IV. De gaagnier par longue tenue chose qui est ballie en sote [rubr.]

Hermogenes dit : cil prant en sote qui reçoit une chose por cause de dete. Et non pas tant solement ce qui est deu mes ce qui est poié por aucunne dete puet estre gaignié par longue tenue.

Paulus dit : se je quidoie que je te deusse aucunne chose et je la te bailloi, tu la gaigneras par longue tenue se tu quides autresi que je la te deusse. Mes il est autrement se je cuit estre tenuz à toi par cause de vente et je le te baille por ce ; et en ce quas puet estre la chose gaignie par longue tenue se l’en ne plede par aucion d’achat. La cause de diversité est en ce que il convient as autres causes regarder ou tens de poiement ; et ce me soffist assez, quant tu me poias, que je cuit que ce que tu me poias soit dou tien ; mes en achet, regarde l’en au tens que li marchiez fu fez e en quoi l’an poie.

Labeo dit : se aucunne chose est anblee, ele ne puet pas estre gaignie par longue tenue devant que ele reviegne en la poeté à son seignor. Mes Paulus dit encontre que se tu m’enbles ce que tu me baillas en gages, la chose est enblee ; mes desque ele revendra en ma poeté, il porra estre gaigniez par longue tenue.

Paulus dit : cil qui porsiet une chose, et en vest poier le pris, commence à porsoer la comme acheterres.

Ulpianus dit : cil qui rent la valor de la chose que l’en li demande resenble à celui qui l’achete.

Scevola dit : uns hom acheta par bone foi une place qui estoit à un autre que à celi qui la vendi ; et ainz que il eust gaignié par longue tenue, il commoinça à edifier ; et li sires li denonça mointenant que il n'i edifiat pas, mes [135rA] il ne le vost pas lessier por lui. Je demans se la possession est entrerompue. Et la response est que, selonc les choses qui sont proposees, ele n’est pas entrerompue.