École des chartes » ELEC » LI DIX-SEPTIESMES LIVRES » VII. D’aucions et d’obligemanz [rubr.]

VII. D’aucions et d’obligemanz [rubr.]

  • Traduit du Dig., liv. 44, tit. 7 : de Obligationibus et actionibus.

§ {44.7.1}

Paulus dit : obligemenz nessent ou de marchiez, ou de mesfez, ou d’un propre droiture ; ce est de diverses manieres de causes. {1} Obligemenz qui nessent de marchié sont fez ou par choses, ou par paroles, ou par consentement. {2} Obligemenz est fez par chose, si comme en chose presente. L’en prete les choses qui sont baillies à pois, à conte, ou à mesure, si comme vin, deniés, oile que nos baillons ; si que eles soient à celui qui les reçoit et que il nos rende autretrant d’autretel maniere et d’autretel qualité. {3} Cil à qui nos prestons une chose à user en est obligiez à nos por chose ; mes ce est à rendre nos ce meisme que nos li prestons. {4} Et cil à qui nos prestons la chose si que ele soit soe est obligiez à rendre une autre d’autretel qualité et d’autretel quantité. Et se il la pert par aucunne aventure, por ce ne remoint pas que il ne soit obligiez à rendre la. Et se cil à qui nos prestons la chose por user en la pert por aventure à qui il ne puisse contrester, si comme par feu ou par peril d’eve, il est toz seurs. Et ce li soffist bien que il ait mis autretel diligence en garder la, comme en sa chose meisme. Mes se ele est perdue par sa colpe, il i est tenuz ; si comme se il devoit apeler ses amis à mangier et il enprunta por ce vaissiaus d’argent et il l’aporta o lui hors dou païs et la perdi par perill d’eve ou par assaut de larrons. {5} Cil à qui nos baillons une chose à garder est obligiez à nos por chose et est tenuz à rendre la nos. Mes se il la pert par negligence, il ne la nos rendra pas ; car il ne la prist pas par son besoing mes por le besoig à celui qui li bailla, et por ce n’est il pas tenuz à rendre la se ele n’est perdue par sa tricherie. Car cil qui baille sa chose à garder à home negligent ne se doit plaindre se de soi moismes non. ¶ Neporquant, il nos plet que tres granz negligence chie el crime de tricherie. {6} Li creanciers qui a pris nostre gage est obligiez à nos par chose et il est tenuz à rendre la chose meismes. ¶ {7} Obligemenz est fez par paroles, si comme par demande et par response. {8} Et quant aucunne chose est convenencie aucuns est obligiez ou en son non ou en autrui. Cil qui est obligiez en autrui non est apelez plege ; car quant aucuns est obligiez à nos en son propre non, nos prenons sovant autres qui [158vA] s’obligent por lui à cele meisme chose quant nos volons estre seur plus que ele nos soit rendue. ¶ {9} Se la chose qui est convenencee est tele que ele ne puet estre rendue, il est aperte chose par droit naturel que li obligemenz ne vaut rien ; si comme se convenance est fete de franc home, ou de celui qui est morz, ou de ma meson arse entre cez qui ne sevent pas que li hons soit franc, ou que il soit morz, ou que la meson soit arse. Autresi est il se aucuns mest en convenant que uns leus sainz ou religios li soit donz, {10} ou la chose qui est soe que il ne set pas qu’i soit soe. {11} Il est certeine chose que la convenance ne vaut rien qui est fete soz condicion qui ne puet avenir. ¶ {12} Il est aperte chose que se li forsenez convenance ou promet aucunne chose, ce qui est fet ne vaut rien. {13} Autresi est il de celui qui est de tel aage que il n’entant pas ce que il fet ; mes l’en fet plus benignement que l’en croit que cil qui puet parler puet par droit convencier et promestre. ¶ {14} Il est aperte chose que chose prestee n’apartient de rien à obligemenz de paroles. {15} Et l’en dira ce moismes de sort que l’en dit do forsené ; car ja soit ce que il puet parler, neporquant il ne puet pas oïr les paroles à celui qui li convenance aucunne chose. Et por ce, apert il que nos ne parlons pas de celui qui o‹ï›t à poine mes de celui qui n’o‹ï›t point.

