigne en la chose prestee, li enpereor dit que l’en donra aucion contre li de prest. {1} Se la chose prestee est rendue peor que ele ne fu prestee, ele n’est pas rendue, puis que ele est enpiree, se l’en ne rent l’enpirement. ¶ L’an dit propremant que la chose est randue quant ele n’est enpiree. ¶ {2} En ceste aucion jurra l’en ausi comme en autres causes ; et li tens la chose jugie tant comme la chose vaut sera tenuz, tot soit gardé li tens que li plez fust entamez en plez de droit estroit. ¶ {3} Li heirs à celui qui ot la chose prestee sera enplediez por tant comme il tient, s’il n’a poer de rendre tote la chose et il ne la rent mie ; lors le condempne li juiges a tot rendre. ¶ {4} Se l’en preste à serf ou à filz, l’en pledera solement dou chetel ; et porra aucun pledoier droitement o le fiz ou o le serf. ¶ Et se l’en preste à serve ou à fille, l’en ne plediera que lors chetel. {5} Et li peres ou li seignor ne sont pas condempné solement de barat à ces persones ; ainz dit Julien que li baraz au pere ou au seignor vient environ aucion de gage. ¶ {6} Ce que puet estre gasté par usage ne puet estre presté, se aucun ne le prent por renier ou por mostrer.
L’en preste deners aucunne foiz por l’amor de celui qui les reçoit.
S’il est convent que li prez soit renduz en certain leu ou en certain
tens, li juiges amesurera l’afere dou leu et dou tens. ¶ {1} Se
aucun plede de ceste aucion et il reçoit l’esme que l’en [70vA] li
offre, la chose est à celui. ¶ {2} Or doit l’en voir que vient en
aucion de prest, savoir se barat ou colpe et se tot le peril ;
et en marchiez solement le barat i vient, et aucunne foiz la cope.
Barat est ou chose baillie en gar, car cil n’i a nul preu qui l’a en
garde ; et par ce i vient tricherie solement s’il n’i a loer et
lors i vient la cope ; ou s’il est en marchié mis que s’il pert
la chose, que il eit le peril et la cope, cil qui a la chose en
garde. Mes la où li uns et li autres a preu, si comme en achat ou en
loange, comme en doere, comme en gage, comme en compoignie, et barat
et cope est baillié. ¶ Prest contient aucunne foiz le preu à celui
qui preste, et por ce est veroie la sentance Quincii qui cuida que
colpe et diligence i fust. ¶ {3} Et se la chose qui est preté est
esmee, cil doit avoir tot le peril qui reçut l’esme de la chose. ¶
{4} Et ce qui avient par vilece ou par maladie en ce que larrons
tolent ou aucunne autel chose avient, cil qui reçut le prest ne doit
pas avoir de ce riens sor soi se aucunne cope n’i avient. ¶ Et se
aucunne chose avient par trebucheiz ou par feu ou aucunne aventure,
il ne sera pas tenu s’il ne pensa plus de sauver les soes choses que
les prestees. ¶ {5} Et il doit garder diligement la chose prestee. ¶
{6} Li ancien doterens se l’en doit metre garde en home presté ; car
aucunne ‹fois› doit l’en metre garde en home, s’il est prestez liez
ou s’il est de tel aage que il ait besoing de garde. Et s’il est
issi que cil qui le prist le gart, l’en doit dire que il doit la
garde. {7} Et aucunne foiz le domage de la mort est sus cetui qui ot
le prest, car se je prestoi un cheval por mener à la vile et tu le
moines en bataille, tu seras tenuz dou prest ; ausi sera d’un
home. Et se je te prestoi le cheval que tu le menasses à la
bataille, le peril en est mien. Et se je te preste un serf texier ou
covreor et il chiet de sus la meson, le peril est mien, ce dit
Julien ; et je cuit que c’est voir se je le [70vB] te prestoi
que il montast sor la meson. Et s’il fust prez que il feist
besoingne à plainne terre sanz monter en haut et tu le mois en haut,
ou se l’ovre chei par ce que il ne l’avoit pas liee ou les perches
furent viez et porries par villece, je di que li perilz est à celui
qui enprunta la chose. Car Mela dit que se serf est presté à pereor
et il le tue en la perriere, li mestres en est tenuz, qui lia
mauvesement l’asteler. {8} Et cil moismes qui use de la chose
prestee autremant que il ne doit est tenuz non pas solemant de
aucion de prest mes de larrecin, si comme Julien dit. Ausit comme se
je te preste un livre et tu i fez escrire que ton detor te doit et
je l’efface
Nos poon prester autrui chose que nos porseon, tot sechein nos que ele est autrui.
