École des chartes » ELEC » CI COMMANCE LI HUITIESME LIVRES » VIII. De paroles porparlies et de aucion de fet [rubr.]

VIII. De paroles porparlies et de aucion de fet [rubr.]

  • Traduit du Dig., liv. 19, tit. 5 : de Prœscriptis verbis et in factum actionibus.

§ {19.5.1} Papinianus. Nonnunquam.

Aucunne foiz avient que quant jugemenz et aucions communes fallent et quant nos ne poon trover propre non à l’aucion, nos descendons à celes aucions que l’en apele « aucion de fet » ; et ge en mostreroi à cortes paroles exemple. ¶ {1} L’en donra aucion de cité contre le metre de la nef au seignor de la mercerie se l’en ne set s’il a aloé la nef ou sa mercerie porter. ¶ {2} Et se aucun balle aucunne chose por fere savoir que ele vaut, ce ne sera ne prest ne chose baillie a garder, ainz avra l’en aucion de [85vB] fet se l’en i fet desloiauté.

§ {19.5.2} Celsus. Nam cum.

Car quant us1 et usages faillent, l’en avra ceste auction.

§ {19.5.3} Julianus. In quam.

Il convient quant l’en trove nos que l’en i puisse mestre par droit de cité.

§ {19.5.4} Ulpianus. Natura.

Car nature s’acorde à ce que plus sont besoignes que noz.

§ {19.5.5} Paulus. Naturalis.

Mis fiz de une meschine te servoit et le tuen moi ; nos nos acordames que tu franchisses le mien et je le tien ; je fis tu, ne feis pas. ¶ L’en demande quele aucion g’e contre toi. L’en resgarde en cete question por la chose don l’en parle, ce que apartient à cez apeces en tel forme : je done que tu me donges, ou ge done que tu faces, ou ge faz que tu donges, ou ge faz que tu faces. ¶ Et en ce demande l’en quele aucion en pot venir. {1} Car se ge done peccune por avoir une chose, c’est achat et vençon. ¶ Et se ge done une chose por autre avoir, ce n’est mie change ne achat, ¶ ainz est aucion de cité. Et ce avient en ceste aucion, que tu ne rendes pas ce que tu as receu, ainz seras condempnez à moi por tant comme je no vossisse que je n’eusse la chose ; ou se ge voil, ge avré ce que j’é baillé, ausi comme se la chose ne fut fete. ¶ Et se ge te donoi hennas por avoir Tebert, il sera à mon peril, et tu doiz garder que n’i ees colpes. ¶ Or est debatre cest article « je done que tu me donges ». ¶ {2} Et quant « je done que tu me faces », se le fet est tel que l’en selt à loer, ausi comme tu talces por poindre une table, se ge te baille l’argent, ce sera loage, ausi comme achat est en cas desus. ¶ S’il n’i a rien baillié, ne ce n’est mie loage, mes ce sera aucion de cité por tant comme je no vossisse et la puis demander. ¶ Et se le fet est tel que l’en ne puisse aloer, ausi comme se tu fez marchié que tu franchisesses un serf, s’il i a certain tens dedenz quant il soit franchi et li tens passe au vivent au serf, ou se le tens n’est passé et tot li tens passe où il pot et dut estre franchi, l’en li pot demander ou avoir contre lui ceste aucion ; et ce avient à ce que nos dison desus. ¶ Se je te donoi un serf por franchir le tuen [86rA] et tu le franchis, et celui que je te donoi est toluz, se je le donoi par barat, por barat tu as aucion contre moi de fet, comme Julien dit. Se tu n’en seus rien, aucion de cité t’avient. ¶ {3} Et se ge faz que tu me doignes et tu ne fez rien enprés ce que j’é fet, l’en n’avra pas aucion de cité mes de barat. ¶ {4} Et se ge te faz que tu faces, ceste maniere de parole regarde plusors marchiez ; car se nos avon mis en convent que tu demandes ma dete à Maroc et g’é la toe à Rome, ou ge face edefice en ta terre et tu en la moie et tu n’en fez rien, li aferes remaint si comme devant, sanz que la peccune ne pot estre demandee en autrui non. Et ge soit ce que il eit despens, nostre office est et de ça et de la, et pot nature passer le mandemant de convenir. Je te puis mander que tu me faces garde et que tu ne despens au demander que .x. sous ; et se tu despens autant, n’est nule dotance que tu n’eies auction. Et s’il le fet autrement, que l’en voie que ciert mandemant, ausi comme se nos rendon despens de ça et de la, je ne te mande pas de ta chose. Mes ce sera plus segure chose que l’en ait ceste aucion en fere mesons et en demander detes ; et ceste aucion est senblable à aucion de mandemant, ausi en quas qui sont desus en loage et en achat. ¶ {5} Et s’il est issi acordé que li un et li autre face, ausi pot l’en dire en cete question, et à force convient que cil soit condempné à moi por tant comme je no vossisse avoir le serf que j’é franchi. Et l’en dote se l’en metra hors ce que g’ei un franchi ? Mes l’en ne pot ce esmer.

§ {19.5.6} Neracius. Insula.

Ge vendi une meson par si que tu en feisses une autre ; je di que c’est nule vençon, mes l’en a aucion de chose qui n’est mie certaine.

§ {19.5.13} Ulpianus. Si tibi.

Si ge te baille la chose à vendre por certain pris, et ce que en peusses plus avoir tuen fut, acordé est que il n’i a auction ne de mandemant ne de compoignie mes de fet, ausi comme de autrui afere fet ; car mandemanz devent estre fez por neient, et il est veü que compoignie n’est pas fete o celi qui ne te reçut pas en compoignie de vendre la chose s’il mest hors cer[86rB]tain pris.

§ {19.5.15} Ponponius. Qui.

Cil qui sorent les fuitis sers estre en aucun leu celez, les solent descovrir au seignors, et ce n’est pas larrecin, ainz en solent avoir loer por dire lo ; ¶ et bien l’en poent prendre, car il i a bone cause, et bien l’en pot demander. Et s’il n’i a rendu rien, mes la convenance fut fete por le serf enseigner et que le serf fut pris, veon s’il pot demander le loer. Et ce convent n’est pas nuz, que aucun ne die pas que ceste aucion ne nesse pas dou convenant, ainz en soi a aucunne afere ; et donc en pot estre ceste aucion, s’il n’i a aucion de barat quant aucun en est repris.

§ {19.5.22} Gaius. Si tibi.

Se je te baille robe à polir ou à costre, se tu prenz cele besoingne por neant il i a obligacion de mandemant ; et s’il i a loer, il i a aucion de loage ; et se tu n’as cele besoigne por neient et le loer n’est pas mis demanois mes en tel pensé le prist à fere que il eust son loer enprés tant comme il seroit à nos .ii., il plest que ceste aucion eist leu. ¶

§ {19.5.23} Alpheis.

.ii. bachelers aloient sor Loire, l’un d’aus qui aloit o l’autre pria l’autre que il li monstrat un anel por voier, li anel li cheist en l’eve ; je di que l’en a aucion contre li de fet.

§ {19.5.26} Si tibi.

Se je te baille hennas por si que tu les me redesses, j’é aucion de prest. Et se ge te prestoi issi un pois d’argent que tu m’en rendisses autretant, j’ei ceste aucion d’avoir ausi bon argent comme cil hennas furent. Et s’il fut en convent que tu me donasses cez henas ou autretant de pois d’argent, ausi en pot l’en dire.


1 us] usez es dans le ms., leçon inchoèrente, cf. lat. nam cum deficiant vulgaria atque usitata actionum nomina