Convenance generau fut establie en baller gage des biens que l’en a ou que l’en avra. Et se convenent est fet en senblance d’autrui chose, s’el ne fut deue à celi qui bailla le gage, l’en donra aucion au detor plus tot que au creancier qui ne sot pas que la chose fut à autrui ; mes cil qui porsiet avra meillor retenue.

Les choses que aucun a ou n’a pas ne seront contenues en generau obligacion ; il est senblent que ce soit voir que aucun [86vB] ne se oblige pas especiaument, ausi comme se vessiaus ou robe est lessie au detor, et sers que cil avoit en son usage que l’en croet que il no voloit pas engager por les besoignes que il li fesoient qui mout li valoent, ou por ce que il les amoit moult por son usage.

Et l’en set bien que l’en ne pot engager ne ses enfanz ne ses norriz en generau obligacion, et s’il i a aucuns de itex menestrés.

Il convient garder et entendre que c’est en gagie que cil hot lors. ¶ {1} Ce que l’en pot acheter et vendre, ce meime pot estre en gagie.

Se betes sont engagies, celes qui nessent enprés en sont. Et se le premers chiés muerent et tot le noncel est renovelé, il sera engagié.

L’en demande se le jor de la pension n’est venuz se l’en puet entretant demander les gages ? Je cuit que l’en doit otroier lo, car il m’apartient ; et issi dit Celsus. {1} Et il convient que le gage durt de la où obligacion vient.

Ce que n’est pas pot estre engagié ; si comme fruiz pendenz, li feon qui sont à nestre des serves et des betes, et ce quil nest sont obligié. Et issi le doit l’en tenir se li sires do champ s’acorde à ce qui vient de usage et de fruit, ou cil qui a l’usage et le fruit, si comme Julianus dit.

Se un champ est engagié et il croist por acroissement de eve, il sera tot obligié.

Cil qui prent plusors choses en gage n’est pas tenuz de une baillier se l’en ne rent tote la dete.

Le creancier pot loer totes les teneures qui sont obligies por cause de gage. {1} Il a bien obligacion de gage entre cez qui ne sont pas do païs par la reson do marchié.

La où l’en deffent à acheter, l’en ne pot gage prendre.

Cil qui te promist à rendre ou à Ticio, se il rent Ticio, tu ne le poz demander, s’il reçoit le gage avant la poie.

Se la meson que tu pois vendre par convenant est arse et enprés ton detor la refet, tu as autant en la nove comme en la viez.

Le senat qui fust fet ou tens Marci li enpereor dit que gage qui est dont ou creancier qui preste deners por refere la meson apartendra au reanbeor qui les deners balla par le mandemant au seignor.

Ponponius dit que les choses que li oste avra aportees en la meson seront engagies non pas solement por les loages mes por ce s’il enpire la meson par sa colpe, et avra l’en contre lui aucion de loage.

Se un grenier est aloez, ou un estage, ou une ere, Neracius dit que ce que est aporté en la meson est obligié sanz dire ; et c’est voir.

Les fruiz qui nessent en teneures sanz dire sont en gagie au seignor dou chemp tot n’en face l’en mencion. ¶ {1} L’en doit veoir que totes celes choses qui sont aportees en la meson mes celes choses qui sont leenz à toz jorz sont en gage ; qui est plus grant chose.

Quant le detor a deners pretez par amor, le creancier pot retenir des fruiz de la chose engagie segont la dete. L’en puet engagier ce que l’en a en gagie.

Li orfelin ne pot rien engagier sanz l’autorité au tutor. {1} Se cil qui en bau oblige chose qui est soe, ou li sers, l’en doit dire que il n’est pas tenuz, tot eent il poer de lor choses ; ne il ne poent rien doner, car il n’ont pas poer tel. Et c’est une demande combien dire le poer que il ont et que il poent fere et que non. ¶ {2} Quant aucun ne pot acheter aucunne chose por ce que ce n’est pas marcheandie, l’en ne pot cele chose engagier, ausi comme le enpereor manda à Claudio Saornin. Et que sera se aucun prent en gage un champ qui est en contenz ? L’en demande se l’en a barre contre lui ? Et Octaveus cuide que ce a leu en gages, c’est à dire barre ; et Scevola dit que barre a leu en moble.

Quant Ticius vot prendre deners à enprunt de moi, il dona plege et envoia de ses choses por gages ; ¶ et enprés, quant il ot vendu une de cez choses, il prist la peccune ; l’en demande se les choses vendues avant estoent au creancier ? Je di que quant il fut en poer au detor que il ne prist pas la peccune enprés ce que la caucion fut donee, le gage est liez en ce tens que la peccune fut baille ; et por ce doit l’en voer quex choses le detor avoit au tens que li denier furent baillié.

Le creancier qui prist en gage le fiz qui est en bau le doit comperer.

Aucunne foiz avient que le derenier creancier est mellor que le premer ; ausi comme se l’en a despendu en ceste chose garder que le segont creancier despendi ; ausi comme se la nef qui fut en gage et je face creance à lui armer ou à raparellier.

Se commun prent especiaument gage, l’en doit dire que ele est avant que le tresor l’enpereor se le detor i est enprés obligié ; car cil qui ne sont pas do commun sont avant mis aucunne foiz.

Se cil qui pot juigier juiga par droit [87vA] que le gage fut pris, il est plus fort por les privileges do tens ; li heir en cui persone le gage fut baillé, i est tenuz Passage qui pose problème, cf. lat. Si et iure iudicatum et pignus in causa iudicati ex auctoritate eius qui iubere potuit captum est, privilegiis temporis fore potiorem heredem eius, in cuius persona pignus constitutum est.

Se aucun engage à .ii. seignors en divers tens, le premer en a le meillor, ja soit ce que il teigne se nos recevons gages de divers seignors.

Lucius Tucius presta argent sor gages à usures et Menius balla argent à celi detor sor ces gages ; je demande se Ticius eust le meillor, non pas solement dou chetel mes des usures qui vindrent enprés aventavent] alient dans le ms., faute de lecture du scribe, cf. lat. antequam que Menius feist la creance ? Je di que Lucius Ticius en a le meillor de quanque l’en deut.

L’en demandoit, se enprés le premer marchié que tu feis à toitoi] troi dans le ms., cf. lat. si post primum contractum tuum, avant que tu ballasses à creance autre peccune, Seius fit creance au detor dusqu’à .l. solz, et le detor engaga le gage de cele chose qui restoit baillie en gage, et enpré tu creus par aventure .xl. ‹…› ou Seius .l., posé que Seius t’offre la pecune qui est creue au commoincement ? Je di que bien est que Seius soit le meillor en ce que il a plus en gage, et que le premer creancer soit avant en la peccune qui est oferte au commencement que il crut au premer detor.

Le creancier qui prist teneures en gages, et enprés un autre creancier, qui mist le convent des gages en biens au detor, il fit autel convent de toz les biens por l’autre marchié ; le segont creancier fut lessiez sanz droit et vendi ces autres biens et engaja. Mes par ce n’a pas le creancer contre lui aucion qui demande ses gages ; mes ele n’est pas de larrecin, car il mena sa cause nicement, comme li autre creancier n’et pas perdu sa chose par larrecin que il n’avoit pas. Et il demandera por neant mostree, car cil ne tint pas ne n’i fit barat por quoi il n’en ‹e›it ; et por ce, le segont creancier pot en pledier cez qui tienent.

Quant l’en met jor à rendre argent, il est veü que il est convent que [87vB] cil n’ait poer de vendre le gage.

L’en demanda se le creancier ne pot avoir de l’acheteor le pris do gage se le detor est quité ? Je cuit se le creancier n’i ot aucunne colpe que le detor est obligé ; car vençon fete à besoing ne delivreroit pas le detor se le detor ne rent l’argent. ¶ {1} Panponius dit que l’en selt metre en convent en choses engagier que, se le gage estoit vendu mois, que le detor rendit la faute ; c’est à dire neent, car l’en l’antant issi sanz dire.

Li enpereor dit, quant Papinian fesoit la demande, que le creancer poet acheter le gage do detor, por ce que il moint en la seignorie au detor. ¶ {1} Se autrui chose est en gagie et le creancier le vent, veon se le pris que le creancer a pris delivre le detor de la peccune qui fut creue. Et à ce respont l’en voir, s’il vent par tel convent que il ne fust obligié par non de delivrance ; il est senblant que de tel marchié comme de tel obligacion le pris qui est pris par acheson de lui doit plus valoir au detor que au creancier. Mes le detor est delivrez quant au creancier ; et quant au seignor de la chose, se le gage n’est delivré, ou le acheteor enprés la delivrance, le detor est de bone aucion tenu que il ne gaignegaigne] gaignent dans le ms., cf. lat. ne ex aliena iactura sibi lucrum adquirat en autrui domage. ¶ Car se le creancier demande plus des fruiz au detor ou au plege et il li toli toz, il doit avoir toz les fruiz por tant come il i a de dete. Et se le creancier tost a son detor la chose qui n’estoit pas soe par le defent au juige et le creancier dit que il l’avoit en gage et il demandast s’il la devoit rendre au detor quant il avroit son argent, Scevola dit que il li devoit rendre. Ausi comme s’il ne le vendi pas, issi que l’en est certain que le pris doit remanoir à lui, ainz est il liez à rendre lo. Je juige que l’en ne puet autretant demander rien au detor, ainz avra sa delivrance en dotence ; et se le creancier est en plet par aucion d’achat, il pot demander la dete au detor, car il est aparissant que il n’est pas delivré.

Le creancier [88rA] qui vult le gage à son droit, doit son droit lessier ; et s’il tient son gage, il doit bailler la possession.

Cil qui fut arbitre de departir l’eritage entre les heirs quant il ot les choses parties il assena à chescun les nons do detors par soi ; l’en demanda se chescun doit poier par sa partie ? Je di que il le pot bien fere.

