École des chartes » ELEC » LI DIX-SEPTIESMES LIVRES » IV. [156vB] De excepcion de tricherie [rubr.]
[p. 272]

IV. [156vB] De excepcion de tricherie [rubr.]

  • Traduit du Dig., liv. 44, tit. 4 : de Doli mali et metus exceptione.

§ {44.4.1}

Paulus dit : que ceste excepcion puisse estre entendue plus clerement, voions avant de la cause par quoi ele est proposee et comment l’en fet par tricherie. Et por ce entendrons nos comment l’excepcion de tricherie nuira, et aprés voions contre quex persones ele a leu ; et au derrenier, se eles apartienent en toz tens. {1} Li prevoz propose ceste excepcion que tricherie ne vaille à nul contre naturel droit par acheson de droit citeain. Et l’en entent bien par le fait moismes quant aucunne chose est fete par tricherie, ou en marchié, ou en testamant, ou en lois.

§ {44.4.2}

Ulpianus dit : il est aperte chose que ceste excepcion est proposee por la cause moisme par quoi aucion de tricherie est proposee. {1} Il convient que nos voions en quex causes ceste excepcion a leu et contre quex persones ele doit estre proposee. Et l’en doit savoir que il convient dire especiaument de quele tricherie aucuns se plaint. Et cil qui oppose contre excepcion doit prover que ses averseres a fet tricherie en la cause. Ne ce n’est pas assz se il dit que tricherie i a esté fete se li demanderres ne l’a fete ; il doit nomer la persone por savoir se ele est tele que sa tricherie doie nuire au demandeur. {2} Ne l’en ne demande pas contre qui la tricherie fut fete, mes sanz plus se ele fut fete en la chose par devers le demandeor. ¶ {3} En la premiere espece par quoi cest excepcion puet avoir leu puet l’en enquerre ces choses. ¶ Se aucuns a fet que deners li soient convenenciez sanz cause et puis plede par cele convenance, excepcion de tricherie li nuira ; car ja soit ce que il n’i fist point de tricherie ou tens que la convenance fut fete, neporquant desque il en [157rA] commoince plet, l’en doit dire que il i fit tricherie. Et se il ot droite cause de fere la convenance et il n’en a or point, il senble que il i fet tricherie, si comme se aucuns devoit doner à prest deners. Et il fist convenance que il seroient renduz, et il ne les presta pas ; l’en doit dire que ceste excepcion li nuist. {4} Se aucuns fet purement convenant que certoine quantité li soit rendue por aucunne certaine cause et il convenance anprés que cele quantité ne li sera demandee devant certain terme, l’en demande se excepcion de tricherie li doit nuire se il la demande devant le terme. Et sanz dote l’en ne doit pas doter que excepcion de convenant ne li valle. Et se aucuns velt user de ceste excepcion, il le puet bien fere ; car l’en ne puet pas noier que cil qui demande contre convenant ne face tricherie. ¶ {5} L’en doit savoir generalment que excepcion de tricherie nest de totes les auctions seur le fet ; car cil fet tricherie qui demande ce don l’en se puet deffendre par aucunne excepcion. Car, s’il n’i ot au commoincement point de tricherie, s’i demande ore, il a par tricherie, se il n’i a tele ignorance qui soit sanz tricherie. ¶ {6} Se uns creanciers a pris usures do tens qui est à venir et il demande sa dete ainz que cil tens soit venuz, excepcion de tricherie li nuist par droit ; car desque il prist les usures il senble que il fist que il ne porroit demander la dete devant le terme. ¶ {7} Se aucuns achete un serf à qui franchisse estoit lessie se il devoit .x. livres, et cil qui l’achate n’en siet rien, et il met en convenant que se li sers ne li est garentiz li pris li soit renduz à dobles, et li sers li poie les .x. livres et il vient à franchise, li acheterres puet pledier por avoir à dobles les pris que il li dona. Mes se il ne conte les .x. livres que il reçut par acomplir la condicion, il sera mis arriere par excepcion de tricherie ; et issint escrit Julians. Neporquant, se cil dener furent do chestel qui apartient à l’acheteor, ceste excepcion ne li nuira pas ; car il n’i fit rien par tricherie.

