Charles, par la grace de Dieu roy de France, a tous ceulz qui ces presentes lettres verront, salut. Savoir faisons nous de grace especial avoir octroyé a nostre amé et feal clerc, notaire et secretaire maistre Odart Morchesne, prieur de l'eglise collegial de Saint Aignen en Berry et penancier d'Orleans, 1 que il tant cause de ses benefices comme autrement en toutes ses causes et quereles meues et a mouvoir contre tous ses adversaires par devant tous juges seculiers de nostre royaume, en demandant et en defendant, soit receu par procureur en parlement et dehors jusques a un an. Donné a Bourges le XXV^e jour de juing, l'an de grace mil quatre cens vint et cinq, et de nostre regne le tiers.

Charles etc., a tous etc. Savoir faisons nous de grace especial avoir octroyé a Tel et a sa femme que eulz, tant conjoinctement comme diviseement, en toutes leurs causes et quereles meues et a mouvoira contre tous leurs adversaires par devant tous juges seculiers de nostre royaume, en demandant et en defendant, soient receuz par procureur en parlement et dehors jusques a un an. Donné etc.

Charles, par la grace de Dieu roy de France, a tous ceulz etc. Savoir faisons nous de grace especial avoir octroyé a Tel et a sa femme que eulx, tant conjoinctement comme diviseement,en toutes leurs causes et quereles meues et a mouvoir contre tous leurs adversaires par devant tous juges seculiers de nostre royaume, en demandant et en defendant, soient receuz par procureur ou attourné souffisamment establi par procuracion ou attournee faicte ou a faire soubz leurs seel ou seaulz ou de leur seneschal, bailly, viconte, ou d'autre seel autentique, en parlement2, eschiquier et dehors jusques a un an ; et que icelui procureur ou attourné ainsi establi puisse requerir adjournement ou adjournemens, delivrance de namps3 et de fiefz, mouvoir et intenter toutes causes et quereles, icelles poursuir et mener a fin deue, faire claim ou claims de marchié de bourse4, prendre et recevoir brief ou briefs5, substituer et establir en lieu de lui ung ou pluseurs procureurs ou attournez qui ait ou aient semblable povoir, et generalment de faire et faire faire autant en toutes choses comme lesdiz Telz et chascun d'eulz feroient et faire pourroient se presens y estoient. Non obstant la coustume du païs a ce contraire. Donné etc.

[1.4.a] ¶ Nota que en une lettre de grace a plaidier par procureur en Normandie, y fault adjouster toutes ces clauses dessus escriptes, c'est assavoir par procureur ou attourné suffisamment fondé etc.

[1.4.b] * Et se celui ou ceulz qui veulent la grace sont nobles, communitez en eglises, evesques, abbez, chappitres ou autres gens qui aient seaulz autentiques, jurisdicion et justice soubz eulz, on y doit mettre ces motz par procuracion ou attournee faicte ou a faire soubz son seel ou seaulz ou du seel ou seaulz de son seneschal ou seneschaulx ou d'autre seel autentique, en parlement, eschiquier et dehors jusques a un an etc.

[1.4.c] * Et se c'est pour simples gens de village, marchans ou autres privees personnes, il ne fault mettre seulement que ces mots faicte ou a faire soubz seel autentique en parlement, eschiquier etc., pour ce qu'ilz n'ont pas seaulz et, s'ilz en ont, ne sont ilz pas congneuz ou approuvez.

[1.4.d] * Item nota que par cestes lettres de grace on ne seroit pas receu par procureur en cas de crime, ne la ou il y auroit adjournement a comparoir par procureur.

Charles etc., au premier nostre sergent qui sur ce sera requis, salut. Nous te mandons et commettons que toutes les debtes bonnes et loyaulx, congneues ou prouvees par lettres, tesmoings, instrumens, confession de partie ou autres loyaulx enseignemens, qui t'apperront estre deues a Tel, tu lui faces paier tantost et sanz delay ou a son certain commandement, en contraingnant a ce les debteurs et chascun d'eulz par prinse, vendue, expletacion de leurs biens meubles et immeubles, detencion et emprisonnement de leurs corps, se mestier est et a ce sont obligiez ; et en cas d'opposicion, reffuz ou delay, nostre main suffisamment garnie avant tout euvre des sommes contenues es lettres obligatoires faictes et passees soubz seaulx royaulz, adjourne les opposans, reffusans ou delayans a certain et competant jour ou jours par devant les juges ou leurs lieuxtenans ausquelz la congnoissance en appartendra, pour dire les causes de leur opposicion, reffuz ou delay, respondre, proceder et aler avant en oultre selon raison, en certiffiant souffisamment audit jour ou jours lesdiz juges ou leurs lieuxtenans de ce que fait en auras. [fol. 3] Ausquelz nous mandons que aux parties, ycelles oÿes, facent bon et briefa. Non obstans quelzconques lettres d'estat, de grace, de respit ou autres impetrees ou a impetrer par lesdiz debteurs ou aucun d'eulz sur le respit et dilacion de leurs debtes paier ausquelles ilz auront renoncié par foy et serement, se en icelles n'est faicte expresse et especial mencion des renunciacion, foy et serement dessusdiz. Mandons et commandons a tous noz justiciers, officiers et subgez que a toy en ce faisant obeïssent et entendent diligemment. Toutesvoyes nous te defendons congnoissance de cause. Ces presentes aprés un an non valables. Donné etc.

Charles etc., au premier etc. A la supplicacion de Tel, prevost ou fermiera de tel lieu, nous te mandons et commettons que toutes les debtes bonnes et loyaulx, cogneues ou prouvees par lettres, tesmoings, instrumens, confession de partie ou autres loyaulx enseignemens qui t'apperront estre deues audit suppliant, tu lui faces paier comme en la precedent jusques adjourne les opposans, reffusans ou delayans a certain et competant jour ou jours, c'est assavoir ceulx qui lui sont ou seront tenus a cause de etc. et demourans en tele seneschaucié ou jurisdicion par devant le seneschal ou juge dudit lieu et les autres par devant les juges ou leurs lieuxtenans ausquelz la congnoissance en appartendra, pour dire les causes de leur opposicion, reffuz ou delay, respondre, proceder et aler avant en oultre selon raison, en certiffiant souffisamment audit jour ou jours ledit tel juge b et iceulz juges. Ausquelz juges nous mandons et audit tel seneschal ou juge pour tele cause et pour tele commettons que entre les parties, icelles oÿes, ilz facent bon et brief droit. Non obstans quelzconques lettres d'estat et comme ou premier 1.

[1.8.a] ¶ Nota que en un debitis et non pas seulement en ce, mais aussi en toutes autres lettres patentes qui se adrescent a huissier ou sergent, on y doit mettre ce mot commettons, pour ce qu'ilz ne peuent ou doivent riens executer se n'est par la commission, auctorité et commandement d'autrui greigneur de lui ; se mestier est et a ce sont obligiez, car autrement il n'y cherroit pas detencion ne emprisonnement des personnes ; soubz seaulx royaulx, pour ce que de choses passees soubz autres seaulx, quelques autentiques qu'ilz soient, le roy n'en donne point de main garnie en cas d'opposicion ; ausquelz nous mandons  : il n'y fault point mettre et commettons, pour ce qu'ilz sont ordinaires des parties et en peuent cognoistre sanz [fol. 4] commission d'autruy ; non obstans quelzconques lettres d'estat etc. ausquelles etc.  : toutes les clauses y doivent estre mises, especialment est neccessaire d'y mettre ces derrenieres clauses Toutesvoies nous te etc. et Ces presentes aprés un an non valables. Donné etc.

Charles etc., au premier huissier de nostre parlement ou des requestes de nostre hostel ou autre nostre sergent qui sur ce sera requis, salut. A la supplicacion de nostre amé et feal clerc, notaire et secretaire Tel, estant a cause de sondit office et autrement en nostre protection et sauvegarde especial et lequel d'abondant avecques sa famille, droiz, choses, possessions et biens quelzconques nous y avons prins et mis, prenons et mettons par ces presentes, a la conservacion de son droit tant seulement, nous te mandons et commettons que ledit suppliant tu maintiengnes et gardes en toutes ses justes possessions, droiz, usaiges, franchises, libertez et saisines esquelles tu le trouveras estre et ses predecesseurs avoir esté paisiblement d'ancienneté ; et le defend de toutes injures, violences, griefz, oppressions, molestacions, de force d'armes, de puissance de laiz2 et de toutes inquietacions et nouvelletez indeues, lesquelles se tu trouves estre ou avoir esté faictes ou prejudice de nostredicte sauvegarde et dudit suppliant, fay les ramener par juge competant et remettre tantost et sanz delay au premier estat et deu et pour ce faire a nous et audit suppliant amende convenable3  ; et nostre presente sauvegarde publie et intime es lieux et aux personnes ou il appartendra et dont tu seras requis ; et en signe d'icelle, en cas d'eminent peril, met et appose nos pennonceaulx et batons royaulx en et sur les lieux, maisons, manoirs, terres, granches, possessions, biens et choses quelzconques dudit suppliant, en defendant de tout par nous a toutes les personnes dont tu seras requis et qu'il appartient sur certainnes et grosses peines a nous a appliquer que audit suppliant, sa famille, droiz, choses, possessions et biens quelzconques ne meffacent ou facent meffaire en aucune maniere. Et se sur ce naist debat ou opposicion, le debat et la chose contencieuse [fol. 4v] en cas de nouvelleté prise et mise en nostre main comme souveraine, icelle nouvelleté ostee et restablissement fait avant tout euvre des choses prinses et levees, attendu que ledit suppliant sanz grant pretermission de nostre service, ouquel il est continuelment occuppé a cause de sondit office, ne pourroit plaidier ne faire de ce poursuite par devant divers juges ne en diverses jurisdicions et que par devant noz amez et feaulx les maistres des requestes de nostre hostel en tel lieu 4 les parties pourront avoir meilleur et plus briefve expedicion et sanz faveur que ailleurs, adjourne les opposans ou faisans ledit debat a certain et competant jour par devant lesdiz maistres des requestes pour dire les causes de leur opposicion, respondre audit suppliant ou a son procureur pour lui proceder en oultre et aler avant selon raison. Et avecques ce toutes les debtes bonnes et loyaulx cogneues ou prouvees par lettres, tesmoings, instrumens, confession de partie ou autres loyaulx enseignemens qui t'apperront estre deues audit suppliant fay lui paier tantost et sanz delay ou a son certain commandement, en contraingnant a ce les debteurs et chascun d'eulx par prinse, vendue, expletacion de leurs biens et detencion de leurs corps, se mestier est et a ce sont obligiez ; et en cas d'opposicion, reffus ou delay, nostre main suffisamment garnie avant tout euvre des sommes contenues es lettres obligatoiresa faictes et passees soubz seaulx royaulx, adjourne les opposans, reffusans ou delayans a certain et competant jour ou jours, et aussi toutes les personnes qui par ledit suppliant ou sondit procureur pour lui a tout ce qu'il leur vouldroit demander et requerir en action personele et proceder en oultre et aler avant selon raison, en certiffiant sur tout ce que fait en auras suffisamment nosdiz conseillers. Ausquelz nous mandons et pour les causes dessusdictes commettons que aux parties, icelles oÿes, ilz facent bon et brief droit. Car ainsi etc. Non obstans quelzconques lettres d'estat etc. et tout comme ou premier debitis commun.

Charles etc. au premier huissier de nostre parlement ou des requestes ou autre nostre sergent qui sur ce sera requis, salut. A la supplicacion de nostre amé et feal conseiller et maistre des requestes de nostre hostel Tel, nous te mandons et commettons que Tel et Telz et Telz etc. tu adjournes vel sic : que toutes les personnes lesquelles ledit suppliant, son procureur ou porteur de ces presentes te requerra tu adjournes a certain et competant jour ou jours par devant noz amez et feaulx conseillers les gens tenans les requestes de nostre palais a Paris vel sic : les maistres des requestes de nostre hostel en leur auditoire establi a Poictiers, pour respondre audit suppliant ou a sondit procureur pour lui a tout ce qu'il leur vouldra demander et contre eulx et chascun d'eulx proposer et requerir en action personele, proceder et aler avant en oultre selon raison, en certiffiant suffisamment audit jour nosdiz conseillers de ce que fait en auras. Ausquelz nous mandons et, pour ce que icelui suppliant est si continuelment occuppé en nostre service que sanz pretermission d'icelui il ne pourroit aler plaidier par devant les juges ordinaires de ses parties adverses vel sic : desdiz dessus nommez ne les poursuir chascun en la jurisdicion ou il est demourant et que par devant nosdiz conseillers lesdictes parties fineront de meilleur conseil sanz faveur que ailleurs, commettons que a icelles parties oÿes facent bon et brief acomplissement de justice. Donné etc.

Charles etc., au premier etc. Nous te mandons et commettons que toutes les debtes bonnes et loyaulx etc. comme ou debitis commun jusques a celle clause ausquelz nous mandons ou l'en y adjouste que les parties demourans es païs de Touraine, d'Anjou et du Maine ilz facent proceder et aler avant par devant eulz de jour en jour en assise et dehors, en lieu toutesvoyes ou l'en puisse finer de conseil, sanz attendue d'assise, et les autres selon la coustume des païs et lieux ou elles seront demourans, et a icelles oÿes facent bon et brief droit. Non obstans usaige, stile, coustume de païs quant a attendue d'assise et quelzconques lettres d'estat, de grace, de respit ou autres, impetrees ou a impetrer par [fol. 5v] lesdiz debteurs ou aucun d'eulx etc. le surplus comme en la forme commune.

[1.11.a] ¶ Nota que le committimus precedent1 se fait plus communement devant les gens tenans les requestes ou palais que devant les maistres des requestes de l'ostel du roy2, et se donne bien pour autres que pour les serviteurs du roy, mesmement pour ceulx qui sont ordinaires en offices nobles es hostelz de la royne et des grans seigneurs du sang qui se tiennent a court.

[1.11.b] * Item nota ces motz fay les ramener et remettre par juge competant au premier estat et deu, car le sergent n'a pas congnoissance de cause et ne lui doit on pas mander que lui mesmes face la reparacion ne la reduction au premier estat ne aussi qu'il ordonne ne tauxe l'amende de l'infractiona de la sauvegarde.

[1.11.c] * Item nota ces motz en cas de nouvelleté 3, car se c'estoit en autre cas que de nouvelleté la chose contencieuse ne seroit pasb mise en la main du roy pendant l'opposicion.

[1.11.d] * Item nota ces autres motz en action personelle 4, car on n'a pas acoustumé de donner l'adjournement aux requestes de choses ou matieres reelles ou ypotheques.

[1.11.e] * Item quant on ne veult pas donner ce committimus general a aucun, pour ce que souvent on en abuse et en travaille l'en les povres gens, on le donne aucunes foiz jusques a certain nombre de personnes, nommees, aux requestes quant aux debtes, et au regard de la nouvelleté par devant les plus prouchains juges royaulx des choses contencieuses.

[1.11.f]  ¶ Item quant au debitis precedent en forme d'Anjou, il est pour les païs de Touraine, d'Anjou, de Poictou et du Maine, ad ce qu'on face proceder les debteurs de jour en jour sanz attendue d'assise, non obstant que la coustume du païs soit de proceder d'assise en assise et non pas de jour en jour.

Charles etc., a tous noz justiciers ou a leurs lieuxtenans, salut. A la supplicacion de Tel et dea sa femme, noz subgetz et justiciables sanz moyen, affermans eulx doubter de pluseurs personnes leurs hayneux et malveillans pour certaines vrayes presumpcions et conjectures, nous vous mandons et a chascun de vous, si comme a lui appartendra, que lesdiz supplians avecques leurs famille, droiz, choses, possessions et biens quelzconques vous prenez et mettez en et soubz nostre protection et sauvegarde especial, a la conservacion de leur droit tant seulement ; et les maintenez et gardez en toutes leurs justes possessions, droiz, usaiges, franchises, libertez et saisines esquelles vous les trouverez estre et leurs predecesseurs avoir esté paisiblement et d'ancienneté ; et les defendez ou faites defendre de toutes injures, griefs, violences, oppressions, molestacions, de force d'armes, de puissance de laiz2 et de toutes autres inquietacions et nouvelletez indeues ; lesquelles se vous trouvez estre ou avoir esté faictes ou prejudice de nostredicte sauvegarde et desdiz supplians, ramenez ou faites ramener et remettre tantost et sanz delay au premier estat et deu et faites pour ce faire a nous et ausdiz supplians amende convenable ; et des personnes dont ilz vous requerront avoir asseurement leur faites donner bon et loyal selon la coustume du païsb. Et ceste nostre presente sauvegarde signifiez et faites publier es lieux et aux personnes ou il appartendra et dont vous serez requis ; et en signe d'icelle, en cas d'eminent peril, mettez ou faites mettre et asseoir noz pennonceaulx3 et batons royaulx en et sur les maisons, granches, terres, bois, prez, vignes, possessions et biens quelzconques desdiz supplians, en faisant ou faisant faire inhibicion et defense de par nous sur certaines et grans peines a nous a appliquer a toutes les personnes qu'il appartendra et dont vous serez requis que ausdiz supplians, leur famille, droiz, choses, possessions et biens quelzconques ne meffacent ou facent meffaire en corps ne en biens en aucune maniere. Et pour les choses dessusdictes plus diligemment executer, deputez ausdiz supplians a leurs despens ung ou pluseurs de noz sergens, se requis en estes, lesquelz ne s'entremettent de chose qui requiere congnoissance de cause. Donné etc.

Charles etc., a tous noz justiciers ou a leurs lieuxtenans, salut. A la supplicacion de nostre amé Pierre Hutin2, prestre, chanoine de l'eglise collegial du Chasteau de Bourges3 et curé de l'eglise parrochial d'Oriac ou diocese de Thoulouse4, affermant lui doubter de pluseurs personnes ses hayneux et malveillans pour certaines vrayes presumptions et conjectures, nous vous mandons et a chascun de vous, si comme a lui appartendra, que ledit suppliant, lequel avecques sa famille, droiz, choses, possessions et biens quelzconques, tant patrimoniaulx comme ecclesiastiques, nous avons prins et mis et par ces presentes prenons et mettons en et soubz nostre protection et especial sauvegarde, a la conservacion de son droit tant seulement, vous maintenez et gardez en toutes ses justes possessions, droiz, usaiges etc. comme en la sauvegarde en forme commune, sans addicion ne diminucion de clause quelconque.

[2.3.a] ¶ Nota quea la sauvegarde pour ung officier royaulb, pour clers vivans clergemment, pour les femmes vefves et aussi pour enfans mineurs durant leur minorité et pour hermites se fait par suscipimus ainsi que la precedent, fors que on n'y met point ces motz tant patrimoniaulx comme ecclesiastiques ; non faitc on de celles des moynes, car ilz n'ont point de patrimoine.

Charles etc., a tous noz justiciers etc. A la supplicacion de Jehan Becon1, marchant publique frequantant foires et marchiez en plusieurs lieux de nostre royaume, estant par ce en nostre protection et especial garde et lequel d'abondant avecques ses femme, famille, droiz, choses, possessions et biens quelzconques nous y avons prins et mis et par ces presentes prenons et mettons, a la conservacion de son droit tant seulement, nous vous mandons et a chascun de vous, si comme a lui appartendra, que ledit suppliant vous maintenez et gardez en toutes ses justes possessions, droiz, usaiges etc. comme en la sauvegarde en forme commune, excepté que après celle clause Et pour les choses dessusdictes plus diligemment executer depputez etc., on met immediate devant le Donné ces deux clauses Pourveu toutesvoies que de ceste presente sauvegarde ledit suppliant ne se puisse aidier contre son seigneur en aucune maniere. Ces presentes aprés un an non vallables. Donné etc.

Charles etc., a tous noz justiciers etc. A la supplicacion de Macé Gobichot, sexagenaire, affermant lui doubter de pluseurs etc., nous vous mandons et a chascun de vous, si comme a lui appartendra, que ledit suppliant avec saa femme, famille, droiz, choses, possessions et biens quelzconques vous prenez et mettez en et soubz nostre protection et sauvegarde especial, a la conservacion de son droit tant seulement, et le maintenez et gardez etc.comme en la sauvegarde commune, excepté qu'on y adjouste immediate devant Donné : Pourveu que de nostre presente sauvegarde ledit suppliant ne se puisse aidier contre son seigneur en aucune maniere. Donné etc.

[2.5.a] bEt note bien qu'en y met pas la clause de Ces presentes aprés un an non vallables ; et aussi qu'elle se fait par prenez et mettez et non pas par suscipimus, nous prenons et mettons etc.

Charles etc., a tous noz justiciers etc. A la supplicacion de frere Jehan Parrier, religieux de l'abbaye Saint Victor lez Paris et prieur du prieuré d'Amponville1, membre de ladicte abbaye, affermant lui doubter etc., nous vous mandons et a chascun de vous, si comme a lui appartendra, que ledit suppliant, lequel avecques sa famille, droiz, choses, possessions et biens quelzconques nous avons prins et mis et par ces presentes prenons et mettons en et soubz nostre protection et sauvegarde especial, a la conservacion de son droit tant seulement, vous maintenez et gardez en toutes ses justes possessions, droiz, usaiges etc. jusques a Donné, devant lequel on met immediate ceste clause Pourveu toutesvoyes que de ceste sauvegarde ledit suppliant ne se puisse aidier contre son prelat en aucune maniere.

[2.6.a] ¶ Note bien que a un moyne on met qu'il ne se puisse aidier de la sauvegarde contre son prelat, c'est assavoir contre son diocesain ou son abbé qui a la correction de lui ; et a marchans et sexagenaires on met contre son seigneur, c'est assavoir contre son seigneur temporel soubz qui il demeure et de qui il tient aucuns heritages.

[2.6.b] * Item nota que le roy ne met pas en sa sauvegarde fors a la conservacion du droit tant seulement, et non pas pour faire mal ne desplaisir a autruy soubz umbre de sa sauvegarde.

[2.6.c] * Item, en la clause de donner l'asseurement, on y met ces motz selon la coustume du païs et aussi, en la clause d'apposer les pennonceaulx du roy, ces autres motz en cas de peril eminent.

[2.6.d] * Item nota que ce mot faites, quant il vient du verbe et qu'on en diroit en latin faciatis vel facite, il doit estre escript sanz c, mais quant il vient du participe et qu'on en diroit factus, -ta, -tum, comme « tele chose est faicte », on le doit escrire par c et par t.

Charles etc., a tous noz justiciers etc. A la supplicacion de Telz, affermans eulx doubter de Telz etc., leurs gens, aliez et [fol. 9v] complices, et qui desja leur ont fait pluseurs menaces et injures et s'efforcent de jour en jour de leur porter dommage en corps et en biens, nous vous mandons et a chascun de vous, si comme a lui appartendra, que vous, premierement informez desdictes menaces et injures, ledit suppliant avec sa femme, famille, droiz, choses, possessions et biens quelzconques prenez et mettez, quant aux dessus nommez, leurs gens, alliez et complices, en et soubz nostre protection et sauvegarde especial, a la conservacion de leur droit tant seulement, et lui faites donner bon et loïal asseurement des dessus nommez, leurs aliez et complices selon la coustume du païs, se ilz le requierent ; et nostre presente sauvegarde leur faites signifier, en faisant ou faisant faire inhibicion et defense de par nous aux dessus nommez, leurs gens, aliez et complices, sur certaines et grans peines a appliquer a nous, quea ausdiz supplians, leur famille, droiz, choses, possessions et biens quelzconques ne meffacent ou facent meffaire en aucune maniere. Et pour les choses dessusdictes plus diligemment executer etc. comme en la sauvegarde commune. Donné etc.

[2.7.a] ¶ Aucuns appellent ceste lettre precedent une sauvegarde a quatre clauses, pour ce que la clause de la maintenue n'y est point.

[2.7.b] * Aussi tele sauvegarde ne se donne que contre ceulx qui sont nommez dedanz la lettre et contre leurs aliez et complices.

[2.7.c] * Et encores mande l'en au juge qu'il soit informé des menaces b.

Charles etc., a tous ceulz qui ces presentes lettres verront, salut. Savoir faisons que, a la supplicacion de noz bien amez les religieux, prieur et couvent de tel prieuré, nous, a ce qu'ilz puissent faire seurement et plus devotement le divin service et prier Dieu pour feu nostre tres chier seigneur et pere, pour nous et pour les trespassez pour qui ilz sont tenus de prier, iceulz avecques leurs serviteurs, familliers, hommes et femmes de corps, s'aucuns en ont, et toutes choses, possessions et biens quelzconques, tant dudit prieuré comme autrement, estans en nostre royaume, avons prins et mis, prenons et mettonspar ces presentes en nostre protection et sauvegarde especial, a la conservacion de leurs droiz tant seulement, et leur avons [fol. 10] commis et depputé, commettons et deputons par ces presentes pour gardiens d'eulz et de leursdiz familliers et serviteurs, hommesa et femmes de corpsb, Telz et Telz, noz sergens.Ausquelz et a chascun d'eulz qui sur ce sera requis nous mandons et commettons que lesdiz supplians, leurs serviteurs, familliers, hommes et femmes de corps ilz maintiengnent et gardent en toutes leurs justes possessions, droiz, usaiges, franchises, libertez et saisines, esquelles ilz les trouveront estre et leurs predecesseurs avoir esté paisiblement et d'ancienneté ; et facent donner ausdiz supplians, a leurs serviteurs, familliers, hommes et femmes de corps bon et loyal asseurement, selon la coustume du païs, de toutes les personnes dont ilz et chascun d'eulz le requerront a avoir ; et les gardent et defendent de toutes injures, inquietacions et nouvelletez indeues, lesquelles, s'ilz treuvent estre ou avoir esté faictes contre ne ou prejudice de ceste presente sauvegarde et desdiz supplians, ilz les facent ramener et mettre par juge competant tantost et sanz delay au premier estat et deu et pour ce faire a nous et ausdiz supplians amende convenable2 ; et nostredicte sauvegarde publient et signifient es lieux et aux personnes ou il appartendra et dont ilz seront requis ; et en signe d'icelle, en cas d'eminent peril, ilz mettent et assieent noz pennonceaulx et batons royaulx en et sur les lieux, maisons, manoirs, terres, granches, possessions et autres biens quelzconques desdiz supplians, en faisant inhibicion et defense de par nous a tous ceulx qu'il appartendra et dont ilz seront requis, a certaines et grans peines a appliquer a nous, que ausdiz supplians, leurs serviteurs, familliers, hommes et femmes de corps dessusdiz, possessions et biens quelzconques ne meffacent ou facent meffaire en corps ne en biens en aucune maniere ; et se en cas de nouvelleté naist sur ce debat ou opposicion entre lesdiz supplians, leurs serviteurs, familliers, hommes et femmes de corps et aucuns de leurs adversaires pour raison des biens de ladicte eglise ou d'aucuns d'iceulx religieux, ledit debat et la chose contencieuse prise et mise en nostre main comme souveraine, et restablissement fait des choses prises et levees, attendu que par prevencion la congnoissance des cas de nouvelleté appartient a noz juges et officiers, adjournent les opposans ou faisans ledit debat par devant tel c nostre plus prouchain juge des parties et choses contencieuses, pour en quel bailliaged ou ressort d'icelui ledit prieuré est assiz et aussi toute ou la plus grant parties des terres et revenues d'icelui, pour dire les causes de [fol. 10v] leur opposicion ou debat, respondre, proceder et aler avant en oultre selon raison ; et avecques ce toutes les debtes bonnes et loyaulx, congneues ou prouvees par lettres, tesmoings, instrumens, confession de partie ou autres loyaulx enseignemens, qui leur apperront ausdiz supplians et a chascun d'eulx estre deues, ilz leur facent paier tantost et sanz delay e ou a leur certain commandement, en contraingnant a ce les debteurs et chascun d'eulx par prinse, vendue, explectacion f de leurs biens meubles et heritages, detencion et emprisonnement de leurs corps, se mestier est et a ce sont obligiez ; et en cas d'opposicion, reffuz ou delay, nostre main suffisamment garnie avant toute euvre des sommes contenues es lettres obligatoires g faictes et passees soubz seaulx royaulx, ils adjornent les opposans, refusans ou delayans a certain et competant jour ou jours par devant les juges ou leurs lieuxtenans ausquelz la congnoissance en appartendra, pour dire les causes de leur opposicion, reffuz ou delay, respondre, proceder et aler avant en oultre selon raison ; et de tout ce que fait auront lesdiz gardians et chacun d'eulx certiffient suffisamment audit jour ou jours ledit bailly et iceulx juges ou leurs lieuxtenans. Ausquelz nous mandons et audit tel juge pour les causes dessusdictes commettons, se mestier est, que aux parties, ycelles oÿes, sur les choses dessusdictes et leurs deppendences facent de jour en jour, en assise et dehors, bon et brief acomplissement de justice, non obstant coustume de païs quant a attendue d'assise. Et generalment lesdiz gardiens et chascun d'eulx facent et puissent faire pour lesdiz supplians, leurs serviteurs, familliers, hommes et femmes de corps toutes et chascunes les autres choses qui a office de gardien peuent et doivent competer et appartenir. Mandons et commandons par ces mesmes presentes a tous noz justiciers, officiers et subgetz que ausdiz gardiens et chascun d'eulx, en faisant leurdit office et les choses dessusdictes, obeïssent et entendent diligemment et leur prestent et donnent conseil, confort et aide, se mestier est et ilz en sont requis. Toutesvoyes nous ne voulons pas que lesdiz gardians ne aucun d'eulx s'entremettent de chose qui requiere congnoissance de cause. Ces presentes, quant aux debtes, aprés un an non vallables.En tesmoing de ce, nous avons fait mettre nostre seel a ces presentes. Donné etc.

[2.8.a] ¶ Nota que, quant la garde a double queue dessus escripte se fait pour ung evesque ou arcevesque, ou pour ung abbé sanz ses religieux, on doit nommer son nom dedanz la lettre en disant ainsi : A la supplicacion de nostre amé et feal Jehan ou Guillaume, evesque ou abbé de tel lieu, et n'est pas besoing de mettre le seurnom ; mais quant c'est pour ung chappitre ou pour ung couvent en general, il suffist de dire les doyen et chappitre ou les religieux, abbé et couvent de tel lieu, sanz les nommer autrement ; mais on doit nommer les sergens ou autres qui sont depputez gardians et conservateurs afin que, quant ilz sont mors, ceulx qui prennent la garde la renouvellent, combien que aucunes foiz d'une grace especiale on deppute bien en gardians bailliz, prevostz ou autres officiers et les sergens de leurs baillages ou prevostez sanz les nommer.

[2.8.b] * Et note bien aussi que, quant la garde contendra debitis avecques la sauvegarde en cas de nouvelleté, qu'il y ait ceste clause : Ces presentes, quant aux debtes, aprés un an non vallables, car elle y doit estre immediate devant En tesmoing.

[2.8.c] ¶ Item nota que les gardiens doivent estre officiers royaulx et non autres, et en peut l'en prendre de deux ou de trois bailliages selon les païs ou l'en a a faire de la garde ; et communement on donne jusques a dix ou douze gardians.

[2.8.d] * Item nota que aux gardians, sinon qu'ilz fussent justiciers, on ne donne pas auctorité de ramener ce qui auroit esté fait ou prejudice de la sauvegarde, ne de donner l'asseurement, ne faire faire l'amende, mais on leur mande qu'ilz le facent faire par juge competant. Et de ce verrez plus a plain ou nota de la sauvegarde en forme commune.

Charles etc., a tel bailly etc. Jehan Barengier nous a exposé comme pour la coustume du païs il lui loyse soy advoer nostre bourgoys, parmy lui soubzmettant a paier les droiz et reddevances qui nous appartiennent et autres services sur ce introduiz, et il ait voulenté de devenir nostre bourgois, faire et paier ce qu'il appartient en tel cas. Nous vous mandons que oudit cas icelui recevez en nostredicte bourgoisie et l'enregistrez ainsi qu'il appartendra, en le faisant joïr et user des privileges eta franchises dont usent noz autres bourgois. Pourveu toutesvoyes que ce ne tourne ou prejudice du droit d'autruy. Et s'aucun s'opposoit au contraire, faites en ceste partie, appellez nostre procureur a la conservacion de nostre droit et autres qui seront a appeller, aux parties, ycelles oÿes, bon et brief acomplissement de justice. Donné etc.

Charles etc., a tous les justiciers de nostre royaume ou a leurs lieuxtenans, salut. A la supplicacion de Tel, affermant lui avoir perdu la greigneur partie de ses biens, tant par le fait et occasion des guerres et gens d'armes qui depuis tel temps ont esté en ce royaume et mesmement en tel lieu, ou ilz lui ont mengié, gasté et fourragé tous ses blez, foins, avoines et autres choses, comme pour la sterilité du temps et autres dures fortunes qui lui sont survenues, et pour ce quant a present il ne pourroit faire satisfacion ne paiement a ses creanciers, ausquelz il est tenu et obligié en pluseurs et grans sommes de deniers et autres choses, sanz faire vile et miserable distraciona de ses biens, nous a icelui suppliant ou cas dessusdit avons donné et octroyé, donnons et octroyons de grace especial par ces presentes terme, respit et delay de ses debtes paier a quelzconques personnes ses creanciers, puissans d'attendre2, jusques a un an a compter de la date de ces presentes, mais que autres foiz il n'ait eu de nous semblable grace. Si vous mandons et a chascun de vous, si comme a lui appartendra, que, receu caucion dudit suppliant tele comme il pourra sur ce donner, vous icelui suppliant, ses pleiges ou autres pour lui obligiez ne contraignez ne faites ou souffrez estre contrains en corps ne en biens a faire a sesdiz creanciers autre solucion ou paiement que dessus est dit, mais de nostre presente grace, terme, respit et delay les faites, souffrez et laissiez joïr et user paisiblement ledit temps durant. Et se son corps ou aucuns de ses biens ou de sesdiz pleiges ou d'autres pour lui obligiez sont ou estoient pour ce prins, saisiz, arrestez ou empeschiez, les lui mettez ou faites mettre tantost et sanz delay a plaine delivrance.Non obstans quelzconques obligacions ou renunciacions sur ce faictes et passees par foy et serement, pourveu qu'il en ait sur ce dispensacion de son prelat ou d'autre aiant povoir a ce, et lettres subreptices a ce contrairesb, noz debtes et celles des foires de Champaigne et de Brie exceptees tant seulement. Donné etc.

Charles etc., a tous noz justiciers ou a leurs lieuxtenans, salut. Se, appellez ceulz qui feront a appeller, il vous appert que la greigneur partie des creanciers de Tel, demourant etc., en nombre de personnes et en sommes de debtes se consente sanz fraude a lui donner terme, respit et dilacion de ses debtes paier jusques au terme de cinq ans pour eschever la vile et miserable cession de ses biens, nous vous mandons et a chascun de vous, si comme a lui appartendra, que la mendre partie de sesdiz creanciers vous, eu regart a ce que dit est, contraingnez ou faites contraindre a donner audit Tel et a ses pleiges semblable terme et respit desdiz cinq ans ; et se son corps ou aucuns de ses biens meubles ou heritages ou de ses pleiges sont ou estoient pour ce prins, saisiz, arrestez ou empeschiez, mettez les ou faites mettre a plaine delivrance. Non obstans quelzconques obligacions ou renunciacions sur ce faictes par foy et serement, pourveu que sur ce il ait dispensacion de son prelat ou d'autre aiant povoir a ce, et lettres subreptices a ce contraires, noz debtes et celles des foires de Champaigne et de Brie exceptees tant seulementa. Donné etc.

