A tous ceulx qui ces présentes lettres verront, Raoullin Franczois, prévost de Chevreuse, salut : Scavoir faisons que par devant Jehan Foucault, clerc, tabellion juré en la chastellenie dudit lieu, Jacques de Thumery, escuier, demourant à Paris, et seigneur de Dampierre, près dudit Chevreuse, congnut et confessa avoir traictié, pacifié et accordé avec les religieulx, abbé et couvent de l'église, abbaye et monastère Nostre Dame des Vaulx de Sarnay, en la manière qui s'ensuyt. Comme procès fust espéré à mouvoir entre lesdits religieulx, abbé et couvent des Vaulx de Sarnay, d'une part, et ledit Jacques de Thumery, escuier et seigneur dudit Dampierre, d'autre part, pour raison et à cause d'une pièce de pré, de toute ancienneté ausdits religieulx appartenans, contenant sept quartiers ou environ, assis és Escouardes, et lequel pré est devenu en ruyne et non valloir à cause d'une chaussée et estang que ledit escuier a fait faire audit lieu, tellement que l'eaue dudit estang regorge dedans ledit pré, pour quoy iceulx religieulx n'en peuvent faire leur prouffit, et avoient requis ledit escuier par plusieurs foiz d'estre récompensés d'icelle perte, et tellement que lesdits religieulx ont voulu traicter en justice icellui escuier. Et pour éviter aux fraiz et mises qui se pourroient trouver en procès, et aussi pour avoir paix et transquillité, icelles parties se sont accordées ensemble et appointées en la manière qui s'ensuit. C'est assavoir, iceulx religieux, abbé et couvent ont, par eschange, délaissé, ceddé, quicté et transporté du tout en tout audit escuier ladite pièce de pré, contenant sept quartiers és Escouardes, ensemble une autre pièce de pré tenant ausdits sept quartiers, avecques ung quartier, du don de madame de Chevreuse, tout ce que dit est assis ez Escouardes, entre le moullin d'Aulne et Dampierre ; de laquelle pièce de pré qui tient ausdiz sept quartiers, et dudit quartier, ne joyssent pas de présent iceulx religieux ; et générallement tout le droit qu'ilz povoyent avoir en toute ladite prarie des Escouardes, assis entre le moullin d'Aulne et Dampierre, avecques la haulte justice, moyenne et basse que lesdits religieux avoient et povoyent avoir ésdits sept quartiers de pré. Et ledit escuier, par eschange, et en récompense de ce que dit est, a délaissé, quicté, ceddé et transporté, et en nom de pur eschange et par vertu et teneur de ces présentes délaisse, cedde, quicte et transporte du tout en tout ausdits religieux une pièce de pré, contenant cinq quartiers ou environ, assis à Moranval, tenant d'un costé à la terre de l'église de Senlices, que tient de présent Colin Condé, et d'autre costé aux prez du seigneur de Sarnay, aboutissant d'un bout au pré à la Civote, ausdits religieux appartenant ; lesdits cinq quartiers de pré non chargés d'aucunes charges ou reddevances, avecques deux solz six deniers parisis de cens et une trousse de foing que ledit escuier avoit et disoit avoir de toute ancienneté sur les prez desdits religieux assis en la vallée de Dampierre et de Senlices ; et dont n'estoit en pocession ne en payement ledit escuier que de douze deniers parisis et une trousse de foing prins sur ledit pré à la Civote, ausdits religieux appartenant. Et avecques ce, a quicté et transporté ledit escuier ausdits religieux quatre mailles parisis de cens que iceulx religieux debvoient audit escuier par chacun an, à cause d'une petite masure assise à Sarnay-la-Ville, en la rue de Bourgneuf, qui anciennement fut à Robert le Normant, tenant au grant hostel d'iceulx religieux, icelle masure contenant troys toyses de large et cinq toises de long ou environ, avecques une place où soulloit anciennement avoir masure, assise en ladite rue du Bourgneuf, contenant de longueur environ dix huyt toises, et de largeur troys toises ou environ, tenant d'un costé à Jehan Foucault, bourgeois de Chevreuse, à cause de Boullart, et d'autre costé tout du long à la censive desdits religieux, aboutissant d'un bout au pignon de la grant granche desdits religieux, à cause de leur dit grant hostel de Sarnay ; et d'autre bout à ladite rue dudit Bourgneuf, avecques toute la haulte justice, moyenne et basse que ledit escuier avoit et povoit avoir és choses dessusdites et en chacune d'icelles, sauf et réservé la masure dessusdite, qui fut anciennement Robert le Normant, tenant audit grant hostel des Vaulx, en laquelle ledit escuier a retenu la haulte justice tant seullement, etc.............

En tesmoing de ce, nous, à la relacion dudit juré, du seel de ladite chastellerie de Chevreuse avons fait seeller ces présentes lettres par vénérable et discrète personne maistre Pierre Bonesseau, bachellier en décret, garde desdits seaulx. Ce fut le lundi quinziesme jour de novembre, l'an mil quatre cenz quatre vingts et quatre.

1 « J. Foucault.