§ {44.7.2}

Cil moismes dit : obligemenz sont fez par consentemenz, si comme en achat, ou en ventes et en loages, et en compoignies, et en conducions1, et en commandemanz. {1} Nos disons que obligemenz est fez par consentement en cez manieres ; car l’en n’i demande nule proprieté d’escriture ne de paroles, ainz est assz se cil qui font besoingnes s’i consentent. {2} Et por ce sont tex besoignes fetes entre cez qui ne sont pas present, si comme par letres ou par mesages. {3} En tel marchié est obligiez li uns à l’autre en ce que il li doit doner por bien et por loiauté.

§ {44.7.3}

Cil moismes dit : la sustance d’obligement n’est pas en ce que ele nos doigne aucunne chose ou aucun servise, mes que aucuns soit tenuz à nos à doner nos ou à fere aucunne chose. {1} Ce n’est pas assez à engendre obligemenz que aucuns baille ses deners à un autre, ainz convient que ce soit fet par corage d’establir obligemenz. Se aucuns me done donc de ses deners, ja soit ce que il furent suen et que il sont or mien, neporquant je ne sui pas obligiez à lui, car ce ne fut pas mis en convenant ; car obligemenz est de [158vB] paroles quant cil qui font aucun marchié ont corage d’establir le.

§ {44.7.4}

Gaius dit : obligemenz nessent de mesfet, si comme de larrecin, de domage, de ravine, de tort fet ; et totes cez choses sont d’une maniere, car cist obligemenz sont par chose tant solement ; et cil qui nessent de marchié sont par choses et par paroles et par consentement. ¶

§ {44.7.5}

Se aucuns a fet les besoingnes à celui qui est hors do païs, se il les a fetes par son commandemant, il est aperte chose que aucions de commandemant nessent entre aus, par quoi il puent pledier entre aus que li uns rende à l’autre ce que il li doit rendre par bone foi. Et se il le fit sanz son commandemant, il nos plet que li uns soit obligiez à l’autre. Et en ce quas sont aucions establies que nos apelons de besoignes fetes, par quoi il puent pledier ensenble de ce que il doivent rendre li uns à l’autre par bone foi. Mes obligemenz ne nessant en aus ne por marchié ne por mefet ; car cil qui fit les besoingnes à celui qui estoit hors do païs ne fit pas marchié à lui ; ne ce ne fut nus mesfez se il amenistra autrui besoingnes sanz commandemant. ¶ Et l’en puet melz entendre que cil à qui les besoingnes sont fetes ait fet marchié ou que il ait mesfet ; mes il a esté receu par cause de profit que li uns soit obligiez à l’autre. Et ce est por ce que plusors vont hors do païs qui cuident maintenant revenir, et por ce ne commandent il à fere à nul lor besoignes, et puis leur avient tel chose que il les convient longuement demorer ; et ce seroit mals que lor besoignes fussent perdues, et perdues les convendroit il estre, se issi estoit que cil qui les amenistreroit n’eust nule aucion contre lui de ce que il avroit despendu do suen, ou se cil qui les besoignes seroient ne poet avoir nule aucion de ce qui seroit malement fet. ¶ {1} Cil qui sont tenu par aucion de garde ne sont pas proprement obligié par marchié, car il n’ot nul marchié entre l’orfelin et son deffendeur. Mes por ce que il ne sont pas obligié par mesfet, il senble que il soient obligié autresint comme par marchié ; et en ce cas a il .ii. aucions, car li orfelins a aucion contre le deffendeur et li deffenderres contre l’orfelin se il a mis do suen en la besoigne à l’orfelin, ou il est obligiez par lui, ou il a obligié sa chose à son creancier. ¶ {2} Li heirs qui doit lés n’est obligiez ne par marchié ne par mesfet ; car cil à cui li lés fut lessiez ne fit mar[159rA]chié ne o le mort ne o l’oir. Et il est aperte chose que il n’a en cele chose point de mesfet. ¶ {3} Cil qui reçoit por error chose que ne li est pas deue est obligiez à cez qui li paient autresi comme par prest, et est tenuz par cele meisme auction par quoi li deteur sont tenuz as creanciers. Mes l’en ne puet pas entendre que il soit obligiez par cele cause autresi comme par marchié ; car cil qui paie par error le fet plus par depecier obligement que por fere le. ¶ {4} Se uns juiges fet le plet, il n’est pas proprement obligiez autresi comme par mesfet, mes por ce que il n’est pas obligiez par marchié ; et l’en entant que il a mefet aucunne chose par peor des suens ; il senble que il soit obligiez autresi comme par mesfet. ¶ {5} Cil de qui meson aucunne chose est getee ou espandue, si que ele fet mal à aucun, est obligiez autresi comme par mesfet comment que il soit, ou se la meson est soue propre, ou se il la tient à loage, ou se ele li est prestee ; ne l’en entant pas que il soit proprement obligiez par mefet, car ce est aucunne foiz en autrui colpe, si comme à un serf ou à un franc home. Autresi est il de celui qui a mis ou pendu aucunne chose sus la voie quant el fet mal à aucun. Et por ce, se li fiz qui est ou baill habite aillors que o son pere, et aucunne chose est getee ou espandue de sa meson, ou aucunne chose i est mise ou pendue qui face mal à aucun se ele chiet, il plet à Julian que aucion ne soit pas donee contre son pere mes l’en en puisse pledier o lui meisme. ¶ {6} Li metres d’une nef, ou d’une taverne, ou d’une ostelerie est tenuz autresi comme par mesfet por le domage qui est fez en la nef, ou en la taverne, ou en l’ostel, se issint est que li domages n’aviegne pas par son mesfet mes par aucun des serganz de la nef, ou de la taverne, ou de l’ostel. Car desque aucion ne puet valoir contre lui por nul mesfet, et il est corpables en aucunne chose por ce que il a serganz mauvés, il est tenuz autresi comme par mesfet.

