A tous ceux qui ces lettres verront, Jeanne de l'Isle, dame de Mally, Louis, sire de Mally, Mahy et Jean de Mally, tous trois frères, chevaliers, fils de ladicte dame, salut : Sçachent tous que nous devons et sommes léaument tenus, chacun pour le tout, aux religieux, abbé et couvent de Nostre-Dame des Vaux de Cernay en la somme de trois cens treize livres huict sols parisis, pour cause de certains arrérages et de plusieurs autres choses comptées entre nous et lesdiz religieux : item nous devons et sommes léaument tenus envers lesdiz religieux en la somme de huict vingtz livres parisis d'argent que lesdiz religieux nous ont prestez à nostre grand besoin, et aussy voulons que les huict vingtz livres parisis dessusdictes soient payées, en prenant un escu d'or pour quatorze solz six deniers ou en autre monnoye courant à la vallue de l'escu, supposé que le roy affoiblist ses monnoyes pour le temps à venir. Desquelles sommes dessusdictes nous voulons que lesdiz religieux en soient payez sur nostre terre de Vertault, en la manière qui s'ensuit : C'est à sçavoir chacun an cent livres parisis, au terme de la Toussaintz prochainement venant, quarante livres, et à la Chandeleur d'après ensuivant, quarante livres, et à la saint Jean-Baptiste après ensuivant, vingt livres ; et à chacune année d'après ensuivant, cent livres, payez en la manière que dessus est devisée, jusques à tant que les sommes dessusdictes soient payées et accomplies, etc.................

En tesmoin de ce, nous avons scellé ces lettres de nos propres sceaux. Ce fut faict l'an de grâce mil trois cens quarante cinq, le vendredy devant la Purification Nostre-Dame.