École des chartes » ELEC » LI DIX-SEPTIESMES LIVRES » III. De fere teneure en pez laborer.
[p. 270]

III. De fere teneure en pez laborer.

§ 1.

Uns hons demende un héritage par la reson de ce que il est droiz heirs. Cil qui tient cel héritage dit, pardevant la justice, que il ne li en viaut respondre, por ce que il a fete en pez, en tens convenable ; si la veaut desbléer, ençois que il ait responsse de lui. Et li autres dit que il li quite la desblée por ses façons, et que il respoigne au fonz de l’éritage : car quant li débaz n’et que por les façons, et l’en les li quite, bien doit respondre à l’éritage. Li autres n'i viaut respondre, et se metent en juigemenz : et droit dit que responsse ne doit pas remanoir por ce.

§ 2.

Uns hons gaagna une terre sans le congié à celui qui ele estoit ; et vint un terme de cuillir les fruis, et les volt cuillir ; et cil qui la terre estoit i mist contanz. Li gaignerres oit (dit), comme il ait gaignie cele chose sanz contenz, que il viaut avoir les fruiz, et estre en la sésine de la chose. A ce respont li hériters : Comme vos (n') avez esté en sésine de ceste chose un an et un jor sanz interrupcion, nos volons que riens [p. 271] que vos aiez fet vos vaille rien ; ainz volons qu'el vos nuisse, com cil qui a mise sa faucille en autrui blé. Et li gaagnerres respont : Tot ne le ai-ge tenu an et jor sanz contanz, je le gaigne sanz contenz. L'en demende qu'en dit droiz. Et l'en respont que li gaagnerres n'aura pas le gaaing ; mès il aura avenament ce qu'il aura au preu au seignor, com nus ne doie estre riches de l'autrui ; car nus ne doit avoir profit en sa malice ; com nus ne doie estre en sésine de chose, se la sésine n'est veraie ; ne sésine n'est pas veraie, s'el n'est tenue an et jor sanz contenz.

Se aucuns fet ma chose, toi li lessé-je fere sanz contanz, l'en ne doit mie entendre que ge m'i consente, fors por mon preu. Et se li anz et li jorz passe sanz fere interrupcion encontre, li gaagnierres est en veraie sésine, et quaudra la dablie.

Et se ge achète vignes, ou terres, ou choses que conviant coitiver, comme vignes fere de sarpe, et de marre, et de terre gaagnier ; et la costume del païs soit tele que l'en ne puisse chalengier dedanz l'an et dedanz le jor, à la pécune païant qu'ele aura coûté : aurai-ge les fruiz ? L'en dit que oïl, por la façon, s'el n'est chalongie dedanz les trois droites façons (sesons ?). Et del pré aurai-ge le fain, que niens n'aura coûté à coitiver ? L'en dit que non, se la chose n'est chalongée avant que li foins soit en seson. Et le loer de la meson auré-ge ? Nenil, fors les mises que l'en i aura mises ; et tex recetes sont mises en poiement. Et se ge faz les choses à l'orfelin don le bail sera miens, et dedanz le termes de la cuillete sera aagé avant : et la naturel reson de gaagner fut.

§ 3.

Uns hons si dit aissint : Je aurai gaanies les terres, et si avoie fetes les vignes en droite seson, sanz contenz. Gaubert m'en a désési ; si requier à estre en sésine des fruiz, com cil qui a fetes les choses sanz contanz. Et s'il viaut dire que ce ne soit voirs, ge sui prez de mostrer et de l'avérer par moi et par garanz, que c'est voirs. A ce respont Gaubert : Com cele chose soit moie, et il ne fut onques en veroie sésine, ne voill que riens qu'il i ait fet li vaille, com cil qui n'a pas tenue la chose an et jor sanz contanz. L'en demende que dit droiz ? Et l'en respont que ci n'a pas bataille ; mès l'en enquerra se li gaagnierres est en veraie sésine ; et s'il est en veraie sésine, il aura les fruiz, avant que autre plez corge ; et si n'est en veroie sésine, li sires de la propriété aura les fruiz, à rendant les choses qui li auront costé.