Universis presentes litteras inspecturis, Petrus de Gazeranno, armiger, dominus de Orfino, et Maria, ejus uxor, salutem in Domino : Notum facimus quod nos, ob remedium animarum nostrarum et antecessorum nostrorum, concedimus et donamus, donatione facta sollempniter inter vivos, in perpetuum, sine spe revocandi, dilectis nostris viris religiosis abbati et conventui Vallium Sarnaii triginta arpenta nemorum que dicuntur nemora de Pouyers, contigua, ex una parte, nemoribus Templariorum, et ex altera, nemoribus de Essartis, et triginta arpenta nemorum sita in communitate nemorum deffuncti Symonis de Pouyers, fratris ejus, et viginti quinque arpenta nemorum, sita in communitate nemorum de Alneolo, et sex viginti et duodecim arpenta nemorum que vocantur nemora de Diluviis, contigua, ex una parte, nemoribus de Alneolo, et ex altera, nemoribus liberis de Orfino ; et in omnibus aliis nemoribus, ubicumque sint, pertinentibus dominio de Orfino, pascua sive pasturas quibuscumque pecoribus seu animalibus suis, que habent vel habituri sunt de cetero apud Orfinum, sine aliquo redditu, exactione vel costuma ab eisdem religiosis nobis vel nostris heredibus in perpetuum solvendis. Insuper concedimus et donamus per totam terram nostram exitum et reditum, pro suis pecoribus seu etiam animalibus, eundo et redeundo in predictis pascuis seu pasturis, et pro aqua haurienda ad usum domus de Orfino predictorum abbatis et conventus. Et quia homines de Orfino possunt, in dictis nemoribus nostris, elapso quinquennio post excisionem eorumdem nemorum, ponere animalia sua ad pascendum, ex usu et longa consuetudine hactenus approbata, volumus et concedimus quod eadem libertate gaudeant dicti religiosi sicut prefati homines de Orfino. Damus insuper supradictis religiosis ne pecora seu animalia sua possint extrahi a nobis sive a nostris ad aliquam prisionem extra Orfinum pro aliquo forefacto nobis vel nostris illato ab eisdem in nemoribus antedictis ; set cum forefecerint in dictis nemoribus apud Orfinum in curia presbiteri teneantur ; et ne cogantur prefati religiosi a nobis seu a nostris solvere majorem emendam de suis animalibus cum forefecerint quam solent homines de Orfino de suis solvere, videlicet unum denarium pro quolibet animali. Promittentes, etc..................

In cujus rei testimonium et munimen, presentes litteras dedimus dictis religiosis sigillorum nostrorum munimine roboratas. Actum anno Domini millesimo trecentesimo primo, mense maii1.