Labeo dit que le ban des meson ne est pas solement de moble que de teneures. {1} Cil qui vendent les sers devoent acertener les acheteors quel maheign il a ou quel vice, ou s’il est fuitis, ou s’il est fos, ou s’il est liez d’aucun forfet. ¶ Et totes ces choses devent il dire quant il vendent les sers ; et se le serf est vendu contre ce, et se l’en ne dit ce quant il fu vendu à l’acheteor et à toz cez à qui ce apartient, nos donron sentence contre aus et sera le serf rendu arriere. ¶ Et se aucunne chose est enpiree enprés la vençon et enprés le ban de la chose au domage à l’acheteor par le fet à la mesnie ou au procurator, ou se aucunne chose est nee ou aquise ou s’il i a aucunne chose apendant à la vençon, ou se le acheteor a aucun preu par si que il rende tot ce et s’il fit aucuns aventages por ravoir les, ¶ et se aucun des sers fet chose dont il doie perdre la teste ou fet aucunne chose par soi tuer ou s’il se met à estre champion, li vendeor devent tot ce metre et dire en lor vençon ; et s’il ne le font, nos donrons juigement contre aus. Et encor plus, se aucuns fet cez maheins et vent par barat, nos donron juigement contre. ¶ {2} Comme ce ban soit contrové por corre contre les conchiemanz à vendeors et que l’en secore à cez qui achetent, quiconques sera deceu de vendeor. Se nos savon qui est le vendeor et s’il ne le siet, l’en rendra quant que cil qui ont la garde des mesons en diront. Ne ce n’est mie mal, car li acheteor n’a que fere que le vendeor l’en conchit ou por ce que il no sot ou por son conchiement. ¶ {3} L’en doit savoir que ce n’apartient pas à [88rB] la vençon qui est fete à l’enpereor. {4} Et se aucunne commune fet aucunne vençon, cest ban avra leu. {5} Et ausi en vençons que orfelin font. {6} Se l’en entent maledie estre maheing que l’en pot voer por dehors en gent, ce ban n’a pas leu ; l’en doit tant solement voier que le acheteor ne soit deceu. {7} L’en doit savoir que Sabinus dit que maladie est issi apelee quant il a en cor aucunne chose qui est contre nature, qui enpire le cors, donc nos avon aucunne foiz santance por l’aide de nature. Et maladie selt aucunne foiz sorprendre tot le cors, aucunne foiz une partie. Et la maledie prent tot le cors, si comme fievre ; ¶ ‹…› et quant l’en ne voitne voit] levent dans le ms.; passage corrompu, d’après le latin, on attendrait l’idée d’une maladie qui n’affecte qu’une partie du corps, comme la perte de la vue, cf. lat. partis veluti caecitas, tot soit il issi nez. Et il a moult grant difference entre maheing et maledie, ausi comme se aucun est baube. Et je cuit que il i eit plus meheing que maledie ; et issi le distrent li mestre des mesons por oster la dotance, mes il n’en i a point. {8} Car s’il i a tel maheing ou maledie qui destorba home à fere son usage, il sera rendu ariere au vendeor. Se nos apelon maledie ou maheingne por un po de chose, ausi comme une petite fievre, ou por une vielle quartene qui se pot tapirtapir] rapir dans le ms., TL tapir « cacher, dissimuler », cf. lat. aut vetus quartana quae tamen iam sperni potest, ou une petite pleie, ci n’a point de forfet por quoi il doie estre rendu, tot ne soit il dit por droit, et si pot l’en bien lessier tel vençon. ¶ Or meton avant aucun essemple de cez qui sont maheingnez ou malades. {9} L’en demanda à Vivien, se le serf ala aucunne foiz entre cez qui estoent hors do seu et fist senblant que il le fust s’il estoit sein. Vivien dit que oïl, ne nos ne devon pas – ce dit il – entendre que aucun ne soent pas sein por aucun maheing ; si que non il avenit que nos direon que plusors ne sereent pas seins por ceste reson, ausi come celi qui est legier, glorios, irex et depisent et icex vices assez que il sont en corage d’ome. Et l’en solt plus prometre de la santé do cors que des vices dou corage quant l’en fesoit la vençon. Et il dit : vice de cors poest aucunne foiz aucun corrumpre, ausi comme frenesie qui avient de fievres ; [88vA] et que sera se le vice do corage est tel que le vendeor ne die que il est tel, et il le sot ne no dist ? Il est tenuz de l’achat. ¶ {10} Et encor dit Vivien : se aucun ala au temple et se contint ausi comme desvé et done paroles ausi comme devineor, s’il ne le fet, il n’i a point de maheign ; en tel non n’a point de aucion, ausi comme celui qui ot aucunne foiz acune fievre. Et s’il demora en celi vice et fut ausi comme desvé, s’il fit ce par soi deduire, ce n’est que vice de corage non de cors, et por ce ne le doit l’en rendre, car ce ban parle des vices do cors ; mes il a auction d’achat. {11} Et ausi est en cez qui sont hors de mesure poerous, covoitos et avers ou irex. ¶

Ou melencoliex.

Ou engres, ou beçuz, ou corbes, ou roignos, ou vieuz, ou soz.

Des vices dont il dist que l’en ne rent pas l’achat, il done aucion de achat. {1} Et se le vice do cors n’est dusque l’ame, s’il parle foles paroles por l’anguoisse de la fievre, ou s’en cort par la vile comme forsené, et se ce avient dou vice dou cors, il convient que il soit rendu. {2} Et forsené aucunne foiz n’e pas contenu en cest ban, ne glotons, ne mesesiez, ne menteor, ne tenceor. ¶ {3} Et Ponponius dit : ja soit ce que le vendeor ne doive pas rendre serf qui est bien sage, s’il le vent si fou ou si mauvles que il ne valle rien à nului, il senble que il est maheigné. Et issi le tenon que l’en n’apele pas ce apel de maledie ne de maheing, ne n’apartient que au cors. ¶ Le vendeor amendera le mehaing do corage s’il le promist ; si non, non. Et por ce parle il nomeement de fou et de fuitif ; ¶ c’est vice de corage non pas de chetel dont aucun distrent que jumenz poereses et repucenz ne devoient pas estre juigies por malades. ¶ Et que ce vice estoit de corage non pas de cors. ¶ {4} En la sume, ce que vient de vice de corage n’est pas dotable se l’en ne dit que ce ne fut pas et il est. Mes l’en a aucion d’achat s’il le solt et ne le dit ; et s’el e vice dou cors solement, ou il est meslé ensenble, ce ban avra leu. ¶ {5} Et ce doit l’en noter, que l’en dit especiaument de la maledie, non pas solement de maledie nuisent. Et Ponponius dit que ce n’est pas mervelle, l’en n’entant [88vB] pas de cele chose à qui la maladie vent encontre. {6} Et encor dit que tote maledie ne doit pas rendue, si comme se aucuns est checieux un pou, ou il a pou de danz, ou il a mal en l’orele, ou un pou de malains, ou un petit de fevres, ce n’apartient pas à ce ban.

Et autretant comme il a de difference entre meains, autretant en a en maledies dont aucun pert son usage.

Ponponius dit et bien que cest ban n’apartient pas solement à maladies pardurables, mes à celes qui ne durent pas que un po. ¶ {1} Lentillos n’est pas maladis s’il fet bien ses aferes ; et il m’est avis que Trebacius dit voir. ¶ {2} Escoillé n’est pas maledis ne maheigné, ainz m’est avis que il est sein, ausi comme cil qui a un coillon qui pot engendrer.

Et se le escollé est tex que la partie devers les coille ne li vaut rien, il n’est pas sein.

Se l’en a aucun copé la lengue, l’en demande s’il est sain. Et Offlilius dit que il n’est pas sain.

Sabinus dit que muz n’est mie sain. Et il n’est pas sein s’il n’a voiz ; mes cil qui parle à pene n’est mie malades ; mes cil qui ne dit pas pleniement ce que il dit n’est mie sein.

Ausi dit Offilius : se l’en copese l’en cope] se l’en cope se l’en cope dans le ms. à un home le doi ou aucun nembre, qui est gite, tot en garisse il et s’il ne pot aider por ce, il n’est mie sein. {1} CatonCaton] chascun dans le ms., cf. lat. Catonem quoque scribere lego meisme dit que cil qui a le doi de la main ou do poin copé n’est mie sain ; et c’est voir segont ce que est dit desus. {2} Et se aucun a plusors doez ou en mains ou en pez, se ce ne le destorbe de rien ne doit pas estre rendu. Et por ce ne doit l’en pas garder quant doiz il i a, ainz doit l’en veoir s’il se pot aidier de plus doiz ou de mains. ¶ {3} Ausi demande l’en de l’idropique s’il estoit sain. Et ge cuit que non. {4} Et ausi est en home qui ne voit ne au soir ne au matin. ¶ Aucun cuident que ce soit l'ois qui ne voit gote à la chendele quant l’an l’a aportee devant lui. {5} L’en demande se baube, et cil qui blesoie et qui parle à rebut, et cil qui est retis et cil qui parole dou nef, ou cil qui parle tost que l’en ne pot entendre, se itel sont sein. Et je [89rA] cuit que oïl. ¶

Cil à cui denz faillent, au moins une, est sainssains] saine dans le ms., distraction du scribe, « celui à qui manquent les dents (tout au moins une seule) est sains », cf. lat. Cui dens abest, non est morbosus ; car une grant partie des genz n’ont pas totes lor denz, ne por ce ne sont il pas malade. Maesmement, comme nos neson senz denz, por ce ne remaint pas que nos ne seon sain dusque nos eon denz ; si que non, nul veillaz ne seroit ‹sein›.