Charles etc., au bailli de Chartres ou a son lieutenant, salut. Oÿe avons l'umble supplicacion des religieux, prieur et convent du prieuré de N. etc., contenant que, tant pour le fait de noz guerres, sterilitez de temps et autres pestilences qui ont esté et sont seurvenues ou temps passé ou païs comme pour ce que ledit prieuré par aucuns predecesseurs du prieur qui est a present a esté petitement gouverné, les rentes et revenues d'icelui sont grandement diminuees et amendries, leurs heritages et maisons demourees en desert et ruine et ledit prieuré cheu et encouru en si grans debtes que lesdiz religieux ne le pourroient de present acquiter sanz faire miserable distracion des biens dudit prieuré, si comme ilz dient, requerans sur ce nostre provision. Pour quoy nous, ces choses considerees, voulons et octroyons ausdiz religieux de grace especial par ces presentes que jusques a trois ans prouchain venans a compter de la date d'icelles les rentes, revenues et emolumens quelzconques appartenans audit prieuré soient mises et divisees en trois parties et converties l'une au vivre, gouvernement et necessité desdiz religieux, l'autre pour faire les labourages, soustenir et reparer les maisons et edifices dudit prieuré, et l'autre tierce partie ou paiement des debtes d'icelui jusques a plaine satisfacion d'iceulx. Si vous mandons et, pour ce que ledit prieuré et la plus grant partie des heritages, rentes et revenues d'icelui [fol. 18] sont assis en vostre bailliage et aucune partie dehors es lieux voisins, commettons que vous mettez ou faites mettre tout le temporel, rentes et revenues dudit prieuré en nostre main ; et pour iceulx gouverner, lever, recevoir et distribuer par la maniere que dit est commettez et deputez de par nous aucune suffisante personne, aux mendres fraiz que faire et estre pourra, qui en puisse et saiche rendre bon et loyal compte la ou il appartendra ; et durant ledit terme de trois ans ne souffrez lesdiz religieux, leurs pleiges ne autres pour eulz obligiez aucunement contraindre a paier leursdictes debtes ; et ce que vous trouverez estre fait au contraire mettez ou faites mettre tantost et sanz delay au premier estat et deu. Non obstans quelzconques lettres surreptices impetrees ou a impetrer a ce contraires. Mandons et commandons a tous noz justiciers, officiers et subgetz que a vous et a voz commis et deputez en ceste partie obeïssent et entendent diligemment. Donné etc.

Charles etc., a noz amez et feaulx gens de noz comptes et tresoriers, seneschal, procureur, receveur et clerc de fiefz en nostre païs de Poictou ou a leurs lieuxtenans, salut et dilection. Savoir vous faisons que nostre amé Tel, demourant a Saint Maixant1, nous a aujourd'uy fait pour lui et ses parsonniers les foy et hommage que tenu nous estoit faire comme mari de Tele, de son hostel, terres et appartenance de tel lieu, tenuz neuement de nous a cause de nostre chastel et chastellenie de Saint Maixant2, ausquelz foy et hommage nous l'avons receu, sauf nostre droit et l'autrui. Si vous mandons et a chascun de vous, si comme a lui appartendra, que pour cause dudit hommage non fait vous ne faites ou donnez ne souffrez estre fait ou donné aucun empeschement audit Tel  ; ainçois, se sondit hostel et appartenance ou autres de ses biens sont ou estoient pour ce prins ou mis en nostre main, mettez les ou faites mettre sanz delay a plaine delivrance, pourveu que ledit Tel baille par escript dedanz temps deu son denombrement et adveu et qu'il face et paie les autres droiz et devoirs, s'aucuns en sont pour ce deuz. Donné etc.

[4.1.a] ¶ Nota que, quant l'en fait la lettre de l'ommage, il fault nommer dedanz le fief ou la chose de quoy on doit l'ommage et ne suffist pas d'y mettre en general de tout ce qu'il tient du roy, sinon du moins qu'on y nommast le fief particulier et aprés la generalité.

[4.1.b] ¶ Item nota que par deffault d'ommage on peut lever a son proufit les revenues et emolumens des fiefs ou choses empeschees tenues par hommage, et ainsi est bon de le faire le plus tost qu'on peut ; mais par deffault de denombrement non baillié on ne peut que empeschier seulement.

[4.1.c] ¶ Item nota que la lettre de l'ommage, quant elle est seellee, ne doit point estre baillee a la partie, mais doit estre portee en la chambre des comptes et la doit estre retenue jusques on ait baillié le [fol. 20v] denombrement.

[4.1.d] ¶ Item nota que qui fait l'ommage au roy on a acoustumé de paier aux varlez de porte du roy, pour leur droit, selon la qualité de la personne ou la valeur du fief.

[4.1.e] ¶ Item nota qu'on doit mettre en la lettre de l'ommage a cause de quel chastel ou de quelle seigneurie est tenue du roy la chose dont on fait l'ommage.

[4.1.f] ¶ Item nota que en pou de païs fors en Poictou le roy a clers de fiefz ; et ainsi la lettre en autres païs se adrece a la chambre des comptes, au bailly ou seneschal, au receveur ou viconte et au procureur.

[4.1.g] ¶ Item nota ces motz sauf nostre droit et l'autruy, car il y doit tousjours estre miz ; mais on n'y met pas souventes foiz le pourveu qui est en la lettre cy dessus escripte, et s'en attent on aux officiers de faire leur devoir au regart du seurplus qu'on doit oultre l'ommage.

[4.1.h] ¶ Item note bien ces motz se son hostel et appartenances estoient pour ce prins, car ce mot  pour ce n'emporte pas qu'on ne les mette a delivrance, sinon au regart de l'empeschement qui y seroit mis par deffault d'ommage seulement, et aussi il ne s'entent pas par ce qu'on lui doie rendre ce qui en auroit esté levé3.

[4.1.i]  ¶ Item nota que ou païs de Normandie le roy n'a autres receveurs ordinaires que les vicontes, car ilz sont justiciers et receveurs ordinaires ; souffist en l'adrece.

Charles, par la grace de Dieu roy de France, a noz amez et feaulx les gens tenans et qui tendront nostre parlement, les gens de noz comptes et tresoriers a Paris et a tel seneschal, vicaire et juge de tel lieu ou a leurs lieuxtenans, salut et dilection. Savoir vous faisons que nostre amé et feal Tel, evesque de tel lieu, nous a aujourd'uy fait le serement de feaulté qu'il nous estoit tenu faire a cause de la temporalité dudit eveschié, auquel serement nous l'avons receu, sauf nostre droit et l'autruy. Si vous mandons et a chascun de vous, si comme a lui appartendra, [fol. 21] que pour cause dudit serement de feaulté a nous non fait vous ne donnez ne souffrez estre miz ou donné audit evesque aucun empeschement ; mais, se la temporalité dudit eveschié estoit pour ce prinse, arrestee ou misea en nostre main, mettez la ou faites mettre tantost et sanz delay a plaine delivrance audit evesque. Non obstans quelzconques ordonnances, mandemens ou defenses a ce contraires. Donné etc.

Charles etc., a noz amez et feaulx gens de noz comptes et tresoriers a Paris, a tel bailly et au receveur de La Rochelle ou a leurs lieuxtenans ou commis, salut et dilection. Receue l'umble supplicacion de Tel, contenant commea a cause de ses terres et fiefz de tel lieu etc. il soit tenu de nous faire foy et hommage a cause de nostre chastel de tel lieu et de nous bailler le denombrement en tel cas acoustumé, laquelle chose obstans telz empeschemens etc. il n'a peu ne peut faire, savoir vous faisons que nous, ce consideré et pour certaines autres causes qui a ce nous ont meu et meuvent et aussi pour ce que nostre Tel est nouvellement venu en aage par le trespas de Tel, par quoy il n'a peu ne pourroit savoir la verité de ce dont il est tenu a nous bailler denombrement et aussi ne pourroit venir parb devers nousc pour nous faire lesdiz foy et hommage, obstant la doubte et perilz des chemins qui sont environnez de gens d'armes, si comme il dit, a icelui suppliantavons donné et octroyé, donnons et octroyons de grace especial par ces presentes terme, respit et souffrance de nous faire lesdiz foy et hommage et bailler par escript son denombrement ou adveu jusques a un an a compter de la date de ces presentes, parmy ce que ce pendant il paiera les devoirs qui pour ce nous pourroient estre deuz et fera es mains de vous, bailly, ou de vostre lieutenant le serement de feaulté en tel cas acoustumé, se fait et paié ne les a. Si vous mandons et a chascun de vous, si comme a lui appartendra, que de nostre presente grace, souffrance et respit vous faites, souffrez et laissiez joïr et user ledit suppliant ledit temps durant, sanz lui donner ne souffrir estre donné ce pendant aucun destourbier, arrest ou empeschement au contraire en quelque maniere que ce soit ; et se lesdiz fiefz etc. ou autres choses du sien estoient prinses, saisies ou mises en nostre main pour cause desdiz foy et hommage a nous non faiz et denombrement et adveu non baillié, lui mettez ou faites mettre tantost et sanz delay a plaine delivrance. Non obstant que autres foiz il ait eu de nous semblable grace et respit et quelzconques ordonnances, mandemens ou defenses a ce contraires. Donné etc.

[4.4.a]  ¶ Nota que, quant on n'a point fait hommage et le seigneur empesche par deffault d'omme, ce qu'il lieve est sien s'il veult ; mais quant l'ommage est fait, on ne lieve pas par deffault de denombrement non baillié, [fol. 22] bien le met on en sa main quousque1.

[4.4.b] * ¶ Item nota que celle provision de paier les devoirs et de faire le serement de feaulté si doit tousjours estre mise es lettres de respit et de faire foy et hommage ; mais quant on a fait l'ommage, il ne s'i met que l'une, c'est assavoir celle de paier les devoirs, car l'ommage emporte le serement.

[4.4.c] * ¶ Item nota qu'elle se doit adrecer a la chambre des comptes, au bailly ou seneschal et au receveur ou viconte ; qui veult on y peut adjouster  et a tous autres justiciers etc.

Charles etc., a noz amez et feaulx gens de noz comptes et a noz seneschal, procureur et receveur ordinaire en Auvergne ou a leurs lieuxtenans, salut et dilection. Oÿe l'umble supplicacion de nostre amé Tel, contenant que puis nagaires il nous a faiz les foy et hommage que tenua nous estoit faire a cause de son hostel, terre et seigneurie de tel lieu et de leur appartenance, a lui nouvellement escheuz par le trespas de feu Tel son pere, mais, obstant la continuele occuppacion qu'il a en nostre service, tele qu'il ne peut vacquer a savoir et enquerir la vraye valeur et declaracion desdiz hostel etc. et aussi obstant ce que les pluseurs qui en tiennent de lui en fief ne lui ont pas encores baillié par escript le denombrement ou adveu desdictes choses ce qu'ilz en tiennent, icelui suppliant ne nous sauroit ne pourroit encores bailler par escript le denombrement ou adveu desdictes choses, si comme il dit, requerant sur ce nostre provision, nous, ce consideré et autres causes a ce nous mouvans, audit suppliant avons donné et octroyé, donnons et octroyons de grace especial par ces presentes terme, souffrance et delay de nous bailler ledit denombrement ou adveu jusques a un an a compter du jour de la date de ces presentes, pourveu toutesvoyes qu'il face et paie les autres droiz et devoirs, se aucuns en sont pour ce deuz et faiz et paiez ne les a. Si vous mandons et enjoingnons et a chascun de vous, si comme a lui appartendra, que ledit suppliant vous faites, souffrez et laissiez joïr et user paisiblement et plainement de [fol. 22v] nostre presente grace, souffrance et delay, en lui mettant ou faisant mettre a plaine delivrance sondit hostel, terres et appartenance, se pour ce estoient prins, empeschiez ou miz en nostre main. Car ainsi nous plaist que soit fait. Non obstans quelzconques ordonnances, mandemens ou defenses a ce contraires. Donné etc.

[4.5.a] * ¶ Nota que, comme devant est dit, la lettre de l'ommage doit estre portee en la chambre des comptes et y doit demourer jusques on y ait baillié son denombrement et les lettres de respit de le baillier doivent estre expediees par la chambre des comptes et y certiffie l'en au dos des lettres de respit que l'ommage est fait et seellé et qu'il est retenu ; et qui veult baillier son denombrement, il en fault faire deux tous pareilz, dont l'un est retenu en la chambre des comptes, l'autre est baillié a la partie avecques son hommage et l'expedicion de la chambre ; et se le baillant est baron, chevalier ou autre qui ait armes congneues, on reçoit bien son denombrement soubz son seel. Et s'il est autre, il le doit faire soubz seel autentique.

Charles, par la grace de Dieu roy de France, a noz amez et feaulx gens de noz comptes, au bailly des exempcions et ressors de Touraine, d'Anjou et du Maine et a tous noz autres justiciers, commissaires et officiers ou a leurs lieuxtenans, salut et dilection. La supplication de noz bien amez les chanoines et chappitre de l'eglise collegial de tel lieu avons receue, contenant que ilz ont et possident pluseurs rentes et revenues, lesquelles ne sont encores admorties par nous, et pour ce eust despieça esté fait commandement ausdiz supplians qu'ilz les feissent admortir et en baillassent la declaracion en nostre chambre des comptes ou icelles meissent hors de leurs mains dedanz certain temps lors ensuivant ; en obtemperant auquel commandement lesdiz supplians eussent baillié la declaration en nostredicte chambre des [fol. 23] comptes et sur ce obtenu de nous pluseurs delaiz et souffrances de non admortir lesdictes rentes et revenues, esperans que pendant ce temps ilz peussent assembler la finance pour ce necessaire ; mais, tant par le siege qui fut mis etc. comme par les guerres, divisions et chevauchees de gens d'armes qui ont depuis esté et encores sont en nostre royaume et mesmement es païs ou leurs terres et revenues sont assises, lesdiz supplians et leurs hommes et subgez ont esté et sont tant grevez et dommagiez que a peine ont ilz de quoy vivre et ne pourroient faire ladicte finance ne admortir lesdictes rentes et revenues, par quoy noz gens et officiers les ont arrestees ou empeschees et les veulent applicquer a nous, se nostre grace n'est sur ce eslargie a iceulx supplians, si comme ilz dient, requerant ycelle. Pour quoy nous, consideré ce que dit est et que chascun jour le service divin est fait et celebré notablement en ladicte eglise de tel lieu par lesdiz supplians, lesquelz ne le pourroient continuer ne avoir leur vie en le faisant, sinon des rentes et revenues de ladicte eglise pour ce ordonnez, a iceulz supplians en faveur de ce que dit est avons donné et octroyé, donnons et octroyons par ces presentes de grace especial terme, respit et delay de faire admortir lesdictes rentes et revenues de cy a deux ans prouchain venans, sanz ce que pendant ledit temps ilz soient tenus de les mettre hors de leurs mains ne pour non estre admorties paier a nous aucune finance. Si vous mandons et a chascun de vous, si comme a lui appartendra, que lesdiz supplians vous faites, souffrez et laissiez joïr et user paisiblement de noz presentes grace, respit et delay ledit temps durant, sanz ce pendant leur faire ou donner, ne souffrir estre fait ou donné aucun arrest ou empeschement en leursdictes terres, rentes et revenues ne en leurs autres biens ou choses quelzconques ; ainçoiz icelles rentes et revenues qui sont arrestees et mises en nostre main pour la cause dessusdicte, comme dit est, mettez ou faites mettre sanz delay a plaine delivrance. Car ainsi etc. Non obstant que sur ce lesdiz supplians aient autres foiz obtenu pluseurs respiz de nous ou de nostre court, comme dessus est dit, et quelzconques ordonnances, mandemens etc. Donné etc.

[4.6.a] * ¶ Nota que ce respit de admortir se doit adrecer a la chambre des comptes, sinon que, pour pitié et afin d'eschever despenses quant [fol. 23v] c'est pour pou de chose et pour povres gens, on est content qu'il s'adrece au bailly ou seneschal.

[4.6.b] * ¶ Item j'ay veu qu'on y mettoit pourveu que lesdictes choses non admorties dont ilz se vouldront aidier de ces presentes ilz baillent par declaracion a nostre receveur ordinaire oudit balliage dedenz tel temps de deux ou trois moys.

Charles, duc d'Orleans et de Valoys, conte de Bloys et de Beaumont et seigneur de Coucy1, au gouverneur de nostre duchié d'Orleans ou a son lieutenant, a noz procureur et receveur ou commis a nostre recepte ilec ou a leurs lieuxtenans et substituz et autres noz officiers a Chastel Regnart2, salut. Comme nagaires par noz autres lettres nous ayons octroyé de grace especial a nostre bien amé maistre Jehan Le Picart, secretaire de mon seigneur le roy et de mon seigneur le daulphin regent3 , terme, respit et souffrance jusques a un an a compter de la date d'icelles de nous faire les foy et hommage que tenu nous estoit faire pour raison de sa terre de Varennes, en la parroisse de Saint Germain lez Gy les Nonnains4, a lui venant et appartenant, si comme il dit, par certain transport que lui en avoit fait feu Linon Barroise, a qui elle estoit advenue et escheue par le deces de Jehanne, jadiz femme de feu maistre Nicolas de Monclenon5, suer de ladicte Linon, ladicte terre mouvant et tenue de nous en fief a cause du lieu de La Louvatiere6 lez Chasteau Renart, qui jadiz fut a feu messirea Pierre de Menou7, et lequel lieu nous appartient a present, et pour ce que en nosdictes lettres de souffrance est contenu que ledit maistre Jehan nous paiera les devoirs qui pour ce nous appartiennent, lesquelz il n'a pas paiez, vous ou aucuns de vous avez pour occasion de ce fait arrester et empescher sadicte terre ou autres de ses biens, si comme il dit, nous requerant nostre grace et provision sur ce. Pour quoy nous, ayans regart et consideracion aux services et plaisirs que nous a faiz icelui maistre Jehan Picart et qu'il est continuelment occuppé ou service de mon seigneur le regent, a icelui maistre Jehan avons par deliberacionb des gens de nostre conseil donné et octroyé, donnons [fol. 24] et octroyons de grace especial par ces presentes terme et delay de nous paier le rachat ou quint denier et tous autres devoirs en quoy il pourroit estre tenu envers nous pour raison de sadicte terre de Varennes jusques a nostre delivrance et retour de ce royaume. Si vous mandons et a chascun de vous, si comme a lui appartendra, que de nostre presente grace, terme et delay vous faites, souffrez et laissiez ledit maistre Jehan user paisiblement, sanz lui faire ou donner ne souffrir estre fait ou donné aucun destourbier ou empeschement au contraire ; et se par deffault du paiement dudit rachat ou quint denier et autres devoirs dessusdiz sadicte terre de Varennes ou autres choses du sien estoient de par nous saisies, arrestees ou empeschees, mettez les ou faites mettre sanz delay a plaine delivrance. Non obstant la provision contenue en nosdictes lettres de souffrance de nous paier par icelui maistre Jehan les devoirs dessusdiz et ordonnances, mandemens etc. Donné etc.

Charles etc., au premier etc. Comme Tel ou sona procureur pour lui se die deuement avoir appellé a nous ou a nostre court de parlement a Poictiers de certainnes sentence, ordonnance, appointement et autres exploiz contre lui fais et donnez par le prevost de tel lieu ou son lieutenant au prouffit, requeste ou instance de Tel ou autrement, comme de nulle ou nulz et, se aucune ou aucuns sont ou estoient, comme de faulse et mauvaise, faulx et mauvais, nous te mandons et commettons par ces presentes que ledit prevost ou son lieutenant tu adjournes a certain et competant jour ordinaire ou extraordinaire de nostre prouchain parlement advenir, vel sic : aux jours ordinaires de tele seneschaucié ou de tel bailliage de nostre present parlement non obstant qu'il siee, vel sic : de nostre prouchain parlement a venir, non obstant que par avanture les parties ne soient pas desdiz jours, pour soustenirb et defendre ladicte sentence, ordonnance, appointement et autres griefz, iceulz veoir adnuller, se mestier est, et sinon proceder et aler avant en ladicte cause d'appel comme il appartendra par raison ; et intime ou fay savoir audit Tel et autres parties adverses, s'aucunes en y a, que ilz soient ausdiz jour ou jours, s'ilz cuident que bon soit et que la chose leur touche ou appartiengne en aucune maniere, en faisans inhibicion et defense de par nous audit prevost ou a sondit lieutenant et a partie adverse et autres qu'il appartendra que pendant ladicte cause d'appel contre ne ou prejudice d'icelle ne dudit appellant ilz ne attemptent ou innovent ne facent ou seuffrent aucune chose estre faicte, attemptee ou innovee en quelque maniere que ce soit ; ainçois, se faicte ou attemptee estoit au contraire, qu'ilz la reparent ou facent reparer et remettre sanz delay au premier estat et deu et toy mesmes en leur deffault la fay reparer par juge competant ; et desdiz adjornemens, intimation et autres exploiz que faiz auras en ceste partie certiffie souffisamment audit jour noz amez et feaulx etc. qui tendront etc. Ausquelz etc. Donné etc.

[5.1.a] ¶ Nota que en parlement on a trois mois de terme a relever et executer [fol. 27v] son adjornement en cas d'appel, et aux generaulx sur le fait de la justice des aides on n'a que un mois.

[5.1.b] * Item on doit tousjours mettre en la lettre de qui on appelle et a quel prouffit ou instance on a fait le grief ; et comme il est dit cy aprés en l'adjournement de droit escript, on adjourne en païs coustumier celui qui a fait le grief et intime l'en la partie.

[5.1.c] * Item quant on appelle [durant ung parlement] c, on peut relever son adjournement au parlement a venir qui veult ; et qui relieve au present parlementd on doit mettre en la lettre non obstant que ledit parlement siee et que par avanture les parties ne soient pas des jours dont l'en plaidera lors.

[5.1.d] * ¶ Item note bien qu'on ne mande pas au sergent qu'il repare lui mesmes les attemptaz ou les choses faictes depuis l'appel, mais qu'il les face reparer par juge competant, car le sergent ne doit point entreprendre congnoissance de cause.

[5.1.e] * Item nota pour regle generale que a la court de parlement le roy ne use jamais de ce mot commettons, ainze seulement de ce mot mandons, et aucunes foiz on dit et commandons  ; et se le notaire treuve en lettre ce mot commettons a la court, en general il le doit oster car mes seigneurs de la court sont juges souverains et non pas commissaires. Toutesfoiz, quant lettres se adrecent nommeement a aucuns de la court et particulierement, on leur mande et commect et use l'en de ce mot commettons.

[5.1.f] * Item nota que qui appelle d'un bailly, d'un seneschal, du prevost de Paris ou d'autre notable officier, la lettre s'en fait autrement que dessus.

[5.1.g] Item aussi de ceulz qui tiennent en parrie, comme verras cy aprés.

Charles etc., au bailly de Saint Pere le Moustier ou a son lieutenant, salut. Comme nostre amé et feal chancelier, l'evesque de Clermont1, ou son procureur pour lui, se die deuement avoir appellé a nous ou a nostre court de parlement de certaine sentence, jugement ou appointement et autres tors et griefz par vous faiz et donnez, et se le grief est fait par aucun comme commissaire du bailly ou de seneschal, on le doit mettre en disant ainsi :  de certaine execucion, contrainte, emprisonnement et autres tors et grief par vous ou par Tel, soy disant vostre commissaire en ceste partie, contre ledit appellant et en son prejudice a la requeste, prouffit, pourchaz ou instance de Jehan de La Vermie2 ou autrement, comme de nulle ou nulz et, s'aucune ou aucuns sont ou estoient, comme de faulse et mauvaise, faulx et mauvais, nous vous adjournons es jours ordinaires de vostre bailliage de nostre prouchain parlement, et s'on a appellé de chose faicte par son commissaire, on y doit mettre ceste clause :  et vous enjoingnons que vous ayez avec vous ausdiz jours ledit soy disant vostre commissaire, pour soustenir et defendre lesdictes sentence, jugement, appointement, vel sic : lesdiz execucion, contrainte, emprisonnement et autres tors et griefs, les veoir adnuller, reparer ou corriger, proceder et aler avant avecques ledit appellant en et sur ladicte cause d'appel et en oultre selon raison, en intimant ou faisant savoir a partie adverse qu'elle soit ausdiz jours, se elle cuide que bon soit et que la chose lui touche ou appartiengne en aucune maniere ; et vous defendons et aussi a ladicte partie adverse que pendant ladicte cause d'appel vous ne attemptez ou innovez aucune chose contre ne ou prejudice d'icelle ne dudit appellant en quelque maniere que ce soit ; ainçois, se faicte ou attemptee estoit au contraire, la remenez et mettez ou faites ramener et remettre sanz delay au premier estat et deu. Et neantmoins, pour ce que depuis ledict appel on dit pluseurs attemptaz et excés avoir esté fais et commis ou comtempt d'icelui appel et en irreverence de nostredicte court, nous mandons et commettons au premier nostre sergent sur ce requis que, appellé avecques lui un notaire ou tabellion royal, il se informe bien et deuement de et sur lesdiz attemptaz et excés ; et ceulx que par informacion, fame publique ou autrement deuement il en trouvera coulpables ou vehementement souspeçonnez il adjourne a comparoir [fol. 28v] selon l'exigence du cas en nostredicte court ausdiz jours ou a autre certain et competant jour ordinaire ou extraordinaire dudit parlement, pour respondre a nostre procureur general a telz fins qu'il vouldra eslire et audit appellant civilement sur les choses dessusdictes, leurs circonstances et deppendences et proceder en oultre selon raison ; et en oultre, combien que ledit appellant soit encores dedanz les trois mois sur ce introduiz, neantmoins, obstant la longue distance de païs qui est jusques audit Saint Pere le Moustier et autre part ou il a a faire et aussi les perilz et dangiers qui sont sur les chemins, il doubte que il ne puisse relever sondit appel ne faire executer ces presentes dedanz lesdiz trois mois, par quoy il pourroit decheoir de sondit appel, se nostre grace ne lui estoit sur ce eslargie, si comme il dit, requerant icelle. Nous audit appellant avons oudit cas octroyé et octroyons de grace especial par ces presentes que dedanz huit jours aprés lesdiz trois mois passez il puist relever et faire executer sondit appel et que ce que pendant lesdiz huit jours en aura esté fait et executé lui soit d'autel effect et valeur comme se fait estoit dedanz lesdiz trois mois sur ce introduiz. Non obstant la rigueur et stille de nostredicte court a ce contraire. De la reception de ces presentes, intimation, adjournement et autres qui faictes seront en ceste partie certiffiez deuement noz amez et feaulx conseillers les gens tenans et qui tendront ledit parlement et ladicte information leur soit envoiee feablement close et seellee. Ausquelz nous mandons que aux parties, icelles oÿes, facent bon et brief droit, en faisant et souffrant ledit appellant joïr et user paisiblement de nostredicte grace et octroy. Donné etc.

[5.2.a] ¶ Nota que quant on a appellé d'un seneschal, d'un bailli ou gouverneur royal, du prevost de Paris ou de leurs lieuxtenans, les lettres de l'adjournement en cas d'appel se doivent adrecer a eulx et non pas au sergent, et les adjourne le roy par ses lettres comme il est contenu en la lettre precedent. Toutesvoyes ce n'est que en païs coustumier, car en païs gouverné par droit escript, quant on appelle d'un bailly ou d'un seneschal, on en adrece la lettre d'adjournement a un sergent, comme l'en feroit d'un petit juge ; la cause si est car ilz ne sont pas adjournez mais intimez. Toutesvoies quant il y a attemptaz, communement on mande au juge ou officier royal les reparer et soy en informer et adjourner les coulpables etc.

[5.2.b] [fol. 29] [Item que en telles lettres d'ajournement ou le roy]a adjourne le juge, doit estre mis le jour de l'adjournement, et ne suffist pas de dire simplement nous vous adjournons a certain et competant jour ordinaire ou extraordinaire, mais fault dire nommeement nous vous adjournons au premier ou tel autre jour de tel mois, ou : aux jours ordinaires de tele seneschaucié ou bailliage.

[5.2.c] ¶ Item nota que, quant aucun a appellé en parlement et sa partie adverse le fait anticiper dedanz les III mois, c'est assavoir le fait adjourner a un jour plus brief par avanture qu'il n'auroit entencion de relever, il n'est plus besoing a l'appellant de impetrer adjournement en cas d'appel ne de le faire executer, et fault qu'il compare au jour a quoy il est anticipé, et suffira ; car l'appellé fait en ce cas la diligence de l'appellant.

[5.2.d] ¶ Item nota que, quant en la lettre d'adjournement en cas d'appel est contenu en general qu'il y a attemptaz, sanz declarer quelz, on ne doit pas mettre en la lettre qu'on adjourne les coulpables des attemptaz a comparoir en personne, mais seulement selon l'exigence du cas et s'en attendre a la discrecion de l'executeur ; et quant les attemptaz sont contenus en la lettre et on voit qu'il y ait cause, on y peut bien mettre adjournement personnel, voire aucune foiz de main mise, ou autrement selon l'exigence du cas.

Et en oultre, combien que ledit appel soit interjecté de tel jour, neantmoins, obstant une griefve maladie en quoy ledit appellant a esté detenu par long temps jusques a esperance de mort, et aussi les grans perilz qui ont depuis esté sur les chemins a l'occasion des guerres et par le fait de noz ennemis qui y ont couru et fait pluseurs prinses et envahies tant que on n'osoit bonnement venir du lieu ou il demeure par devers nous sanz grant dangier et du corps et des biens, icelui suppliant n'a peu plus tost obtenir ces presentes ne faire au seurplus la diligence de relever et executer sondit appel et sont les trois mois sur ce introduiz passez de tant de jours, par quoy sondit appel est et seroit desert et ledit appellant encourroit grant dommage et perdicion, [fol. 29v] se nostre grace ne lui estoit sur ce eslargie, si comme il dit, requerant icelle. Pour ce est il que nous, qui ne voulons ledit appellant estre decheu dudit appel et de son bon droit a cele occasion, icelui appellant avons ou cas dessusdit relevé et relevons par ces presentes de grace especial dudit temps contre lui encouru depuis lesdiz trois mois ; et lui avons octroyé et octroyons de plus ample grace que de cy a un mois prouchain venant il puist faire executer ces presentes et relever sondit appel aussi vallablement comme s'il l'eust fait dedens le temps deu, non obstant rigueur de stile a ce contraire, en certiffiant suffisamment etc. Ausquels etc. comme ou precedant adjournement.

[5.3.a] ¶ Note bien que, quant on veult obtenir relievement de laps de temps, il fault declairer de combien, comme tu peuz veoir en ce present relievement, ou il est declairé le jour de l'appel et de combien les trois mois sont passez, car le roy n'a point acoustumé de relever sanz savoir de quoy et de combien ; ainsi ne suffiroit pas de mettre seulement que les trois mois feussent passez sanz savoir de combien.

Charles etc., au premier sergent etc. Comme Tel, prisonnier en tel lieu, de certaine main mise, arrest, emprisonnement, question et autres tors, excés et abuz contre lui faiz par Tel, prevost de tel lieu, en procedant de son office au autrement a l'instance et pourchaz de nostre procureur en tel lieu ou : de Tel ou autrement comme de nulle ou nulz et, se aucune ou aucuns etc. comme il est contenu es lettres precedens jusques a celle clause : en certiffiant souffisamment1, devant laquelle on met immediate ce qui s'ensuit : et neantmoins pour ce que, comme l'en dit, icelui appellant est emprisonné par hayne et sanz cause, au moins pour cas civil ou qui ne requiert point detencion de prison, nous mandons et commettons par ces presentes a tel juge ou a son lieutenant que il s'en informe bien et deuement et, se il treuve qu'il soit detenu pour casa qui ne requiere detencion de prison, il le eslargisse ou mette ou face mettre hors desdictes prisons ; et se c'est pour autre cas, qu'il l'amene ou face admener soubz seure et bonne garde es prisons de la conciergerie de nostre palais de Poictiers ou : de Paris pour ilec ester et fournir a droit, poursuir sadicte appellacion, respondre, proceder et aler avant en oultre comme il appartendra par raison ; en certiffiant souffisamment audit jour noz amez et feaulx conseillers les gens tenans nostredit parlement et leur envoyant ou apportant, feablement cloz et seellez, les informacions et procés qui ont esté ou seroient faiz contre ledit appellant. Et nous mandons a nosdiz conseillers que aux parties, ycelles oÿes, facent bon et brief droit et acomplissement de justice. Donné etc.

[5.5.a] ¶ Nota que on doit bien avoir regart pour quelle cause l'appellant est detenu prisonnier, se c'est pour cas criminel ou civil, s'il y a avantage pour lui a mettre le jour de son adjournement brief ou long ; car en ce il peut avoit grant interest, mesmement pour ce que aucunes foiz l'appellant demeure en prison jusques on ait discuté de l'appel.

[5.5.b]  ¶ Item nota qu'on ne donne pas commission au sergent de le delivrer de prison, mais a un juge ; car il fault congnoissance de cause, dont le sergent ne se doit point entremettre.

Charles etc., a nostre tres chier et tres amé frere le duc d'Orleans et de Valois, conte de Bloys et de Beaumont et seigneur de Coucy1, salut et dilection. Comme Jehan Le Fevre, escuier, seigneur de Mitry2, ou son procureur pour lui se dit deuement avoir appellé a nous ou a nostre court de parlement de certaine sentence, jugement, condempnacion, reffuz et denee de droit contre lui faiza, donnez et proferez par vostre gouverneur de Blois ou son lieutenant a l'instance, prouffit ou pourchaz de Jehan Beringault ou autrement comme de nulle ou nulz et, se aucune ou aucuns sont ou estoient, faulz et mauvais, faulse et mauvaise, nous vous adjournons aux jours ordinaires de tel païs, et vous enjoingnons que vous ayez avecques vous vostredit gouverneur de Blois ou son lieutenant, pour soustenir et defendre lesdiz sentence, jugement, condempnacion, reffuz et denee de droit, les veoir adnuller ou les reparer et amender, se mestier est et faire se doit, sinon pour proceder en ladicte cause d'appel et en oultre comme raisonb. Et neantmoins vous defendons que pendant ladicte cause d'appelc vous ne attemptez ou innovez ne faites ou souffrez attempter ou innover aucune chose contre ne ou prejudice d'icelle ne dudit appellant en quelque maniere que ce soit ; ainçoiz, se faicte estoit, faites la reparer sanz delay et mettre au premier estat et deu. Donné etc.

Charles etc., a telz bailliz etc. Comme par noz autres lettres, desquelles la teneur s'ensuit :
Charles, a nostre tres chier et tres amé frere etc.,
nous adjournonsa nostre tres chier et tres amé frere et cousin le duc d'Orleans a telz jours du prouchain parlement a venir, nous vous mandons et commettons par ces presentes et a chascun de vous sur ce requis que noz lettres d'adjournement en cas d'appel dessus transcriptes vous presentezb ou faites presenter de par nous par personne suffisant et ydoine a nostredit frere et cousin ou a ses principaulx officiers, en lui enjoingnant qu'il ait avecques lui ausdiz jours sondit gouverneur de Blois, lequel vous y adjournez ou faites adjourner, se mestier est, pour soustenir et defendre les choses dessusdictes, veoir reparer les griefz sur ce faiz et proceder en oultre comme raison donra ; [fol. 31v] et avecques ce intimez ou faites intimer audit Beringault et autres parties adverses, s'aucunes en y a, qu'ilz soient ausdiz jours s'ilz cuident que bon soit et la chose leur touche ou appartiengne en aucune maniere ; en leur faisant ou faisant faire inhibicion et defense de par nous et autres qu'il appartendra et dont serez requis sur certaines et grans peines a appliquer a nous que pendant ladicte cause d'appel contre ne ou prejudice d'icelle ne dudit appellant ilz ne attemptent ou innovent aucune chose, mais tout ce qui auroit esté ou seroit fait au contraire ilz ramenent et remettent ouc vous mesmes ramenez ou faites ramener et remettre tantost et sanz delay au premier estat et deu. De la presentacion de ces presentes, intimacion, inhibicion et autres choses qui faictes seront en ceste partie soient deuement certiffiez noz amez et feaulx conseillers les gens tenans et qui tendront nostredit parlement. Ausquelz etc. Non obstans lettres subreptices a ce contraires. Donné etc.

