VII. De change de choses [rubr.]

Ceste aucion est profitable, tot i eit il loer.

Car un est vendeor autre acheteor, ¶ et ausi est pris1 [85vA] une chose et merz autre chose. Et quant la chose est changie, l’en ne set le quel est acheteor ne le quel est vendeor. Et moult i a grant difference. ¶ Car l’acheteor s’il ne baille le pris au vendeor est tenuz de la vente ; et le vendeor est tenuz de la chose delivrer et de baller la possession et que il n’i face tricherie, et se la chose est tolue il ne doit rien. Et s’il a pris ou change de ça et de la, la chose doit estre à l’un et à l’autre ; s’il i a merz, n’a l’un n’a l’autre. ¶ Mes quant il doit avoir et merz et pris, l’en ne pot savoir le quel est merz ne le quel est pris, ne reson ne s’ofre mie que une moine chose soit rendue et soit pris d’achat. {1} Donc se cele chose que j’é prise, piece à m’est tolue, je avroi aucion de fet. ¶ {2} Achat et vençon est fet por la volenté2 à cez qui s’i acordent ; et change done commandemant à obligacion quant la chose est baillie par dehors. ¶ Et se la chose n’est baillie, nos dison que l’obligacion sera fete par nu consentement ; et c’est issi establi que chescunne aucion eist son non, si comme en achat, en vençon, en aloage, en mandemant. ¶ {3} Pedius dist que cil qui baille autrui chose ne fet nul change. {4} Et d’autre part, se la chose est baillie, se l’un ne velt baller les choses, nos ne plederon pas do domage de ce que nos ne poon avoir la chose dont est la convenance, mes nos poon demander la chose que el nos soit rendue, ausi comme se la besoigne ne fut mie.