I. [105rB] Ci titres est d’aucions de choses par feme à mari ostees [rubr.]

Paulus dit : li juigemenz des choses ostees a esté1 trovez contre cele qui fut feme à aucun, car il ne plest pas au mestres de droit que l’en ne puisse pledier à lui par aucion de larrecin. Et li un cuident que ele ne puet pas fere larrecin o son mari, si comme Nerva et Cassius dient, car la compoignie de feme la fet dame en une maniere ; et li autre, si comme Sabinus et Proculus, dient que ele pot bien fere larrecin, autresi comme la fille le fet à son pere, mes aucion de larrecin n’i a pas lieu de droit qui est establiz ; et à ceste sentence s’acorde Juliens.

Paulus dist : car en l’enor de mariage est l’aucion julienne nee contre la feme.

Paulus : et por ce, s’ele toche à cez choses moismes, aprés le departement do mariage, ele est tenue de aucion de larrecin. {1} ‹Et se ses sers fet larrecin›2, nos poons pledier o lui par aucion de larrecin. {2} Il puet avenir que aucun puet pledier à sa feme par aucion de larrecin se ele fist larrecin à celi à qui ele estoit hers, ou à lui meisme, ainz que il la prist à feme ; neporquant, por la reverence des persones, nos dison que il ne pot fere en l’un et l’autre cas, fors demander [105vA] ariere la chose qui fut enblee. {3} Ce que Offilius dist est voirs, que les choses que la feme a despendues ou vendues ou donees ou gastees par aucunne maniere au tens do departement sont contenues par non de choses gastees ou ostees. {4} Se la fille qui est en baill oste aucunnes choses, Mela et Fulcius dient que aucion en doit estre donee por son chastel ; car il ne lor plet pas que ele soit obligee par aucion de larrecin, ou que aucions des choses ostees soit donee contre lui. ¶ Se li peres et sa fille pledent à son mari por son doere, aucion ne pot pas estre donee au pere se la fille ne le fet procurator par bone caucion en juigemant des choses ostees. ‹Mes Proculus dit que quant la fille est morte il ne convient pas que action de choses ostees›3 ne soit donee contre le pere fors en tant com il en est plus riches.

Ponponius dit que en tant com il a fet par tricherie qu’i n’est pas venue à lui.

Ulpianus dit : feme a contre son mari aucion de choses ostees ; par quoi l’aucion4 que il a contre lui, por cele meisme cause pot estre quitee.

Ponponius dit : se l’en ne dit pas quant li doeres fut renduz à la feme que l’en voloit pledier à lui par auction de choses ostees, por ce ne remaint pas que l’en n’i puisse pledier ; car quant il n’i a point de doere, si est ceste aucion donee. {1} Sabinus dist que se la feme ne rent les choses que ele osta, eles doivent estre prisees par le seremant à l’ome.

Paulus dit : car il n’est pas droiz que il vende ses choses maugré suen por le pris que eles valent.

Et por ce ne doit il pas asseurer que eles ne seront pas chalengees, et c’est por la constumence à la feme.

Ulpianus dist : Marcianus escrist que se li hom met sa feme hors de sa meson ou la feme son mari, il sont tenuz por aucion de chosees ostees. ¶ {1} Se cil qui met avant aucion5 des choses ostees se velt mestre sor le seremant à son aversere, li aversaires est contrainz à jurer que il n’a rien osté, por quoi cil jurt avant que il ne le charge pas dou seremant par malice6. {2} Et la fe[105vB]me est autresi bien contrainte comme li mariz ; mes li peres à celui qui oste les choses n’est pas contrainz de jurer, car il n’est pas droiz que li uns jurt do fet à l’autre. Cil est donc contrainz de jurer que l’en dit qui a osté les choses ; et por ce son heir ne sera pas contrainz de jurer. {3} Se li seremanz est mis sor aucun et il le velt mestre arriere sor son aversere, il ne senble pas que li prevoz l’ostroit.

Paulus dit : ne plus que se aucuns se met sor le seremant à celi qui plede à lui par aucion de larrecin, savoir mon se cil est lerres.

Ulpianus dit : il n’i a point de force se li hom et la feme ont habité ensenble à ce que aucions de choses ostees aparteignent à un d’aus ; car ele pot apartenir contre cele qui a osté aucunne chose de la meson en quoi ele n’abitoit pas o son mari. ¶ {1} La feme et la bruz poent fere larrecin au mari ou au socre ; mes eles ne sont pas tenues par aucion de larrecin se le fiz n’est hors de bau ; car lors pot la bruz fere larrecin à son socre et est tenue à lui par aucion de larrecin.

Hermogenes dist : se li bien au mari sont eschoet à la borse l’enpereor, la feme rendra ce que ele en a osté sanz plus, ja soit ce que li autre soient condempné à rendre en quatre dobles ce que il en ont osté.

Ulpianus dist : se la meschine à aucun a osté de ses choses, nos usons de tel droit que ele soit tenue par aucion de larrecin. Et nos disons que par tout la où mariages faut, si comme en cele qui s’est mariee à celui qui l’avoit en garde, ou contre les commandemanz, ou en quel maniere que mariage cesse, aucion de choses ostees cesse ; car ele apartient por cause de departement. {1} Nos apelons « choses ostees » non pas solement celes que la feme osta quant ele prist consoil de departir le mariage, mes celes que ele osta avant se ele les cela ou tens do departement. {2} Juliens dit que ou tens des choses ostees vienent non pas tant solement les choses qui encor durent mes celes qui sont faillies ; et ausi poent eles estre demandees ariere. ¶ {3} Cele qui a osté les choses qui estoient engagies à son mari est tenue7 par aucion des choses ostees. [106rA]

Paulus dist : et cil qui les avoit engagies les puet demander arriere ; et l’en doit otroier à l’un et à l’autre à pledier an.

Ulpianus dist : se la feme amena larrons en la meson son mari ou tens do departement et ele lor fist oster les choses, si que ele n’i tocha onques, ele sera tenue par aucion des choses ostees. C’est donc voirs que Labeo dit que la feme puet estre tenue par aucion des choses ostees, ja soit ce que les choses ne sont pas venues à lui.

Triphonius dist : li pris des choses ostees doit estre reportez ou tens ou quel eles furent ostees, car c’est larrecin, ja soit ce que la feme en soit chastiee plus legierement que uns autres. Et por ce, cil qui porsiet en bone foi les choses qui sont issi ostees ne les pot pas gaigner par longue tenue ; mes s’eles sont enpleies et eles ne sont pas rendues, li pris croist, ausi comme quant l’en demande arriere chose qui a esté enblee.

Papinianus dist : quant aucion de choses ostees est mise avant contre feme aprés ce que li mariages est departiz, se li mariages est assenblez arriere, l’aucion faut.