I. Ci commoince li sistes livres de Di[154vB]geste nove. Cis titres est de excepcions et de prelacions [rubr.]

Ulpians dit : il senble que cil demant qui use de excepcion ; car li deffenderres est autresi comme li demanderres quant il propose excepcion.

Cil moismes dit : excepcion est une barre qui est mise contre l’aucion à aucun por boter arriere s’entencion. ¶ {1} Replicacion n’est nule autre chose que excepcion que vient par devers le demandeor. Et replicacions sont necesseres por mestre arriere les excepcions ; ne eles ne sont mises avant par nule autre cause. ¶ {2} L’en doit savoir que excepcions et replicacions ne sont fors barres, car l’excepcion bote arriere l’entencion au demandeor. {3} Mes contre replicacion selt estre opposee triplicacion, et contre triplicacion quadruplicacion, et issi en montepleant tant comme li uns et li autres en velt proposer. ¶ {4} Nos solons dire que les unes excepcions sont dilatoires et les autres peremptoires. Excepcion dilatoire est qui deloie le plet, si comme excepcion qui est proposee contre le procurator ; car cil qui dit que il ne loit pas pledier par procurateur n’estaint pas le plet mes il le desloie.

Gaius dit : excepcions sont ou pardurables ou peremptoires, ou temporels ou dilatoires. Les pardurables ou peremptoires sont celes qui ont toz jorz leu ne ne puent estre achevees ; si comme sont excepcion de tricherie et de chose juigee, et de ce qui est fet contre les lois ou contre les consauz au senat, et cele de pardurable convenant si comme se il a esté mis en convenant que cele dete ne sera jamés demandee. ¶ Les temporeles et dilatoires sont celes qui n’ont pas toz jorz leu, ainz puent estre eschevees ; si comme cel de convenant temporel si comme se il fut mis en convenant que cele dete ne seroit demandee devant .v. anz. ¶ Les excepcions de procurators sont dilatoires qui puent estre eschevees aucunne foiz.

Paulus dit : cil qui dit que il a fet seremant puet user des autres excepcions o cele de seremant ou d’autres seules ; car il est ostroié à user de plusors deffensses.

Cil moismes dit : se cil à qui une chose fut lessie la demande, l’en puet user contre lui d’excepcion de la tricherie au [155rA] mort ; car autresi comme cil qui est heirs de toz ses biens est mis arriere par excepcion, i puet estre mis cil à qui uns lés est lessiez qui n’est hoirs que d’une chose.

Cil moismes dit : les excepcions qui apartienent à la persone à aucun ne vienent pas à autres, si comme excepcion de compoignie. L’excepcion de ce que li peres ou parrons ne puet paier n’apartient pas à son pleige. Li plege que li mariz dona est condempnz à rendre tot le doere quant li mariages est departiz. {1} Les excepcions qui vienent de la chose apartient as plege ; si comme excepcion de chose juigee, ou de tricherie, ou de seremant, ou de ce qui est fet par cause de poor. Et se li detors a fet un convenant de la chose, l’excepcion dou convenant vaut au plege. ¶ Excepcion de quitence et de ce qui est demandé por chargier franchise apartient au plege. Et se aucuns est plege por le fiz qui est en bail contre le consoil au senat, ou par celui qui a meins de .xxv. anz qui est deceuz, il se puet deffendre par excepcion ; mes se il n’est pas deceuz, il n’a pas droit enterine restitucion, ne ses plege n’a pas excepcion.

Cil moismes dit : il n’est deffendu à nul à user de pluseurs excepcions, ja soit ce que eles soient diverses.

Marciaus dit : il ne senble pas que cil reconoisse l’intencion à son averseire qui use d’excepcion.

Modestinus dit : chose qui est jugee entre les uns ne nuit pas as autres. Et se cil contre qui l’en n’a rien juigié et il plede por l’eritage, l’excepcion de cele sentence ne li puet nuire, qui fut donee contre lui ainz que il fut heirs.