Cil qui a clou n’est pas sain ; et cil qui a boce de char ou nés, {1} ou l’une goe plus haute que l’autre, s’il fet bien son afere, Pedius dit que il est sain. ¶ Et dit que il est sain tot eist il l’unne espaule ou l’une joe ‹…› que l’autre, ou l’oil plus haut ; mes se le costé ou la cuisse est plus corte que l’autre, c’est destorber ; ¶ et sera itel rendu ariere. ¶ {2} Se aucun a goitron por nature, ou eauz trop gros, est tenu por sain. ¶ {3} L’en doit savoir que cil qui fet son afere de la senestre main est sain, fors que itant s’il i a la destre plus foible que l’autre, et lors il est maheignié. ¶ {4} L’en demande se cil est sain a qui la boche put. Trebacius dit que oïl, ausi comme se il put comme boc et ce li avient que il ne lieve pas sa boche ; mes se ce li avient dou vice dou cors, ausi comme s’il a mauvés le gesier, ou le pomon, ou aucun autel, il n’est pas sein.

La feme qui .ii. foiz s’espurge le mois n’est pas seine. ¶ Et cele que ne s’espurge n’est pas saine s’il ne li avient por aage.

Ce qu’est ausi sané, comme s’il ne fut onque malade, s’il retorne à celui point, ausi est comme s’il fut toz jorz sain.

Offilius mostre qui est fuitis ; fuitis est qui s’en voit hors de la meson son seignor por soi celer. {1} Et Celius dit que cil est fuitis qui se part de son seignor por tel volenté que il ne bee mie à torner, tot mue il son consoill et retorne ; car penitence n’a pas leu en tel pechié. ¶ {2} Cassius dit que cil est fuitis qui lesse son seignor à certain proposement. ¶ {3} Et Vivien dit que cil est fuitis par la volenté que il a, non pas de fuite ; car qui fuit por ennemis ou por larrons ou por fou ou por trebuchiez, ja soit ce que il soit voir que il [89rB] fuie, por ce n’est il pas voir que il fuie. ¶ Ne cil n’est pas fuitis qui s’enfuit de chiés son mestre, à qui il estoit baillié à aprendre, s’il foïst por ce que il le batoist trop malement. Et ausi est s’il s’enfoist des chiéschiés] choses dans le ms. celui à qui il avoit esté presté s’il s’enfuit por autel cause, s’il le menoit trop cruement, s’il s’en vint à son seignor. Et s’il ne vint au seignor, il est fuitis sanz dote. {4} L’en demanda à Proculus de celi qui s’atapi en la meson por s’enfoïr, et il dit que il est fuitis. Et s’il s’atapi por eschiver l’ire son seignor, il n’est pas fuitis. Ausi comme cil quant il aperçut que ses sires le voloit batre corut à l’ami à celui por le prier. Ne il n’est pas por ce fuitis s’il se avança ; mes cil est fuitis qui s’en monta en un aut leu por soi trebuchier et soi tuer, ausi comme aucun dient ; cil qui n’est pas fuitis qui s’en ala une nuit sanz la volenté au seignor, mes ce n’est pas voir ; mes nus n’est fuitis se do corage ne li vient. {5} Et ausi dit Julien : se le enfant se parti de son mestre et vint à sa mere, il n’est pas fuitis ; et s’il le fist por soi celer que il ne venist à son mestre, il est fuitis ; et s’il le fist que sa mere priast por lui, il n’est pas fuitis. ¶ {6} Celsus dit : se tu achetes un serf qui se lance en Leire, s’il fet ce solement por cause de morir par consoill que il prist de departir de son seignor, il n’est pas fuitis ; et s’il prist avant consoil de foïr et enprés mua son corage et se gita en l’eve, il est fuitis ; et ausi est il de celi qui se geta dou pont en l’eve ; et c’est tot voir. {7} E ausi dit il : se ton serf qui s’enfuet enmena o soi Sevin mon vicaire, se le vicaire le fist contre sa volenté ou par sa folie, ne il ne pot avoir acheson de retorner à toi, il n’est pas fuitis ; s’il entendoit quant il fuet, ou eu conut que il devoit fere, et quant il ‹puet il ne› volt à toi retorner, autrement vet. Autrement doit l’en dire de celui que larron enmena. ¶ {8} Ausi dit Celsus : se le serf qui estoit en la teneure s’en issi por s’enfoïr et aucun le prist avant que il issit [89vA] de la teneure, il ‹est› fuitis por le corage que il en ot. ¶ {9} Aussi dit il : ne celi qui ala .i. pas ou .ii. por foïr et conmença à corre que il ne poet eschaper son seignor qui le siguet, il n’est pas fuitis. ¶ {10} Il dist que foïr est une maniere de franchise, c’est à dire quant cil est delivré dou poer au seignor. ¶ {11} Serf qui est en gage a son seignor detor ; et se il le tint comme suen et le creancier l’otrea, il pot estre veü que il est fuitis. {12} Et se aucun s’enfuit à un temple por soi vendre, l’en demande s’il est fuitis. Je cuit que il n’est mie fuitis, car il fet ce que chescun puet fere. Ne cil qui s’enfuit à l’image l’enpereror n’est pas fuitis, car il ne fit pas ce por corage de foïr. Et s’il s’enfuit avant et enprés s’enfuit en moster, por ce ne remoint pas que il ne soit fuitis. {13} Et dit Celsus que cil est fuitis qui se met en tel leu don li sires ne le pot avoir. ¶ {14} Labeo dist que erratiqueerratique] en ratique dans le ms., cf. lat. Erronem ita definit Labeo Pusillum fugitivum esse est petit fuitif. Encontre, il dit quil est grant fuitif ; mes l’en pot dire que itel n’est pas fuitif, mes itel va et ça et la sanz preu, et gaste le tenstens] son dans le ms., cf. lat. et temporibus in res nugatorias consumptis en trufles, et enprés retorne à son seignor. ¶ {15} Celsus dit que un qui estoit ches le patron, et en la meson qui ne fermet que à une clef, se rapi dedanz la meson au patron et i fut tote la nuit ; il n’est pas fuitis s’il avoit corage de retorner au seignor et se cele meson n’ot tel garde qu’i s’i vosist sauver ; et le serf fut lëauz ou il avoit assez de reduiz, n’est pas fuitis. ¶ {16} Et encor dit Celius que li sires qui envoia son serf en la province, et enprés quant il oï dire que cil estoit mort et que il l’avoit franchi en son testamant, et il fut remés en celui office et se menoit por franc, il n’est pas fuitis quant il fit ce sanz consoil de foïr. ¶ {17} Ce que li seignor qui firent ce ban dient « que cil ne soit pas pris d’aucun forfet », l’en·entent issi que l’en doit dire que n’eist fet aucun forfet, mes que il est quités dou forfet, ne que il n’en est de rien tenuz ; et donc, s’il fist aucun forfet ne il n’i demore, il n’est pas encore delivré. ¶ {18} Nos devons entendre forfez privez toz cez qui vienent de forfez, non pas de communs crimes dont l’en [89vB] a aucions par juigemenz de forfez, et enprés par le leu de boidies capitaus ; et de privez forfez nest domage de deniers se aucuns ne velt amender le forfet mes velt sofrit l’esme do plet. ¶ {19} Se aucun serf est cex qu’il ne pot estre franchi et li sires l’oblige à une poine, ou est condempnez à estre soz aucun poer ou envoié en essil, ‹…› . ¶ {20} Se aucun dit aucunne chose estre o serf qu’i n’i est pas ou qu’i est, ausi comme s’il dist que il n’est pas lerre et il l’est, et s’il dit que il est bon menesterel et il ne l’est pas, et il ne rent pas ce que il tesmoigne, il est aparessant que il fet contre son dit ou contre sa promesse.

Et se c’est dist avant le tens de la vençon, et enprés fut fete la promesse, Celius Sabinus dit de la premiere cause demander pot l’en le manciple puis que il est vendu.

Rendre est à dire que le vendeor est arriere ce que le acheteor ot de lui ; et redebicion vaut autant comme rente. ¶ {1} Quant l’acheteor rent le manciple au vendeor, Ponponius dist que il doit garder que il n’i face barat. ¶ Et por ce convient il que il en dont caucion que le acheteor n’achate le serf ou que le serf par son commandemant ne face larrecin ne domage. ¶ {2} Et encor dit Ponponius que il convient .ii. caucions mestre, l’une de preterit l’autre de futur ; ausi se le acheteor ou son procurator oit juigement en non de celui serf qui est rendu, ou se l’en pleda o lui, ou s’il pleda en non de li. ¶ Et il dist que l’en doit doner caucion se le acheteor fut condempné sanz barat ou s’il dona ; et il doit rendre de cez choses s’il en a rien receu, ou s’il fist barat par quoi il ne receust rien ; {3} et il dist que, en cez jorz que il fut renduz convient il avoir caucion en non do tens qui estoit à venir à celui qui le vendit, ‹s’il› le selt, l’en issi fere. ¶ Se li hom s’enfuit sanz la colpe l’acheteor, por ce ne remaint pas que li vendeor ne soit condempné, et il doit doner caucion que le acheteor demant son home ; et s’il l’a, que il le rende à l’ome qui le vendi.

