V. De gaagnier par longue tenue chose que l’en tient comme hers [rubr.]

Paulus dit : Nus ne puet gaignier par longue tenue comme heirs nul des biens à celui qui est encore vis, neïs se cil qui les tient quide que il soit morz.

Juliens dit : cil qui est mis en possession por cause de garder les lés n’e‹n›treront pas la possession à celui qui tient comme heirs, car il tient la chose por garder la ; ne1 ne se doit partir devant que li lés li soit poiez, ou que satisfacion l’en soit fete. ¶ {1} Ce que nos dit communaument que nus ne puet müer la cause de la possession doit estre issi entendu, que l’en n’entende pas tant solement de possession citeene, mes de naturel. Et por ce a il esté respondu que li coitiverres, ne cil à qui la chose est baillie en garde ou prestee, ne la puet pas gaigner comme hoirs2 por gaigner la. ¶ {2} Servius dit que li fiz ne puet pas tenir comme heirs la chose que ses peres li dona ; car il entent que li fiz en ait naturel possession ele viant au pere. Et de ce s’ensit il que li fiz de quoi li peres fet savoir ou autres n’en puet pas tenir les choses que ses peres li dona en sa vie que li autre hoir n’en aient lor partie.

Ponponius dit : plusors quident que se je sui heirs et je cuit que une chose soit de l’eritage qui n’en est pas, je la puis gaigner par longue tenue.

Paulus dit : il est certoine chose que cil qui3 a poer de fere testamant puet porsoir comme heirs.