[5.7.a] ¶ Nota que cest adjournement se doit faire en ceste forme par deux lettres quant on a appellé des officiers de ceulx qui sont pers de France. Et sont XII, III ducz et trois contes d'Eglise, et III ducz et III contes de siecle. Ceulz d'Eglise sont l'arcevesque et duc de Reims, premier ; l'evesque et duc de Laon ; l'evesque et duc de Lengres ; l'evesque de Beauvais, conte ; l'evesque et conte de Noyon ; l'evesque et conte de Chaalons. Les seculiers, le duc de Bourgongne, qui se dit doyen des pers ; le duc d'Acquitaine ou de Guienne ; et le duc de Normandie ; le conte de Champaigne ; le conte de Flandres ; et le conte de Thoulouse1.

[5.7.b] * ¶ Item aussi se fait en celle forme quant on appelle des seigneurs qui tiennent en parrie ou de leurs officiers, ja soit ce qu'ilz ne soient pas pers de France, comme monseigneur d'Orleans et monseigneur de Bourbon qui sont aujourd'uy, et d'autres. Et qui ne releveroit son adjournement en cas d'appel par celle forme, il en decherroit comme de mal relevé et poursuy.

[5.7.c] ¶ Item nota que en cest executoire doit estre incorporé tout au long et de mot a mot l'adjournement en parrie ; et doivent estre tous d'une date et signez d'un secretaire ou notaire ; et le notaire qui les signe les doit collationner et puis dessoubz son signe de l'executoire escrire de sa main ces motz collation est faicte, ou s'il est en latin collatio est facta, et non pas seulement en ceste lettre mais aussi en toutes autres lettres ou il y auroit incorporacion de lettre quant les lettres portent affirmativement desquelles la teneur s'ensuit, car le roy afferme et s'en attent au notaire ; [fol. 32] et s'il y a chose incorporee que le notaire ne voie et collationne a sa lettre, on n'y doit pas mettre desquelles la teneur s'ensuit, mais on y doit mettre desquelles on dit la teneur estre tele.

[5.7.d] * ¶ Item nota que l'executoire dessusditd se doit tousjours adrecer a juges et non pas a sergens ; et se les juges a qui il se adrece ne le presentent eulx mesmes, ilz le doivent faire presenter par personne ydoine et honneste, et aussi le mande le roy par son executoire.

[5.7.e] * ¶ Item nota que aprés les lettres de l'adjournement incorporees en l'executoire doit estre mis nous adjournons e par i entre n et o, ou meuff conjunctif, et non pas nous adjournons en temps present en l'indicatif2 .

[5.7.f] * ¶ Item nota que en l'adjournement en parrie n'est pas mise intimacion de partie ne certifficacion a la court de parlement, car l'executoire le porte et le doit faire l'executeur, non pas les pers ou qui tiennent en parrie.

Charles etc., au viconte d'Arques2 ou a son lieutenant, salut. Tel et Tel, consors en ceste partie, nous onta fait exposer en complaignans, disans que nostre amé etc., soy disant nostre bailly de Caux, ou son lieutenant leur a fait pluseurs tors, griefs, reffuz et denez de faire droit, a declairer en temps et en lieu quant mestier sera, pour et au proufit ou pourchaz, requeste ou instance de Tel etc., en procedant de son office ou autrement indeuement, desquels tors, griefz, reffuz et denez de droit il ne loist pas ausdiz complaingnans d'appeller selon la coustume de nostre païs de Normandie mais a nous en doivent avoir recours par maniere de complainte ou doleance et nous leur devons sur ce pourveoir de remede convenable, si comme ilz dient, requerant icelui. Pour quoy nous, ce consideré, te mandons et commettons que, caucion ou pleige suffisant pris desdiz complaingnans de leurdicte complainte ou doleance poursuir, paier le jugié et amende, se mestier est et ilz en encheent3, tu adjournes ou faces adjourner ledit bailly ou sondit lieutenant a nostre prouchain eschiquier ordinaire de Normandie, pour soustenir et defendre les choses dessusdictes, veoir reparer lesdiz tors, griefs et denez de droit et iceulx mettre du tout au neant, se par raison et ladicte coustume le doivent estre, respondre et proceder en oultre selon raison ; et intime ou fay intimer et savoir a partie adverse qu'elle soit audit eschiquier se elle cuide que bon soit et que la chose lui touche ou appartiengne en aucune maniere ; et parmy ladicte caution met et tien ou fay mettre et tenir les choses discordables ou point et en l'estat qu'elles estoient au temps que lesdiz tors et griefs deurent estre faiz, sanz souffrir que pendant icelle complainte ou doleance contre ne ou prejudice d'icelle ne desdiz complaingnans aucune chose soit attemptee ou innovee en quelque maniere que ce soit ; laquelle, se faicte estoit au contraire, ramene et remet ou fay ramener et remettre sanz delay au premier estat et deu. Et desdiz adjournemens, intimacion et de tout ce que fait auras en ceste partie certiffie souffisamment noz amez et feauls gens qui tendront nostredit eschiquier. Ausquels nous mandons que aux parties etc. Donné etc.

[5.9.a] ¶ Celle lettre est pour ceulx de Normandie quant on leur fait grief [fol. 33] comme l'adjournement en cas d'appel est pour ceulz de France.

[5.9.b] * Item nota qu'elle se doit adrecier a un viconte, et non pas a un sergent, et qu'il fault bailler caucion.

[5.9.c] * Item nota les autres clauses et ne doit on point muer le langage ne les termes de celle lettre de doleance, car ainsi on l'a tousjours acoustumé, et est escripte la forme en leur livre coustumier4.

Charles etc., a noz amez et feaulx les generaulx conseillers ordonnez sur le fait de noz aides, salut. Tel, esleu de par nous es cité et diocese de tel lieu sur le fait desdiz aides, nous a fait exposer que, ja soit ce qu'il soit homme notable et qu'il ait esté mis et establi de par nous oudit office, il nous a servi bien et loyaument par l'espace de tel temps sanz reprehencion et sanz ce qu'il fust oncques convaincu ne attaint d'aucun villain cas, crime, delit, faulte ou negligence qu'il eust fait ou perpetré oudit office ne autrement, neantmoins Tel, par importunité de requerans ou autrement et soubz umbre de son faulx et surreptiz donné a entendre, a tant fait qu'il a eu noz lettres de don dudit office, veriffiees, comme l'en dit, par vous, par vertu desquelles le compaignon esleu dudit exposant en faveur de partie adverse ou autrement en l'absence dudit exposant et sanz l'oïr ne appeller a receu ledit Tel et institué oudit office ; laquelle chose venue a la congnoissance d'icellui exposant, incontinent aprés s'opposa au contraire a toutes fins, a quoy sondit compaignon esleu ne le voult recevoir ne oïr en faveur de partie adverse, comme dit est, et hayne qu'il a conceue de long temps contre ledit exposant ; dont et d'autres griefz a declairer, se mestier est, ledit exposant a appellé a vous et est encores dedanz le mois de relever sondit appel, et nous a humblement fait supplier que sur ce lui vueillons pourveoir de remede gracieux et convenable. Pour ce est il que nous, qui ne voulons aucuns de noz serviteurs et officiers estre desappointiez de leurs offices sanz cause raisonnable et sanz les appeller et oïr premierement, et que ainsi l'avons voulu et [fol. 33v] ordonné par ordonnances royaulx sur ce faictes, ladicte appellacion ou cas dessusdit avons muee et convertie, muons et convertissons par ces presentes en opposicion, sanz amende et sanz ce que icellui exposant soit tenu de la relever autrement ; et vous mandons que ledit exposant vous recevez a opposicion a l'encontre des lettres et institucion dessusdiz et lequel par ces mesmes presentes y avons receu et recevons en tant que besoing est ; et icelle opposicion signifiez ou faites signifier audit Tel, partie adverse, et l'adjournez ou faites adjourner a certain et competant jour par devant vous pour proceder en ladicte cause d'opposicion, respondre audit exposant sur ce que dit est et les deppendancesa et aler avant en oultre selon raison ; en faisant ledit exposant joïr et user de nostredicte grace et octroy et au seurplus aux parties oÿes bon et brief droitb. Car etc. Donné etc.

[5.10.a] ¶ Nota que, quant on a appellé soit en parlement soit aux generaulx et qu'on est ou danger de l'amende, on doit adrecer la lettre de mettre l'appellacion au neant ou de muer en opposicion a nos seigneurs de parlement ou aux generaulx, car autrement le procureur du roy tendroit condempnacion de l'amende etc.

[5.10.b] ¶ Item nota ces motz et lequel nous y avons receu et recevons par ces presentes, car on n'a pas acoustumé de les y mettre, sinon que la lettre soit commandee par le roy et pour gens que on scet a qui on auroit fait tort. Bien y met on ces autres motz et lequel nous y voulons estre receu par ces presentes.

Charles etc., a nos amez et feaulx conseillers les gens tenans et qui tendront nostre parlement, salut et dilection. Receue avons l'umble supplicacion de Tel, contenant que nagaires il a appellé a nous ou a nostredicte court de certaine sentence, jugement ou condempnacion contre lui faiz par le bailly de Berry ou son lieutenant au proufit de Tel et sondit appel a bien et deuement relevé en icelle court, mais neantmoins icelles parties, qui sont voisines, pour nourrir paix et amour entre elles accorderoient voulentiers ensemble de et sur ladicte cause d'appel, en laquelle n'a aucun procés par escript et ne nous touche, fors pour raison de l'amende qui nous en pourroit appartenir pour le fol appel en fin de cause, s'il nous plaisoit leur en octroyer congié et licence, si comme dit ledit suppliant, requerant humblement iceulz. Pour quoy nous, ces choses considerees, voulans eschever plaiz et procés et nourrir paix et amour entre noz subgetz, ausdictes parties avons oudit cas donné et octroyé et par ces presentes de grace especial donnons et octroyons congié et licence de pacifier et accorder ensemble en ladicte cause d'appel et de elles departir de ladicte court et de procés sanz amende, en vous rapportant sur ce leur accord tel comme elles l'auront sur ce fait. Si vous mandons et enjoingnons que de noz presentes grace, congié et licence vous faites, souffrez et laissiez lesdictes parties joïr et user paisiblement et plainement. Car ainsi etc. Donné etc.

[6.1.a] ¶ Nota que, quant on a appellé d'un sergent, on donne a grant difficulté le congié d'accorder, car on peut avoir recours de justice a celui qui est par dessus le sergent qui fait grief et n'en doit on pas appeller mesmement jusques en ait fait diligence devers celui qui peut reparer la chose avant l'appel.

[6.1.b] ¶ Item nota ces trois clauses, c'est assavoir [qu'il]a n'y ait point de [fol. 35v] procés par escript, ne chose qui touche le roy, et aussi que l'appel a esté deuement relevé et poursuy ; car autrement on ne donroit pas le congié d'accorder mesmement sanz le procureur du roy et sanz discuter bien a point la chose.

[6.1.c] ¶ Item nota que la clause de rapporter l'accord devers la court y doit tousjours estre mise, car l'accord pourroit estre tel que la court ne le passeroit point, quelque congié d'accorder que les parties eussent.

[6.1.d] ¶ Item nota que la lettre du congié se fait a la requeste de celui qui a appellé ; et en conclusion elle se fait au prouffit de l'appellant et de l'intimé.

Charles etc., au seneschal de tel lieu et a tous noz autres justiciers en ladicte seneschaucié ou a leurs lieuxtenans, salut. Nostre amé Tel, escuier, seigneur de tel lieu, nous a exposé que nagaires nous lui avons donné telz offices comme vacquans par la mort de feu Tel, mais qu'il est si occuppé par deça ou fait des guerres a l'encontre de noz ennemis en la compaignie de nostre chier et feal cousin le viconte de Nerbonne2, ila ne pourroit aler par dela ne desservir en personne lesdiz offices, si comme il dit, en nous humblement suppliant que sur ce lui vueillons pourveoir de nostre grace. Pour ce est il que nous, consideré ce que dit est et les bons services que ledit Tel nous a fais ou fait des guerres, fait chascun jourb et esperons que encores face, a icelui avons donné et octroyé, donnons et octroyons de grace especial par ces presentes congié et licence de faire desservir et excercer lesdiz offices par personne suffisant et ydoine, a ses perilz et fortunes, jusques a un an a compter de la date de ces presentes. Si vous mandons et enjoingnons et a chascun de vous, si comme a lui appartendra, que ledit Tel vous faites, souffrez et laissiez joïr et user de noz presentes grace, congié et licence, et a ses commis obeïr et entendre ledit temps durant ainsi qu'il appartendra. Car tel est nostre plaisir. Non obstans ordonnances etc. Donné etc.

[6.2.a] ¶  Nota bene que le roy ne donne pas congié de desservir un office [fol. 36] sinon que ce soit par personne suffisant et ydoine et aussi aux perilz et fortunes de celui qui le baille a desservir.

[6.2.b] ¶ Item nota qu'on ne donne le congié que a temps et que le roy mande qu'on face obeïr a son commis durant le temps, qui est communement d'un an.

[6.2.c] ¶ Item aussi on adjouste bien en ceste lettre, devant Si vous mandons, la clause qui s'ensuit : et en oultre que ce pendant ledit exposant ait et preigne les gaiges, droiz, prouffiz appartenans audit office comme s'il l'excerçoit en personne ; et lors on fait communement adrecer sa lettre aux gens des finances, au moins au tresorier ou receveur qui paie les gaiges.

Charles etc., au bailly des Montaignes d'Auvergne ou a son lieutenant, salut. Receue avons la supplicacion de noz amez les gens des trois estaz, consulz et habitans des prevostez d'Orilhac et des Maours1 esdictes Montaignes d'Auvergne, contenant que comme pour supporter les grans fraiz, mises et despens qui leur a convenu et convient chascun jour faire pour la garde et defense du païs d'icelles prevostez, qui sont es frontieres de noz anciens ennemis les Anglois, qui chascun jour y courent et ont pres d'icelles pluseurs grosses garnisons et patiz, soit besoing et neccessité ausdiz supplians de eulx assembler ensemble et asseoir, imposer et lever sur eulx certaines sommes de deniers pour convertir et employer en leur garde, ce qu'ilz n'oseroient faire, comme ilz dient, sanz avoir noz lettres de congié et licence, requerans humblement iceulz. Pour ce est il que nous, consideré ce que dit est et la bonne obeïssance que avons tousjours trouvee en eulx, a iceulz gens des trois estaz, consulz et habitans d'icelles prevostez d'Orilhac et de Maors avons donné et octroyé, donnons et octroyons de grace especial par ces presentes congié et licence de eulz assembler ensemble, asseoir, imposer et lever sur eulx la somme de tant et au dessoubz, pour convertir et employer en ce que dit est. Si voulons et vous mandons que de nostre presente grace, [fol. 36v] congiéa et licence vous faites, souffrez et laissiez lesdiz supplians joïr et user paisiblement en faisant cueillir et lever ycelle somme par celui ou ceulx qui a ce sera ou seront commis par lesdiz supplians, en contraignant ou faisant contraindre par toutes voyes deues et raisonnables a paier ladicte somme tous ceulz qu'il appartendra, pourveu toutesvoies que la plus grant et saine partie desdictes gens des trois estaz desdictes prevostez en soient d'accord. Car ainsi etc. Non obstans ordonnances etc. et lettres subreptices etc. Donné etc.

Charles etc., au prevost de Meleun ou a son lieutenant, salut. Nous avons receu l'umble supplicacion des manans et habitans de tel lieu, consors en ceste partie, contenant comme il leur soit neccessité de eulx assembler pour faire et constituer eulx ensemble procureurs pour poursuir et defendre une certaine cause ou causes touchans le fait commun d'entr'eulx, meue et encommencee a l'encontre de Tel, et aussi leur soit neccessité de asseoir, imposer et faire lever sur eulx une taille pour employer, tourner et convertir es mises, fraiz et despens qui leur seront neccessaires a faire et supporter en la poursuite d'icelle cause ou causes, ce qu'ilz n'oseroient bonnement faire, si comme ilz dient, sanz avoir de nous congié et licence dua faire, requerant humblement iceulx. Pour ce est il que nous te mandons et commettons, se mestier est, que tu faces commandement de par nous au seigneur de qui ladicteb ville est tenue que il donne congié et licence ausdiz supplians de eulx assembler, appellé a ce un de noz officiers ; et en cas que de ce faire seroit reffusant ou delayant, tu mesmes en son deffault leur donne de par nous iceulz congié et licence de eulx assembler pour faire et constituer un ou pluseurs procureurs et aussi pour asseoir, imposer et faire lever sur eulx mesmes la somme de tant, pour emploier et convertir en la poursuite de ladicte cause et autres qui mouvoir se pourroient encontre eulx, en faisant cueillir, lever et bailler icelle somme de tant a celui ou ceulx qui a ce sera nommé et requis [fol. 37] par lesdiz manans et habitans, en contraingnant ou faisant contraindre pour toutes voies et manieresc deues et raisonnables un chascun desdiz manans et habitans a paier ce a quoy il sera tauxé, ou cas toutesvoyes que la plus grant et saine partie d'iceulx sera de ce d'accord et consentant ; lequel commis sera tenu d'en rendre bon et loyal compte la ou il appartendra toutes foiz que requis en sera. Car ainsi etc. Non obstans quelzconques etc. Donné etc.

[6.4.a] ¶ Nota la difference qui est entre le congié precedent et cestui ; car, quant ceulx qui demandent le congié sont neument subgetz du roy, le roy leur donne le congié par ses lettres et, quant ilz sont subgez d'autres seigneurs, il mande qu'on leur face commandement qu'ilz le leur donnent et en leur reffuz par ses juges royaulx il leur donne, et qu'il y ait de ses officiers en l'assemblee.

[6.4.b] ¶ Item quant on demande congié de imposer argent, il fault mettre jusques a quelle somme et au dessoubz.

[6.4.c] ¶ Item fault que la plus saine partie s'i consente et que celui qui en fera recepte en rende compte.

Charles etc., a nostre amé et feal chancelier et a tous noz autres justiciers ou a leurs lieuxtenans, salut et dilection. Receue avons l'umble supplicacion de Tel, nostre sergent en tel bailliage, contenant que comme depuis qu'il fut institué oudit office il nous ait tousjours servy loyaument en icelui sanz y avoir fait ou commis a son povoir aucune faulte, et il soit ainsi que, pour lui aidier a gouverner d'ores en avant et avoir sa vie honnestement, il resigneroit voulentiers ledit office de sergenterie et en prendroit prouffit, se sur ce nous plaisoit lui donner noz congié et licence, si comme il dit, en nous humblement requerant yceulz. Pour quoy nous, les choses dessusdictes considerees et pour certaines autres causes et consideracions a ce nous mouvans, a icelui suppliant avons donné et octroyé, donnons et octroyons de grace especial par ces presentes congié et licence que toutes et quantes foiz qu'il lui [fol. 37v] plaira et en quelque estat qu'il soit, sain ou malade, il puisse et lui loise resigner ou faire resigner par procureur a ce suffisamment fondé es mains de nous ou de vous, chancelier, sondit office de sergenterie au prouffit de tele personne souffisant a ce que bon lui semblera et en prendre d'icelle personne tel prouffit qu'il en pourra avoir pour une foiz, sanz ce qu'ila tourne ou puist tourner audit suppliant ne a celui a qui il aura ainsi resigné a aucun prejudice ou dommage ne aussi que pour ceste cause ledit office puist estre impetrable ne que nostre procureur ou autres y puissent prendre aucune amende soubz umbre des ordonnances royaulx faictes sur la provision de noz offices ou autrement en quelque maniere que ce soit ou puist estre. Si vous mandons et a chascun de vous, si comme a lui appartendra, que de nostre presente grace et octroy vous faites, souffrez et laissiez ledit suppliant et celui a qui il resignera ledit office, comme dit est, et chascun d'eulx joïr et user plainement et paisiblement, en recevant par vous, chancelier, ladicte resignacion toutes foiz que requis en serez, et en baillant sur ce noz lettres patentes teles qu'il appartendra a celui au prouffit duquel elle aura esté faicte par la maniere que dit est ; laquelle resignacion nous voulons estre d'autel effect et valeur comme se faicte estoit en noz mains. Car ainsi etc. Non obstans nosdictes ordonnances et quelzconques mandemens et lettres etc. Donné etc.

[6.5.a] ¶ Nota que, ja soit ce que ceste lettre de congié de resigner soit adrecee au chancelier et a tous autres juges, si ne se doit faire la resignacion que es mains du roy ou du chancelier seulement, et n'ont pas les juges puissance de la recevoir au moins d'en bailler lettres de don. Bien est adrecee a eulx la lettre du congié pour le debat ou procés qui en pourroit ensuir.

[6.5.b] ¶ Item nota ces motz en quelque estat qu'il soit, sain ou malade.

[6.5.c] ¶ Item et d'en prendre prouffit.

[6.5.d] ¶ Item ce mot a personne suffisant.

[6.5.e] ¶ Item nota que, quant tele resignacion est faicte es mains du chancelier, la lettre du don de l'office resigné se doit signer Par le roy a vostre relacion.

Charles etc., a tous ceulx etc. Les bourgoys, manans et habitans de la ville de Cucy1 nous ont fait exposer comme ilz soient en la frontiere de pluseurs noz ennemis et presque tous les jours en grant dangier d'estre prins par iceulx ennemis, parce que ladicte ville est tres petitement emparee et a tres grant neccessité de reparacions ; lesquelles, pour les grans charges qu'il a convenu et convient de jour en jour supporter ausdiz supplians pour le fait des guerres et autrement, ilz ne pourroient ne auroient de quoy faire faire sanz lever en ladicte ville un aide de deux solz tournois sur chascune queue de vin qui depuis la Saint Michiel2 derrain passee y a esté mise, et sur toutes celles que on mettra ou amenera en icelle ville de cy a trois ans a commencier a ladicte feste de Saint Michiel ; lequel aide a esté advisié entr'eulx le plus prouffitable et moins grevable, mais ilz ne l'oseroient lever sanz nostre congié et licence, si comme ilz dient, requerans icelui. Pour ce est il que nous, considerans les choses dessusdictes et autres a ce nous mouvans, ausdiz bourgois et habitans avons octroié et octroions par ces presentes de grace especial congié et licence de imposer, cueillir et lever l'aide dessus declairé, c'est assavoir de deux solz tournois sur chascune queue de vin qui est entree et entrera en ladicte ville de Cucy durans yceulx trois ans, pour l'argent qui en ystra tourner et convertir en ladicte fortifficacion et emparement de ladicte ville et non ailleurs. Si donnons en mandement par ces mesmes presentes au bailly de Saint Pere le Moustier et a tous noz autres justiciers et officiers ou a leurs lieuxtenans et a chascun d'eulx, si comme a lui appartendra, que lesdiz supplians facent, seuffrent et laissent joïr et user de nostre presente grace, congié et octroy par la maniere et jusques au temps que dessus est dit, en contraingnant a icellui aide paier tous ceulx qui feront a contraindre par toutes voies deues et raisonnables, pourveu toutesvoyes que audit aide imposer et asseoir se consente la plus grant et saine partie desdiz habitans, que nostre demaine ou les aides ordonnez pour le fait de la guerre n'en soient point diminuez et que celui ou ceulx qui seront commis a faire la recepte et distribucion de l'argent d'icellui aide sera tenu d'en rendre compte en la presence dudit bailly ou d'autres noz officiers, et aussi que l'argent dudit aide soit employé esdictes reparacions et emparemens necessaires et non ailleurs. Car ainsi le [fol. 38v] voulons estre fait. Non obstans quelzconques ordonnances, mandemens etc. En tesmoing etc. Donné etc.

[6.6.a] ¶ Nota que en tous aides de villes doit estre mis le consentement de la plus grant ou saine partie de ceulx sur qui se lieve l'aide ; et se il se lieve en une ville et chastellenie, ou en une ville et foursbours, il fault que les habitans et de la chastellenie et des foursbours se consentent comme ceulx de la ville. Et y met on la plus grant ou saine partie, car par ce mot saine est entendu que, se la plus grant partie de tous en general ne s'i consent, au moins que la pluspart des notables et gens de raison s'i consente, et suffira3.

[6.6.b] ¶ Item que ceulz qui recevront l'argent de l'aide en comptent en la presence des gens du roy.

[6.6.c] ¶ Item que le demaine ne les aides n'en soient diminuez.

[6.6.d] ¶ Item que l'argent soit converti es reparacions ou autres choses neccessaires dont on cause sa lettre ; et n'est pas aucunes foiz expediant d'y laisser ou d'y adjouster ces motz et es autres affaires communs de ladicte ville, car il se peut trop largement entendre, et ceulx qui ont l'administracion des villes en usent aucunes foiz mal a point4.

[6.6.e] ¶ Item nota que pour chascune annee qu'on donne congié de lever un aide on doit LI solz parisis au seel, qui n'en fait grace.

Charles etc., a tous ceulx etc. Savoir faisons de la partie de noz amez les bourgois et habitans de la ville de Saint Pourçain1 nous avoir esté exposé que par l'octroy et congié de feu nostre tres chier seigneur et pere, cui Dieu pardoint, et par le nostre lesdiz habitans ont cueilli et fait cueillir et lever par certain temps un barrage sur les bestes passans par ladicte ville et l'argent qui en esta yssu converti et employé en la reparacion des pons et chaucees d'icelle ville, toutesfoisb puis nagaires yceulx pons et chaucees ont esté rompuz par grans inundacions d'eaues et sont en estat que on n'y peut passer que a grant peine et dangier, especialment [fol. 39] charroy ne autres bestes chargees, et ne les pourroient yceulx exposans faire refaire ne soustenir d'eulx mesmes sans prendre et lever ledit barrage ainsi qu'ilz ont acoustumé, ce qu'ilz n'oseroient faire sanz nostre congié et licence, si comme ilz dient, requerans icelui. Pour quoy nous, consideré ce que dit est, a iceulx exposans avons octroyé et octroyons de nouvel par ces presentes que jusques a quatre ans prouchain venans ilz puissent lever et prendre ledit barrage sur les bestes passans par ladicte ville, c'est assavoir sur chascun cheval ou jument chargiez deux deniers, sur chascun beuf ou asne chargié ung denier et sur chascune beste non chargee passant par ladicte ville ou pont de Saint Poursain un denier, pour l'argent qui en ystra convertir et emploier en la reparacion et soustenement desdiz pons et chaucees et non ailleurs, pourveu toutesvoyes que la plus grant ou saine partie desdiz habitans se consente a ce et que noz droiz, aides ou demaine ne soient pour ce diminuez et que celui ou ceulz qui seront commis a recevoir ledit barrage en rendent compte par devant aucuns de noz gens et officiers. Si donnons en mandement par ces mesmes presentes au bailly de Saint Pere le Moustier et a tous noz autres justiciers ou a leurs lieuxtenans et a chascun d'eulx, si comme a lui appartendra, que lesdiz exposans facent, seuffrent et laissent joïr et user paisiblement de noz presentes grace et octroy, en contraignant ceulx qui feront a contraindre a paier ledit aide ou barrage jusques au temps et par la maniere que dit est. Car ainsi le voulons et nous plaist que soit fait. Non obstans quelzconques lettres subreptices etc. Donné etc.

[6.7.a] ¶ Nota que l'argent qui se lieve d'un barrage ne se doit employer que es reparacions et soustenemens de pons, de chaucees ou de chemins ; et pour ce communement le barrage se fait par une lettre a part et ne le veult on point entrelaxer avecques autres aides qui sont pour la reparacion ou fortifficacion de la ville, afin qu'on n'en convertisse pas l'argent autre part ; et la raison est bonne, car le barrage se lieve plus sur les estranges et forains que sur ceulx des villes.

[6.7.b] ¶ Item nota aussi qu'on en paie LI solz parisis au seel pour chascune annee, qui n'en fait grace.

[6.7.c] ¶ Item nota les clauses et provisions qui y sont ; vide ou nota precedent.

Charles etc., a noz amez et feaulx conseillers les gens tenans et qui tendront nostre parlement a Thoulouse1, au seneschal de Quercin et a tous noz autres justiciers et officiers ou a leurs lieuxtenans, salut et dilection. De la partie de nostre amé Tel, juge mage etc., nous a esté humblement exposé que il a par long temps tenu et excercé ledit office de juge mage si bien et deuement que puis pou de temps ença il a esté esleu a l'estat de conseillier lay dudit parlement et nous y a ja servy et sert de jour en jour et par ce doubte que aucuns voulsissent empetrer et lui oster ledit office de juge mage soubz couleur de dire que les deux sont incompatibles, se nostre grace ne lui estoit sur ce impartie, si comme il dit, en nous humblement suppliant que, attendu qu'il a bien servy oudit office de juge mage, comme dit est, au prouffit et utilité de nous et du bien publique du païs de ladicte seneschaucié et puet encores faire et aussi qu'il y a oudit païs grant chierté de vivres et si lui a convenu et convendra faire mutacion de demeure et autres grans frais a l'occasion dessusdicte, lesquelz pour l'affoiblissement et empirence des monnoyes il ne pourroit pas supporter ne son estat honnestement maintenir des gaiges de l'un desdiz estas et offices, nous lui vueillions sur ce pourveoir de nostredicte grace. Pour quoy nous, consideré ce que dit est et les bons et agreables services que ledit suppliant nous a fais par long temps et esperons que encores face ou temps a venir, voulons et nous plaist et a icelui suppliant avons octroyé et octroyons de grace especial par ces presentes que de cy a un an a compter de la date de ces presentes il puisse tenir lesdiz deux estaz ou offices de nostre conseiller oudit parlement et de juge mage de Quercin2, ja soit ce qu'ilz soient incompatibles, et, se bon lui semble, faire desservir et excercer ledit an durant ledit office de juge mage, a ses perilz et fortunes, par personne suffisant et ydoine. Si vous mandons eta enjoingnons et a chascun de vous, si comme a lui appartendra, que ledit suppliant vous faites, souffrez et laissiez joïr et user paisiblement de noz presentes grace, voulenté et octroy ledit an durant. Car ainsi etc. Non obstans quelzconques ordonnances, mandemens etc. Donné etc.

[6.8.a] ¶ Nota que on donne pou de teles lettres et ne se doivent donner sanz grant cause ; et fut ceste octroyee en partie pour ce que le parlement de Thoulouse n'est pas a tousjours durer et qu'il avoit esté miz suz a l'occasion des guerres et de la division de Paris et trouvoit on pou de gens notables qui y voulsissent demourer3.

Charles etc. Savoir faisons a tous presens et a venir nous avoir oÿe l'umble supplicacion des consulz, manans et habitans de la ville, chastellenie et mandement du Crot1, contenant que ledit lieu du Crot est assis en clef de païs marchissant a l'entree d'Auvergne, de Guienne, de Combraille et de la Marche, et a ceste cause est plus foulee et dommagee par les gens d'armes et autres, passans, sejournans et rapassans par lesdiz païs ; et pour ce lesdiz supplians, afin d'y garder et sauver eulx et leurs biens, ont propos et entencion de faire clorre ladicte ville du Crot, qui est a ce faire avantageuse, se sur ce il nous plaisoit leur octroyer noz congié et licence, si comme ilz dient, en nous humblement requerant que, attendu que les seigneurs ou dames moyens soubz nous de ladicte ville sont d'accord que icelle ville soit close et que ce sera le proufit desdiz habitans et aussi de nous et la seurté du païs d'environ, nous leur vueillons sur ce pourveoir de nostre grace. Pour ce est il que nous, consideré ce que dit est, a iceulx supplians avons ou cas dessusdit donné et octroyé, donnons et octroyons de grace especial, plaine puissance et auctorité royal par ces presentes congié et licence de clorre et faire clorre et fortiffier de murs, tours, foussez, portes et autres choses ladicte ville du Crot, pourveu aussi toutesvoies que ce ne nous tourne a dommage ou prejudice ne au païs d'environ et que, non obstant ladicte fortifficacion, lesdiz supplians facent le guet ou chastel dudit lieu du Crot ou autre part ou ilz sont tenus ainsi qu'ilz [fol. 40v] ont acoustumé. Si donnons en mandement par ces mesmes presentes au seneschal d'Auvergne et a tous noz autres justiciers ou a leurs lieuxtenans presens et a venir et a chascun d'eulx, si comme a lui appartendra, que, se, appellez des nobles et autres gens en ce congnoissans et aussi les autres qui feront a appeller, il leur appert de ce que dit est, ilz facent, seuffrent et laissent lesdiz supplians joïr et user plainement et paisiblement de nostre presente grace, congié et licence, sanz sur ce leur donner ne souffrir estre fait ou donné aucun destourbier ou empeschement au contraire. Non obstans quelzconques ordonnances, mandemens ou defenses a ce contraires. Et afin que ce soit chose ferme et estable a tousjours, nous avons fait mettre nostre seel a ces presentes. Sauf en autres choses nostre droit et l'autrui en toutes. Donné etc.

Charles etc., a tous etc. Comme Tel et Tel, freres, nous ayent humblement supplié que, comme Telz les ayent deffiez et desja se soient efforcez de faire ausdiz supplians villennie de leurs corps, par quoy ilz sont en grant doubte de jour en jour desdiz Telz, nous sur ce vueillons a iceulx supplians pourveoir de remede gracieux et convenable, savoir faisons que nous, eu regart aux choses dessusdictes, avons ausdiz freres octroyé et par la teneur de ces presentes octroyons de grace especial et certaine science quea eulx avecques six hommes en leur compaignie puissent porter armes couvertement sanz envahir ou molester aucun et aler armez par tout nostre royaume, a la tuicion et defense de leurs corps tant seulement et jusques a deux ans a compter de la date de ces presentes. Si donnons en mandement au prevost de Paris et a tous noz autres justiciers ou a leurs lieuxtenans et a noz subgez ou a leurs lieuxtenansb et a chascun d'eulz que lesdiz freres ilz laissent joïr et user paisiblement de noz presentes grace, congié et licence ; et leur defendons estroitement que contre la teneur d'icelles ilz ne molestent ou empeschent ne facent ou seuffrent molester ou empeschier lesdiz freres ou lesdiz hommes ainsi estans en leur compaignie jusques audit nombre ou aucun d'iceulx en corps ou en biens durant ledit temps en quelque maniere que ce soit. En tesmoing etc. Donné etc.

[6.12.a] ¶ Nota que celle lettre se donne jusques a un temps seulement et aussi qu'elle ne se donne que a la tuicion et garde de la personne sanz molester aucun.