Cil moismes dit : uns hons fut trez en cause por une dete et quant instrumant furent aporté avant, il paia par le commandemant au juige, autressi comme se il fussent verité. Se il set aprés la verité et il voit que li istrumant soient faus, et il velt prover que li instrumant soient faus par quoi il fut trez en cause et ou il fist subscripcion par le commandemant au juige, se demant se excepcion de chose juigie li puet estre opposee, par ce que il est apertement contenu es establissemenz as princes quex sentence qui est donnee par faus instrumant, et l’en trove aprés que il soient faus, excepcion de chose juigee ne soit pas opposee. Et Modestinus respont que, por ce que li paemenz est fez par error, ou l’en a demandé caucion de paier par cez instrumanz que l’en dit ore qui sont faus, n’a pas l’excepcion de chose juigie leu.

Ulpians dit : il est en leu de demandeor qui mest avant [155rB] s’intencion.

Julians dit : se li plez d’un heritage est entamz et l’en demande aprés chascunne des choses par soi, il nos plet que excepcion de plet qui est commoinciez ne nuise pas ; car tex excepcions nessent do juigement qui a esté fez et ne mie de celui qui est a fere.

Ulpians dit : li filz qui estoit en bail vendi un de ses sers et mist en convenant que li pris li seroit renduz et paietz ; cil sers fut retrez et puis morut, et li peres demandoit à l’acheteor les deners qui furent convenenciez à son fil. Il nos plet que il se peust deffendre par excepcion de ce que li denier furent promis por le serf qui fu retrez.

Julians dit : replicacion de tricherie ne doit pas estre donee contre excepcion de seremant ; car li prevoz doit fere que l’en n’enquiere pas do seremant à aucun.

Affricans dit : tu porsiez le champ Tyce de quoi il a plet entre moi et toi par la proprieté ; et par desus ce, je demant voie à aler i parmi le champ Semprone, que l’en set bien qui est tuens. Se je demant la voie, tele excepcion c’est bone que l’en ne puisse pas prover que la voie me soit deue devant que je aie prové que le chans Tyce est miens.

Paulus dit : mes se je demant avant la voie et puis le champ, por ce que ce sont diverses choses et les causes de la restitucion sont diverses, l’excepcion ne me nuira pas.

Affricans dit : je te demans une partie do champ que tu diz qui est tiens propre et si vuel que il soit partiz par devant cel meisme juige. Et de l’autre part, se tu porsiez ce meisme champ et je di que il soit miens propres et je t’en vuell demander les fruiz, l’en demande se l’excepcion qui grieve soit fete au champ, ou à une partie, te doit nuire ou non. Et je croi, en l’un cas et en l’autre, que li prevoz s’en doit entremetre, ne ne doit pas ostroier au demandeor à pledier por les fruiz ou par avoir partie dou champ devant que l’en sache que la proprieté en soit soue.

Marcus dit : totes les excepcions qui apartienent au detor apartiennent au plege malgré au detor.

Paulus dit : excepcions sont proposees ou por ce que ce est fet que il convint fere, ou por ce que ce n’est pas fet que il convint fere. Excepcion est donnee por ce que ce est fet que il convint fere, si comme excepcion de chose vendue et de chose juigee. Ele est donnee por ce que ce est fet que il ne convint pas fere, si comme quant la possession de la chose qui [155vA] est vendue n’est pas baillie.

Paulus dit : excepcion est contredissemenz qui aucunne foiz garde celui qui est acusez d’estre condempnez, et aucunne foiz amenuisse le condempnement. ¶ {1} Replicacion est contraire1 à excepcion, et autresi comme excepcion contre excepcion.

Pains dit : Paulus dit que se aucuns met une ymage en un commun leu par corage que ele soit en commun et il la velt puis demander, il sera mis arriere par excepcion seur le fet.

Hermogenes dit : li filz qui est en bail aquiert à son pere excepcion de seremant se il jure que il ne doit rien.