§ {44.7.7}

Ponponius dit : le fiz ne puet avoir aucion contre son pere tant comme il est en sa poesté.

§ {44.7.8}

Cil moismes dit : nus obligemenz n’en est de convenance qui est fete soz condicion tele « se je vuoill » ; car cil qui fet tel convenance ne puet estre contrainz de doner nule chose se il ne viaut. Ne li heirs à celui qui fit la convenance, et ne volt rien doner, n’i est pas tenuz ; car la condicion ne fut onques aconplie.

§ {44.7.10}

Ulpianus dit : l’en tient les obligemanz [159rB] à naturex non pas tant solement quant aucunne aucion en apartient, mes quant li denier qui en sont paié ne puent estre demandé arriere.

§ {44.7.14}

Cil moismes dit : li serf sont obligié por lor mesfet ; et se il sont franchi, il remaignent obligié ; mes il ne sont pas obligié citeinement por lor mesfet ne por marchié, mes il sont obligié naturelment, et cil à cui il ont fet marchié. Se je paie à un serf puis que il est franchiz les deners que il m’avoit prestez, je en sui quites.

§ {44.7.21}

Julianus dit : l’an antant que chascuns ait fet marchié el leu en coi il est obligiez à paier.

§ {44.7.22}

Affricans dit : quant aucuns a mis en convenant que une chose li soit paié et il en a pris plege, l’en la doit proisier à tant comme ele valoit quant il la prist en plege.