Quant rente est fete, se le acheteor a enpirié la chose vendue, il l’amendera au vendeor ; ausi comme [90rA] se c’est feme et il li eist fet force, ou s’il s’enfoi por la cruauté à l’acheteor. Et por ce dit Ponponius que se il enpire par queque maniere, ce sera esmé por l’arbitre au juige, et sera rendu au vendeor. Et se li hom est rendu sanz juige et le acheteor no velt rendre ce que nos avon dit, il sofise au vendeor avoir aucion de vente. ¶ {1} Cil qui firent ce ban commandent que l’en rende ce que apendoit à la vençon ; et s’il dona aucunes aucions que chescun n’eist plus que ce, quant le marchié sera despecié, plus que il eust se la vençon ne fut pas fete. ¶ {2} Et s’il est mis hors qui fist barat, donc prendre teste ; et isi le diseent et feseent li encien que metoient boidie de chief por poine. Nos dison fere tel chose quant l’en a fet tel chose por barat et por lecherie ; et se aucun fet ce por error ou por aventure, ce ban n’a point de leu. Donc Ponponius dit que cil qui n’a .xiiii. anz ne cil qui est forsené ne pot fere tel boidie. {3} Et cil en est hors qui fet aucunne chose por soi tuer. Et cil est mauvés serf qui fet aucunne chose par quoi il prent mort, si comme il fist un laz por soi pandre ou s’il fist aucun venin ou s’il se lessa cheer de haut ou s’il fist aucunne chose por quoi il cuida que il morist ; et moult ce feist volentiers à autre que ce fist à soi. ¶ {4} Se cil est qui vendi son fiz qui n’est aage, il ont aucion contre le pere ou contre le seignor de ce ban ; tot soit il veü que il eent aucions de poine, qui vienent ausi comme do marchié, l’en doit dire que il vienent en non de cez qui sont en autrui poer. Et par sa fille qui est en bau ou en autrui poer, l’en doit dire que ceste aucion a leu. ¶ {5} Cez aucions que vienent de ce ban avienent contre toz. ¶ {6} Et se noz effanz qui nos servent en bone foi ou homes ou autrui serf vendirent, l’en pot dire que il sont tenuz de ce ban. ¶ {7} Julians dist : juigemenz de ceste aucion est que le vendeor et l’acheteor sont tenu de rendre tot quant que il orent de la vençon. {8} Par ce, se le serf fet larrecin au marchent ou à autre, et il en rent por ce aucunne chose, l’acheteor n’est pas tenuz de rendre le au vendeor dusque il eist amendé le domage. Et que sera – ce dit Julien – se le vendeor ne velt prendre l’ome ? Il ne en sera pas forcié de rendre rien fors que le pris que il ot de la vençon ; et le acheteor perdra ce par sa colpe qui volt miauz sostenir l’es[90rB]mé do plet que doner l’ome por le forfet. Et m’est avis que la sentence Julien est moult bone. ¶ {9} Quant manciple est rendu, il convient que le acheteor, s’il en a rien eu ou s’il n’en a eu, que il le rende ; non pas solement s’il a pris les fruiz ou les loiers do serf ou de celui qui l’aloa, ou se le vendeor les li rendi por ce que il li rendi l’ome tardivement ; et s’il ot les fruiz de queque autre que vos vodroiz, il convient que le acheteor les rende. Et rendra se il a eu aucunne chose des fruiz et se lés ou heritage avient au serf ; ne il ne monte rien se le vendeor le pot avoir ou non s’il ne vendi le serf, posonposon] por son dans le ms., cf. lat. ponamus enim talem esse, qui capere aliquid ex testamento non que il fut tel que il ne pot rien avoir do testamant, ceste chose ne nuira rien. Et Pedius cuide que cele chose ne doit pas estre regardee, por qui amor le sires commanda que le serf fut heir ou que il li fist lés ; car se la vençon remainsist, ce ne profite rien à l’acheteor. Et ausi est par contraire s’il est establi por l’amor à vendeor, s’il ne le voloit rendre.

Et l’en doit dire generaument que quant que li serf a conquis n’est pas veü droit que il le rende.

Li seignor qui firent ce ban volent que li acheteor rendent ce en quoi li serf est enpirié, einsi s’il est enpirie enprés le ban et enprés la vençon ; et se ce avint avant, ne monte rien ; {1} ou s’il l’enpira ou sa mesnie ou son procurator, ceste aucion avra leu. ¶ {2} Par ce non « mesnie » sont entendu tuit cil qui sont en servage et frans homes qui servent en bone foi o autrui serf et cil meismes qui sont au poer à celui. ¶ {3} Il a fete mencion de procureor en ceste aucion. Mes Neracius dit que l’en doitque l’en doit] que l’en doit que l’en doit dans le ms. entendre ci procureor non pas chescun à qui l’en a baillié toz les aferes ou ce por quoi le mandemant est enpirié. {4} Et il dit que il fut droit que l’en mete ce sor le acheteor ; et bien si gart do fet au procurator ou à sa mesnie que le serf ne eust pas soffert s’il ne li fut vendu et en ce que il devoit soffrir s’il ne fut vendu ; en ce doit avoir le acheteor l’amende do forfet au serf ; et en ce que le procurator forfit, li doit il doner ses aucions. {5} Et que sera se le serf est enpirié non pas por le barat à l’acheteor mes par sa cope ? {6} Ce doit estre entendu que ce vient de [90vA] corage non pas de cors ; ausi comme se il fut corrompu por la mauvese compoignie as autres, ou que il i fut si comme joeor à tables, jureor, musart, correor ça et la. {7} L’en doit garder que acheteor ne pot son serf por cez causes doner por le forfet, ne il n’amende pas le fet as sers ne au procurator. ¶ {8} Et l’en doit savoir que totes les choses qui sont contenues en ce ban il est tenuz do rendre se c’est fet avant que le plet soit entammé ; et por ce, convient il que il fussent nomees, que se il avint aucunne chose avant que le plez soit entammez que il fut rendu. Et enprés que le plet est entammé, tote la cause est à ce que l’ome soit rendu, et les fruiz et tot ce dont il est enpirié. Et tot ce apartient à l’ofice au juige, que manois que il est fet juige l’ofice de totes les choses li apartient de quant que l’en fet au juigement. ¶ Les choses qui sont avant plet ne li apartienent pas moult se l’en ne li enjoint nomeement. ¶ {9} Et encor est il issi en ce ban mis se : la peccune qui est rendue por celui home ou en son non ne sera rendue, ou aucun qui est obligié en celi non est delivré. ¶ {10} Cil qui firent ce ban garderent bien l’ordre que l’achateor rende au vendeor tot ce qui est nomé desus et enprés avra son argent.

Et se le acheteor prist sor soi le plet ou non dou serf rendre, ou s’il oi sentence en non de lui, il convendra doner caucion de ça et de la ; que s’il est condempné sanz barat ou s’il a en aucunne chose de celui plet ou s’il fit ce por barat que il n’en eut rien, il le rendra. ¶ {1} Il contera les despens que il a fet en garir le serf enprés ce que le plez fu entamé et les despens qui furent avant fez ; mes les mangiers que il done au serf ne seront pas conté. Aristo le dit, car l’en ne doit demander li rien que il despendit quant que il fit son mester.

Quant plusors choses d’une maniere sont vendues ensenble, si comme jugleors et clers qui sont en coret, il dit que il i a difference savoir se le pris est establi sor toz ou sor chescun ; si que l’en entende aucunne foiz une vençon fere, aucunne foiz plusors. Et por ce apartient il a demander que se aucun d’aus est maladis ou maheignez, que il seent tuit rendu ensenble. {1} Et se le pris est mis aucunne foiz sor chescun chief, c’est achat, que por le vice d’un porront il tuit estre rendu quant l’en [90vB] le savra ; que le acheteor ne achata pas s’il n’eust toz, ausi comme il avient de juigleors et de charretes et de mules qui sont paroiz, qui ne valent rien à nului s’il n’es a totes. ¶

Li seignor qui firent ces lois commandent que veillart ne soit vendu por novice. Et c’est contre le conchiement à vendeors et que il ne conchient les acheteors ; si comme aucun solent vendre novices qui ne sont pas novices por vendre les plus. Et l’en doit cuider que les manciples qui sont rudes et simples sont plus meillors à enseigner à toz mestiers ; mes forte chose est enseigner cez qui sont veillarz. Et por ce que le acheteor corrent tost à acheter les jeunes, por ce entrameslent il les veillarz et les vendent por juenes, et l’en le deffant ci ; et se l’en vent ce, issi il sera rendu.

Freres ne poent estre departiz. ¶ {1} Enprés deffent ce ban que nus ne vende chien, ne sanglier, ors, lou, panthere, leon.

S’il sont en ce leu par où genz passent, que il ne puissent nuire. Se l’en fet contre ce, et se franc home perist par ce, cil qui le meine sera condempné  au blecié, tant comme le juige verra que bien soit ; et en cez autres choses, tant comme le domage sera fet ou au doble.

À buef qui fiert des cornes aucun dient que il est maheignié ; et les mules qui fierent dou pié et autre jumenz qui senz cause se troblent et enportent ça vau l’avau les genz, sont mahaigniés. ¶ {1} Cil qui s’enfuit à l’ami au seignor por soi garir n’est pas fuitis ; s’il est encor en tel pensee que il ne retort pas en meson s’il n’a eide, n’est pas fuitis, car ceste fuite n’est pas de consoil fete. ¶ {2} Cil qui se part de son seignor par amonetement d’autrui est fuitis, tot ne fait il pas ce se ne fut cil qui le conseilla. ¶ {3} Se mis sers qui te servoit en bone foi s’enfoit, ou il set que il est mien ou il n’en siet rien, ‹il est fuitis›, s’il ne le fist por corage de retorner à moi ; {4} et il le fet por soi tuer s’il est lecherre, ou il a mauveses taches en soi, et il li baille aucun torment sor lui ; s’il le fist sanz dolor que il se soffrist, il est rendable. ¶ {5} Se aucun achete un serf et l’en li tolt, et il en a le quart vaillant plus par aucions de biens toleiz, et il rent enpré le serf, il doit rendre ce que il en ot. Et se il li fet injure et il en plede, il no rendra pas au vendeor ; car autrement [91rA] pot avenir se aucun le bati o corgies, o se l’en se pleint de lui et le acheteor en mut plet. ¶ {6} Aucunne foiz devra l’en rendre manciple, tot eon nos aucion de tant comme la chose valoit mains ; car le marchié est nul quant le serf ‹est› tel que il n’a mester, si comme quant il est desvé ou lunagiers, tot soit il esmé ; il sera en l’ofice au juigie que le pris soit rendu quant le manciple sera rendu. ¶ {7} Se aucun fit consoilfit consoil] fit consoil fist consoil dans le ms. par conchiement mestre sor le creancer, et le creancier por ce rendi la chose qui autrement ne rendist pas s’il ne fust cil menesterex, le vendeor est tenuz au creancier por ce conchiement. ¶ {8} Li gage sera liez, tot soit le serf rendu ; ausi comme s’il eust mis hors de sa main ou l’usage et le fruit de lui, il n’est pas rendu à droit s’il n’est receu et delivré de gage et soit rendu. ¶ {9} Se home est acheté soz condicion, il a por neant ceste aucion avant la condicion ; car le achat qui n’est mie perfet ne pot estre fet, et pot estre fet por l’arbitre au juige. Et por ce, se l’en a aucion de vente ou de achat ou de ceste aucion avant que la condicion soit acomplie, l’en porront encor avoir aucion. {10} Et aucun foiz, se la vençon est pure por la condicion de droit qui est demoree, ausi comme aucun serf en qui l’usage est à un et la seignorie est à un autre, et en autre l’achete, et quant l’en ne set de quele chose il rent le pris, l’en doit veoir à cui le droit est aquis ; et por ce n’avient pas ne à l’un ne à l’autre ceste aucion.