Charles etc., a tous ceulx qui ces presentes lettres verront, salut. Comme l'eglise de N. soit a present vuide et destituee de pasteur par la mort de feu Tel, derrenier evesque, et pour ce soit besoing pour le bien et proufit de ladicte eglise que les doyen et chappitre d'icelle se assemblent afin d'eslire aucune bonne personne en evesque, ce qu'ilz n'oseroient ne vouldroient faire sanz avoir sur ce nostre congié et licence, ainsi qu'ilz nous ont fait exposer, requerans icelui, savoir faisons que nous, desirans le bien et voulens obvier aux dommages d'icelle eglise, ausdiz doyen et chappitre avons donné et octroyé, donnons et octroyons par ces presentes congié et licence d'eulx assembler et proceder a l'election d'aucune bonne personne pour estre evesque d'icelui eveschié, gardees en ce les solennitez qui y sont requises et acoustumees. Donné etc.

Charles etc. Savoir faisons que nous, confiens de la loyauté, preudommie et diligence de nostre amé varlet de chambre N. et considerans les bons et continuelz services qu'il nous a longuement faiz et fait de jour en jour et esperons que encores face, a icelui avons donné et octroyé, donnons et octroyons de grace especial pas ces presentes l'office de nostre chastellain ou cappitaine de tel lieu, que souloit avoir et tenir Tel, vaccant a present par son trespassement si comme l'en dit, pour ledit office de chastellain avoir et tenir d'ores en avant par ledit Tel aux gaiges, droiz, prouffiz et emolumens acoustumez et qui y appartiennent tant comme il nous plaira. Si donnons en mandement par ces mesmes presentes a nostre seneschal ou bailly de tel lieu ou a son lieutenant que, prins et receu dudit Tel le serement acoustumé, icelui mette et institue ou face mettre et instituer en possession et saisine dudit office de chastellain et d'icelui, ensemble des gaiges, droiz, prouffiz et emolumens dessusdiz, le face, seuffre et laisse joïr et user paisiblement, et a lui obeïr et entendre de tous ceulx qu'il appartendra es choses touchans et regardans ledit office, osté et debouté d'icelui tout autre illicite detenteur qui sur ce n'auroit noz lettres de don precedens en date ces presentes. Par lesquelles nous mandons aussi a noz amez et feaulx gens de noz comptes que par nostre receveur ordinaire de tel lieu, ou par autre qui a acoustumé de paier lesdiz gaiges, ilz les facent païer, bailler et delivrer audit Tel d'ores en avant chascun an aux termes et en la maniere accoustumez. Et par rapportant ces presentes ou vidimus d'icelles pour une foiz faiz soubz seel royal ou autre autentique et quittance suffisant sur ce, allouent es comptes et rabatent de la recepte dudit receveur tout ce qu'il aura paié audit Tel de sesdiz gaiges sanz y faire reffuz ou [fol. 44v] difficulté. Non obstans ordonnances, mandemens ou defenses a ce contraires. En tesmoing etc. Donné etc.

Par lesquelles nous mandons a nostre receveur ordinaire de tel lieu, ou autre qui lesdiz gaiges a acoustumé de paier, que iceulx il paie, baille et delivre audit Tel ou a son certain commandement chascun an d'ores en avant aux termes et en la maniere acoustumez. Et par rapportant ces presentes ou vidimus d'icelles deument fait pour une foiz et quittance suffisant sur ce seulement, nous voulons tout ce qu'il lui en aura paié estre alloué en ses comptes et rabatu de sa recepte par noz amez et feaulx gens de noz comptes, ausquelz nous mandons que ainsi le facent sanz contredit ou difficulté. Non obstans ordonnances etc. En tesmoing etc. Donné etc.

[7.2.a]  ¶ Nota que on mande premierement recevoir le serement et instituer en l'office, et aprés on met l'executoire des gaiges, car aussi on commence a paier et prendre les gaiges du jour de l'institucion et recepcion et non point devant, de quelque date precedent que les lettres de don soient.

[7.2.b]  ¶ Item nota que, quant c'est office de seneschal ou de bailli royal ou de prevost de Paris, l'institucion et la recepcion du serement se doit adrecer a nos seigneurs de parlement ; aussi fait on adrecer a eulz l'executoire d'autres grans offices, comme de connestable, de chancelier, de maistre d'arbalestriers, de mareschaulx, d'amiral de France, de conseilliers en parlement et d'autres.

[7.2.c]  ¶ Item nota que ce mot illicite soit miz aprés ces motz osté et debouté tout autre detenteur, car par ce mot illicite est entendu que, s'il y avoit un detenteur a bon et juste tiltre, qu'on ne l'en doit pas oster.

[7.2.d] Item nota ce mot pour une foiz, car il suffist pour l'acquict du receveur qui paie les gaiges d'avoir une foiz les lettres ou le vidimus du don de l'office, mais il fault que d'an en an ou de terme en terme, quant il paie les gaiges, il ait la quittance de celui qui tient l'office, ou l'en ne les lui alloueroit pas en ses comptes.

[7.2.e] ¶ [fol. 45] Item nota que, quant on fait l'executoire des gaiges adrecierb a ung receveur comme il est contenu en l'executoire precedant, ce neantmoins mes seigneurs des comptes peuent donner sur ce leur consentement et expedicion par vertu de celle clause ausquelz nous mandons etc.

[7.2.f]  ¶ Item advise bien ces notaz qui sont miz aprés les lettres d'office subsequens.

Nous, les gens des comptes du roy nostre seigneur, veues par nous les lettres du roy nostre seigneur transcriptes au blanc de ce present vidimus, ou : pour consideracion du contenu es lettres royaulx transcriptes etc., ou ainsi : par vertu des lettres royaulx transcriptes etc., en obtemperant es lettres royaulx transcriptes etc., faisans mencion de Tel a qui le roy nostre seigneur a donné tel office, nous consentons et sommes d'accord, en tant que en nous est, que les gaiges ordinaires et anciens appartenans audit office de etc. lui soient paiez, bailliez et delivrez par le receveur ou tresorier de tel lieu, ou autre qui lesdiz gaiges a ou ont acoustumé de paier, aux termes et en la maniere acoustumez, pour les causes et tout par la forme et maniere que icelui seigneur le veult et mande par sesdictes lettres. Donné soubz noz signetz etc.

[7.3.a] ¶ Nota que on a acoustumé a veriffier les gaiges d'un office en la chambre des comptes au doz du vidimus collationné par les clers de la chambre, et le puet on faire qui veult par une atache attachee au vidimus, et met on Les gens etc. (sanz y mettre Nous), a tel receveur, salut. Veues etc., nous vous mandons que les gaiges etc. vous paiez etc. des deniers de vostre recepte etc. aux termes etc.Donné etc.

Les generaulx conseillers du roy nostre seigneur sur le fait et gouvernement de toutes finances tant en Languedoïl comme en Languedoc, a tous ceulx qui ces presentes lettres verront, salut. Savoir faisons que, veues par nous les lettres royaulx au vidimus desquelles, collacionné a l'original, ces presentes sont attachees soubz l'un de noz signetz, par lesquelles et pour les causes contenues en icelles le roy nostredit seigneur a de nouvel donné et octroyé a N. l'office de etc., nous, par vertu desdictes lettres et pour acomplir le contenu en icelles, avons aujourd'uy dudit Tel prins et receu le serement en tel cas acoustumé de bien et loyaument faire et excercer ledit office de etc., avecques la caucion qui y appartient et, ce fait, l'avons miz et institué en possession et saisine dudit office de etc., pour ledit office de etc. par lui faire et excercer et d'icelui, aux gaiges, droiz, prouffiz, chevauchees et autres emolumens acoustumez et audit office appartenans, joïr et user plainement et paisiblement. Si donnons en mandement par ces mesmes presentes a tous a qui il appartendra que dudit office de etc., ensembles des gaiges, droiz, prouffiz et emolumens dessusdiz et audit office appartenans, facent, seuffrent et laissent ledit N. joïr et user plainement et paisiblement, et a lui respondre et obeïr de tous a qui il appartendra es choses touchans et regardans ledit office. Voulons aussi, sommes d'accord et consentons que lesdiz gaiges a icelui office appartenans ledit Tel ait et preigne par sa main des deniers de sa recepte dudit grenier d'ores en avant par chascun an aux termes et en la maniere acoustumez, pour les causes et tout par la forme et maniere que le roy nostredit seigneur le veult et mande. Donné aa, soubz noz signetz, le […]b jour etc.

A tous ceulx qui ces presentes lettres verront, Guillaume Fradet2, licencié en lois, garde du seel de la prevosté de Bourges, salut. Saichent tuit que Tel, clerc juré dudit seel, notaire usant de nostre auctorité et quant a ce de nous commis, nous a relaté et tesmoingné de verité lui le […]b jour de […]c, l'an mil CCCC XXV, avoir veu, tenu et leu de mot a mot unes lettres patentes du roy nostre seigneur, seellees de son grant seel en cire jaulne et simple ou double queue, si comme il apparoit de prime face, saines et entieres, contenans la forme qui s'ensuit :
Charles etc.
Et estoit escript en marge dessoubz Par le roy etc., et signees N., ou : Ainsi signees Par le roy etc.. En tesmoing de laquelle vision, nous, garde dessus nommé, a la relacion dudit juré, auquel nous creons fermement, ledit seel de ladicte prevosté de Bourges avons miz a ces presentes lettres, les jour et an premiersdiz.

Charles etc., a tous etc. Savoir faisons que nous, confians etc., ou : que pour le bon rapport et tesmoingnage etc., a icelui avons donné et octroyé, donnons et octroyons de grace especial par ces presentes l'office de nostre grenetier de tel lieu, vaccant etc., pour le tenir et excercer d'ores en avant aux gaiges et chevauchees etc. Si donnons en mandement par ces mesmes presentes a noz amez et feaulx les generaulx conseillers par nous ordonnez sur le fait et gouvernement de toutes noz finances que, prins et receu dudit Tel le serement et la caucion acoustumez, icelui mettent et instituent en possession et saisine dudit office de grenetier, et d'icelui office, ensemble des gaiges, chevauchees etc., et a lui obeïr etc., osté etc., et en oultre lui seuffrent et laissent prendre et avoir par sa main des deniers de sa recepte lesdiz gaiges et chevauchees aux termes et en la maniere acoustumez. Et par rapportant ces presentes ou vidimus d'icelles pour une foiz seulement, nous voulons [fol. 46v] que ce qu'il en aura ainsi prins et retenu soit alloué en ses comptes et rabatu de sa recepte par noz amez et feaulx gens de nos comptes, ausquelz nous mandons que ainsi le facent sanz aucun contredit ou difficulté. Non obstans quelzconques ordonnances, mandemens ou defenses a ce contraires. En tesmoing de ce, nous avons fait mettre nostre seel a ces presentes. Donné etc.

[7.6.a]  ¶ Nota que en offices ou commissions ou il y a recepte de deniers du roy on doit mettre caucion avecques le serement ; et en adrecer l'expedicion a nos seigneurs des comptes quant c'est du demaine ; et quant c'est autre chose, aux generaulx ou commissaires sur le fait des finances.

[7.6.b]  ¶ Item nota que es lettres d'office de grenetiers on met aux gaiges et chevauchees acoustumez ; car ilz ont chevauchees quant ilz vont dehors pour prendre faulx saulniers ou pour autres affaires touchans le prouffit du roy et du grenier. Mais en autres affaires de recepte, on ne met point ce mot chevauchees, au moins que en tres peu.

[7.6.c]  ¶ Item puis que l'officier se paie par sa main de ses gaiges, on ne doit point mettre en sa lettre d'office qu'il rapporte quittance, car il se quitteroit lui mesmes, mais suffist qu'il rapporte son don de l'office ou le vidimus pour la premiere foiz seulement avecques l'expedicion de nos seigneurs des comptes ou des generaulx.

[7.6.d]  ¶ Item nota que le Daulphiné est une chose a part, ou il y a tresorier general et chambre des comptes, a qui les chastellains du païs a cause a de leur office de recepte de leurs chastellenies font le serement et baillent la caucion et comptent en la chambre des comptes du Daulphiné ; mais le tresorier general dudit Daulphiné compte en la chambre des comptes du roy mesmement tant que le roy a le Daulphiné ou les revenues en sa main.

[7.6.e]  ¶ Item nota que, quant c'est office qui se donne a la nominacion d'autruy, comme les offices des [greniers] b ou des aides es terres des grans seigneurs a qui le roy a donné la nominacion, l'office se doit donner a celui que le seigneur y nomme au roy ; et en la lettre du don on y met ces motz ac icelui, a la nominacion de nostre tres chier et tres amé frere et cousin Tel, avons donné et octroyé, donnons et octroyons par ces presentes tel office etc., et tout le seurplus [fol. 47] comme es precedens. Et doit le notaire veoir la nominacion du seigneur pour savoir se la vaccacion est bonne, et aussi se le nom qui est en sa lettre d'office est celui qui est en la nominacion.

Charles etc., a tous ceulx etc. Comme nostre amé escuier d'escuierie Jehan Seaume, maistre des pors et passages en la seneschaucié de Beaucaire et lieutenant de nostre chastellain d'Aiguemortes1, ait commis jusques a ce que par nous y fust commis Tel a l'office de l'un des sergens de la garnison de nostre grosse tour Constantinea d'Aiguemortes2 ou lieu de Tel, lequel comme l'en dit est alé de vie a trespassement, ainsi qu'il nous est apparu par lettres dudit Jehan Seaume, savoir faisons que, oÿe la bonne relacion qui faicte nous a esté de la personne dudit Tel, voulons et octroyons qu'il soit et demeure oudit office de nostre sergent de ladicte garnisonb d'Aiguemortes ; et icelui office lui avons donné et donnons de grace especial par ces presentes pour le tenir et excercer d'ores en avant aux gaiges etc. tant comme il nous plaira. Si donnons en mandement par cesc mesmes presentes a nostredit chastellain d'Aiguemortes ou a son lieutenant que ledit Tel mette et institue de par nous en possession et saisine dudit office, prins et receu de nouvel le serement se mestier est, l'en face joïr et user paisiblement ensemble desdiz droiz, prouffiz et emolumens, et a lui obeïr ainsi qu'il appartendra. Mandons en oultre a nostre tresorier general dudit païs de Languedoc que par le tresorier de Nymes, ou autre qui lesdiz gaiges a acoustumé de paier, il les face paier chascun an audit Tel aux termes et en la maniere acoustumez. Et par rapportant ces presentes ou vidimus d'icelles fait etc. nous voulons iceulx gaiges etc. estre allouez es comptes dudit tresorier ou d'autre qui paiez etc. En tesmoing de ce etc. Donné etc.

[7.7.a]  ¶ Nota ces motz jusques a ce que par nous y feust pourveu ; car autrement telz chastellains ou autres officiers n'y doivent pourveoir ne [fol. 47v] commettre.

[7.7.b] * Item ces autres mots ainsi que par les lettres dudit Jehan Seaume nous est apparu ; car le notaire doit veoir les lettres et bien se donner garde s'elles sont de celui qui demande l'office et s'il vacque par celle maniere, car le roy s'en attent au notaire. Et ne doit le notaire jamais le mettre affirmativement ne aussi autres motz en affermant, s'il ne voit les lectres ou le scet certainement.

Charles etc., a tous etc. Savoir faisons que, pour la bonne relacion qui faicte nous a esté de la personne de Tel, a icelui avons donné et octroyé, donnons et octroyons de grace especial par ces presentes l'office de sergenterie de tel lieu ou de tel bailliage que souloit tenir feu Tel, vaccant a present par son trespassement si comme l'en dit, a icelui office avoir et tenir par ledit Tel aux droiz, prouffiz et emolumens acoustumez et qui y appartiennent tant comme il nous plaira, s'il est a ce suffisant. Si donnons en mandement par ces presentes au bailli de tel lieu ou a son lieutenant que ou cas dessusdit, prins et receu dudit Tel le serement acoustumé, icelui mette et institue ou face mettre et instituer en possession et saisine dudit office et d'icelui, ensemble des droiz, prouffiz et emolumens dessusdiz, le face, seuffre et laisse joïr et user plainement et paisiblement, et a lui obeïr et entendre de tous ceulx qu'il appartendra es choses touchans et regardans ledit office, osté et debouté d'icelui office tout autre illicite detenteur non ayans sur ce noz lettres de don precedens en date ces presentes. Ausquelles, en tesmoing de ce, nous avons fait mettre nostre seel. Donné etc.

[7.8.a] ¶ Nota que quant celui a qui on donne un office est de l'ostel du roy en office que le roy le congnoisse, on a acoustumé de mettre ces motz Savoir faisons que nous, confiens de la personne de Tel, ou : du sens, loyauté et diligence de Tel, a icelui avons donné etc. Et ainsi on n'y doit point mettre celle clause s'il est a ce souffisant ; [fol. 48] car le roy se confie par ses lettres de celui a qui il donne l'office et de sa suffisance. Mais quant celui a qui on donne l'office est autre que de l'ostel du roy, posé ores qu'il fust a ung des grans seigneurs du sang royal, on y met ces motz pour la bonne relacion etc., comme il est miz en la lettre precedent, et ainsi on y doit mettre s'il est a ce suffisant.

[7.8.b] ¶ Item nota ce mot si comme l'en dit  ; car le roy s'en rapporte a ce qu'il en est tant de la mort comme de la vaccacion par sa mort.

[7.8.c] ¶ Item nota ces motz que, prins et receu le serement etc., car en tous offices royaulx fault faire serement avant la possession.

[7.8.d] ¶ Item nota ce mot ou cas dessusdit, car par ce le roy charge le juge de deux choses, c'est de savoir se l'office est vaccant, et se celui a qui on l'a donné est suffisant.

[7.8.e] ¶ Item nota celle clause tant qu'il nous plaira, car elle se met en tous dons d'offices qui se seellent en chancelerie, fors en dons d'offices de notaire et de sergent d'armes du roy, pour ce que ce sont offices perpetuelz de roy en roy qui ne les forfait.

Charles etc., au prevost de Montargis1 ou a son lieutenant, salut. Savoir te faisons que, pour le bon rapport qui nous a esté fait de la personne de Tel, nous lui avons donné et donnons de grace especial par ces presentes l'office de sergenterie de ladicte prevosté, que souloit tenir et exercer Tel, vaccant a present par son trespassement si comme l'en dit, pour ledit office avoir et tenir d'ores en avant par ledit Tel aux droiz, prouffiz et emolumens acoustumez et qui y appartiennent tant qu'il nous plaira, s'il est a ce suffisant. Si te mandons et enjoingnons que, prins et receu dudit Tel le serement acoustumé, tu oudit casa le met et institue en possession et saisine dudit office de sergenterie et d'icelui, ensemble desdiz droiz, prouffiz et emolumens, le fay, seuffre et laisse joïr et user paisiblement, et a lui obeïr etc., osté etc. Donné etc.

[7.9.a] ¶ Nota que toutes sergenteries ou il y a gaiges, comme sergenteries de [fol. 48v] forestz et autres, et aussi sergenteries de bailliages ou de seneschauciez et sergenteries a cheval de Chastelet de Paris, se doivent faire en double queue. Mais petites sergenteries, comme de prevostez ou de vicontez, se font en simple queue comme la precedant.

[7.9.b] ¶ Item nota que es lettres d'offices on doit au plus pres qu'on peut recommander ou louer celui a qui on donne l'office de vertus pertinens a l'office et a lui ; comme de capitaine d'une place, on le doit louer de vaillance, de prudence, de services en guerre ; d'un receveur, de loyauté, de preudommie ; d'ung juge, de suffisance, de litterature, de preudommie, d'amour de justice ; et sic de aliis. Et quant ce sont petis offices ou menues gens pou congneuz, il suffist simplement pour la bonne relacion que avons eue deTel, sanz mettre de son sens, de sa loyauté ne autre chose.

Charles etc., a tous etc. Comme ung nommé N., qui par aucun temps a tenu l'office de gardea de la monnoye de Thoulouse, ait fait et commis oudit office pluseurs faultes, larrecins et abuz1, au grant dommage et prejudice de nous et de la chose publique dudit lieu de Thoulouse, et pourroit plus faire se par nous n'estoit pourveu d'autre en son lieu audit office, ainsi que on nous a acertenez, savoir faisons que nous, consideré ce que dit est et la bonne relacion qui faicte nous a esté de la suffisance etc. de nostre amé Tel, a icelui oudit cas avons donné et octroyé, donnons et octroyons de grace especial par ces presentes ledit office de garde de ladicte monnoye de Thoulouse, pour icelui office de garde avoir etc., aux gaiges etc., tant comme il nous plaira, s'il est etc. Si donnons en mandement par ces presentes a noz amez et feaulx les generaulx maistres de noz monnoyes ou païs de Languedoc que de et sur lesdictes faultes et abuz ilz se informent bien et deuement et, s'il leur en appert, procedent contre ledit N. a la privacion de sondit office et autrement comme ilz verront estre a faire, se ja fait n'avoit esté ; et, ladicte privacion ou declaracion deuement faicte, mettent ou facent mettre [fol. 49] ledit Tel en possession et saisine dudit office de garde de ladicte monnoye de Thoulouse, prins et receu de lui premierement le serement et caucion acoustumez, et d'icelui, ensemble etc., et a lui obeïr etc. Mandons en oultre, en commettant etc., a nostre amé et feal conseiller Alixandre Le Boursier2, l'un des commissaires sur le fait etc. et par nous envoyé pour le gouvernement d'icelles oudit païs de Languedoc, que par le maistre particulier de ladicte monnoye de Thoulouse qui est a present et qui sera ou temps a venir il face paier audit Tel lesdiz gaiges etc. aux termes etc. Et par rapportant ces presentesetc., tout ce qui etc. sera alloué es comptes dudit maistre etc. par noz amez et feaulx gens de noz comptes etc. Non obstans quelzconques ordonnances, mandemens etc. En tesmoing de ce etc. Donné etc.

[7.10.a]  ¶ Nota que, quant le roy ou le chancelier ne sont informez du meffait d'un officier, ilz mandent seulement qu'on procede contre lui, et ne mande pas qu'on lui oste son office ne que on y institue celui a qui il le donne, sinon jusques a ce que celui qui le tenoit en soit privé par procés ordinaire ; aussi par ordonnances royaulx nul officier ne doit estre osté de son office sanz cause et sanz y estre oÿ.

Charles etc., a tous ceulx etc. Savoir faisons que, pour le bon rapport qui nous a esté fait de la personne de Jehan du Mes, a icelui avons donné et octroyé, donnons et octroyons par ces presentes de grace especial l'office dea sergenterie de nostre forest de Biere1 en la garde et contree2 de tel lieu, vaccant a present, comme l'en dit, par la simple resignacion aujourd'uy faicte en noz mains vel : es mains de nostre amé et feal chancelier par Tel, derrenier possesseur dudit office vel sic : par Tel, procureur quant a ce suffisamment fondé de Tel, derrenier detenteur dudit office, pour icelui office avoir, tenir et excercer d'ores en avant par ledit Jehan du Mes aux gaiges, droiz, prouffiz et emolumens acoustumez et qui y appartiennent tant comme [fol. 49v] il nous plaira, s'il est a ce suffisant. Si donnons en mandement par ces presentes aux maistres de noz eaues et forestz es païs de France, Champaigne et Brie et au maistre forestier de nostredicte forest de Biere ou a leurs lieuxtenans et a chascun d'eulx, si comme a lui appartendra, que, prins et receu dudit Jehan du Mez le serement acoustumé, icelui oudit cas mettent et instituent ou facent mettre et instituer en possession et saisine dudit office et d'icelui, ensemble des gaiges etc., et a lui obeïr etc. Mandons aussi a noz amez et feaulx gens de noz comptes que par nostre receveur ordinaire de Meleun ou autre qui lesdiz gaiges a acoustumé de paier ilz les facent paier, bailler et delivrer d'ores en avant audit Jehan du Mez chascun an aux termes et en la maniere accoustumez ; et par rapportant vidimus de ces presentes, fait soubz seel royal ou autre autentique, pour une foiz et quittance suffisant sur ce tant seulement, tout ce qui paié lui en aura esté allouent es comptes et rabatent de la recepte dudit receveur ordinaire ou d'autre qui paié l'aura, sanz contredit ou difficulté. Non obstans quelzconques ordonnances, mandemens ou defenses a ce contraires. En tesmoing de ce, nous avons fait mettre nostre seel a ces presentes. Donné a Saint Aignan en Berry3, le XX e jour de juillet, l'an de grace mil CCCCXXV, et de nostre regne le tiers.

[7.11.a] ¶ Nota que en office qui vacque par resignacion on ne met point celle clause osté et debouté d'icellui office tout autre illicite detenteur non ayant etc.

[7.11.b]  ¶ Item nota que des offices sur le demaine ou il y a gaiges, comme bailliz, seneschaulx, procureurs du roy, receveurs ordinaires, gardes et sergents de forestz et d'eaues, maistres de pors et autres, on doit mander l'expedicion des gaiges, et aussi la caucion ou il y a recepte on la doit bailler a nos seigneurs de la chambre des comptes et tresoriers ; et d'autres offices qui ne se extendent pas sur le demaine, comme grenetiers, esleuz officiers sur le fait des aides, contreroleurs, receveurs de tailles, de subsides et autres, on en doit mander l'expedicion aux generaulx ou commissaires sur le fait des finances.

[7.11.c]  ¶ Item nota que d'offices sur le fait de b monnoyes, comme gardes, essayeurs, contregardes et tailleurs, on en doit faire adrecer l'institucion et la recepcion du serement a nos seigneurs les generaulx maistres des monnoyes ; et le plus souvent se donnent telz offices a leur relacion et aprés [fol. 50] leur examen et le maistre particulier de la monnoye ou en sont les offices paie les gaiges des officiers.

Charles etc., a tous ceulz etc. Savoir faisons que, pour la bonne relacion qui faicte nous a esté des bonté, suffisance, loyauté et diligence de Tel, cappitaine etc., et pour consideration des bons et agreables services qu'il a faiz par long temps oudit office de etc. et autrement tant a feu nostre tres chier seigneur et perea , cui Dieu pardoint, comme a nous aussi, et esperons que encores nous face ou temps a venir, il nous plaist et voulons que icelui Tel soit et demeure oudit office de etc. et icelui office, en tant que par le trespassement de nostredit feu seigneur et pere et par nostre advenement au royaume et couronne il est ou pourroit estre vaccant et cheu a nostre disposicion, lui avons confermé et donné de nouvel, confermons et donnons par ces presentes, pour le tenir et excercer d'ores en avant par ledit Tel aux gaiges, franchises, droiz, prouffiz et emolumens acoustumez et qui y appartiennent et tout ainsi qu'il a fait le temps passé tant qu'il nous plaira. Si donnons en mandement par ces presentes a tel bailly etc. que ledit Tel maintiengne et garde oudit office ou l'en mette et institue de nouvel de par nous en possession et saisine, prins et receu de lui le serement acoustumé ; et dudit office, ensemble desdiz gaiges etc., le face etc., et a lui obeïr etc., osté et debouté d'icelui tout autre illicite detenteur non ayant depuis nostredit advenement noz lettres de don etc. precedens en date ces presentes. Mandons en oultre a noz amez et feaulx gens de noz comptes que par tel ou autre qui lesdiz gaiges etc. ilz les facent paier etc. aux termes etc. ; et par rapportant ces presentes ou vidimus etc., allouent es comptes etc., sanz aucun contredit ou difficulté. Non obstans quelzconques ordonnances etc. En tesmoing etc. Donné etc.

Loys, duc de Guienne, daulphin de Viennoiz, au gouverneur de La Rochelle1 ou a son lieutenant, salut. Comme par don et octroy a nous fait par mon seigneur a nous compete et appartiengne la nominacion de tous les officiers estans en noz païs, terres et seigneuries de Guienne et es terres enclavees en yceulx et aussi en ladicte ville de La Rochelle et ou gouvernement d'icelle, savoir vous faisons que nous, confiens a plain des etc. de Tel etc., nous icellui avons aujourd'uy nommé et nommons par ces presentes a l'office de etc., pour et ou lieu de Tel, lequel, pour ce qu'il n'a aucunes lettres de nominacion de nous a cause dudit office et pour certaines autres causes qui a ce nous ont meu et meuvent, nous avons deschargié et deschargons par ces presentes dudit office, pour icelui office avoir, tenir et d'ores en avant excercer par ledit Tel ou son procureur pour lui aux gaiges etc., tant comme il plaira a mondit seigneur et a nous. Si prions et requerons mondit seigneur que audit Tel lui plaise donner et confermer a nostredicte nominacion ledit office de etc., et en icelui le faire mettre et instituer en possession et saisine, aux gaiges etc. ; et a vous, gouverneur, ou a vostredit lieutenant mandons expressement que, aprés ce qu'il vous sera deuement apparu des lettres patentes de don de mondit seigneur sur ce faictes et octroyees audit Tel, vous d'icelui prenez le serement en tel cas acoustumé, en le mettant et instituant ou faisant mettre et instituer en possession et saisine dudit office de etc. et d'icelui, ensemble des gaiges, droiz etc., le faites, souffrez et laissiez joïr et user plainement et paisiblement, et a lui obeïr etc., en ostant et deboutant ledit Tel et tout autre illicite detenteur non aiant sur ce noz lettres de nominacion precedens en date ces presentes. Donnees en tel lieu, le etc.

Charles etc., a tous etc. Savoir faisons que, pour la bonne relacion qui faicte nous a esté de Tel et de ses sens etc., a icelui a la nominacion de nostre etc. avons donné et donnons de grace especial par ces presentes l'office de etc., que tient et occuppe de present ou : souloit nagaires tenir Tel, lequel nostredit etc., par vertu du povoir et commission par nous a lui donné de povoir commettre et instituer officiers telz que bon lui semblera es terresa etc., vaccans par mort ou autrement, pour certaines causes et consideracions qui a ce l'ont meu, a deschargié par ses lettres dudit office, et lequel Tel par ces presentes en avons deschargié et deschargons, pour icelui office de etc. avoir, tenir et excercer d'ores en avant par ledit Tel, aux gaiges, droiz etc. et audit office appartenans et telz et semblables que les y a et prent ou : avoit et prenoit ledit Tel, tant comme il nous plaira, s'il est a ce suffisant. Si donnons en mandement par ces presentes a tel que, prins et receu dudit Tel le serementetc., il le mette etc., et d'icelui ensemble etc., et a lui obeïr etc., en ostant et deboutant ledit Tel et tout autre etc. Et par ces mesmes presentes mandons a celui ou ceulx etc. Et par rapportant ces presentes ou vidimus etc. par noz amez et feaulx etc. Non obstans ordonnances etc. En tesmoing de ce, nous avons fait etc. Donné etc.

Charles etc., au bailli de Chartres ou a son lieutenant, salut. Tel nous a fait exposer que des le vivant de feu nostre tres chier seigneur et pere, cui Dieu pardoint, ledit office de N. lui fut donné et conferé, et aprés son trespassement le lui avons confermé et aussi donné de nouvel, et tousjours depuis s'i est bien et deuement gouverné, y a longuement servi feu nostredit seigneur et pere et nous aussi sanz faulte ou reprehencion aucune et par ce de raison et bonne equité n'en doit estre debouté ; neantmoins puis nagaires G., soubz couleur de certaines lettres de don teles quelles, qu'il se dit avoir obtenues de nous dudit office, causees a sa poste1 et teuz les bons services [fol. 54] dudit exposant, a tant fait et pourchacé que vous lui avez baillié la possession et saisine dudit office et s'est efforcié et efforce d'en debouter ledit exposant, sanz le recevoir a opposicion ; qui est en son grant dommage et prejudice, et plus seroit se par nous ne lui estoit sur ce pourveu de nostre grace et remede convenable de justice, si comme il dit, en nous humblement suppliant que, attendu ses bons services et que par ordonnances royaulx aucun officier ne doit estre desapointié de son office sanz cause et sanz estre oÿ en ses raisons et justificacions, nous lui vueillions sur ce pourveoir dudit remede. Pour quoy nous, consideré ce que dit est, vous mandons et enjoingnons, en commettant se mestier est, que a l'encontre desdictes lettres de don et autres que ledit Tel se dit avoir obtenues sur ledit office et aussi de l'execucion d'icelles vous recevez et nous mesmes oudit cas recevons ledit exposant a opposicion ; et pour proceder sur ycelle opposition, y veoir plus a plain, recevoir ycelui exposant, se mestier est, et faire en oultre ce qu'il appartendra par raison, adjournez ou faites adjourner les parties a certain et competant jour ou jours par devant noz amez et feaulx conseillers les maistres des requestes de nostre hostel en leur auditoire de nostre palais a Poictiers, en les certiffiant audit jour ou jours de ce que fait en aura esté. Et nous leur mandons et, pour ce que a eulx appartient la congnoissance et decision de noz offices et que par devant eulx lesdictes parties fineront de meilleur conseil sanz faveur que ailleurs, commettons que a icelles parties oÿes facent bon et brief droit. Non obstans quelzconques lettres surreptices etc. Donné etc.

Charles etc., au premier nostre sergent qui sur ce sera requis, salut. Nostre amé Tel nous a fait exposer que, ja soit ce qu'il nous ait bien servi en tel office par tel temps et que par les ordonnances royaulx aucun de noz officiers ne doie estre desapointié de son office sanz grant cause et sanz estre oÿ en ses defenses, neantmoins Tel, par vertu de certainnes noz lettres de don qu'il se dit avoir obtenues de nous dudit office par importunité de requerans ou autrement, s'est fait bouter en possession et saisine dudit office par Tel, executeur desdictes lettres, sanz vouloir recevoir ledit exposant a opposicion ; qui est en son grant dommage et deshonneur, si comme il dit, et plus seroit se par nous ne lui estoit sur ce pourveu de nostre grace et remede de justice, si comme il dit, requerant icelui. Pour quoy nous, consideré ce que dit est, qui ne voulons noz bons officiers estre desapointez sanz cause en ensuivant lesdictes ordonnances royaulx, te mandons et commettons par ces presentes que tu faces commandement de par nous audit Tel, executeur desdictes lettres de don, que a l'encontre d'icelles et d'autres obtenues par ledit Tel il reçoive ledit exposant a opposicion et, en son reffuz ou delay, toy mesmes le y reçoy ; et pour a plain le y veoir, recevoir, proceder sur ce et aler avant en oultre selon raison, adjourne lesdictes parties a certain et competant jour ou jours par devant noz amez et feaulx conseillers les maistres des requestes de nostre hostel en leur auditoire de nostre palais a Poictiers. Et nous leur mandons etc. comme en la precedent etc.

[7.21.a] ¶ Nota que en matiere d'offices le defendeur a avantage devant le demandeur, et mesmement au regart de la recreance ; et pour ce doit on adviser a faire la lettre d'estre receu a opposicion. Et qu'on ne preigne pas la maintenue, c'est assavoir qu'on ne face pas la conclusion de sa lettre tendant simplement qu'il soit maintenu en sa possession, car je tieng qu'on n'en donroit pas lettre sinon qu'on y mist et en cas d'opposition, et ainsi la partie adverse se pourroit opposer ou seroit opposant, et l'en la devroit faire demanderesse. [Les fol. 55-56 sont coupés.]

De par le roy
Maistres de nostre hostel et vous, maistre et contreroleur de nostre chambre aux deniers, savoir vous faisons que, pour la bonne relacion qui faicte nous a esté de la noblesce, loyaulté et diligence de nostre amé Tel, escuier, icelui avons aujourd'uy retenu et retenons par ces presentes en nostre eschanson pour nous desormais servir oudit office, aux gaiges, hostellages, livroisons, droiz, honneurs et prouffiz acoustumez et qui y appartiennent. Si vous mandons et a chascun de vous, si comme a lui appartendra, que, dudit Tel prins et receu le serement acoustumé, vous enregistrez ou faites enregistrer nostre presente retenue es registres, papiers et escripz de nostredicte chambre aux deniers avecques celles de noz autres eschansons ; et des gaiges, hostellages, livroisons, droiz, honneurs et prouffiz dessusdiz le faites, souffrez et laissez joïr et user paisiblement, en lui comptant et paiant iceulx gaiges et hostellages aux terme et en la forme et maniere acoustumez. Et par rapportant ces presentes ou vidimus d'icelles, fait soubz seel royal ou autentique, pour une foiz seulement, nous voulons tout ce que compté et paié lui en aura esté estre alloué es comptes et rabatu de la recepte de vous, maistre de nostredicte chambre aux deniers, par noz amez et feaulx gens de noz comptes ; ausquelz nous mandons que ainsi le facent sanz aucun contredit ou difficulté. Non obstans quelzconques ordonnances, mandemens, restrinctions ou defenses a ce contraires. Donné etc.

