École des chartes » ELEC » CI COMMANCE LI HUITIESME LIVRES » II. De peril et de preu de chose vendue [rubr.]

II. De peril et de preu de chose vendue [rubr.]

  • Traduit du Dig., liv. 18, tit. 6 : de Periculo et commodo rei venditœ.

§ {18.6.1} Ulpianus. Si vinum.

Se vin qui est vendu egrist ou prent aucun tunve, le domage est a l’acheteor ; ausi comme s’il [82rA] fust espandu ou s’il fust mis en vesseaus depeciez ou par aucunne autre cause. Mes se le vendeor prist le peril sor soi, il avra le peril en ce tans que il le prist. Et s’il n’i mist terme, le peril est son dusque aist tasté dou vin ; ausi comme se l’en fet lors la vençon quant l’en a tasté dou vin, ou s’il s’acorde que il eist le peril dou vin itant de terme, ou s’il ne fet de ce convent, il avra lors le peril dusque l’en aist do vin tasté. ¶ Et se l’en ne taste, et li tonel ne sont bien vercee par la main l’acheteor, encore est le peril au vendeor se autre convent n’i a. {1} Et le vendeor doit garder combien il en i a, car avant que il soit mesuré la vençon n’est mie fete ; puis que la mesure n’est fete, le vendeor n’i a point de peril ; et il est delivré dou peril avant la mesure s’il ne vent à mesure, ‹mes› par buies, ou par poz, ou par toniaus. ¶ {2} Se le acheteor a seignié le tonel, Trebacius dit que il en est ja comme sesi ; Labeo dist que ce n’est pas voirs, car l’en le seigne que l’en n’i mete rien. ¶ {3} Le vendeor pot despendre le vin s’i dut estre mesuré dedanz un jor ne il ne le fet pas ; il ne porra pas avant dusque il eit fet savoir à l’acheteor que il oste son vin ou que il sache que il le dapendra. Et s’il le pot despendre ne no fist pas, il en doit estre mout loez. Et por ce, pot il d’iqui en avant demander le loier des toneaus s’il i ot domage, se les toneaus ne furent vuidiez où li vin estoit, ausi comme s’il les eust loez ou il li convient querre d’autres toneaus. Miauz est que li vaissiau soient loiez, ne que vin ne soit pas rendu dusque il eist rendu le loage, ou que il puisse vendre son vin à bone foi se l’en le pot fere sanz domage à ce que li achateor n’i eist domage. ¶ {4} Se tu achetas vin en tonel, ne n’i a point de convent quant il soit baillié, il est entendu en convent que il fuissent voidié ant il fussent bon à recevoir ou en la vendenge. Et s’il ne sont voidié, il convient que l’en en face ce que li ancien cuiderent, que le vendeor face mesure et jeter hors. Issi le distrent li ancian por la mesure, se l’en ne set quel est me[82rB]sure, s’il n’est aparissant combien le acheteor i a eu de domage.

§ {18.6.2} Gaius.

Et se celi venst, qui n’a point de nove vendenge, et sanz cele n’a ce mestier ; et se cil est marcheant qui seaut acheter vins et revendre, celi jor doit l’en atandre que l’en pot oster au preu au vendeor. ¶ {1} Il convient que l’en voie quel garde le vendeor face avant que il soit mesuré, savoir s’il i metra pleine diligence ou solemant que il n’i eist barat ; et je cuit que le vendeor doit metre cele diligence que prodom doit metre en ses choses, et vimaira seent hors.

§ {18.6.3} Paulus. Custodia.

Le vendeor doit baillier tel diligence comme cil à cui la chose est prestee, que il i meste plus grant cure que il ne selt mestre en ses choses.

§ {18.6.4} Papianus. Si quis.

