VIII. Se l’en dit que cil qui a esté franchiz est naturelment franc [rubr.]

Ulpianus dit : se uns hons plede à celui que uns autres a franchi, et il eist prononcié que il est naturelement frans, ses patrons puet pledier à lui par sa droiture sanz nule excepcion de tens.

Saturninus dit : li enpereres Adrians establi que cil qui avoit plus de .xx. anz, quil soffri que il fust venduz por avoir le pris, ne puet pas puis chalongier franchise ; mes il ostroia que il en peust aucunne foiz pledier se il rendi le pris. ¶ {1} Cil qui ont esté franchi et dient que il sont naturement franc ne seront pas oï puis .v. anz aprés ce que il ont esté franchi. ¶ {2} Cil qui dient que il ont trové .v. anz aprés les estrumanz par quoi il puent prover que il sont naturement franc devent requerre l’enpereor meismes qui conoistra de cele chose.

Ponponius dit : l’en doit entendre que quant li senaz dit ceste parole « quant il avront reconeu la nativité », il n’est rendi fors de cex qui sont naturement frans. ¶ {1} Et por ceste parole « ce que il ont lessié » doit l’en entendre que totes les choses que il ont aquises do chetel à cex qui l’afranchirent soient rendues. Mes il convient veoir comment ce doit estre entendu ; savoir mon s’il convient rendre1 les choses que il en porterent sanz le seu au seignors, et de cez que il ont aquises par le chetel as seignors, ou les choses que cil qui les franchirent lor ont donees ; et ceste parole est la meillor.

Paulus dit : la loi qui deffant que cil qui a esté franchiz par devant les contes ou par devant les prevoz ne puissent pas chalongier naturel franchise puis .v. anz aprés ce que il est franchiz, n’ecete nule cause ne nule persone.

Cil moismes dit : je respondi que quant sentence est donnee aprés .v. anz por naturel franchise sanz le seu au patron, il ne doit estre mis arrieres por nule excepcion de tens.

Ulpianus dit : totes les foiz que l’en plede savoir mon se aucuns a esté franchiz, ou servises li est demandez ou jornees, ou aucion est meüe qui donne mauvese renomee, ou cil qui dit que il est patrons entrenz en cause, ou aucuns plez est meüz entr’aus, juigement en doit estre renduz. Et quant aucuns reconoist que Tices le franchi, et il nie que Sey qui pledie à lui [127rA] ne le franchi pas, juigemenz en doit estre renduz. Il est renduz quant li quex que soit le requiert ; mes cil qui se tient por patron est en leu de demandeor et doit prover que il l’a franchi ; et s’il ne le prove, il est franchiz.