§ {44.7.23}

Cil moismes dit : quant deners orent esté presté por marcheandier par tel convenant que se cil qui les reçut ne les rendoit au terme qui fut mis, il paieroit une certaine paine. ¶ Quant li termes fut venuz, cil qui avoit baillié les deners les demanda, mes il ne demanda lors la poine, et aprés il2 la commença à demander. Et quant l’en m’an demanda consoil, je respondi que la paine poit bien estre demandee, ne il ne poet avenir que ele ne soit demandee se issi n’est que il est remés par le deteur que li dener ne furent paié au terme ; car se il ne remet pas en lui, mes por ce que cil qui les devoit demander estoit malades, il n’est pas tenuz à la paine. Et se cil qui devoit les deners ne les paia pas au terme mes il les paia ainz que plez en fust commoinciez, l’en demande se il est tenuz à la paine. Et ge croi que oïl, par droit ; car se uns arbitres conmanda que dener fussent paié à un certein jor, ne il ne remaint par celui qui les dut paier, il n’est pas tenuz à la paine. Et Servius dit que se li arbitres n’establi pas le jor dedanz coi li dener doivent estre paié, il senble que il vossit doner peuc terme. Autresi doit l’en dire quant une chose est vendue par tel convenant que la vente ne valle rien se li pris n’est paiéz à un certain terme.

§ {44.7.25}

Ulpianus dit : deus manieres d’aucions sont : l’une est seur la chose qui est apelee chalongemenz et l’autre est seur la persone. Auction seur la chose est par coi nos demandons nostre chose que uns autres porsiet ; et cele auction est toz jorz contre celui qui porsiet nostre chose. Auction seur la persone est par [159vA] quoi nos pledons contre celui qui est obligiez à nos à fere nos, ou à doner aucunne chose ; et cele aucion a toz jorz leu contre celui. ¶ {1} Les unes aucions nessent de marchié, les autres de fez, les autres de sur le fet. Auction qui nest de marchié est totes les foiz que aucuns fet marchié ou autre por gaagnier, si comme quant il vent ou achate, ou prent à loage, ou fet aucunne tel chose. Auction qui nest de fet est quant aucuns est tenuz par ce que il a fet, si comme quant il a fet larrecin, ou tort fet, ou domage. Auction seur le fet est si comme cele qui est doneee au patron contre celui que il a franchi qui le tret en cause contre le banissement au prevost. {2} Totes aucions sont ou citaennes, ou eles sont donnees par l’autorité au juige.

§ {44.7.28}

Cil moismes dit : aucion est donnee contre la persone, et chalengemenz seur la chose est porsivemenz seur la chose, ou seur la persone por avoir sa chose.

§ {44.7.31}

Neraces dit : les3 convenances qui sont fetes soz condicion qui ne puet avenir ne sont pas tant solement sanz valor, mes li autre marchié, si comme achaz et loages, où condicion est mise qui ne puet avenir ; car en la chose qui est fete par assentement à deus ou à plusors est regarder la volenté à toz. Et l’en doit savoir que ce qui est fet ne vaut rien quant tel condicion est mise que l’en siet bien que n’avendra ja.

§ {44.7.32}

Hermogenes dit : quant plusors aucions nessent d’un mesfet, si comme il aviant quant arbre sont copé en larrecin, il fut ostroié aprés plusors detes que l’en en puet pledier par totes.

§ {44.7.34}

Paulus dit : cil qui bat à tort autrui serf enchiet par un meisme fet en la loi qui fet restorer les domages et en aucion de torz fez. Car li torz fez vient de corage et li domages vient de sa colpe ; et por ce puent anbedeus les aucions apartenir contre lui. Mes desque il en choisist l’une, l’autre li faut ; car se il plede par la loi qui fet restorer les dommages, l’aucion de torfet faudra par ce que il n’est pas droiz que cil soit condempnz par le tort fet qui a restoré le domage ; mes se l’en pleda avant par aucion de tort fet, l’en puet aprés pledier par la loi qui fet restorer les dommages. Mes sentence doit estre deffendue par le prevost se l’en ne plede por ce que [159vB] l’en puet avoir par la loi qui fet restorer les domages plus que par l’auction de tort fet. ¶ Il est donc plus tenable chose que cele sentence soit receue que il li loise à pledier avant par la quele aucion que il vodra, et puis demande par l’autre ce que il puet plus avoir que par cele.