Li seignor qui firent ce ban ne vodrent pas que home fut prisez o choses qui vaut meins, ne que l’en feist conchiement en cest ban, si comme Pedius dit por la dignité des genz, et que il eust autre chose en cez autres choses ; car ce fut moquois priser une coute à une teneure et priser home à une teneure. Qui pot dire ce que il voit, car aucunne foiz vaut plus le chetel que le serf et aucunne foiz vaut plus le vicaire que achiet que le serf qui est vendu. ¶ {1} L’en prent aucion de ce ban contre celi dont la plus grant partie est vendue ; car aucunne foiz acompoignent li vendeor compoignie, que quant que il ont soit en commun. Et il fut esgardé à bien que l’en pledast contre un de cez dont la plus grant partie est vendue ou la menor ; et que ceste aucion avient à l’acheteor que il ne fut forciez [91rB] de pledier devant divers juiges, tot est aucion d’achat contre chescun por lor partie por ce que il furent compoignon ; car tel maniere de gent est plus presté à gagnier en quelque lede maniere que à autre cortoisie fere. ¶ {2} L’en pot doter en aucion d’esme ou en renterente] ceste dans le ms., cf. lat. In redhibitoria vel aestimatoria potest dubitari, ou por ce que cil vendi autrui serf et il ne fut acheté, ou por ce que il ne fut delivré, ou por ce que il fut malade, ou por ce que il estoit fuitis. Car l’en puet dire que le acheteor n’a que fere s’il est sain, ou s’il n’est fuitis ou que il soit delivré, mes il li apartient que il soit sein por fere ses besoignes. Ne por ce ne destroit pas l’obligacion, car manois que l’un est baillié est la promesse fete tant comme il apartient à l’acheteor.

Cest aucion a doble condempnacion ; le vendeor est ores condempné en une chose, autre foiz au doble. Car s’il ne rent le pris ne ce qui apartient, ne il ne delivre celi en qui non il est obligiez, il doit estre condempnez au doble. ¶ Et s’il rent le pris et l’apartenance et il delivre celui por quoi il fut obligié, il ne doit estre condempné que en une chose.

Quant tu me renz le serf, tu ne me doiz pas promestre que cil soit delivré de larrecin ne de forfez, fors ce que il a fet ton commandemant et le celi à cui tu baillas.

Se tu franchis home acheté, Labeo dist que ceste aucion et de tant comme la chose vaut meins ‹…› se l’aucion de doble faut, et que se l’aucion faut contre le dit ou contre la promesse ; {1} ceste aucion dure enprés la mort à l’omePassage qui pose problème.

S’il est morz sanz la colpe à l’autor, ou sa mesnie ou à son procurator. ¶ {1} Cil qui se pleint de la maledie ou de la maledie au serf et il le velt retenir, {2} il ne nuira pas à l’acheteor s’il est mis hors de barre de l’espacel’espace] la pace dans le ms. de .vi. mois et il velt pledier dedanz l’an de aucion d’esme. ¶ {3} Droiz est par ceste aucion que il soit lessié à celui qui vendi le serf liez ‹…› {4} ‹…› que le vendeor soit assous. ¶ {5} Cez aucions avienent à l’eir et contre l’eir ; et les fez as hers qui avindrent et que cil seent quis qui en poent pledier. ¶ {6} Et ce n’avient pas de manciples mes de totes betes. Se je achete en home usage et fruit, l’aucion [91vA] tient. ¶ {7} Quant l’en plede de senté par ceste aucion, l’en doit soffrit à pledier d’un vice et doit dire se aucunne chose avient enprés ne est pres, à part que l’en en plede de chief o lui. ¶ {8} Redibicions de vençons simples est en usages.

N’est pas dote que ‹rente› ne doie estre fete en teneure vendue, se teneure où il i a champchamp] cheat dans le ms., cf. lat. pestilens fundus pestilen est vendue, et il doit estre renduz. Bien est à dire que la demande do paage do tens qui est à venir doit cesser enprés la rente contre l’acheteor.

Cil qui cort ça et la comme fos n’est mie sain.

Quant l’en achete manciple maheignié et le sires plede d’achat, l’en doit regarder le savoir à serf non pas au seignor. Lors ne monte rien s’il fet l’achat en non do serf ou dou seignor ; car c’est de bone foi que le serf o qui l’en fist l’afere ne soit pas deceu. Et encor, le forfet à celui que il fist au marchié ne doit pas nuire au seignor. Et se le serf achete un home par le mandemant au seignor, que li sires savoit bien que il estoit maheigniez, le vendeor n’est pas tenuz au seignor. {1} Quant à la persone au procurator, s’il sot que il fust maheignié, ilil] et dans le ms. n’est pas tenuz à dote que il ne soit tenuz au seignor de aucion de mandemant ou de afere fet. ¶ Et por ce ne remaindra pas que il ne puisse pledier en celui non ; et comme il ne set pas que il ne soit maheignié por le mandemant au seignor qui ce savoit et le achete et il plede de ceste aucion, il ne cuida pas que tel barre soit mise par la persone au seignor.

Se le serf fet larrecin au seignor n’est pas besoing que l’en die ce en la vençon au sers, ne por ce ne doit il pas estre rendu. Et se il ‹dit› que il n’est pas lerre, il sera de cele partie tenuz de ce que il dist ou que il promist.

Ceste aucion n’a pas leu se le manciple est acheté por bones condicions, qui avant ne s’en estoit pas foiz.

Comme l’en eist doné .vi. bones moismois] mors dans le ms., cf. lat. Cum sex menses utiles de demander ce que l’en vodra en ceste aucion, il n’est pas veü que cil eist poer de pledier qui ne sot pas le vice do serf qui ne estoit pas aparissant. Et il ne convendra pas a[91vB]voir à l’acheteor grant excusement.

Je mande se l’en pot rendre au plege de l’achat le manciple ? Je di que se le plege prist sor soi tot l’afere, Marcellus cuide que l’en le rende au plege.

Se le serf achete un manciple et li sires use de ceste aucion, le vendeor ne li doit doner autrement dusque il eist tot rendu quanz apartient à ceste aucion ; et unes choses por tot, no pas por tot le chetel. ¶ Et se li sires plede do chetel, s’il ne rent tot le pris, il n’a rien. {1} Et se le serf ou le fiz vent, ceste auccion a leu à avoir le chetel. ¶ Il sera contenu el chetel de ceste aucion ; ne ne nos chaut, car le serf n’est pas en chetel dusque il soit rendu, quant il est encor à l’acheteor ; s’il est conté ou chetel par ceste aucion. Et donc, se le serf est acheté .x.m mars et il soit de .v.m, nos diron que c’est do chetel. Se li sires ne doit rien ou s’il ne tolit le chetel et s’il doit plus au seignor, il avendra que il rende l’ome et n’en avra rien.

Je demande se le serf s’enfuit à l’acheteor; et l’en dit que il doit estre renduz ; il ne sera pas avant rendu au vendeor dusque il eist eu ce que le serf li osta. Paulus dit que l’en doit forcer le vendeor à rendre non pas solement le pris do serf mes l’esme des choses que le serf enporta s’il ne veaut lessier le serf por le forfet. {1} Encor demande je, s’il ne velt rendre l’esme ne le pris des choses, se le serf doit estre renduz et se l’en doit doner aucion de chetel ou do pris do serf qui est rendu de la promesse de doble. ¶ {2} Je achetoi un serf au doble qui s’enfoit o mes choses ; enprés il fut trovez de bones genz et li demanderent s’il s’en estoit foi de la meson à celui qui le vendi, il dist que oïl ; je demande se l’en le doit de ce croire. Paulus dit : s’il i a autres signes que il s’en soit foiz autre foiz, l’en le doit lors croire.

Quant la rente est fete totes les choses sont rendues enterinement, ausi comme s’il n’i eust vente n’achat.

Ceste aucion n’apartient pas as choses donees. Et por ce doit l’en dire de celui que le doneor promist à rendre quant il n’i a nul pris, et que se la chose amende de celui à cui il est donee, et le doneor est de ce tret en plet, l’en doit dire que il ne doit pas estre tret en plet de bien fet ne de franchise. Et por ce, se aucunne chose est donee, ne sera pas mester que le doneor en soit tenuz [92rA] ; mes cil qui done doit obligier soi que il n’i face barat ; et issi le fet l’en que s’il a doné aucunne chose debonerement, que il ne la toille par consoil de boidie.

L’en doit savoir que ce ban apartient à ventes solement, non solement de manciples mes de ces autres choses. Et l’en ne dit riens de loages, et est mervelle ; mes l’en i met i tant de resons que vençons et loages ne sont pas senblables.

Labeo dit : se tu achetas plusors sers à un pris et tu velz pleder de l’un, l’en doit fere esme ou serf ausi comme l’en feroit en la bonté do chanp, quant l’en plede por la delivrance d’une partie d’un chemp. {1} Ausi dit il : se tu achetas plusors sers ou vendis por un pris et tu promeis que il fut sein et une partie d’aus n’est mie saine, il plede bien de toz contre le dit ou contre la promesse. {2} Et il dit iqui que il li vendeent por foloer et por foïr, et que ausi pot fere le serf et itel com le pot l’en rendre.

