Omnibus presentes litteras inspecturis, officialis curie Parisiensis, in Domino salutem : Notum facimus quod Guillermus, dictus Carpentarius, et Seintisma, uxor sua, recognoverunt se vendidisse magistro Radulpho de Gonnessia et ejus heredibus et in perpetuum quittavisse, pro decem et septem libris parisiensibus, quamdam peciam terre arabilis, unum arpentum et quindecim cordas continentem, ut dicitur, quam dicebant se habere et possidere apud Gonnessiam, versus Crucem defuncte Alargie, ut dicebant, in dominio domini de Codrello, ad talem decimam et campipartem, videlicet quod, fructibus decimatis et campiparte, dictus dominus de Codrello habet et percipit solummodo terciam partem decime et campipartis, aliis duabus partibus possessori terre predicte quitte et libere nichilominus remanentibus. Promittentes, etc........... Promiserunt insuper, per fidem suam, quod quam cito Petrum, clericum, fratrem dicte Seintisme, absentem, ut dicebant, repatriare contigerit, ipsi facient et efficaciter procurabunt erga ipsum Petrum quod ipse dictam vendicionem acceptabit, laudabit et ratam habebit. Et de omnibus et singulis premissis tenendis et observandis ipsi venditores obligaverunt dicto magistro Radulpho et ejus heredibus quandam domum quam habent, ut dicebant, apud Gonnessiam, contiguam domui Antelmi, dicti Piquert ; item unum stallum quod habent in draperia de Gonnessia, et aliud stallum in draperia Montismaurenciaci, ut dicebant ; dicta stalla cum domo predicta relinquentes specialiter obligata. Insuper de premissis omnibus et singulis tenendis et fideliter adimplendis, Rogerius, draperius, Thomas de Dugniaco, et Radulphus, gener Johannis de Ganterio, coram nobis constituerunt se plegios et principales garantizatores pro dictis venditoribus. Datum anno Domini millesimo ducentesimo quinquagesimo nono, mense novembri.