A tous ceus qui ces présentes lettres verront et orront, Jehen Fuiret, garde du seel de la prévosté de Vernon, salut : Sachiez que par devant Pierres du Port, clerc juré nostre sire le roy, tabellion à Vernon, fu présent Gillebert Renout, de la paroisse de Héricourt, et recongnut que il s'estoit rendu et donné lui et tous ses biens, muebles et non muebles, à Dieu et à Nostre Dame des Vaus de Sarnai, et à l'abbé et au couvent de cel meimes lieu, espéciaument dis pièces de terre et une meson, desqueles dis pièces de terre desusdites les cinc en sunt assises en la paroisse de Heubecourt, c'est asavoir la première pièce au Mur Gris, entre la terre de Sauceuse, d'une part, et la terre Robert de Giencourt, de l'autre, par sis souls de tournois au fiex mestre Philippe de Tourni, et par deus souls parisis de rente à Sauceuse ; la seconde entre la terre Guillaume Bouvelot, d'une part, et la terre Rad..... la Vieille, de l'autre, par deus souls et demi et demie geline à Noel, et deus souls et demi à la Nativité de saint Jehan Baptiste, à Jehenin de Launei ; la tierce à la Croiz Bouchart, entre la terre as moines de Vétueil, dune part, et la terre Robert Homfrei, d'autre, par trois souls parisis de rente à Sauceuse ; la quarte au Périer, entre la terre audit Robert Homfrei, d'une part, et la terre Guillaume de Room, de l'autre, par dis et huit deniers parisis de rente à l'abeesse du Trésor ; et la cinquième entre la terre Guillaume de Room, d'une part, et la terre Robert Huscaille, d'autre, par deus boisseaus et une quarterenge de blé de rente à Jehen le Vicomte de Dant-Martin ; et deus pièces en sunt assises en la paroisse de Tylli, l'une entre la terre Pierres Renout, d'une part, et la terre Guillemin de la Frenaie, de l'autre, par douze deniers parisis de rente à Sauceuse ; et l'autre entre la terre Guillaume Daguet, d'une part, et la terre Pierres Renout, de l'autre, par maaille tournoise de rente à Pierres le Camus de Tylli ; et trois pièces en sunt assises en la paroisse de Héricourt, c'est assavoir : la première entre le chemin le roy, d'une part, et la terre Thomas de la Queue-d'Aez, d'autre, par le champart rendant ; la seconde et ladite meson entre la terre Gacé de la Queue-d'Aez, d'une part, et la terre Mahieu le Caron, de l'autre, par quatre souls parisis et un chapon de rente à Gacé de la Queue-d'Aez ; et la tierce entre la terre au Verdier, d'une part, et la terre Pierres Renout, d'autre, par le champart rendant ; à tenir et à porseer et à avoir, par droit héritage, à touzjours perpétuaument, le don desusdit as diz religieus, l'abbé et le couvent desusdiz et à lours successours, etc.........................

En tesmoing de laquele chose, nous avons seelé ces présentes lettres du seel de la prévosté de Vernon, à la requeste des parties, sauf le droit le roy et l'autrui. Ce fu fet l'an de grace mil trois cenz et deus, le jour de lundi devant la feste saint Climent.