VIII. De gaagner par longue tenue ce que aucun tient par soe [rubr.]

Ulpianus dit : quant aucuns quide que la seignorie li soit aquise et il la porsiet par cele cause, il la tient comme soe. Et se aucuns porsiet une chose que il a achetee, il la porsiet comme soe et par son achat. Et se une chose est donee ou lessie à aucun, il la porsiet comme soe ou comme chose lessie. Et se une chose m’est baillie par droite cause, si comme por achat, je commoinz à porsoer la comme la moie chose, ainz que je l’aie gaignie por longue tenue.

Paulus dit : il i a une maniere de possession quant aucuns porsiert comme la soe chose ; en1 ceste maniere porseons nos totes les choses que nos prenons ou ciel, ou en la terre, ou en la mer, ou celes qui demenent noz par sorondemanz de flueves, et celes que nos porseons qui sont nees des choses qui sont porsises en autrui non, si comme li serf qui sont né de la serve d’un heritage, et li fruiz de la chose qui est achetee ou trovee en l’eritage [136rA].

Ponponius : tu me bailles .i. serf que tu quidoies devoir moi, ja sé ce que tu ne m’an devoies point. Se je savoie bien que tu ne me devoies rien, je ne le gaigneré pas par longue tenue ; mes se je n’en le savoie rien, je le puis porsoer comme le mien.

Cil moismes dit : se tu achetas par bone foi une serve qui avoit esté enblee et tu porsies l’enfant que ele conçut et enfanta en ta meson, si que dedanz le terme qui est establiz à avoir longue tenue tu seus que sa mere avoit esté enblee, Trebaces quide que ce que a issi esté porsis soit gaigniez par longue tenue. Et je croi que l’en doit distinter que se tu ne2 seus dedanz le tens qui est establiz cui li sers estoit, ou se tu le seus et tu ne li peus fere savoir3, ou se tu li feis savoir, tu la gaigneras par longue tenue. Et se tu le seus et tu li peus fere savoir et tu ne li feist pas, il est autrement ; car il apert que tu aies porsis en repost, et nus ne puet porsoer une moisme chose comme seu en repost. ¶ {1} Se li peres a parti à ses enfanz ses biens que il avoit, et il les tienent issi aprés la mort lor pere, et il se tienent apoié de cele partie, [et] chescuns tient comme le sien ce que il a en sa partie. ¶ {2} Se une chose n’est pas lessie, et li heirs la baille à aucun à qui il quide que ele soit lessie, il nos plet que il la gaint par longue tenue, car il la porsiet comme la soe.

Neraces dit : il a esté establi por foïr les plez que nos gaignon par longue tenue les choses que nos quidons qui soient noz. {1} Et aucuns gaigne par longue tenue ce que il quide qui soit sien, ja sé ce que il n’est pas suen. Et ce doit estre issi entendu que cil qui porsiet ait provable cause por coi il cuit que la chose soit soe. Si comme se je porsie aucunne chose por ce que je cuit que mis sers ou cil à qui je fui heirs l’ait achetee, ja soit ce que ce n’est pas voirs ; car ignorance d’autrui fet puet estre sofferte.