III. De bonnes et de bonner.

§ 1.

Bonnes si sont unes choses qui sont fichées en la devise d'une chose, comme pierres ou pex, et fet chascun certain par où son héritage vet.

Et bones sunt par acort mises des parties ; et si seront misses par jostice, segont ce que chascuns a prové sa chose par où ele vet.

Gaubert se plaint de Tybert, et dit qu'il avoit un champ lez le Tybert, où il avoit bones, qui toz jorz i avoient esté, de pierres, et chascun gaignoit sa terre jusque celes bones. Et dit Gaubert que Tybert a ces bones arachies, et a trespassé son gaaignage outre ; et s'il veaut dire que ce ne soit voirs, il est prez de monstrer et de l'avérer par soi et par garanz, qui set ces choses, qui vist les bones oster et vit l'usage que chascuns usoit, par iqui qui le montrera et l'avérera, si comme la cort esgardera [p. 150] que il fere le doie. Li autres fet encontre tel ni et tel deffanse comme il doit : l'en demende qu'en dit droiz. Et l'en respont que cil est loisanz de prendre la prove de lui ou de son garant, et de quenoistre que c'est voirs ou d'escondire par gage de batalle ; car li forfez est si granz de bones oster, que c'est uns membres de larecin.

§ 2.

Ne l'en ne puet apeler sanz garanz ; et del cas l'en ne puet apeler fors dedanz l'an et dedanz le jor que les bones furent ostées.

Tot en ceste menière puet l'en home apeler de bones, quant eles sont mises par acort de parties ; car bones oster est ausi comme ravir autrui choses, sanz le cogié à celui qui ele est.

§ 3.

En bonnes qui sunt mises par juigement au juige, en tel demende n'a point de gage ; car il convient rendre le recort del juige et des jujors et de toz cex qui mitrent les bones. Et se li juigemenz est mez, si convient croire le recort de la cort et des prodes homes ; car autrement querele ne seroit jamès juigie.