A tous ceus qui ces présentes lettres verront et orront, Nicholas Gascoing, clerc, garde du seel de la prévosté de Vernon, saluz : Sachent que par devant nous furent présens Lorenz de Tourni et Maheut, sa fame, et recognurent que eus avoient vendu et otroié à hommes religieus, l'abbé et le couvent des Vaus de Sarnai, une acre de terre, assise ù dimage de Tylli, entre la terre as hoiers Gillebert Baudoere, d'une part, et la terre as hoiers Pierres du Port, d'un bout, pour sis livres parisis, etc............ Et obligièrent, quant à ce, les diz vendeeurs en contreplege eus et lour hoiers et tous lour biens, muebles et non muebles, présens et avenir, et espéciaument une pièce de terre, assise à la mare Beneeston, à prendre et à vendre par la main de la justise, pour tous les cous et les damages restorer as diz religieus et à lour successours, s'aucuns en encouroient par défaut de la garantie desdiz vendeeurs ou de lour hoiers, toutes les foiz que mestier en sera. En tesmoing de laquele chose, nous, à la requeste des parties, avons seelées ces lettres du seel de la prévosté de Vernon, sauf le droit le roy et l'autrui. Ce fu fet l'an de grace mil CC quatre vinz et seize, le diemenche après la Conversion seint Pol.