A touz ceus qui ces lectres verront et orront, Guillaume Postel, garde de seel de la prévosté de Vernon, salut : Sachiez que par devant nous furent présens Symon de Bétisy et Aalis, sa femme, de la paroisse de Saint Nicolas de Vernonniel, et requenurent qu'il avoient donné et délessié à touzjors, par non d'eschange, à hommes religieus, l'abbé et le couvent des Vaus de Sarney ; c'est assavoir dis soulz parisis de anuel rente en chieve segnorie, assise sus la meson Richart l'Uilier, el bourc de Vernon, devant la Meson-Dieu, entre la meson Richart de May, d'une part, et la meson Jehan Boutevilain et sa femme, d'autre ; c'est assavoir pour la moitié d'une meson que lesdis religieus avoient dessoubz Nostre-Dame de Vernon, assis entre la meson Jehan d'Espouville, d'une part, et la meson dudit Symon, d'autre ; laquele meson estoit venue audis religieus par segnorie de la mort Jehane l'Espicière, marrastre dedit Symon, et par deffaute d'oir, et ne rendra ledit Symon que vint soulz parisis de rente de chieve segnorie de ladite meson ; et pour ceu donnèrent il as dis religieus et à leur successeurs lesdiz soulz devant nommez ; et voudrent et otrièrent ledit Symon et sa femme que se les dis soulz devant nommez n'estoient bien solables et en chieve segnorie, si comme dessus est dit, que lesdis religieus ou leur successeurs les puissent prendre sus toute la meson dudit Symon, oveques les vint soulz que eus i ont de chieve segnorie, à tenir et à pourseer, etc...................

En tesmoig de ce, nous avons mis à ces lettres le seel de la prévosté de Vernon, sauf le droit le roy et l'autrui. Ce fu fet l'an de grace mil troiz cens et douze, le lundi devant li saint Symon et saint Jude, apostres.