IV. [83vA] Ci commence de aucion d’achat et de vente [rubr.]

Se la chose qui est vendue n’est baillie, l’en avra auction de domage que l’en i a ; et ce domage monte plus aucunne foiz que la vençon. ¶ {1} Et se le vendeor cela le servage qui estoit deu, l’en avra contre lui aucion d’achat se le acheteor n’en sot rien ; car tot ce que l’en fet contre bone fois vient en aucion d’achat. Et nos entendon que le acheteor dest au vendeor dire tot, et s’i cele, non pas solement s’il ne amonesta, mes encor s’il nia que celui servise ne fust deu quant l’en li demanda. ¶ Et se il li est tenuz, nos dison que il dit issi : que il n’i a point de servise et se aucun servise vient avant, je ne sui pas tenu. Je cuit que cil a aucion d’achat, car le servise estoit deu s’il le savoit. Et s’il nie et le acheteor no sot pas que l’en deust aucun servise, je cuit que il est tenuz d’achat. Et que je die en generau s’il se moine en mauvese maniere de celer le servise : il en est tenuz s’il ne se vost garder. Et ce est voir se le acheteor n’en sot rien ; car ce ne est pas celé ce1 qui est seu, ne cil ne dut pas estre acertené qui bien le savoit.

Se mesure est dite en l’achat et ele n’est baillie, l’en a aucion d’achat. {1} L’en ne entent pas que possession soit baillie voide à l’achateor se un autre est mis leanz por cause de garder lés et les autres choses, et que le creacier porsient les biens. Et ausi doit l’en dire se li un ne li autre n’est en possession ; car issi entant [83vB] l’en que la possession est voide.

Se tu me venz un serf qui est lierre ou mauvés et je n’en soi rien, tot le me amendes tu au doble, tu m’es tenuz de l’achat por tant comme je no vosisse que il ne fust seu ; car je ne puis pledier o toi de la promesse en celui non que il i eist aucunne faute de la poie. ¶ {1} Se l’en trove greignor mesure en champ, ¶ li auctor est obligié segont le numbre des jornex, car la où l’en trove greignor numbre l’en ne puet esmer la bonté dou leu qui ne apert mie ; et non pas solement se tote la mesure est plus grant mes de parties, ausi comme se l’en dit que il i a cent jornex de vigne ou de alviei et l’en i trove mois. ¶ Et en ce quas fera l’en l’esme dou leu por sa bonté.

Se ge te baille un champ franc et je le te devoie baillier a servitute, l’en a ci aucion de chose qui n’est pas certoine que tu soffres metre la servitute qui dust estre mise. ¶ {1} Et se ge baille un champ serf que je te dui baillier franc, tu avras aucion d’achat por la grace de relachier l’achat que tu ne devoies pas.

Se aucun achete pierres de un champ et il ne les veaut oster, l’en a contre lui aucion que il les oste.

Se je achete le giez de la roiz et le pecheor ne veaut giter, l’en doit ce esmer non pas certoinement. Et s’il tret aucun poisson et il ne le veaut rendre, il convient que ce soit prisé que il a tret en la teneure.

Rien n’est de la teneure fors ce qui s’entretant. Et maintes choses sunt de maisons qui ne sont pas de mesons, et l’en le doit bien savoir, si comme serreures, clos et cles. ¶ Et les caves qui sont fetes ne sunt pas de la teneure ne de la meson, comme vaissiaus à vin pressors, car ce sont estrumenz, tot soint joint à l’edefice. {1} Et li vin et li fruiz ne sont pas de la meson. ¶ {2} Se la teneure est lessie ou vendue, le fumer ou l’estrein sont à l’acheteor ou à celui à cui l’en fet le lés. Et les fuz sont au vendeor ou à son heir, car il ne sont pas de la teneure, tot eient il ce vendu. Et il a difference en femier, car s’il fust acheté por [84rA] femer le champ, l’acheteor l’avra ; se non, il est au vendeor, s’il n’i a autre convenance. Ne n’i a point de difference se li fiens est en l’estable ou en la cort en un moncel. {3} Et s’il i a point de chamberil et pierres de marbre, il sont de la meson. {4} Et ce qui se tient à soliviaus et ce qui se tient à mesieres et les cortines ne sont pas de la meson. {5} Et ce qu’est apareillié por la meson s’il n’est perfet tot soit il mis en l’edefice, il n’est pas de mesons.

Li granier qui solent estre fez des tables sont des mesons se l’estape d’aus est foie en terre ; et s’il sont hors de la terre, il n’en sont pas. {1} Et les tueles qui ne sont pas mises en l’edefice, tot soent eles aportees por covrir la mesons, ne sont pas des mesons. Autre chose est des choses qui sont ostees por remetre ariere, car celes sont des mesons.

Li encien useent de non de ventes et de achaz pelle melle.

Ausi est en loage et en aloage.

Se aucun vendi une teneure et dist que cent toneaus apartienent à cele teneure, il devra les toneaus à l’acheteor tot n’en i eust il nul.

Quanque le vendeor dit que apartient à la vençon, ce convient que il rende et sein et entier ; ausi comme s’il dist que toneaus apartienent à la vençon, il est tenuz de baillier les seins et enteres.

Cil à cui la chose fut lessee soz condicion, l’acheta de l’eir comme fos ; il porra avoir par bone auction ce que il a rendu, car il n’a pas la chose par cause de lés.

Ausi comme il est droiz que ausi comme l’acheor achete en bone foi que autrui barat ne li nuise, ausi n’est ce pas droiz que li barat au vendeor li nuise.

Je demande, se aucun vent issi un champ, que ce soit veü vendu que il i a dedanz les bones, et set bien que il n’en tient pas aucunne partie, ne il ne le fist savoir l’acheteor, l’en demande s’il est tenuz d’auction d’achat. Comme ceste decision2 generau ne doie pas apartenir à ce que cil sot especiaument qui vendi, ne ne la mist hors, que l’acheteor ne soit issi deceu [84rB] ; car s’i l’eust seu par aventure il n’eust pas acheté, ou par avainture il l’eut eu por moins s’il fust certain dou leu. ¶ Et issi le distrent li encien en cele persone qui issi avoit mis hors : ¶ se il i a servage deu, il sera deu. Issi distrent cil qui establirent droit : ¶ se le vendeor fut certain que l’en deust certain servage à aucunne gent, ne il ne le dist à l’acheteor, il est tenuz de l’achat ; quant ceste barre generau ne doit pas apartenir as choses que le vendeor sot, que il pot mestre hors espaciaument et dut, mes à ce que il ne sot mie et dont il ne pot acertener l’acheteor. Modestinus dit que se le vendeor fist ce par conchier l’acheteor en la meniere dont est le plet, il puet estre trez en plet par auction d’achat.

Se aucun veut autrui chose et est certain que il est heir au seignor de la chose, il sera forcié d’acomplir la vençon.