II. Ci titres est de reconoistre les enfanz et de norrir les, ou les peres ou les patrons ou1 cez qui ont esté franchi [rubr.]

Ulpianus dist : le consoil au senat qui fut fez de reconoistre les enfanz contient .ii. especes : l’une est de cez qui les reconoissent et l’autre de celes qui tiennent autrui enfanz por loer. {1} Il est donc ostroié à la feme, ou à son pere en qui poesté elle est, ou à celi à qui il le commandent, se il cuident que la feme soit grosse, que il le denoncent à son mari dedanz .xxx. jorz aprés le departement do mariage ; ou à son pere en qui poesté il est ; ou en sa meson se il ne2 trovent ne li ne son pere. {2} Nos apelon « sa meson » son ostel se il maint en cité ; et se il n’est pas en cité mes en vile, sa meson est la où il converse. {3} L’en doit donc denoncier au mari que sa feme est grosse de lui ; mes ce n’est pas que il envoit gardes, et c’est assez à la feme que ele li face savoir que ele est grosse. Et il apartient au mari ou que il i envoit gardes ou que il li renonce que ele n’est pas grosse de lui ; et il est ostroié au mari que il le face, ou autres por lui. {4} La poine au mari est tele que s’il [106rB] n’i envoie gardes, ou s’il ne li renunce que ele n’est pas grosse de lui, il est contrainz de reconoitre l’enfant ; et s’il ne le reconoist, il doit estre chaciez hors d’ordre. Il doit donc respondre que ele n’est pas grosse de lui, ou il doit estre respondu en non de lui ; et s’il le fet issi, il n’avra pas besoing de reconoistre l’enfant se il n’est verement son fiz. {5} L’en doit savoir que le denoncemens ne commence pas do mari, mes de la feme. {6} Mes se li mariz offre garde de son gré et ele ne le reçoit pas par le juigement au juige, li mariz ou sis peres a franche poesté que il ne conoisse pas l’enfant. {7} Se la feme ne denonça pas à son mari dedanz .xxx. jors que ele estoit grosse, s’ele li denonce aprés, ele devra estre oïe quant la cause sera coneue. {8} Et s’ele lesse à denoncier de tot, Juliens dit que ce ne doit pas nuire à l’enfant qui nest. {9} Nos devons conter les .xxx. jors continués dés le jor do departement. ¶ {10} Julien demande, se la feme ne denonça pas à son mari dedanz les .xxx. jors, savoir mon se li consoill au senat i a leu. Et Plancius dist que le consoill au senat cesse, car il ne senble pas que il entende de l’enfant qui nest dedanz les .xxx. jors ; et le senat dona .xxx. jors à denoncier le ; mes ge croi que ceste chose ne grieve de rien l’enfant. {11} Autresi comme, se la feme denoncie, et li mariz i eust envoié gardes, ‹nus grief ne li venist de ce. Il li loira donc avoier que li enfes n’est pas de lui ; ne ce ne li nuira riens que il i a envoié gardes›3. Et issi l’escrit Marcianus, et dit que se aucun renie sa feme ou que ele n’est pas grosse de lui, il li puet envoier gardes sanz nul gref ; mesmement, se il li dist avant que il les i envoiast. ¶ {12} Juliens dist que ce qui est compris ou consoil au senat, que se la feme denonce à son mari que ele est grosse de lui, et il n’envoie pas gardes à garder la, ne il ne pot pas dire que de lui n’est ele pas grosse, il li convient par force reconoistre l’enfant qui est nez. N’apartient pas à ce que, se aucun dist que il reconoist l’enfant, il soit son heir, ja soit ce que il soit conceuz d’autre ; car, si comme il dit, quanz l’en comenst4 à pledier la confession au pere aporte grant grevance à l’enfant. {13} Cil meisme dit encontre que quant li mariages est departiz, se la feme ne fet les choses qui sont commandees ou conseill ou senat [106vA], il loisse au pere que il ne reconoisse pas l’enfant, ce n’apartient pas à ce, que il ne puisse dire que li enfes fut son, mes à ce sanz plus que li peres soit contrainz de norrir le, se il est certaine chose que il soit son fiz. ¶ {14} Cil meismes Juliens dit que se la feme denonce que ele est grosse, et li mariz ne li nie pas, li enfes n’est pas son à force, neporquant il doit estre contrainz de norrir le ; car se il est autremant, ce seroit tort. Se aucun a esté longuement hors do païs et il revient et trove sa feme grosse, et il la mest hors por cele cause, se il entrelesse aucunnes des choses qui sont contenues ou conseil au senat {15}, il apert par ce que li enfes qui nestra sera son heir ; et se la feme entrelesse aucunnes des choses que ele deust garder segont le conseill au senat, ce ne nuist rien au fiz, ne en droiture ne en norriture, si comme li enpereres Pius l’escrit. Et se li peres despit à fere ce que il devoit fere par le conseil au senat, il sera contrainz de norrir l’enfant ; mes se il ne le despit pas, il porra refuser l’enfant. {16} Et quant la feme li denonça que ele estoit grosse, s’il noia que ce n’estoit pas de lui, ne il n’i envoia pas gardes, il ne eschivera pas que l’en n’en quiere se la feme estoit grosse de lui. Et se cele cause est menee par devant le juige et ‹il› prononce par ce que il a oï que ele fu grosse de lui, il convient que il reconoisse l’enfant comment que il soit.

