VII. A qui il ne loit pas chalongier franchise [rubr.]
- Traduit du Dig., liv. 40, tit. 13 : Quibus ad libertatem proclamare non licet.
§ {40.13.1}
Ulpianus dit : cil qui ont plus de .xx. anz ne puent pas chalengier franchise se cil1 qui est venduz en tel aage a receu le pris ; mes por autres causes, ja sé ce que cil qui a plus de .xx. anz a soffert que il soit venduz, il li loit à chalongier franchise. {1} Et chelongement de franchise ne doit pas estre veez à celui qui a moins de .xx. anz, neïs por la devan dite cause s’il ne fu en servage puis que il ot passé .xx. anz ; car lors, s’il parti au pris, l’en puet dire que il li puet estre vee que il ne chalonge franchise.
§ {40.13.2}
Marcellus dit : uns hons prist por force un serf de Tice et commanda en son testamant que il fust frans ; ja soit ce que il eust assez de quoi poier ses detes quant il morut, neporquant li sers ne sera pas frans ; car autrement seroit Tices grevez, qui ne puet pas pledier à l’oir de cele franchise. Et se li sers chalonge franchise, Tices n’avra pas nule aucion contre l’oir ; car li heirs n’a eu nul preu de la tricherie au mort.
§ {40.13.3}
Ponponius dit : congiez de chalongier franchise est veez2 à cex qui ont sofert que il ont esté vendu. Et je demant se conseauz au senat apartient à cex qui sont nez de femes qui ont forfet à estre vendues. Et se l’e‹n› ne [126vB] puet pas doter que poiers de chalongier franchise ne doie estre veez à cele qui avoit plus de .xx. anz, qui soffri que ele fu vendue, ne il ne poet pas estre donz à cex qui n’aquitent de lui en tens de son servage.