C’est plus vice de corage que de cors d’esgarder jeus assiduement ou platures, ou s’il est menteor, ou s’il est tenuz et sorpris de itex riboderies. ¶ {1} Totes les foiz que l’en nomme maledies sontique, itel maladie dist Cassius que c’est à entendre maladie qui nuist. L’en entent que il nuist quant ele dure, quant ele ne fenist mie ; et itel maladie apele l’en qui chiet en home puis que il est gariz, l’en apele sontes nuisanz. ¶ {2} L’en pot apeler serf et vel et juene. Et vell non pas por l’espace de servier mes por lignage et por cause, si comme dit Celi. Car se aucun vendeor vent aucunne novice à quelque mestier que il soit, il est conté manois en nombre de veillarz. Le vice est entendu non pas par legiereté de corage mes por convence et par usage de servage. Ne ce ne se monte s’il set parler latin ou non ; il est tenu por veillart puis que il a esté longuement à escole.

Se une partie ou tote est toleste à l’acheteor, il a son retor contre le vendeor. Et quant l’en li tost une partie, s’ele n’estoit partie, il a son retor contre le vendeor por tant comme la partie se monte. Et se certain leu li est toloist, non pas ce qui n’estoit pas parti, l’en avra son retor segont la bonté dou leu. Et que sera s’il a en champ aucunne chose preciose et l’en la li tost ou s’il i ot aucunne chose vil ? L’en esmera la qualité do leu et issi l’en i avra retor.

Se un champ est vendu, il convient segont la costume de la terre où le afere est fet doner caucion que le afere ne soit recest ; se coutume est cele.

Cil qui achete serf que orfelin à soz soi il pot avoir aucion contre celui d’achat et de promesse de delivrance quant il ne pot avoir l’une ne l’autre aucion contre l’orfelin.

Se aucun vent la voie que il a par un champ commun o un autre comme sols [92vA] seignor et il le me lesse, il me sera tenu par non de delivrance, tot no me lessent ces autres.

Un qui fut heir establi vendi totes les teneures que il avoit et li autre heir compoignon orent le pris ; ces choses sont establies. Je demande se li heir sont tenu de aucion d’achat. Je di : se li heir sont present et il s’acordent, il est aparessent que chescun eit vendu sa partie.

L’en doit fere esme de bonté do champ quant une partie est tolue. Proculus cuida à droit que l’en ne tolist pas ce que fut au tens de la vençon.

Et ce que vient enprés por crois d’eve, l’en doit regarder le tens ou ce avint. ¶ {1} Se usage et fruiz est toluz, l’esme doit estre faiz por la bonté des fruiz. {2} Et se le serf est delivré, le plet doit estre esmé de tant comme il avra mains en la chose.

Se la chose est tolete l’en avra aucion d’achat de ce que avint et acheist. Ausi les choses qui avindrent, s’el est tolete, l’en ne rent que une simple chose. ¶ {1} La promesse de doble est perdue quant la chose est rendue au demandeor, ou il est dampné de l’esme do plet, ou se le teneor est asseos de l’acheteor. ¶ {2} Se le serf en qui non nos avon promis est retret por celui qu’i n’est pas fuitis ou sein, l’en demade se nos poon pledier. Proculus dit que l’en doit veoir que ce n’i soit, s’il fut ‹…› toloit quant il fut mienPassage qui pose problème. Et en ce quas que il est mien, manois il m’apartient de savoir combien il est enpirié por ce ; et quele auction je puis avoir une foiz, ne je ne le puis perdre por le tolement ne par mort, ne par franchise, ne par fuite de serf, ne par autre cause. Ausi comme s’il ne fut pas en ma chose, por ce que il est fuitis, il est plus povre quant il n’est o moi. Et se je promis que il est sain et que il n’est pas fol, la chose est moie tant comme ele apartient à mon usage ; et s’il fut en obscur leu sanz nostre sen, tant comme je le dui avoir et il astoit à venir que aucun l’eust de moi, ou j’é d’aucun, ou à aucun que je l’é promis le me tolt. ¶ Et la summe de son cuider est tel que je e tant de cele promesse comme je la prisse, et por tant comme je no vosisse enprés la promesse que il ne fut fuitis [92vB].

Se nef ou meson est achetee, cez tables, cez paroiz ne sont pas achetees et l’en ne l’entant pas ; et por ce n’est pas le vendeor obligié en non de vençon por une partie se ele est retrete.

Se serve grosse est vendue et baillie, se le enffant est retret, le vendeor ne pot estre tret en plet do retret, car le enffant n’est pas vendu.

Il n’est pas veü que scaphe seit partie de nef, car el n’i a point de jointure ; car scaphe est par soi une petite nef. Et ces autres choses qui sont jointes à la nef, comme governel, mashe, la veile, les hobens, sont ausi comme membres de nef.

Si l’en demande le fruit et l’usage à l’achateor, cil le doit fere savoir au vendeor et quele partie ce est que le li demande.

Se le juige commande que l’en vende gages par mauvese sentence, nus ne dira que l’en doie doner aucion contre aus se la chose est retrete ; mes s’il sovent la chose por moins que ele ne vaut, lors done l’en contre aus avoir aucion de barat au seignor de la chose.

Cil qui vendi autrui chose enprés longue tenue, il n’est pas tenu de retret. ¶ {1} Se li heir vendi celui qui deveit estre franchi par condicion de peccune doner, et il dist que il i a plus en la peccune que l’en ne dist et que l’en ne li commanda pas doner, il est tenuz de l’achat se la condicion est tele que le acheteor l’eust. ¶ Ausi est se l’en commande doner au serf, tot dist il voir de la peccune, s’il ne le dist que il feist le mandemant, il sera tenu do retret.

Et li heir bala un serf qui n’estoit pas lessié nomeemant, et promet que il n’i feroit barat ; enprés le serf fut retret. Cil à qui l’en fist le lés porra avoir aucion contre l’oir de testemant, tot ne seust le her que il fut autrui serf.

Se je achete de toi et je le vendi à Ticio, et tu le li ballas par ma volenté, tu ne m’i es pas tenuz de retret, ausi comme se ge eusse baillie la chose que j’é receue ; et à ce s’acorde l’en.

Le vendeor est tenuz à l’acheteor enprés le retret do serf, que li sires en mena, de rendre lui le serf enprés celi tens, et doit offrir le li, il ne s’en pot deffendre ; et ce apartient à l’acheteor.

[93rA] Se l’en done plus ou mains que l’en a doné en non de pris et il est en convent que l’en done se la chose est retrete, l’en doit garder le convenant. ¶ {1} Se gage de chose juigie est pris par l’ofice au juige et vendu, l’en a enprés celui qui est delivré aucion d’achat non pas de domage mes do pris solement et des usures, si que les fruiz seent contez, c’est à dire s’il n’a besoing de rendre les à celi qui les retret. ¶ {2} Et se l’en muet entretant plet, non pas de rendre le pris mes que cil deffende la chose, le vendeor en porra estre tret en plet. ¶ Cil qui vendi la chose por tele comme ele est, il n’est tenuz sanz plus que itele la rendra et que il n’i fera barat.

Se tu me venz autrui chose et je l’é ausi comme por lessie, il est acordé que je en per‹t› l’autorité por le retret.

Macellus dit : se tu venz autrui chenp et tu demandes enprés ton fet, tu doiz estre botié ariere par cete excepcion. {1} Et se li sires dou chenp est heir au vendeor, ausi en dira l’en. ¶ {2} Et se aucun vent ma chose par mon mandemant, ceste barre me nuira se je demande cele chose, se l’en ne prove que je mandasse que ele ne fut baillie dusque le pris fust renduz. ¶ {3} Celsus dist : que se aucuns vent ma chose meins que je ne li mandoi, il n’est pas veü mestre la hors de ma mein ; et se je le demande, ceste barre ne me nuira pas ; et c’est voir. ¶ {4} Se le serf achete merceries especiaument, enprés li sires commande que il fut franc en son testemant avant que il eust la seignorie des choses, il avra barre de fet por ce que il commanda que le chetel li fust lessié ; et le vendeor ne pot avoir les merceries por ce que cil fut serf ou que il fist marchié. ¶ {5} Se aucun achete une chose ne elle n’i est mie baillie et il en a la sesine enprés sanz vice, il a excepcion contre le vendeor s’il n’i a mie droite cause por quoi il chalenge la chose ; car s’il baille la possession et la cause est juste de chalengier, il avra replicacion contre l’escepcion.

Se tu achetes un champ de Ticio qui estoit Sempronii, et l’en le te baille, et quant le pris est rendu Ticius est heir à Semproniy et balle celui chemp à Mevio, et li vent, Julius dist que il est droit que l’en te deffende avant ; car se Ticius te demandast [93rB] lele] len dans le ms. champ, il eust barre contre lui ; et se Ticius le remist, tu eusses contre lui bone aucion de demander li.

Barre de chose baillie et vendue n’a pas solement leu à celi à qui la chose est baillie, qui à ses hers et au segont acheteor ; et se la chose ne li est baillie, el li vendra, il apartient au premer acheteor que le segont ne la perde. {1} Et ausi nuira as hers au vendeor se li acheteor perdent en la vençon que il firent.

À totestotes] tes dans le ms. les foiz que l’en demande se aucun est do linage à aucunne gent, il le li convient prover.

Ci la prove afiert à celi qui dist, non pas à celi qui nie.

Quant lés fez en privé est doné de celi qui est heir escrit ou premier testamant, et en segont por une meisme partie ou enprés plus grant, la prove de la volenté mue apartient à celi qui est tret en plet ; comme cil qui a le segré receu face aucunne foiz entendre as seignors des choses escriere lor heirs issi, en qui il se fierent.

Le acheteor doit prover que cil serf dont est la plainte s’enfoi avant que il l’achetast.

Il convient que cele partie prove que il dist que son aversere est deffendu por aucun droit, ou por loi, ou por constitucion à estre oï. {1} Il meisme dit : se aucun nie que le pere mist mauvesement son fiz hors de sa main, il le doit prover.

Le patron doit mostrer apertement que le franchi a doné aucunne chose en barat de soi por rapeler cele partie.

Quant l’an prove de la premiere fuite, l’en en doit croire le serf ; l’en le doit demander contre lui, non pas por le seignor ou contre le seignor.

