I. Ci commence li livres de Digeste Nove. Cis titres est de franchissemenz [rubr.]

Marcians dit : il plot au sages homes que cil qui fu nez le premer jor de genver et acompli .xx. anz, si que il n’en faut fors la nuit qui est devant le premer jor de genver, puisse franchir ses sers. Et il n’est pas ostroié à home qui a moins de .xx. anz que il franchise ; et cil qui ja est au derrener jor de .xx. n’a pas moins de .xx. anz.

Marcians dit : il est certoine chose que cil qui est fet serf à poine ne puet pas franchir son serf ; car il moismes est serf. {1} Ne cil qui sont acusé de crimes capitaus ne puent pas franchir lor sers, si comme li senat juja1. {2} Et li enpereres Pius dit à Calfirin que les franchises que cil qui est dampnz por aucun crime, ou cil qui siet bien que il sera dampnez, donent à lor2 sers [124vA], ne valent riens. {3} Et li enpereres Adrians escrit que cil ne vienent pas en droite franchise qui sont franchi por estre sostrez à crime.

Paulus dit : li sers qui est venduz par tel convenant que il ne soit franchiz, ou de qui il a esté deffenduz en testamant ou par le prevost que il ne soit pas franchiz por aucun mesfet que il a mesfer, ne puet estre amenez à franchise.

Pomponius dit : li sers au forsené ne pot estre franchiz por celui qui est procurators ; car franchissement n’est pas en aministracion de patremoine. Mes se li peres au forsené est joint à aucun en son testamant que il franchissist le serf, li procurerres li doit baillier por franchir le.

Papinianus dit : se aucuns reçoit deners d’autre por franchir son serf, il peut estre franchiz maugré sien, ja sé ce que li denier au serf moismes i ait esté poié3 ; et moismement, se li freres au serf ou ses peres naturés les poie ; et il sera senblables à celui qui est achetez de ses deniers propres.

Cil moismes dit : li mariz qui a assez de quoi paier puet bien franchir le serf dou doere sa feme tant comme lor mariages dure. Et s’il n’a de quoi paier, ja soit ce que il ne doit rien, la franchise au serf sera empechiee ; car l’en entant que il doit à sa feme son doere tant comme li mariages dure.

Cil moismes dit : se je achete une serve par tel condicion que ele sera franchie dedanz .i. an, et dedanz l’an il fu prononcié que il estoit sers, je demans se la serve doit avoir franchise aprés l’an selon la loi de la vente. Et Paulus respont que la serve qui est achetee fu aquise au seignor à celui qui l’acheta o tel condicion comme ele fu vendue.

Jabolenus dit : Labeo croit que sers forsenz, qui est franchiz, puet bien avoir franchise.

Ponponius dit : il est certaine chose que cil qui est dedanz aage puet franchir son serf por devant le prevost qui l’a en garde desque il en done congié.