V. De partir heritages et comment l’en les doit departir [rubr.]

Ceste aucion vient de la loi de .xii. tables, car mestier estoit as hers qui voleent departir ce que il avoient que il eussent aucunne aucion par qui les choses de l’eritage fussent departies entre aus. {1} Et ceste aucion avient ausint bien à celui qui n’a mie sa partie. Et se cis qui tient nie sa partie apartenir à celui qui dit qui est eir, il le puet metre hors de ceste excepcion en tel meniere que l’en ne face tort à l’eritage de la chose don l’en pledoie. Et s’il tient cele partie, tot nie l’en que il ne soit heir, tel excepcion ne li nuit pas. Et issi en fet que an ce quas li juiges devant qui cest juigement est moiné conoist an ce1 quil est heir ; et s’il n’est heir, l’en ne li doit riens ajuigier, ne son aversere ne doit estre condampnez que il li rende rien s’il n’est heir.

S’il i a nules lestres de l’eritage, li juiges doit fere tant que il les ait en garde ; et cil qui a la greignor partie en doit fere le transcrit et la reconoissance as autres, et doit l’en doner caucion que les letres seent monstres quant mesters sera. Et se tuit sont heirs d’unes parties moismes, mes il ne s’acordent mie li quex gardera les letres, il convient que il treent allors qui les gardera, ou que il i lessent un de lor amis qui les gart, ou que il seent mises en un moustier.

Les choses que li heir ont en usage venent en partie qui avoient esté baillies au mort et celes qui furent baillies as hers se li morz les avoit achetees.

Et les teneures qui sont de nostre patremoine, et celes qui deivent paages et qui non, et celes choses meismes que li morz tenoit en bone foi qui estoit à autrui.

Se un heir domage l’eritage, bien est que l’en en moisne l’esme dou domage en cest plet.

Ausint doit li juiges encontre regarder que ce que li uns des herrs prist de l’eritage, en ce que il a promis que il n’est pas sol le gaing. Et li juiges atendra bien ce [57vA] s’il fet conte entr’eus, ou s’il fet fere letres par quoi il face an communaument entr’eus et les gainz et les pertes.

Condannacions et absolucions devent estre fetes en la persone de toz. Et por ce, se condempnacions est lessie au persone d’aucun, ce que li juiges fera en la persone des autres ne vaudra rien ; car chose jugie d’une chose ne puet valoir en partie et en partie non valoir.

Acordé fu que li sers qui estoit esmez entre les hers au tens que il firent les parties non pas por achater que por partir qu’i soent prisiez ; et s’il morent, issi il faillent à l’oir et à celui à qui il furent lessiez.

Lucius et Tucia freres furent mis hors dou bau lor pere, il orent curators, il mistrent ensenble lor deniers communs, enprés il partirent lor patremoine, et enprés la partie Ticia mut plet à son frere et disoit que il avoit plus que ele, comme il n’eust pas plus de sa partie, ainz moins de la moitié. Je demande se ele a aucion contre son frere. Paulus dit que non ; s’il n’a eu plus de la rente que lui des communs chans et por la partie de l’eritage, n’avient à la suer contre le frere nule aucion. Ausi dit il se l’en dist que li freres prist plus que la sor des norritures que li prevoz avoit juigiees, s’il n’en ot esté la moitié de la partie.

Si ‹qu›id. Se ce que tu doiz qu’est commun à moi et à toi en l’eritage et je di par autre reson que il est mien, quite il ne vient en partie. ¶ {1} La tricherie que li sers à l’oir fist ne vint pas en cest jugement s’il i a copes de ce que il ne dit pas convenable serf en lor aferes.

Se l’en pledoie de partie de mesnie ou de communauté de partir et de mestre bones et un muert de cex qui pledoie et lesse plusors heirs, l’en ne puet le plet depecier par pieces, ainz deivent tuit li heir prandre le plet ou le baillier à un portor ou prandre un procurator qu’i i soit por toz.

Resons ne sofre mie que ce vigne en partie que li peres a doné à son fiz qui est à l’escole s’il i done par sa pitié, se l’en ne prove que li peres li eust presté.

La pecune que li fiz qui est hors dou bau crut por estre randue au pere, doit estre contee en l’eritage au pere se aucion avient au pere contre le fiz de tant comme la chose se monte.

Quant arbitres est receuz et li frere departent commun heritage par bien et por lëauté, il ne convient pas que celui qui font soit rapelé ; li arbitres ne dit pas son dit quant le plet fust failli se li ages ne li amoine.