§ {44.7.35}

Cil moismes dit : Cassius dit que l’en doit issi establir es aucions que li prevoz donent, que o il a chalongement des choses puissent estre donnees aprés l’an, et les autres dedanz l’an. Et celes qui ne sont pas donnees aprés l’an ne doivent pas estre donees contre l’oir por tant que il n’en ait gaing ; si comme l’en fet en aucion de tricherie et en l’entredit de force, et cez qui sont senblable à cez. Celes contiennent chalongement de choses par quoi nos chalongons les choses qui nos faillent de nostre patremoine, si comme quant nos pledons à celui qui porsiet les biens à nostre deteur, ou par aucion de dessesine qui est donnee en maniere de chalongemant. Mes quant la chose est rendue et la longue tenue est rompue, l’auction est finee en un an por ce que ele est donnee contre le droit citaien. {1} Auction est donnee aprés un an contre la chose commune por le marchié as metres de l’université.

§ {44.7.43}

Paulus dit : cil puet estre obligiez qui est hors de bail et est de saine penssee et a passé .xiiii. anz. Li orfelins n’est pas obligiez par le droit citaian sanz l’autorité à celui qui l’a en garde. Sers n’est obligz por nul marchié.

§ {44.7.46}

Cil moismes dit : li forsenz et li orfelins sont obligz sanz l’autorité à cez qui les ont en garde quant l’auction n’est d’aucunne chose ; si comme se je ai un champ commun à aus et je i despans aucunne chose, ou il m’i font domage, car il seront obligié à moi par le juigement de partir choses communes.

§ {44.7.48}

Affricans dit : il n’est pas besoinz de paroles en toz marchiez, ainz i soffist bien consentement ; et por ce les puet li sorz fere desque il puet entendre, si comme en loage et en achat et en autres senblables.

§ {44.7.50}

Ponponius dit : se aucuns promet ou il est condempnz à paier aucunne chose en cest an, il la puet paier en quel jor de l’an que il vodra.

§ {44.7.51}

Celsus dit : aucion n’est nule autre chose que chalonger en juigement ce que l’en doit.

§ {44.7.52}

Cil moismes dit : nos somes obligié ou par chose, ou par paroles, ou par enbedues [160rA] ensenble, ou par consentement, ou par loi, ou par le commandemant au juiges, ou par besoing, ou par fet. {1} Nos somes obligié par chose quant aucunne chose est baillie et receue. {2} Nos somes obligiez par paroles quant demande est fete et puis avenant responsse. {3} Nos somes obligiez par chose et par paroles ensenble quant la chose est baillie et aucunne chose en est convenancee. {4} Il senble que nos seons obligiez en aucunne chose par consentement, par besoing, et par nostre volenté. {5} Nos somes obligié par loi quant nos fesons aucunne chose par le commandemant de la loi. {6} Nos somes obligiez par le commandemant as juiges quant nos fesons ce qui est commandé, ou lessons ce qui est deveé par pardurable bannissement, ou par le commandemant à aucun juige. {7} Cil sont obligié par besoing à qui il ne loit à fere aucunne autre chose que ce qui lor est commandé, si comme cil qui est fez heirs par force. {8} Nos somes obligié par fet quant tote la some de l’aucion est en fet. {9} Nuz consentement soffist à fere obligement, ja soit ce que il puisse estre exprés par paroles. {10} Et par signes est aucunne foiz obligemenz fez.

§ {44.7.53}

Cil moismes dit : plusors mesfez en une meisme chose engendrent plusors aucions, mes il est prové que l’en ne puet pas pledier par totes ; car se pluseurs aucions nessent en un obligement, l’en doit user d’une sole et ne mie de totes. {1} Quant nos disons generaument celui à qui la chose apartient, nos i comprenons noz fiz adoptis.

§ {44.7.54}

Cil moismes dit : marchié faint n’ont pas lian de droit, desque il n’i a verité.

§ {44.7.59}

Calistratus dit : l’en doit savoir que tuit li plet qui sont entammé vienent as hoirs.


1 conducions] condicions dans le ms., cf. lat. locationibus conductionibus
2 il] il a dans le ms.
3 les] ce dans le ms.