I. De mal renomez.

§ 1.

Les paroles Johan de Beaumont sunt teles : Cil est mau renomez, qui por aucune mauvestié s'en vint de l'ost le roi ; et li bordeler, et li larron, et li toleor et li tricheor ; et cil qui ovrent de bosdie ; et cil qui ovrent mauvèsement de bal ; et fame qui prent home que si sires het de mort, segont droit1. Ballif qui fet tort apensèement, et qui prent loer por droit fere, et ballif qui est hors de ballie par son forfet ; cil qui ovre de son privilége fausement ; chevalers qui est désordenez, avostres et avotresse ; truanz ; travalleors de genz à tort ; cil qui traït celui à cui il doit aider. Omecide, traïtor, murtrier, aforceor de femes ; qui tout membre, qui fet sanc et chaable ; procurator, curator, tutor, avoquaz, si ne font en la chose ce qu'il devent, sont mau renomé. Cil qui demende chose que il ne doit mie, parjur, foi-mentie, et cil qui prent feme marié par tricherie, ou fiz qui est ou poer son père, et se marie sanz son congié2 ; cil qui prent la feme à autre, arbitre qui prent loer. Cele est mau renomée, qui fet son mari de celi qui ne l'est pas. Qui decet guig (juige) est mau renomez ; faus tesmoins est mau renomez.