Se aucun vent vins et dit que dedanz un jor en tastera l’en, et enprés faut par le vendeor que l’en en tastast, l’en demande s’el e peril qui est passe et de egror et de muide se le vendeor le doit rendre; ou, s’il est tenu dou peril qu’i est passe que s’i s’est1 par aventure corrumpu puis le jor que taster passa, se le peril apartient à celui qui le vendi; ou si li achaz est depeciez, ausi comme s’ele est fete soz condicion, c’est à dire s’il fussent tasté avant celi jor. Et l’en ne fiet quel convent il i ot. Je cuit que ce ne fut pas fet en repostan, et que l’en doit dire que c’est achet. Et bien si gart le vendeor outre le jor qui fust mis a en taster et par li failli ; la cope est soe. ¶ {1} Se vin est venduz en contenz, l’en le doit garder ; et de ce avient il que se le vins fut issi vendu que le n’en tastast, le vendeor n’est tenuz de egror ne de muide, ainz apartient tot le peril à l’acheteor. Et grieve chose est que aucun achete issi par si que le n’en taste pas ; et por ce, se le jor de taster en n’i est i mis, li acheteor en porra taster aucunne foiz ; et quant il en avra tasté, le peril apartendra au vendeor, car por ce que le jor est mis à l’acheteor à taster dou vin se marchiez est amendé. {2} Et se vin est vanduz en contanz, s’il i a garde ou tens de aporter ; et l’en doit [82vA] issi ce entendre se le tans i est mis. Et s’il n’i est mis, l’en doit voier que le vendeor ne soit tenuz de metre i trop longue garde. Et est voir segont ce que nos avons dist desus, il demandera son domage de ce que le vin n’a esté osté ou que il li face savoir qui l’ost. Et certes, avent que li tonel seent necessere à vendenges, le vin doist estre avant anporté.

§ {18.6.5} Paulus. Si per hemptorem.

Se il faut par l’achateor que le vin ne fust pas osté à jor, enprés se le vendeor n’i fet barat et il perit, il ne le doit pas rendre. S’i ne li a fet ausi comme se l’en a osté .c. poz de tonel qui estoit en son celier, s’il a esté mesuré, dusque il soit mesuré tot le peril avient au vendeor, se ce n’est fet par l’acheteor.

§ {18.6.6} Ponponius. Si vina.

Se je achete vins, hors les egres et les muides, et il me convient prendre les egres, Proculus dit que ja soit ce que soint mis hors par la cause de l’acheteor, li egre et li muide ne sont pas vendu ; car li acheteors ne les prendra pas outre sa volenté et ce seroit iniquité se l’en ne soffroit au vendeor ou à autres vendre les.

§ {18.6.7} Paulus. Id quod.

Ice que acheist à la teneure, enprés l’achat, par eau, si ‹est› comme ce apartient au preu ou au damage de l’acheteor ; car se tot le champ est coviart de fluve enprés l’achat, le peril est à l’acheteor, ausi sera le preu son, s’il i aviant. ¶ {1} Ce qu’est vendu est en la mesure do champ s’il n’en fust mis hors ; et ce que i vient doit estre en la mesure, s’i fust mis en convent, ausi comme voies communes, sentes, bois qui toihet à la teneure. Tot ce i doit venir quant l’en en dit mot ; et por ce doit l’en doner nomeement caucion que les voies communes qui sont en la teneure seent en la vençon et en la mesure.

§ {18.6.8} Idem. Necessario.

À force convient savoir quant achat est perfet ; et lors savrons nos qui est le peril. Car se le achat est perfet, le peril apartendra à l’acheteor ; et se ce apert qui est vendu et quoi et quel chose et combien et le pris et se c’est fet soz condicion, l’achat est perfet. Et se la chose est [82vB] vendue soz condicion, se la condicion faut, l’achat est nul, ausi comme ne la promesse. Et se la condicion dure, Proculus et Octavenus dient que le peril est à l’achateor ; et ce dit Ponponius. Et se le acheteor ou li vendeor muert tant comme la condicion pent, la vençon estoit. ¶ Et se la condicion est, li heir sont obligié, ausi comme se le achat fut fet piece à. Et se la chose est baillie tant comme la condicion pent, l’acheteor n’en avra pas l’usage por achat, et ce que il a eu en non dou pris sera rendu, et li fruit d’autretant sunt au vendeor si comme promesses, et les fez en condicion sont nul se la chose est esmee tant comme la condicion pent. Et se la chose dure, tot soit ele enpiree, l’an pot dire que le domage est à l’acheteor. {1} Et se l’en vent issi une chose, ou serf soit acheté, se une nef vient d’otre mer ou ne vient, Julien cuide que la vençon est fete mointenant, car le marchié est fet. ¶ {2} Quant tu me venz le fruit et l’usage de quoi li heir sont tenu, il a difference se tu venz le fruit de l’usage qui est tuen solement ou cele chose qui est toe dont tu me venz le fruit et l’usage ; car an premer cas, tot meures tu mointenant, ton heir ne me devra rien et l’en devra à mon heir se tu viz ; et ou cas desranier, ne doit l’en rien à mon heir, ton heir me devra.