Se li fiz dit que il n’est pas au poer au pere, le prevost dit que le fiz le doit prover, car l’en doit ce establir por la partie por ce que il dit que il est franc ; por ce est il de prover tenu.

Se convent est fet où l’en ne fet mencion de l’eir, je demande se c’est fet que son fet fut estrecié. Et tot soit il voir que cil qui met barre la doit prover, se le convent fut fet de lui ou de son avoir, cil qui demande doit prover [93vA], non pas cil qui met la barre ; car nos provon aucunne foiz à noz hers et à nos.

L’en doit voer en droit celui qui dit que el est noble de lignage le quel est demandeor. Et s’il fut de ce sesi, il convient que il le prove ; et s’il n’en fut sesi, et l’en dit que il est franchi de celui qui muet le contenz, cil qui dist que il est seu franchi il doit prover. Et que se aucun dit que il est son serf ou son franchi et se aucun reçoit la prove sor soi que il dont sentence par la franchise ? L’en le doit soffrir et il doit prover que il est noble.

La requenoissance à la mere as enfanz est receue ; et de l’aiau ausi.

Quant l’en fet question de la loi falcidiane la prove est à l’oir ; et s’il ne le pot prover, il sera condempné.

À totes les foiz que l’en demande besoignes au franchi, les proves sont requises de celi qui dist que il est patron. Et por ce dit Julius que tot teinge le patron, il doit estre auctor non pas le franchi, car il dit que il est patron. ¶ {1} Qui dist por barat aucunne chose tot soit ce en barre, il doit prover le barat. ¶ {2} L’en doit metre de la demande sor l’autor à qui l’en demande en droit s’il est sol heir ou s’il se test quant l’en li demande ; autant sera à dire comme se la prove estoit sor lui, non pas à celui qui mist la barre avant.

L’en doit dire en barres que reus est auctor, et que il veüt et doit prover la barre ausi comme l’entencionl’entecion] sentencion dans le ms., cf. lat. In exceptionibus dicendum est reum partibus actoris fungi oportere ipsumque exceptionem velut intentionem implere ; ausi comme s’il use de barre de convent acordé, il le doit prover. ¶ {1} Quant aucun promist que il feroit ester à droit aucun, et il dist que il ne pot venir, que il est hors por le commun et por ce n’i pot venir, ou se le aversere fist barat que celui pot estre, ou por feblece ou por tempeste, il convient que il le prove. {2} Et se aucun use de barre de procureor por ce que il ne li lut pas doner au procureor, il convient que le procureor prove ce que il n’i est avant la barre. {3} Ausi dira l’en se cele peccune est demandee, qui est ja paiee. {4} Et se l’en met sor lui le seremant de ce que l’en li demande, ou s’il dit que ce fut fet en jeu de tables, il convient que il le prove.

Se aucun tient franc [93vB] home en liens, n’est pas droit que le tienge ; car il ne pot pas prover que le home, en ce tens que le plet fut commoincé, que il fust franchi.

Je cuit que il est voir que li autor qui doit pledier doit prover que il sot que le mort lessoit autrui chose ; le heir ne le doit pas prover que le mort ne le seust que il fust autrui ; car la prove est toz jorz à celui qui plede.

Cil qui dist que cil mua sa volenté, il le doit prover.

Avant totes choses, ce qu’est convent entre l’autor et le detor que la chose soit en gage. Et se le auctor prove ce, il doit ce acomplir que la chose apartienge au detor en celui tens que le convent fut do gage ou par qui volenté il fut baillié.

Se ton gage est si cancelé, tot soit le detor delivré par presumpcion, le detor est à droit tret en plet de tant comme le creancier velt prover que il le doit encore.

Quant l’en demande chose que l’en ne doit pas, quil doit prover que ele ne fut pas deue ? La chose est issi à atrenper ; se cil qui reçut la chose ou la peccune qui n’estoit pas deue le nie, et cil qui le balla le preve sanz faille, cil qui nia que il n’avoit pas eu la peccune, s’il velt estre oïz, il doit estre forciez à prover, cil qui receust la peccune ; car truflerie est cil qui nia au commoincemant avoir pris l’argent, puis que il sera convenu à avoir receu la prove de la dete, il ne la porra demander à l’aversere. Et s’il reconoist au commoincem‹en›t que il l’a receu, et il dist que n’estoent pas deues et furent rendues, nus ne dote que l’en n’et pressumpcion por celi qui reçut ; car cil qui rendi n’est pas si nice que il gete ce que il a et que il rende ce que il ne doit pas. Et mesmement, se cil qui rendi ce que il ne devoit est hom diligent et prodome, que l’en ne cuide pas que il fut deceu, tost et por ce est il forciez à prover lo, que il fut deceu ; et s’il ne le prove, il ne le pot redemander. {1} Et se cil qui demande ce que il rendi ne no devoit pas est orfelin ou menor ou feme, s’il est home parfet ou chevaler ou vilein que il ne vet pas à plez ou ne pense pas à cex jeux et est parreceux, lors cil qui reçut la peccune doit mostrer que il la reçut bien et que l’en li devoit ; si que non, il la doit rendre. {2} Il [94rA] est voir se cil qui demande dit que ele n’estoit pas tote deue. Et se il demande une partie, et dit que cele partie rendue n’estoit pas deue, ou que ele fut deue aucunne foiz mes enprés fut rendue, et il n’en savoit rien, ou s’il fu seguz ou par niceté rendi cele peccune, il convient que il mostre ce que il a plus rendu par error ou que il avoit barreavoit barre] avoit avoit barre dans le ms. por soi et comme fou geta son argent, segont la rigle generau qui dit que cil doit prover qui metant barre avant et afferment et dient que il ont rendu chose que il ne devoient pas. ¶ {3} En totes les devises que nos avons proposees doit l’en doner congié à celui qui velt prover que il mete le seremant sor son aversaire et que il jure avant de calumpnia, que le juige puisse former sa sentence quant il avra oïz les seremanz. {4} La où est le plet de ce que l’en demande chose que l’en ne doit pas. Et se caucion de ce que l’en ne doit pas est mise avant, et ele ne parle deviseement, lors cil qui dona la caucion est tenuz de mostrer le dete et ce que il mist en la caucion ; se cil qui mist la caucion ne dit la cause por quoi il l’escrit, lors convient il que l’en le croie de sa confession, s’il ne mostre por bones proves que il est promis chose que il ne doie.

Comme Procula vosist contrepeser le lés que sis freres li devoit enprés sa mort o les choses que les heirs au frere avoient, et comme l’en deist encontre que ce n’avoit onc le frere convenencé comme il eust maintes foiz rendu plusors detes por la seror, divus Commodus, qui tient le plet, ne volt pas que le contrepois fut fet, ausi comme s’ele eust lessié le lés à son frere.

Cil qui fist testamant à celui qui poet prendre dusque à une certaine mesure, il lessa une summe certaine. Et dist issi : « Je done et lesse à Ticio ce que il me lessa, et je ne l’en ai pas doné letres, car j’oi tote la chose sa mere en ma garde sanz nul plege. Et oncor, vuel ge que Ticius eist de ma chose tant comme g’ei eu des fruiz de sa teneure que j’é pris et vendi, et ce que Ticius ot de sa mere que il a mis en mon preu ». Je demande se Ticius les pot demander. Je [94rB] di, se Ticius pot prover que cil eust ces choses, il les pot demander ; et por ce que il n’en poet plus prendre, il mist ce au testamant.

Se li arbitres doit penser se le memoire de l’ovre dure, il doit demander se aucun s’en recorde, et en quel tens il fut fet, et comment ce puisse estre prové quant ce fut fet. Et enprés cele memoire n’est pas tenuz se c’est fez dedanz l’an, se nus d’aus ne set ce fet, ne ne s’en remenbrent et en tens à quel conte il vit ce ; et, se chescun dit que il ne vit ne ne l’oit quant ce fut fet ne que il ne virent cez qui ce virent ne n’oirent, ne il ne l’oirent dire a cez qui descendent de parenté ou an montent.

Severus et Antonens manderent à Claudio cex paroles : « Les proves qui sont donees por les fiz, ne sont pas solement en ce que li garant affirment ; mes se l’en deist les letres que l’en envoie à femes, se il sont creables, il n’en convient ja fere letres ». ¶ {1} Une feme qui fut refusee ot un fiz sanz son mari, il dist que il estoit barat ; l’en demande s’il est au poer au pere; et, la mere mort sanz fere testamant, il pot demander par son commandemant l’eritage, ne se ce que la mere dist li nuist. Je di que verité a son leu.

Tot ce doit estre entendu et pris en non d’estrumant dont la cause pot estre enseignie ; et par cez garenz et persones sont en leu d’estrumanz.

Quicunqu’est tret en plet de la borse l’enpereor ne doit pas estre tret en plet de juige, ne par essemple de aucunne escriture, mes par autentique ; issi se la foi do marchié pot estre mostree et escriture mauvese ne doit pas avoir force en plet.

En chose qui est obligee ne monte rien en quex paroles est ce fet, ausi comme il est en cez choses qui sont fetes por acordement. Et s’il est acordé sanz escriture que il soit en gage, et prové, le gage tendra don le convent fut fet. L’en fet de ce letres que l’en puisse plus [94vA] tost prover ce que a esté fet ; et sanz ce, vaut ce que a esté fet, s’il i a prove ; et noces fet l’en, tost n’i et il letres.

Se une chose est fete sanz seel et sanz letres, il ne vaudra pas moins por ce que il n’i ot fet nules letres.

Se l’en plede des tables do testamant et l’en ne set à cui eles deent estre baillies, nos metron toz jorz le veau au jeunre, et les plus haut au plus bas, le masle à la femele, le noble au franchi.