§ {44.4.4}

Cil moismes dit : Celsus demande : se li creanciers d’un heritage commanderent à Tyce que il receut l’eritage, et li uns ne li commanda pas por decevoir le, et, se por ce ne fust, i l’eust commandé, et il plede aprés à lui, savoir mon se il doit estre mis arriere par excepcion de tricherie ; et Celsus dit que excepcion de tricherie li doit nuire. ¶ {2} Se nos1 meismes est mise, et je ne la poi pas tenir por maladie et l’en me demande la poine, l’en demande se ge me puis deffendre par excepcion de tricherie. Et [157rB] Pomponius dit que oïl bien. ¶ {3} Se tu fais mise o celui qui te devoit .vi.c livres, li offices à l’arbitre fut que il commandat que il te rendist ce que il te devoit en verité. Et se il comanda que il te rendist moins, tu puez demander le suerplus. Et se l’en te tret en cause par la poine, tu te porras deffendre par excepcion de tricherie. ¶ {4} Se aucuns a poié à un orfelin ce que il devoit sanz l’autorité à son deffendeor et li orfelins en est fez plus riches, l’en dira par droit que excepcion de tricherie nuira à cez qui li demanderunt la dete. Autresi doit l’en dire as autres à qui l’en ne paie pas par droit ; car se il en sont plus riches l’excepcion avra leu. ¶ {20} Se mes deteurs te deçut, et il t’atorna à moi à paier sa dete et tu la me convenenças et je la te demant, l’en demande se excepcion de tricherie me puet nuire. Et il est melz que il ne te soit pas otroié à user contre moi d’excepcion de la tricherie ne à mon deteur ; car ge ne te deçui pas, mes tu en porras pledier contre mon deteur. ¶ {27} Excepcion ne sera pas opposee à l’acheteur de la tricherie au vendeur ; car il use de ce que li acheterres li otroia. {29} Se aucuns chalonge une chose por cause de lés ou por ce que ele li a esté donee, l’en demande se excepcion li puet estre opposee de la tricherie à celui qui li donna ou lessa la chose. Et Pomponius dit que oïll. Et ge croi que cil doivent estre mis arriere par excepcion de tricherie qui a la chose par la cause de gaagner ; mes il est autrement de choses achetees. {31} La tricherie au vendeur ne sera pas opposee à l’acheteur, si comme nos avons dit ; et nos garderons ce en celui tant solement qui a la chose par achat, et en celui qui l’a par eschange ou prise en sorte, et es autres qui sont autresi comme acheteor.

§ {44.4.6}

Gaius dit : se il est avenu par le porchaz as creanciers que ses deteurs ait perdu les deners que il a paié et il les demande puis, il sera mis arriere par excepcion de tricherie.

§ {44.4.7}

Julianus dit : se je cudoie que je te deusse deners, et je l’a‹i› premis par ton commandemant à celui à cui tu les voloies doner, je me puis deffendre par excepcion de tricherie ; et par desus ce, je puis pledier à lui que il me quit. {1} Se tu cuidoies que uns hom fust tes creanciers et je li promis par ton commandemant les deners que je te cuidoie devoir, se il les me demande il doit estre mis arriere par excepcion de tricherie. Et par desus ce, je puis pledier à lui que il me quit. Et ceste sentence est plaine d’umanité que je me deffande par excepcion, et soie delivrez de ce à qui je fui obligiez.

§ {44.4.9}

Paulus dit : se uns procurators a pris deners por sofrir [157vA] que il soit condempnz et l’en plede à son seignor par aucion de chose juigee, il se deffendra par excepcion de tricherie. Et ce que li procurators a receu ne li puet pas estre tolu ; car dener qui sont receu por vileine cause doivent melz estre à celui qui est deceuz que à celui qui deçoit.

§ {44.4.10}

Marcians dit : quant uns hom edefie aucunne chose en la place que sa feme li a donee, pluseur dient que il puet garentir la chose par excepcion de tricherie.

§ {44.4.12}

Panponius dit : cil qui puet brisier l’aucion à son averseire par leal deffensse est seurs par excepcion.

§ {44.4.13}

Paulus dit : quant enfant son deserité ou testamant leur pere et li testamanz est roz2, leur droiture lor doit estre gardee tote entere, ne excepcion de tricherie ne lor sera pas opposee. Et ce doit estre gardié non pas tant solement en la persone as enfanz mes en leur heirs.

§ {44.4.16}

Hermogenes dit : se uns forsenez atorne son deteur à paier à son creancier ce que il li doit, et li detors cuide que il soit bien en son sans et il le paie, il se deffendra par excepcion de tricherie se l’en li demande autre foiz la dete ; car ele est alee el besoing à son deteur.


1 nos] nos nos dans le ms.
2 roz] toz dans le ms., cf. lat. rupto testamento ius suum conservandum est