[8.1.a] ¶ Nota que en teles retenues ne se met point la clause tant qu'il nous plaira, car de soy elle y est entendue.

[8.1.b] * Item on n'y met [fol. 57v] point qu'on rapporte quittance, mais seulement la retenue ou le vidimus pour une foiz ; car, puis qu'on est receu a servir en l'officea ou on est retenu et qu'on en a fait le serement et est on enregistré en chambre aux deniers tant qu'il servira, on lui comptera ses gaiges et hostellages au bureau devant nos seigneurs les maistres d'ostel et sera mis en l'escroe pertinent et ce qui est compté se paie par vertu de l'escroe sanz point de quittance, ce qui ne se fait pas en autres receptes ou offices hors hostel.

[8.1.c]  ¶ Item le notaire doit adviser de louer la personne retenue en office de vertu afferent a l'office, comme de noblesce, de vaillance ou de honnesteté, se c'est office de gentilhomme ; ou de experience, de neteté1 et diligence, se c'est a autres2.

[8.1.d] ¶  Item nota que, quant c'est office de secretaire, on y adjouste mon seigneur le chancelier, en disant ainsi : Chancelier, maistres de nostre hostel et vous, maistre et contreroleur de nostre chambre, etc. ; et met on Si vous mandons etc. que, prins et receu par vous, chancelier, le serement acoustumé etc., vous, maistres et contreroleur, faites enregistrer etc., car le serement de secretaire appartient a mon seigneur le chancelier a recevoir.

[8.1.e] * Item nota que, quant aucun est mort et on est retenu en son lieu, on puet mettre en la retenue qu'on le retient en tel office ou lieu de Tel.

[8.1.f] ¶ Item celui qui est retenu a a faire faire vidimus de sa retenue, puis porter et vidimus et retenue devers nos seigneurs les maistres d'ostel et de chambre aux deniers, la faire le serement en leurs mains, bailler son vidimus en chambre aux deniers, et faire certiffier sur la retenue qu'il a fait le serement etc. avant qu'il se ingere de servir.

[8.1.g]  ¶ Item nota que, ja soit ce que teles retenues se seellent du seel secret, si ne le met on pas en la lettre, mais dit on simplement Donné en tel lieu, comme en une lettre patente.

Par le roy
Maistres de nostre hostel et vous, maistre et contreroleur de nostre chambre aux deniers, savoir vous faisons que, pour le bon rapport qui fait nous a esté de la suffisance, industrie, loyaulté et diligence de N. et pour consideracion des bons services qu'il nous a faiz ou fait des guerres, fait de jour en jour et esperons qu'il nous face ou temps a venir, icellui avons retenu et retenons par ces presentes en tel office, pour nous y servir d'ores en avant, aux honneurs, droiz, prouffiz et emolumens acoustumez. Si vous mandons et a chascun de vous, si comme a lui appartendra, que, prins et receu dudit Tel le serement acoustumé, vous nostre presente retenue faites enregistrer es registres, papiers et escripz de nostredicte chambre aux deniers en la forme accoustumee, et dudit office ensemble desdiz droiz, prouffiz et emolumens faites, souffrez et laissiez ledit N. joïr et user paisiblement. Donné etc.

[8.2.a]  ¶ Combien que souventes foiz aucuns ne demandent retenue d'aucun office que pour honneur, toutesvoyes, quant ce sont gens qui les valent, on les fait souvent aprés intervale de temps servir en ordonnance. Et pour ce n'est pas bon de trop user de ceste retenue cy, qui est simple d'onneur, mais a gens de bien on leur peut faire la retenue precedent ceste et se attendre de l'ordonnance de servir a ceulx a qui il appartient.

Charles etc., a tous ceulx qui ces presentes lettres verront, salut. Savoir faisons que, pour consideracion des bons et aggreables services que nostre chier et feal cousin Tel nous a faiz ou fait de la guerre et autrement, en pluseurs manieres fait chascun jour et esperons que encores face ou temps a venir, confiens a plain de ses sens, loyauté, preudommie et bonne diligence, icelui avons retenu et retenons par ces presentes en nostre conseiller, aux honneurs, prerogatives, franchises, gaiges, droiz, prouffiz et emolumens acoustumez. Si donnons en mandement par ces mesmes presentes a nostre amé et feal chancelier que, prins et receu dudit nostre conseiller le serement acoustumé, icelui appelle et convoque ou face appeler et convoquer en noz conseilz et affaires ; et dudit office ou estat de conseiller ensemble des honneurs, prerogatives, franchises, gaiges, droiz, prouffiz et emolumens dessusdiz le face, seuffre et laisse joïr et user plainement et paisiblement. En tesmoing de ce, nous avons fait mettre nostre seel a ces presentes. Donné etc.

Charles etc., a tous ceulx etc. Savoir faisons que nous, confiens a plain des grans sens, loyauté, preudommie, experience et autres commendables vertus estans en la personne de nostre amé et feal Tel et considerans les notables et prouffitables services qu'il nous a faiz par long temps tant au vivant de feu nostre tres chier seigneur et pere, cui Dieu pardoint, comme depuis et fait de jour en jour en pluseurs manieres et pour autres causes a ce nous mouvans, icelui Tel avons retenu et ordonnéa, retenons et ordonnons par ces presentes nostre conseiller de nostre grant conseil, pour nous servir oudit estat, estre et assister a noz plus grans conseil et besoignes et joïr et user des prerogatives, preeminences, droiz, prouffiz et emolumens qui y appartiennent et telz b que usent et joÿssent les autres conseillers de nostre grant conseil, et prendre et avoir a ceste cause telz gaiges ou pension que par noz autres lettres lui seront tauxez et ordonnez. Si donnons en mandement par ces mesmes presentes a nostre amé et feal chancelier que, prins et receu dudit Tel le serement acoustumé, il le advoque et face advoquer a nosdiz conseilz et besoingnes et joïr et user des prerogatives, franchises et preeminences dessusdictesc. En tesmoing de ce, nous avons fait mettre nostre seel a ces presentes. Donné etc.

Charles etc., a noz amez et feaulx les generaulx conseillers par nous ordonnez sur le fait et gouvernement de toutes noz finances tant en Languedoïl comme en Languedoc, salut et dilection. Savoir vous faisons que pour nous servir tant a l'encontre des Anglois1 noz anciens ennemis et adversaires comme partout ailleurs ou il nous plaira nous confiens de la loyauté, vaillance et preudommie de nostre amé N., escuier du païs de Bretaigne, icelui avons aujourd'uy retenu et retenons par ces presentes au nombre et charge de cent hommes d'armes, sa personne enz comprise, a noz gaiges acoustumez ; et pour lui aidier a supporter les fraiz et despens que faire lui convendra a cause de ladicte charge, lui avons ordonné et ordonnons par ces presentes pour son estat la somme de tant par chascun moys, oultre et par dessus ses gaiges [fol. 61] ordinaires vel sic : la somme de vint solz tournois pour chascun homme d'armes dont il fera monstre ou reveue. Si vous mandons que par l'un de nos tresoriers des guerres vous, des deniers a lui ordonnez ou a ordonner pour convertir ou fait de son office, faites faire prest et paiement audit N. de sondit estat et des gaiges de lui et de ceulx de sa chambre et aux autres de sadicte retenue ou a leurs chiefs de chambre pour eulx de leursdiz gaiges pour ung mois entier a commencier du jour de leur premiere monstre faicte ou a faire par devant ceulx qu'il appartendra vel sic : par devant nos amez et feaulx les mareschaulx de France, et d'ilec en avant de mois en mois, selon leurs reveues ainsi faictes jusques a leur cassement. Et par rapportant ces presentes ou vidimus d'icelles, fait soubz seel autentique, avecques lesdictes monstre ou reveues et quittance suffisant sur ce dudit N. de sondit estat et des gaiges de lui et de ceulx de sa chambre et des autres de sa compaignie ou de leurs chiefz de chambre pour eulx, nous voulons et mandons tout ce que a la cause dessusdicte paié leur aura esté par l'un desdiz tresoriers des guerres estre alloué en ses comptes et rabatu de sa recepte par noz amez et feaulx gens de noz comptes ou autres qu'il appartendra sanz aucun contredit ou difficulté. Non obstans ordonnances, mandemens, restrinctions etc. Donné etc.

[8.9.a] ¶  Nota que aucunes foiz en retenue de gens d'armes on n'y met point d'estat, car ou on n'en veult point bailler ou l'en le baille par autres lettres a part, et ainsi on ne doit point mettre en la retenue la clause ou les motz subsequens qui font mencion de l'estat.

[8.9.b] ¶  Item nota que les mareschaulx de France ou leurs commis passent les monstres des gens d'armes et des archiers, mais le maistre des arbalestriers passe celles des arbalestriers.

[8.9.c] ¶  Item nota que le paiement des gens d'armes et de gens de trait se doit faire par les tresoriers des guerres et non pas par autres receveurs.

[8.9.d]  ¶ Item nota que souventes foiz on met et declare es retenues les gaiges ou souldees telz qu'on veult que les gens d'armes les ayent par moys.

[8.9.e]  ¶ Item nota que avecques la retenue et les quittances fault mettre qu'on rapporte es comptes des tresoriers les monstres et reveues.

Charles etc., a tous etc. Savoir faisons que nous, a plain informez et confiens de la personne de Tel, seigneur de tel lieu, et de ses gransa vertus, preudommie, vaillance et bonne diligence, icelui avons aujourd'uy retenu et retenons par ces presentes en nostre conseillerb de nostre grant conseil et nostre chambellan, pour nous servir d'ores en avant esdiz offices aux honneurs, prerogatives, preeminences, franchises, droiz et libertez et autres prouffiz acoustumez et qui y appartiennent ; et pour ladicte cause et afin qu'il ait mieulx de quoy avoir et soustenir son estat plus honnorablement entour nous, oultre tous autres bienffaiz, lui avons ordonné et donné, ordonnons et donnons par ces presentes la somme de cinq cens livres tournois de pension par an, a icelle pension avoir des deniers de noz finances par la main de nostre amé et feal Guillaume Charrier, receveur general d'icelles1, ou par autre qui ou temps a venir le sera, aux termes et en la maniere en tel cas acoustumez. Si donnons en mandement a nostre amé et feal chancelier que ledit Tel, duquel nous avons prins le serement en tel cas acoustumé, il face, seuffre et laisse joïr et user des honneurs, prerogatives, preeminences, franchises, libertez et autres droiz et prouffiz dessusdiz et le appelle en noz conseilz ainsi comme noz autres conseillers toutes foiz que besoing sera ; mandans aussi a noz amez et feaulx conseillers les commissaires par nous ordonnez sur le fait et gouvernement de toutes finances tant en Languedoïl comme en Languedoc que par ledit receveur qui a present est ou par autre qui pour le temps a venir le sera ilz facent paier et delivrer audit Tel ladicte pension de V^C livres tournois par an, aux termes et en la maniere en tel cas acoustumez. Et par rapportant ces presentes ou vidimus d'icelles, fait soubz seel autentique, pour la premiere foiz seulement et quittance sur ce dudit Tel, nous voulons tout ce que paié et delivré lui aura esté de ladicte pension estre alloué es comptes et rabatu de la recepte dudit receveur general present ou a venir par noz amez et feaulx gens de noz comptes ; ausquelz nous mandons que ainsi le facent etc. Non obstans quelzconques ordonnances etc. En tesmoing de ce, nous etc. Donné etc.

Charles etc., au bailly de Saint Pere le Moustier1 et aua prevost de Cucey2 ou a leurs lieuxtenans, salut. Nostre amé Tel, aumosnier de nostre tres chier et améb cousin Charles de Bourbon3, nous a exposé que, comme, vaccant le doyenné de Heriçon4, ceulx du chappitre dudit lieu, a qui de plain droit appartient l'election dudit doyenné, en usant de droit commun ayent esleu ledit exposant audit doyenné et lui ait esté conferé par l'arcevesque de Bourges, ordinaire d'icelui, lequel exposant par vertu desdictes election, collacion et provision ait prins et apprehendé la possession et saisine dudit doyenné et en ait joÿ et usé et encores face, et combien que par les ordonnances royaulx faictes a Paris ou grant conseil de feu nostre tres chier seigneur et pere, cui Dieu pardoint, par nous tenu en la chambre de nostre parlement, presens et appellez pluseurs notables prelaz, nobles, gens d'Eglise et autres du grant conseil de feu nostredit seigneur et de nous, des notables docteurs maistres de l'université de Paris, les procureur general et advocat de mondit seigneur oudit parlement et autres notables personnes en grant nombre, sur le fait de la reducion de l'Eglise de France [fol. 71] et de nostre Daulphiné en ses franchises et libertez anciennes, ait esté ordonné entre autres choses que aux benefices electifz desdiz royaume et Daulphiné seroit pourveu par les elections, collacions ou institucions des ordinaires ausquelz il appartient de droit commun ou de coustume selon les anciens droiz communs et les conseilz generaulx cessans et regectez du tout et non obstans quelzconques reservacions generales ou especiales, defenses, expectacions ou graces avecques opposicions de droit irritans faictes ou a faire, octroyees ou a octroyer, et par lesdictes ordonnances et lettres sur ce faictes ait esté mandé et commis a tous seneschaulx, baillifz, prevostz et autres juges quelzconques desdiz royaume et Daulphiné que toutes les personnes de quelque estat qu'ilz fussent ou soient qui vendroient ou attempteroient au contraire feussent et soient pugnies comme transgresseurs desdictes ordonnances telement que ce feust exemple a tous autres5, neantmoins un nommé Tel et autres par vertu de certainnes graces, expectacions ou reservacions qu'ilz se dient avoir de court de Romme se sont efforciez et efforcent d'avoir et apprehender la possession et saisine dudit doyenné et a ceste cause faire citer et travailler ledit exposant et ceulx dudit chappitre de Heriçon ou autrement le molester contre raison et lesdictes ordonnances et ou grant prejudice et dommage d'icelui exposant, si comme il dit, requerant sur ce nostre provision. Pour quoy nous, consideré ce que dit est, vous mandons, commandons et, pour ce que ledit benefice est assis oudit bailliage, se mestier est commettons par ces presentes, et a chacun de vous sur ce requis, que, s'il vous appert desdictes election et collacion faictes audit exposant dudit doyenné et autrement de ce que dit est6, vous ycelui exposant maintenez et gardez en possession et saisine dudit doyenné et d'icelui et des fruiz et revenues qui y appartiennent le faites joïr et user paisiblement et plainement, en faisant ou faisant faire inhibicion et defense de par nous ausdiz de chappitre et autres qu'il appartendra sur certaines et grans peines a nous a appliquer qu'ilz ne reçoivent ne mettent ledit Jehan de La Grange7 en possession et saisine dudit doyenné ne autre quelconque par vertu de expectacion, reservacion ou autres lettres de court de Romme, et aussi audit de La Grange, ses procureurs ou entremetteurs et autres qu'il appartendra et a chascun d'eulz qu'ilz ne soient si hardiz de user [fol. 71v] desdictes graces, reservacions ne autres lettres de court de Romme au contraire desdictes ordonnances ne de traire ne faire citer ne convenir lesdiz de chappitre, icelui exposant ne leurs procureurs ou entremetteurs en ladicte court de Romme ne autre part hors de nostre royaume a cause dudit doyenné, en les contraingnant a ce et a revoquer et rappeller et mettre au neant a leurs despens tout ce que fait ou fait faire auroient au contraire desdictes ordonnances par prinse et arrest desdictes bulles et lettres et de leurs autres biens et autrement comme on a acoustumé a faire en tel cas ; et se sur ce naist debat ou opposicion, lesdictes bulles, citacions et autres lettres et procés de court de Romme mises et tenues en nostre main jusques autrement en soit ordonné, attendu que ce touche lesdictes ordonnances faictes oudit parlement, dont la congnoissance appartient a icelui parlement, adjournez ou faites adjourner les opposans a certain et competant jour ordinaire ou extraordinaire de ce present parlement a Poictiers, non obstant qu'il siee, se bonnement peut estre fait, sinon du parlement a venir, pour dire les causes de leur opposicion etc., en certiffiant etc. Ausquelz nous mandons etc. Car ainsi nous plaist il et voulons qu'il soit fait. Non obstans quelzconques etc.

Charles, par la grace de Dieu roy de France, a tous noz lieuxtenans, connestable, mareschaulx, admiraulx, visamiraulx, seneschaulx, bailliz, prevostz, cappitaines, chastellains, gardes de bonnes villes, citez, chasteaulx, forteresses, bastides, pons, pors, passages, travers, peages, chaucees, jurisdicions, destroiz et autres lieux quelzconques, a tous maires, eschevins, bourgoiz, jurez et habitans de villes, et a tous noz autres officiers, justiciers et subgetz, bienvueillans, amis et alliez de nous et de nostre royaume ausquelz ces presentes seront monstrees, salut et dilection. Comme souventes foiz pour besoignes et affaires qui grandement nous touchent ou les affaires de nostre royaume Tel, chevaucheur de nostre escuierie, soit envoyé de par nous en pluseurs lieux en nostredit royaume et dehors, nous mandons a vous, nos justiciers, officiers et subgez, prions et requerons vous, amis, aliez et bienvueillans, que ledit Tel, lui quatriesme en sa compaignie et au dessoubz, armez ou desarmez, avec leur or, argent, joyaulx, bouges, harnoiz, chevaulx, lettres closes ou patentes et autres biens et choses quelzconques vous laissez, chascun de vous endroit soy, passer, sejourner, demourer et retourner par lesdictes villes, citez, chasteaulx, forteresses, bastides, pons, pors, passages, travers, jurisdicions et destroiz de jour et de nuit, plainement et paisiblement, sanz leur donner ou faire ne souffrir estre fait ou donné en corps ne en biens destourbier ou empeschement aucun ; mais a nostredit chevaucheur pourveez ou faites pourveoir de bon et seur conduit. Et pour plus diligemment faire et acomplir [fol. 79v] nosdictes besoingnes et affaires, lui baillez ou faites bailler et delivrer bonnes et seures gardes, chevaulx et autres neccessitez a ses despens et par pris raisonnable, se mestier en a et il vous requiert, telement que nostre service n'en soit retardé ou empeschié. Saichans, noz justiciers, officiers et subgetz, que, se vous estes trouvez faisans le contraire, il nous en desplaira et vous en ferons punir telement que ce sera exemple a tous autres ; et vous, noz bienvueillans, amis et alliez, en vueilliez tant faire que nous vous en doyons savoir gré et comme en cas pareil vouldriez que feissions faire pour vous ou les vostres en cas semblable ou greigneur. Et pour plus ferme et seure chose, nous avons prins et mis, prenons et mettons d'abondant nostredit chevaucheur avecques sa famille, choses et biens quelzconques en nostre especial sauvegarde. Voulens ces presentes demourer en leur force et vertu jusques a un an prouchain venant. Donné a etc.

[10.1.a]  ¶ Nota qu'on ne baille pas communement ces lettres de passage ainsi amples, sinon aux chevaucheurs qui sont de l'ordonnance de l'escuierie du roy.

[10.1.b] * ¶ Item qu'elles ne durent que un an et que on ne mande pas qu'on leur face provision de gardes et chevaulx, sinon a leurs despens.

[10.1.c] * ¶ Item nota ce mot feissions faire, car mieulx est qu'il y ait feissions faire que qu'il n'y eust seulement feissions ; car le roy de soy ne pourverroit pas de chevaulx, de vivres ne d'autres neccessitez aux chevaucheurs ou autres de ses bienvueillans, mais le feroit faire.

De par le roy.
Vous, cappitaines, chastellains, gouverneurs, maires, eschevins, consulz, jurez, bourgoiz et habitans de bonnes villes, chasteaulx, forteresses, pons, pors, passages et destroiz, cappitaines de gens d'armes, archiers, arbalestriers et autres gens de guerre estans en nostre royaume, laissez passer, sejourner et rapasserN., que pour aucunes choses qui nous touchent nous envoyons en tel lieu  ; et ne lui faites ou donnez ne souffrez estre fait ou donné aucun arrest ou empeschement ne a ceulx de sa compaignie jusques a tel nombre et au dessoubz, en corps ne en biens, en quelque maniere que ce soit ; ainçoiz leur administrez vivres et autres choses neccessaires a leurs despens, se requis en estes.Saichans que, se ainsi ne le faites, nous vous en ferons punir par maniere que les autres y prendront exemple. Donné a Tours le […]a jour de etc.

[10.2.a] ¶ Nota que a telz passages a seel placqué ne se doivent adrecer que aux subgez seulement et non point a aliez ou bienvueillans, puisqu'il y a en teste De par le roy.

[10.2.b] ¶  Item communement on n'y met point de temps, pour ce que ce sont passages volans.

[10.2.c]  ¶ Item nota qu'il suffist de dire simplement Donné en tel lieu, sanz dire soubz nostre seel de secret ou soubz seel placqué.

Charles, filz du roy de France, regent le royaume, daulphin de Viennois, duc de Berry, de Touraine et conte de Poictou, a tous etc. Comme pour la delivrance de nostre tres chier et amé cousin le conte d'Angoulesme1 et d'autres chevaliers et escuiers de ce royaume, qui des long temps a ont esté et sont en ostage avecques lui ou païs d'Engleterre es mains du duc de Clarance2 et d'autres seigneurs dudit païs ou de leurs gens, soit neccessité d'aler et venir, envoyer et escrire par devers le roy d'Engleterre3, ledit duc de Clarance et autres estans a present en ce royaume et par avanture d'aler ou envoyer oudit païs d'Engleterre, et il soit ainsi que par noz tres chiers et tres amez frere et cousins le duc d'Orleans et le conte de Vertus4, freres de nostredit cousin d'Angolesme, ou par les gens de leur conseil ait esté advisié que noz bien amez Jehan Sac5 et Telz et Telz, marchans et les aucuns bourgois de Paris, seroient moult propices pour conduire et demener le fait de la delivrance de nostredit cousin d'Angolesme et des autres hostages estans avecques lui oudit païs d'Engleterre, se de ce faire nous plaisoit donner congié et licence ausdiz marchans, sans lesquelz noz congié et licence iceulx marchans ne se vouldroient ne oseroient jamais entremettre dudit fait, savoir faisons que nous, desirans comme raison est la delivrance de nostredit cousin d'Angoulesme, a iceulx Telz et Telz et a chascun d'eulx avons donné et octroyé, donnons et octroyons par la teneur de ces presentes congié, licence et puissance que, jusques au terme de quatre mois prouchain venans a compter du jour de la date de ces presentes6, ilz puissent aler et eulx transporter par devers lesdiz roy d'Engleterre, duc de Clarance et autres dudit païs d'Engleterre et de envoyer par devers eulx et leur escrire une foiz ou pluseurs, et par tant de foiz durant ledit temps que besoing sera pour le bien de la besoingne, quelque part que soient yceulx roy d'Angleterre, duc de Clarance et autres aa qui il convendra et sera necessité de besoigner pour ceste cause, soit en ce royaume, en Angleterre ou ailleurs quelque part que ce soit, pour traictier, appointier et besoingner avecques les dessusdiz Angloiz et autres que mestier sera, tant en cedit royaume [fol. 81] comme ou païs d'Engleterre et ailleurs, sur le fait de la delivrance de nostredit cousin d'Angoulesme et des autres hostages dessusdiz ; voulans, octroyans et consentans que les dessusdiz Telz et Telz, les trois, les deux ou l'un d'eulx, leurs gens, serviteurs ou messages puissent aler et venir, acompaignez honnorablement selon leur estat, toutes et quantes foiz que bon leur semblera durant le temps dessusdit par devers les Angloiz, ou leur escrire pour ledit fait, franchement et quittement, sans aucun destourbier ou empeschement et sanz ce que pour occasion de ce aucun blasme, reprouche ou faulte leur puissent estre imputez ne imposez ores ne pour le temps a venir, en quelque maniere que ce soit. Et avecques ce pour l'execucion et acomplissement de ladicte delivrance de nostredit cousin d'Angoulesme et des autres hostages dessusdiz avons voulu et octroyé et par la teneur de ces presentes voulons, consentons, octroyons et nous plaist que les marchans dessusdiz et chascun d'eulx, leurs gens, serviteurs ou autres de par eulx puissent porter ou faire porter et rapporter, se mestier est, tant par eaue comme par terre, par devers lesdiz Anglois durant ledit temps toute la finance d'or et d'argent, joyaulx et autres choses licites quelzconques, en quelque façon ou espece qu'elles soient ou puissent estre, lettres obligatoires ou cedules de change et autres choses neccessaires touchans le fait de la delivrance de nostredit cousin d'Angoulesme et des autres hostages de sa compaignie, franchement, seurement et quittement, et sans pour ce paier aucuns peages, travers, acquitz, coustumes ou autres reddevances a nous ne a autres subgez de mon seigneur et de nous en quelque maniere que ce soit. Car ainsi nous plaist il et le voulons estre fait. Et pour contemplacion de nosdiz frere et cousins l'avons octroyé et octroyons de grace especial par ces presentes. Donné etc.

Charles etc., a tous connestables, mareschaulx, admiral, visadmiral, seneschaulx, baillifz, prevostz, vicontes, viguiers, chastellains, cappitaines, gouverneurs, bourgoiz et habitans de bonnes villes, citez, chasteaulx, forteresses, pons, pors, passages, travers, peages et destroiz, capitaines et meneurs de gens d'armes, archiers, arbalestriers, tant de ce royaume quea estrangiers estans en nostre service, et a tous noz autres justiciers, officiers et subjez, amis, alliez et bienvueillans de nous et de nostre royaume ausquelz ces presentes seront monstrees, salut et dilection. De la partie de noz amez Telz et Telz, bourgois et marchansb de nostre ville et cité de Bourges, nous a esté exposé que pour entretenir le fait de leur marchandise et mesmement pour fournir nous et nostre tres chiere et tres amee compaigne la royne1 de pluseurs vivres, denrees et marchandises pour la despense de nous et de noz serviteurs, ainsi qu'ilz ont entrepris, leur convient necessairement aler et envoyer en pluseurs et diverses parties de ce royaume et dehors, tant par mer que par terre, mais pour la diversité du temps et les dangiers et perilz qui sont sur les chemins a l'occasion des guerres et divisions qui sont en nostredit royaume ilz doubtent que aucun arrest ou empeschement fust fait ou donné a eulx ou a leurs agensc et varlez, se ilz n'avoient noz lettres de seurté et passage, ainsi qu'ilz dient, requerans icelles. Pour quoy nous, acertenez de la loyaulté desdiz Telz, mandons et expressement enjoingnons a vous, noz justiciers, officiers, serviteurs et subgez, prions et requerons vous, amiz, alliez et bienvueillans, que lesdiz Telz et chascun d'eulx et leurs gens ou facteurs, portans ces presentes ou vidimus d'icelles avecques certifficacion sur ce, vous souffrez et laissez, chascun de vous endroit soy, passer, rapasser et sejourner par lesdictes bonnes villes, citez, chasteaulx et forteresses, pons, pors et passages paisiblement et plainement, par mer et par terre, ensembled les denrees, marchandises et autres biens quelzconques qu'ilz meneront ou conduiront, sanz faire ou donner ne souffrir estre fait ou donné a eulx ne a ceulx qui meneront ou conduiront leursdictes denrees, marchandises ou autres biens aucun arrest, desplaisir ou empeschement en quelque maniere que ce soit ; ainçoiz, se miz ou donné leur estoit, ostez le et faites mettre a plaine delivrance tantost [fol. 82] et sanz delay. Car ainsi nous plaist il et voulons estre fait. Non obstans quelzconques ordonnances, mandemens ou defenses a ce contraires. Pourveu toutesvoyes que lesdiz Telz ou leursdiz gens et facteurs paient les peages, travers et autres reddevances es lieux et en la maniere acoustumez. Ces presentes aprés un an prouchain venant non vallables. Donné a Bourges le […]e jour de […]f, l'an de grace mil CCCC XXIIII etc.

[10.4.a]  ¶ Nota que le roy ne use pas de ce mot mandons, fors a ceulz qui sont ses subgetz ; et a ceulz qui sont amis, aliez et bienvueillans il use de ces mots prions et requerons ; ne aussi ne use pas contre eulx de punicion en cas de desobeïssance ou de negligence d'obtemperer a ses lettres de passage, comme il fait a ses subgetz.

[10.4.b]  ¶ Item nota que lettres de passage se donnent communement a temps ; et aussi souventes foiz on y adjouste ou restraint des clauses ou des motz selon la qualité des personnes et selon la diversité du temps.

Charles, par la grace de Dieu roy de France, daulphin de Viennoiz, a noz amez et feaulx les gouverneura ou son lieutenant, les gens de nostre conseil en nostre païs du Daulphiné, gardes de bonnes villes, citez, chasteaulx, forteresses, jurisdicions et destroiz, gardes de pons, pors, peages, passages, election, acquictz et autres reddevances quelzconques, et a tous noz autres justiciers, officiers et subgez ou a leurs lieuxtenans, salut. De la partie de nostre amé et feal conseiller Hugues de Noier1, escuier, chastellain et capitaine de nostre chastel de Roquemore2 en la seneschaucié de Beaucaire, nous a esté exposé que ledit chastel de Roquemore est tres forte place et de grant ancienneté y a garnison de sergens [fol. 82v] et autres gens et officiers establiz a la garde d'icelui, pour le vivre et alimens desquelz et dudit capitaine et de ses gens et serviteurs et aussi pour la provision et advitaillement d'icelui chastel est besoing d'y avoir grant foison de vivres, especialement de blez, lesquelz ledit exposant ne pourroit pas bonnement recouvrer en la partie du royaume pour la trop grant chierté qui y est, et pour ce en ait fait ou vueille faire acheter en nostredit païs du Daulphiné, mais il doubte que on ne les laisse enlever ne partir d'icelui païs obstant certaine ordonnance nagaires sur ce faicte au contraire, se sur ce il n'avoit noz lettres de congié, si comme il dit, requerant icelles. Pour quoy nous, consideré ce que dit est et le grant besoing qui est d'avitaillier ledit chastel pour la dangereuse disposicion du temps qui court et pour eschever les inconveniens qui autrement s'en pourroient ensuir, voulons, ordonnons et expressement vous mandons et enjoingnons, et a chascun de vous si comme a lui appartendra, que vous souffrez et laissiez audit exposant ou a ses gens et serviteurs pour lui, dont il vous appere par sa certifficacion, enlever et faire partir de nostredit Daulphiné et amener par eaue et par terre oudit chastel de Roquemore jusques a la quantité de deux cens sommades de blez et au dessoubz, paisiblement et franchement, sanz y mettre ou donner ne souffrir estre miz ou donné aucun arrest oub empeschement, ne en prendre ou exiger peage, travers ne autre subside ou reddevance en quelque maniere que ce soit. Car ainsi nous plaist il et voulons estre fait. Non obstant ladicte ordonnance et autres ordonnances, mandemens ou defenses a ce contraires. Donné etc.

[10.5.a] ¶ Nota que qui auroit a faire de ceste lettre a officiers du royaume, que par avanture y convendroit il avoir expedicion ou verifficacion de generaulx ou de chambre des comptes, mesmement pour nouveaulx trehuz3 ou subsides.

Charles etc., a tous noz connestable, mareschaulx, admiral, visadmiral, seneschaulx, bailliz, prevostz etc. comme es passages precedens. Comme nous envoyons presentement noz amez N. en ambaxade par devers nostre tres chier et tres amé frere le roy de Jerusalem et de Secile1 pour choses touchans grandement le bien de nous et de nostre royaume, nous mandons a vous, noz justiciers, officiers et subgetz, prions et requerons vous, noz amis, aliez et bienvueillans, que lesdiz N. et ceulx de leur compaignie jusques au nombre de H personnes et autant de chevaulx et au dessoubz, ensemble leurs robes, joyaulxa, males, bouges, bahus, lettres, vaisselle, or, argent et autres biens et choses quelzconques, vous souffrez et laissez, chascun de vous endroit soy, passer, sejourner et rapasser de jour et de nuit, par eaue et par terre, paisiblement et plainementb par lesdictes villes, chasteaulx, forteresses, pons, pors, passages, travers, jurisdicions et destroiz, sanz leur faire ou donner aucun arrest, desplaisir ou empeschement, ne leur faire paier de ce peage, tribu ne autre reddevance quelzconques ; ainçoiz leur administrez vivres, guides et autres choses necessaires a leurs despens, se besoing en ont et ilz vous en requierent. Et tant en faites vous, noz officiers et subgetz, que en doyez estre recommandez vers nous de prompte obeïssance ; et vous, noz amis, aliez et bienvueillans, comme vous vouldriez que feissions faire pour vous en cas pareil ou greigneur. Donné etc.

[10.6.a] ¶ Nota ces motz de jour et de nuit ; ¶  item par eaue et par terre ; et encores, quant on veult porter harnoiz, on y met ces motz armez et desarmez.

[10.6.b] ¶ Item nota que, quant on fait un passage pour gens communs qui ne sont pas serviteurs ou officiers, on ne met pas qu'on les laisse passer sanz paier tribu.

[10.6.c] ¶ Item on y met ceste clause Ces presentes aprés etc.2 ; aussi souventes fois le met on en celles des ambaxeursc.

[10.6.d]  ¶ Item nota que la lettre contiengne passage aussi bien a retourner comme a aler.

[10.6.e] * Item nota ces motz a leurs despens, [fol. 83v] car ilz doivent estre miz toutes foiz qu'on mande qu'on pourvoye de vivres ou autres necessitez, a ce qu'il ne semble pas que le roy vueille que ses subgez voisent par païs sanz paier leur escot.

Charles etc., a tous connestables, mareschaulx, cappitaines etc., amis, aliez etc., salut et dilection. Nostre amé et feal conseiller, chambellan et mareschal de noz guerres N. nous aa exposé que Telz et Telz, les Angloiz qu'il a prisonniers en nostre chastel de Mehun sur Evre1, ainsi qu'ilz lui ont fait dire, ont neccessairement a parler pour le fait de leur delivrance avecques Telz, Angloiz de la garnison de Bellesme2, ou a aucun d'eulx, mais ilz ne vouldroient pas ne oseroient venir devers eulx audit lieu de Mehun sanz avoir sur ce noz lettres de sauf conduit, requerans icelles. Pour quoy nous, consideré ce que dit est, aux deux des dessus nommez Angloiz de la garnison de Bellesme ou a l'un d'eulx et a un sien serviteur de sa compaignie avons donné et donnons par ces presentes sauf conduit et seurté de la date de ces presentes jusques a tel temps etc., pour venir dudit lieu de Bellesme audit lieu de Mehun sur Evre par devers lesdiz prisonniers pour le fait de leur finance et composicion et eulx en retourner a Bellesme, pourveu que ce pendant ilz ne facent ne procurent faire, en appert ne en secret, chose dommagable ne prejudiciable a nous ne a nos subgetz et obeïssans. Si mandons et expressement enjoingnons a vous, justiciers, officiers et subgez, prions et requerons vous, amis, alliez et bienvueillans, que les deux des dessus nommez Angloiz ou l'un d'eulx et son varlet, portans ces presentes, vous souffrez et laissez passer, aler et retourner paisiblement et plainement, le temps de ce present sauf conduit durant, sanz ce pendant leur faire ou donner ne souffrir estre fait ou donné aucun arrest, empeschement ou destourbier en corps ne en biens. Car ainsi etc. Non obstans quelzconques ordonnances, mandemens ou defenses a ce contraires. Donné etc.

