VI. Li quel ne puent franchir et li quel ne puent estre franchi [rubr.]

Ulpianus dit : Celsus dit por cause de profit que sorz et muz qui est issi nez ne puet franchir.

Ulpianus dit : nos ne poons pas franchir le serf que nos avons obligié par non de gage1.

Affricanus dit : quant cil qui doit franchise au serf soz condicion le franchist por ce que il li a esté enjoint, la2 loi de franchise qui est deue par condicion a leu. ¶ {1} Se uns chevaliers fet son testamant par droiture de chevaliers, et il done franchise a ses sers por griver ses creanciers et il n’a de quoi aquiter soi quant il muert, les franchises sont e‹n›pechies.

Gaius dit : il apert que cil franchist ses sers por griver ses creanciers quil les franchist au tens que il n’a de quoi poier, ou quant il est en tel estat que il n’avra par tens de quoi poier ; car il avient sovant que aucuns quide que il ait en son chetel plus que il n’i a. Et ce avient assez en cex qui par lor sergant et par cex que il ont franchiz moinent marchendies otremer et en estrange païs aillors que la où il sont ; car il perdent sovent en cex marcheandises, si que il n’en sevent rien ; et s’il franchissent lors leur sers sanz consoil de barat, il lor donent franchise.

Cil moismes dit, se franchise est donnee à autrui serf sanz l’asentement ou3 [126vA] seignor, ele ne puet valoir par l’autorité de droit, ja sé ce que cil qui le franchi est aprés heirs au seignor. Car ja sé ce que il soit par droiture de lignage, neporquant li dons de la franchise n’est pas confirmz por ce que li heritages est receuz.

Cil moismes dit : cil qui set bien que il n’a de quoi paier ses detes ne puet franchir ses sers que ce ne soit en grevance des creancier, ja sé ce que li serf l’aient bien deservi.

Paulus dit : li heirs qui franchist son propre serf, que cil à qui il est heirs avoit lessié à un autre, ne fet rien ; et il nos deplet que l’en ne face pas force s’il le sot ou s’il ne le sot.

Gaius dit : li sers qui est bailliez en gages est sanz nule dete au detor par pleine droiture ; et il puet recevoir de lui droite franchise, s’il a asez d’autre part de quoi paier sa dete, si que il n’apere pas que li creanciers en soit grevez. ¶ {1} Sers qui est lessiez soz condicion est à l’oir4 par ploine droiture, ainz que la condicion soit acomplie. Mes il ne puet recevoir par lui nule franchise que torz ne soit fez à celui à qui il est lessiez.