A touz ceus qui ces présentes lettres verront et orront, Symon de Chevreuse, chevallier, sire de Dampierre, et Johanne, sa fame, saluz en Nostre Seignour : Saicheint tuit que nous, pour le salut et le remède de naus ames et de naus prédécessors, avons donné, quité et délessié, desorendroit à touz jours mes, en pure et perpétuel aumone, à l'église de Nostre Dame des Vaus de Sarnoy et aus religieus qui à Dieu servent en ladite église, cinc arpanz et demi de prez en deus pièces, lesquieux nous avions conquis et retrez de Thomas de Sanlices, escuier, mouvenz de nostre propre fié et de nostre propre héritage, assis entre les Grous-Sauz et le moulin de Saint-Denis, qui fu jadis monseignor Johan de Sarnoy, chevalier, en renoncent desorendroit à tel droit comme à nous appartient ou puet appartenir pour la reson des cinc arpanz et demi de prez desusdiz, exceptée la haute justice et la basse qui à nous doivent appartenir et sis deniers parisis de cens que les diz religieux feront chacun an à nous et à naus hers, ou jour de feste saint Andri ; et en récompanssacion de ce, lesdiz religieux, de lour bonne volenté, de lour courtoisie et de lour charité, nous aquellent et font participanz en touz les biens qui sunt et seront fez espirituelment desoremes en ladicte église ; et nous donnent chacun jour une collecte du Saint Esperit, et chacune semaine une messe tant comme nous vivrons, et après nostre décès, ladite messe sera chantée de Requiem en ladite collecte. Et tant comme l'un de nous survivra l'autre, chacun en portera sa moitié tant de la messe comme de la collecte, tant au vivant comme au mort, etc..............

En témoign de laquele chose, nous avons donnés ces lettres seellées de naus propres seaus, fetes l'an de grace mil CCC et quatorze, le lundi d'après la feste saint Gile et saint Leu.