I. [54rA] Se beste à .iiii. piez fet domage. Et d’omecide, et de geter eve sor genz [rubr.]

Se beste à .iiii. piez fet domage, la loi en done aucion que vost que la beste que fist le domage soit donee por le forfet, ou que il en rendra la value de la chose ; {2} et ceste aucion s’estant à totes betes qui ont .iiii. piez. ¶ {3} Li prevoz dit : se l’an dit que beste eit fet domage ; pué estre domage fet sanz le domage et sanz le tort à celui qui le fet, car l’en ne puet pas dire que beste face tort, car ele n’a point de san. {4} Et issint comme Servius dit, ceste aucion a leu quant la bes[54rB]te fet domage par sa cruauté ; ausint comme li chevaus repuce et fiert do pié, et se buef hurte de ses cornes par costume, ou se mule par sa cruauté ou por ce que ele n’est pas en bon leu ou par la cope à celui qui l’amoine, ou si la beste est chargie plus que ele ne doit lesse choer son fes sor aucun, ceste aucion ne1 sera donee, et plediera l’en do domage et de injure. ¶ {5} Et se chien que aucun menoit eschape par s’apereté et fet domage, se l’en le puet retenir ou s’il ne dut pas estre menez par ce lieu qui, cete aucion cessera et avra aucion contre celui qui tenoit le chien. ¶ {6} Et se la beste fet domage par l’aticement d’autre, cete aucion cesse. ¶ {7} Et generaument ceste aucion ne cesse mie quant la beste sauvage est moue contre nature et fet domage. Et par ce, se li chevaus se deslie et il anchuce et fier, ceste aucion cesse. Et cil qui ferra le cheval ou li fera plee, l’en avra contre lui aucion de fet por ce que il ne fist pas le domage en son cors ; mes s’il eust le cheval apleignié et il repuçat, l’en avra contre lui aucion tele. ¶ {8} Et se une autre beste esmuet une autre por fere domage, l’en plediera en non de la beste que l’autre fist amovoir. ¶ {9} Et se la beste fet domage par soi ou par autre à qui il a hurté, ceste aucion a leu  ; ausint comme se un buef areste un char ou s’il abat aucunne chose qui est dedanz ; {10} ceste aucion n’a pas leu en bestes por la naturel cruauté. Et por ce, se uns hors s’enfuit et fet domage, cil qui il estoit n’en porra mie estre tret en plet, car il en pert la seignorie puis que il li est eschapez. Et por ce, se je l’ocis, li cors est miens. ¶ {11} Mostons ou buef funt mellees ; se l’un ocist l’autre, Quintus Mucius dit que se cil qui comoinça, qui fist la mellee, est tuez, l’aucion faut, et se li autres fust ocis ceste aucion a leu. Et par ce, il convient [54vA] que il soet sien, ou que il amant le domage. ¶ {12} Et ceste aucion est donee contre le seignor, por ce que li forfez des betes sit la beste ; ne ceste aucion n’est pas donee à celui qui est la beste, car ele n’estoit pas soe, mes à celui à qui ele n’est pas. ¶ {13} Et se la beste muert avant que li plez soit entamnez, la demande ne vaudra rien. ¶ {14} Baillier por le forfet est ballier la beste vive. ¶ Se la beste est commune, l’aucions sera contre toz por le to‹r›t, ausint comme d’ome. ¶ {15} Li sires ne sera pas aucunne foiz plediez de ce mes de to‹r›t, ausint comme se li juiges li demande en droit se la beste estoit soe, et il dit que non ; quar se l’en seust que ele fut soe, il fust condampnez dou tot. ¶ {16} Se la beste est ocises anprés ce que la cause est entamnee por ce que li sires a aucion de la loi Aquiliene, reson de ce i sera treté en plet, por ce que li sires pert le poer de amender le forfet. Et por ce convient il que il rende la value, s’i ne veust pledoier contre celui qui ocist la beste. ¶ {17} Nus ne dota onques que ceste barre ne fust donee à l’oir et à ses hers, et contre l’oir et contre celx qui ne sont pas hers par ce droit qu’i sont seignors.

Ceste aucion ne vient pas en bestes au seignor solement, mes à celui à qui il apartient, ausint comme à celui à qui la chose est prestee, et ausint apartient ele à feulon qui ont domage2 an ce que il sont tenu de rendre. ¶ {1} Se aucun por ce qu’i eschive3 son mestre sanz foi en une taverne, et un chien le mort leanz, aucun cuident que l’en ne poit fere plainte de chien par ce que il fust deslié, et aucun cuident encontre.

L’en ne dot pas de cete loi que l’en ne puisse pledier en non de franches persones ; ausint comme la beste a fet ploie au pere ou au fiz, en tel leu qu’i n’est pas enledi, nus ne puet franc cors esmer. Il est tenu, cil qui est la beste, de randre les despens que l’an fera au garir les, et les domages de lor besoignes que il perdent à fere.

Ceste aucion [54vB] a leu tot n’ait la beste .iiii. piez qui fist le domage.

Un asner entra en une taverne ou son chevau, il ouia une muile, la mule repuça et fruissa la cuisse à l’asner ; l’en demande consoil se l’en porroit pledier o le seignor de mule qui avoit fet le domage. Et je di que oïl.