II. De excepcion de chose jugie [rubr.]

Ulpians dit : por ce que les chose qui sont juigees entre les uns ne grievent point as autres, l’en puet pledier par le testamant en coi franchise ou lés a esté lessiez, ja soit ce que li testamanz ait esté toz ou vains ou tenuz por desleal. Et se cil à qui li lés fut lessiez et seurmontez, por ce ne pert pas li autres la franchise qui li fut lessie.

Cil moismes dit : Julians dit que excepcion de chose juigee nuist totes les foiz que uns moismes plez est recommoinciez entre unes meismes persones. Et por ce, se aucuns a demandé chescunne des choses par soi et il demande aprés tot l’eritage, il sera mis arriere par excepcion de chose juigie.

Cil moismes dit : aucuns puet pledier de la chose dont il a pledié, ja soit ce que il n’en plede pas par l’aucion par quoi il en pleda premierement ; si comme se aucuns a pledié par aucion de mandemant et il plede aprés par cele meisme chose par aucion de besoignes fetes. L’en dit donc par droit que cil ne plede pas par cele meisme chose qui ne chalonge pas cele meisme chose. Mes se il mue l’aucion, et il plede par autre, et demande cele moisme chose, il senble que il plede de la chose meisme dont il avoit avant pledié, mes par autre aucion.

Paulus dit : il nos plest par bone reson que une aucion et une sentence soffisse à chescunne cause que li plet ne soient monteplié ; et moismement, se l’en donoit diverses sentences, il convient donc obeir à excepcion de chose juigee.

Ulpianus dit : se aucuns avoit demandé tote une chose et sentence en fust donee contre lui et il en demande ore [155vB] une partie, excepcion de chose juigee li nuist, car la partie est contenue en tot. Et ce est une meisme chose se il demande une partie de ce que il demanda tot ; et por ce, se aucuns a demandé un champ et il en demande une partie, excepcion li nuist. Autresi puet l’en dire se aucuns demandoit premierement .ii. choses, et il en fut convoincuz, il n’en demande or que une ; car excepcion li nuira. Autresi est il se aucuns demanda un champ et il demande ore un arbre qui est copez ; ou se il demanda une meson et il demande ore la place, ou le merrien, ou les pierres ; ou se il demanda une nef et il en demande ore les tables. Se ge demant une serve grosse, et je sui conveincuz, et je demant aprés l’enfant que ele a puis eu, il a grant dote savoir mon se je demant cele meisme chose ou autre. Et l’en puet dire que une meisme chose est demandee totes les foiz que l’en demande par devant le derrener juige ce que l’en demanda par devant le premer. {1} Excepcion nuist donc en totes ces choses. Mes il est autrement el pierres, e ou marrein ; car se cil qui demanda le marrien demanda les pierres ou les chevrons ou aucunne autre chose, il senble que il demande autre chose que il ne demanda avant ; car il avient sovant que les choses de quoi la meson est fete ne sont pas à celui de qui la meson est. Quant la meson est donc depecee, cil à qui les choses sont les puent donc chalengier. {2} Ceste meisme question est des fruiz qui est de l’enfant ; car ces choses n’estoient encor pas quant l’en pleda, mes eles sont de la chose qui est demandee. Il est donc melz que ceste excepcion ne nuisse pas à celui qui les demande. ¶ {3} Julians dit generaument que excepcion de chose juigee nuist totes les foiz que uns moismes plez est renovelez entre unes meismes persones. Et por ce, se aucuns a demandé un heritage et il en demande ores aucunnes choses, ou il a demandé les choses et il demande hore l’eritage, il sera mis arriere par excepcion. ¶ {4} Ce meisme porra l’en dire se aucuns a demandé la dete à un des deteurs de l’eritage et il a esté convaincuz et il demande aprés l’eritage, ou se il demanda avant l’eritage et puis demande la dete, car en ce cas li nuira excepcion ; car quant je demant heritage les choses et les aucions qui apartienent à l’eritage sont en ma [156rA] demande.

Julians dit : se aucuns a demandé une partie d’un champ et il plede aprés par aucion de partir heritage ou de partir choses communes, il sera mis arriere par excepcion.