§ {18.6.9} Gaius. Si post.

Se li arbre sont tunbé à terre par force de vent avant ce que la teneure a esté monstree, l’en demande s’il doivent estre à l’acheteor. Et ce demande l’en, et l’en dit que non, car le acheteor nes acheta mie, car il n’estoient de la teneure quant li achat fut fet. Et se li acheteor ne sot pas que li arbre fussoint jus, et le vendeor le sot ne n’en dit rien, il amendra à l’acheteor por tant comme il n’on vossit.

§ {18.6.10} Ulpianus. Si in.

S’i fust mis en la convenance qui fust fete en condicion que la chose fust gardee au peril à l’acheteor, je cuit que li marchiez doit valoir. {1} Par la sentence Julien, Scevola note que l’acheteor ne po rien demander de la teneure comme une partie de la teneure soit niee par sorondemant de eve ou par deluige ou par aucunne autre aventure.

§ {18.6.11} Alphenus.

Se une meson qui estoit arse fust [83rA] rendue, comme tel chose ne soit pas fete sanz colpe, l’en demande qu’an dit droiz. Je di que ce pot estre fet sanz colpe, car se ce avient par la negligence au serf mavois, li sires est en colpe. Et por ce, se le seignor eust mis diligence en la meson garder, autel comme bon home doit doner, se aucunne chose avint, il n’est pas tenuz.

§ {18.6.12} Paulus. Lectos.

Li sires des maisons depeça liz achatez qui estoient mis en la voie commune ; s’il furent baillié à l’achateor, ou par li failli que il ne furent baillié, acordé est que le peril en soit sun.

§ {18.6.13} Julianus. Cum.

Et il a auction contre le metre des mesons por la loi Aquiliene s’il n’ot droit de fere le domage que il fist encontre le vendeor d’achat ; que cil li doint ses auctions que il eust contre le seignor des mesons.

§ {18.6.14} Paulus. Quod si neque.

Et s’il ne furent baillie à l’acheteor ne en lui ne failli que il ne le receust, le peril sera au vendeor. ¶ {1} Se ma terre qui estoit achetee est enblee, se ele fust baillie, le peril est à l’acheteor ; si non, il est au vendeor. Et ausi le trés que li acheteor avoit seeloés avant et seigniés.

§ {18.6.16} Labeo. Servi.

Cil qui acheta le serf, s’il ne rendi l’argent mointenant, il ne porra rien conquerere par celi serf ; car l’achat n’est mie fet puis que il est retenu por le loage de par le vendeor. Le peril dou serf apartient à l’acheteor ensint que le vendeor n’i eist fet barat.

§ {18.6.17} Ponponius. Cum mora.

L’en doit savoir que quant l’en demore à avoir sa chose, il doit garder que il n’i eist ne colpe ne barat cil qui vent. Et se li un et li autre demorent, Labeo dit que ce puet plus nuire à l’acheteor que au vendeor ; mes l’en doit veoir que la demore desreniere ne li face domage. Et que sera se je demande au vendeor et il vent ce que je avoie acheté et enprés il offre le pris et je ne voil recevoir ? Certes, ce me doit nuire. Et se la demore vint por l’acheteor, et enprés comme il n’i eust encore rien osté le vendeor demora quant il pot la chose bail[83rB]ler, droiz est que cele demore doit nuire au vendeor.

§ {18.6.18} Papinianus. Habitacionum.

Quant les redevances des mesons sont fenies par mort de hers, li acheteor de la meson ne sera pas tenuz au vendeor por cele cause s’il n’i a autre convenance, fors que l’en baillast les mesons sor le pris de la franchise segont la volenté au mort.

§ {18.6.19} Hermogenes. Venditori.

Se l’acheteor demore à rendre le pris au vendeor, il en rendra l’usure et non pas tot ce que le vendeor pot avoir por la demore ; ausi comme s’il fust marcheant, et il pot gaigner plus en sa mercerie plus que en usure.


1 s’est] sont dans le ms.