Charles etc., a tous noz lieuxtenans, mareschaulx, maistre des arbalestriers, admiral, seneschaulx, bailliz, prevostz, chastellains, capitaines, maires, eschevins, gardes de bonnes villes, citez, chasteaulx et forteresses, pons, pors, passages, jurisdicions et destroiz, justiciers et subgez ausquelz ces presentes seront monstrees, salut. Savoir faisons que a la supplicacion de nostre tres chier et amé cousin le conte de Richemont1 et pour certaines causes qui a ce nous meuvent nous avons donné et donnons par ces presentes a Tel et a ceulx de sa compaignie, jusques au nombre de tant personnes et autant de chevaulx et au dessoubz, bon et loyal sauf conduit du jour de la date de ces presentes jusques a deux moys prouchain venans pour venir peschera et faire pescherb un sien estang qu'il a en tel lieu et pour eulx retourner. Si vous mandons et enjoingnons que ledit Tel et ceulx de sa compaignie, jusques audit nombre de tant et au dessoubz, vous souffrez et laissiez, chascun de vous endroit soy, venir pescherc ledit estang, y demourer et eulx en retourner paisiblement, et sanz leur faire ou donner aucun arrest, desplaisir ou empeschement en corps ne en biens le temps de ce sauf conduit durant. Pourveu toutesvoyes que ilz ne aucun d'eulx ne facent ne ne procurent faire chose qui soit dommagable ne prejudiciable a nous ne a nos subgez et obeïssans en quelque maniere que ce soit. Donné etc.

Charles etc., a tous noz lieuxtenans, connestable, mareschaulx, admiral, visadmiral, seneschaulx, gouverneurs, bailliz, prevostz, chastellains, capitaines, maires, eschevins, gardes de bonnes villes, citez, chasteaulx, forterresses, pons, pors, passages, jurisdicions et destroiz, justiciers, officiers et subgez, amis, aliez et bienvueillans de nous et de nostre royaume ausquelz ces presentes seront monstrees, salut. Savoir faisons que a la supplicacion d'aucuns noz especiaulx serviteurs et pour certaines causes a ce nous mouvans nous avons donné et donnons par ces presentes a Tel, marchant du royaume de Portingal, seurté et sauf conduit de la date de ces presentes jusques a un an pour admener marchandise en nostredit royaume, y charger vins et autres denrees ou il verra son proufit et les mener ou faire mener oudit royaume de Portingal. Si mandons a vous, noz justiciers, officiers et subgetz, prions et requerons vous, nos amis, aliez et bienvueillans, que ledit Tel, marchant, et son varlet ensemble ses denrees et marchandises et les mariniers, patrons, commitres1 et autres gens qui les meneront vous souffrez et laissiez passer, sejourner et retourner par mer et par terre, en faisant sa marchandise paisiblement et plainement, sanz donner ne souffrir estre donné ledit temps durant audit Tel, a sondit varlet ne aux mariniers de son vaissel aucun arrest, destourbier ou empeschement en leurs corps ou en leurs biens ou marchandises. Non obstans quelzconques marques repulsables ou contremarques jugees ou a juger, ordonnances, mandemens ou defenses a ce contraires. Car tel est nostre plaisir. Pourveu que le dessusdit ne ceulx de sa compaignie ne facent ou procurent faire, en appert ou en secret, chose prejudiciable a nous, a nostre seigneurie ne a noz subgez. Donné etc.

[10.10.a] ¶ Nota que a subgetz ou bienvueillans le roy ne use point de ce mot sauf conduit ne ne donne sauf conduit fors a ennemis ; et, quant l'en fait un sauf conduit, on y doit tousjours limiter le temps combien il a a durer.

[10.10.b] *  ¶ Item tousjours y doit estre mise la provision que celui a qui on donne sauf conduit ne fera ne ne pourchassera etc., combien qu'elle y est entendue de soy.

[10.10.c] *  ¶  Item nota qu'on n'y met pas communement qu'on face administrer vivres ne autres neccessitez, comme l'en fait a amis ou subgetz, et en toutes autres [fol. 85v] choses, puisque c'est pour ennemis ; on doit faire la lettre la plus maigre et le moins a l'avantage de l'ennemy qu'on puet, sinon qu'on sceust bien que celui a qui on donne le sauf conduit venist pour aucun bien ou qu'il fust commandé par le roy ou mes seigneurs du conseil. Et en aucuns saufz conduiz met on aucune foiz une autre provision, c'est assavoir : pourveu que a l'entree des villes et autres lieux ou passera celui qui a le sauf conduit, il face exhibicion dudit sauf conduit ; et y met on notanter cette clause a ce qu'on saiche par ou ilz passent, qu'ilz sont ennemis et qu'on s'en donne garde comme d'ennemis.

[10.10.d] *  ¶  Item nota aussi que communement on n'y met pas ce mot sejourner, mais seulement passer et rapasser.

[10.10.e] *  ¶  Item nota que les Anglois et Portingaloiz paient en chancelerie de France chascun un escu d'or pour le seel et, se le roy faisoit faire plus forte ou meilleur monnoye d'or que escuz, meilleur doivent paier, ou ceulz de France ne paient que VI solz parisis ; et se le sauf conduit est pour pluseurs, ilz doivent paier chascun un escu et sic consequanter, sinon quant ilz sont varlez ou serviteurs, car le maistre acquite ses serviteurs, mais que la lettre porte qu'ilz soient serviteurs. Et ceste rigueur vient d'eulx mesmes, car en Angleterre chascun François paie un noble ou plus forte piece d'or, se plus forte y avoit cours.

[10.10.f]  ¶   Les Ytaliens, Lombars et autres Oultremontains paient XI solz parisis pour seel de simple queue en chancelerie de France, et les juifz en paient III frans.

[10.10.g]  ¶  Item les Navarrois paient pour scel XXIIII solz parisis, ou un François ne paieroit que VI solz parisis.

Charles, par la grace de Dieu roy de France, au bailli de Chartres ou a son lieutenant, salut. Se, appellez ceulz qui feront a appeller, il vous appert Tel avoir esté deceu d'oultre la moitié de juste priz en la vendicion par lui faicte a Tel de tele chose, assise en tel lieu, vous icelui contract et vendicion recindez et mettez du tout au neant ou faites suppleer et rendre audit Tel tout ce qu'il fauldra de juste pris moyennant justice, en contraingnant a ce ledit Tel et tous autres qui pour ce feront a contraindre par toutes voyes deues et raisonnables. Non obstans quelzconques obligacions ou renunciacions sur ce faictes par foy et serement, pourveu qu'il en soit dispensé de son prelat ou d'autre sur ce ayant puissance, et lettres surreptices a ce etc. Donné etc.

Charles etc., a tous noz justiciers ou a leurs lieuxtenans, salut. Se, appellez ceulx qui feront a appeller, il vous appert que Tel ne puisse a present paier ses debtes en quoy il est obligié a pluseurs ses creanciers et que il soit prest de faire cession de tous ses biens sans fraude, nous vous mandons, et a chascun de vous si comme a lui appartendra, que icelui Tel a vous recevez a faire ladicte cession, les debtes premierement confessees ; et, ladicte cession faicte, ne le contraingnez ou molestez ne souffrez estre contraint ou molesté par prise de son corps ne de ses pleiges qui pour lui seroient obligiez en aucune maniere, en corps ou en biens ; et se ledit Tel ou aucuns de sesdiz pleiges sont detenuz prisonniers pour ceste cause, si les faites delivrer a plain, se ce n'est pour noz debtes et pour celles des foires de Champaigne et de Brie. Pourveu que, s'il vient par greigneur fortune a possibilité de biens, il sera tenu de paier sesdiz creanciers. Donné etc.

[11.3.a] ¶ Nota que ces deux clauses, les debtes confessees et la provision qu'il sera tenu de paier ses creanciers s'il revient a fortune de biens, y sont necessaires et doivent estre mises en toutes lettres [fol. 90] de cession ; et aussi y doit on mettre la congnoissance de cause, appellez ceulx qui font a appeller.

Charles etc., au premier huissier etc. Tel nous a fait exposer que, comme certain procés fust nagaires meu et pendant par devant le bailly de tel lieu ou son lieutenant entre ledit exposant, d'une part, et Tel, d'autre part, pour raison de certaine somme d'argent en quoy ledit Tel lui estoit et est tenu pour certaines et justes causes plus a plain contenues oudit procés, et sur ce ait esté tant procedé que par sentence dudit bailly ledit Tel aa esté condempné envers ledit exposant en la somme dont il le poursuivoit et en ses despens faiz en ladicte cause, de laquelle sentence ledit Tel pour fuir et delayer et le bon droit et debte dudit exposant retarder et empescher a frivolement appellé et son adjournement relevé a noz grans jours de tel lieu, lesquelz ne seront point tenuz ceste annee presente ne n'est esperance qu'ilz le soient de cy a long temps, et par ainsi ledit exposant, qui est povres homs, seroit en peril de perdre sa debte par teles fuytes et delaiz, se par nous ne lui estoit sur ce pourveu de remede convenable, si comme il dit, en nous humblement suppliant que, comme deb ladicte cause le procés soit par escript et de legier sanz plaidoierie pourra tantost estre determiné en nostre parlement et seroit dure chose, moult grevable et dommagable audit exposant de attendre nosdiz grans jours de tel lieu, que sur ce lui vueillons pourveoir dudit remede. Pour quoy nous, ces choses considerees, te mandons et commettons que tu adjournes ledit Tel aux jours de tel bailliage de nostre prouchain parlement a venir, non obstans que les parties ne soient pas dudit bailliage, pour poursuir ou delaissier sondit [fol. 90v] appel, se par raison y doit estre receuz, et pour apporter et monstrer la diligence qu'il a faicte d'icelui relever, proceder et aler avant sur ce et en oultre selon raison. Et nous par ces presentes donnons en mandement audit bailly de Meaulx ou a son lieutenant que ausdiz jours de tel lieu il envoye ledit procés, suffisamment cloz et seellé de son seel, par devers noz amez et feaulx conseillers les gens qui lors tendront nostredit parlement, pour en ordonner comme il appartendra par raison ; auquel jour, en tant que mestier est, nous l'adjournons sur ce par ces presentes. Et de tout ce que fait auras en ceste partie certiffie audit jour nosdiz conseillers ; ausquelz nous mandons que aux parties, ycelles oÿes, facent bon et brief acomplissement de justice. Car ainsi etc. Non obstans etc. Donné etc.

Charles etc. Nostre amé et feal clerc, notaire et secretaire maistre Odart Morchesne, prieur de l'eglise parrochial de Cognas1, ou dyocese d'Agde, nous a fait exposer que de certaine sentence ou appointement, donnee a son proufit par le bailly de Meleun2 ou son lieutenant a l'encontre de Jehan Hermoyn, demourant a Bry en Biere3, ledit Hermoyn a appellé a nous ou a nostre court de parlement et, pour plus longuement delayer, a relevé sondit appel ou le pourroit relever es jours ordinaires dudit bailliage de nostre prouchain parlement a venir, qui est ou grant dommage dudit exposant et ou retardement de son bon droit, et plus seroit se par nous ne lui estoit sur ce pourveu de remede convenable, si comme il dit, requerant icelui. Pour quoy nous, consideré ce que dit est, voulens l'abreviacion des procés, te mandons et [fol. 91] commettons par ces presentes que ledit Hermoyn tu adjournes a certain brief et competant jour extraordinaire de nostre present parlement, non obstant qu'il siee et que par avanture les parties ne soient pas des jours dont on y plaidera lors, pour monstrer quele diligence il a faite de relever et poursuir sondit appel, icelui veoir, dire et declairer desert se mestier est et estre le doit, sinon pour y proceder et aler avant avecques ledit exposant comme il appartendra par raison, en certiffiant dudit adjournement audit jour noz amez et feaulx conseillers les gens tenans nostredit parlement ; ausquelz etc. Donné etc.

[11.5.a] ¶ Nota que en la lettre d'anticipacion fault declairer de quoy et de qui on a appellé en brief, sanz en faire grant narré, qui ne vouldroit tendre a autre conclusion avec l'anticipacion. Et quant il y a procés par escript et on a appellé de sentence diffinitive, on mande qui veult par la lettre d'anticipacion que le juge envoye les procés et les exploiz a la court cloz et seellez.

[11.5.b] * ¶ Item nota comme devant que, puisque une lettre se adrece a un sergent, tousjours y fault mettre ce mot commettons, car il ne doit riens executer sanz commission.

[11.5.c] * ¶ Item nota que, quant une lettre royale contient qu'on adjourne ou present parlement, on y doit tousjours mettre non obstant que ledit parlement siee et que par avanture les parties ne soient pas des jours etc., ou au moins on y doit mettre ces motz de nostre present parlement et pour cause, car ces motz et pour cause emportent la non obstance. Mais, quant on mande l'adjournement estre fait ou parlement a venir, on ne la y doit pas mettre, fors seulement aucunes foiz la clausea de non obstant que par avanture les parties etc.

[11.5.d] * ¶ Item nota que, quant on fait anticiper l'appellant dedanz les trois mois, il n'est plus tenu de impetrer adjournement en cas d'appel ne de le faire executer, mais doit comparer au jour a quoy il est anticipé.

[11.5.e] * ¶ Item nota que le roy ne use jamais de ce mot commettons a la court de parlement, car ilz ne sont pas commissaires, ainz sont juges souverains ; mais bien leur mande et commande simplement. Toutesvoyes il mande bien et commet a ceulx de la court en particulier et quant on les nomme4.

Charles etc., au premier huissier de nostre parlement ou nostre sergent qui sur ce sera requis, salut. De la partie de nostre amé et feal clerc, notaire et secretaire maistre Odart Morchesne, chanoine et penancier de l'eglise d'Orleans, nous a esté exposé en complaingnant que a cause desdictes penanceriea et prebende il a pluseurs beaulx droiz et prerogatives et, combien que entre les autres il ait droit, ait esté et soit en bonne possession et saisine de l'une des porcions de l'eglise parrochial de Saint Pierre en Santelee dudit lieu d'Orleans1, en bonne possession et saisine de bailler sadicte porcion de cure a desservir ou a ferme a tele personne que bon lui semble, en possession et saisine de prendre et avoir les fruiz, oblacions et revenues d'icelle porcion sanz ce que autre que lui, mesmement N., les y puisse ou doye prendre ne s'en entremettre en aucune maniere, sinonb par le gré et consentement dudit exposant, en [fol. 92] possession et saisine, que se aucun et mesmement ledit Tel s'estoit intruz en sadicte portion de cure ou en avoit prins les fruiz, oblacions ou revenues, de l'en mettre hors2 et de lui faire rendre et restituer tout ce que prins en auroit et de faire en oultre reparer et amender tout ce qui autrement auroit esté fait au contraire de sesdictes possessions et saisines, desquelles et d'autres pertinens a la matiere icelui complaignant a joÿ et usé paisiblement, tant par lui comme par ses predecesseurs penanciers de ladicte eglise et autres dont il a cause en ceste partie par tel et si long temps qu'il n'est memoire du contraire, au moins par temps suffisant a bonne possession et saisine avoir acquise, garder et retenir et par les derreniers ans et exploiz, au veu et sceu dudit N. et de tous autres qui l'ont voulu veoir et savoir, neantmoins, ledit complaignant estant en sesdictes possessions et saisines, ledit N. depuis an et jour et ença, de son auctorité et sanz la licence, gré ne consentement dudit complaignant, s'est intruz en ladicte portion de cure, en a prins ou s'est efforcié de prendre les fruiz, revenues et emolumens et les applicquer a son proufit, qui est ou tres grant dommage dudit exposant, et en le troublant et empeschant en sesdictes possessions et saisines a tort, sanz cause, indeuement et de nouvel, si comme il dit, requerant sur ce nostre provision. Pour quoy nous, consideré ce que dit est, te mandons et commettons par ces presentes que, appellez ceulz qui feront a appeller a comparoir par devant toy en ladicte eglise de Saint Pierre de Santelee pour tous autres lieux et choses contencieuses, maintieng et garde de par nous ledit complaingnant en sesdictes possessions et saisines, et d'icelles et de chascune d'icelles le fay joïr et user paisiblement et plainement, en contraingnant a ce et a cesser d'ores en avant lesdiz troubles, empeschemens et nouvelleté ledit N. et tous autres qui pour ce feront a contraindre, viguereusement et sanz aucun deport ; et se sur ce naist debat ou opposicion, le debat et les choses contencieuses prises et mises en nostre main comme souveraine, la nouvelleté, trouble et empeschement ostez et restablissement fait avant tout euvre des choses prises ouc levees, attendu que des cas de nouvelleté la congnoissance appartient par prevencion a noz gens et officiers et que nostre bailly de Montargis et de Cepoy et des exempcions et ressors du duchié d'Orleans3 est nostre plus prouchain juge desdictes parties [fol. 92v] et choses contencieuses, adjourne les opposans ou faisans ledit debat a certain et competant jour par devant ledit bailly ou son lieutenant pour dire les causes de leur opposicion ou debat, respondre audit complaignant sur les choses dessusdictes, leurs circonstances et deppendences, proceder et aler avant en oultre selon raison, en certiffiant souffisamment audit jour ledit bailly ou son lieutenant de ce que fait en auras ; auquel nous mandons et pour les causes dessusdictes commettons que aux parties, ycelles oÿes, faced bon et brief droit et acomplissement de justice. Car ainsi etc. Non obstans etc. Mandons a tous noz justiciers etc. Donné etc.

Charles etc., au premier etc. De la partie de nostre amé N. et de M. sa femme, heritiers seulz et pour le tout de Tel, jadiz escuier, frere dudit N. , nous a esté exposé en griefment complaingnant que, ja soit ce que ausdiz complaingnans a cause de ladicte hoirrie, tant par la generale coustume de nostre royaume qui est tele que le mort saisist le vif son plus prouchain heritier par apprehensiona de fait1 comme autrement, deuement competent et appartiengnent et aient esté, soient et doyent estre en bonne possession et saisine de tous les biens meubles et immeubles demourez du decés dudit feu Tel, en possession et saisine d'avoir et prendre yceulx biens et les fruiz, revenues et emolumens demourez du decés et d'en faire et disposer comme de leur propre chose, en possession et saisine que autre que eulz et mesmement Tel ne autres quelzconques n'ont que veoir ne que demander esdiz biens et ne les peuent ne doivent prendre ne appliquer a eulx sanz le sceu et consentement des diz complaingnans, et en possession et saisine, que se on avoit prins ou emporté desdiz biens, de les faire rapporter et restituer et de faire en oultre reparer par justice tout ce qui auroit esté ou seroit fait au contraire, et desdictes possessions et saisines [fol. 93] et autres a ce pertinens ayent lesdiz complaignans joÿ et usé tant par eulx comme par leurs predecesseurs et ceulx dont ilz ont cause par tel et si long temps qu'il n'est memoire de hommeb du contraire, ou au moins qu'il suffist, puet et doit suffire a bonne possession avoir acquise, garder et retenirc, au veu et sceu duditTel et de tous autres qui l'ont voulu veoir et savoir, neantmoins, lesdiz complaignans estans en leursdictes possessions et saisines, ledit Tel ou mois de mars derrain passé, acompaignié de Telz et Telz et autres gens armez d'armes invasibles et defendues, s'est transporté de nuit en l'ostel ou trespassa ledit feu Tel et en icelui hostel lui et ses complices ont rompu de fait et a force les coffres et escrins, ont prins et emporté IIII C escuz d'or, V Md de vaisselle, seintures, verges, joyaulz d'or et d'argent, linge, utencilles d'ostel et autres biens meubles et, non contens de ce mais procedens de mal en piz, sont alez en un autre hostel fort, l'ont prins d'eschelle et emblee2, emporté tous les biens qui y estoient et fait autres maulx innumerables ou tres grant grief, prejudice et dommage desdiz complaingnans, en les troublant et empeschant en leursdictes possessions et saisines a tort, sanz cause, indeuement et de nouvel, et aussi en enfraingnant folement nostre sauvegarde, en laquelle lesdiz complaingnans sont notoirement avecques tous leurs biens et choses quelzconques, en commettant port d'armes, force publique, larrecin, voye de fait et autrement delinquant grandement, ou contempt et irreverence de justice, si comme lesdiz complaingnans dient, requerans sur ce nostre provision. Pour quoy nous, consideré ce que dit est, qui ne voulons teles entreprises avoir lieu mais les perpetreurs en estre puniz et chascun estre gardé en son bon droit, te mandons et commettons par ces presentes que, appellez ceulz qui feront a appeller a comparoir par devant toy sur l'un des lieux contencieux pour tous les autres, maintieng etc. comme en la precedent jusques a celle clause : en certiffiant etc., devant laquelle on met ce que s'ensuit : Et neantmoins, appellé avec toy ung notaire ou tabellion publique, fay bon et loyal inventoire desdiz biens meubles pour la conservacion du droit de celui ou ceulx a qui ilz doivent appartenir ; et te informe diligemment et secretement de et sur la prinse d'iceulz biens, sur l'infraction de nostredicte sauvegarde, sur [fol. 93v] le port d'armes, voye de fait, larrecin et autres choses dessusdictes ; et tous ceulz que par informacion, fame publique ou vehemente presumpcion tu en trouverase coulpables ou souspeçonnez adjourne a comparoir en personne ou autrement selon l'exigence du cas audit jour ou autre certain et competant par devant ledit bailli ou son lieutenant pour ester a droit et respondre a nostre procureur a telz fins qu'il vouldra eslire et ausdiz complaingnans et autres qui partie s'en vouldront faire civilement sur les choses dessusdictes, leurs circonstances et deppendences, proceder et faire en oultre selon raison, en certiffiant souffisamment audit jour ledit bailli ou son lieutenant et lui envoiant l'informacion qui sur ce sera faicte feablement close et seellee ; auquel nous mandons et, pour les causes dessusdictes et aussi que de l'infraction de nostre sauvegarde la congnoissance appartient a noz juges et officiers et que lesdiz malefices ont esté commis et perpetrez oudit bailliage, commettons que aux parties etc. Car ainsi etc. Mandons a tous noz justiciers, officiers et subgez que a toy en ce faisant obeïssent et entendent diligemment et te prestent et donnent conseil, confort, aide et prisons, se mestier est et par toy requis en sont. Donné etc.

[11.8.a] ¶ Nota que en la lettre de complainte en cas de nouvelleté soient tousjours mis ces motz depuis an et jour ença ; car qui veult proceder par voye de nouvelleté, il fault qu'il le face et aussi que la complainte soit executee dedanz l'an et le jour de l'empeschement ; et qui ne se pourvoit dedanz ledit temps, s'il n'a grace et reliefvement du prince, ce qu'on donne a tres grant difficulté, il n'est plus receu par voye de nouvelleté. Bien puet avoir autre remede et prendre une simple saisine, qui se conforme assez a la complainte en cas de nouvelleté, excepté que en cas d'opposicion la chose contencieuse n'est pas mise en la main du roy, et aussi que la congnoissance s'en donne aux juges ordinaires et non pas a ceulz du roy par prevencion.

[11.8.b] ¶ Item nota qu'on ne doit pas mettre en la lettre de complainte que celui qui la prent ait esté miz hors ne osté de sa possession, car il doit tousjours maintenir sa possession, maiz doit estre mis qu'on le y a empeschié ou qu'on s'est efforcié de le faire.

[11.8.c] ¶ Item nota ces motz desquelles possessions et saisines et autres [fol. 94] a ce pertinens ledit N. a joÿ et usé et paisiblement tant par lui etc. par tel et si long temps.

[11.8.d] * ¶ Item ista et en le troublant et empeschant en sesdictes possessions et saisines a tort, sanz cause, indeuement et de nouvel, car ce sont quasi vocabula sacramentalia in talibus et y doivent estre mis.

[11.8.e] * ¶ Item nota qu'on ne donne pas complainte en cas de nouvelleté pour biens meubles seulement, mais on la donne bien quant avecques les meubles on se complaint des immeubles, comme en la precedent lettre.

[11.8.f] * ¶ Item nota ces deux motz par prevencion ; car se les juges ordinaires ou autres que royaulx avoient prevenu, c'est assavoir en avoient eu ou entreprins la congnoissance premier que le roy ou ses officiers, ilz en peuent et doivent congnoistre.

[11.8.g] * ¶ Item nota que l'assignacion pour veoir executer la complainte doit tousjours estre faicte sur un des lieux ou des choses contencieuses, sinon que le prince l'octroyast autrement par sa lettre pour doubte et peril ou pour autres causes etc.

[11.8.h] * ¶ Item nota les III clauses qui sont mises en la lettre en cas d'opposition, c'est assavoir que la chose contencieuse soit mise en la main du roy ; et la nouvelleté, trouble et empeschement ostez ; et que restablissement soit fait de ce que prins ou levé auroit esté, et s'entent ledit restablissement de fait ou par signe.

[11.8.i] * ¶ Item nota qu'on ne doit pas prendre sa complainte de moins qu'on a droit en la chose ne aussi de plus ; comme qui seroit seul heritier, il doit prendre sa complainte de toute l'oirrie, et qui n'est que heritier en partie, il doit prendre sa complainte pour sa partie et porcion.

[11.8.j] * ¶ Item nota que en sa majeur3 on doit mettre les possessions etc. pertinens a la matiere dont on prent sa complainte.

Charles etc., au premier huissier ou sergent etc. De la partie de nostre amé et feal Tel, seigneur de Beaulieu1, nous a esté exposé que, ja soit ce qu'il soit a present heritier seul et pour le tout de feu Tele, en son vivant femme de Tel et fille et heritiere seule et pour le tout de feu N. et par ce, tant par la generale coustume de ce royaume par laquelle le mort saisit le vif son plus prouchain heritier2 comme autrement, soit et doye estre ycelui complaingnant en bonne possession et saisine et lui competent et appartiengnent la conté de etc. et les terres et seigneuries de etc. et teles choses etc. et leurs appartenances et appendences, avecques toutes les autres terres et seigneuries dont ladicte feue etc. estoit saisie et vestue au jour de son trespas, en bonne possession et saisine d'avoir et tenir en sa main toutes lesdictes terres et seigneuries, en prendre, cueillir, lever et applicquer a son proufit toutes les revenues, rentes et emolumens, d'y commettre et ordonner officiers telz que bon lui semble et y faire et faire faire toutes autres choses et exploiz que ceulx qui en ont esté seigneurs ont eu droit de faire et exploicter, en possession et saisine, que se aucuns se sont boutez esdictes terres ou en aucunes d'icelles ou s'ilz en ont prins et levé les rentes, revenues, fruiz, prouffiz et emolumens, de les leur faire rendre et restituer3 et reparer par justice tout ce qu'ilz auront fait au contraire de ses possessions et saisines, desquelles et autres pertinens a la matiere icelui Tel ait joÿ et usé paisiblement tant par lui comme par ceulz dont il a la cause en ceste partie, par tel et si long temps qu'il suffist et doit suffire a bonne possession et saisine avoir acquise, garder et retenir au veu et sceu de tous ceulx qui l'ont voulu veoir et savoir, neantmoins pluseurs personnes de divers estas, depuis le trespassement des dessus nommez etc. de fait et de leur voulenté au moins, sanz tiltre vallable, ont prins et apprehendé la possession desdictes terres et seigneuries, les tiennent et possident et en applicquent a leur proufit les fruiz, revenues et emolumens, qui est ou tres grant grief, prejudice et dommage dudit exposant, en le troublant et empeschant en sesdictes possessions et saisines a tort et sanz cause, si comme il dit ; mais pour ce que ladicte etc. est alee de vie a trespassement des deux ans a ou environ et que, obstant ce que ledit exposant a esté longuement detenu prisonnier es mains des Angloiz, noz anciens ennemis et adversaires, et depuis son retour de prison, [fol. 95] il a eu pluseurs et diverses occupacions et affaires, tant pour le fait de sa raençon, qui a esté grosse et excessive, comme pour les divisions qui ont couru en nostre royaume, et aussi pour nous servir tant a l'encontre desdiz Angloiz comme d'autres noz ennemis, il ne s'est pas complaint dedanz l'an et jour desdiz empeschemens et doubte qu'il ne fust pas a present receu a soy complaindre en cas de nouvelleté, se nostre grace ne lui estoit sur ce eslargie, si comme il dit ou a : nous a fait dire et exposer, requerant humblement icelle. Pour quoy nous, ces choses considerees et les grans, notables et proufitables services que ledit Tel a faiz a feu nostre tres chier seigneur et pere, cui Dieu pardoint, et a nous aussi tant ou fait des guerres comme autrement fait etc., voulans, en recongnoissance d'iceulx et a ce que de plus en plus il soit abstraint et curieux de nous servir, lui estre favorable en ses affaires et lui eslargir amplement nostredicte grace, icelui Tel avons relevé et par ces presentes relevons de grace especial et auctorité royal de ce qu'il ne s'est pas complaint de ce que dit est dedanz temps deu et acoustumé et lui avons octroyé et octroyons de plus ample grace qu'il soit receu a soy complaindre en cas de saisine et de nouvelleté, tout ainsi et par la forme et maniere qu'il eust peu faire dedanz l'an et jour desdiz empeschemens, et qu'il en puisse faire faire les execucions et exploiz dedanz deux mois a compter de la date de ces presentes. Si te mandons et commettons par ces presentes que, appellez ceulz qui feront a appeller a comparoir par devant toy sur l'un desdiz lieux contencieux pour tous les autres, maintieng et garde de par nous ledit Tel ou son procureur pour lui en sesdictes possessions et saisines et d'icelles le fay joïr et user paisiblement, en contraingnant a ce et a cesser d'ores en avant lesdiz troubles et empeschemens et nouvelleté les detenteurs desdiz heritages, terres et seigneuries et tous autres qui feront a contraindre, viguereusement et sanz deport et par main armee se mestier est ; et en cas d'opposicion ou reffuz, le debat et les choses contencieuses prises et mises en nostre main comme souverainne, la nouvelleté, trouble et empeschement ostez et restablissement fait reaument et de fait, premierement et avant tout euvre, de ce que pris et levé aura esté, attendu que des cas de nouvelleté par prevencion la congnoissance appartient a noz juges et officiers, que ceste matiere est de grans choses situees et assisesb et touche puissans parties et diverses, qui sont demourans en pluseurs jurisdicions et dont les aucuns [fol. 95v] ont leur conseil a pension ou parlement par nous ordonné a Poictiers, et que par devant noz amez et feaulx conseillers les gens tenans les requestes de nostre palais a Poictiers4 ceste cause pourra mieulx et plus seurement estre discutee et determinee que ailleurs, adjourne les opposans ou faisans ledit debat a certain et competant jour ou jours parc devant nosdiz conseillersd [en eulx certiffiant audiz jour ou jours de tout ce que fait auras en ceste partie. Ausquelz nous mandons et pour les causes dessusdictes commettons que ledit exposant facent, seuffrent et laissent joïr et user plainement et paisiblement de nosdictes grace, reliefvement et octroy, en administrant aux parties etc. Car ainsi etc. . Non obstans etc. Donné etc.]d.

Charles etc.[…]a François etc., au seneschal de tel lieu ou son lieutenant, salut. Complainct s'est a nous griefvement Tel, disant que, combien que a bon et juste tiltre, a declarer plus a plain quant mestier sera, le lieu et chastel de etc., assis et situé en tel lieu, avec ses appartenances luy competent et appartiennent, neantmoins Tel de sa rigoureuse volunté ou autrement indeuement a faict et par force et puissance desraisonnable prins et occupé ledit chastel en prenant et levant ou faisant prendre et lever royaulment et de faict les sens, rentes, revenues et emolumens qui y competent et appartiennent, et d'iceulx a ordonné et dispensé a sa volunté, sans en vouloir faire aucune restitution ou delivrance audit complaignant, combien qu'il en ait esté sommé et requis par plusieurs fois, au grant prejudice et dommage dudit complaignant, si comme il dit humblement etc.Pour quoy nous, considerans ce que dit est, vous mandons et, pour ce que ledit complaignant, qui est de petit estat au regard dudit Tel et n'oseroit playder ne faire poursuytte aucune contre luy par devant les juges qui sont pres de la terre dudit Tel, tant pour les grans portz et faveurs que il y a que autrement, et que par devant vous les parties procederont l'une contre l'autre plus sommairement, sans aucune faveur ou contraincte, et y fineront de meilleur conseil que ailleurs au pays, et pour eschever toute maniere de faveur et aultres involutions de procés, et que les parties sont de vostre seneschaussee, commettons que vous faictes ou faictes faire commandement de par nous audit Tel que tantost et sans delay il rende et restitue ledit chastel et toutes ses appartenances et appendances audit complaignant, avecques tous les fruictz ou la juste valleur d'iceulx que il en a perceu et levé depuis l'injuste detention et occupation par luy faicte, et a ce le contrignez ou faictes contraindre rigoureusement et sans deport par toutes voyes et manieres deues et raisonnables ; en cas d'opposition faictes aux parties ouÿes bon et brief droict. Car ainsi etc. Non obstant etc.Donné etc.

Charles etc., a tel bailly etc. Nostre amé Tel nous a exposé que, comme selon raison et les ordonnances royaulx chascun soit tenu de faire guet et garde en la plus prouchaine forteresse du lieu ou il est demourant et ou il a et puet plus promptement avoir son retrait et reffuge en temps de guerre, neantmoins les habitans de pluseurs parroisses voisines du chastel et forteresse de tel lieu, appartenant audit suppliant, et lesquelz sont plus prouchains dudit chastel et forteresse que d'autre forteresse et y peuent plus promptement avoir leur refuge et sont tenuz d'y faire guet, si comme l'en dit, sont refusans ou delayans de faire guet et garde oudit chastel de tel lieu, dont grant inconvenient s'en pourroit ensuir a nous et a la chose publique, se sur ce n'estoit pourveu de remede convenable, si comme dit ledit exposant, requerant sur ce nostre provision. Pour quoy nous, ces choses considerees, vous mandons et, pour ce que ledit chastel est assis etc., commettons que, se il vous appert de ce que dit est, appellez ceulx qui feront a appeller, vous contraignez ou faites contraindre les habitans des villes et parroisses voisines dudit [fol. 97v] chastel de tel lieu qui sont plus prouchains d'icelui que d'autre forteresse, tant noz subgetz que d'autres seigneuries, a faire guet et garde oudit chastel de tel lieu, tant de jour que de nuit, selon la forme et teneur desdictes ordonnances royaulx ; et en cas d'opposicion, provision faicte en cas d'eminent peril de chascun d'icelle parroisse premierement et avant tout euvre tele que verrez estre a faire, faites aux parties, ycelles oÿes par devant vous, bon et brief droit sanz long procés. Car ainsi etc. Et audit etc. Non obstans lettres surrepticesa etc. Donné etc.

[11.12.a] ¶ Nota que la provision de guet et garde ne se baille pas durant l'opposicion, sinon en cas de peril eminent, et ne baille l'en pas celle lettre sanz opposicion devant le plus prouchain juge royal pour cause des ordonnances royaulx etc., ou devant le juge ordinaire, sinon toutesvoyes en tres grant neccessité et pour evident cause.