Ulpians dit : ge te demant un heritage quant tu ne porsoes rien, et tu as puis commoincié à porsoer aucunne chose, et ge te demant de rechief l’eritage, l’en demande se ceste excepcion me nuist. Et ge croi que se il fust juigié que li heritages estoit miens, ou se tu fus asous por ce que tu ne porsoies rien, ceste excepcion ne me nuist rien. {1} Se aucuns deffendi le champ que il cuidoit que il porsoit et il acheta aprés, et sentence fut donee por celui qui li demandoit, je demant se il est tenuz do rendre li le champ. Et Neraces dit que se excepcion de chose juigie est opposee contre celui qui le demande segonde foiz, il porra user de replicacion que sentence a esté donee par lui. ¶ {2} Julians escrit que excepcion de chose juigie vient de vendeor à l’acheteor mes ele doit retorner arriere de l’acheteor au vendeor. Et por ce, se tu as vendu une chose de ton heritage, et je la demant à celui qui l’a acheté et je le vaint, je ne opposeroi pas contre toi ceste excepcion se tu me demandes cele chose.

Paulus dit : quant l’en demande se ceste excepcion doit nuire ou non, il convient garder se l’en plede de la chose meisme dont l’en a pledié autre foiz.

Ulpianus dit : et se ele est de cele meisme quantité.

Paulus dit : et se il a une meisme cause de demander et se la condicion des persone est une meisme et se totes ces choses ne s’asenblent, la chose est autre. L’en entant en ceste excepcion que la chose est une meisme, ja soit ce que la premiere qualité ou la premere quantité n’est pas gardee, car l’en prent la chose plus largemont par le commun profit. ¶ {1} Cil qui avoit une partie d’un usaire le demanda tot ; se l’autre partie li eschiet puis, et il la demande, il ne sera pas mis arriere par ceste excepcion, car ceste partie n’eschiet pas à l’autre mes à lui. {2} Les aucions personels se devisent en ce .ii. aucions qui sont menés seur la chose, que quant uns hons me doit une chose je puis mestre toz jorz toz les obligemenz et totes es causes por quoi il la me doit. Et l’une ne prist pas por l’autre, mes quant je plede sus la chose, et je ne di pas la cause [156rB] par quoi ele est moie, totes les causes sont comprises en une demandee ; car la chose ne puet pas estre moie plus d’une foiz, ja soit ce que ele me puet estre deue.

Gaius dit : se plez est meüz entre moi et toi d’un heritage et tu en porsiez unes choses et je autres, rien ne deffant que tu ne me puisses demander l’eritage et je à toi. Et se tu commoinces à pledier o moi puis que sentence sera donee, il convient regarder se il fut prononcié que li heritages fust miens ou tuens. Et se il fut juigié que il fut miens, excepcion de chose juigie te nuira, car il a esté prononcié que il est miens et que il n’est pas tuens. Et se il est prononcié que il n’est pas miens, l’en n’entant pas por ce que il soit tuens ; car il puet avenir que il n’est ne miens ne tuens.

Julians dit : il est aperte chose et leal que excepcion de chose juigie ne puet rien valoir à celui contre qui sentence est donee.

Marciaus dit : uns hons bailla une meisme chose en gage à deus en duis tens ; li derreners pleda au premier par aucion de gage et le vainqui, cil commença maintenant à pledier par autretel aucion, l’en demande se excepcion de chose juigee li doit nuire. Se il propose que la chose li fut premierement engagie et il n’i ajoint nule novele chose, l’excepcion li nuira ; car il rapele en juigement la chose qui est terminee.

Ulpianus dit : se l’en a pledié en un juigement et l’en ne demande fors usures, excepcion de chose juigie ne tost pas à demander le chetel. Autresi sera il se aucuns ne velt chalengier fors usures en juigement de bone foi, car por ce ne remoint pas que usures ne corent ou tens qui est à venir ; car tant comme li marchiez de bone foi dure, corent les usures.

Ulpians dit : se aucuns achete une chose de celui qui n’est pas sires, et li sires la demande et il est assous de sa demande, et il en pert aprés la possession et il la demande au seignor, replicacion li vaudra contre l’excepcion au seignor se sentence n’a avant esté donee.

Paulus dit : se aucuns a pledié sus une chose et il ne l’a pas conquise, se il la demande depuis, auction de chose juigie ne li nuist pas.