Ego Lora de Monteforti, domina de Sparnone, omnibus hec visuris notum facio quod cum karissimus pater meus Almarricus, bone memorie, condam comes Montisfortis, ob remedium anime sue, legaverit, prout in testamento suo vidi plenius contineri, viginti libras parisienses annui redditus, pro tunicis emendis ad usus pauperum, capiendas videlicet ad census de Barateria medietatem, reliquam vero medietatem ad census de Passoerio, singulis annis, in festo beati Remigii in capite octobris, dividendis ipsis pauperibus unam medietatem per manus abbatis de Vallibus Sarnay, alteram vero per manus abbatis Grandis-Campi : Ego prenominata Lora, eandem voluntatem prefati genitoris mei volens benigniter prosequi et ad effectum ducere, predictum legatum ratum habeo et confirmo, et pro remedio anime ipsius patris mei et mee, volo et assigno quod de predictis viginti libris capiantur decem libre parisienses, singulis annis, ad census meos de Barateria, in termino suprascripto, per manus abbatis Grandis-Campi, pro tunicis, sicut dictum est, ad usus pauperum emendis, et per ipsum abbatem, qui pro tempore fuerit, per terram Montisfortis solummodo, prout melius expedire viderit, pauperibus in festo Omnium Sanctorum dividendis ; ita tamen quod de prefata peccunia sive de tunicis nichil in usus abbacie prenotate convertatur. Quod ut robur et firmitatem perpetuam obtineat, presentes litteras sigilli mei munimine confirmavi1. Actum anno Domini Mº CCº quinquagesimo sexto, mense februario.