Charles, par la grace de Dieu roy de France, au bailly ou prevost dea N. ou a son lieutenant, salut. De la partie deTel nous a esté exposé que en certaine cause meue et pendant par devant N. ou son lieutenant entre ledit exposant, demandeur d'une part, et N., defendeur d'autre, pour tele chose, en laquelle cause les parties ont procedé par aucunes journees et sont appointees en N., ledit exposant pour prouver son entencion a besoing des ditz et depposicions de pluseurs tesmoings vielz, vallitudinaires et affuturs1, de la mort ou longue absence desquelz, consideré la mortalité qui est au païs et les divisions qui sont en nostre royaume, il est vraissemblablement a doubter, et par ce lui est neccessaire d'iceulx tesmoings faire tost examiner, ou autrement il pourra perdre son droit, si comme il dit, requerant sur ce nostre gracieuseb provision. Pour quoy nous, consideré ce que dit est, vous mandons et pour tele cause commettons que, appellez ceulx qui feront a appeller, vous, adjoinct avec vous un notaire royal ou autre personne notable, non favorable ou souspecté a l'une ne a l'autre des parties, [fol. 98] oyez et examinez sur l'intendit2 et articles dudit exposant tous les tesmoings des condicions dessusdictes qui de sa part vous seront produiz et administrez ; et leurs depposicions et attestacions, redigees par escript en forme deue, apportez ou envoyez audit N. juge ou a son lieutenant feablement close et seellees soubz les seaulx et signe manuel de vous et de vostre adjoinct, pour valoir et servir audit exposant en temps et en lieu ce que raison donra ; sauf toutesvoyes a partie adverse ses contreditz et reprouches contre lesdiz tesmoings, s'aucuns en veult bailler. Mandons a tous noz justiciers que a vous et a vostredit adjoinct en ce faisant etc. Donné etc.

[11.13.a] ¶ Item3 nota qu'on ne donne point communement ceste lettre d'examiner tesmoings quant les parties sont ja appointees contraires ou qu'elles ont aucunement ja procedé avant en la cause, sinon que ce fust par l'appointement de la court ou du juge.

Charles etc., a tous ceulz qui ces presentes lettres verront, salut. Exposé nous a Tel que, ja soit ce que N. soit puis un an ença alé de vie a trespassement, delaissié ledit exposant son parant plus prouchain et habille a lui succeder en tous les biens meubles et heritages demourez de son decés, neantmoins il ne s'est osé ne oseroit porter simplement pour heritier dudit deffunct, doubtant qu'il ne fust trop chargié de debtes, par quoy les biens demourez du decés d'icelui defunct sont en voye d'aler a gast et tourner a perdicion, se par nous n'estoit sur ce pourveu de remede convenable, si comme ledit exposant dit, requerant icelui. Pour ce est il que nous, ces choses considerees, audit suppliant oudit cas avons octroyé et octroyons de grace especial par ces presentes que par benefice d'inventoire deuement fait par noz gens et officiers il se puisse porter pour heritier dudit defunct et prendre et apprehender la possession et saisine des biens tant meubles comme heritages demourez de son decés, sanz ce que pour quelzconques debtes, charges ou obligacions d'icelui defunct il soit tenu de paier aucune chose a quelque personne que ce soit oultre la valeur que lesdiz biens monteront par ledit inventoire ; pourveu toutesvoyes que il sera tenu de bailler caucion suffisant, de paier les debtes, obseques et funerailles et de acomplir le testament dudit defunct, s'aucun en a fait, jusques a la valeur desdiz biens dudit inventoire et aussi que, se aucun du lignage se appert qui de lui simplement se vueille porter pour heritier, il y sera receu. Si donnons en mandement par ces presentes a tel bailly et a tous noz autres justiciers ou a leurs lieuxtenans et a chascun d'eulx, si comme a lui appartendra, que, ledit inventoire fait et ladicte caucion baillee, ilz delivrent ou facent delivrer audit exposant lesdiz biens meubles et immeubles demourez par le decés dudit defunct, en le faisant, souffrant et laissant joïr et user d'iceulx selon la teneur de nostre presente grace, sanz l'empescher ne souffrir estre empeschié en quelque maniere que ce soit au contraire. Car ainsi nous plaist il estre fait. Non obstans usage, stille, coustume et quelzconques lettres surreptices a ce contraires. En tesmoing de ce nous avons etc. Donné etc.

[11.15.a] ¶ Nota qu'il fault declairer le temps de la mort du trespassé, car on n'a pas acoustumé de donner lettre de benefice d'inventoire [fol. 99v] sinon dedanz l'an de la mort, qui ne le feroit d'une especiale grace avec reliefvement.

[11.15.b] * ¶ Item nota que l'inventoire des biens se doit faire par les officiers du roy et non par autres.

[11.15.c] * ¶ Item nota qu'il n'y ait autre du lignage qui se voulsist porter pour heritier simplement, c'est a dire sanz benefice d'inventoire.

[11.15.d] * ¶ Item nota que celui qui se fait heritier doit bailler caucion d'autant que valent les biens du mort et qu'il est tenu de paier les debtes et les obseques et aussi d'acomplir le testament, tant que les biens le peuent fournir. Aussi il ne seroit point tenu a en paier plus, ce qu'il seroit se il se portoit heritier sanz benefice d'inventoire.

[11.15.e] * ¶ Item nota que l'executoire s'en adrece aux officiers du roy et qu'on leur mande que la caucion soit baillee et l'inventoire fait avant qu'ilz baillent nulz des biens du mort.

[11.15.f] * ¶ Item nota que celui qui prent le benefice d'inventoire doit estre le plus prouchain heritier, au moins qui s'en vueille entremettre.

Charles etc., a tous les justiciers de nostre royaume etc. Nous voulons et vous mandons et a chascun de vous, si comme a lui appartendra, que toutes les causes et querelles meues et a mouvoir en demandant et en defendant debtes, besoingnes, possessions et biens quelzconques de N., lequel se dit estre presentement monté et armé suffisamment en nostre service soubz le gouvernement et en la compaignie de nostre amé et feal conseiller et maistre des arbalestriers, le sire de Torsay1, ou voyage qu'il fait presentement ou païs du Maine par nostre commandement et ordonnance pour le recouvrement d'aucunes places qui y sont occuppees par les Anglois, noz anciens ennemis, et pour en extirper iceulx ennemis, vous tenez et faites tenir en estat du jour de la date de ces presentes jusques a quinze jours aprés son retour, et ce pendant ne attemptez ou innovez ne faites ou souffrez aucune chose estre faicte, attemptee ou innovee contre ne ou prejudice dudit Tel ne de sesdictes causes, quereles et besoingnes ; mais se faicte, attemptee ou innovee estoit au contraire, [fol. 100] ramenez la ou faites ramener et remettre sanz delay au premier estat et deu. Car ainsi etc. Et audit etc. Non obstans quelzconques lettres surreptices etc. Donné etc.

[11.16.a] ¶ Nota que la lettre d'estat se doit adrecer a tous les justiciers du royaume et non pas seulement a ceulx du roy ; car on a souventes foiz a faire devant autres juges que royaulx. Et quant celui qui prent l'estat s'en veult aidier en parlement ou aux requestes, pour honneur de la court on le doit adrecier formeement a nos seigneurs de parlement, et si fait on communement aux bailliz ou seneschaulx2 devant lesquelz on s'en veult aidier quant on le scet, et puis on met la generalité aprés, c'est assavoir et a tous les justiciers de nostre royaume etc. Toutesvoyes qui seroit adjourné a comparoir en personne ou qui seroit convenu pour un delit ou autre cas criminel, teles lettres d'estat en general ne leur proufiteroit riens, ne pourtant on n'y laisseroit a proceder sinon que les lettres feissent mention du cas en particulier.

[11.16.b] * ¶ Item nota ces motz lequel se dit estre, car en ce cas le roy ne l'afferme pas, et ainsi celui qui se veult aidier de l'estat doit avoir et exhiber aux juges lettre certifficatoire de son cappitaine qu'il est ou service etc. ; toutesvoyes quant celui est de l'ostel du roy ou homme notable et le roy ou le chancelier scevent ou sont informez a la verité qu'il est ou service etc., ou quant la certifficacion du cappitaine est monstree en chancelerie avec la lettre d'estat, on donne l'estat affirmativement en disant ainsi : lequel est montéetc. et, puis que le roy l'afferme par ses lettres, il n'est plus besoing d'avoir certifficacion en jugement ne dehors.

[11.16.c] * ¶ Item nota que, quant le roy chevauche en armes, on donne communement l'estat jusques a un moys aprés le retour.

[11.16.d] * ¶ Item aussi, quant c'est pour gens qui sont en une frontiere, on leur donne communement leur estat prefix3.

[11.16.e] * ¶ Item aucuns veulent souventes foiz avoir estat du jour qu'ilz partirent de leur hostel, mais on n'a pas acoustumé de le leur donner, fors seulement du jour des lettres.

Charles etc., au bailli de S. ou a son lieutenant, salut. De la partie de N. nous a esté exposé que des tel temps il bailla et presta comptant a Tel tele somme d'argent a son tres grant besoing, parmy ce qu'il lui promist de la lui rendre des tel temps et a ce faire s'obliga lui et ses biens meubles et immeubles et ceulx de ses heritiers et ayans cause et renonça expressement et par la foy et serement de son corps a toutes lettres d'estat, de grace, de respit et autres qui pourroient empescher ou retarder le paiement d'icelle somme, si comme par lettres faictes et passees soubz tel seel l'en dit ce plus a plain apparoir, et, combien que le terme dedanz lequel il devoit restituer ladicte somme soit passé et que ledit exposant ait sommé ledit Tel de le paier ainsi que promis lui avoit, neantmoins icelui Tel en a esté et est refusant et pour ce l'a fait icelui exposant executer et par son opposicion adjourner par devant vous a certain jour nagaires [fol. 101] passé, auquel, pour tousjours plus delayer et en venant contre sa promesse et serement, il vous a presenté certaines noz lettres d'estat ou de respit, desquelles on dit la teneur estre tele :
Charles etc.,
par vertu desquelles noz lettres dessus incorporees ledit Tel s'est efforcié et efforce de faire surseoir et assoper1 ladicte cause et jusques a tel temps, et ainsi ledit exposant ne seroit pas paié de son deu en son grant dommage et prejudice, se par nous ne lui estoit sur ce pourveu de remede convenable, si comme il dit en nous humblement requerant que, attendu qu'il a presté le sien de bonne foy, qu'il a ja longuement attendu et qu'il a besoing d'estre paié tant pour vivre et maintenir son estat comme aussi pour soy acquitter envers ses creanciers et n'a pas faculté de longuement attendre sanz grant dommage, et mesmement que ledit Tel est obligié a le paier et a renoncié par foy et serement a teles lettres comme dit est, nous lui vueillons sur ce pourveoir dudit remede. Pour quoy nous, consideré ce que dit est, qui ne voulons a aucun ouvrir voie de parjure, vous mandons et enjoingnons, en commettant se mestier est, que, s'il vous appert de ladicte obligacion et renunciacion et autres choses dessusdictes tant que suffire doye, vous, lesdictes parties presentes ou appellees par devant vous ou leurs procureurs pour elles, les faites proceder et aler avant en ladicte cause sommairementa et de plain et a icelles oÿes administrez bon et brief droit. Non obstans nosdictes lettres d'estat impetrees par ledit Tel et autres quelzconques lettres surreptices par lui impetrees ou a impetrer au contraire, ausquelles quant a ce nous ne voulons estre eu aucun regart. Car ainsi etc. Et audit etc. Donné etc.

[11.18.a] ¶ Qui veult faire lettre de contre estat, il doit incorporer les lettres d'estat, au moins en doit declairer si avant dedanz sa lettre qu'on puisse veoir comment l'estat est causé et a quelle occasion on l'a donné et jusques a quel temps ; et doit mettre en sa lettre les motifz selon les personnages et les causes du prest et les promesses. Et se les parties n'estoient pas encores en procés, on doit faire autre conclusion que la precedent, comme de mander qu'on execute l'obligacion etc. ou autrement.

Charles etc., a tel juge etc. L'umble supplicacion de Tel avons receue, contenant que comme des l'an etc. ou mois etc. ledit suppliant eust obtenu de feu nostre tres chier frere Loys, en son vivant daulphin de Viennoiz1, que Dieux absoille, certaines lettres de grace et remission en laz de soye et cire vert, pour occasion de la mort par lui perpetree en la personne de Tel, comme plus a plain est contenu et declairié esdictes lettres de grace et remission, lesquelles lettres, dont l'execucion vous estoit commise, ledit suppliant, obstant ce que par sa povreté ou autrement il ne povoit faire satisfacion aux parens et amis charnelz dudit defunct, qui par long temps se sont tenuz rigoreux vers lui, et pour les mutacions du temps et aussi qu'il s'est occuppé et emploié en nostre service ou fait des guerres, ne vous a encores presentees ne requis l'enterinement d'icelles, par quoy il est en voie qu'elles lui soient de nulle valeur et effect, se par nous ne lui estoit sur ce pourveu de nostre grace et remede convenable, si comme il dit, requerant humblement que, attendu qu'il a depuis fait satisfacion a partie et que ledit fait advint par chaude cole, en son corps defendant, et que pour occasion dudit cas il a esté et encores est absent du païs et par ce a enduré moult de paine et travail, nous lui vueillons sur ce impartir nostredicte grace. Pour quoy nous, ces choses considerees, voulans la grace et pardon faiz audit suppliant par nostredit feu frere avoir et sortir leur plain effect, vous mandons et, se mestier est, commettons que, ledit suppliant comparant en personne par devant vous dedanz tel temps, vous le recevez a requerir l'enterinement desdictes lettres de grace et remission et a veriffier les faiz contenus en icelles ; et lesdictes lettres lui veriffiez et enterinez en le faisant joïr et user dudit pardon et de tout le contenu esdictes lettres, tout ainsi et par la forme et maniere que vous eussiez fait et peu faire se il les vous eust presentees au vivant de feu nostredit frere, dedanz l'an de la date d'icelles. Car ainsi nous plaist il estre fait pour les causes dessusdictes et autres a ce nous mouvans, et audit suppliant l'avons octroyé et octroyons de grace especial par ces presentes. Non obstant le laz de temps ainsi encouru contre lui, la faulte ou negligence de non avoir presenté lesdictes lettres, [fol. 102] les evocacions, appeaulx, multes, defenses et contumaces, bannissement et sentences contre lui a ceste cause donnez et ensuiz, tant paravant que depuis ledit laps de temps, dont nous oudit cas avons relevé et relevons par ces presentes jaa icelui suppliant et sur ce imposons silence perpetuel a nostre procureur et a tous autres noz justiciers et officiers, rigueur de droit2, usaige, stile, coustume de païs et lettres etc. Donné etc.

[11.19.a] ¶  Nota ces motz comparant en personne, car autrement on ne doit donner le relievement ; et aussi le malfaicteur doit presenter en personne sa lettre de grace pour veriffier le contenu, car en cas de delit on n'est pas receu par procureur au moins quousque.

[11.19.b] * ¶ Item nota qu'on lui baille temps prefix3 de la date des lettres a presenter la grace.

[11.19.c] * ¶ Item nota que, se depuis la date de la remission estoit pronuncié ou ensuy bannissement, il ne suffiroit pas de ce reliefvement cy, mais fauldroit avoir lettre en double queue revocatoire dudit bannissement.

Charles etc., au bailly de N. ou a son lieutenant, salut. Oÿe l'umble supplicacion des parens et amis charnelz de Tel, povre homme prisonnier en noz prisons de tel lieu, contenant que de l'omicide par lui nagaires perpetré de chaude cole en la personne de Tel nous lui avons octroyé noz lettres de gracea et remission, mais sesdiz parens, obstant leur povreté et la sienne, n'ont encores de quoy paier le seel et autres fraiz neccessaires a l'expedicion d'icelles et par ce sont nosdictes lettres de grace retenues en nostre audience et doubtent lesdiz supplians que ce neantmoins vous vueilliez proceder contre la personne dudit prisonnier se nostre grace ne lui est sur ce eslargie, si comme sesdiz amis dient, requerant icelleb. Pour quoy nous, consideré ce que dit est, voulons et vous mandons que vous surseez et faites seurseoir de proceder contre ledit Tel par execucion, par geheyne ne autrement extraordinairement jusques a quinze jours prouchain venans, pendans lesquelz lesdits supplians [fol. 102v] feront diligence d'avoir nosdictes lettres de remission et de vous en faire apparoir. Car ainsi le leur avons octroyé et octroyons de grace especial par ces presentes. Non obstans quelzconques condempnacion et lettres surreptices empetrees ou a empetrer a ce contraires. Donné etc.

[11.20.a] ¶ Nota que on ne doit pas bailler surseance par le narré que dessus, sinon que la remission soit passee. Et souventes foiz aucuns cauxc poursuivans, quant leur maistre ou leur amy est prisonnier en dangier de mort et que le cas est dur, ilz font leur lettre de remission et colorent le cas a l'avantage de leur prisonnier autre qu'il n'est a la verité et ainsi on leur passe leur remission, et par ce moyen on leur donne la surseance de quinze jours ou d'un mois et laissent la lettre de la remission en l'audience sanz paier le seel ; et pendant le temps de la surseance ilz font leur remission au vray en parlant et poursuivant tant et devers le roy et devers les ungs et les autres qu'elle se passe, soit en mettant peine corporelle ou en paiant ou donnant aucune chose etc., et ainsi sauvent leur amy.

Charles etc., a tel juge etc. Nous, pour certaines causes et consideracions a ce nous mouvans, voulons et vous mandons que jusques a tel temps vous seurseez et faites surseoir de proceder ou attempter par geheyne, tourment ne autre voye extraordinaire a la personne de Tel, prisonnier pour tel cas etc.

[11.21.a] ¶ Nota qui seroit prisonnier es prisons d'autres que du roy, on doit faire adrecer le mandement de la surseance au premier huissier ou sergent et lui mander et commettre qu'il face commandement au juge qu'il sursiee jusques au temps sanz attempter etc.

Charles etc., au prevost de Mascon ou a son lieutenant, salut. L'inquisiteur de la foy et le procureur de noz amez et feaulx conseillers l'arcevesque de Lyon, desa evesques d'Ostun, Chaslon et Mascon et autres prelas et gens de sainte Eglise du bailliage de Mascon1, consors en ceste partie, nous ont fait exposer que pluseurs personnes en tres grant nombre sont et ont esté par tres long temps en sentences d'excommeniement, et par tel temps qu'il est a croire qu'ilz sont hors de la foy et cheuz en heresie, laquelle chose est en la dampnacion de leurs ames et pourroit estre ou temps a venir de tres mauvais exemple de nostre peuple, se par nous n'y estoit pourveu, si comme ilz dient. Pour ce est il que nous, qui voulons de nostre povoir obvier a telz erreurs et infidelitez de la foy chrestienneb, te mandons et estroictement enjoingnons, en commettant se mestier est, que tous ceulx et celles que tu trouverras estre et avoir esté par laps de temps d'un an ou plus en sentence d'excommeniement tu contraignes ou faces contraindre par prinse et detencion de leurs personnes, vendicion et expletacion de leurs biens et autrement deuement a eulx faire absoldre, pourveu que a cause de leur absolucion on ne lieve sur eulx excessivement aucune chose. Car ainsi etc. Donné etc.

[11.22.a] ¶ Les prelaz et diocesins doivent estre diligens d'obtenir teles lettres et de les faire executer pour les inconveniens qui de jour en jour adviennent a catholiques par telz pertinax2 excommeniez, et ne fut pas sanz grant cause qu'on ordonna teles lettres contre eulx.

Charles etc., a nos amez et feaulx gens de noz comptes et aux maistres de noz eaues et forestz es païs de France, Champaigne et Brie ou a leurs lieuxtenans, salut et dilection. Savoir vous faisons que nous, considerans les aggreables et continuelz services que nostre amé et feal clerc, notaire et secretaire maistre Odart Morchesne nous a faiz et fait de jour en jour en sondit office et autrement et que pluseurs maisons, granches et hostelz qu'il avoit ou païs de Gastinoiz1 ont esté arses et demolies a l'occasion de nostre service par les Angloiz, noz anciens ennemis, durans ces guerres et divisions, nous a icelui maistre Odart avons donné et donnons de grace especial la coppe et tonsure2 de deux arpens de bois a prendre en nostre forest de Biere3, pour lui aidier a faire refaire et remettre suz sesdiz hostelz, granges et maisons. Si vous mandons et enjoingnons, et a chascun de vous si comme a lui appartendra, que par le maistre forestier de nostredicte forest de Biere vous faites bailler et delivrer audit maistre Odart ladicte coppe et tonsure de deux arpens de bois, ou lieu moins dommagable pour nous et pour lui plus aisié et prouffitable. Et par rapportant ces presentes ou vidimus d'icelles et recongnoissance sur ce d'icelui maistre Odart, nous voulons que ledit maistre forestier et tous autres qu'il appartendra en soient et demeurent quittes et deschargiez partout ou mestier sera, sanz aucun contredit ou difficulté. Non obstans quelzconques ordonnances, mandemens, restrinctions ou defenses a ce contraires. Donné etc.

Charles etc., au maistre de noz eaues et forestz en nostre païs de Berry ou a son lieutenant, salut. Nous voulons et vous mandons que a Tel vous delivrez et souffrez prendre et avoir, ou lieu moins dommageable pour nous et pour lui plus aisié et prouffitable, la coppe et tonsure de deux arpens de nosdiz bois de la chaucee de Mehun que avons donnez et donnons de grace especial par ces presentes [fol. 104] pour lui aidier a faire bastir et ediffier une sienne maison qu'il a encommencee en nostre ville de Mehun1. Et par rapportant ces presentes et recongnoissance sur ce dudit Tel tant seulement, vous et ledit verdier de ladicte forest et tous autres qu'il appartendra en serez et demourrez quittes et deschargiez partout ou mestier sera, sanz aucun contredit ou dificulté. Non obstans etc. Donné etc.

[11.24.a] ¶ Nota que l'adrece de ces dons de bois se fait en diverses manieres, car aucune foiz on adrece la lettre au souverain maistre des eaues et forestz quant il en y a un2, autre foiz et le plus souvent a la chambre des comptes, et autre foiz au maistre des eaues et forestz es païs et au verdier ou garde des forestz.

[11.24.b] * ¶ Item nota qu'on dit plus proprement la coppe et tonsure de deux arpens (ou : de tant ) de bois qu'on ne feroit que le roy donnast deux arpens de bois.

[11.24.c] * ¶ Item nota que tousjours on y doit mettre qu'on le face delivrer ou lieu moins dommageable pour le roy.

Au roy nostre seigneur.
Supplie humblement Tel ou Telz, comme des pieça ilz aient esté miz en cause par devant vostre bailly de N. a l'instance ou requeste de Tel pour tele cause, et sur ce ayent procedé les parties par pluseurs journees tant qu'elles sont appointees en faiz contraires et en enqueste et que jour prefix leur a esté assigné a faire tele chose, laquele chose lesdiz supplians, obstant tel empeschement, n'ont point fait et ne la pourroient plus faire dedanz ledit jour, par quoy ilz sont en voye de perdre leur bon droit, se vostre grace ne leur estoit sur ce [fol. 104v] eslargie, que, ce consideré et que la chose dont il est debat concerne grant partie de la chevance desdiz supplians, il vous plaise de vostre grace mander audit vostre bailly que il donne ausdiz supplians terme de faire ladicte chose jusques a tel temps etc. Et vous ferez bien et aumosne et lesdiz supplians prieront Dieu pour vous.

Au bailly etc.a ou a son lieutenant.
La requeste civile de Telz.
Tel secretaire.

[11.26.a] ¶ Nota qu'on doit faire sa requeste civile selon le cas, et la doit on faire adrecer au roy et lui supplier qu'il mande au juge qu'il face ce qu'on veult requerir, et la fait on en parchemin et aucunes foiz en papier. Et quant d'une lettre royale ja grossee et respondue en chancelerie on veult faire sa requeste civile sanz se donner peine de la faire par maniere de requeste adrecee au roy, on doit mettre en marge au dessusb de la premiere ligne ces motz : Per modum requeste civilis si placet, laquelle requeste civile doit estre playee en carré, comme unes lettres closes, et se clost d'une liace de parchemin petite comme la petite queue d'une simple lettre1, laquelle liace se cordelle comme de la longueur d'un petit doy, et au bout se noe et sur le neu se met le contreseel.

[11.26.b] * Item nota qu'on doit escrire dessus lac requeste civile le juge a qui le mandement de la requeste se adrece, sanz toutesvoies y mettre ne salut ne dilection. Mais quant c'est a la court de parlement, a la chambre des comptes ou a autres qu'il appelle en lettres patentes ses amez et feaulx, on le y met en disant ainsi : a noz amez et feaulx les gens tenans nostre parlement. Et un pou plus bas, en autre ligne, on met le nom de celui ou ceulx [fol. 105] pour qui elle est, et au dessoubz de la closture de la requeste le notaire qui signe le mandement de la requeste doit escrire son signe seulement, sanz y mettre ne Par le roy ne Par vous. Et au doz de la requeste, le procureur ou celui qui l'a faicte y mect aucunes foiz son nom, a ce qu'elle ne soit perdue en chancelerie et qu'on saiche a qui la bailler a l'audience.

Charles etc., au bailly de etc. ou a son lieutenant, salut. Nous vous envoyons enclose soubz nostre contreseel la requeste civile de Telz. Si vous mandons que de et sur le contenu en ladicte requeste vous pourveez ausdiz Telz de tel remede et provision vel sic : de tele grace et remede comme verrez au cas appartenir et comme vous nous conseilleriez en vostre conscience que leur feissions, telement qu'ilz n'aient cause d'en retourner plaintifz par devers nous. Donné etc.

[11.27.a] ¶ Nota que le notaire qui signe le mandement doit signer la requeste ; et selon les cas et les conclusions que la requeste contient on doit faire la conclusion du mandement : se la requeste contient matiere de grace, le mandement doit estre qu'on lui pourvoye de grace ; se elle contient matiere de punicion ou de justice, qu'on pourvoye de remede de justice ou que on se informe et, informacion faicte, qu'on y pourvoye, etc. Et communement on octroye ces requestes civiles de lettres qu'on ne veult pas ne du tout refuser ne du tout octroyer et s'en attent on a la discrecion des juges.

[11.27.b] * ¶ Item quant on a a faire devant ung juge qui n'est pas royal, pour ce que le roy ne adrece point ses lettres en particulier, au moins patentes, que a ses juges et officiers, on doit faire le mandement de la requeste adrecer a ung sergent selon le subsequent.

Charles etc., au premier nostre sergent qui sur ce sera requis, salut. Nous te mandons et commettons par ces presentes que la requeste civile de Tel, qui est enclose soubz nostre contreseel, tu presentes au gouverneur de Blois ou a son lieutenant et lui fay commandement de par nous que de et sur le contenu en ladicte requeste il pourvoye audit Tel de tele grace et remede convenable comme il verra estre a faire en sa conscience et comme il nous conseilleroitb que lui feissions, sanz ce que plus conviengne en retourner plaintifz par devers nous. Non obstans quelzconques lettres surreptices etc. Donné etc.

Charles etc., aux bailliz de Touraine et de Chartres et a tous noz autres justiciers en iceulx bailliages ou a leurs lieuxtenans, salut. Pour obvier aux grans dommages de noz subgetz et aux inconveniens qui adviennent et peuent avenir chascun jour pour la tres grant multitude de loupz et louves qui sont et repairent en pluseurs lieux de nostre royaume et mesmement es mettes desdiz bailliages et par lesquelz sont souventes foiz devorees pluseurs creatures humaines et faiz pluseurs autres griefz et dommages ausdiz subgetz, nous, confiens des [fol. 106 v] sens, loyauté et bonne diligence de Tel, icelui, portant ces presentes sanz ce qu'il se puisse aidier du vidimus d'icelles, avons commis et ordonné, commettons et ordonnons et lui avons donné et donnons par ces presentes plain povoir et auctorité de chasser ausdiz loupz et louves en et par tous les lieux de nostre duchié de Touraine et des contez de Blois et de Dunoiz ou il en saura repaire, a force de gens et de chiens, harnoiz, fillez et autres engins a ce propices et convenables, depuis la date de ces presentes jusques a Pasques prouchain venant, pourveu toutesvoyes qu'il y soit en personne et que ce soit hors garenne, se n'estoit du gré et consentement de celui ou ceulx a qui seroit ycelle garenne ; et pour supporter les fraiz et despens que faire lui convendra pour icelle cause lui avons ordonné et ordonnons par ces mesmes presentes que, pour chascun loup ou louve qu'il prendra es duchié et contez dessusdiz, il aura et prendra pour tous fraiz sur chascun feu des habitans et demourans a deux lieues a la ronde du lieu ou celui loup ou louve aura esté prins deux deniers parisis ou les parisis ont cours, et deux deniers tournois ou les tournois ont cours ; en quoy toutesvoies ne voulons estre aucunement comprins les mendians et miserables personnes ne aussi ceulx qui a jour ouvrier seront aux defenses ou a la huee1 de ladicte chace. Si vous mandons et a chascun de vous si comme a lui appartendra que, aprés ce qu'il vous sera apparu deuement de la prinse d'iceulx loupz ou louves, vous cueillez et levez ou faites cueillir et lever lesdiz deux deniers parisis ou tournois pour chascun loup ou louve et sur chascun feu d'iceulx habitans par la maniere dessusdicte et, iceulx ainsi cueilliz et levez, faites bailler et delivrer audit Tel ou a son certain commandement, en lui faisant aussi bailler tout ce qui pour raison de ladicte chasse lui sera necessaire, a ses despens et en paiant promptement. Pourveu que ces presentes soient veriffiees et expediees par le maistre de noz eaues et forestz en icelui duchié de Touraine ou son lieutenant general. Donné etc.

[11.30.a] ¶ Nota que, quant il y avoit souverain maistre et general refformateur sur le fait des eaues et forestz2, on mettoit que la verifficacion s'en feist par lui et il la faisoit adrecer aux maistres des eaues et forestz es païs.

[11.30.b] ¶ Item nota ces motz portant ces presentes sanz [fol. 107] ce etc.

[11.30.c] * ¶ Item qu'il y soit en personne et que ce soit hors garenne.

[11.30.d] * ¶ Item pour tous fraiz, deux deniers parisis ou tournois.

[11.30.e] * ¶ Item nota l'excepcion des miserables personnes etc.

[11.30.f] * ¶ Item nota bene qu'on ne la donne que jusques a un temps, de la Toussains jusques a Pasques.

[11.30.g] * ¶ Item que en un bailliage ou en un païs.

[11.30.h] * ¶ Item que les lettres en doivent estre expediees ou veriffiees par le maistre des eaues et forestz.

[11.30.i] * ¶ Item qu'on doit promptement paier ce qu'on prent pour faire la chace.

[11.30.j] * ¶ Item qu'on n'en adrece les lettres communement que a juges royaulx et leur mande l'en qu'il leur soit apparu deuement de la prise des loups ou loupves avant qu'ilz donnent leur compulsoire3 a en paier l'argent.

Charles, par la grace de Dieu roy de France, a tel juge etc. Receue avons l'umble supplication de Tel, povre homme chargié de femme grosse et d'enfens, contenant comme il ait nagaires obtenu de nous certaines noz lettres de grace et remission seellees de nostre grant seel en laz de soye et cire vert pour le fait de la mort de Tel, lesquelles lettres il ne pourroit bonnement veriffier ne les fais contenus en icelles prouver pour ce que, quant le fait advint, il estoit nuit ; pour quoy ledit suppliant doubte nosdictes lettres a lui estre de nul effect et valeur, se sur ce ne lui estoit impartie nostre grace, si comme il dit, requerant humblement ycelle. Pour quoy nous, qui voulons nosdictes lettres de remission avoir et sortir leur plain effect, attendu que pour ledit fait ledit suppliant doit estre en prison fermee par deux mois par maniere de penitence et qu'il a fait satisfacion aux amis et parens dudit deffunct, te mandons et commettons, se mestier est, que, s'il t'appert que ledit suppliant soit homme de bonne vie et renommee et non coulpable, reprins ou convaincu d'aucun autre villain cas, blasme ou reprouche et qu'il ait fait satisfacion ausdiz [fol. 107 v] amis et parens, tu pourvoies a icelui suppliant par l'advis et deliberacion des saiges et conseillers de ton siege et auditoire de tel remede ou grace comme tu verras qu'il appartendra a faire de raison et bonne equité et comme tu nous conseilleroyes a lui faire en tel cas, se toutesvoyes nostre procureur ou autres ne vouloient proposer iceulz faiz estre autres qu'ilz ne sont contenuz en nosdictes lettres de remission ; ouquel cas fay aux parties bon et brief acomplissement de justice. Car ainsi etc. Donné etc.

[11.31.a] ¶ Nota que en celle lettre le roy ne octroye pas absoluement que le suppliant soit creu par son serement du contenu en sa remission, mais seulement que sur ce on lui pourvoye par l'advis des saiges etc.

[11.31.b] * Item nota bene celle clause : se toutesvoyes nostre procureur etc., et celle de ouquel cas etc.

Charles etc., au bailly de Meleun ou a son lieutenant, salut. L'umble supplicacion de nostre amé veneur Philipot Raso1 et de Jehanne sa femme, demourans a Fontaines Bleault2, avons receue, contenant que a eulx compettent et appartiennent les biens meubles demourez du decés de feu Jehan Raso, frere dudit Philipot, et, pour ce que Jehan Gautereau y pretendoit avoir droit, il fist adjourner lesdiz exposans par devant vous au premier jour de mars derrain passé, tendant a fin d'avoir lesdiz biens, auquel jour lesdiz exposans se comparurent bien et deuement et fut la cause continuee au XV^e jour de juinga derrain passé, auquel jour lesdiz exposans, obstant l'empeschement des gens d'armes qui estoient sur chemin et aussi de certaine maladie en laquelle ledit Philipot estoit detenu, ne alerent ne comparurent et furent mis en deffault, comme l'en dit, a l'instance et prouffit dudit Godereaub, lequel, par moyen dudit deffault, pretend avoir obtenu gaigne3 de cause ou autre grant proufit ou avantage contre lesdiz exposans et en leur grant dommage et prejudice, se par [fol. 108] nous ne leur est sur ce pourveu de nostre grace et remede convenable, si comme ilz dient, en nous humblement suppliant que, attendu que ilz ont bon droit ou principal et que moult dure chose leur seroit d'en estre forcloz par un tel deffault ou hoquet4, nous leur vueillons sur ce pourveoir dudit remede. Pour quoy nous, ce consideré, qui voulons la verité des cas estre sceue et le droit estre adjugié a qui il appartient, rejectees toutes telesc cavillacions et deffaulx, vous mandons et enjoingnons, en commettant se mestier est, que, lesdictes parties presentes ou appellees par devant vous ou leurs procureurs pour elles, vous ou cas dessusdit les faites proceder et aler avant en et sur ladicte cause tout ainsi et par la forme et maniere qu'elles eussent fait ou peu faire au temps dudit deffault donné, en contraingnant a ce, se mestier est, ledit Godereau et tous autres qui feront a contraindre par toutes voyes deues et raisonnables, et a icelles parties oÿes administrez bon et brief droit. Non obstant ledit deffault, dont nous oudit cas avons relevé et relevons par ces presentes lesdiz exposans de grace especial, en refondant toutesvoies a partie adverse despens raisonnables pour icelui, rigueur de droit, usaige ou stile de vostredicte court et quelzconques lettres surreptices, impetrees ou a impetrer, a ce contraires. Donné etc.

