École des chartes » ELEC » LI CINQUIESME LIVRES » IV. [57rA] De metre bonnes en chans communs et de juigemenz qui en issent. Li .vii. livres [rubr.]

IV. [57rA] De metre bonnes en chans communs et de juigemenz qui en issent. Li .vii. livres [rubr.]

  • Traduit du Dig., liv. 10, tit. 1 : finium regundorum.

§ {10.1.1} Finium1 regondorum.

Aucions de bones metre apartient à persone, tot soit ele por la chose chalongier.

§ {10.1.2} Ulpianus. Hec accio.

Ceste aucion apartient à teneures de vile, tot n’i et il nule meson ; mes il n’en n’i a pas moult de difference se aucuns pose arbres ou edefice en la bone. ¶ {1} L’en ostroie à celui qui est juiges de bones metre que, la où il ne porra departir les bones, qu’i depiece le contenz par juigement. Et s’i vest par avanture depecier por autrui terre les bones por ostier l’ancien contenz, il puet ce fere par juigement et par condempnemant.

§ {10.1.3} Gaius. Quo casu.

Et mestier est en ce quas que l’en ajuige à l’autre de la teneure à l’un et à l’autre ; par ce, cil à qui l’en ajuige est condemné an rendre aucun dener por la chose ajuigie.

§ {10.1.8} Ulpianus. Si.

Sorundemant de fluive cue les bones dou champ, par quoi aucun prenent achoison de sorprendre leus où il n’ont point de droit. Li sires de la province commande que il ne praingnent pas autrui chose et que l’en rendre au seignor la soe chose, et que el mesureor jauge et desclere les bones. ¶ {1} Il apartient à l’ofice à celui qui conoist des bones que il i envoit mesureor et qu’i determine le plet par aus, si comme il est droit ; et se la chose le requiert, il moismes voie les leus.

§ {10.1.10} Idem. Judicium.

Plet de departir communauté de bones, de mesnie departir, est tel que chascun de cex a doble droit, c’est à savoir que chascun d’aus est autor et reus.

§ {10.1.11} Papinianus. In finalibus.

L’en doit sivre les ancienes voies em plez de bones sanz diversité d’eritage et sanz arbitre de porseor ; doit l’en prover que les bo[57rB]nes soent changies por ajoster ou por oster des chans.


1 Finium] Filium dans le ms.