VI. De longue tenue de chose donee [rubr.]

Paulus dit : il ne sofist pas que l’en quit que une chose soit donee à gaigner par longue tenue, ainz convient que ele soit donee en verité. ¶ {1} Se li peres donne à son fiz que il a en sa poeté une chose, il muert aprés, li fiz ne tandra pas cele chose comme don quar li dons ne fu nul1. ¶ {2} Se dons est fez entre home et sa feme, il ne puet estre gaigniez par longue tenue. ¶ Se li mariz done une chose à sa feme, ou la feme à son mari, et li mariages est depeciez, Cassius respont que longue tenue n’i a nul leu, car nus ne puet müer la cause de sa possession. Mes se li mariz li ostroie aprés le departement, la longue tenue vaudra autresi comme s’il li donast lors à primes. Et Juliens quide que feme puisse porsoer la chose que sis mariz li done.

Ponponius dit : se li mariz donne à sa feme ou la feme [135rB] à son mari, c’est voirs que Trebaces cuide que se cil qui dona la chose non est plus povres, la longue tenue puet valoir à celui qui la reçut.

Cil moismes dit : se li peres donna une chose à sa fille qui estoit en son baill et il la deserita aprés ; se li eirs ostroia ce qui fu fez, la longue tenue vaudra à la fille por cele cause, et doit estre contre le jor que li hers ostroia ce qui fu fet.

Sevola dit : se cil qui a commoincié à porsoer .i. serf por cause de franchir, ainz qui l’ait, acompli la longue tenue, ne fet rien, car il n’en a pas encore gaignié la seignorie. L’en demande donc s’il entreront la possession. Et la response est que il apert que il ait entrelessié la possession, et por ce est la longue tenue entrerompue.

Hermogenes dit : quant verité est dite por cause de don, la chose n’est pas porsise por cause mes por don.

Ulpianus dit : se chose est guerpie, ele lesse maintenant à estre à celui qui la guerpist et est à celui qui la prant ; car les choses lessent à estre noz par celes moismes menieres par quoi eles sont aquises.

Paulus dit : se nos savons que une chose soit guerpie dou tot, nos la poons aquerre. {1} Mes Proculus dit que la chose ne lesse pas à estre à son seignor devant que autres la porsie. Et Julians dit que ele lesse à estre soe, mes ele n’est pas à autre devant que il la porsie.

Modestinus dit : l’en puet demander se une chose puet estre guerpie en partie. Et sanz dote, se une chose est commune et uns des compoignons en guerpist sa partie, ele lesse à estre soe. Mes cil qui est sires de tote la chose ne puet pas fere que il en retiegne une partie et guerpisse l’autre partie.

Paulus dit : nos poons gaigner par longue tenue ce qui est guerpi que nos avons, ja soit ce que nos ne savons quil l’a guerpi.

Ponponius dit : se tu porsiez une chose qui a esté guerpie et je l’achate à toi à mon escient, il est certeine chose que je la puis gaigner par longue tenue ; ne ce ne me nuist pas que ele n’estoit pas en tes biens. ¶ Il est autresi se je achete à mon escient de toi une chose que ta femme te donna. ¶ {1} Desque aucuns guerpist sa chose ou il la gete, l’en entent « que il la gete » que ele soit à autre.

Ulpianus dit : nus ne puet gaigner par longue tenue la chose que il quide qui soit guerpie quant ele ne l’est pas.

Cil moismes dit : se aucuns trove marchandies qui ont esté getees d’une nef, il ne puet2 pas gaigner les par longue tenue, por ce que il n’apere que eles soent guerpies [135vA] ; mes il est mieuz que il ne les puisse pas tenir comme guerpies.

Paulus dit : Semprones pledoit à Thetis por son estat et disoit que ele estoit fille de sa serve. Mes quant Procule, la norrice Thetis, demanda à Saprone le loier de norrir la, il li respondi que il n’avoit de quoi poier li, et que ele le demandast à Tice son pere, et li rendist sa fille ; et ele si fist. Et quant Tices li ot baillié le loier de norrir la, il la franchi. Je demant se la franchise Thetis puet estre apelee. Et Paulus respont que, por ce que li sires à la serve de quoi Thetis fu nee le guerpi, il apert que Tices la puet bien franchir.