Universis presentes litteras inspecturis, Guido, dominus Caprosie1, salutem : Noverint universi quod nos volumus et concedimus quod viri religiosi prior de Vallibus Sarneii et prior sancti Pauli de Alneto, qui pro tempore fuerint, accipiant, singulis annis, in censu nostro de Caprosia, in crastino Omnium Sanctorum, viginti libras parisienses distribuendas fideliter et devote pauperibus parrochiarum de Caprosia, de Sancto Remigio, de Sancto Paulo et in aliis parrochiis Caprosie propinquioribus, in burellis et calciamentis, prout melius anime mee viderunt expedire ; de quibus viginti libris dabunt dicti priores, singulis annis, Hospicio Dei de Caprosia usque ad valorem quatuor librarum in pitantia pauperum infirmorum, sicut in testamento nostro plenius continetur. Si autem predictus census non suffecerit ad solutionem predictarum viginti librarum, volumus et precipimus quod defectus sive residuum accipiatur in prepositura nostra de Caprosia. In cujus rei testimonium et munimen, Herveus, miles, filius noster karissimus, sigillum suum, una cum sigillo nostro, presentibus duxit apponendum. Datum anno Domini Mº CCº LXº secundo, mense januario.