II. De dons 1 [rubr.]

Ulpianus dit : plusors manieres de dons sont. Aucuns done par tel corage que il veust2 que ce que il done soit maintenant à celui qui le reçoit, ne il ne le fet por nule cause fors por sa largece ; ce apele l’en propremant don. ¶ Aucuns done en tel maniere que ce que il done soit à celui qui le reçoit quant aucunne chose sera avenue ; et ce n’est pas apelé proprement dons, ainz dons soz condicion. ¶ Et se aucuns done par tel corage que ce que il done soit maintenant à celi qui le reçoit, neporquant il vieust que il retort à lui se aucunne chose avient ou s’ele n’avient pas, ce [123vA] n’est pas proprement dons, mes dons qui puet estre depeciez par condicion ; et tex est dons qui est fez par cause de mort. ¶ {1} Quant nos dison donc que don vaut entre esposé et esposee, nos uson de propre non de don et mostrons la volenté et le fet qui de celui vient, qui done aucunne chose par sa largecie et si que ele soit maintenant à celui qui la reçoit et ne reviegne à lui en nul cas. Et quant li espossez done à l’esposee par tel corage que il ait arrieres ce que il li done se lor mariages n’est assenblez, nos dison que c’est dons qui puet estre depeciez soz condicion.

Ulpianus dit : l’en doit generaument distinter en cex dons, que il a moult grant difference s’il i ot cause de doner ou condicion ; car s’il ot cause de doner, ce qui fu doné ne puet estre demandé arrieres ; et s’il i ot condicion, il puet estre demandé.

Ponponius dit : dons puet estre perfez par moine persone.

Ulpianus : dons qui sont fez por amor ne sont pas deffenduz, quex que il soient ou honeste si comme cil qui sont fez à foles femes.

Ponponius dit : quant l’en otroie à aucun que il abit por noiant en autrui mesons, ce senble dons qui est fez à celui qui abite sanz doner en loier. Et dons qui est fez de tens puet valoir, si comme se i ostroie à mon detor que je ne li demanderoi rien devant un certein terme. ¶ {1} Li fruit qui sont receu des choses donnees ne sont pas contees ou don. Mes se ge ne te donoie pas mon champ, mes poer de coillir en les fruiz, li fruit seroent conté ou don. {2} Ce qui li fiz qui est en bail a doné por le commandemant son pere ou por sa volonté vaut autretant comme se li peres moismes l’eust doné. Et se tu dones en ton non ma chose par ma volenté, li dons ne vaut rien ; car la chose ne puet estre donee s’ele n’est à celui qui la done.

Paulus : l’en puet bien doner à celui qui n’est pas presanz, ou par envoier li, ou par ostroier li que ce que il a ja soit sien. Mes s’il ne siet pas que la chose que il i a li soit donnee, ou il ne reçoit pas cele qui li est envoie, il n’en est pas sires, ja soit ce que ele li est esté envoié por son serf moismes s’ele fust tote soe.

Gaius dit : quant l’en enquiert de don il n’apert pas que li fruiz ne les pen[123vB]sions ne li loage soient doné. ¶

Ulpianus dit : cil qui est obligiez à doner aucune chose est trez en cause, si comme li enpereres Pius dit, por tant comme il puet fere.

Cil moimes dit : cil qui me voloit doner une chose la bailla au serf qui estoit communs à moi et à Tice. Et li sers le reçust por aquerre la ‹à› Tice et à moi ensenble. L’en demande que l’en en doit fere. Et il nos plest que, ja soit ce que li sers la reçut por carage d’aquerre la à moi compoignon sol, ou à moi et à lui ensenble, neporquant ele est aquise à moi sol ; car, se tu bailles à mon procurator une chose por corage d’aquerre la à moi, et il la reçoit por corage d’aquerre la à lui, il ne fet rien à lui ainz l’aquiert à moi.

Julianus dit : qui coitive autrui champ par cause de don n’en peut riens retenir por les despens ; car la chose que il i met est maintenant au seignor.

Marcianus dit : dons que aucuns fet puis que il a fet capital crime vaut selonc l’establissement as enpereors Sevoir et Antonius s’il n’a esté condempnez.

Ulpianus dit : se li peres fet cele escriture : « je donne à celui et à cel autre qui je franchi totes les robes et tot le vin que je avroi à moi quant je morroi », li heir sachent que totes les devant dites choses apartienent par beragne exposicion à cex qui furent franchiz.

Cil moismes dit : se chose juigee est amenee an convenance por cause de renovelement, et la convenance est aprés quitee por cause de don, l’en dit que de ce vient delivrance.

Modestinus dit : il est droiz que cil qui a promis por cause de don deniers ou aucunne autre chose ne poit pas avoir usures por la demore de la poie ; por ce moismement que dons n’est pas contenz es marchiez de bone foi.

Cil moismes dit : li creanciers puet quiter et amenuiser por convenant les usures dou tens qui est à venir ; ne nus vices ne vient en ce don por la some de la quantité. {1} Cil moismes dit que cil qui est forsenez ne puet rien doner.