V, 12
En semblable n’entendons qu’il soit faict aucun exercice de lad. Religion en la
ville, prevosté et viconté de Paris ny à dix lieues à l’entour d’icelle ville,
lesquelles dix lieues nous avons limitées et limitons aux lieux qui ensuivent,
sçavoir est : Senlys et les faulxbourgs, Meaulx et les faulxbourgs, Melun et
les faulxbourgs, une lieue par della Chastres soubz Montlhery, Dourdan et les
faulxbourgs, Rambouillet, Houdan et les faulxbourgs, une grande lieue par dellà
Meulan, Vigny, Meru et Sainct-Leu de Serans. Ausquelz lieux susd. nous
n’entendons qu’il soit faict aucun exercice de lad. Religion, sans toutesfoys
que ceulx d’icelle Religion puissent estre recherchez en leurs maisons, pourveu
qu’ilz se comportent ainsi que dessus est dict.
Voir aussi, II.04, III.09, VI.05, VII.04, VII.08, VIII.10, XII.14, XIII.33.
VIII, 10
Comme aussi de faire aucun exercice de lad. Religion en nostre court et suitte,
ny à deux lieues es environs d'icelle, ny pareillement en noz terres et païs
qui sont dela les montz, ny aussi en nostre ville, prevosté et viconté de
Paris, ny à dix lieues autour de lad. ville, lesquelles lieues nous avons
limittées et limittons aux lieux qui ensuivent, sçavoir est Senlis et les
forsbourgs, Meaulx et les forsbourgs, Meleun et les forsbourgs, une lieue par
dela Chastres soubz Mont[l]hery, Dourdan et les forsbourgs, Rambouillet, Houdan
et les forsbourgs, une lieue grande par dela Meulant, Vigny, Meru et Saint-Leu
de Serans, ausquelz lieux susd. nous n'entendons qu'il soit faict aucun
exercice de lad. Religion. Touteffois ceulx de lad. Religion demeurans esd.
terres et païs dela les montz et en nostred. ville, prevosté et viconté de
Paris, estendue ainsi que dict est, ne pourront estre recerchez en leurs
maisons, ne abstrainctz à faire chose pour le regard de leur religion contre
leur conscience, en se comportant au reste selon qu'il est contenu en nostre
present eedict.
Sur l'interdiction du culte réformé à la cour, V.11, VI.05, VII.04, XII.14.
Sur l'interdiction du culte réformé à Paris, II.04, III.09, V.12, VI.05, VII.04, VII.08, XII.14, XIII.33.
