A touz ceus qui verront et orront ces présentes letres, Pierre de Marcilly, escuier, chastelain de Rocheffort, salut : Sachent touz que, en nostre présence establi, Andry Basin de Rocheffort recognut de sa propre volenté lui avoir donné, en pure et perdurable ausmone, sanz james rapeler, donnoison feite entre les vis, à religieus homes, l'abbé et le couvent des Vaus de Sarnay, soi et tous ses biens meublez et non meublez, présenz et avenir, en quelque leu que il soient ou puissent estre trouvez, en tresportent desorendroit esdiz relegieus et en leur successeurs tout le droit, la seigneurie, la possession et la propriété que il avoit ou povait avoir ésdiz biens, retenus toutevois à soy ésdiz biens, tant comme il vivra, l'usfruit. En bonne foi ledit Andry promist que encontre ladite donnoison ne vendra ne fera venir par autre ou tens avenir. En tesmoing de laquelle chose, à la requeste doudit Andry, nous avons seellée ceste letre dou seel de la chastelerie de Rocheffort aus causes, sauf le droit de chascun. Ce fu fet l'an de grace mil CC quatre vinz et dis et neuf, ou mais de juing.