A tous ceux qui ces présentes lettres verront, Pierre Mercier, garde des sceaux des chastellenies de Trappes et de Beaulrain, et Charles de Jussac, escuyer, garde des sceaulx de Lévis, salut : Sçavoir faisons que ........... honnorable homme et sage André Lasne, marchand, demeurant audit Trappes, et Simonne, sa femme, ...... congneurent et confessèrent eux avoir donné et par ces présentes donnent, par manière de perpétuelle aumosne, à l'église et monastère de Notre-Dame des Vaulx de Cernay, c'est à sçavoir un fief, terre et seigneurie, nommé et appellé le fief de Greffiers, assis et situé en la paroisse de Sonchamp, en la chastellenie de Rochefort et en la comté de Montfort-l'Amaury, avec les fiefs, arrière-fiefs, cens, rentes, revenus, circonstances et dépendances dudit fief, lequel contient six cens arpens de terre ou environ............ Ces présens don, cession, transport et délaissement dessusdits ainsy faits par lesdits donateurs à ladite église, aux charges que ledit fief est et sera tenu faire, moyennant aussi pour estre associez et participans en tous les bienfaicts, messes, prières, suffrages et oraisons faicts et à faire en ladicte église des Vaulx, en toutes les églises et monastères dudict ordre de Cisteaulx et dépendances d'iceluy, et pour estre ensépulturez et inhumez en ladicte église des Vaulx, au lieu et place où il plaira à l'abbé d'icelle abbaye quand ils iront de vie à trespas : lequel abbé, accompagné de quatre ou six des religieux d'icelle abbaye, sera tenu accompagner leurs corps depuis ladite ville de Trappes jusques à ladite abbaye des Vaulx ; et le jour qu'ils et chacun d'eux seront inhumés, lesdits religieux seront tenus faire le service et enterraige solennellement ; et semblablement le huictiesme jour après ensuivant, c'est à sçavoir vigiles à neuf leçons et trois messes haultes à diacre et sous-diacre avec les basses messes, que seront tenus dire et célébrer tous et chacuns les religieux d'icelle abbaye pour les âmes dessusdites : et avec ce, par chacun an, à tousjours perpétuellement, seront tenus iceux religieux faire un anniversaire solennel, à haute messe et vigiles des Trépassez, au jour de l'obit du premier qui décédera desdits donateurs, lequel jour ils seront tenus escrire en épitaphe au calendrier et marthirologe de ladite abbaye, iceluy lire et ramentevoir par chacun an en chapitre le jour précédent dudit obit, et à tous et chacuns des jours d'obit, lesdits religieux auront, en outre leurs pensions accoustumées, la somme de seize sols parisis, lesquels seront pris sur les censives et revenus desdits fiefs et arrière-fiefs, etc.....

En tesmoin de ce, nous avons scellé ces présentes des scels dessusdits, qui furent faites et passées le mercredy quatorziesme jour de janvier, l'an mil quatre cens quatre vingt et dix neuf.