« Gregorius episcopus, servus servorum Dei, dilecto filio magistro Willelmo, archidiacono Verzenensi, Bituricensis diocesis, salutem et apostolicam benedictionem. Dilectorum filiorum decani et Capituli ecclesie Carnotensis recepimus questionem quod, cum ipsi habeant plures servos, iidem, maliciose se ab eorum serviciis subtrahentes, debita eis servicia denegant exhibere, nisi per duellum convinci valeant ab eisdem. Cum igitur monomachia sit sacris canonibus interdicta, discretioni tue per apostolica scripta mandamus quatinus, si dicti decanus et Capitulum per testes vel alias probationes legitimas de jure suo docuerint in hac parte, servos ipsos ad debita eis servicia exhibenda, monitione premissa, per censuram ecclesiasticam, appellatione remota, compellas, contraria duelli consuetudine non obstante. Datum Laterani, v kalendas maii, pontificatus nostri anno septimo. »