Usage de tesmoinz est moult necessere ; et cex doit l’en apeler à ce que il sont creable. {1} Tesmoinz poent estre amené non pas solement en causes criminaus et encor en causes de peccune, si comme mestier est ; et il sont tel que il poent estre garant qui ne sont deffendu por nule loi. {2} Et ja soit ce que aucunnes lois devisent nombre de tesmoinz, les princes les ont emesurez ; et le juige que l’en enmene tant comme il cuiderent, si que moltitude de garanz ne seent amené à genz travaillier por poeir defrené.

En tesmoinz devent estre requis la foi, la dignité, les mors, la hautece ; et por cez, garenz que chancelent contre la foi de lor garentie ne devent pas estre oïz.

Foi de garenz doit estre examineee. E por ce, en lor persone en cerchera l’en prisyer lor estat, s’il est de haut ou de bas, ou s’il est prodome ou s’il est ribaut, ou s’il est blasmé ou repris, ou riche ou povre qui meste tot por gaagnier, ou s’il est anemi à celi contre qui il porte garentie, ou s’il est ami à celi por qui il le porte. Car s’il n’a point de sopeçon en tesmoing por ce que il est prodome, et ne het celui ne n’i gaigne, le tesmoing est recevable. {1} Et por ce divus Adrianus ‹escrit à› Varo, legat en Sezile, itex paroles : « Cil qui juige pot trop bien savoir combien sont lëau li garent » ; et dit issi : « Tu poz savoir combien sont lëau li garent, et de quel digneté et de quel esme et comment il ont apris à parler, et s’il aportent parole devant por pensee, ou s’il respondent à tex demandes et do tens et de autres deffides ». ¶ {2} Et cil princes meinsme dit tex paroles à Valerien des garanz : ¶ « L’en ne pot avoir argument sofisent d’avoir esprové [94vB] des chascunnes choses, ne certaine meniere ne pot estre dite ; ausi comme il n’est pas toz jorz, issi n’en a l’en pas toz jorz letres de chascunne chose ne la verité. An aucun leu vent nombre de garenz, aillors dignité, aillors autorité, aillors renomee qui s’acorde à la chose don l’en quiert la foi. Et je te mande ce à une summe, ne l’en ne doit pas amener toz jorz une maniere de prove, ne une maniere de sentence, mes il te convient juiger segont que tu troveras en ton corage de ce que tu croiz ou de ce que tu cuides ». ¶ {3} Cil divusdivus] dimus dans le ms., cf. lat. divus Hadrianus dist Julio visconte de Grece que il devoit croire as tesmoinz non pas à lor diz ; et itex furent les paroles que il li manda : « Alexander proposa devant moi mout de crimes ; et por ce que il ne provet ne n’amenoit garanz, ainz voloit user de tesmoinz qui n’ont pas leu devant moi, car je les soil enquerre, et mander au seignor de la province qui l’enqueist de la foi es garanz. Et s’il ne feist ce que l’en li manda, il fut envoiez en essil ». ¶ {4} Cil prince meisme dist à Gaio Seio itex paroles : ¶ « Autre est l’autorité des garanz qui sont presenz et autre de lor paroles qui solent estre recordees ; or te porpense dons, que, se tu veauz ce retenir, done lor depens ». ¶ {5} Il est contenu en la loi Julius que l’en ne poist pas dire tesmoing contre le reus, meesmement cil qui l’oste de sa meson et de son pere, ou cil qui sont .xiiii. anz, ou qui sont dampné en commun juigement, ou cil qui a sa feme lessie, ou cil qui est en prison ou qui se loe à combatre as bestes, ou cele qui gaegne à son cors, ou qui dist tesmoinz por loer. Et li un ne sont pas receu por lor reverence, li un por lor legereté, li un por la note de lor ribauderie. ¶ {6} L’en pot bien tesmoingz mener longue voie ; mes chevaler n’i devent pas estre apelé s’il sont en ost ou chevauchié, et ce dist divus. Et le enpereor distrent que il apartient à garenz amener et il apartient au juige de encerchier quel costume il i a en cele province où il juige ; car s’il est prové que garent augent de cité en cité por porter tesmoing, n’est pas dote que le juige n’i puisse apeler cez que il savra dont la cause a mestier.

Ignorance de fet ou de droit est {1} que se aucun ne set que cil soit mort de cui il tient les biens, li tens ne cort mie contre lui. Et s’il set que li cosins soit morz, et il ne siet pas que il et ses biens par non de ce, ou s’il se set heir escrit et il ne set que li prevoz promete la possession des biens as heirs escriz, li tens cort contre lui ; car il meserre en droit. ¶ Ausi est se li frere cosin au mort croit que la mere avent que ele fut en sesine des biens. ¶ {2} Se aucuns ne set que il soit cosin, ilil] et dans le ms., cf. lat. Si quis nesciat se cognatum esse, interdum in iure, interdum in facto errat folie une foiz en fet, autre foiz en droit ; et s’il set que il soit franc et set de qui il est nez, il folie en droit quant il ne set que il tient les biens do cosignage. Ou se aucun est geté, et ne set de quex peranz il est, et sert à aucun et cuide que il soit serf, il folaie plus en fet que en droit. {3} Et se aucun fet que la sesine des biens soit portee à autre, et il ne set pas que le tens de la sesine des biens est passee, il folaie en fet. Ausi est s’il cuide que il eit eu la sesine ; et s’il set que il ne l’eit demandee et que le tens est passé, et il ne set pas que la sesine li avient par heritage, li tens cort contre lui ; car il folaie en droit. {4} Ausi diron nos se aucun est heir escrit et il ne cuide pas que il puisse demander la sesine dusque le testamanz soit ouerz [95vB] ; et se il ne set que il i ait tables, il folie en fet.

Cil qui folie en tot fet ou en partie et en droit n’est pas en leu en qui ignorance de fet doit estre eue, quant le droit est feni ou pot estre et doit ; les parlement do fet deçoit aucunne foiz des plus sages.

Il i a debat se aucun ne set rien de la cause d’autrui ne de son fet, savoir s’il ne set rien de son droit. {1} Cassius dit que l’ignorance Sabinus doit issi estre esmee, non pas de home aperdu mes de home qui est trop segu.

Ignorance de droit est niee profiter en usage, mes ignorance de fet vaut.

Ne l’en ne doit pas soffrir trop grant ignorance ne le fet à celui qui ne set, ne dure enqueste ne doit pas estre fete ; car le savoir en doitdoit] droit dans le ms., cf. lat. scientia enim hoc modo aestimanda est estre esmé en ceste maniere que il ne soit trop negligenz, ne trop segur, ne trop plein de demore.

Ignorance de droit ne nuit pas à cez qui volent conquerre, ne ne nuit à cez qui demandent lor droit.

Error de fet ne fet preu ne domage à homes ; ne error de droit ne fet nul preu à femes. Mes error de droit en domages de sa chose perdre ne nuist pas.

Relle de droit est que ignorance de droit nuist à chescun, mes ignorance de fet ne nuit. Or veon en quex choses ce puet avoir leu. L’en otroie bien que cil qui n’ont .xxv. anz ne sachent pas droit, ne femmes ; et por ce, la où il n’a forfet, il ne sont pas tenuz por ceste reson. Se menor de .xxv. anz croit au fiz qui est en bau au pere, l’en li secort que la creance ne vaut rien. ¶ {1} Se fiz qui est au bau de chevaler, que li autre chevaler a fet heir, ne set pas que il pot demander l’eritage sanz son pere, il pot bien mesconoistre les establissemanz as princes, et por ce pot il demander l’eritage. ¶ {2} Ignorance de fet ne nuit pas issi à checun s’il n’est trop negligent ; et que sera se toz cez de la cité sevent ce que il ne setset] fet dans le ms., cf. lat. quid enim si omnes in civitate sciant pas ? Et Labeo dit que l’en doit bien savoir de home qui n’est pas trop curios ne trop negligent, mes de celui [96rA] qui enquiert bien qui puisse savoir la chose. ¶ {3} Mes Labeo dit que ignorance de droit ne vaut pas se cil se pot conseiller, ou, tot por soi que il pot bien savoir, son domage ce seit issi ignorance de droit ; nos ne nos i acordons pas. ¶ {4} Cil qui ne sot que le vendeor fut sires de la chose, foleia plus enen] est dans le ms. chose que en esme de pensee. Et bien cuide que il n’achete pas do seignor, se seignor la li baille, il en fet seignor. ¶ {5} Se aucun qui ne set droit ne use de la loi falcidienne, ce li doit nuire. Mes li enpereor distrent se l’en balla chose que l’en ne dut par cause de testamant, s’el est rendue par error de fet, ele ne pot estre redemandee. Ausi comme li heir Garielen, qui pristrent peccune do testamant au pere à fere un conduit d’eve qui avoit esté lessé au commun de cez de Pise, il ne demandent pas solement les caucions qui i soleent estre mises, que ce que li gardein eussent pris outre il poissent demander par la loi falcidiene, et rendissent maugré aus ce que il avoint promis que cele somme ne fut mise en autre usage. Et cil sorent bien que cele peccune estoit despendue en conduit, il la demandent por neent, ausi comme s’il ont plus baillié que il ne devent pas ; comme ce ne soit pas droit de redemander la peccune ne qui fut baillié au conduit et de demander le cors de patremoine qui est despendu en ce leu donc c’est chose gloriose. Et s’il cuident par ce avoir cele peccune que il firent que fol et que il n’ont pas usé de benefice de la loi falcidiene, il devent savoir que l’en ne secort pas à fos mes à cez qui meserrent. {6} Et tot face l’en de gardeins en ceste loi, ausi doit l’en ce tenir en autre persone ; et doit l’en dire que la peccune qui fut lessee au conduit ne pot estre redemandee ; car le commoincemanz de la constitucion est generau. Et dist que se le lés n’est rendu par error de fet, l’en ne pot demander ce qui ne fut deu. Et encor, cil qui ne sont usez de la loi falcidienne ne poent redemander que l’en puisse dire segont ce que sa peccune est lessee et ele est rendue ; et ‹s’›ele ne fut pas lessee à fere aucunne chose, tot ne soit ele despendue [96rB] ainz dure encore, l’en ne la pot demander à celui à qui ele fut rendue.