V. De loage et de aloemanz [rubr.]

Loage et aloemant, tot soit naturel et entres totes genz, est fet non pas par paroles mes par consentement, ausi comme achat et vençon.

Loage et aloemant est prochein à achat et à vençon et c’est en relles de droit ; car ausi comme achat et vençon est fet se l’en siet le pris, ausi loage1 et aloage sont entendu se le loier i est entendu. {1} Et est ausi comme une chose jointe à achat et à vente, loage et aloage est ausi, comme l’en selt demander en aucunnes choses savoir se c’est achat ou vençon ou loage ou aloemant. Ausi comme se je fis marchié o l’orfevre que il me feist aniaux de son or à certain pois et de certoine forme, si comme .ccc., l’en demande se c’est achat ou vençon ou loage ou aloage. Mes acordé est que c’est un afere, et que c’est acordé que c’est achat et vençon. Et se je e doné or et le loier est apareillié, n’est pas dotance que ce ne soit loage et aloemant.

Se une teneure est aloee et le gaegneor [84vA] prent l’antrumant esmé, Proculus dist que le gaenigneor doit avoir l’estrumant por achat, ausi comme il avendroit se aucunne chose esmee est donee en doerre.

Ansi demande l’en se le charetier, quant il ne lesse passer la gent, vers sa cherrete et ocit un serf. Je cuit que l’en a contre lui aucion de loage, car il doit atrenper son hernois ; et avra l’en contre lui aucion de la loi Aquiliene. ¶ {2} Se li mestres de la nef mest la nef sanz governeor en l’eve et tempeste lieve et il ne la pot atrenper et il pert la nief, li seignor avront contre lui aucion de loage. ¶ {3} Se aucun prent un enfant à aprendre et il le moine hors do païs et il est pris de guerre ou il perist, l’en a contre lui aucion de loage s’il ne fut mis en convent que il fust mené hors do païs. ¶ {4} Si le suor fiert si belement à la forme do soler le garçon que il aprent que il li tret l’oil, le pere a contre lui aucion de loage tot eit l’en ostroié à metre legier chastiement, totesvoies ne dut pas cil avoir ce fet. Et le pere n’a pas contre aucion de la loi Aquiliene, car il ne fist pas ce por nuire que por commander au garçon. ¶ {5} Se une pierre preciose est baillie à mestre en or ou a entaillier et el e froisse, se aucunne chose de ce est fete par le vice de la matiere, l’en n’avra pas auction de loage. Et se c’est por la niceté au menestrel, l’en doit ce garder se le mestre prist le peril sor soi ; ¶ et lors, se ce avient par le vice de la matire, l’en avra aucion de loage. ¶ {6} Se le folon prent dras à polir et soriz le pertuisent, il est tenuz de loage, car il se dut bien garder. Et se le folon change la robe et il la baille à un autre, il est tenuz de auction de loage, tot ne l’oit il fest à escient. ¶ {7} Cil qui avoit aloé la meson s’en issi quant li ost2 vint ; cil enporterent de celi ostel fenestres et autres choses ; s’il ne fist savoir au seignor son issir, il est tenuz de loage. Labeo dit : s’i la pot defendre et ne la deffant, il est tenuz, et c’est veroie sentence ; et s’il ne le pot fere savoir, je cuit [84vB] que il n’en est pas tenuz.

S’il est mis en convent do loage que l’ovre soit prisee à la volenté au seigneor, ausi est comme se ce fust mis en la gart de prodome.

Cil qui avoit aloé une meson .xxx. solz il aloa chescunne chambre issi que l’en eust .xl. solz de tot ; li sires de la meson, por ce que il disoit que il i avoit maumeteure, la depeça. L’en demanda combien ce plet devoit estre esmé se cil qui tote l’aloa pleda de loage. Je di, si com vint à besoing que il abatist l’edefice, qui estoit mauvés, l’en en dut metre hors do loage de tant de tens comme li arbitreor n’i porent demorer ne habiter, et itant esmer le plet. Et s’i ne fut nul besoing d’abatre la meson, por ce que il voloit fere meillor edefice, il convient que il rende à l’oste por tant comme il ne vosist estre issu de la meson.

Cil qui avoit loé la teneure à lonc tens morit et lessa cele teneure ; Cassius dist que l’en ne puet forcier le coitiveor que il foist cele teneure, car il n’avoit que fere de l’eir. Et se le gagneor velt fere la teneure, et cil à cui l’en lessa la teneure li deffendi que il ne la feit, li gagneor a aucion contre l’eir et le perill apartient à l’eir ; ausi comme se aucun vendi la chose ne n’en sesi l’acheteor et le eust lessié, sis heirs est obligié à l’acheteor et à celui à qui l’en fist le lés.

Cil qui loa ses besoignes doit avoir le loer de tot le tens s’il ne failli en lui que les ovres ne fusent fetes. {1} Li avocat, s’il faut par aus que il ne deffendent la cause, il n’avront pas lor loer.

Se je te loe une meson et mi serf t’i font domage et larrecin, je ne te sui pas tenuz de loage mes de aucion de forfet. ¶ {1} Se je loe un home por avoir l’en en ta taverne, et il te fet larrecin, l’en porra de tot savoir se aucion de loage sofist, comme ce soit hors de bone foi que tu soffres domage en ce que tu as loé, ou se l’en doit dire que cause de crime de larrecin est hors de larrecin et que ce soit une cause por soi ; et l’en dist que ce ‹est› qui plus vaut. ¶

{2} Cil qui lessent avant que il fust tens sanz droite cause contre la conveneue sont tenu de rendre tot le loage et tot le domage que li sires ne vosist.

Lucianus aloa une meson à don Julien qui avoit [85rA] non Flacus, et quant l’ovre fut fete en partie, trelle de terre abati l’edefice. Massius dist que le peril doit estre Flacus se la trelle avint par nature.