A touz ceus qui ces lettres verront, le visconte de Gisors, salut : Sachiés que par devant Robert le Mareschal, tabellion des leitres nostre sire le roy à Andeli, fu prensente Richeut, jadis femme Johan le Normant, de la parroisse Saint-Martin de Tylly, adonques qui requenut que ele avoit donné à touzjours, en perpétuité, en pure aumosne, à l'abé et au couvent et à leur successors de Nostre-Dame du Val de Sorney, quant que ele avoit et povet avoir, où que ce fust et quanque il li peust eschaier, pour la cause de trouver li son vivre et pour estre és bienfes de l'yglise, et pour le salut de s'ame, dont ele se tint pour bien paiée par devant ledit tabellion, à tenir, à avoir, à pourseer touz les dis biens et toutes les dites eschéances as dis religieus et à leur successeurs, bien et en pes, franchement et quitement, sauf le droit segnorel. Et adecertes ladite Richeut jura par devant ledit tabellion, sus saintes ewangilles, que james encontre ces choses desus devisées et dites ne vendra ne fera venir, par soy ne par autre, etc.........................

En tesmoing de ceu, nos avon mis à ces lettres le seel de la ballie de Gisors, sauf le droit le roy et l'autri. Donné l'an de grace mil CC IIII^xx quatorze, le juesdi après Penthecoste.