Julianus dist : en totes causes, il sera freres as autres enfanz.

Paulus : Il senble que cil renie l’enfant non pas tant solement quil dit que il n’est pas son, mes quil le gite, ou quil le nie norreture, ou qui le met en communs lieus que la gent en aient pitié. ¶

Cil meismes dit : se li peres velt que si enfaint le sostiengnent, ou li enfaint volent que lor pere les norrisse, li juiges quenoistra de la cause. {1} Mes il convient voer se aucuns est contrainz de norrir ces enfanz tant solement qui sont en sa poeté, ou cez qui sont hors de son baill par aucunne maniere. Et ge croi que se li pere deivent norrir lor enfanz, ja soit ce que il ne soient pas en lor poesté ; et autresi, li enfant devent norrir lor pere. {2} Mes il convient voer se li enfant sont contraint tant solement de norrir lor pere et lor eol et lor beseol par devers le pere ou la mere, et cez qui sont par devers lui. Et il [106vB] est mielz que li juiges s’en entremete d’une part et d’autre et sequorre la où il verra que mestier en sera, ou par besoing ou par maladie. Et por ce que ceste chose descent de lëaute et d’amor de sanc, il convient que li juiges regart au desirrer à chescun. {3} Ce maisme doit l’en dire as enfanz que li pere doivent norrir. {4} Nos contreignon donc la mere de norrir ses enfanz, et meismement cez qui sont de porchaz, et les enfanz de norrir lor meres. ¶ {5} Li enpereres dist que li aiaus de par la mere doit estre contrainz de norrir lor nevoz. ¶ {6} Cil meismes escrit que li peres norrisse sa fille se il est certaine chose par devant le juige que ele aist esté engendree lëaument. {7} Et se li fiz se pot maintenir, il convient que li juige regardent se il devent commander au pere que il le norrisse. Et li enperes Pius rescrit issi : « Je te donroi avenanz juiges, et il commanderont que ton pere te norrisse selonc la maniere de son chetiel desque tu diz que es si malades que tu ne puez pas fere ton mestier ». {8} Se li peres renie le filz, et il dit por ce que il ne le doit pas norrir, ou se li fiz renie le pere, il convient que li juiges conoissent sor ceste chose. Et quant il seront certain que il est son fiz ou son pere, lors comoinderunt il que il le norrisse ; et s’il n’est son pere ou son filz, il juigeront que il ne le doit pas norrir. ¶ {9} Il convient que s’il juige que il le doit norrir, ci juigemanz ne grieve de rien la verité, car il ne juige pas que il fut si fiz ou sis peres, mes que il le devoit norrir ; et issi l’escrit li sainz enpereres Marc. ¶ {10} Se aucun refuise à norrir celi de qui il est juigé que il le norrisse, norreture li sera establie selonc la quantité do chetel ; et s’il ne les paie, si gage seront pris et vendu tant que satisfacion soit fete à la sentence. {11} Cil moismes juiges doit regarder se li peres a aucunne droiturere cause por quoi il ne velt pas norrir l’enfant que il acuse. ¶ {12} Il est contenuz es escriz au princes que li peres doit doner norreture as enfanz, non pas tant solement norreture, mes totes les choses dont il ont mestier. ¶ {13} Se li fiz qui a meins de .xiiii. anz est hors do baill, il sera5 contrainz de sostenir son pere se il est povres ; car ce seroit deslëauté que li peres fust besoignos et li fiz fust riches. ¶ {14} Se la mere demande au pere les despenses [107rA] que ele a fetes por norrir le fiz, li enpereres Marc dit que ele doit estre oïe en cez paroles : « li juige priseront combien ton mari doit rendre por les necesseres despenses que tu as fetes por norrir ta fille ; ne tu ne poz pas demander les choses que tu li