Tu me prestas une chose, tu la me emblas ; enprés tu la me
demandas et je ne savoie pas que tu l’eusses sotresté, li juige me
condempne et je rendi la chose ; anprés j’ai apris que tu
l’avoies sotresté, quele aucion ai je contre toi ? Je di que je
n’avoie mie contre toi aucion de larrecin mes de prest contre toi. ¶
{1} Je prestoi en l’ost à compoignons vessiaus à user à commun
peril, et mi sers la sostret, et s’enfuit à noz guerriers, et anprés
revint sanz les vaisseaus. Il est voirs que j’é aucion de prest
contre les compoingnons chascun par sa partie ; et il puent
contre moi avoir aucion de larrecin en non de mon serf, car le
forfet suit
Se je te preste un cheval à aler jusqu’à un certain leu, se li chevaus enpire en la voie sanz ta cope, tu n’es pas tenuz dou prest ; me je seroi en cope, qu’i l’e presté à aler si longue voie que il ne pot sostenir.
Aucion de gage est fet non pas solement par le baillier qui par
nue
Se tu rendis à ton detor son [71vA] gage et tu deus avoir mointenant
l’argent, et il l’envoia
Se je fas despens necesseres en serf ou en teneure que j’é en gagie, je n’é pas solement retenue mes aucion de gage : pose que je done argent as fisiciens por le serf qui estoit malades et il est morz, ou j’é fere une meson ou refere et enprés ele art, ne il n’i a que je puisse retenir. ¶ {1} Se plusors sers sont en gagie, et li un soient mis à certain pris se le creancier les vant, issi que il donast caucion de lor delivrance et il a sa peccune, il pot retenir les autres sers dusque il ait tot son argent et de ce que il promist à delivrer cex qui estoient vendu l’en le doit garder de domage. ¶ {2} Se un des hers au detor eust rendu en deniers sa partie, tote la chose mise en gage porra estre vendue, ausi comme se le detor eust rendu tote sa partie. ¶ {3} Se je preste à .ii. anz .xxx. livres ou à .iii. anz et il est mis en convenant que se li denier ne sont rendu à chascun de ces termes que je puisse vendre les gages, dusque li jorz des poies seit passé, ge ne puis vandre ; car par cez paroles seroient montrees totes les poies, ne il n’est pas voir que li denier ne soient mie poié en certain tens dusque tuit li jor soient passé ; mes se totes les poies soent passees, se une partie n’est rendue, il puet vendre le gage. Et s’il est issi escrit et escordé : « se aucun ou aucunne pecune ne fust rendue à son jor », il la puet demander de mointenant. {4} La convenance doit estre fete de vadre le gage et que li marchiez soit devisez. Et se la persone [71vB] au creancier est comprise en marchié, li heirs à celui vendra se l’en ne fet rien encontre. ¶ {5} Quant li convenz est fez de gage, que il ne soit vendu se li sort n’est paez – c’est à dire se le chatel n’est rendu – li gages sera venduz et ausi por cez autres choses.
Et autresi entendon nos dou fiz qui est en bau.
Se meson est en gagie et ausi sera l’ere, car c’est une partie de la meson ; et la terre est de l’edefice.
N’est pas merveille se l’en commande bailler gage se li prevoz commande mestre aucun en possession par aucunne cause, car en testamant moismes puet l’en commander bailler gage ; et issi se dit li enpereres. ¶ {1} L’en doit savoir que la où gage est baillié par le commandemant au prevost, la commandise n’en vaut rien se l’en n’en est sesi.
Pere Bumat engaga sa meson à Raol Panée por neuf livres. Perre mori ; sez annez fiz vendi cele meson à Beni ; li créancier demanda son gage. Li frère de Bani ditrent que li gages n'ere de riens de Roz, par ciez que la meson ere de premer mariage, et li dereniés enfant devet aquiter les detes, car il ot conquez et mobles et achetées. Et fu droiz donez sor ce, segont la costume d'Orliens, que li gages n'ere de riens obligiez.
Cil qui crut au notoner por ce que il ne rendi au jor, retint la nef en l’eve par s’autorité ; enprés l’eve crut et enporta la nef : s’il retint la nef contre la volenté celui qui ele estoit, le peril de la nef gist sus le creancier ; mes se li detor veust que cil retenist la nef, il doit emender la cope li creanciers non pas le vimoire.
Se serf qui est en gagie fet larrecin au creancer, le detor le puet lessier por le forfet ; et s’il savoit que il fust lierres et il le me baille en gages, et s’il est prez de lessier le moi por le forfet, j’é aucion contre lui de gage que il m’en ement mon domage. Et ausint doit l’en dire quant serf presté ou baillé en garde fet larrecin.
[72rA] Se j’é aloié au seignor gaige qui m’a esté baillié, je retien li la possession por le loage ; car avant que li detor l’aloast, la possession ne fust pas soe, comme je eusse coraige de retenir la possession et comme cil qui a la chose loee n’et mie corage de retenir la possession.
Il convient que autorité de tutor soit donee à l’orfelin qui prent chose en gages.
Li creancier soit forciez par droit de rendre ce que il a eu de gage outre le gage ; ne il ne sera pas oï s’il veust juster l’acheteor à autrui, car li creancier fet son afere en la vençon quant ele est bien fete.