École des chartes » ELEC » LI QUATORZIESMES LIVRES » II. De cez qui sunt franchi por garredon [rubr.]

II. De cez qui sunt franchi por garredon [rubr.]

  • Traduit du Dig., liv. 40, tit. 2 : de Manumissis vendicta ; tit. 3 : de Manumissionibus quœ servis ad universitatem pertinentibus imponuntur ; et tit. 4 : de Manumissis testamento.

§ {40.2.3}

Papians dit : se li heirs franchist le serf qui est lessiez à aucuns et cil à quil est lessiez le refuse, franchise li apartient. Et autresi, uns sers est lessiez porement à .ii. et li uns le franchist et li autres le refuse, franchise li apartient.

§ {40.2.4}

Julien dit : se li peres ostroie à son fiz que il franchisse son serf et li peres muert dedanz ce sanz fere testamant, et li [124vB] fiz n’en savoit pas que ses peres fust morz, ainz franchi le serf, franchise li apartient, desque l’en ne siet que la volenté au pere fust muee. Et se li peres deffendi au fiz par un mesage que il ne le franchist pas, et il le franchi ainz que il seust la deffense, il n’est pas frans ; car à ce que li sers viegne à franchise par franchissement au fiz, il convient que la volenté au pere durt. Et s’el est muee, il ne sera pas voir que li fiz l’eist franchi por la volenté son pere1. {1} Totes les foiz que li sires franchist son serf, ja sé ce que il cuide que il soit à un autre, neporquant il ne remoint pas por ce que li sers ne soit franchiz par la volenté au seignor, et por ce sera il frans. Et encontre ce, se li sers ne quidoit pas estre à celui qui le franchissoit, por ce ne remoint pas que il n’eist franchisse ; car plus vaut ce qui est en verité que ce qui est en quidence ; et en l’un et en l’autre cas il est noviaus, car il est franchiz por la volenté au seignor. Et ce moismes seroit droiz se li sires et li sers sont en une moisme error, si que li sires ne quit pas que li sers soit siens, et li sers ne quit pas que il soit ses sires. ¶ {2} Li sires qui a moins de .xxv. anz ne franchist pas par droit sanz consoil le serf qui est communs à lui et à un autre. ¶ Paulus dit que, se cil qui a moins de .xxv. anz soffre que li sers que il a engagés soit franchiz, il est franchiz par droit ; quar l’en n’entant pas que il ait franchi, mes s’il n’a pas empechié que il soit franchiz.

§ {40.2.10}

Cil moismes dit : li fiz au sort et au mu puet franchir son serf par le commandemant son pere ; mes le fiz au forsené ne le puet franchir.

§ {40.2.23}

Hermogenes dit : franchissement puet orendroit estre dit par procurator, si que li sires ne die mot ; et ja soit ce que les paroles sollennes ne soient pas dites, autretant comme se l’en les deist.

§ {40.2.24}

Paulus dit : li orfelins qui a passé .xiiii. anz puet bien franchir son serf par devant le prevost, s’il est à l’autorité à celui qui l’a en garde ; en tel maniere, neporquant, que li chetex li remoigne.

§ {40.2.25}

Gaius dit : se uns orfelins franchist son serf por ce que il veust estre en sa garde, Fusius dit que il doit prover la cause. Mes Offilius dit le contraire ; et il dit voir, car il seroit male chose que li juigemenz à l’orfelin, qui n’est fers en nule chose2 sanz gouverneor, fust fers en eslire deffendeor.

§ {40.3.1}

Ulpians dit : li enpereres Marques dona à totes les assenblees poer de franchir lor sers.

§ {40.4.5}

Cil moismens dit : l’en doit garder es franchises à [125rA] la plus legiere escriture quant il en i a plusors. Mes à franchisses qui sont lessies à terme doit l’en garder à la desraine escriture.

§ {40.4.8}

Ponponius dit : s’il est issi escri : « Sticus, franc se l’en voit que il ait à droit tretié mes besoignes » ; l’en doit garder grant diligence s’il a servi son seignor par bone foi et rendu bien les arrerages.

§ {40.4.16}

Cil moismes dit : se il est issi escrit en testamant : « quant Tices avra .xxx. anz, Ticius soit frans et mes orés li doint un champ », et Tices muert ainz que il viengne au trentisme an, franchise apartient au serf, mes li lés ne li est pas deuz ; car il a esté ostroié por la grace de franchise que, puis que Tices est morz, l’en gart le tens aprés que li sers doit avoir franchise ; mes il apert que la condicion est faillie par devers les lés.

§ {40.4.23}

Marcians dit : sers qui est franchiz en testamant est frans se li testamant vaut et li heirs en reçoit l’eritage, ou s’il entrelesse la cause do testamant et porsiet l’eritage sanz testamant. ¶ {1} Franchise qui est porement donee en testamant apartient à celui à qui ele est donnee desque li uns des heirs reçoit l’eritage ; et s’ele est donnee à terme ou soz condicion, ele apartient desques li termes vient ou la condicion est acomplie.

§ {40.4.33}

Paulus dit : franchise ne puet pas estre donee jusqu’à certein terme.

§ {40.4.31}

Ulpianus dit : quant plusors sers sont apelé par un moismes non, et lor sires commande en lor testamant que li uns d’aus soit frans, et il n’apert pas do quel il vieust dire, il n’en i a nul franc.

§ {40.4.32}

Paulus dit : l’en doit savoir que, ja soit ce que li heirs necesseres se tiegne de l’eritage, neporquant les franchises apartient à cels à qui eles furent donnees contre la loie.

§ {40.4.51}

Cil moismes dit : uns hons deffendi en son testamant que si sers ne fussent vendu et requist que il fusseint franchi selonc ce que chescuns deserviroit. Je respondi que les franchisses furent à droit donees ; car se nus d’aus ne mesfet, il puent tuit venir à franchise ; et se li uns la perdent par lor mesfet, li autre seront franchi. ¶ {1} Quant il fu issit escrit en un testamant : « li sers qui seront sanz mesfet soient franc », il senble que il i ot escrite condicion qui doit estre issit entendue, que cil qui fist le testamant ne pensa pas de doner franchise à cex qui mesferoient, ainz les osta de l’annor d’aministrer ses besoignes.


1 pere] peree dans le ms.
2 chose] chose fust dans le ms., cf. lat. namque perabsurdum est in eligendo tutore firmum videri esse iudicium pupilli, cuius in omnibus rebus ut infirmum iudicium tutore auctore regitur