A touz ceus qui ces letres verront et orront, Guillaume Postel, garde du seel de la prévosté de Vernon, salut : Sachent touz que par devant nous fu présente Ameline de Crevecuer, à cel temps fame Jehan du Pont-Saint-Pierre, borgois de Vernon ; et requenut que ele avoit donné et aumosné en pur don, pour Dieu, purement et pour le salu de s'ame, à l'église de Nostre-Dame des Vaus de Sarnay et as religieus, l'abbé et le couvent, servanz Dieu et Nostre-Dame en ladite église, en laquele ele avoit esleu, si comme ele disoit, sa sépulture, à sa fin, vint livres parisis et son lit forny, teil comme il sera trouvé souz le, ou le melleur des siens, et pour avoir plenière participation en touz les biens fez de ladite église et és oroisons ; lesquex vint libres ele vout et ordena à estre pris sus touz ses muebles et sus touz ses héritages, quex que il soient, gaaigniez ou conquestez, etc............................

En tesmoig de ce, nous, à la requeste de ladite Ameline, avon seelé ces lettres du seel de la prévosté de Vernon. Ce fu fet l'an de grace mil trois cenz et onze, le juedi après la saint Andreu, apostre.