III. Comment l'en puet vendre teneures.

§ 1.

Home puet vendre son héritage por son besoing, non por son preu ; et se il n'a besoing, ou se l'en siet apertement qu'il le face por son lignage désériter, non. Et se il a feme, si poent-il vandre ensemble. Et puet li sires vendre sanz la feme ? Nenil, que la chose dure que sa vie, et enprès sa mort non.

§ 2.

Li doeres ne puet estre encombriez, ne l'éritages à la feme, ne sa part des conquez, s'ele ne l'otroie. Et s'ele le otroie, li hons puet vendre et se conquez, se il a enfanz de li, et por son besoing.

Et fame ne puet vendre son héritage enprès la mort son seignor, s'ele a anfanz del seignor, sanz besoing nécessère ; et s'ele n'a enfanz, ele puet vendre.

§ 3.

Home puet vendre son héritage por son besoing emprès la mort sa feme, s'il a anfanz, sauf doere. Et se il doit, puet-il vandre son héritage ? [p. 170] Oïl, se li héritages n'est sésiz avant. Nus ne puet vendre chose porquoi ele soit liée.

Home et sa feme puent vendre ce qu'il ont ensemble, aient enfanz ou non, por besoing. Nus héritages n'est encombrez de fet, se l'en n'est dampnez avant par juigement.

§ 4.

Home garantira sa vie ce que il vendra de l'éritage sa feme, sanz l'otroi sa feme ; et se il muert ou se la feme muert, la vente ne vaut riens.

§ 5.

En l'an de l'incarnacion mille et deux cents et cinquante et neuf, ou mois de septembre, juja li rois Loïs et son consoil, por estoper l'usure as mauvès créanciers, que la dame de Chevri, ne ses sires ne vandroient point de lor héritage por lor dete ; ainz seroit la terre laborée et gaagnie en sauve main, et totes les issues seroient baillies as détors en esquit.