III. Dons qui sunt fez par cause de mort [rubr.]

Ulpianus dit : dons por cause de mort est quant cil qui dona la chose l’eime mieuz à lui tant comme il vivra que à celi à qui il la dona. ¶ Et veust meuz que cil à qui il la done l’ait, aprés s’il mort, que ses heirs.

Cil moismes dit : Juliens dit que il est .iii. manieres de dons por cause de mort. L’une est quant aucun done sanz peor de peril qui soit presenz, [124rA] mes por ce sanz plus que il pense à la mort. ¶ L’autre est quant aucuns est apontez par present peril et il donne si que il veust que la chose que il done soit maintenant à celui qui la reçoit. ¶ La tierce est quant il a peor de mort et il done si que la chose ne soit pas maintenant à celui qui la reçoit mes quant sera morz.

Paulus dit : il loit à doner par cause de mort non pas tant solement por la maladie, mes por peor de mort prochene, ou par peor d’anemis, ou de larrons, ou de poissanz homes, ou par haine, ou quant l’en doit aler par mer.

Gaius dit : quant l’en doit aler par leus perillos.

Ulpianus dit : ou par vuillece.

Paulus dit : car totes ces choses demostrent apert peril.

Ulpianus dit que se aucuns done aucunne chose par cause de mort et il soffre aprés poine capital, li dons faut comme cil qui n’est pas perfez ; ja soit ce que li autre don, qui sont fet sanz sopeçon de poine, vaillent.

Paulus dit : il est ostroié à cex qui puent recevoir lés que il recevent don par cause de mort.

Ulpianus : il est certaine chose que l’en puet establir que aucuns ait la chose aprés celi à qui ele fu donnee por cause de mort ; si que cil qui la done ostroit que uns autres l’oit, se cil à qui i l’a doné ne la puet avoir, ou soz autre condicion.

Cil moismes dit : li peres puet par droit doner por la cause de la mort son fiz, ja soit ce que li fiz ait feme.

Paulus dit : il est establi que li don qui sont donné por cause de mort puent estre rapelé à la maniere de lés. ¶

Don qui est fez por cause de mort puet estre rapelez, tant comme il est en dote, se li donnerres guerra ou non.

Cil moismes dit : ja sé ce que li detors n’ait pas corage de barater ses creanciers, neporquant la chose que il a donee por cause de mort doit estre rapelee. Car, autresi comme li lés ne valent rien que cil qui n’a dont aquiter ses detes font en son testamant, apert il que le don que il fet por cause de mort doivent estre depeciez, car il ont senblance de lés.

Cil moismes dit : plusors sages homes escritrent, et Priscus s’i acorde, que cil qui reçut deners, que il ne demandast heritage, les reçut por cause de mort.

Affricanus dit : es dons qui sont fet por cause de mort l’en ne doit pas regarder au tens dou don, mes au tens de la mort à ce que aucuns les puisse avoir.

Cil moismes : se cil qui donnent li uns à l’autre por cause de mort [124rB] muerent ense‹n›ble, li heir à l’un ne à l’autre ne demandent pas arriere les dons ; car li uns ne sorvoin pas l’autre1. Cil moismes : droit est se li mariz et la feme donent l’uns à l’autre.

Cil moismes dit : quant l’en done par cause de mort si que li dons ne puisse estre rapelez en nul cas, c’est meuz dons perfez que dons por cause de mort ; et por ce doit l’en dire que cil dons est autresi comme cil qui est fez entre les vis. Et la loi qui fet retaillier les lés n’i a pas leu, autresi comme au don qui est fez por cause de mort.

Cil moismes dit : cil qui dona une chose por cause de mort la puet demander arriere, ou avoir aucion sus la chose s’il se repent.

Marcellus dit : dons por cause de mort puet issi estre establiz que une certoine quantité soit rendue chescun an2 à aucun tant comme il vivra ; mes il n’en puet rien demander tant comme li doneres vive.

Paulus dit : se cil à qui uns sers fu donz por cause de mort le franchi, le pris do serf li doit estre demandz se li donerrers garist.

Cil moismes dit : ce que cil qui à franchise a esté lessié3 done de son chetel à un des heirs doit estre conté à celui qui le reçoit en sa partie de l’eritage. Il senble que il doint de son chetel quant il done ce que il i a esté doné ; et ce que uns autres done en son non, quant il est presanz, est autresi comme s’il moismes le donast.