[11.32.a] ¶ Nota que ou relievement on doit declairer le jour que le deffault fut donné et y doit on mettre les causes de l'essoine5 et choses veritables, car autrement la partie le debatroit ; et le roy ne relieve point du deffault sinon ou cas dessusdit, c'est assavoir que le donné a entendre soit vray.

[11.32.b] * ¶ Item on doit venir au relievement avant que le proufit du deffault soit adjugié, car autrement on ne obtendroit point relievement au moins que a tres grant dificulté. Et pour ce doit advertir le notaire a qui on baille a signer le relievement qu'il n'y ait en la lettre ces motz : Non obstant ledit deffault et ce qui s'en est ensuyd, car il doit rayer ces motz : et ce qui s'en est ensuy, sinon que le maistre des requestes l'eust adverty et commandé signer sanz l'oster.

[11.32.c] * ¶ Item communement on ne donne point relievement de default sinon en refondant despens s'ilz y [fol. 108v] escheent ; et plustost et legierement6 relieve on un defendeur que un demandeur.

[11.32.d] * ¶ Item nota que en la conclusion on y met tousjours parties presentes ou appelees.

[11.32.e] * ¶ Item, quant le deffault est donné devant ung juge subget7, on en adrece les lettres du relievement a un sergent comme en la subsequent.

Charles etc., au premier nostre sergent etc. La supplication de Jehan Barbin, demourant a Ury en Biere2, avons receu, contenant que en certaine cause meue et pendant par devant le prevost ou garde de la justice audit lieu de Ury entre N., demandeur d'une part, et ledit suppliant, defendeur d'autre, lesdictes parties ont esté appoinctees a faire tele chose a tel jour, auquel jour ledit suppliant, obstant ledit empeschement, ne peut comparer ne envoier ses lettres et munimens, et par ce fut mis en default, par le moyen duquel sa partie adverse pretend emporter gaigne de cause ou tel autre prouffit, se par nous n'est sur ce pourveu audit suppliant de nostre grace, si comme il dit, requerant icelle. Pour quoy nous, consideré ce que dit est, te mandons et commettons par ces presentes que tu faces commandement de par nous audit prevost ou garde de justice audit lieu de Ury en Biere ou son lieutenant que, lesdictes parties presentes ou appellees par devant lui ou procureura pour elles, il les face proceder et aler avant en ladicte cause en l'estat qu'elles estoient au jour et heure que ledit deffault fut donné et a icelles oÿes face bon et brief droit. Non obstant icelui deffault etc. comme en la precedent lettre de relievement etc.

Charles etc., au premier nostre sergent etc. De la partie de nostre amé varlet de chambre Herbelet Petitpas1 nous a esté exposé que feu Jehan Duisy, escuier, qui en son vivant possidoit la terre de Repost en la chastellenie de Clarsy2, tenue neuement de nous en foy et hommage, est alé de vie a trespassement et, par deffault de hommage non fait et de rachat et autres devoirs non paiez audit exposant, il a mis ou a entencion de mettre lesdictes choses en sa main, mais il doubte que la vefve et heritiers dudit deffunct ou autres enfraingnissent legierement sa main, se en icelle confortant la nostre n'y estoit apposee, si comme il dit, requerant sur ce nostre provision. Pour quoy nous, consideré ce que dit est, te mandons et commettons que, la main dudit exposant mise esdictes choses, tu en confortant la sienne y mette et appose la nostre, en defendant de par nous a ladicte vefve et heritiers et autres qu'il appartendra que ilz ne soient si hardiz d'enfraindre nostre main mise ne aussi celle dudit exposant, sur certaines et grosses peines a nous a appliquer ; et se sur ce naist debat ou opposicion, adjourne les opposans ou refusans par devant les juges ausquelz la congnoissance en appartendra pour dire les causes de leur opposicion, respondre, proceder et aler avant en oultre selon raison, en certiffiant lesdiz juges de ce que fait en auras. Ausquelz nous mandons que aux parties, icelles oÿes, facent bon et brief droit. Car ainsi etc. Et audit etc. Non obstans etc. Mandons etc. Donné etc.

[11.34.a] ¶ Nota que, quant le roy mande qu'on adjourne devant les juges ordinaires, c'est assavoir ceulx a qui la congnoissance en appartient, on ne met point de committimus en la lettre ; toutesvoyes aucunes foiz ceste lettre se fait par committimus devant un juge royal, quant il y a assez cause de committimus.

Charles etc., a tous etc. Comme nous soions acertenez que noz ennemis se soient traiz et approuchiez de laa riviere de Loire1 en entencion de usurper sur nous et noz subgetz villes et chasteaulx et de y faire tous autres faiz et exploiz de guerre, et pour ceste cause et pour resister a leur dampnable entreprise, conserver noz païs et subgetz et grever lesdiz ennemis en toutes manieres ayons conclud et deliberé et soions de tous poins determinez de nous mettre presentement suz a toute puissance et d'assembler, convoquer et appeller a nostre aide tous noz bons, vraiz et loyaulx subgetz, tant nobles que autres, qui ont acoustumé de eulx armer et de suivir les guerres, pour ce est il que nous mandons, commandons et estroictement enjoingnons a tous nobles, barons, chevaliers, escuiers et autres gens tenans de nous en fief ou arriere fief ou qui ont acoustumé d'eulx armer et suivir les guerres que, sur peine de confiscacion de corps et de biens et d'estre reputez desloyaulx envers nous et la couronne de France, ilz se mettent suz en armes et soient par devers nous, toutes excusacions cessans, en tel lieu etc., tel jour etc., montez, armez et acompaignez suffisamment, chascun selon son estat, pour venir en nostre compaignie a l'encontre desdiz anciens ennemis. Si donnons en mandement par ces presentes a nostre seneschal de Poictou ou a son lieutenant ou : a telz et telz que en et par toutes les villes notables et chastellenies de ladicte seneschaucié ou : de tel bailliage ilz facent hastivement et sanz delay ces lettres publier a son de trompe es lieux acoustumez, telement que aucun n'en puisse ou doye pretendre ignorance, en commandant de par nous a tous les dessusdiz que ainsi le facent sur les peines dessusdictes ; et, s'aucuns desdiz nobles ou autres frequantans les armes sont ou estoient refusans ou delayans de eulx mettre hastivement suz et de venir par devers nous audit jour, ou plus tost preignent et arrestent tous leurs fiefz, meubles et immeubles, heritages, possessions et autres biens quelzconques reaulment et de fait en nostre main, sanz leur en faire aucune recreance ou delivrance, et en oultre les preignent au corps de main mise et en facent ou facent faire punicion comme de crimineulx de leze magesté et desobeïssance a leur souverain seigneur, telement que ce soit exemple a tous autres et que ilz n'en doyent estre reprins de negligence ou dissimulacion. Car ainsi voulons que soit fait. Non obstans quelzconques mandemens de gardes ou garnisons [fol. 110 v] de forteresse et autres excusacions frivoles a ce contraires. En tesmoing etc. Donné etc.

[11.36.a] ¶ Selon la necessité et selon les cas, on fait ces mandemens d'arriere ban aucune foiz plus expres, aucune foiz moins ; toutesvoies, quant le roy veult aler sur les champs en personne, on le doit tousjours faire plus expres.

Charles etc., a tel seneschal etc. et a tous noz autres justiciers et officiers ou a leurs lieuxtenans, salut. De la partie de nostre amé Tel nous a esté exposé que, comme il soit nobles homs et tiengne noblement en fief et arriere fief et par ce soit tenu de nous venir servir en ceste presente armee a l'encontre de noz ennemis et adversaires, ainsi que l'avons mandé et fait publier par maniere d'arriere ban, neantmoins il n'y est peu ne pourroit venir, obstant la continuelle occupacion qu'il a a cause de tele chose, ainsi que ledit exposant nous a fait informer, requerant sur ce nostre grace et exempcion. Pour ce est il que nous, consideré ce que dit est, icelui exposant, en la faveur et contemplacion de nostredit chancelier1 et pour consideracion des bons services qu'il a faiz a feu nostre tres chier seigneur et pere, cui Dieu pardoint, et a nous aussi, avons exempté et quittié et par ces presentes de grace especial et auctorité royal quittons et exemptons de nous venir servir ne envoyer autre pour lui par deça en ceste presente armee et entreprise ne aussi es autres voyages et chevauchees que ferons et ferons faire cy en arriere tant qu'il aura ledit office, sanz ce qu'il lui tourne a aucun blasme, reprouche ou dommage ores ne ou temps a venir. Si vous mandons et enjoingnons et a chascun de vous, si comme a lui appartendra, que ledit exposant vous faites, souffrez et laissiez joïr et user paisiblement de noz presentes grace, exempcion et octroy, sanz lui faire ou donner ne souffrir estre fait ou donné aucun empeschement ou desplaisir au contraire ; ainçoiz, [fol. 111] se pour cause de non estre venu ou avoir envoyé a nostredit mandement et service aucunes de ses terres, fiefz, possessions ou autres biens quelzconques sont ou estoient prinses, saisies ou empeschiees, mettez les ou faites mettre sanz delay a plaine delivrance. Car tel est nostre plaisir. Non obstans quelzconques publicacions sur ce faictes et a faire et autres ordonnances, mandemens etc. Donné etc.

[11.37.a] ¶ Nota que on n'a pas accoustumé d'exempter ung homme de venir servir en armes, fors pour une foiz et pour une armee seulement, et encores selon la neccessité que on a ; et selon les excusacions ou la faculté des parties, on met aucune foiz ceste provision : Pourveu toutesvoies que ledit Tel envoyera pour lui a nostredit service et armee ung homme d'armes monté, habillé et accompaignié souffisamment. Toutesvoies a gens povres et decrepitez on le donne bien aucune fois a tousjours.

Charles etc., a tel bailly et a tous noz autres justiciers et officiers ou a leurs lieuxtenans, salut. De la partie de Tel, aagié dea LXXII ans ou environ, nous a esté humblement exposé que, tant qu'il a peu supporter les armes, il a servy bien et loyaument feu nostre tres chier seigneur et pere, cui Dieu pardoint, ou fait des guerres a l'encontre de ses ennemis et adversaires, tant en la compaingnie de Tel comme de Tel et autres, et, quant il a esté decrepité par vieillesce, a monté et armé successivement a ses despens deux de ses enfans pour nous servir, l'un en la compaignie de Tel et l'autre de Tel, lesquelz ses enfans sont mors en nostre service ; et combien que ledit exposant pour sa vieillesce et imbecilité ne puisse plus frequanter les armes ne nous venir servir comme il a fait le temps passé et qu'il n'ait plus qui y envoier et aussi n'ait pas si bien de quoy qu'il a eu [fol. 111v] le temps passé1, pour les charges qu'il a eues a supporter pour les causes dessusdictes et pour les pertes qu'il a eues a l'occasion des guerres, neantmoins il doubte que on ne l'en vueille tenir pour excusé, se nostre grace ne lui estoit sur ce impartie, si comme il dit, requerant icelle. Pour quoy nous, acertenez de ce que dit est, considerans les agreables services que ledit exposant et sesdiz enfans ont faiz a feu nostredit seigneur et a nous, icelui exposant avons tenu et par ces presentes de grace especial et auctorité royal tenons et voulons estre tenu quitte, exempt et pour excusé de venir ne d'envoyer d'ores en avant nous servir en armes ne autrement oudit fait de guerre, ne ne voulons pas que pour non y venir ne envoyer on lui en donne aucune charge, blasme ou reprouche ores ne ou temps a venir, et quant a ce imposons silence a nostre procureur. Si vous mandons et enjoingnons expressement et a chascun de vous, si comme a lui appartendra, que ledit exposant vous faites, souffrez et laissiez joïr et user plainement et paisiblement de noz presentes grace, exempcion et voulenté, sanz lui faire ou donner ne souffrir estre fait ou donné aucun empeschement au contraire ; ainçoiz, se a ceste cause son corps ou aucunes de ses terres, fiefz, revennues ou autres biens sont ou estoient empeschiez, arrestez ou misb en nostre main, mettez les ou faites mettre sanz delay a plaine delivrance. Car ainsi etc. Non obstans quelzconques ban, arriere ban et ordonnances ou defenses faictes ou a faire au contraire. Donné etc.

Charles etc., au bailly des exempcions de Touraine, d'Anjou et du Maine et a tous les autres justiciers de nostre royaume ou a leurs lieuxtenans, salut. Savoir faisons que, oÿe la supplicacion de nostre amé et feal conseiller l'evesque d'Angiers1, contenant que, se par deffault de garde ses chasteaulx et forteresses de Chalonne2 et de Rochefort3, qui sont fortes places et avantageuses, estoient prinses [fol. 112] ou occuppees par les ennemis, inconvenient et dommage irreparable s'en ensuivroit a lui et a tout le païs d'environ, nous, ce consideré et les bons services que ledit evesque a faiz a nous et a noz predecesseurs par tres long temps et autres causes a ce nous mouvans, voulons et nous plaist que Telz et Telz, escuiers, demeurent a la garde et defense de sesdiz chasteaulx et forteresses de Rochefort et de Chalonne et iceulx escuiers et chascun d'eulx avons exemptez et quittiez, exemptons et quittons par ces presentes et pour ceste foiz de grace especial de nous venir servir ceste saison contre noz ennemis et adversaires en l'armee pour laquelle avons fait crier et publier nostre ban et arriere ban. Si vous mandons et enjoingnons, et a chascun de vous si comme a lui appartendra, que ledit evesque et lesdiz Telz et chascun d'eulx vous faites, souffrez et laissiez joïr et user plainement et paisiblement de nostre presente grace, exempcion et voulenté, sanz leur faire ou donner ne souffrir estre fait, mis ou donné aucun arrest ou empeschement en corps ne en leurs terres ou autres biens quelzconques en quelque maniere que ce soit ; ainçoiz, se miz ou donné leur estoit, ostez le ou faites oster et mettre a plaine delivrance. Non obstans nostredit ban et arriere ban et les peines dedanz inflictes4, ordonnances, mandemens ou defenses a ce contraires. Donné etc.

Charles etc., au bailli ou : aux esleuz sur le fait de la guerre en tel lieu, salut. Oÿe la supplication de Tel, escuier, demourant en tel lieu, contenant que, ja soit ce qu'il soit noble et procreé de noble lignee et qu'il face fait de noble en soy armant et poursuivant les guerres quant le cas y eschiet, sanz soy entremettre de marchandise, et par ce soit et doye estre franc de tailles, aides et autres subsides imposees sur les non nobles, neantmoins les habitans de tel lieu ou : les commis sur le fait des tailles d'icelle ville [fol. 112v] l'ont tauxé, assiz et imposé et encores s'efforcent de le asseoir, tauxer et imposer ausdictes tailles comme ung autre d'eulx qui ne sont pas nobles, qui est contre raison et en son tres grant grief, prejudice et dommage, si comme il dit, en nous humblement requerant sur ce nostre provision, pour quoy nous, ces choses considerees, vous mandons et, pour ce que ledit lieu dea est assiz et lesdictes parties demourans en ladicte election ou : oudit baillaige, commettons se mestier est que, se, appellez ceulx qui feront a appeller, il vous appert que ledit suppliant soit noble extrait de noble lignee et face fait de noble, comme dit est, sanz ce qu'il s'entremette du fait de marchandise, vous le tenez et faites tenir quitte et paisible desdictes tailles, aides et subvencions comme les autres nobles de sa condicion, sans le y contraindre ne souffrir estre contraint, imposé ne assis en aucune maniere ; et a ce, se mestier est, contraingnez ou faites contraindre lesdiz habitans ou collecteurs et tous autres qui feront a contraindre par toutes voyesb deues et raisonnables ; en lui mettant ou faisant mettre au delivre tous ses biens pour ce prins, arrestez ou empeschez ; et en cas de debat ou opposicion faites aux parties, ycelles oÿes, bon et brief droit. Car ainsi etc. Non obstans quelzconques lettres surreptices etc. Donné etc.

[11.40.a] ¶ Nota que en teles lettres on ne met pas absolument qu'on tiengne quitte de tailles etc., mais seulement comme les autres nobles de sa condicion.

[11.40.b] * ¶ Item nota que ceulx qui sont anobliz par lettre ou anoblissement ne sont pas nobles extrais de noble lignee, mais sont simplement nobles.

[11.40.c] * ¶ Item nota ces motz appellez ceulx qui feront a appeller ; et aucunes foiz, quant il n'y a point de contrainte, je l'ay veu donner sans opposicion.1

Charles etc., a tel bailly ou a son lieutenant, salut. Receue avons l'umble supplicacion des amis charnelz de Tele, file de Tel, consors en ceste partie, contenant que, comme ladicte Tele, qui est agee de XXV ans ou environ, soit, des longtemps a, insensee et prise de pensee, telement que elle ne se sauroit gouverner et ne scet qu'elle fait ne qu'elle dit, et par ce pourroit perdre tous ses biens et estre sanz gouvernement, se sur ce ne lui estoit par nous pourveu de gracieux remede, si comme lesdiz exposans dient, requerans icelui. Pour quoy nous, ces choses considerees, vous mandons et, pour ce que les parens et amis charnelz de ladicte Tele sont demourans en vostre bailliage en diverses jurisdicions, comme l'en dit, commettons que, se, appellez les plus prouchains parens et amis charnelz de ladicte Tele, il vous appert de ce que dit est, vous pourveez a icelle de curateur, c'est assavoir de ladicte Tele sa mere2 ou d'autre de ses parens prouffitable et ydoine pour ladicte Tele et ses droiz, causes et biens garder, poursuir et defendre en jugement et dehors ; et interdisez a ladicte Tele l'alienacion de ses biens et heritages, en mettant au neant tous contraulx par elle faiz depuis qu'elle fut insensee, comme dit est, et faisant crier et publier es lieux acoustumez a faire criz au païs que aucun ne face d'ores en avant aucun contrat avecques ladicte Tele ne lui preste aucune chose ne achate d'elle, sur peine de perdre ce qu'ilz y mettront. Car ainsi etc. Non obstans etc. Donné etc.

[11.41.a] ¶ Nota la congnoissance qu'on donne au juge de se informer du non sens, et que les parens doivent estre appellez et par leur advis se doit donner le curateur.

Charles etc., au premier etc. Tele etc. nous a fait exposer en complaingnant, disant qu'elle a esté conjoincte par mariage avecques Tel et, aprés le trespassement d'icelui, avecques Tel son derrenier mari, qui pareillement est depuis alé de vie a trespassement, et ja soit que, tant de raison comme par l'usage et la coustume du païs, tantost aprés le decés de chascun des dessus nommez compete et appartiengne a ladicte exposant pour son droit de douaire la tierce partie de tous et chascuns les heritages, biens meubles et chosesa nobles et noblement tenues et la moitié des heritages et choses non nobles et coustumieres1 dont ledit N. estoit seigneur ou temps du mariage fait et consummé en sainte Eglise entr'eulx, et aussi la tierce partie des heritages, choses nobles et non nobles tenues et la moitié des heritages et choses coustumieres que tenoit ledit T. et dont il estoit seigneur au temps du mariage celebré entr'eulx, pour en user et joïr aprés le trespassement de chascun d'eulx par ladicte exposant et en prendre et parcevoir les fruiz, prouffiz, revenues et emolumens, sa vie durant seulement, et les appliquer a son seul et singulier proufit ou autrement en disposer a son plaisir, neantmoins N., filz et heritier dudit N., et I.G., heritier par certain moyen a declairer en temps et en lieu dudit T., se sont efforcez et efforcent et de fait se sont ensaisinez, c'est assavoir ledit S. b de tous et chascuns les heritaiges, biens immeubles et choses nobles et autres non nobles tenues coustumierement, demourees du decés d'icelui N., et ledit S. c de tous et chascuns les heritages, biens immeubles et choses qui audit Tel appartenoient en son vivant, et d'icelles choses ont, pour tant comme a chascun d'eulx touche, prins et parceuz les fruiz, prouffiz, revenues et emolumens et en ont autrement disposé a leur voulenté, sanz ce que eulx ou aucun d'eulx aient voulu ne vueillent laissier user et joïr ladicte exposant de son droit de douaire tel qu'il lui appartient par raison et ladicte coustume, eulx et chascun d'eulx sur ce suffisamment sommez et requis, qui est ou grant grief, prejudice et dommage de ladicte exposant et plus seroit, se par nous ne lui estoit sur ce pourveu de remede convenable, si comme elle dit, requerant humblement icelui. Pour quoy nous, attendu ce que dit est, te mandons et commettons que tu faces commandement expres de par nous ausdiz Telz et chascun d'eulx que ilz facent, seuffrent et laissent user et joïr ladicte exposant de sesdiz [fol. 114] droiz de douaire telz qui lui appartient par raison et ladicte coustume et, avecques ce, que eulx et chascun d'eulx, pour tant qu'il lui pourra toucher, lui rendent et restituent les fruiz, prouffiz, revenues et emolumens qu'ilz en ont prins et parceuz, c'est assavoir ledit Tel depuis le trespassement de sondit pere et ledit G. depuis le trespassement dudit T., ou que ladicte exposant eust peu prendre et parcevoir, se ne fust leur torsonnier2 empeschement, soubz l'estimacion de plus grant priz, pour en joïr par elle par la maniere que dit est, et a ce les contraing et chascun d'eulx par toutes voyes deues et raisonnables ; et, en cas d'opposicion, reffuz ou delay, adjourne les opposans, refusans ou delayans a certain et competant jour ou jours par devant les juges ou leurs lieuxtenans ausquelz la congnoissance en appartendra pour dire les causes de leur opposicion, reffuz ou delay, respondre a ladicte exposant sur les choses dessusdictes, leurs circonstances et deppendences, proceder et faire en oultre si comme de raison sera, en certiffiant deuement audit jour ou jours lesdiz juges ou leurs lieuxtenans de tout ce que fait auras sur ce. Ausquelz nous mandons que entre les parties, icelles oÿes, provision faicte a ladicte exposant qui traicte de sesdiz droiz de douaire qui est chose favorable tele qu'ilz verront a faire par raison, facent bon et brief acomplissement de justice. Car ainsi etc. Et a ladicte etc. Non obstans etc. Mandons etc. Donné etc.

[11.42.a] ¶ Nota que douaire est chose tres favorable et pour ce mande l'en au juge que, en cas de debat, il donne provision a lad femme sur le douaire.

[11.42.b] * ¶ Item nota que, se les heritiers du mary sont mineurs et ilz n'ont tuteur, on mande au sergent qu'il leur en face pourveoir par juge competant et non pas que lui mesmes leur en pourvoye, car il ne doit.

Charles etc., au premier etc. De la partie de Tele, vefve de feu Tel, nous a esté exposé en complaignant que, ja soit ce que de raison et par la coustume du païs lui appartiengne tele chose et tele pour son douaire, neantmoins les heritiers ou ayans cause dudit deffunct ont esté et sont refusans et en demeure de lui delivrer ou laissier prendre et avoir son droit et douaire, eulx sur ce sommez et requis, si comme elle dit, requerant sur ce nostre provision. Pour quoy nous, consideré ce que dit est, te mandons et commettons que tu faces commandement de par nous aux heritiers ou ayans cause dudit defunct ou a leurs tuteurs ou curateurs, s'aucuns en ont — sinon fay leur en pourveoir par juge competant —, que ilz baillent et assieent a ladicte exposant sondit douaire et l'en seuffrent et laissenta joïr plainement et paisiblement, en les contraingnant a ce par toutes voyes deues et raisonnables ; et, en cas d'opposicion ou reffuz, attendu que lesdictes parties sont demourans et les heritages sur lesquelz doit estre prins ledit douaire situez en tel bailliage, en diverses jurisdicions, et que par devant nostre bailly d'icelui lieu de N., qui est nostre plus prochain juge desdictes parties et choses contencieuses, icelles parties pourront finer de1 meilleur conseil et y auront plus seure expedicion que ailleurs, adjourne les opposans ou reffusans a certain et competant jour par devant ledit bailly ou son lieutenant, pour dire etc., en certiffiant etc. ; auquel nous mandons et pour les causes dessusdictes commettons que aux parties etc., en donnant a ladicte suppliant tele provision de sondit douaire pour son vivre et le demené2 de ceste cause, comme il verra estre a faire de raison. Car ainsi etc. Non obstans etc. Mandons etc. Donné etc.

Charles etc., a noz amez et feaulx gens de noz comptes, conseillers les gens tenans et qui tendront nostre parlement etc. et a tous seneschaulx, baillifz, prevostz et autres noz justiciers, officiers et subgetz ou a leurs lieuxtenans, salut et dilection. Nostre chiere et amee cousine Tele nous a fait exposer en complaingnant que, comme elle ait pieça esté mariee avecques feu nostre tres chier oncle le duc de Berry, durant lequel mariage et de sa viduitéa elle se soit bien et honnorablement gouvernee et portee et, apres le trespas de nostredit oncle, ait esté mariee a George, seigneur de La Tremoïlle1, avec lequel elle se soit aussi bien et honnorablement gouvernee, sanz aucune faulte ou blasme et sanz ce qu'elle ait fait chose par quoy ledit de La Tremoïlle, son mary, la doye avoir en male grace ou indignacion, neantmoins ledit de La Tremoïlle, depuis la consummacion dudit mariage, a mené tres dure vie a nostredicte cousine et, des deux ans a ou environ, l'a mise hors de sa compaignie et envoyee demourer ou païs d'Auvergne, dont elle est contesse de son heritage, et a prins et occuppé, prent et occuppe ses terres, chasteaulx et forteresses et d'icelleb levé et parceu les fruiz, prouffiz et emolumens et n'en a riens voulu ne veult bailler pour le vivre et estat de nostredicte cousine et de ceulx de sa compaignie, telement qu'il a convenu et convient a nostredicte cousine faire sa demourance en autruy hostel et vivre a l'aide et confort d'aucuns de ses parens et amis et a l'occasion dessusdicte est en voye de cheoir en neccessité, se par nous ne lui est sur ce pourveu de remede convenable, si comme elle dit, en nous humblement requerant que, attendu ce que dit est et que, tant de son propre heritage comme de son douaire, elle a pluseurs belles terres, chasteaulx et seigneuries a cause desquelles elle a pluseurs causes et procés, lesquelz elle a entencion de poursuir, et aussi de requerir et pourchassier ses droiz, revenues et devoirs que pour raison desdictes terres et autrement lui sont et peuent estre deuz, nous la vueillons auctorizer et lui pourveoir sur ce dudit remede. Pour quoy nous, ces choses considerees et pour certaines autres causes a ce nous mouvans, nostredicte cousine avons oudit cas auctorisee et auctorizons par ces presentes, de grace especial et auctorité royal, a gouverner ses [fol. 115v] terres, seigneuries, chasteaulx, forteresses, rentes, revenues, terres et possessions, a en faire requerir, cueillir et recevoir les fruiz, prouffiz, revenues et emolumens et disposer d'iceulx a sa voulenté, a creer et ordonner un ou pluseurs receveurs et autres officiers, a respondre et estre en jugement et dehors, intenter et demener toutes causes, actions et procés, requerir et demander ses debtes, biens et choses quelzconques, constituer et ordonner un ou pluseurs procureurs ou attournez qui ait ou aient semblable povoir, et generalment de faire et faire faire autant es choses dessusdictes et chascune d'icelles et leurs deppendences et appendences comme elle feroit et faire pourroit se elle n'estoit point liee en mariage. Si vous mandons et a chascun de vous, si comme a lui appartendra, que nostredicte cousine faites, souffrez et laissiez joïr et user plainement et paisiblementc de nostre presente graced, octroy et auctorisacion sanz lui faire ou donner ne souffrir estre fait ou donné aucun destourbier ou empeschement au contraire. Car ainsi nous plaist il estre fait. Non obstans quelzconques usaige, stile, rigueur de droit, coustumes, lettres et constitucions a ce contraires. Donné etc.

Charles etc., a nostre amé Tel, salut. Comme pour certainnes causes nous ayons baillié et transporté a Tel tel nostre chastel, dont vous avions baillié la charge, nous vous mandons et commandons expressement que ledit chastel vous bailliez et delivrez sanz reffuz, delay ou difficulté audit Tel  ; et de la garde d'icelui et du serement que nous en aviez fait vous quittons et deschargons par ces presentes en ce faisant. Donné etc.

Charles etc., au premier nostre sergent etc. De la partie de Jehan Costedart, demourant a Nemousa 1, nous a esté exposé en complaignant que, ja soit ce que a lui compete et appartiengne tele piece de vigne et tele terre et qu'il ne loise a aucun d'en prendre les fruiz, neantmoins puis nagueres Tel s'est transporté de nuit en ladicte vigne, a coppé et arraché les soches et emporté les roisins, rompu les murs et fait autres larrecins et malefices, dont encores punicion n'a esté faicte, ou grant dommage et prejudice dudit exposant et en esclande de justice, si comme il dit, requerant sur ce nostre provision. Pour quoy nous, consideré ce que dit est, qui ne voulons telz malefices demourer impugniz, te mandons et commettons par ces presentes que, appellé avecques toy un notaire publique, tu te informes diligemment et secretement de et sur ce que dit est et tous ceulx que tu en trouveras coulpables ou vehementement souspeçonnez adjourne a comparoir en personne ou autrement, selon l'exigence du cas, a certain et competant jour par devant nostre bailly deb ou son lieutenant, pour fournir a droit sur ce que dit est, respondre a nostre procureur oudit bailliage a telz fins qu'il vouldra eslire et audit exposant civilement tant seulement proceder et faire en oultre ce qu'il appartendra par raison, [fol. 117v] en certiffiant et lui envoyant ladicte informacion feablement close et seellee ; auquel nous mandons et, pour ce que lesdiz malefices ont esté commis et sont yceulx delinquans habitans oudit bailliage et que par devant lui la verité du cas pourra mieulx estre attainte et sur ce justice estre administreec plus tost et par meilleur conseil que ailleurs, commettons que aux parties, ycelles oÿes, faced bon et brief droit. Non obstant etc. Mandons etc. et prisons etc. Donné etc.

[11.48.a] ¶ Nota que on ne donne pas l'auctorité a un sergent de faire seul une informacion, mais fault qu'il y ait un notaire ou autre personne publique avec lui ; bien donne l'en celle auctorité a un commissaire ou examinateur de Chastelet, voire a un huissier de parlement.

[11.48.b] * ¶ Item, quant un sergent ou autre executeur de lettres royaulx a a faire d'avoir obeïssance, d'avoir aide, confort ou prisons, on doit mettre es lettres la clause de Mandons a tous noz justiciers etc.

Charles etc., au bailly de Sens et d'Aucerre ou a son lieutenant, salut. De la partie de nostre amé veneur Philipot Raffo1, escuier, nous a esté exposé en griefment complaingnant que, ja soit ce qu'il soit notoirement en nostre protection et sauvegarde, tant a cause de nostre service comme autrement deuement, et qu'il ne loise a aucun de faire larrecin ne violence a autruy, neantmoins ou mois de N. derrain passé N. N., acompaignez d'autres leurs complices, armés d'espees, auberjons et autres armes invasibles et defendues, se sont transportez de nuit en la garenne dudit exposant, ont prins ses counilsa 2, ses paons et autres biens et, pour ce que son garennier s'efforça de le leur empescher, l'ont batu et villené inhumainement etb, non contens de ce, firent encores tele chose et tele et, en procedant de mal en piz, se transporterent a l'ostel dudit exposant pour le tuer et murdrir, s'ilz l'eussent trouvé, y [fol. 118] rompirent coffres, huys et fenestres, emporterent vaisselle d'argent, robes, linges et autres biens meubles en l'estimacion de mil escuz et firent autres maulx et dommages en enfraingnant nostre sauvegarde, en commettant larrecin publique, port d'armes, invasion et autrement delinquant en grant esclande et lesion de justice et ou dommage et prejudice dudit exposant, et plus seroit se par nous n'estoit sur ce pourveu de remede convenable, si comme il dit, requerant icelui. Pour quoy nous, consideré ce que dit est, qui ne voulons telz malefices demourer impuniz, ainçoiz bonne justice en estre faicte telement que ce soit exemple a tous autres, vous mandons et, pour ce que lesdiz cas ont esté perpetrez en vostre bailliage, comme l'en dit, et que de l'infraction de nostre sauvegarde et aussi du port d'armes la congnoissance appartient a noz juges et officiers, mesmement que par devant vous la verité de ceste chose pourra plus tost estre attainte et la punicion en estre faicte que autre part, toutes faveurs rejectees, commettons que de et sur les choses dessusdictes, leurs circonstances et deppendences et autres, se mestier est, qui baillees vous seront par declaracion, vous vous informez ou faites informer bien et deuement et tous ceulx que par informacion, fame publique ou vehemente presumpcion vous en trouverez coulpables ou souspeçonnez prenez ou faites prendre au corps quelque part que trouvez pourront estre en nostre royaume, hors lieu saint, et les admenez ou faites admener soubz seure garde en noz principales prisons dudit bailliage pour fournir a droit sur ce que dit est et en recevoir tele punicion comme au cas appartendra ; et neantmoins prenez ou faites prendre en nostre main par bon inventoire tous leurs biens meubles et immeubles et soubz icelle les faites gouverner et tenir jusques a ce que par vous en soit ordonné ; et, ou cas que lesdiz malfaicteurs ou autres d'eulx se absenteroient ou latiteroient3, adjournez les ou faites adjourner a leurs personnes, se trouvez peuent estre, sinon a leurs hostelz et domicilles, s'aucuns en ont en nostredit royaume et on peut y avoir seur accés, ou es lieux ou ilz ont acoustumé de converser et repairer et ou lesdiz malefices ont eté perpetrez, a yssue de grant messe, a jour ferié, a son de trompe, par cry publique, es principaulx sieges et auditoires dudit bailliage et autrement, comme il est acoustumé de faire en tel cas, a comparoir personnelment par devant vous a trois briefz jours, sur peine de [fol. 118v] bannissement et d'estre attains et convaincus desdiz cas, pour respondre a nostre procureur a telz fins qu'il vouldra eslire et audit exposant et a chascun d'eulx sur ce que dit est et les deppendences proceder et aler avant en oultre selon raison, en administrant aux parties, icelles oÿes, bon et brief droit. Car ainsi nous plaist il et voulons estre fait. Non obstans quelzconques lettres surreptices empetrees ou a empetrer a ce contraires. Mandons et commandons a tous noz justiciers, officiers et subgetz que a vous et a voz commis et depputez en ce faisant obeïssent et entendent diligemment et vous prestent et donnent conseil, confort, aide et prisons, se mestier est et requis en sont. Donné etc.

Charles etc., a nostre amé Tel, general maistre et visiteur de nostre artillerie, salut. Nous voulons et te mandons que, pour la garde, seurté et defense des chastel et ville de N., tu bailles et delivres ou faces bailler et delivrer a nostre amé et feal conseiller et chambellan N., bailly et cappitaine dudit lieu de N., ou a ses gens pour lui les parties d'artillerie qui s'ensuivent, c'est assavoir XX aubalestres grosses tant de tour que de guelle1, ung canon, X casses de bon trait fin et XII guelles, six doubles et six sanglesa. Et par rapportant ces presentes et recongnoissance sur ce dudit N. seulement, tu en seras et demourras deschargié et seront lesdictes parties allouees en tes comptes et rabatues de ta recepte par noz amez et feaulx gens de noz comptes ; ausquelz etc. Donné etc.

[11.50.a] * ¶ Nota que souventes foiz les chiefz de guerre, mesmement le maistre des arbalestriers, baillent telz mandemens et descharges touchans fait d'artillerie, et non pas le roy.