feisses par la reson do mariage se sis peres les norrissent ». {15} Reson de6 pitié dist que li heirs qui est riches doit sostenir le pere et sa mere se il en ont besoing. {16} Ja soit ce que li fiz doit sostenir sa mere par le droit naturel, ne por tant il ne doit pas estre contrainz de paier ses detes. {17} Il a esté escrit que li heir au fiz devent estre contrainz de fere ce que li fiz fesoit por l’ofice de pitié quant il vivoit ; mes ce ne doit pas estre fet fors quant li peres est amenez à trop grant povreté. ¶ {18} Li juige solent conoistre entre les patrons ‹et› cez que il ont franchi se l’en plede que li un norrissent les autres. ¶ Se il vient donc que cil ne7 les ont pas franchiz, li juige en doivent conoistre premierement ; et s’il sievent certainement que il aient esté franchi, il doivent juigier que il norrissent les patrons ; et li juigemanz ne todra pas à celui qui fut franchi poer de pledier se il nie que il ne fut pas franchi. ¶ {19} Norreture doit estre donee à besoignos selonc la quantité do chetel ; et s’il ont de quoi il se puissent vivre, li juiges ne lor feront pas doner autre norreture. ¶ {20} L’en pot doter se cil qui ont esté franchi doivent norrir lor patrons tant solement ou les enfanz aus patrons. Et ge cuit que se li juige voent droite cause, il doivent juigier que li enfant au patrons soent nourri8 ; mes il ne le doivent pas juigier si legierement des enfanz come des patrons, car servises doit estre fez non pas solement as patrons mes à lor enfanz. {21} Et cil qui la mere franchi est contrainz de norrir les enfanz. {22} Se aucuns velt que cil qui est franchiz por celi qu’i franchi le norrisse, ou cil que il franchi por ce que il li fut enjoint en .i. testamant, ou cil que il a achaté des deners que il meismes li bailla, il ne doit pas estre oïz, si comme Marciaux escrit. Et il oelme ce patron à celui qui pert la droiture do patronage por ce que il demande loier de cez que il a franchi. {23} Et il dit que li fiz au patron qui acusa de crime capital celui que sis peres franchi ne li doit pas demander norreture. {24} Cele qui a esté franchie est contrainte de norrir son patron. ¶ {25} Arbitres seult9 estre donez à ju[107rB]igier la norreture qui doit estre donee au patron, qui doit regarder combien cil qui a esté franchi a en son chetel, si que il atenpre selonc ce la norreture. Et cele norreture sera donee tant comme li patrons en i avra besoing, et cil qui fut franchiz le porra fere. {26} Se cil qui ont esté franchiz sont riche, il sont contraint de norrir le pere et la mere à lor patron quant li patrons et son fiz sont mort.

Cil meismes dit : se aucun nie que il n’est pas mariz à une feme et que li mariages qui fez entre aus n’est nus por ce que il est apareilliez de prover que ele est serve, ‹il doit estre contrainz de norrir les enfanz dedenz ce. Et se il est prové que ele est serve›10, nus griés ne soit engendriez por ce à celui qui a norri les enfanz.

Marcianus dit : li enfant à noz enfanz malles apartienent à nostre cost ; mes il n’est pas autresi as enfanz à noz filles, car il est aperte chose que li enfes à la fille n’apartient pas au cost à son ael mes à son pere, se li peres n’est morz ou besoignos.

Paulus dit : li patrons ou li enfant au patron n’ont nule droiture as biens à cez qui ont esté franchi tant comme il vivent, s’il ne mostrent11, por devant les prevoz, que il sont si malade ou si povre que cil que il ont franchi lor doivent por droit aidier à vivre de12 mois en mois. Et issi est il escleré as establissemanz à plusors princes.